مشاهدة النسخة كاملة : ليه؟
Tarek Elemary
14/04/2011, 12h19
ليه يا عمر بتعدى قوام تجرى؟
ما حسيت بيك و ليه لياليك
بتسرق حلمى من فجرى؟
و تسرق م النهار أنوار
و تسبقنى الدموع أنهار
تدوِّب بالحنين صبرى؟
و ليه يا عُمر مهما تْمُر
لا بْتِهْنَى و لا بِتْسُّر؟
ولا فيك ناس و لا حبايب
مدام لِسَّه الحبيب غايب
و فين أراضيه؟ وأيه يرضيه؟
و ليه قاسى ...
مدام شاف إن أنا دايب؟
و ليه يا سنين يفوتنى حزين؟
و ساكن طيفه نِنْ العين
و يحلالُه عذابى ليه؟
و ليه يحلاله بينَّا البين؟
على أمل اللُّقا الخادع
يغيب الوعد و يلاوع
يمنينى و ياخدنى يِوَدِّينى
لآخر سكةْ العاشقين
و يرمينى
وحيد وسط الفَضَا الواسع
و دمعى يسيل و أنا راجع
و أسأل ليه؟
و ليه .. كلمة ما ليها جواب
و ليه ... دايما ماليها عتاب
تفيض بعذاب و تِسْأَلنى
و أنا دايماً عليه مَجْنى
مافيش كلمة تِرَيَّحْنى
و من كتر الهموم مَحْنى
و لمَّا بَحاول أفتح باب
ألاقى من وراه مية باب
و يتكرر سؤالى ... ليه؟
و ليه الغُربة ساكنانى
و ليه غامقة يا ألوانى
و فيه حاجز كبير واقف
مخلِّينى مانيش شايف
و لا عارف ...
أدوب فى حضن خلَّانى
و مين حط الحواجز دى
و مين زارع و مين بانى
و تفضل برضه كلمة ليه؟
و ليه صوتى ماهوش واصل؟
و ليه السور أو الفاصل؟
و لا يمكن يكون موصول
بدون ما يكون هناك واصل
و مش عاوز كلامى يكون
يادوب تحصيل من الحاصل
و أرجع تانى أسأل ليه؟
سؤال مالقيتش رد عليه
و روح قلبى الجواب فى عنيه
و عذره أيه؟
نسينى ليه؟
يا أيام شكل بعضيها
و معظمنا بدون تفكير مقضيها
و لا بيسأل ساعة ما يفوق
و لا أمَّا يروق
مين الركاب؟
و مين بيسوق؟
و فين الراحة فى الدنيا؟
و مين يعرف أراضيها؟
وليه بنعيش؟
و ليه بنموت؟
و ليه تتر الزمن بيفوت؟
و ليه الخوف صراخه سكوت؟
و ليه الرعب من غير صوت؟
و ليه بندارى بلاوينا؟
و لو بانت ما يكفينا؟
ولا يسترها شجر التوت؟
و يونس قال فى بطن الحوت
أنا الظالم و أنا المظلوم
و أنا نفسى عليها اللوم
رمتنى لبحر أوهامها
بلا قارب و لا تجارب
و لا خبرة بفن العوم
و قال يا رب فى العتمة
و قال يا خالق الكلمة
أنا تايب بعلو الصوت
إلاهى أنت سُبحانك
يا باقى بعد موت الموت
و لسة يرن فيا الصوت
و يسأل ليه؟
و فين الراحة فى الدنيا؟
و مين يعرف أراضيها؟
وليه بنعيش؟
و ليه بنموت؟
و ليه تتر الزمن بيفوت؟
و ليه الخوف صراخه سكوت؟
و ليه الرعب من غير صوت؟
و ليه بندارى بلاوينا؟
و لو بانت ما يكفينا؟
ولا يسترها شجر التوت؟
الله عليك يا استاذ طارق
قلم لا يعتاذ غير الحكمة
والكلمة الهادفة
نجد راحتنا الوجدانية
بين سطوركم
كونوا دائما بخير
تقديرى
Tarek Elemary
16/04/2011, 10h29
ربيبة بيت الفن و ست الستات / الست أم مدحت
دائما ما تخرج كلمات التشجيع و الإطراء منك كفيض نهر الكرم الذى تغدقين على شخصى منه بحيث يصعب علىَّ إيجاد الردود المناسبة فأتسمر أمام الشاشة مبتسما يعترينى الخجل و الزهو و الغبطة و الفخر و العجز معاً
جزاك الله خيراً
سعدالشرقاوى
23/04/2011, 10h37
أنا الظالم و أنا المظلوم
و أنا نفسى عليها اللوم
