شاديه

[اماني العالم]

بسم الله نبدأ فى تحليل أغنية ( على عش الحب )

كلمات : مرسى جميل عزيز

ألحان : منير مراد

كلمات الأغنية

على عش الحب وطير ياحمام .. قول للأحلام أنا جاية قوام

وخطيبى حبيبى معايا .. بشويش بيقول ويايا

عارفين سكتنا سوا .. وحانوصل بيتنا سوا

وننام ونقوم ونقوم .. وننام على حب فى حب

***

ياحمام يابو جناح وردى .. على عش الحب وهدى

وإفرش لنا فرحة كبيرة .. على قد حبيبى وقدى

والشوق وحبيبى وأنا .. الليلة معادنا هنا

نقسم فرحتنا سوا .. ونقضى حياتنا سوا

وننام ونقوم ونقوم .. وننام على حب فى حب

***

ياللى بأحلامى ناديتلك .. وف ليل الشوق غنيتلك

ياأحلى مكان فى الدنيا .. أنا جيت لحبيبى وجيتلك

والشوق وحبيبى وأنا .. الليلة معادنا هنا

نسمع ضحكتنا سوا .. ونشوف حلاوتنا سوا

وننام ونقوم ونقوم .. وننام على حب فى حب

***

م الليلة خلاص ياحبيبى .. أنا وإنت حانصبح عيلة

م الليلة حاتبقى نصيبى .. ودى ليلة العمر الليلة

والشوق وحبيبى وأنا .. الليلة معادنا هنا

وتطول سهرتنا سوا .. ونقول حواديتنا سوا

وننام ونقوم ونقوم .. وننام على حب فى حب

عمنا مرسى جميل عزيز ( صاحب الألف أغنية ) .. وربما أكثر .. شاعر ذو حس

مرهف .. كلما صادفت أغنية رومانسية شاعرية ستعرف بالتأكيد أنها لمرسى جميل عزيز ..

الكلمات واضحة جداً .. القصة توضح نفسها ..

عروسة تغنى لعريسها وهم فى الطريق للبيت السعيد ( بيت العدل ) ..

تعلن له فرحتها به وتؤكد له أنها ستكون أسعد زوجة وهى معه ..

نأتى الأن للحن .. وياله من لحن .. وضعه المبدع منير مراد ..

إختار منير مراد مقام النهاوند ليبدأ به لحنه .. النهاوند مقام جميل ومرح ومنطلق وشجى فى نفس الوقت ..

وهو نفسه سلم دو الصغير فى الموسيقى الغربية ( المينور )

تبدأ اللازمة الموسيقية بتريللات من القانون بكامل سلم المقام ( هبوطاً ) ليسلم الوتريات مع دخول الإيقاع ..

وإيقاعنا اليوم هو إيقاع المقسوم .. وسنجد ألة ( الرق ) مسيطرة على الإيقاع ..

سنسمع فى هذه اللازمة .. تحاورات جميلة من ألة الأكورديون والجيتار مع الوتريات ..

الأكورديون يعزف أكوردات .. أى نغمات ثلاثية وترد عليه الوتريات .. ثم يدخل الجيتار ليعزف جملة لترد عليه أيضاً الوتريات ..

وتتسلم شادية الدفة .. لتغنى المذهب ( على عش الحب وطير ياحمام ) .. من نفس المقام .. ونظل مع النهاوند بتفريعاته لنهاية المذهب ..

نفس اللازمة الموسيقية مع التسليم على الدرجة الخامسة من النهاوند .. لنصل إلى مقام الكرد .. وهو مقام ملاصق للنهاوند ..

وتغنى شادية ( ياحمام يابو جناح وردى ) من الكرد .. وتظل معه حتى تعود للنهاوند عند ( نقسم فرحتنا سوا .. ونقضى حياتنا سوا ) ..

