الورد .. وأعمال أخرى [الأرشيف] - منتدى سماعي للطرب العربي الأصيل

ممدوح محفوظ

27/04/2010, 18h11

و ليه ديماً تقولى كلام
وتقول عنيكى كلام تانى
و بنظره ابتدى الاحلام
وبكلمه ارجع لمكانى
وادوب فيكى واغنى وابوح
وارجع والفؤاد مجروح
وادوب تانى
وأرسم سكه للعاشقين
واتوه وأنسى عنوانى
وليه ديماً
يا غنوه حب
تملا الدنيا احلى كلام
واستنى
عشان أسمعها منك يوم
بهمسه أو بحتى سلام
تلامس فيه ايدك ايدى
ويوم قربك ده يوم عيدى
و عمرى م اتوب
وادوب تانى
وارسم سكه للعاشقين
واتوه وأنسى عنوانى
وليه ديماً

ممدوح محفوظ

29/04/2010, 20h32

قولِى الحقيقه
ولو دقيقه
و ما تظلميش قلبى الى حبك
ليه تقتليه بإدين رقيقه

اول ما حبيتك زمان
كانت عنيكى كتاب مفتوح
كانت تبوح
بأحلامك .. بأوهامك
كانت سكون وحنان و امان
اول ما حبيتك زمان
دلوقتى بحر غريق غدار
مليان اسرار
و ف لحظه تبقى الحنه نار
تحرق سنين
وبتمحى احلى كلام قلناه
و الضحكه تبقى فِ قلبى اه
و الاه الم ... والاه ندم .. وبحور غريقه
قولى الحقيقه

اول ما حبيتك زمان
كنتى معايا ... حتى وانتى مش معايا
كان الكلام يجمع قلوب
برد الليالى يدوب
و ف همسه قلنا ف حبنا حكيات
و ف لمسه طرنا فى السما مسفات
دلوقتى ليه ...
وهقولها ليه
حتى الكلام مبقاش يفيد
والخطوه بنا بلاد بعيد
دلوقتى نهرب مِ العتاب
و ف حبنا كانت قلوبنا زمان جريئه
قولى الحقيقه ...ء

ممدوح محفوظ

15/05/2010, 20h17

و عرفت يا قلبى الغُنى بعد السنين تانى
الحب ده دوبك و يا ريته ما جانى
ارجع يا قلبى عن طريق دموعه كتير
وتبقى من بعد ما كانت البريء .. جانى

ممدوح محفوظ

15/05/2010, 20h25

يا قلبى ارجع لى تانى وكفياك أوهام
وانسى الى غير طريقك هزل كان أو هام
انا طبيبك وعارفك والدوا عندى
لأرد بابك وادارى الوحى والإلهام

ممدوح محفوظ

15/05/2010, 20h58

ولما جانى الهوى انا قلت ده وعدى
يا قلبى اجمد وقاوم , اهى شوطه وتعدى
رمش العيون ده خطير ايا تدوب فِ هواه
واعمل لنفسك حدود , حرص ولا تعدى

ممدوح محفوظ

16/05/2010, 18h39

تعديل (اياك)
ولما جانى الهوى انا قلت ده وعدى
يا قلبى اجمد وقاوم , اهى شوطه وتعدى
رمش العيون ده خطير اياك تدوب فِ هواه
واعمل لنفسك حدود , حرص ولا تعدى

ممدوح محفوظ

16/05/2010, 18h55

دى صوره ولا خيال ولا دَ طيف شارد
يا قلبى فُتْ المُحال وهمك صبح مارد
الرمش ولا العيون بتغذبك فى هواك
ولا الكلام والدلال , اهو برضه شيء وارد..

ممدوح محفوظ

18/05/2010, 20h08

اقول يا قلبى إختشى يِقولى دَ عنيَه
حبيبى وكلمه احِبِك نَفسها شويه
حبى ده شعر وزجل عالى ولحن جميل
يا قلبى كفايه كده , إلرك عَ النيه

خدت قلبى ورُحْت بعيد عن الاماكن
الى فيها طيف حبيب القلب ساكن
لجل ما ينسى ويرجع ليا تانى
كل ما اقول له كفايه .. يقولى لكن

ممدوح محفوظ

18/05/2010, 22h02

يا ورد بلغ حبيب القلب منى سلام
غايب وفايتنى ما بين جراح والام
و يا سلام لو يرجع مع الربيع حسنه
يزول همى ويصفالى الزمان يا سلام

ممدوح محفوظ

19/05/2010, 21h56

هل الربيع علينا وفْ إيديه ورده
صَحصَح قلوبنا الى كانت فى الشِتا خُرده
نسهر ليالى بين الفن والانغام
ونسمه الليل تِعدى عَ القلوب بارده ...ء

ممدوح محفوظ

19/05/2010, 22h37

قفلتْ يا قلبى بابى و ( عندنا تصليح )
يمكن اصلح كلامك الى فيه تَلميح
دَ نَا مُهندس و اصلّحْ مِ المَكن اُلوفات
ما إدِرتش استَعدِلك .. خليك شويه مريح ...ء

الباشاقمرزمان

20/05/2010, 12h45

ممدوح محفوظ

20/05/2010, 14h47

الأخ / ممدوح

السلام عليكم ورحمة الله وبركاته

كلام حلو وجميل وكله تجليات
وانت ماشي على نهج الرباعيات

الكلام حلو الأفكار كويسة وفيه تصوير جيد
ده رأي سميع مالوش غير السمع بس

ودمت لي بكل خير

شكرا صديقى يا قمر الزمان يَ كبير
سعيد بِتَعليقك رغْم ان المُجامله كتير
مكَتَبْتِش اشعار دَ الشعر الى كاتِبْنى
طلَعْت من قلبى كُل إلى ضناه .. يا أمير ...ء

ممدوح محفوظ

20/05/2010, 22h40

و رِجِعت يا قلبى تانى تقولى دَ واحشنى
عاوز اشوفُه ... بسْ إنت الى حايشنى
خليك يا قلبى بعيد عن حبها وناره
دى فِ لحظه تموتنى .. و فْ لحظه تعيشنى

ممدوح محفوظ

20/05/2010, 22h46

يا نِجم عالى فِ السَما و مَشْهور
باهى فْ عبيرك زَى عِطر زهور
تِئسرعُيونا فى هَواك لحَظات
ما تبانش تانى الا بعد شهور

