الــفـــار والـقــطط [الأرشيف] - منتدى سماعي للطرب العربي الأصيل

مشاهدة النسخة كاملة : الــفـــار والـقــطط

ناصر دويدار

01/10/2009, 13h11

O?°'¨ (الـفــار والـقــطط )¨'°?O
الـفــار مابقاش يخاف من القطط
والقطط مابقتش بتخوّف فيران
الـفـار فـْجــْر
بـقــى يمشــى ولا أجـــدع أســـــد
يبرم فى ديله يخش فى شوال الدقيق
يطلع على التوم والبصل
يضرب بلنص فى صحن فول
والقــط واقـف يسـألــه
فـى أى خـدمة يا محترم ؟
يبرم فى ديله الـفــار ويشتم
جاتكوا الـقـرف
قطط رمم
مفيكوش دكــر
قاعدين فى بيت مفيهوش كتب ولا ورك فرخة محمّرة
ولا بنطلون جينز أقرضه
الـفـار فْجْــر
يعزم صحابه فى الصالون
فيران كتير على كل لون
يرمش بعينه تيجى القطط بعصير لمون
يرمش بديله يجى العشا
يبقى نهار أسود غطيس
لو قط مرة أعترض
وأجـــدع شنب من القطط
ياكل من الفار ع القفا
وإذا قطة مرة نونوت من نفسها
وحزقتها مرة النونوة
لازم تقول متأسفة ع النونوة
ولحد ما الفار يتقبل عنده إعتذار
كل القطط تدعى يخليه ربنا
ويكسبه ويربحه يكفيه بقدرة ربنا شر العرس
وشر حاسد إذ حسد
يبعتله فارة تونسه تتجوزه
ويملوا الوطن قطاقيط فيران
آهــــ يا قطط متخلفة
مفيكوش دكــر
الـفــار فْـــجْــر
مع أنه فـــار
كبر صغر
فــار أبن فــار
طلع نزل
فــار أبن فــار
وسهل ياكل بالجزم
وإذا لزم ينداس على كعوب البُلغ
بـــس القــطــط
لابسه البُلغ فوق الدماغ
آهــــ يا قطط متخلفة
مفيكوش دكـــر
بقى دى النهاية يا قطط
فينك يا أيام الدلع
نوم السراير
والكنب
شرب اللبن
بقى دى النهاية يا قطط
يبقى السكن فى قلب صناديق الزبالة
والــفـــار بيـســـكن فى الــوطــــن
آهــــ يا قــطــط
http://www8.0zz0.com/2009/10/01/12/638702409.jpg

Tarek Elemary

01/10/2009, 13h24

يا بن الذين يا أكبر القطط
عامللى فيها فار يا بن دويدار
طب ابقى استلقى وعدك بقى
بسم الله ماشاء الله يا عم ناصر
رائعة و فى الوريد و مفعولها خلانى أهز ديلى و أمد إيدى أتحسسه هو ديل فار و لا قط
منك لله يا دويدار خليت العقل حار و مليت دماغى نار ... أفكار أفكار أفكار

NAHID 76

01/10/2009, 14h54

بسم الله الرحمن الرحيم
الحقيقه يا أستاذ طارق يا عمرى موضوع الاستاذ ناصر دويدار فى الوريد
على الدم على طول
وشوف جمال ناصر دويدار وهو بيقول الفيران سكنت الوطن
والله عال على خيبه القطط
برافو ناصر دى فى العضل وتحت الجلد
تحياتى

عمر زهران

01/10/2009, 15h03

أولاً :عايز أقولكم على الأستاذ ناصر دويدار انا قابلته فى الأسماعيلية وكنت فاكر حقابل راجـــل عجوز لكن بصراحة لقيته شباب زينا وبيلبس البناطيل الساقطة وعايش لدرجة أنه قـالى أنا أصلع وتخين وأسمر ولابس بدلة قعدت أدور عليه ساعــة وهو قاعد قدامـــى بالجينز والحركات وعامل الموبايل صامت وانا زى الأهبل رنيت عليه 100 مرة ولما صعبت عليه خدنى بالحضن
يااااااااااااااااااه بجد لاقيت فنان مثقف فاهم واعى ويكلمك فى أى موضوع بنفس الحماس رياضى أجتماعى ثقافـى وأنا ما اعرفش انا كنت مشدود لشعره ليه اكتشفت انه زى اخويا عمى قريبى صاحبى حد كده قريب منك وبصراحة عشت يومين معاه وعرفته بكل أهلى وأصحابى لدرجة أنهم بقوا أصحابى وأهله أكتر منى وعرفت أن الأنسان ده لازم يكون شاعر كبير .اناحبيت اقول ده للمنتدى مش عارف ليه وأنا بشكره على العيدية الجميلة وكل سنة وهو وفريق العمل فى الجريدة بتاعته بخير الأستاذ أبو المجد والأستاذ حسين الطيب وانا مش هعلق على الفار والقطط لانى سمعتها منه 10 مرات لان ده حالنا كلنا بقينا قطط والفار بقى بيسكن فى الوطن شكراً يا عم ناصر