رمتنى لبحر أوهامها
بلا قارب و لا تجارب
و لا خبرة بفن العوم
و قال يا رب فى العتمة
و قال يا خالق الكلمة
أنا تايب بعلو الصوت
اخى الغالى
الشاعر القدير
الاستاذ/طارق العمرى
ورائعة فاقت وصف الابداع
كلما كررت قراأتها
كلما ظهرت لى مواطن جمالية
اكثر روعة
لك كل تحياتى وتقديرى
Tarek Elemary
26/04/2011, 13h15
الكريم ... المغدق ،،،، و الحساس ... المرهف ،،،، و الفنان ... المبدع
سعد الشرقاوى
لا حرمنى الله منك و لا من كلماتك الرقيقة ، فكاتب أى محاولة تسعده كلمة ثناء
فما بالك عندما تجيء من مبدع حقيقى و فنان أصيل ... يقيناً تزداد قيمتها
لكن يا صديقى ... ما يحز فى نفسى هنا أننا و إن كانت نسبة المشاهدات مرضية جداً، إلا أن التواصل المكتوب أصبح ضنيناً و كأننا نتحدث لبعضنا البعض و هذا يشعرنا بالسلبية التى كانت من آفاتنا إبان فترة الحكم المنتهية و التى ولت بلا رجعة أو أسف عليها ... و لا أريد أن نأسف على ما بعدها يارب
سعدالشرقاوى
26/04/2011, 14h11
معك الحق
اخى ابو عمر
فآسف انا على يوم كان فيه هذا القسم
اكثر الاقسام مشاهدات وردود
بل كان يوما فاكهة سماعى
لكنى قلت قبل ذلك
انه يجر ستائره
ليختفى من المنتدى ببطء شديد
ويعلم الله اننا جميعا
سنغلق بابا للابداع
ولاحول ولاقوة الا بالله
صبره ابو حسن
27/04/2011, 01h33
الاستاذ طارق العمرى
ها انت تعود الينا بنسمات الربيع التى تفوح عطرا من بين ثنايا كلماتك المتالقه شاعرنا الرائع لا تغيب وخصوصا احنا داخلين على الصيف ومحتاجين لهذه النسمات
اما عما قاله استاذنا سعد الشرقاوى هذا الملتقى الذى كنا نتحاور ونستمتع بصفوه الشعراء وكان اكثر ما يعجبنى قراءت الردود بالله عليكم اين هم الان لو حد يعرف يدلنى ويكسب فيا ثواب
Hisham Khala
27/04/2011, 04h41
صياغة جميلة و رشيقة
و أفكار أجمل
أحسنت يا أستاذ طارق
:emrose::emrose::emrose:
Tarek Elemary
27/04/2011, 07h58
الاستاذ ......
اما عما قاله استاذنا سعد الشرقاوى هذا الملتقى الذى كنا نتحاور ونستمتع بصفوه الشعراء وكان اكثر ما يعجبنى قراءت الردود بالله عليكم اين هم الان لو حد يعرف يدلنى ويكسب فيا ثواب
يا صديقى المثقف الجميل ... صبره أبو حسن
تحياتى إليك ملؤها المودة و السعادة و الإحترام
الحكاية إن القائمين على المنتدى و لهم كل الإحترام .. فى فترات سابقة كانوا قد ضاقوا ذرعاً بهذا القسم لما يسببه من خلافات و معارك جانبية صغيرة و لأتفه الأمور ... و لهم عذرهم طبعاً ،،، لكنها طبيعة الأمور ... فالناس تدخل المنتديات على إختلاف تخصصاتها لتبادل الآراء و الإختلاف فيما بينهم ... و لكن ثقافة الحوار الهادئ و الإختلاف الذى لا يفسد للود قضية لم تتأصل عند غالبية مجتمعاتنا الشرقية بما يكفى بعد للأسف
فكان هذا النفور و الفتور بين رواد المنتدى ة هذا القسم المتعب .... و الله أعلم
أتمنى أن يخيب ظنى و يعود هذا القسم لسابق عهده و يعود إليه نجومه و براعمه و أعمدته ليكون من جديد واحة الفن المتكامل مع باقى أقسام المنتدى فلا أغانى بلا كلمات و لا كلمات تغنى بلا موسيقى و ألحان