ممدوح محفوظ

21/05/2010, 19h07

البُعد نِسْيان و فِ النِسيان هدوء وامان
و قلبى عاشْها نَغم .. لَحّنْها بِعود وكَمان
وكل مَ انسى حُبك الاشواق ترَجَعْنى
انسى نِسْيانك وافتِكْرك كَمان وكَمان

ممدوح محفوظ

21/05/2010, 19h47

واخِدْنى وياك يا قلبى .. مَ تقولى رايحين فين
دِ السكه طالت بينا... والخطوه بئِت الفين
و ليك يومين سَاكت ... ما تقولى ايه صابك
بقى هى دى نِهايتك .... الدفن و التكفين

ممدوح محفوظ

21/05/2010, 19h48

هاتو الكفَن لقلبى الى فِ حبُه مات
النَبض شَغّال .. لكنُه قَطْع كَلِمات
حَ اعيش وحيد ودَيما حَ ذكُرك بالخير
واحفُر فِ قَبركْ واكتِب عن هواكْ علامات

ممدوح محفوظ

22/05/2010, 17h50

عمَلتْ للقلب مَيْتَم والعَزاء واجب
إلى سَعيد شَمْتان و الى عَاقِد الحاجِب
يا خْوانا ما يصَحِش كِده .. إدعوله بالرحمه
مَ عِجبشْ فِ حياته .. و فْ موته مِش عاجِب

ممدوح محفوظ

22/05/2010, 17h52

لقيت وسْط المُعَزِيّين كِتير سِتات
الله يرحمك يا قلبى .. ياما عرِفتِلَكْ حكايات
قُلت ادَورْ عَ الى قلبى مات فيها
قالو دِ بعته اعتذار .. عندها انشِغلات

الباشاقمرزمان

22/05/2010, 22h57

تعبت قلبي والله كتير كتير معاك
واقول ابعد وانسى انسى هواك
قولي ابعد عنك واهرب منك ازاي
وقلبي اللى واجعني تملي معاك

مشاركة كدة على الماشي

ممدوح محفوظ

23/05/2010, 18h36

مَ احْلاك يا ليل بَلا قلبى وِاوجاعُه
انسَامَك الحِلوه واحلى كلام واسْجاعه
وبالى لمّا يروق يِبقى المَزاج عالى
والى راحْ راحْ مِش حَ اسْمح بإرجاعُه...ء

ممدوح محفوظ

23/05/2010, 18h38

يالى الفؤاد عَذِبك سِيبه يِموت وارتاح
احسن ما تِقضِى حياتك بين سُهاد ونُواح
وارضى بِأيامَك والمَولى يِعَدِلها
يمْكِن تِلاقى فى طَعْم الخِيار تُفاح...ء

ممدوح محفوظ

24/05/2010, 17h35

ولما رُحْت أزورُه قُلتْ القُبور مَالها
انا قلبى قَبرُه اتنَبَشْ والبَاقى على حالها
قالو دِ واحده جَتْ حَفرتْ خدِتْ قلبك
وجِرينا وَراها مإدرناش نِحَصَلها ...ء

ممدوح محفوظ

24/05/2010, 17h38

يعنى الحِكايَه كِده , دَه اخرِة اسَايا فيك
عامِلّى مَيتْ وجامِد , وانتَ الحُب دَ مدَفيك
خُديه خَليه يِنفَعِك انا حِلو مِن غيرُه
وانتَ يا قَلبى ادعِيلك رَبِنا يِشفِيك ...ء

ممدوح محفوظ

24/05/2010, 18h44

فِ قلوبنا باقِى و تَوِجْناك مَلكْ مُنولوج
سابِق زَمانك و فْ بَحر الكومِيديا موج
اجيال واجيال , عشّاقك , مُحِبينك
وبخِفّه الدم تِسعِد فوج و تِبهِج فوج ...ء

ارجو عند التجميع تضاف مع الورد ولا تضاف مع يا قلبى ولكم الشكر

ممدوح محفوظ

25/05/2010, 12h33

فِ الجيشْ و فِ الطَيَران وإبن حَميدو يا سُمْعَه
حتى معَ المَجانين مزَجتْ الضِحكه بالدَمْعَه
يا مِليونير يا فَقير رَصِيدك حُب فِ قلوبنا
و فْ مَتحف الشَمع حَ نقيدلك مِتين شَمعَه ..ء

سلوى خزبك

25/05/2010, 12h56

ان شاء الله يااستاذ ممدوح تكمل رباعية لان اسماعيل يس يستاهل التكريم حقيقى برباعية وخماسية واكثر
تسلم كلماتك المعبرة بحق عن حبك لهذا الفنان الجميل
:emrose::emrose::emrose:

ممدوح محفوظ

25/05/2010, 19h42

و ادِى الحِكايه بين ادَم وبين حَوّه
هوّ على قَلبه قادر عَندو الحَزْم والقِوّه
و هِى معَ حُبها لو كان فِ بحر غَريق
مَ يِحوشها عَنُه لا مُوجَه ولا نَوّه ....ء

ممدوح محفوظ

25/05/2010, 19h47

عُمرِى معاك يا زَمَن صَابر ومِستَنى
احْمال على احْمال شايِلها وبَغنى
والدُنيا دَيما كِده زَى الرْحا دَايرَه
مرّه تِبات شَقيان ومرّه مِتهنى ..ء
مهندس -ممدوح محفوظ

الباشاقمرزمان

25/05/2010, 21h14

كلام جميل حلو ... وعاجبني
بس ما تنتظرش اعلق أصحاب الشعر وأساتذته واللى بيفهموا فيه أولى
لأني بصراحة ومن الآخر لسة باتهجى

ممدوح محفوظ

26/05/2010, 15h43

كرَوان يِقول للقَمر يا جَمِيل حَبيت
سَهران اشَاهد جمالك فوق سِطوح البيت
افرِد جِناحِى فِ كل ليله وادْعِيلك
واقول لرَب السَما والنُجوم لبّيت ..ء

