مشاهدة النسخة كاملة : كلمات أغاني الشيخ محمد بلخياطي
كلمات أغاني الشيخ محمد بلخياطي
أحاول انطلاقا من هذه المشاركة نقل كلمات أغاني الشيخ محمد بلخياطي حسب ما تتيحه الفرصة..ولعل أغلب ما يعترض ناقل كلمات الأغاني هو غموض بعض الكلمات وندرة استعمالها، خاصة إذا كان يقوم بنقل الكلمات عن طريق السماع فقط، وتصعب المهمة بالأخص أو تستحيل عند رداءة التسجيل، لكن رغم ذلك سأحاول التثبت من الكلمات قبل نقلها قدر المستطاع ان شاء الله، على امل أن يصحح لنا الأخوة السماعية ما يرونه مجانبا للصواب ولهم مني جزيل الشكر.
كلمات أغنية "البابور"
تحكي معانات المغتربين والشوق إلى أرض الوطن
قطعتني يا البحر، قطعتني على بلادي
وماعرفتش كيفاش عميت وجابني البابور
سلم على وهرن بالله يا الغادي
وسلم على سيدي الهواري المشهور
سلم على الدزاير كلها تنادي
زور سيدي عبد الرحمن راك مستور
تفكرت وطني وبكيت على اسيادي
جيت للغربة غي كلي جيت مسحور
شتا جابني للغربة ما عرفتش واش عندي؟؟
شتا جابني لذا الوطن لي فيه منكور
خدعتني يا البحر خدعتني على بلادي
ماعرفتش كيفاش عميت وجابني البابور
كل يوم نخمم حتى طاب خدي
كان راسي حامي واليوم راه مذعور
إيلا نبكي وإيلا نخمم واش بيدي؟
دارهالي رايي خلي نروح توكور
ميات عربي تخدم وشافنا يهودي
اخدم ولا ماتبغيش انطح الصور
خدعتني يا البحر خدعتني على بلادي
ماعرفتش كيفاش عميت وجابني البابور
خدمة بخدمة، نخدم في بلادي
وعلاش نجي للوطن لي فيه محقور
سلم على وهرن بالله يا الغادي
وسلم على سيدي الهواري المشهور
كلمات أغنية من "حقي نبكي" وهي من الأغاني التي صنعت شهرة ومجد الشيخ "محمد بلخياطي"
من حقي نبكي
من حقي نبكي وحدي غير أنا *** حرموني من الخوخ في وقتو طايب
خدودها كالتفاح مطبوع بخانة *** يا سيدي وشوفو الرجال وما تكسب
الشعور مخبلين زي البستانة *** الشفايف ضراف والعنق يرهب
تحت العنق جبرت حالة مزيانة *** خلقة ربي رخام للعاشق يلعب
زدت شوية صبت رمان الجنة *** آ خاوتي قلعت ذاك الغلاف وبقيت نقلب
هبطت شوية بعد ذاك تسالمنا *** وعمرت زوج كيوس مدتلي نشرب
اشربنا من الغرام حتى روانا *** والقلب لي مريض ثم جبر الطب
ذاك اليوم صعيب كي يوم الفنا *** وبعد وقع الخلاف والقلب مع القلب
نبكو للأرض والسما والكائنا *** الدمعة تبقى تسيل والخد يصلب
كي ترقد الناس في الليل وتهنا *** تبقى تاكل في الفراش وتتقلب
نخاف الجوارين لا يسمعونا *** هذا نص الليل ما هوش المغرب
آ سيادي عقليتها صعبة مرة شينه *** ويحسن عون خليلتي تبغي تلعب
ما نهنا ما نتوب يا حوجي انا *** ولي ذاق الغرام يبقى يتعذب
حسراه على ايام في زهو وقانه *** وما ينفعني لا طبيب ولا طالب
تفكر خاطري جماعة يمينة *** وهذي الفرقة صعبة والله غالب
***
ما نهنا ما نتوب يا حوجي أنا *** ولي ذاق الغرام يبقى يتعذب
حسراه على ايام في زهو وقانه *** راه باقي النار في قلبي تلهب
تفكر خاطري جماعة يا منية *** هذا الفرقة صاعبة والله غالب
القدرة والمكتوب فرق بيننا *** وتفارقنا وما بقا حد يواجب
يا بن سيدي واش ينسي فرقتنا *** لا طالب ولا طبيب راني نتعذب
مثل السوسة في العظم هذي المحنة *** لي قتلتني العين كحلة والحاجب
نرجاو المكتوب تلحق دالتنا *** ولي فارقو صاحبو ليمن يهرب
هذي ثلث سنين وأنا نستنا *** كي نسكر نروح للباب نطبطب
يا فاهم الكلام لازم تعذرنا *** لو كان جات بالموت لازم نحارب