نفس اللازمة الموسيقية مع التسليم لمقام البياتى .. وسبق أن ذكرنا أن البياتى مقام شرقى طربى جميل ..

لتغنى شادية ( ياللى بأحلامى ناديتلك ) .. من البياتى حتى تعود للنهاوند مرة أخرى عند ( والشوق وحبيبى وأنا .. الليلة معادنا هنا ) ..

نفس اللازمة الموسيقية مع التسليم لمقام الحجاز .. وهو مقام شرقى أيضاً ..

وتغنى شادية هذا الكوبليه من الحجاز مع لمس درجة السيكا .. لزيادة التأثير وتعميق الإحساس بالحجاز .. حيث أنه إمتداد طبيعى لمقام ( الهزام ) وهو من فصيلة السيكا ..

وتعود بنا للنهاوند عند ( والشوق وحبيبى وأنا .. الليلة معادنا هنا ) .. وتنتهى الأغنية ..

بالتأكيد برع منير مراد فى إستعمال المقامات الشرقية والغربية على حد سواء .. فأعطانا جرعة مكثفة من المقامات والتحويلات والإنتقالات فى مدة قصيرة .. هى مدة الأغنية .. التى تزيد عن الخمسة دقائق ببعض الثوانى ..

لم أحب أن أتفرع بكم فى التحويلات الجانبية والسريعة .. لأنها كثيرة ..

شادية .. برعت فى تصوير العروسة المشتاقة لعريسها .. ولونت صوتها حسب التحويلات المقامية التى وضعها الملحن .. مع إضفاء حسها الخاص على اللحن ..

هى نفسها شادية .. ماذا نقول عنها .. يتهمونها أنها مطربة الأغنية الخفيفة .. وهل هذا إتهام ؟

بصراحة .. إن هذه الأغنية ليست خفيفة بالمرة .. إنها من النوع الثقيل .. تحتاج لمطربة بجد .. ونحن معنا شادية .. وكفى ..

تنتهى الأغنية .. ولا ينتهى الحديث عن شادية

[اماني العالم]

بسم الله نبدأ فى تحليل أغنية ( حه وبه )

كلمات : فتحى قورة

ألحان : منير مراد

غناء : شادية

قد تتعجبوا .. لماذا إخترت هذه الأغنية بالذات .. بالرغم من أنها أغنية خفيفة كمعظم ألحان منير مراد لشادية

إخترتها .. لأنها مصيبة من مصايب منير مراد .. أغنية خفيفة تحمل فى داخلها فكر لحنى وتمكن من إستخدام المقامات ..

مقدمة موسيقية .. تتحاور فيها الوتريات بأشكال العزف المختلفة ( بستكاتو ، قوس ) والبستكاتو .. هو النقر بالأصبع على الأوتار .. والقوس .. هو العزف العادى ..

ثم يدخل القانون وبعده الناى فى جملة جميلة جداً من الكرد .. ثم يعزف القانون الجملة الرئيسية ويسلم للغناء

تغنى شادية ( حه وبه ويه وبه ويه كمان .. مكتوبين فى القلب جوه من زمان ) ومع إيقاع المقسوم ..

ويرد عليها الكورس بنفس المذهب ..

لازمة موسيقية من الكرد .. وتغنى شادية ( لما بتسلم عليا .. بانكسف ماعرفش ليه ) ..

إسمعوا الجملة اللحنية القادمة ( أرجع أتندم وأقول ياريتها قالت .. وألقى دمعة شوق إليك ع الخد سالت )

ياساتر .. ماهذا الجبروت الموسيقى .. جملة جميلة جداً من الكرد .. إستعمل فيها عمنا منير مراد .. حرف خارج حيز المقام

( عُربة يعنى ) حرف واحد ورجع بسرعة .. لكنه وجعنا .. أمتعنا ..

وترجع شادية تقول ( روحى إنت .. قلبى إنت .. ياحبيبى ) لتنهى الكوبليه .