ممدوح محفوظ

26/05/2010, 15h49

عَجَبى على شَابْ ..وكِتابتُه فِرَانْكوأرَاب
عامِل مثَقف و شَايل جُوَه مُخه سَراب
يا سِيدى عِيب اخْتِشى و إكتِب لُغه بَلدك
دَ الدَم مِش مَيه .. ولا الدَهب هَيِبقى تُراب ..ء

ممدوح محفوظ

26/05/2010, 20h52

شكرا يا سلوى... هو فعلا يستحق الكثير ...ء

الباشا قمرالزمان ... لقد علقت بالفعل .. والف شكر ...ء

ممدوح محفوظ

26/05/2010, 20h54

و فِ المُنولوج كلامك فِ الصَميم سَاخر
مع الإبْيارِى فِ القفَشات مَالوش اخر
تضّحَكنا على اخْطائنا و عُيوبنا
فِ بَحر الفَن الف شِراع وبَواخر ...ء

ممدوح محفوظ

29/05/2010, 19h21

يا ظَالمَه قَلبِك و قَلبِك وَرْد فِ عَبيرُه
و قَافله بَابِك و فِينْ عُشّاقُه واسِيِرُه
مين إلى بَكاكى وخَلاكى تِجَافِى النوم
مِسِيرُه يِغْرق مَعَاكى فِ الهَوى مِسِيرُه ....ء

ممدوح محفوظ

29/05/2010, 20h59

سَألت الوَرد لِيه الوَرد غَار مِنِك
مِن رِقِتِك و ابتِسامتِك ولا مِن جَمَال سِنِّك
اصَالحِك على الوَرد و خَلينى لِوحْدى بِعيد
لا قَلبى ادْ هَواكى ولا كان سِنِّى مِن سِنِّك ...ء

ممدوح محفوظ

30/05/2010, 20h04

يا وَرد إيه حَيَّرَك مُش رَاسِى على عُودَك
زَعْلان ويّا حَبيبك وِبتِخلِف لُه فِ وُعُودَك
دَمْع الفُراقْ و النَدَى سايِل على خَدَّك
وامّا الحَبيب يِلمِسَك تحمرلُه خُدودَك ....ء

ممدوح محفوظ

01/06/2010, 20h28

اقُول ازاى وانا حاسس بِطَعم مَرار
و اى كلام يِعبر عَن رَجال اشرَار
بكُل شَراسَه هاجْموها و فَتَحُو النار
سُفُن مَدَنِيه لإغاثَه و فَكْ حِصَار ...ء

ممدوح محفوظ

01/06/2010, 20h30

يا اُمَه نِفْسَها فَّ فارس يِداوى الجَرح ويِطَيب
يِلِم الشَمل ويِوَحَد بِعيد الارض وقُرَيِب
و ما يخَاف لُوم ولا تَهديد و قَلبُه شِديد
وقَلبُه بِاليَقين طَيِب ( رَجَبْ طَيب ) ...ء

الباشاقمرزمان

01/06/2010, 22h13

فين الأشرار ياصاحبي واسال الجدود
هو الفيران ممكن ف يوم تكون اسود
لما نسينا اللى خلقنا وعليه اعتمادنا
استأسدت الفيران وعملت لها حدود

محمد رمضان ماضي

02/06/2010, 08h37

وقَلبُه بِاليَقين طَيِب ( رَجَبْ طَيب ) ...ء

بسم الله الرحمن الرحيم
الطيبين في زمانا كتير
بس دي مش عايزة طيب
شكرا يا صاحب الرباعيات
تحياتي ومحبتي
:emrose:

الباشاقمرزمان

02/06/2010, 09h44

الاسم قافلة وهي قافلة من كل الجهات
ليه توصل معونة ومعاها شوية حاجات
لو نقدر كنا منعنا عنهم الشمس والهوي
عشان يموتوا وان كان ابوهم السقامات

احنا غلبنا معاهم وبنينا لينا مستعمرات
عشان نطفشهم وقفلنا عليهم الممرات
ولحد امتى قاعدين العرب على قلوبنا
لغاية ما يأمر ربنا ونصرخ م الآهات

Hisham Khala

02/06/2010, 15h01

ممدوح محفوظ

02/06/2010, 16h13

[QUOTE=محمد رمضان ماضي;439880]بس دي مش عايزة طيب

يا اُمَه نِفْسَها فَّ فارس يِداوى الجَرح ويِطَيب
يِلِم الشَمل ويِوَحَد بِعيد الارض وقُرَيِب
و ما يخَاف لُوم ولا تَهديد و قَلبُه شِديد
وقَلبُه بِاليَقين طَيِب ( رَجَبْ طَيب ) ...ء

اخى .. انا اتحدث عن الفارس الذى يوحد الامه وله قلب شديد على اعدائها و طيب مع شعوبها .. وارى ان رجب طيب اردوغان به ما يشبه هذا الفارس ...لك شكرى وتحياتى ...ء

ممدوح محفوظ

02/06/2010, 16h26

كلمات جميلة و صادقة و تستحق التلحين لعمل فني متكامل و الترجمة للغات المختلفة و نشرها علي سماعي و اليوتيوب عشان العالم يسمع صوتنا و يعرف حقيقة اسرائيل التي تفوقت في الاجرام و الخسة علي المغول و النازيين و كل الظالمين و المفسدين
تحياتي لكم

شكرا يا اخى هشام ... واتمنى ان تعنى كلماتى ... و ربما تعنى كلمات الاخ الباشا الذى اترجاه ان يكتب ازجاله فى صفحه مستقله ... فهى تستحق ذلك ....ء

الباشاقمرزمان

02/06/2010, 17h23

حاضر يا أستاذ / ممدوح

وأعتذر

Hisham Khala

02/06/2010, 19h41

شكرا يا اخى هشام ... واتمنى ان تعنى كلماتى ... و ربما تعنى كلمات الاخ الباشا الذى اترجاه ان يكتب ازجاله فى صفحه مستقله ... فهى تستحق ذلك ....ء

الكلمات جميلة
بس يا ريت تكتب كمان مقطع و مش ضروري يكون المقطع الثاني عن رجب الطيب ، ممكن يكون عن ثبات (نوم) العرب ، عن وحشية و خسة الكيان الاسرائيلي ، عن ضرورة المقاطعة العربية لاسرائيكا ....

