تسجيل الدخول

مشاهدة النسخة كاملة : إنتي حبيبتي يا سعاد

علاء طه ياسين
25/11/2009, 18h10
إنتي حبيبتي يا سعاد
يا ضحكة بتهدّي الفؤاد
تبدر نجوم فوق الطريق
تبقي غناوي في البلاد

يا غيمة شاردة ع الضفاف
يا نهر يتحدي الجفاف
يا عروسة في يوم الزفاف
بيني وبينك فيه ميعاد

انا قولتلك كل الكلام
ما تردي يابت السلام
يدي الصباحات ابتسام
يقفل شبابيك العناد

ياللي انتي غاوية المرجحة
وفي قلبي ساكنة مريَّحة
خلي الغناوي المُفْرحة
تنده علي نجومنا البعاد

:emrose:

ياسين
سعدالشرقاوى
27/11/2009, 21h11
تسمح ياخويه تغير الجملة دى

انا قولتلك كل الكلام
ما تردي يابت السلام
يدي الصباحات ابتسام
يقفل شبابيك العناد

عشان تبقى من أجمل ماكتبت على الاطلاق
الظاهر انك شايل الحلو كله
بس وراك وراك

عموما بلاش(يابت)
عشان سعاد ماتزعلش
وعشان غاوية العناد ممكن نخليها(ياحلوه)
مثلا
الله ينور
علاء طه ياسين
29/11/2009, 15h41
أخوي وحبيبي وتؤأم روحي
سعد الشرقاوي
الحلو هو إنت ..
والكلام الحلو كلامك إنت ..
أنا يدوب واحد من دراويشك ومحاسيبك ومريديك ..
يا سيدنا ..
ونخليها يا حلوة ..
تتصور إنها فعلا أجمل من يابت ..
إيه يابت دي ..
جات ما اعرفشي إزاي ..
جات علشان ترجع تدور تاني السواقي ..
وأنا وإنت نرجع نقعد تحت التوتة ..
بس قول للمشرفين بتوع المنتدي عتاب رقيق مني ..
إنتوا ليه قفلتوا بابك المنتدي كده جامد أوي ..
افتحوا الأبواب شوية ..
المشاركة بتفضل يمكن باليوم علشان تظهر ..
انا مش عارف ايه حصل ..
بس حاولوا تفتحوا البيبان ..
وآسف علي عتابي الرقيق لأسرة المنتدي ..
بس ده من عشمي وحبي ..
ياسين
NAHID 76
03/12/2009, 11h23
بسم الله الرحمن الرحيم
يا خالى سعد أجمل ما فى الموضوع يا بت لانه تصغير لها فى الست ودلع لها وتقريب لنفس المحب
ده حتى متنفعش يا بنت
الكلمه فى سياق الحدث جميله وليس بها خلل
ده من وجه نظرى
أما الغنائى بلا جدال علاء ياسين
معدش أممنا الا أن ندعو له بالاستمرار والمزيد من أعماله الرائعه ومعدش يبعد ويغيب كتير
يا سى علاء
طول بالك ومتأخذش على خاطرك بسرعه
وسع بالك زى أ غنياتك
ولا أيه
أخر كلامى سلام
علاء طه ياسين
03/12/2009, 13h49
سيدة منتدي الشعر العامي
السيدة / ناهد هانم البن :emrose:
احقاقا للحق .. حلوة احقاق للحق دي ..
احقاقا للحق
كلمة "بت" كلمة متداولة في الصعيد الجواني
وكلمة "حلوة" متداولة في الصعيد البحراني
فأخويا سعد الشرقاوي عاوز ياخدني معاه لبحري
وانا وربنا موافق :mdr: ;)
أما سعة الصدر
فحاضر يا ستنا
تفهمت الظروف وإدارة المنتدي ليها مليون حق
أما هدية العيد ..
بين رموش النجمة شفتك

غنوة بتزيل الكآبة

ساقية في قلبي الحنان
شاتلة في قلبي الصبابة
طالعة ويا الشمس ضحكة
زارعة وسط الصحرا غابة
من عنيكي المستحية
ضي كل الدنيا يا با
وانا بس مغنواتي
وانتي يا ستي الربابة
لكي مني كل التحية والتقدير والاعتراف بالفضل والجميل
علاء ياسين