يردد الكورس نفس المذهب .. وتسلم الموسيقى من مقام الحجاز .. تسليمة صغيرة جداً ..

وتغنى شادية ( فى كل خطوة تقابلنى صورتك .. فى كل حتة شايفاك معايا )

وتعود من نفس الطريق إلى الكرد .. ثم النهاوند المعلق .. وتنهى الكوبليه

يرد الكورس .. وتسليمة أطول قليلاً لمقام العجم ..

وتغنى شادية من العجم ( فيه كلمة شاغلنى بيها .. أه لو تسألنى عنها )

وتعود من نفس الطريق .. كرد ثم نهاوند .. وتنتهى الأغنية

لاحظتوا أن الملحن لم يستعمل أى مقام شرقى به ثلاثة أرباع التون .. هذا هو منير مراد ..

الذى يعتقد الكثيرون أنه ملحن بسيط أو خفيف .. كلا البتة ( على رأى محمد صبحى فى مسلسل ونيس ) .

إسمعوا منير مراد فى لحن ( من يوميها ) لوردة .. إسمعوه فى لحن ( علمنى الحب ) لصباح .

إسمعوه فى لحن ( فارس أحلامى ) لشادية .. إحنا فين والعالم دى فين ..

[اماني العالم]

في قلوبنا ليكي يا ست الكل ( الحب الحقيقي )
وقصرنا عالي في حبك و ( شباكنا ستايرة حرير )
لانك كنتي في درب حياتنا ( أغلى شعاع )
وبكل حب وكل رقة بنقولك ( أجمل سلام )
ولو تساليني عن كل الحب دة نقولك ( أدي اللي كان )
ولو في يوم قالوا حبايبك هجروكي فكل دة ( إشاعة )
لان حبك مش مجرد كلام ده رمز وانا ( إتعودت علية )
معاكي وبيكي وليكي هنقضي أحلى ( رحلة عمر )
والنهاردة ومن بكور الصبح بدعي ( قولوا لعين الشمس ما تحماش )
علشان كل الحبايب جاييين في يوم الحب يقولوا ( بنحبك حب )
والحكاية مش حكاية سماع وبس دي ( حكاينتا كانت وياكي حكاية )
وبنندة على اللي غايب واللي ناسي ونقوله ( أمانه عليك امانة )
لو كنت يوم مننا زعلان تعالي واحنا نقولك ( نصالحك بإية )
وان في يوم جالنا جاهل ولا حاقد نقولة ( الظلم الحرام )
شادية لسه عايشة فينا وانت حتما ( مسيرك هتعرف )
دي السما بتنور في ليلها نور يدوم حتى لو ( غاب القمر )
وانتي القمر اللي لو غاب من السما مش ممكن يغيب من قلوبنا

[اماني العالم]

بسم الله نبدأ فى تحليل أغنية ( إن راح منك ياعين )

الكلمات : فتحى قورة

الألحان : منير مراد

كلمات الأغنية

إن راح منك ياعين .. حايروح من قلبى فين

ده القلب يحب مرة .. مايحبش مرتين

***

الحب إللى فى قلوبنا .. الناس فاكرينه إيه

ده شاغلنا مهما تبنا .. ولا حلفنا عليه

ومهما بعدنا عند .. نسيانه أقوى منه

وتخافى ليه ياعين .. حايروح من قلبى فين

ده القلب يحب مرة .. مايحبش مرتين

***

وحياة إللى جرالى .. وياه من غير معاد

لاأسهره الليالى .. وأحرمه البعاد

وأطفى بناره نارى .. وأخلص منه تارى

ولا يهمك ياعين .. حايروح من قلبى فين

ده القلب يحب مرة .. مايحبش مرتين

***

إياه يقسى عليا .. إياه ينسى إللى كان

لسه الليالى جايه وأكتر من زمان

وياحيرته أه ياويله .. فى نهار الشوق وليله

خليه يروح ياعين .. حايروح من قلبى فين

ده القلب يحب مرة .. مايحبش مرتين

واضح من الكلمات .. أن هذه العاشقة ( مقروصة ) من حبيبها جداً ..