محمد رمضان ماضي

02/06/2010, 20h48

كلمات جميلة و صادقة و تستحق التلحين لعمل فني متكامل و الترجمة للغات المختلفة و نشرها علي سماعي و اليوتيوب عشان العالم يسمع صوتنا و يعرف حقيقة اسرائيل التي تفوقت في الاجرام و الخسة علي المغول و النازيين و كل الظالمين و المفسدين
تحياتي لكم

بسم الله الرحمن الرحيم
أهلا حبيبنا د/هشام وحشتنا
همتك تسمعنا عمل جميل، لحن لكلمات
اخينا
الشاعر الجميل
ممدوح محفوظ...
أخي
فاهم منذ البداية
وربما للنهاية.......
تحياتي.
السلام عليكم ورحمة الله وبركاته

ممدوح محفوظ

02/06/2010, 21h10

يا قاضى الحَقْ ضَاعْ مِنى , وهَاتلى الحَقْ يا قاضِى
اُمَم مُتَحِده .. مجْلس امن .. مُش راضِى
شُعُوب نَايمه على وِدَانها بَقالها سِنِين
حقوقنا حَ تِيجِى بالصحوه , ووِحدتنا دِ سِيف مَاضِى ...ء

Hisham Khala

03/06/2010, 05h41

تحياتي لكم جميعاً و للاساتذة ممدوح محفوظ و قمر الزمان و حبيب عبد الوهاب و محمد رمضان ماضي و احمد سنايم
أنا شغال في التلحين في كلمات الاخ ممدوح محفوظ و قمر الزمان
هذا بخلاف "كفر المظاليم" انتهيت منها و من توزيعها
و بانسق مع الالاتي و الله المستعان

ممدوح محفوظ

03/06/2010, 20h19

مع اعجابي بشعرك الجميل يااستاذ/ممدوح

شكرا اخى نظمى ...ء

ممدوح محفوظ

03/06/2010, 20h20

نَصَحتك يا ورد و انا مِين الى يِنْصَحنى
تِشُوف الدُنيا بين النَاس وتلمَحْنى
دِ الدنيا حِلوَه ليه تِحْبِس عبيرك ليه
فيها الدَوى للشَباب والى عَجُوز مَحْنى...ء

ممدوح محفوظ

04/06/2010, 21h01

احبابك كِتير يا ورد يَابُو الجِفون نَايمين
وصَفوك بِمَغنَى وشِعر يا فُل يا ياسمين
داوى بِعِطرَك وِ وَاسِى كُل قلب عَليل
الكل عُشّاقك ... وحُبك إنت لِمِين ...ء

ممدوح محفوظ

05/06/2010, 20h21

قالو الامُورإتْغَيَرِت فِ الامرِيكان يَاما
والسُمْر بَعد الشُقْر لا عِتَاب ولا مَلامَا
دِ سِياسَه واحده و مُش مُمكن حَ تتغير
إياك تِصَدق يوم لا بُوش ولا اُباما ...ء

سلوى خزبك

06/06/2010, 20h17

قالو الامُورإتْغَيَرِت فِ الامرِيكان يَاما
والسُمْر بَعد الشُقْر لا عِتَاب ولا مَلامَا
دِ سِياسَه واحده و مُش مُمكن حَ تتغير
إياك تِصَدق يوم لا بُوش ولا اُباما ...ء

حقا ما قلت مع الاسف كلنا املنا فى اوباما الكثير فلم يقدم حتى القليل
جميل شعرك ومعبر
اشكرك واشكر ظرف ما حدث لاسطول الحرية الذى فجر هذه الابداعات التى نأمل ان تبعث فينا الروح العربية من جديد ويحيا الامل بأيدينا دون ان ننتظر اوباما او غيره وما على الله ببعيد
عاشت غزة وعاش اهلها ومات كل من اراد مماتها

ممدوح محفوظ

06/06/2010, 20h43

يا وَرد فيك المَعانى للصُحْبه والعُشَّاء
تِفْشِى للحَبيب سِره و تُنشُره لو شَاء
مِ الصَاحِب لصَاحْبُه مَوَده والمَعانى كِتير
كلامَك دَ شِعر وزَجَل وباقِى الكلام إنْشَاء ...ء

ممدوح محفوظ

07/06/2010, 19h02

القلب عَ القلب شُعْله مِن إيمان ويَقين
خِيرْ الاُمَم على مَر العُصور سَابقين
والى يِفَرق نِزِيحُه عَن طَريقْنا بِعيد
واثقين فِ نَفسِنا ما يِصِيبنا الوَهَن .. واثقين ...ء

-----------------------
مهندِس وشاعِر ولِيا فِ الإصَصْ رِوَيَات
طَاقه نَظيفه إختِرَاعى .. تِتْرِفعْ لُه رايات
تلاميذى ف الهندسه اساتذه فِ المهنه
حَامد و شَاكر رَبْ العَرش والسَموات
ممدوح محفوظ ..ء

عميد

07/06/2010, 21h41

القلب عَ القلب شُعْله مِن إيمان ويَقين
خِيرْ الاُمَم على مَر العُصور سَابقين
والى يِفَرق نِزِيحُه عَن طَريقْنا بِعيد
واثقين فِ نَفسِنا ما يِصِيبنا الوَهَن .. واثقين ...ء

قد تعود القدس يوما

تحياتي:emrose:

ممدوح محفوظ

08/06/2010, 16h04

و مهما نِجيب يا نَجيب مُش ممكن نِجيب زَيَّك
راقى وباقى بِفنك و نُور الفنانين ضَيَّك
تِبكينا على دموعك و عَ المأساه تِضَحَكنا
أخو البُسطاء أخو الفُقراء وقلب الشَقْيانين خَيَّك ..ء

ممدوح محفوظ

08/06/2010, 16h07

(غزل البنات ) يا بَنات باعُه ( سى عُمر ) بِبَلاش
(ياما كان ف نفسى ) ادُوقه لكن ( قِسمتى ) مَ الأش
و فْ ( لعبه السِت ) بُكره تِلوص يا ( ابو حَلموس )
( باحمر شفايف ) وبُدرَه يِقلبو الفِسيخ جُولاش ...ء

عادل فؤاد رفاعى

09/06/2010, 01h32

كلامك جميل جدا...بحثت فى جميع مشاركاتك وجدتها كلها من الزجل الرباعى الجميل ..نجيب الريحانى عبقرية لن تتكرر فى المسرح او السينما