Tarek Elemary
27/04/2011, 11h23
صياغة جميلة و رشيقة
و أفكار أجمل
أحسنت يا أستاذ طارق
:emrose::emrose::emrose:
ربنا يبارك فى حضرتك يا دكتور هشام
و الله أنا حاسس بتقصير تجاه حضرتك فى الردود لكن و الله أنا أكن لك كل مودة و إحترام و تقدير
يا سيدى زيارتك لصفحتى تكريم ليس له مثيل ... و أنا اعلم قدره و أسجل إمتنانى
صبره ابو حسن
27/04/2011, 17h45
يا صديقى المثقف الجميل ... صبره أبو حسن
تحياتى إليك ملؤها المودة و السعادة و الإحترام
الحكاية إن القائمين على المنتدى و لهم كل الإحترام .. فى فترات سابقة كانوا قد ضاقوا ذرعاً بهذا القسم لما يسببه من خلافات و معارك جانبية صغيرة و لأتفه الأمور ... و لهم عذرهم طبعاً ،،، لكنها طبيعة الأمور ... فالناس تدخل المنتديات على إختلاف تخصصاتها لتبادل الآراء و الإختلاف فيما بينهم ... و لكن ثقافة الحوار الهادئ و الإختلاف الذى لا يفسد للود قضية لم تتأصل عند غالبية مجتمعاتنا الشرقية بما يكفى بعد للأسف
فكان هذا النفور و الفتور بين رواد المنتدى ة هذا القسم المتعب .... و الله أعلم
أتمنى أن يخيب ظنى و يعود هذا القسم لسابق عهده و يعود إليه نجومه و براعمه و أعمدته ليكون من جديد واحة الفن المتكامل مع باقى أقسام المنتدى فلا أغانى بلا كلمات و لا كلمات تغنى بلا موسيقى و ألحان
عزيزى الشاعر الكبير
ان الحصول على الاشعار المكتوبه والمسموعه اصبح فى عالم الانترنت سهل للغايه
ولكن ان تتناقش وتطرح قضيه ويشارك كل منكم باختلاف مزاهبكم هو قمه الروعه
ولكن ماقصدته انك وعمى سعد الشرقاوى لكم علاقات باغلب أعمده هذا القسم اتمنى ان تقومو بتقريب وجهات النظر ليعود هذا القسم الى ما كان عليه
حقيقى شعر دا بأقراه
ودا شاعر ودى كلمة
أقول سبحانه من سواه
ووهبه الشعر والحكمة
وليه ما جيتش من بدرى
وطال ليلى وغاب فجرى
وامتع قلبى مع بصرى
بشعر أقراه يطول عمرى
وكتبه طارق العمرى
وليه غرقتنى فى شعرك
بمعنى يجسد الإحساس
وليه دغدغت عواطفنا
بشعرك ليه يا إبن الناس
طلعت معاك سما عالية
وسر كبير عليه حراس
سألت واحد من الواقفين
بعد ما حلفته بالغالى
طارق بجيب الشعر منين
وليه حسه دوام عالى
بص بعين فيها الحكمة
وفات واحد واقف جنبه
وقال السر دا ف طارق
بيملا قلمه من قلبه
ودمه يرسمه أشعار
وهوه اللفظ والمعنى
ودلوقتى أنا هسيبك
لحد يفوت ويسمعنا
رجعت المنتدى دوغرى
يا طارق لاجل أشوف شعرك
واشوف ازاى بتختار لفظ
ومعنى تصبغه بحسك
وليه شعرك بقى يا طارق
مايكونش ليه فى كل الصفح
وكل سطر آجى أقراه
الاقيه فى قلبى قوام طرح
عنقود أسى
وعناقيد فرح
Tarek Elemary
15/05/2011, 13h32
حقيقى شعر دا بأقراه
ودا شاعر ودى كلمة
أقول سبحانه من سواه
ووهبه الشعر والحكمة
وليه ما جيتش من بدرى
وطال ليلى وغاب فجرى
وامتع قلبى مع بصرى
بشعر أقراه يطول عمرى
وكتبه طارق العمرى
وليه غرقتنى فى شعرك
بمعنى يجسد الإحساس
وليه دغدغت عواطفنا
بشعرك ليه يا إبن الناس
طلعت معاك سما عالية
وسر كبير عليه حراس
عم هانى .........