لاكن القانون صدَّر ومنعنا *** حتى انا خواف والحكم يراقب
هذي العدرة لقيتها غير خيانة *** لقاتني تبكي وتشتكي في أول حب
ولي صرالهم مثل ما يفهمونا *** ياك الحب يطوع لي هو تايب
الشيخ محمد بلخياطي
كلمات أغنية
الغادية للخدمة
يا الغادية للخدمة شعال تصوري *** ارجعي لداركم أنا نخلص الشهر
شعال نبكي منك كيما تبكري *** نقول ذي المخلوقة ما عندها زهر
العين كحلة والساق به تغيري *** الناس تعشق فيك وما جبتي خبر
هاتي يدك في يدي ويا تشوري *** نكملو المحنة لابغا نطيحو في البحر
شدي سرارك بلاكي لا تخبري *** خلي الحب يبقى بيناتنا في الستر
دايرك فال مع الصباح تربحي *** منين نلقاك نفرح يا ضو القمر
***
الغادية للخدمة وينتا تريحي؟ *** كل يوم عليك البكرة والعذاب
الله يحسن عونك اختي تربحي *** أنا نقلك ذي الكلمة وانتي ديري حساب
ردي البال خوفي عليك لا تزربحي *** البنزين والنار عمرو لا يكونو اصحاب
نوصيك غير اخطيك من الخلطة تنجحي *** نهار تتهناي ترديلي الوجاب
انتي ارض خصبة لازملك تتفلحي *** مانيش غالط هذي الكلمة في الصواب
***
قلبي عشق فيك ما نخليكش تتميزري *** عمري اعزيزة علي وانتيا اكثر
تفكري ذي الكلمة عمري تفكري *** قولي العاشق الله يأتيه بالصبر
أجي لعندي ما ظليش تتكبري *** نديرو نهار وخلي تقصف العمر
كلمات أغنية قرصتني لفعة سمية
قرصتني لفعة بقرصة سميّة ** وهذا اللفعة سمّها ما يداواش
حر السم صعيب ما لالو دوية ** نار المحنة صاعبة ما تطفاش
اصبرت لعذابها وما دارت فيا ** نساتني على محاين الدنيا قداش
هذا شعال من عام ناري مقدية ** لو نصرف في الذهب وما نهناش
راني غير ما زال طامع في الدنيا ** راني خايف لا نموت وما نبراش
لفعة عدرة يا الفاهم معنايا ** ولي فيها خاطري ما ننساهاش
هذا العدرة كواتني كم من كية ** جرحتني وانساتني ما نعرف لاش
وأنايا المسكين نعشق بالنية ** احسبت المحنة ساهلة ما نعرفهاش
المحنة لي كواتني عدراوية ** واه ولا لا صاعبة ما تتحصاش
جرحت عيطا ارجال قبلي جراية ** اشعال تعبو بعيونهم ما شافوهاش
ذي المحنة خلات في قلبي كية ** ولي ذاقت الهوي ما تترباش
عييت وسلمت فيها يا خويا ** لو كان نبقى هكذا ما نتهناش
سمحني في الأم ونسمح في بويا ** حتى عند الناس نرجع ما نسواش
با وعين ودال زيد سين اكسر اليا ** هذا هو اسمي الصحيح وما يخفاش
وهي سماوها صدا واليا ** يبقى فيا اللوم لو ما نذكرهاش
كلمات أغنية "البليدة"
اليوم ذا المكتوب داني امشيت حواس ** للبليدة قاصد اداتني القدرة
اجبرت زوج عوارم يتكبرو على الناس ** كل وحده منهم كلاتني بخزرة
امشيت للساقي سربالي شحال من كاس ** ولي المحنة في قلبو محال يبرا
راني نقارع في زهري وما قطعت لياس ** نوبات صاحي ونوبة تقبضني العبرة
وحد الجنان عجبني وحرمني العساس ** ابغيت ناكل وخفت خطيتو كبيرة
الخوخ في الشجرة طايب طيبو التلماس ** المريض ياكل منو كلي دار نشرة
هذي امرا عربية حرة وناسها ناس ** تكوي العاشق كي تلبس كل يوم شهرة
لو كان غي نلقاها مرة نعود لاباس ** خاطري يتهنا وتحلالي القصرة
كي دير الميني تمشي تهبل الناس ** ومرة تلبس جلابة هذي اليشيرة
الناس ترقد هاني وانا نبات عساس ** الليل طال عليا قتلتني السهرة
حالتي حالة لي عاشرين لحباس ** يا الساقي سربيلي ولي صار يصرا
كلمات أغنية شوف الحقرة شوف