ممدوح محفوظ

09/06/2010, 15h34

و فْ عَاشِق الرُوح ألف تَحِيه للهِمَّه
عبد الوهاب وحسين عِملاقين وِ فِ القِمَّه
و بدمْعِتك وصِدقك حَركتْ القلوب ويَّاك
ألفِتْ لَحَّنت غَنيت و مَ قُلتِش ولا كِلمَه ...ء

وجيه خطاب

09/06/2010, 15h38

(غزل البنات ) يا بَنات باعُه ( سى عُمر ) بِبَلاش

(ياما كان ف نفسى ) ادُوقه لكن ( قِسمتى ) مَ الأش
و فْ ( لعبه السِت ) بُكره تِلوص يا ( ابو حَلموس )

( باحمر شفايف ) وبُدرَه يِقلبو الفِسيخ جُولاش ...ء

كلام جميل

نجيب الريحاني ملك المسرح الكوميدي والابتسامة السوداء

ممدوح محفوظ

09/06/2010, 19h41

انا صاحب الوَرد و كُل الوَرد دَ وردِى
سايِق دَلالُه وجَمَالُه عَ الخُدودْ وردِى
تِسألنِى يا وَرد ليه الحُب و الاشواق
سؤالك عَبيركْ أما فِ الزَجل رَدِى ...ء

ممدوح محفوظ

10/06/2010, 09h45

كلامك جميل جدا...بحثت فى جميع مشاركاتك وجدتها كلها من الزجل الرباعى الجميل ..نجيب الريحانى عبقرية لن تتكرر فى المسرح او السينما

شكرا اخى حبيب ... اعشق اسكندريه واحب اهلها ...ء

ممدوح محفوظ

10/06/2010, 10h51

الفَن ضَاع يا نَجيب مُش باقِيلنا غِير ذِكره
سِينما و مَسرح ومَغنى من غِير طَعم او فِكره
و اُمُور كتيره ضَيَّعناها ونَسينا
واهِى بُكره تِتْعَدل , بَس مَنين اجِيب بُكره ...ء

ممدوح محفوظ..ء

محمد رمضان ماضي

10/06/2010, 16h45

قالو الامُورإتْغَيَرِت فِ الامرِيكان يَاما
والسُمْر بَعد الشُقْر لا عِتَاب ولا مَلامَا
دِ سِياسَه واحده و مُش مُمكن حَ تتغير
إياك تِصَدق يوم لا بُوش ولا اُباما ...ء

بسم الله الرحمن الرحيم
حذاري ثم حذاري من الخداع ،
وأوعوا تفتكروا الحلم ضاع ،
فاكرين الحمامة ، و قصف قانا ،
إحتفلا ً بنوبل ، قلنا الوداع ،
دول عملة وحدة ليها وشين ،
كلهم واحد بس إحنا لكاع،
تسلم يا مبدع على الإبداع.
والله تستحق تكريم :emrose:

ممدوح محفوظ

10/06/2010, 20h20

الحب يا وَرد زَى المَيَه للازهار
فراشه رقِيقه تِبوس قَلبك تِخَليه نار
سُهَّار يا عَاشِقين ويا القَمر هايمين
و الى ما حَبْ دِبِلْ وِ عَ الغُصُون يِنهار ...ء

ممدوح محفوظ

18/06/2010, 20h36

ظالم حَبيبك وعَامل فى الغرام إشكال
دَ الورد حَبَك و إداك مِ الغرام أشكال
الحُب فِ الوصل و اللُؤيا رِضَى و مَنَال
مِين حَب نَال اما الجَافى عُمره مَ نَال ...ء

ممدوح محفوظ

20/06/2010, 19h36

الى قَرارُه فْ إيدُه يهدِيه للطَريق وخَلاص
و الى على الأسر راضى ما يلائى لذله خلاص
و هى الدُنيا كِدَه يا تسُوقها يا تسُوقك
تلاعِبها حَ تلاعبَك ومَ يفيدَك سِوَى الإخلاص ...ء

ممدوح محفوظ

24/06/2010, 20h23

تِمُر ايام والصِيف من بَعد الربيع جَانه
و الحَر عامل حِصار بِجْمَال وهَجَّانه
اسْفَلت سَايح و الناس زَى ما هُمَّا كتير
العقل شَارد والقلب عَشْمان و الهِدْمَه عَرقانه ...ء

ممدوح محفوظ

25/06/2010, 21h35

اكتب مجموعه رباعيات جديده
اسمها

قلوب وعشاق

لعلها تكون جيده

ممدوح محفوظ

25/06/2010, 21h36

قُلوب وعُشاق فى بَحر الهوى دَابو
إلى حَبيبُه مَعاه و الى الحَبيب سَابو
و الى شعور الحُب خَلى شَبابَو يطول
والى الشُعور غَلبُه خَلى الشُعور شَابو ....ء

ممدوح محفوظ

27/06/2010, 18h00

كان لِيَّا صَاحِب أسد ... قَلَبُو الهَوى عصفُور
انا قُلت انُه اتحَسد .... راحْ فى نَفق مَحفُور
يا صاحبى ايه صَابك ... ما تشِد اعْصَابك
العقل دَاب والجَسد ... و القلب بَاتْ مكسُور ...ء

ممدوح محفوظ

29/06/2010, 19h46

تِحكيلى عن حُب قلبك و إنت قلبى معاك ؟
و طول الليل انصَحك و اكتِم وادارى هَواك
الحُب بالحُب يا نَاسى الى كان بِينَّا
ماهُو قلبى ما لُوش تَمَن وقلبك انت مَلاك....ء

ممدوح محفوظ

30/06/2010, 19h05

كِتير اشتَكوا من قَلبِك يامُو قَلب حَديدْ
قُلوب الناس رَقيقه وقلبِك إنتى شِديدْ
خَايفه ليِجْرَح قلبك حُب زَى زَمان
سِيبى الزَمان فِ أمَان و عيشى حُب جِديدْ ...ء

ممدوح محفوظ

01/07/2010, 20h34

يالى الهوى دوبك نِفسَك فى يوم تِرتاح
نوم الليالى إتمَنَع , سهر الليالى مُباح
القلب ما يسَاععش غير واحده تِعشِش فيه
قلبك فِ حبه كذَب , بابُه بميت مُفتاح ...ء