وواضح إن عينه ( زايغة ) .. وهى تكلم عينها .. التى ربما لا تراه فى بعض الأحيان .. وبرغم ذلك .. تؤكد أنها تراه وتراقبه بقلبها ..

فى الكوبليه الأول .. تؤكد أن الحب أقوى من أى شئ وهو غير مايظنه الناس ..

وفى الكوبليه الثانى .. واضح أن المحبوب لوع قلبها وسهرها الليالى .. لذا فإنها ستقابله بالمثل .. ومافيش حد أحسن من حد .

وفى الكوبليه الثالث .. تحذره أن يقسى عليها أو ينسى ماكان بينهما من حب .. وتؤكد له أن القادم من الأيام أكثر من الذى فات .. لذا فإنه يجب عليه أن يحذر منها ومن حبها ..

نأتى الأن للحن ..

عمنا منير مراد أطاح بنا من فوق الجبل فى هذه الأغنية ..

إستخدم مقاماً واحداً ( تقريباً ) طيلة الأغنية ..

لكننا عندما نسمع .. نسمع جمل مختلفة وشديدة العذوبة والرقة ..

إختار مقام ( النهاوند ) ليصوغ منه لحنه ..

لماذا إختار النهاوند ..

النهاوند ياسادة .. هو مايسمى فى الموسيقى الغربية ( سلم دو الصغير ) أو الدو مينور ..

وهو أحد المقامات الرئيسية والأصيلة فى الموسيقى الغربية والشرقية على حد سواء ..

وهو أيضاً مقام رحيب ومتسع ويقترب كثيراً من عدة مقامات أخرى .. وله تفريعات عديدة ..

لذا فإنه يصلح لإستعماله فى تلحين أغنية كاملة .. دون أن نشعر بالملل ..

تبدأ الأغنية بصولو ( عزف منفرد ) جميل من البيانو من النهاوند .. يدخل بعدها الإيقاع .. وهو إيقاع الرومبا ..

نسمع ضربات من البيانو ترد عليها الوتريات .. وتسلم للمذهب من مقام العجم ( الميجور )

وتغنى شادية ( إن راح منك ياعين ) من النهاوند .. مع تغير الإيقاع إلى ( المقسوم ) .

ينتهى المذهب على خير .. ونفس اللازمة الموسيقية تماماً .. وهى اللعبة التى أجادها منير مراد فى هذه الأغنية ..

الموسيقى تسلم على درجة الدو ( فى جميع الكوبليهات ) .. وشادية تغنى من درجة أخرى ..( تختلف فى كل كوبليه ) ولا نشعر بأى خروج أو نشاز .. أو أى شئ غريب .. الأذن تتقبل مايفعله دون نقاش ..

تغنى شادية الكوبليه الأول من نفس المقام ( النهاوند ) .. ( الحب إللى قى قلوبنا ) .. ولا شئ جديد فى هذا الكوبليه .. إلا إستعراض درجات الركوز .. فنجد أن الموسيقى تسلم لشادية على درجة المى بيمول .. لكى تغنى من نفس الدرجة .. ( ولما بعدنا عنه .. نسيانه أقوى منه ) . هى مجرد طريقة من طرق التسليم .. أى بداية الغناء ..

نفس الموسيقى ( كما إتفقنا ) .. وتغنى شادية ( وحياة إللى جرالى .. وياه من غير معاد ) .. من الدرجة الثالثة من النهاوند ( مى بيمول ) .. ونفس المسألة .. تغنى ( وأطفى بناره نارى .. وأخلص منه تارى ) بنفس الطريقة .. من المى بيمول ..