من حق الانسان ينخلع ** كي ولاّ الفار ياكل السبع
كلا منو حتى اشبع ** والقانون يشوف
شوف الحقرة شوف
قانون واضحى فيه الخدع ** غلبو عليه اصحاب الطمع
من يهدر الصح ينتبع ** يشووه كالملفوف
شوف الحقرة شوف
الكذب والزور ولاَّ ينزرع ** يزرعوه في موضع الزرع
يحسبوه ايجيب النفع ** ويجيب المصروف
شوف الحقرة شوف
اتعداولنا على ارزاقنا ** واتصرفو فيه قدامنا
ما دارولناش حسابنا ** لا حشمة لا خوف
شوف الحقرة شوف
اسكتنا عليهم كلاونا ** وبهدلو الفن في بلادنا
هاذو لي تعاندو على الغنا ** راهم بالألوف
شوف الحقرة شوف
زوّروا علينا في حياتنا ** زوّروا على من قبلنا
ولي شجعوهم ضدنا ** راه الشي معروف
شوف الحقرة شوف
ما يحشموا على فعالهم ** خربو في ارزاق سيادهم
خلطو وجلطو بفكرهم ** والقانون يشوف
من خلطو حرقوا عمارهم ** فلحو ارض ماشي ارضهم
وايزيدو يكبرو فوامهم ** حسبو السدرة صوف
شوف الحقرة شوف
الدنيا غلب عليها الطمع ** من حق الانسان ينخلع
الفيران تاكل في السبع ** والقانون يشوف
شوف الحقرة شوف
كلمات أغنية "واش جابك ليا خيرة"
واش جابك ليا خيرة ** انتي صغيرة وأنا خواف
لوكان كاش ما يصرا ** انعود مسلسل بكتاف
يا اختي قتلتي عبرة ** قسمي المحبة واعطي لنصاف
غير ساعة وحده نبرا ** غير ليلة وحده وبزاف
بغيت نسهر معاك سهرة ** وخايف على روحي ننشاف
واش جابك ليا العدرة ** انتي صغيرة وأنا خواف
***
قالتلي يا محبوبي ** لاتخمم راني نبغيك
غير ساعفني في طلبي ** ولي بغيتها راهي بين يديك
قلتليها غير تكذبي ** راهم يباصوني اماليك
قالتلي عاهد ربي يا عمري ** حد واحد ما يسمع بيك
رديت ليها انا بوجابي ** يا خيرة ربي يخليك
زينة شابة تعجبي ** انتي صغيرة ونخاف عليك
***
واش جابك ليا السمرة ** انتي صغيرة وأنا خواف
انتي في تيارت المشهورة ** وأنا بلادي بعيدة بزاف
بلادنا شلف وماشي صحرا ** وظاهرة عند لي عرَّاف
كلمات أغنية "كي ندير يا تشطاني"
عشقتها عشقتني واحلفنا ما نخدعوش ** زين ذي الغزالة عجبني وايماتنا ما طالوش
بوها طلب الفاني والفلوس خيكم ما عندوش ** كي ندير يا تشطاني حوجي دراهمي ما حضروش
اداوها عدياني وانا دموعي ما نشفوش ** بكيت ما عذروني نهار اعطاوها ما حشموش
العفس والشيوخ تغني والكراريس ما ينحسبوش ** كي ندير يا تشطاني حوجي دراهمي ما حضروش
***
تحرم النوم علي ونوض نبكي في الليل ** منها كرهت الدنيا هاذي حالة لي قليل
آهيا يا عالي العليا مينتا ليام تميل ** وينتا تفرج عليا الدينار يعمل تاويل
كي ندير يا تشطاني حوجي دراهمي ما حضروش
***
راح الغزال انساني خلاني محير مدهوش ** بركاك من البكا يا عيني عيطا ارجال تعبو وما نالوش
كلمات أغنية " جا مرسول الزين"
جا مرسول الزين اخبرني ** احكالي بلي صار
قالتلو قولو سامحني ** اعملت معاك العار
نحكيلك لازم تفهمني ** ونعرفك خيار
لو كان بغيت من بغاني ** ما نرجع للعار
أنا كلام الناس اعماني ** وقالولي ضرَّار
طال الدهر وشفت بعيني ** وتكشفت لسرار
يا محمد اتسامحني ** آممو لبصار
خيالك راه مقابلني ** كل ليلة ونهار
رديتلها وجابي ثاني ** وتعرفني صبَّار
قلتلها يا الريم اخطيني ** طار حمامك طار
أنا ويح من خدعني ** واسكن في لوعار
اتمنيت حتى تدفنيني ** ونسكن ذيك الدار
لاكن معاك خاب ظني ** آممو لبصار
في الأول حبك عماني ** كسرني تكسار
رجعتيني شيخ نغني ** ونحفظ في لشعار
غير قليل الي يفهمني ** حسبوني تجار