ممدوح محفوظ

02/07/2010, 14h13

اسعار يا نار ايه الى ولعك تانى
لا رحمتى المحتاج ولا تعبان وبيعانى
موظف وغلبان و شبعان مِ الزمن تلطيش
عايش فِ الدنيا كده , بلا احلام ولا امانى ...ء

ممدوح محفوظ

02/07/2010, 21h11

يا شَط رَقْ هَواك و الوَرد ليه مَعنى
يُربُط قُلوب عُشاق , يسحِرنا يلَوعنا
بعد اللؤى يمشو , وانت يا ورد وحيد
مكتوب عليك الفُراق وانت تجَمعنا ...ء

ممدوح محفوظ

04/07/2010, 19h49

ليه سبتى قلبِك فى بَحر المَحبه غَريق
يقِبْ يِغطَس ويطَفى حَريق بحَريق
مَ تصونى قلبِك وتخبيه لحُب اصيل
قلبك بريء جَوهره دَايما يشِع بَريق ...ء

مازن دحلان

05/07/2010, 16h04

سلسة الكلمات وفيها جمال اصالة مصر

تحياتي

ممدوح محفوظ

05/07/2010, 20h52

قلبَك مَلاها نُواحْ يَالِى حبيبَك راح
تسجِن نفسَك فِ حُبه والدنيا فيها بَراح
يمكِن يوفى وُعُود ويعُود و تهْدى ورُود
بعد الجراح تِرتاح و ترَجَع الافرَاح ....ء

ممدوح محفوظ

23/09/2010, 22h03

فى ذكرى سعاد حسنى

الفن حَبْ سُعاد و الحُسن فيها احتار ...

سينما ومَغنى ورِقه تشبه الازهار ...

ايه سِر فَنك و مين قلبك خَفى سِره ...

حتى رَحيلك عنا لسَه فيه أسرار ...ء

زوزو ده إسم الدلع اما الحقيقى سعاد

للسندريلا زمن فاتنا و عمره ما عاد

لسه السفيره عزيزه جوا القلوب عايشه

و نعيمه حَبت حَسن ولكل حب معاد ...ء

سعدالشرقاوى

25/09/2010, 11h03

الاخ الاستاذ
ممدوح محفوظ
امتعتنا بهذه الرباعيات
المنظومه والهادفة
دمت بكل خير

ممدوح محفوظ

25/09/2010, 14h14

الاخ الاستاذ
ممدوح محفوظ
امتعتنا بهذه الرباعيات
المنظومه والهادفة
دمت بكل خير

استاذ سعد الشرقاوى
اسعدنى تعليقك
و لما سمعت ازجالك وعرفت قدرك
اخافنى تعليقك
فقد يصيبنى الغرور بأن كلماتى امتعتك ...ء

ممدوح محفوظ

30/09/2010, 20h15

فى ذكرى جمال عبد الناصر

بعد الأمَال الفرع مَال و على الكِتاف احْمَال

عُمال مَ شافت مَال نهبوها رِجال اعْمَال

فوق الفساد إهمال .. عَمال يزيد عَمال

واتغيرت احوال ... بَعدك , حبيبنا جمال ...ء

ممدوح محفوظ

30/09/2010, 20h17

صاحب اُسود و سدود .. عزمك مَ كان له حدود

و الى بخيره يجود مش ممكن يلاقى جحود

بعدك شَبعنا شُرود وجمود وكلنا الدُود

و بقينا اهل لحود ... يا ريت الى فاتنا يعود ...ء

ممدوح محفوظ

05/10/2010, 21h21

صانعوا نصر اكتوبر

يوم العبور يا نور فِ ضميرنا و عقولنا

عزْم الرِجال قولناه ... شِعر و زَجل قولنا

و مَهما وصَفنا مَ نوصل للحقيقه كتير

بإراده و إيمان عَبَروا والنصر جابُولنا

بطل الحكايه دِ جندى من ولادنا شِديد

عاشِق بلاده و جهاده والاراده حديد

قاعد على شط الكنال صاحى ومستنى

اخر مناه العبور .. ويوم عبوره عيد

عدى الكنال مَرات و الليل وَفى وسَتّار

ينْزف فِ دم العدو يملالُه ليلُه نار

يا ألف يوم أمجاد رسَمت طريق النصر

يوم العبور خَلى ضَلمه قلوبنا نهار

فى كل عيله نلاقى مِ البطل ده كتير

الى مصيره شهيد والى مصيره اسير

والى رَجَعْ بالامل شايله على كتافه

دولْ إلى ضَحّو و صَبرو ..و جابو نصر كبير ....ء

ممدوح محفوظ

20/10/2010, 17h21

يا غصن ليه زعلت الوردَه دى منّك
بكت الليالى و دارت دمعها عنّك
إن كنت انت الضِل , هىّ العبير يرويك
و إن كنت إنت اللّحن , هىّ نَغَم فنّك ....ء

ليلى ابو مدين

20/10/2010, 23h35

يا غصن ليه زعلت الوردَه دى منّك

بكت الليالى و دارت دمعها عنّك
إن كنت انت الضِل , هىّ العبير يرويك

و إن كنت إنت اللّحن , هىّ نَغَم فنّك ....ء

بسم الله الرحمن الرحيم

الشاعر الكبير الاستاذ
ممدوح محفوظ
أسعدك الله بكل خير
الله الله الله
إيه الرومانسيه والشاعريه دي كلها يا أستاذنا ...
أبيات رومانسيه كلماتها رقيقه كلها عذوبه وسلاسه
ومعانيها ذات إحساس عالي جداً
أحسنت يا شاعرنا الكبير
متعك الله بالصحه والعافيه
مع خالص تحياتي واحتراماتي
ليلى ابو مدين
:emrose::emrose::emrose:

ممدوح محفوظ

22/10/2010, 13h55

مع خالص تحياتي واحتراماتي
ليلى ابو مدين
:emrose::emrose::emrose:

الاخت ليلى
قرأت تعليقك مره واحده
و لن اكررها
خوفا ان يصيبنى الغرور
لكى كل الشكر والتحيه ...ء