نفس الموسيقى .. وتغنى شادية ( إياه يقسى عليا .. إياه ينسى إللى كان ) .. من مقام الكرد .. وهى المرة الوحيدة التى يذهب فيها الملحن للكرد .. لماذا ؟

لأنه يريد تعميق لهجة التحذير من العاشقة .. ( إياه يقسى عليا ) لذا فإنه يلحن هذه الجزئية بشئ من الحدة .. وكان لابد من تغيير المقام .

وعموماً .. الكرد مقام لصيق بالنهاوند .. إذن لا مشكلة ..

ويعود للنهاوند عند ( وياحيرته أه ياويله .. فى نهار الشوق وليله ) .. وتنتهى الأغنية ..

سنلاحظ أن اللحن غربى بعض الشئ .. ولكننا نستسيغة ولا نعتبر هذه مشكلة ..

تعتبر هذه الأغنية من الأغانى التى غنتها شادية فى عنفوان مجدها وأقصى قوة لصوتها ..

نسمعها وهى تردد ( وتخافى ليه ياعين .. حايروح من قلبى فين ) بكل الإحساس والرقة ..

وعلى العكس نسمعها وهى تردد ( إياه يقسى عليا .. إياه ينسى إللى كان ) بكل الشدة والحزم ..

إنها تعبر عن كل مقطع بما يناسبه من أداء وتلوين صوتى .. هذه هى شادية ..

تنتهى الأغنية .. ولا ينتهى الحديث عن شادية ..

[اماني العالم]

بسم الله نبدأ فى تحليل أغنية ( ياقلبى سيبك )

كلمات : مرسى جميل عزيز

ألحان : محمد الموجى

غناء : شادية

ياقلبى سيبك من الحب سيبك .. لا تقول حبيبى ولا حبيبك ..

قرأ الموجى هذه الكلمات .. وفكر كيف يلحنها .. ماهو المقام الذى يبدأ به .. والإيقاع الذى يسير عليه اللحن ..

إختار مقام الكرد .. وإختار إيقاع المقسوم .. لماذا ؟

واضح من كلمات الأغنية .. أن هذه العاشقة تريد التخلص من الحب ومتاعبة .. وسهر الليالى والسهد والأرق .. و .. و .

فمقام الكرد .. مقام متحرر ورشيق .. ويصلح لمثل هذه الألحان .. كذلك إيقاع المقسوم الراقص ..

إستغنى الموجى أيضاً عن الأدليب فى مقدمته الموسيقية .. فاللحن رشيق وسريع .. ولا يتحمل الأدليب ..

والأدليب كما ذكرنا من قبل .. هو الجزء الموسيقى الذى يأتى عادةً قبل دخول الإيقاع .. أى هو موسيقى بدون إيقاع ..

المقدمة الموسيقية بنفس لحن المذهب الغنائى ..

وتغنى شادية ( ياقلبى سيبك من الحب سيبك ) .. من الكرد ..

ويردد الكورال النسائى نفس المذهب ..

ودون لازمة موسيقية .. تغنى شادية ( ياقلبى ياللى إشتريت عذابك ) .. من الكرد أيضاً .. ولكن بلحن مختلف .. ومع إيقاع السنباطى ..

ويردد الكورس نفس المذهب ..

وتغنى شادية ( ياقلبى مهما تشكى الليالى ) من مقام العجم .. وهو نفسه سلم ( الميجور ) الغربى ..

وتعود للكرد عند ( ومهما تبكى بدمع غالى ) .. لتنهى الكوبليه

ونفس أداء الكورس .. وتغنى شادية ( ياقلبى سيبك من الماضى كله ) من مقام الحجاز ..

لتعود للكرد مرة أخرى عند ( وإن حد قالك ع الحب قوله ) .. وتنتهى الأغنية ..

سنلاحظ فى هذا اللحن .. أن الموجى إختار مقام العجم من درجة السى بيمول .. ويسمى ( عجم عشيران ) .. مع الأخذ فى الإعتبار أن شادية تغنى من كرد ( الدوكا ) .. أى الرى ..