لاكن أنا الزعاف اعماني ** وما بيا دينار
نغني علي لي نساني ** ما دامت لعمار
كلمات أغنية شعال غلطو فيا _ اغنية حديثة _
شعال غلطو فيا وغروني ** حسبوني فنان متأخر
يا ريتهم ذو الناس عشروني ** وعلاش يحكمو على المظهر
عندهم حق منين سمعوني ** نغني بالقصبة ونستخبر
جاهل من الجاهلين وسخوني ** وأنايا انسان متحضر
مانيش عارف واش عدُّوني ** معاهم ما لقيت واشتا نهدر
مثلوني للي قلدوني ** راني مخلّي حكايتي في السر
أنا كبرت مع الموسيقى ** ولاد بلادي كل تعرفني
كنت متمني نكون فرقة ** والامكانيات خانوني
مع الزمان دارت الورقة ** كاين شي هواة لاموني
ما حبونيش هكذا نبقى ** ذا الميدان ما هوش ميداني
ولصق فيا البعض كاللصقة ** مكاش لي حب يعذرني
وانا حلفت نهاية الحلقة ** بالقصبة ما نزيدش نغني
شعال غلطو فيا وظلموني ** حسبوني فنان متأخر
كان عندي قصاب يفهمني ** لي ما زالني بيه نفتخر
حافظ الموسيقى ويحفظني ** من غيرو مكانش من يقدر
نغني بالشرقي تبعني ** نغني المغربي زيد أكثر
عزوني في النمس عزوني ** عاش معايا سنين وتشهر
فارق الدنيا وفارقني ** الله يرحمو ويفيدنا بالصبر
الـــــغــــريــــب
عايش وحدي غريب برَّاني ** ما عندي لا خي ولا آب
نبكي ما جبرت من يصبرني ** لي نحكي لو ما يرد وجاب
الرومي محال يفهمني ** هدرة عربي رغمة الصواب
القدرة والمكتوب قاسوني ** نتمحن ما دامني شباب
لكن بعض الناس غاضوني ** كي خرجو من بلادهم شيَّاب
غاضوني شي رجال يا غبني ** يخدمو في خدمة العذاب
همّ الغربة صعيب بكَّاني ** بكاني وبكِّيت يا لحباب
سيليا لمطار من عيني ** على وطن الكرامة والآداب
من حقي نبكي على وطني ** نبكي ونبكِّي لي غيَّاب
ايلا مت شكون يدفني ** يدفنوني غير في لصناب
أهلي وحبابي ما يشوفوني ** هوما يسمعو حتى نعود تراب
سهل يا ربي على الجاني ** يهديه ربي ما يدير حساب
الراجل ما يشوفش للفاني ** عيشة الغربة عيشة الطلَّاب
يا سامع الكلام سامحني ** ملفرقة والهم راسي شاب
كان كتمت هم ما تكذبني ** شفت قبلك ما تقول ذا كذاب
سقسو سان تيديان تعرفني ** عشت فيها عامين جنبي طاب
عايش وحدي غريب براني ** ما عندي لا خي ولا آب
نبكي وما جبرت لي يصبرني ** لي نحكي لو ما يرد وجاب
يا طير روح بعيد
كتبت يوم 10 فيفري 1983م
يا طير بالله روح بعيد ** سلم على ضو عينيا
قول لها الملقى نهار العيد ** ان شاء الله ربي يكمل المنية
بعد الفراق يكون حب جديد ** نستقبلك مثل هدية
ذاك اليوم يكون يوم سعيد ** ملقانا بلفراح والنية
***
يا طير بالله روح بعيد ** سلم على ضو عيني
قول لها الملقى نهار العيد ** ان شاء الله نتلاقو بالنية
**
توحشتك وبغيت ليك نعيد ** نحكي لك شي سرار خفية
نحكي لك ما صار بالتأكيد ** كي تولي قدام عينيا
***
يا طير بالله روح بعيد ** سلم على ضو عينيا
قول لها الملقى نهار العيد ** ان شاء الله ربي يكمل المنية
***
قول لها وعلاش يا عمري ** راكي جافيتني بلا سبة
نحكي لك ما جرى في عمري ** نسيتيني ونكرتي المحبة
نحكي لك ما شفت بأمري ** نسيتي ونكرتي المحبة
****
يا طير بالله روح بعيد ** سلم على ضو عينيا
قول لها الملقى نهار العيد ** ان شاء الله ربي يكمل المنية
***
ما كنتش ضان علي تخدري ** وتهزك لرياح كالقصبة
يا طير بالله روح بعيد ** سلم على الغزال نادية
يا من صابنا نكون ساوى
يا من صابنا نكون ساوى ** أنا والي فيه نهوى