ممدوح محفوظ

23/10/2010, 20h29

شايفِك وشايفَاه مَهما داريتو العيون
فِ القلب حُب و غَرام ...اما النتيجه سكون!!
انا لو احب اعدى لجل حُبى بحور
واشكِى لحبيبى هوايا ... والى يجرى يكون ....ء

ممدوح محفوظ

27/10/2010, 19h22

غَريب يا بحر ايه سِرك وليه مَهْجور
القلب ضَلمه و الموجَه بتِعكس نور
عروسِه بَحر بتدارى على سِرك
ملايكه حُب ويّاها و كونْ مَستور ...ء

ممدوح محفوظ

28/10/2010, 22h08

يا دنيا إيه غيَّرك حالك ماهوش هُوَّه
ليه ناس كتير تنهزم من بره و من جُوَّه
بقت العداله ميزان بس السنجه مغشوشه
قلوب زى الحديد , والباقى بلا قُوَّه ...ء

ممدوح محفوظ

02/11/2010, 21h13

لفيت ولفيت شرق و غرب مُش لاقى
سواقى العمر بتدور والقليل باقى
عمَّال ادَوَرْ عَ الحقيقه و النتيجه سَراب
اشربْ فِ كاس الحيره و الزمن سَاقى ...ء

د أنس البن

04/11/2010, 18h04

ممدوح محفوظ

05/11/2010, 18h37

جميله يا أستاذ ممدوح , عجبتنى قوى , فيها صدق واحساس جميل , والى الأجمل والأجود ان شاء الله

أشكرك يا دكتور أنس .. يسعدنى جدا إعجابك بكلماتى.
مهندس / ممدوح محفوظ ..ء

ممدوح محفوظ

09/11/2010, 18h12

مَالى و حَالى التبَدل ليه ومِتْغيَّر
لا كَهْل انا حَصَّلتْ .. و لا فتى صُغيَّر
يا ليلى نِجْمك لمَعْ و التانى مِتدارى
و السِر حيرنى .. زى ما العَلن حيَّر ...ء

ليلى ابو مدين

10/11/2010, 07h26

مَالى و حَالى التبَدل ليه ومِتْغيَّر

لا كَهْل انا حَصَّلتْ .. و لا فتى صُغيَّر
يا ليلى نِجْمك لمَعْ و التانى مِتدارى

و السِر حيرنى .. زى ما العَلن حيَّر ...ء

:emrose:الشاعر الاستاذ ممدوح محفوظ:emrose:
أجمل ما في أشعارك الرباعيه هي المباشره وصدق الاحساس
والمعاني الواضحه والثريه
اسلوبك في نظم الشعر يدل على أن خير الكلام ما قل ودل
ولكنه ذو دلاله جميله رقيقه لا تخلو من الحكم
الى الامام دائماً
مع خالص تحياتي واحتراماتي
ليلى ابو مدين
:emrose::emrose:

ممدوح محفوظ

11/11/2010, 19h24

مع خالص تحياتي واحتراماتي
ليلى ابو مدين

:emrose::emrose:

الاخت ليلى
لكى كل الشكر و التقدير
مهندس / ممدوح محفوظ ...ء

عفاف سليمان

12/11/2010, 04h25

قالوا الشعر دا فن يا ناس
زوق وادب وكمان احساس
ولما تلاقى هنا فيه ناس
بالود تقول اجمل احساسhttp://smiles.al-wed.com/smiles/65/585.gif
للورد جمال وريحه ومعنى
بعبيره ننسى
اوجعنا
استاذنا المهندس جميل المشاعر
ورقيق الاحساس
الاستاذ
((ممدوح محفوظ))http://iraqnaa.com/ico/image/056.gif
حاولت ان اقتبس من كل ما كتبت الاجمل
ولكن فى كل مشاركه اجد فيها اجمل
واجمل من السابقه والتى تليهاhttp://iraqnaa.com/ico/image2/f/n017.gif
بصراحه معرفتش اخذ انهى واحده
كلهم حلوين
كلهم عبير وتعبير عن كلام جميل
ومواقف لشاعر نبيل
للسنديلا كتبت ولجمال قلت
وللريحانى شرحت فى كلمتين حلوين
تحياتى لك استاذى والينا المزيد
لك خالص تحياتى
اختك عفاف

ممدوح محفوظ

12/11/2010, 18h46

لك خالص تحياتى

اختك عفاف

انتى أختى فعلا
لن انل كل هذه المجامله و الاطراء سوى من اخت لى
أراكى تعشقين فايزه ... فاقول لكى (ده كتير عليا )...ء
اخوكى ممدوح

ممدوح محفوظ

15/11/2010, 23h03

ربى بِأيامك وقْفَه و حَجْ و عيد
لَتسَامِع إلى تاب ... و تِرحم إلى بِعيد
إهدى يا هادى و اغفر للعباد يا رَحيم
الى يسيبك خَسَر ... والى يلبى سَعيد ...ء

عفاف سليمان

17/11/2010, 09h23

ربى بِأيامك وقْفَه و حَجْ و عيد

لَتسَامِع إلى تاب ... و تِرحم إلى بِعيد
إهدى يا هادى و اغفر للعباد يا رَحيم

الى يسيبك خَسَر ... والى يلبى سَعيد ...ء

اخى الكريم الباشمهندس
(((ممدوح)))http://smiles.al-wed.com/smiles/65/585.gif
عيد اضحى سعيد على حضرتك
وعلى اسرتك الجميلهhttp://iraqnaa.com/ico/image2/f/n013.gif
ويارب ينعاد عليكم
على خير وصحه وسعاده
وفرحه وهنا وراحة بال
ارق تحياتى
ويارب يتقبل الله منا ومنكم http://iraqnaa.com/ico/image2/022.gif
صالح الاعمال
اللهم آمين
ارق تحياتى
اختك عفاف

ممدوح محفوظ

17/11/2010, 21h40

الاخت فايزه ...كل عام وانتى بخير
و كل عام و جميع الاصدقاء بخير
و اعتذر عن الخطأ فى الرباعيه الاخيره

ربى بِأيامك وقْفَه و حَجْ و عيد
لَتسَامِح إلى تاب ... و تِرحم إلى بِعيد
إهدى يا هادى و اغفر للعباد يا رَحيم
الى يسيبك خَسَر ... والى يلبى سَعيد ...ء