إن لهذا التصرف من الموجى .. سبباً مقنعاً ووجيهاً ..

أولاً : لأنه يستعمل العجم من درجة الجواب .. لكى لا يرهق صوت شادية

ثانياً : لسهولة العودة لمقام الكرد دون إستعمال كبارى .. أى مقامات أخرى .. لأن الأبعاد النغمية واحدة .. فإذا إستقر على نغمة الدوكا .. سيكون فى الكرد .. وإذا إستقر على نغمة السى بيمول .. سيكون فى العجم .. هكذا ببساطة شديدة .. واضح أن هناك خطة للحن .. وهذا هو الموجى

[اماني العالم]

بسم الله نبدأ فى تحليل أغنية ( أبو العين العسلية )

الكلمات : عبد الرحمن الأبنودى

الألحان : بليغ حمدى

كلمات الأغنية

ولا قدك ميه .. يابو العين العسليه

إن شاالله تاخدنى .. لشط الجنه الدهبيه

وإن رحت معاه .. وطاوعت هواه

حاهرب على أول مركب .. حاتعدى عليا

***

يابو عين قدارة .. ولما بشوفها بدارى

عايز تسرقنى من قلبى .. فاكرها شطارة

ماتطمنيش بصة عينك .. عسلية عسلها يشبه طعم السنارة

وإن رحت معاه .. وطاوعت هواه

حاهرب على أول مركب .. حاتعدى عليا

***

يابو عين عسليه .. عنيك مافيهاش حيرة العاشقين

فيها مكر وسحر وشئ .. موش عارفه جاى منين

شئ بيحايلنى أجرى .. وراه خطوة وأعود تانى

أهرب وأرجع لك .. وأهرب موش عارفه أهرب على فين

وإن رحت معاه .. وطاوعت هواه

حاهرب على أول مركب .. حاتعدى عليا

***

بتغنى عليا وبتلعب بيا .. بعد شوية حاترمينى

يابو عين عسلية ولا قدك ميه .. شاطر بس تودينى

حاتمشى معاك فى جنينة الحب .. تلات تيام

وتفوتنى هناك أشواك البعد .. تكوينى

وإن رحت معاه .. وطاوعت هواه

حاهرب على أول مركب .. حاتعدى عليا

إممممم .. مشكلة ..

هذه البنت موش عارفه هى عايزه إيه بالظبط ..

واضح طبعاً أنها وقعت فى براثن واحد ( مقطع السمكة وديلها ) .. ولد خبرة فى مسائل الحب والغرام ..

وبرغم معرفتها بكل هذا .. إلا أنها لا تبتعد تماماً .. وإنما هى ( بتتلكك ) ..

تعرف تماماً أنه يلعب بقلبها .. وترى شئ فى نظرة عينه لا يطمئنها ..

ولكنه تريده .. تريد أن تمنحه الفرصة لكى يثبت لها حبه الحقيقى ..

ولكنها فى الحقيقة .. تريد أن تقع فى حبه وتستجيب له حتى بدون فرصة ..

المسألة فى النهاية .. تماحيك .

نأتى الأن للحن الأغنية ..

عمنا بليغ حمدى .. صاحب أحلى أغانى شادية الأخيرة .. وخاصة الأغانى الطويلة ..

واضح الإرتباط الوثيق بين بليغ والأبنودى .. ونرى هذا الأرتباط جلياً فى فيلم ( شئ من الخوف ) لشادية أيضاً .

يختار بليغ مقام ( العجم ) ليصوغ منه لحنه ..

والعجم هو نفسه سلم دو الكبير فى الموسيقى الغربية .. ويسمى ( دو ميجور )

تبدأ اللازمة الموسيقية بكامل الفرقة مع إيقاع السنباطى .. وهو إيقاع رباعى الزمن .. قريب من المقسوم والبلدى ..