نجوزو ليلتنا حلوة ** ويطفا ذا المشهاب
اهنا تطلع لي النشوة ** نزها مع ذا الغزال زهوة
غي نشوفها العين تروى ** نبرا من العذاب
جرحتني بجراح قوة ** قلبي من غرامها تكوى
ما قدرتشي يا الخاوة ** فيها زهري خاب
انجرحت وسال دمي ولجراح هوما سباب غرامي
جرحني يا ناس همي ** قاتل وغدار
( جرحني يا ناس سمي ** قاتل وغدار )
يا طير تدي لها سلامي ** فهمها معنى كلامي
قول لها يا بنت عمي ** قتلوني لضرار
راني شفتك في منامي ** كليتي وكليت من طعامي
ومن بعد صبت الخوخ رامي ** في صدرك احمار
آجي عندي وصارحيني ** وعلى سرك فهميني
وعلاش راكي معذبتني ** وأنا نعشق فيك
عشقتك ربي بلاني ** بسبابك كثرو محاني
تبعتك وشتا داني ** وغلطوني عينينك
راهو عاشق فيك جني ** بسبابك كثرو محاني
راني بين يديك
راهو عاشق فيك جني ** باسمك في قلبي نغني
حنيني يا لغزالة حني ** راني بين يديك
ما ننساكش طول عمري ** إذا نهار سكنت قبري
ويلا مت يجيك خبري ** وتقولي مسكين
عييت صابر طال ضري ** ما ينفع حتى دوا لضري
نتفكر غير فيك
المكيدة _ 1 _
في فراشي راقد وجا الهم مصادف *** مكتوب ربي مكانش لي كان داري
فتشو لي داري واداوني مساعف *** ضجة اندارت بلخف انطلقو اخبار
واشتا نحكي أنا على عمري واشتا نخرف *** مكيدة نخدمت ما ننساهاش طول عمري
تخطيط أمينة وخاوتها جاب هادف *** صوموني رمضان في الحبس عند كبري
اعطات شهادة للشرطة بشي مزيف *** باصاتني وبكاتني ويتمت الذراري
لو جات صلة الآب فيها تكون عاطف *** ما تهون لي كرامتي ولا تهون قدري
منين جات حاجة محتومة علي مسيف *** مكان ما نقول نوكل لله أمري
شي ما عملتوش ودارتني فيه طرف *** في نهار واحد خربتني وخلات داري
حتى ابن امها واشهد باش يكحلو الملف *** مكانش من استدعاه للشهادة وراح يجري
والله ما خذاش برايهم يا للأسف *** لو جات بيديهم فيا واش راه صاري
يعيا الباطل يراوغ والدهر يكشف *** الحق يرجع ليا ونفرح في انهاري
انسجنت في باطل ربي والناس تعرف *** والله غالب علي ما قريتش حذري
ولكن الصح اجناحو ماهوش قاصف *** يروح ويولي لمكانو كالقمري
لي ما عمل والو عمرو ما يكون خايف *** يقطع البحور ولجبال ويزيد الصحاري
كانو ناويين يخلوني وحدي مجيف *** وأنا الله معاوني نزيد ليه شكري
الشجرة لي زبرولها عرافها تزيد تخلف *** قبل عام تقول لهم ذوقوا ثماري
من دار فيا الشر ما ننسى ولا نتلف *** جرحني بجرح والجرح تخيط راه باري
طحت ونضت وراني ما زل واقف *** انسان حساس وشاعل في القلوب ناري
معروف في كل مكان ومانيش تالف *** والناس تعرفني ايذا كنت ضربت صدري
مانيش عايش كالبقرة غير باش نعلف *** عندي سلا ح لي باش نخلف بيه ثاري
ربي اكرمني واعطاني مخ باش نصرف *** والخير ما يفارقنيش ايلا سكنت قبري
بسيط عايش متواضع مانيش لاهف *** الموت كاينة ندي من الدنيا غير شبري
ولي دمرني للحبس ما عرفش كي تصرف *** راح فيها من خدع باباه ديسباري
المكيدة _ 2 _
يا آمينة حوسي اسمك *** قولي لأمك مين جبتيني
بلعداسي ما هوش ذا أصلك *** أصلك على الاسم براني
اليوم خرجت للصح نعلمك *** ايذا كنت نموت متهني
في الأول ما نويتش نجرحك *** كنت صابر وحافظ لساني
ضربتيني بشكة وادخل سمك *** ما نخليش السم يقتلني
لحقت ساعة وين نفضحك *** ونخليك حديث ومعاني
انتي لي هلكتي نفسك بيدك *** جبتي لعمرك ضر دخلاني
لازملي نعطيك تاريخك *** والي كذبني يواجهني