ممدوح محفوظ

19/11/2010, 19h36

ماشى لطريق الشَرق و بَدورْ على نَفْسى

طول الطريق هَدِّنى و إنقطع نَفَسِى

فِ إيدى قنديلى و مِستنى شُروق الشَمس

يمكن الاقى فِ يومى إلى ضَيَّعُه أمْسِى ...ء

ممدوح محفوظ

20/11/2010, 21h46

وطنى ولا وطنَّا ولا ناس تانيين

الوفد إخوان ولا عَ العَداء ناويين

مين الحرامى و مين عَسْكر و مين إلى

شَدّو اللِحاف و فِضْلو عَ الوِدان نايميين ...ء

ممدوح محفوظ

24/11/2010, 22h32

مين إشتَراها و مين إلى يبيع بَلَدى

الأصل غلّابْ مِن وَالْدى الى ولَدِى

أجيَال توَرِثْ بَعضَها عَلامه إستِفهام

تِقلت على كِتافى و إتكتف بِها جَسَدى ...؟

ليلى ابو مدين

30/11/2010, 07h16

مين إشتَراها و مين إلى يبيع بَلَدى

الأصل غلّابْ مِن وَالْدى الى ولَدِى

أجيَال توَرِثْ بَعضَها عَلامه إستِفهام

تِقلت على كِتافى و إتكتف بِها جَسَدى ...؟

الباشمهندس :emrose:ممدوح محفوظ:emrose:
:emrose:أسعدك الله بكل خير:emrose:
والله عندك حق يا أستاذنا مين اللي أشتراها ومين اللي باعها
ده الحمل بقى تقيل قوي على ناسها واللي عايشين فيها
ومش عارفين رايحين على فين
ربنا يستر
خالص تحياتي واحتراماتي
ليلى ابو مدين

ممدوح محفوظ

17/12/2010, 21h08

راجع لأحبابى ماسِك شمعه مطفيَّه
لا نار بتلسع و لا لنورها أثر فيَّه
إيه فايده الحُب للى الفكر عنده سجين
و الروح طليقه أما النفس منفيَّه ...ء

ممدوح محفوظ

22/12/2010, 19h49

قالولى روح إنتخب و لا انتَ---خِبْت خلاص
دَ الشاطر الى نجح قال ع البليد بلاص
يا حَضره النايب و مقامك بميت نايبه
لا الصدق عاد ينفع فها و لا الاخلاص ....ء

ممدوح محفوظ

24/12/2010, 19h33

يا نيل ولادك أٌمَمْ .. أجْيال و بتعَدِّي

سدَّك جبل راسى و انا انهدم سدِّى

فكرى وليد نسْمِتك .. تاخدنى و تودِّى

و دوايا فى ميتك هدِّى الجراح .. هدِّى ...ء

ممدوح محفوظ

26/12/2010, 20h41

اطربنى يا بلبل بانغامك وسمَعْنى
دِ دماغى تعبت مِ الضوضاء بتوجعْنى
اصوات وخبط ورزع و اغانى بلا مَعنى
هو الهدوء دَ حرام ... ولا ايه يعْنى ...ء

ممدوح محفوظ

06/01/2011, 20h05

غدر الديابه ظهَر , هوَّ الاسدْ راح فين
كان لما يزأر يخوف منّهُم الفين
يا شمس نورك خفت بسحابه و تعدى
الكف ما يسقَّف و صُوت الإنتصار كفِّين ...ء

ممدوح محفوظ

08/01/2011, 20h21

الى يفرَّق سَاد و الى إنعزَل ما سَاد

احقاد و نار بتغلى فى قلوب حسَّاد

دمى ميتك يا نيل و لحم كتافى من ارضك

احمد و جرجس حبايب و العدو موساد ...ء

عفاف سليمان

08/01/2011, 21h39

الى يفرَّق سَاد و الى إنعزَل ما سَاد

احقاد و نار بتغلى فى قلوب حسَّاد

دمى ميتك يا نيل و لحم كتافى من ارضك

احمد و جرجس حبايب و العدو موساد ...ء

اخى الكريم الباشمهندس
(((ممدوح محفوظ)))http://smiles.al-wed.com/smiles/65/newblume010.gif
كلمات قصيره جدا
لكن قالت المفيد
والله يفعل ما يريد
فيكيدون كيدا واكيد كيدا
والله خير الكائدين
اللهم اجعل كيدهم فى نحورهم
ولا تسلط علينا من لا يخافك ولا يرحمنا
انك بنا سميع عليم
وهتفضل مصر بحب ابناؤها
مسلميها واقباطها
فى يد واحده
لا يفرقهم حاسد ولا حاقد
وهنفضل فى كل صباح جديد
نسمع اغنيات الصبح الندى
واحنا رايحين على شغلنا
مسلمين ومسيحيينhttp://smiles.al-wed.com/smiles/42/i125293348_84309.gif

التى تبعث الفرح ع الصبح الجديد
بنوره وندى الزرع الاخضر
برائحته الجميله
زرع الشراقى (http://www.sama3y.net/forum/showpost.php?p=131242&postcount=55)http://smiles.al-wed.com/smiles/65/newblume010.gif

ازدان فوق عيدانك واخضر يا زرع الشراقى
دا صباحك منور يا اخضر والخير فى اللى ساقى
يا صغير يا زرع اديه انا ساقى التقاوى غناوى
وهتفرج برمش عنينيه من كتر اشتياقى يا عينى من كتير اشتياقى
ازدان فوق عيدانك واخضر يا زرع الشراقى
...دوار الحنان خبيته من خوفى عليه بكفوفى
والعود الجميل حبيته لليوم التلاقى يا عينى
لليوم التلاقى دا صباحك منور يا اخضر والخير فى اللى ساقى
يا زرع الصباح يا منور
محبوبى هواه مطلوبى
وانا جمبك لحد ما تكبر على عهدك وباقى يا عينى على عهد وباقى
دا صباحك منور يا اخضر والخير فى اللى ساقى
ازدان فوق عيدانك واخضر يا زرع الشراقى
دا صباحك منور يا اخضر والخير فى اللى ساقى
ارق تحياتىhttp://smiles.al-wed.com/smiles/42/i125293348_84309.gif
اختك عفاف