واحشني

[AhmedSalaHammad]

واحشني غناكي عظيم الأثر
واحشني هواكي المشوب بالحذر
واحشني اعتصامي بعنيكي المِلاح
و شعري اقوله كإنه مِزاح
و هوَّ الحقيقة لكن مش مُبَاح
غير انه يبانلك في رعشة وتر

واحشني الحياء الكَتوم الرقيق
واحشني الجمال الرصين الجريء
و فن اختيار الخطوط و العطور
في رقة فراشة تروَّض نمور
و يفضى اللي فيَّه ما بين السطور
معاني تدوِّب جبال من حجر

واحشني إيمانك بإني نبي
و تصديق نبوءة كلامي الغبي
كإن اللي اقوله لابد و يكون
و يِصْدَق كلامي صُدَف أو ظنون
و غيرك يشوفه مجرد جنون
آمنتِ محبة .. و هُوّ كفر

ناديتك نِِدَا رغم بُعْدي وَصَل
بشعري اللي بَعدك كان مُعْتَزَل
و لسه الغرام فيّه ما بيتقريش
و مين يعرف السر غيري.. مافيش
و لو إنّ يعني العيون ما تداريش
بتنكر.. فتجزم بكل الصور

وحشتيني كلك يا حقي و حقيقتي
وحشتيتي عايزك ما تعصي مشيئتي
(و لازم تعودي).. و عُدْتِ و هتبقي
وإلاّ في بعدي هتشكي و تِشْقِي
أنا بحر شوقك.. و عمرك في عِشْقي
تعالي اغرقيني.. هوايا قدر