يام حبس الحراش تشهدلك *** خيرة ذاك العام خدعتني
ضربها ريح الغرام خطفاتك *** شعال كنت ظان وخيبت ظني
منين حسيت واكسبت لك خبرك *** بغات بدمعتها تغلطني
تلمست في بطنها زعذ رجلك *** كي زيرت شوي ركلتيني
جبت الموس وابغيت نجبدك *** نقتلها ونبرد جنوني
لكن الحظ كان في صفك *** أوما نخلعت بكات غاضتني
خافتني نباصي على جالك *** نرجع للحراش من ثاني
قالت يا ولدي استر عرضك *** إذا بغيت الله غير ساعفني
ساعفت والدتي تبنيتك *** خفت دعوة الشر تلحقني
وانهار زدتي رحت سجلتك *** استرتك قلت ربي يخلصني
منين كبرتي زدت قريتك *** قلت بالاك هاذي تشرفني
حكمك مرض الجلد عالجتك *** اصرفت وما غاضني فاني
ما نجحتيش للخارج ابعثتك *** لو ما نيتي شكون رغمني
بلي طقت عليه عاونتك *** ما كنت ظان هكذا تخونيني
حتى في سلك الأمن دعمتك *** وين تربصتي يعزوني
شعال دافعت عليك في غيبتك *** عند الناس لي يحبوني
لي يلقاني يقولي بنتك *** راه عندنا كونك مهني
بعدما تخرجتي وجا دورك *** في قبر الأحيا دفنتيني
كلي ما ربيت ما صنتك *** كونكي بنتي ما تخونيني
****
كلي ما ربيت ما صنتك *** كونكي بنتي ما تباصيني
والشرطة خدمو بتحريضك *** ما همش هوما انتي دمرتيني
يوم جابونا (حجزونا) وافرح قلبك *** تجرتي فيا وبعتيني
حسبتيني ما كنتش فايق لك *** وأنا قلبي عليك خبرني
جيتت تجسي النبض غير في غرضك *** وتقوليلي شعال راك غايضني
غايضني انتا وزايدة مرتك *** لي جابوها معاك بلعاني
شعال كنتي مغلطة ظنك*** كلام فارغ ما ترفدو وذني
ما غاضتك زوجتي ولا غضتك *** انتقمتي انتقام عدواني
كل ساعة تجي تبردي جنك *** وتجيبي القرودة يشوفوني
السم القاتل كل من تحتك *** وانتيا هي لي دمرتيني
دمرتي لبرة غير في عقلك *** ديتي ربع يام بلعاني
يا آمينة حوسي اسمك *** قولي لأمك مين جبتيني
انتقمتو ملي كوات امو *** شوية منها والكثر مني
عملتي خطة باش نعذرك *** ونقول القانون وقفني
السم القاتل كل من عندك *** انتيا هي لي دمرتيني
تعيا السنارة وتجبدك *** ويجيبوك للعرجة نتي ثاني
كيما جابو خوك من قبلك *** لي حرضتيه باش يعصيني
ساعة تطيحي وينهدم ساسك *** تنهزمي كيما هزمتيني
إذا ربي يحبني يعجلك *** ينتقموا احبابي وعدياني
الرودة تدور تعيا وتقلبك *** ذو وليام ربي يفرحني
بكاو ولادي حد ما شفك *** خمسة جوان ما زال جارحني
نتمنى ندير حرب من أجلك *** ان شاء الله ربي يوفقني
الحرب هو كتاب من أجلك *** يقراه الجمهور يعذرني
المكيدة _ 3 _
راني معلول
راني معلول علتي ما تشبه عله *** يا ناس كي ندير ضر قلبي باش نداويه
العبد المعسول صار في المقلة يتقلى *** مكان كي يدير صار متكتف من يديه
نمشو (مالصول) والهموم علي شله *** بكي بدموع من خرج من الحبس نوصيه
نقلو بالله يا الخو روح ضرب طله *** وشوف ولادي وكل واحد منهم رضيه
امهم زبلتها ودارت لهم وحد الزله *** ما بقى لهم حد غير ربي والتكل عليه
وليداتها صغار خلاتهم هملَّه *** احكمها ريح الغرام ما قدرت تسمح فيه
ايلا اسمعت قوال غير ما تشقاش تكذب *** عمرو الدخان لا طلع وما تكونش النار
فكرت وحللت بتحليل مرتب *** الشي لي صرا لي كل خارج من أهل الدار
تطفر فيه غير لي ما هوش مجرب *** ولي مجرب ذاق واروى من ذو للمرار
تعذبنت وما زال في لمحان نحارب *** قليل كي مثلي لي تحمل هذي لخطار
خدعة كبيرة شاب منها يرجع شايب *** ..............................