سيبك من المديح فى شخصى و سعادتى به الغامرة و شكرى لك عليه و هذا أقل بكثير مما تستحق و دعنا فيما تكتب أنت
يا عم هانى إنت مين و عندك كام سنة و دارس أيه ........ ممكن أعرف؟
عم هانى إنت لو موش واخد بالك إنك شاعر مكتمل الموهبة و ينقصك أولا أن تصدق هذا و ثانيا أن تصقل الموهبة و تعتنى بما حباك الله به ... تبقى كارثة
لأنى حاسس إنك غير مقدر موهبتك و داير تبدرها يمين و شمال مع عظيم تقديرى للهدف النبيل .... لكنها تستحق منك بذل العناية و التدقيق
أنا لا أجامل و يمكن كثيرين يعلمون عنى أننى لا أتورع فى قول الرأى الذى اشعر به حتى و لو كان صادماً
بيننا كلام كثير .... إذا أحببت
Tarek Elemary
15/05/2011, 17h54
حياتى كلها عَدِّتْ
بتتهادى
صحيح أيامها تشبه بعض
ليل و نهار
كما العادة
ما يِفْرِقْ فيها
غير الضلمة ولَّا النور
و سُكَّرها قليل لكن
كُؤوس المُرّْ بزيادة
و لا قلبى خفق مرة
ولا داق م الهوى ذرة
و بياع الغرام عدى
ما يوم نادى
و كنت مْصَالِح الأيام
و هىَّ كاتْ مخاصمانى
و لا عدَّيت ساعاتها يوم
و لا إستنيت تِعود تانى
و كان بينَّا إتِّفاق ضمنى
و كان باين رضوخى فيه
و إذعانى
ما يوم أطلب من الدنيا
و أرضى بحظى لو جانى
و قابلتك
و يا ريتنى ما قابلتك
كرهت الدنيا و الأيام
و عرفتينى بالأحلام
و حب و شوق
و عشق بيجرى جوة عروق
و آه يا سلام
على لمسة إيدين بحنين
و نظرة تكحل العينين
و طيف زاير ليالينا
يطير يحكى بما فينا
و وقت يمر يكوينا
يبكينا على بعادنا
يحسرنا على معادنا
الأخ الفاضل
الأستاذ طارق العمرى
السلام عليكم ورحمة الله وبركاته
انت مكبر الدور ليه يا عمنا
سيبك من المديح فى شخصى
ومين قال إن أنا مدحت حضرتك
اللى حصل إن أنا قريت لك وسرحت واستمتعت
وكان طبيعى انى أشكرك وأوفيك بعض من حقك
برد أعتقد إنه كان عفوى وتلقائى
يا عم هانى إنت مين
أنا أخوك هانئ الجمل
و عندك كام سنة
وعندى 54 سنة
و دارس أيه
دارس الصيدلة
طبعا يسعدنى أقرا لك دايما
ويشرفنى يكون بينا كلام
وأشكرك
ملحن مصري
03/06/2011, 14h37
أستاذي العزيز طارق وأخي الكريم
لم أقرأ السطور ولكني قرأت مابينها
وأتمني أن تفجر مابداخلك في كتابات للوطن " وهذه رسالتك التي تؤمن أنت بها "
فأنت شاعر كلما قرأت لك إرتبط ذهني بالميدان والثوره
" أنت ثوره "
أرجوك إنفجر
تامر عامر
ملحن مصري
Tarek Elemary
06/06/2011, 08h39
أنا و عيونك الحلوين
مابينَّا كلام
حوار صامت بنظرة عين
و دنيا عايشة ف الأحلام
و واحة و ضفتين راحة
و قصة عشق بصراحة
باجيلها هروب من الأيام
و نظرة ساعات بتبقى سؤال
و نظرة تجدد الآمال
و نظرة كمان بتبقى سلام
و أنا شعبك و أنا الجمهور
و أنا المسجون بدون ولا سور
و إنت رموشك الحكام
و لسة عيونك الحلوين
ماليها كلام
ولمَّا بابص فى عيونك
بالاقى الهم راح منى
و ييجى النن فى الننى
أتوه من فرط أشواقى
مابين شطين من الحلام
و رمشك مرسى يحضنِّى
وراه روضة من الألوان
بتعزف أجمل الألحان
و أنا ف بحرك
يادوب قارب
لا لاقى ليل و لا مغارب
و لافى نجوم ولا كواكب
و لا شمسك ف يوم بتغيب
و لا الأيام بتتعاقب
و أنا هايمان ف بحر الشوق
يا ريت كل اللى حب يدوق
جمال الحب و شعوره
و يبدر ع الوجود نوره
و أرج تانى لعيونك
ألاقى عنيا فيك دايبين
أخى الشاعر الجميل
الأستاذ طارق العمرى
لا حرمنا الله أشعارك
ولا موضوعاتك القيمة والهادفة
أين أنت
لن نمل
نحن فى الإنتظار
سهاام ماجد
11/01/2015, 21h24
يادنيـا ليـه ؟ قاسـيـة عـليــا
مــا فـيــكِ لمـسـة حنيــة
كــل مـا أقــول عـليـا تحـنى
ألقـى الدمــوع ماليــة عـنيـا
بقلمى
أخى الفاضل
طارق العمرى
سعدت بمعزوفتك الراقية
رغم الحزن الكامن فيها
دمت ودام قلمك الثرى
كانت هنااا
سهــ ماجد ــام
Powered by vBulletin Version 3.8.4
Copyright ©2000 - 2024, Jelsoft Enterprises Ltd