ما تجيبش لقلبي سيرة

[علاء طه ياسين]

ما تجيبش لقلبي سيرة ..... عن حب وعن حنان
كفاياه القـلب حيرة ...... وكفاية كان وكان
دي الأحزان الكتيرة ....... خلتني أكره زمان

طالت ليالية جنـبك .... ف الشك وف الدموع
مهما يندهني قلبك .... دلوقتي مفيش رجوع
من بعد ما صنت حبك .... وانت طفيت الشموع
بتقول دلوقتي نرجع .... ونعيش تاني ف أمان
ما تجيبش لقلبي سيرة ..... عن حب وعن حنان

آدي القلب اللي شالك ..... مش راضي بجد يفـرح
وإنت اللي مجاش ف بالك ...... غير بس تخون وتجـرح
مالك دلوقتي مالـك ..... بتجيني ف كل مطـرح
يا حبيب قلبي ياغالي ..... خلاص فات الأوان
ما تجيبش لقبي سـيرة ..... عن حب وعن حنان

جرب تقعد دقايق ..... تفكر ف اللي عدى
اللي أصبح يضايق ..... وف أحلام المودة
وان سالت دمعة منك ...... امسحها في المخدة
أنا ياما بطرف ايدي ...... مسحت دموع زمان
ما تجيبش لقبي سـيرة ..... عن حب وعن حنان

ما تجيبش لقلبي سـيرة ..... عن حب وعن حنان
كفاياه القـلب حيرة ...... وكفاية كان وكان
دي الأحزان الكتيرة ...... خلتني أكره زمان

[NAHID 76]

بسم الله الرحمن الرحيم
الشاعر علاء
هو ده طبع الزمان لما يكون الشيئ فى يدك لا نشعر به ولما يغيب نبحث عنه مش عارفين أن الاوان فات والزمن بنى جدار عالى يكبر مع الايام
هى الناس مابتكنش فاهمه
والا على رأى أم كلثوم
هو حنانى عليك أساك حتى علي
والا تسامح روحى معاك غرك في

تحياتى

[علاء طه ياسين]

السيدة الفاضلة
مدام ناهد
فات الأوان والزمن .. بني جدار عالي .. وماتت الأحلام
وكل شيء له تمن ... حتي اللي كان غالي ... بترخصه الأيام
فعلا
سلمت يداكي .. وسلمت أفكارك
ويسلم مروك الرائع
علاء

[سعدالشرقاوى]

عاتب عليك يازمن يامبهدل الغالى
سوّقته من غير تمن بالبخس طوّالى
ولمّا عاز السّكن سلـّمتله البدروم
والندل عند اللزوم سكـّنته فى العالى
انا جاى أصالحك ونفسى تنعدل مرّه
لو حجّتك فى البلد آهى أصبحت حرّة
ياريت تراجع حسابك واللىّ صار منـّك
وعشمى انـّك هاتصفى وينعدل حالى
,,,,,,,,
يابو الكلام ع الكيف
قول وسمّعنا
ياللى كلامك حكم
بالطعم والمعنى
الله عليك يابو ياسين
الله ينور عليك

[ليلى ابو مدين]

ما تجيبش لقلبي سـيرة ..... عن حب وعن حنان
كفاياه القـلب حيرة ...... وكفاية كان وكان
دي الأحزان الكتيرة ...... خلتني أكره زمان


شاعرنا الكبير الأستاذ /علاء طه ياسين
الله الله على حلو الكلام .....غنائيتك يا شاعرنا ذكرتني بأغنية العظيمة أم كلثوم {فات الميعاد}
وعايزنا نرجع زي زمــــــان
قول للزمان إرجع يا زمـــان
وهاتلي قلب لا داب ولا حب
ولا إنجرح ولا شاف حرمان
وطبعاً لا الزمان بيرجع ولا الماضي بيعود والقلب المجروح لا تُشفى جراحه مهما طالت الأيام
وهذا هو طبع الزمان مالوش آمان.
كلمات غنائيتك جميلة معبرة سلسة سهلة على الأذن عميقة الأثر والتأثير تدخل الى القلب بدون إنذار
ياريت أحد مطربينا في المنتدى يقوم بغناءها.....خسارة أن تُترك هي وغنائيتك الأخرى[هاقيد شمعك بإحساسي}.
سلمت وسلمت يدك على ما نظمت لنا من شعر سلس بديع
دمت بخير وسعادة
ليلى ابو مدين

[علاء طه ياسين]

توأم روحي
سعد الشرقاوي

عجبي عليك يا زمن .. واللهْ العجب ياما
واللي يطاوع العجب .. هيعيش في دوامة

خد حتة من عجبي

عجبي علي اللي يطلع ... في الأمارة عيوب (الأمارة = الناس الكويسين)
ويبقا بيته إزاز ... ويحدفك بالطوب

و........

يابو الكلام ع الكيف ... الحب جمعنا ..
هات الشتا في الصيف ... وقول وسمعنا ...

تحياتي ياخال

[علاء طه ياسين]

أختي الفاضلة
ليلي أبو مدين

شكراااااااااااااااااا ..
أسعدني مرورك العذب المتألق ..
وردك الجميل بجمال روحك ..
الله يخليكي يارب ..
شكراااااااااا ..

من صفصافة ف شط النيل لمِّيت أوراق ..
ضفرتها بالعطر الشارد من شوق العشاق ..
وغزلتها حلقان وعقود وتيجان وأساور ..
فجأة لقيت عصفورة جميلة جاية تشاور ..
وتزقزق وتروح وتطير وتعافر ..
طب فيه ايه .. قالت دولا لليلي هدية ..
قولت خلاص .. زي ما ربنا شاء ..

اقبلي مني التحيات والحروف ..
لا حرمنا الله منك .. ولا من تشجيعك وثنائك العذب الراقي ..
وسعيد أنا جدا بتشجيعك
شكراااااااااا ..

[عفاف سليمان]

اخى الكريم
:emrose:أ. علاء:emrose:
كلام جميل ومتلحن
وحشنا كتير
تقول احسن
غنى ومواويل
من غير لحن
تتلحن
اغانى كلماتها اصيله
احساس له معانى جميله
ساعات تبقى لفراق
وساعات تبقى حيره
وساعات تبقى الفرحه
فى قلبك غنوة شوق كبيره
لا حرمنا الله منك
ولا من غناويك الجميله
اخى الكريم
أ. علاء:emrose:
اهلا بعودتك وعودة الاغانى
والكلمات الجميله التى
اصبحنا نفتقد
لها فى زمن
الكلمتين وبس
وبيتغنوا
ونسمعهم من ناس قال
ايه مطربين
وفى ثوانى وفى غمضة عين:mad:
تلاقى الكلام اتنسى
واللحن والمطربين
تحياتى لقلمك
واحساسك الراقى
اختك عفاف

[الشاعر]

حلوة يا استاذ علاء وبعد اذنك ماتجبش لحد سيرة اغنية بجد جميلة مع انها خلصت بسرعة وكان نفسى تكون طويلة