ونسمع ألة ( الكلارنيت ) الخشبية .. تؤدى جملة وترد عليها الوتريات .. ونسمع أيضاً ألات ( الأوبوا والفلوت ) من الخشبيات أيضاً ..

وتغنى شادية ( ولا قدك ميه .. يابو العين العسلية ) من نفس المقام .. ( العجم ) .

لا تخرج عن العجم طيلة المذهب .. ثم نفس اللازمة الموسيقية بنفس صولوهاتها ..

وتغنى شادية ( يابو عين قدارة .. ولما بشوفها بدارى ) .. من العجم أيضاً مع بعض التحويلات البسيطة .. التى لا تتعدى لمس نغمة واحدة بدلاً من نغمة أخرى ..

يردد الكورال نفس المذهب .. ثم لازمة موسيقية من مقام النوا أثر .. وهو مقام لصيق بالنهاوند .. ونسمع الكلارنيت يصول ويجول فى هذه اللازمة .. وكأنه يقوم بوصلة رقص ..

تغنى شادية ( يابو عين عسليه عنيك مافيهاش حيرة العاشقين ) من النوا أثر .. ثم تعود للعجم عند ( شئ بيحايلنى أجرى .. وراه خطوة وأعود تانى ) .. إلى نهاية الكوبليه ..

الكوبليه الأخير من مقام النهاوند .. ولكن من طبقة مخالفة لطبقة العجم .. فلقد رجع حرفان للخلف وبدأ الكوبليه ..

هى بالتأكيد طريقة محترفين .. ويعود مرة أخرى للعجم عند ( وإن رحت معاه وطاوعت هواه ) .

تنتهى الأغنية ولا ينتهى الحديث عن شادية ..

أدعوكم لسماع الأغنية .. وأتمنى لكم الإستمتاع

[اماني العالم]

بسم الله نبدأ فى تحليل أغنية ( القلب معاك )

الكلمات : فتحى قورة

الألحان : منير مراد

كلمات الأغنية

القلب معاك ثانية بثانية .. لو حتى تروح أخر الدنيا

فرحته معاك أول فرحة .. مشتاق وحياتك للتانية

دنا قلبى معاك لو حتى تروح أخر الدنيا

***

أنا حابعت روحى تهيم حواليك .. ع البعد عشان تفتن لى عليك

بتكلم مين وتبص لمين .. فى غيابى ومين حليت فى عنيك

إياك إياك .. لابقى مخاصماك

ده أنا قلبى معاك لو حتى تروح أخر الدنيا

***

حابعت لك كل دقيقة سلام .. من ساعة ماصحى لحد مانام

وحاقضى اليوم من بعد اليوم .. على فات كام يوم وفاضلك كام

بس إوعى تغيب .. ياأعز حبيب

ده أنا قلبى معاك لو حتى تروح أخر الدنيا

***

العين بتقول لى راح أعمل إيه .. وأنا لسه معاه وإشتقت إليه

والقلب خلاص بيقول لى خلاص .. من بكره خلاص أنا ملك إيديه

إياك تنساه .. وتزيد له أساه

ده أنا قلبى معاك لو حتى تروح أخر الدنيا

واضح من الكلمات .. أن هذه العاشقة تخاطب محبوبها الذى سيتركها ويسافر ..

وتؤكد له أنها لن تنساه .. وإنما ستكون معه بقلبها وروحها ..

وتحذره فى نفس الوقت .. ألا يلتفت لغيرها وأنها ستراقبه بروحها وقلبها .. وستعرف أن عينه زاغت أم لا ..

وأخيراً .. تؤكد له أنها ستنتظره على أحر من الجمر .. وستعد الدقائق والثوانى حتى يعود لها ..

عمنا فتحى قورة .. صاحب رصيد كبير من أغنيات شادية ..