(خلل في نهاية التسجيل حال دون اتمام كلمات القصيدة)
يا الطاير مالك تبكي
يا الطاير مالك تبكي واشتا بيك *** عيد لي واش صرالك نعطيك بالي
يا الطاير عاهد ربي ما نآذيك *** شفيتني وبكيت حتى أنا قليل والي
لو نعيد لك همومي يا القمري نسيك *** أنت شتا صرالك في الدنيا كيما صرالي
لا تامن حبيب يا صاحبي يعريك *** دير كالبحر وصفي ويدان الحمالي
يا القمري جيت تبكيني نبكيك *** حتى أنا ضحيت غريب وبعدتني عزالي
لو دير النية ها القمري نربيك *** تربي الجنحة بيهم تطير في العلالي
تربي الجنحة وتفوت على لي سمح فيك *** كلي خدعني أنا وامشى معاه عقلي
تروح يا القمري عند لي متهولة عليك *** لا طولو في الغيبة (حيموت) والي
بعد ما تريح ترجع لي اهنا نوصيك *** تدي الوجاب للبنت لي فاضحة هبالي
كان غرب الحال تبات في الشبابيك *** والصباح تصبح ثما مع غزالي
حط فوق الليسي وارجاها تجي ليك *** تدير ليك السلوم تطلع من السكالي
يا القمري خويا هذي وصايتي ليك *** بعدما تروح لصافية وتجي مولي
لا تخمي قوللها ما زال نبغيك *** ايلا نسيتك يا صافية شتا بقالي
سباب فرقتنا آعمري غي ماليك *** منين درقوك عليا وانتيا قبالي
ذاك الشهر زعما لي قلت فيه نديك *** كانت سباب الفرقة والأجل تالي
نبات ساهر طول الليل نخمم عليك *** الدموع تهوطل والنوم ما حلالي
ناظم القصيدة بلخياطي انسبها ليك *** طايع الرجال العلما عز راس مالي
فضيلة
سيادي أنا سباب عمري فضيلة *** منها راني مريض خايف لا نهبل
أنا كنت زمان زاهي في غلفة *** حتى ضربني ريح جاني متقبل
هذا الزين مقيوم من كل مسالة *** نصبر ولي كاتبة لازم توصل
هب نسيم كبير جاني من القبلة *** غالق الطرقان ليا ومقدل
لكن ذا بشار بعثاتو طفلة *** بعثاتو مرسول جا ليا عاجل
تقدم ومد ليا رسالة *** شديتها وبقيت نقرا ونسول
كي سولتو منين هاذي المريولة *** قال اتبعني يا الخو ليها توصل
اداني رحنا جوالة *** ماني داري بالمحاين كي توصل
كي وصلني نصيب هاذي الغزالة *** تمشي مشي القمام ثم وتزعبل
بانت لي من قريب نخلة تتلالا *** ذاك الشعر الزين طايح متخبل
وحواجبها ظراف والصيفة حالة *** في عينيها تقول جعبات مكاحل
والسيقان ظراف دبلوني دبلة *** يا خوتي سبحان ربي ما فصل
(تتولى) بالقد والباقي حالة *** في زينها يا ناس ( لا تتمثل)
من الأغاني الحديثة للشيخ محمد بلخياطي
يحشم ويخاف
يحشم ويخاف من يدير الشر *** ولي يدير الخير ما يندم
تحمل يا قلبي وزيد اصبر *** ما تبقاش كل وقت تتألم
مع النسا راني موالف نكابر *** ما نيش غير اليوم نتعلم
قل هاذي خيبت بعد النظر *** والله ما كنت ظان تسسلم
كنت زاهي بيها ونفتخر *** مسكنها في القلب تتنعم
كي خدعت هي لي تخسر *** شي لي بناتو كل يتهدم
يا حسراه وين راح ذاك القدر *** لقد كان من خيالها يحشم
ومين كشفها وشاف السر *** ولا فيها اليوم يتحكم
زلجت زلجة وكلش تكسر *** الشرف تمس بعد محترم
وضيعت ولادها لي قصر *** كان الخير في يدها وحرم
ضيعت ولادها لي قصر *** دعا وعبد الكريم بلقاسم
وحيد وايمان وياسر *** هيبة ومحمد صالح تحطم
وشوهت سمعتها أكثر وكثر *** فم تكسر باش تتكلم
***
وشوهت سمعتها أكثر وكثر *** فم تكسر باش تتكلم
لو جا عندها القلب تنتحر *** كيفاش بعد العز تنهزم
عاشت في الطيبة من السكر *** واش طلبت مني نجي عازم
وأنا معاملها حسن وأكثر *** وهي في الشؤون تتحكم
منين دخلت الحبس بان الضر *** الحاجة الفايحة كلها تنشم
