خى .. خى .. لمحمد عبد الوهاب

[سامى امين]

برجاء تحليل اغنية محمد عبد الوهاب خى خى حبيبى قاسى لية يا خى

[الألآتى]

أخى العزيز

أرجو أن تذكر لنا .. لماذا إخترت هذه الأغنية بالذات .. وماهى ذكرياتك عنها ومعها ..

حتى يكون هناك تفاعل .. لأن هذا هدف القسم الأصلى ..

[سامى امين]

مستر محمد كل الحكاية انى كنت معزوم فى فرح فاخر جدا وفؤجئت بمطرب شعبى مشهور بيغيها وكانت افضل من كل الاغنيات اللى غناها كسرت الدنيا تانى يوم تنافسنا انا وشلة الكفتجية اشباة المحترفين مين اللى يطلعها ويعرف مقاماتها وانا بحب اتأكد من حضرتك

[الألآتى]

هههههههه .. بتضحكنى حكاية الكفتجية دى .. ولما هما كفتجية بتمشى معاهم ليه

سأقوم بتحضير التحليل فوراً .. حاضر

[سامى امين]

يا مستر محمد هما معايا فى المدرسة من ابتدئى اتنين من مدرستى واتنين من المدرسة اللى جنبنا كلنا شاطرين فى الدراسة وبنعزف كمانجة هما كفتة فى الموسيقى بس انا سميتهم كدة بعد ماعرفت حضرتك وباخد منك الاجابات النموذجية

[الألآتى]

ياعم بكره تبقوا أساتذة .. ربنا يوفقكم .

[الألآتى]

بسم الله نبدأ فى تحليل أغنية ( خي )

كلمات : حسين السيد

ألحان وغناء : محمد عبد الوهاب

نحن أمام عاشق خجول .. مكسوف يواجه المحبوب بأوجاعه وألآمه ..

فإستعان بواسطة .. بشخص أخر يرسل معه مايريد أن يقوله لحبيبه .. ليس المهم أن يكون هذا الشخص حقيقى ..

المهم أنه حد تانى والسلام .

( حلفه بويلى .. وبنهارى وليلى ) و ( أمانه لو تقابله .. تقوله الفرح ناسينى ) و ( وتقوله يشاور عقله وينسى يوم ويجينى )

وباقى الأغنية على هذا المنوال ..

نأتى الأن للحن ..

عمنا عبد الوهاب إختار مقام الراست ليبدأ به الأغنية .. وليكون الراست هو المقام المسيطر على العمل ..

بدأ بمقدمة موسيقية تتحاور فيها الوتريات مع القانون والناى والماندولين ..

المقدمة كلها راست .. لم يخرج عن المقام ..

ومع إيقاع المصمودى الكبير .. وهو إيقاع ثمانى الميزان .. أى ثمانية أضلاع فى المازورة الواحدة .

ويتغير الإيقاع للمقسوم بعد أربعة موازير من المصمودى ..

ويغنى عبد الوهاب ( خى .. خى .. حبيبى ليه قاسى ياخى ) .. من الراست أيضاً ..

ويظل مع الراست حتى ( وحلفه بويلى .. من نهارى وليلى ) لينتقل للحجاز

ليعود مرة أخرى للراست عند ( أهـ يابا .. أهـ يابا ) لينهى المذهب .

ونقف هنا شوية لنناقش هذه التحويلة .. هى تحويلة بسيطة وطبيعية جداً .. مافيش أى مشكلة ..

يعنى من الراست للحجاز .. ومن الحجاز للراست .. ياقلبى لا تحزن ..

أمال فين المشكلة ؟ .. المشكلة أن العودة من الحجاز للراست كانت عن طريق مقام السوزناك

ومافيش أى مشكلة .. لأن السوزناك يتكون من جنسين ( جنس راست وجنس حجاز )

يعنى يروح من الراست للحجاز وبالعكس .. العملية فى بيتها .. نكمل .

تبدأ لازمة موسيقية جديدة .. ومع إيقاع الواحدة الكبيرة .. تقسم الفرقة ليغنى عبد الوهاب ( أمانه لو يسألك .. فى العبد عن حالى ) من الراست أيضاً .. ولم يخرج عن الراست هذه المرة .. لا حجاز ولا غيره .

ونسمع لازمة موسيقية جديدة تمهيداً للكوبليه الثانى ..

لازمة موسيقية من النهاوند .. تؤديها الفرقة بكاملها ..

ومع تسليمة من البياتى يؤديها الناى .. يغنى عبد الوهاب ( يافايت قلبى على نار حبى )

ويتحول الغناء للكرد عند ( الشوق خلانى أبعت لك .. مرسال الروح والعين )

ويعود للراست عند ( ياتجينى ياتقول لى أروح لك .. ياتقول أروح منك فين )

وتنتهى الأغنية كما بدأت بالراست وبنفس المذهب الغنائى ..

أرجو أن أكون وُفقت فى هذا التحليل المتواضع

[سامى امين]

قمة يا مستر محمد تحليل منطقى ومقنع جدا الاغنية القادمة اهواك الدور الدور اهواك هى اللى عليها الدور

[سامى امين]

مستر محمد المايسترو المثقف الخلوق الجنتلمان بمعنى الكلمة بليز ابداء فى تحليل اغنية اهواك وهى فيها المقام ابو حجازين اللى قابلنا فى اغنية قبل كدة اللى هى كل ماقول التوبة بتاعت حليم

[الألآتى]

مستر محمد المايسترو المثقف الخلوق الجنتلمان بمعنى الكلمة بليز ابداء فى تحليل اغنية اهواك وهى فيها المقام ابو حجازين اللى قابلنا فى اغنية قبل كدة اللى هى كل ماقول التوبة بتاعت حليم

ههههههههههه .. مافيش حاجه إسمها المقام أبو حجازين .. إسمه حجاز كار ياسامى ..

وله أسماء أخرى حسب درجة الركوز ( شد عربان ، شاهيناز ، سوزدل ، أويج آرا )

حاضر .. سأقوم بتحضير التحليل وأعرضه عندما ينتهى إن شاء الله .