الأغنية تحتوى على أربع مقاطع .. كل مقطع يحتوى على بيت مكون من أربع شطرات .. يعقبه شطرة أخيرة فيها من التحذير مافيها ..

فنجد فى المقطع الأول .. تحذير يقول ( إياك إياك لابقى مخاصماك )

ونجده فى المقطع الثانى .. يقول ( بس إوعى تغيب ياأعز حبيب )

وفى المقطع الثالث يقول ( إياك تنساه وتزيد له أساه )

بالتأكيد هناك خطة وضعها المؤلف ..

نأتى الأن للحن الأغنية ..

معنا الموسيقار منير مراد .. والذى سنقابله كثيراً فى أغنيات شادية ..

بدأ الأغنية بصولو ( عزف منفرد ) من ألة القانون .. صولو جميل أعطى فيه الحرية لعازف القانون ليبدع لنا من مقام الكرد ..

والكرد أيضاً سنصادفه كثيراً مع شادية .. لماذا ؟

لأن الكرد مقام متحرر .. قريب من العديد من المقامات الأخرى .. مناسب جداً للأغانى المرحة .. وسنتحدث عنه كثيراً فى القادم من التحليلات ..

بعد صولو القانون .. يبدأ الإيقاع بمازورتين بدون موسيقى .. وإيقاعنا فى هذه الأغنية هو إيقاع المقسوم .. وهو إيقاع رباعى الزمن ..

تبدأ الموسيقى بجملة من الألآت الخشبية ( كلارنيت ، أوبوا ) ويعقبها الوتريات ( كمانات ، تشيللو ) ..

تتسلم شادية وتغنى ( القلب معاك ثانية بثانية ) من نفس المقام ( الكرد ) .. ولا تخرج عنه طيلة المذهب ..

الوتريات ترد على شادية بطريقة ( البستكاتو ) وهى النقر بالأصابع على الأوتار بدلاً من القوس ..

وهذه الطريقة تبين لنا أن منير مراد مش أى ملحن .. إنه يقصد توضيح وتثبيت التأثير لدى المستمع .. عندما تقول شادية ( ثانية بثانية ) .. إذن طريقة البستكاتو .. تعبير عن دقات الساعة .. عن مرور الثوانى ..

ينتهى المذهب .. ونسمع نفس اللازمة الموسيقية ..

وتغنى شادية ( أنا حابعت روحى تهيم حواليك ) من نفس الكرد .. ولكنها تخرج فى بعض الأحيان عن المقام .. بتغيير حرف واحد من حروف المقام .. أو درجة واحدة .. لزيادة الجرعة الطربية والإستفادة من موهبة شادية فى الأداء الجميل ..

ينتهى هذا الكوبليه .. ونفس اللازمة الموسيقية .. مع تغيير التسليم لنجد أنفسنا فى مقام الحجاز .. وهو قريب للكرد كما ذكرنا من قبل .. وتغنى ( حابعت لك كل دقيقة سلام ) .. وتعود للكرد مرة أخرى عند ( بس إوعى تغيب .. ياأعز حبيب ) .. إلى نهاية الكوبليه ..

نفس اللازمة الموسيقة مع تغيير التسليم ونصبح فى مقام الراست .. المقام الشرقى الجميل ..

وتغنى شادية ( العين بتقول لى راح أعمل إيه ) .. من الراست .. ونسمع شادية المطربة .. حتى فى الأغانى الخفيفة .. لابد من أن نستمع إليها كمطربة وليست مؤدية فقط .. هى مطربة بالتأكيد ..

تعود شادية للكرد عند ( أنا ملك إيديه ) .. وهى فى الحقيقة عودة غريبة وإنتقاله من موضع غير مألوف أو تقليدى ..

تنتهى الأغنية .. ولا ينتهى الحديث عن شادية ..

أدعوكم لسماع الأغنية .. وأتمنى لكم الإستمتاع