شفت عليها منام بعد اظهر *** لقيتها في بحر غامق تعوم
نضت مخلوع وبقيت نستغفر *** قلت ذا الشي صح ولا حلم
من ذاك اليوم بقيت نتأثر *** حتى قالو خلاص باعت الخاتم
حسبتني مت ما نجيب خبر *** تعمل واش بغات ما نعلم
قالت خلاص دفنوه واستقبر *** اتدفن وراه متردم
وانسات بلي كاين القادر *** هو لي ما يخاف وما يحشم
عساس على الناس ينتظر *** المظلوم يغلبو على الظالم
وأنا بنيتي انزيد ننتصر *** ومن ظلمني للواقع يسلم
هاكذا يصرا لها لي تعثر *** تتدفن حية وتتردم
nouariahmida
06/09/2012, 23h44
شتا داني نعشق فيها شتا داني
شفتها تتبسم من بعد غلطتــــــــــــــــــــــــــــــني قلتلها هاذ الغلطة طاحت في يد عطشان
شتا داني نعشق فيها شتا دانـــــــــــــــــــــــــــــي شتا داني نعشق فيها نبات سهــــــــــــــــــــران
دارت هاذ الغلطة خرجت من دار غاني راه سامح فيها مول الخير شبعــــــــــــــــان
حتى جابهالي زهري فالحين واجبـــتـــــــــــــني مين قبلتلي هاذ العدرة وحيد دهشــــــــــــان
ركبتها فالوطو خفت لا يلحقونــــــــــــــــــــــــــــي كامل هاذ الشي وفاقو بينا العديــــــــــــــــــــــان
هي تقولي اذا مت معاك مت هانـــــــــــــــــــــــــــــــي وانا نقول ليها ما تخافي عليك لمــــــــــــــــــــان
مازالت الرونو تعفس كوني مهنــــــــــــــــــــــــــــــــــي مازال تلقاي فطيمة تروي لغصـــــــــــــــــــــــــــان
بغيت نسأل فيها ليا عندها النكـــــــــــــــــــــــــــــــــــــــوة قالت ما جبتهاش أنايا جيت غاصــــــــــــــــــب
حين لزت ليا طلعت لي النشـــــــــــــــــــــــــــــــــــــــــوة دهشوني ذزك العينين والحواجـــــــــــــــــــــــــــــــــــــــب
الشعر مخبل والشفاف كي الحلـــــــــــــــــــــــــــــــــــوة تلمستها خويا وشعلت الغوالــــــــــــــــــــــــــــــــــــــــــــ ب
قبل ما نشعلهم جبرت غير قــــــــــــــــــــــــــــــــــــــــــــــوة مطرح مفرش غير ما يشقاش تتعـــــــــــــــــــــــــب
يا الطالب سبب ليا وخوذ قهــــــــــــــــــــــــــــــــــــــــــــــــ ـــــــــــوة لكانش ما عندك حكمة غير جـــــــــــــــــــــــرب
حل الكتاب عليا اما قلبي تكــــــــــــــــــــــــــــــــــــــــــــــــ ـــــــــــــوا الزين طوعني ياسيدي الله غالــــــــــــــــــــــــــــــــــــــب
djalal wahdani
13/10/2013, 23h04
قصيدة الدراهم للشيخ محمد بلخياطي
الدراهم يسجو الجايح ويفطنوا من كان سارح
يسترو من دار الفضايح غير كلي ما دار والو
*****
الدراهم يوفو الكلمة بيهم تتعلى القيمة
ويفتحو عينين لعمى يصبح غاير من خيالو
*****
الدراهم يفطنو الغافل ويسلكو من كان حاصل
بيهم العكلي يسترجل فالحين يتبدلو احوالو
*****الدراهم يطورو الحالة مولاهم من الفراغ يملى
يشري واش حب جملة سعد اللي ربي عطالو
*****الدراهم يسقمو البنادم ويفيقو من كان نايم
يصحى بعد اللي مغيم والمريض يبراولو علالو
*****الدراهم يسقمو العوجة ويزيدو للرخيص درجة
يغرس اليابسة وتسجى بيهم عيطى جياح نالو
*****الدراهم يجبرو المكسر يطلب واش حب يحضر
واللي ماعندوش قاصر مسكين ينقطعو احبالو
***** والدراهم هما الدراهم
achouronline
17/03/2015, 12h23
شكرا
Powered by vBulletin Version 3.8.4
Copyright ©2000 - 2024, Jelsoft Enterprises Ltd