NAHID 76

01/10/2009, 15h04

سعدالشرقاوى

01/10/2009, 17h09

العين الثاقبة
واللغز المحيّر
الشاعر الجميل
الاستاذ/ناصر دويدار
فعلا كان المثل
(غاب القط العب يافار)
وبعد كده كان للمثل رؤية اخرى
(بقى العجل بسعر امّه)
وعلى السريع راى المثل ان
(القوالب نامت والنصاص قامت)
والظاهر ان القط اللى عايز يتقطقط فى زماننا
لازم يصاحب فار
مع انه كان بيبص عليه فى السقف يقع بالايحاء
ماعدتش قلّة حياء
ماعدش عيب ولا عار
والمكتشف واعى
بلقطة فلاش مايعملهاش غير دويدار
خليهم يقرقضوا بمخمخة

علاء قدرى

01/10/2009, 22h26

اخى و صديقى ناصر :emrose:
حين يقمع الشرفاء؛ ويجرم الحياء؛ ويكرم الاغبياء
تعمى الفوضى
وحينئذ ينتشر الوباء
فيحق للفئران ان تفعل ما تشاء
اما عن قصيدتك التى لى شرف الاستماع اليها منك سابقا
فهى لا تقل ادهاشا و روعة عن باقى قصائدك
فيها عمق الرؤية ؛ وخصوصية المفردات؛ وسخرية التامل من اختلال الموازين ؛ و عبثية الاشياء التى نمر عليها مر الكرام و لا نلقى لها بالا ؛ ولا تستفز فينا سوى الدهشة ؛ وبعض النكات ؟؟ رغم عمق الماساة
هذا زمن الرويبضة ؟؟؟؟؟؟؟؟

abuzahda

02/10/2009, 02h12

الـفــار مابقاش يخاف من القطط
والقطط مابقتش بتخوّف فيران
الـفـار فـْجــْر
بـقــى يمشــى ولا أجـــدع أســـــد
يبرم فى ديله يخش فى شوال الدقيق
يطلع على التوم والبصل
يضرب بلنص فى صحن فول
والقــط واقـف يسـألــه
فـى أى خـدمة يا محترم ؟
يبرم فى ديله الـفــار ويشتم
جاتكوا الـقـرف
قطط رمم
مفيكوش دكــر
قاعدين فى بيت مفيهوش كتب ولا ورك فرخة محمّرة
ولا بنطلون جينز أقرضه
الـفـار فْجْــر
يعزم صحابه فى الصالون
فيران كتير على كل لون
يرمش بعينه تيجى القطط بعصير لمون
يرمش بديله يجى العشا
يبقى نهار أسود غطيس
لو قط مرة أعترض
وأجـــدع شنب من القطط
ياكل من الفار ع القفا
وإذا قطة مرة نونوت من نفسها
وحزقتها مرة النونوة
لازم تقول متأسفة ع النونوة
ولحد ما الفار يتقبل عنده إعتذار
كل القطط تدعى يخليه ربنا
ويكسبه ويربحه يكفيه بقدرة ربنا شر العرس
وشر حاسد إذ حسد
يبعتله فارة تونسه تتجوزه
ويملوا الوطن قطاقيط فيران
آهــــ يا قطط متخلفة
مفيكوش دكــر
الـفــار فْـــجْــر
مع أنه فـــار
كبر صغر
فــار أبن فــار
طلع نزل
فــار أبن فــار
وسهل ياكل بالجزم
وإذا لزم ينداس على كعوب البُلغ
بـــس القــطــط
لابسه البُلغ فوق الدماغ
آهــــ يا قطط متخلفة
مفيكوش دكـــر
بقى دى النهاية يا قطط
فينك يا أيام الدلع
نوم السراير
والكنب
شرب اللبن
بقى دى النهاية يا قطط
يبقى السكن فى قلب صناديق الزبالة
والــفـــار بيـســـكن فى الــوطــــن
آهــــ يا قــطــط

يــــــــــــــــــــاااااا :emrose:دمــــــــااااااغك:emrose: المصيدة !

يا جدع ده انت زي ما تكون غايب بقالك سنة ،
و من محاسن الطوالع ، إنك راجع مع استئناف الغالي طارق:emrose: ، نشاطاته ذات الجهات الأربعة

* * *
أما عن الفيران ، فهي تفكرتني بالحكمة المصرية التليدة :

القوالب نامت و الـِّنصاص قامت

و إن كانت تلك الحكمة ، على عبقرية تكثيفها ، لا تعدو عن كونها مجرد إقرار بوضع مايل - بعيد عنك - إلا أنها تؤكد ما عرضته أنت تفصيلاً ، على مر العصور

الظاهر إنها حكمة ربنا ، سبحانه و تعالى ، إن كل زمن يكون له فيرانه و قططه

فما أكثر فئران اليوم ، يا عم ناصر:emrose: ، يا صائدهم

القمر الساهر

02/10/2009, 02h55

مازلنا مع الشاعر المميز والفنان ناصر ، مازلنا كالعادة مع كلمات مؤثرة وصور معبرة .
شعرت مع هذه الكلمات بأننى أجلس أمام شاشة سينما أو فى قاعة مسرح فقد بدأ الشاعر ناصر وكأنه يحكى لنا حكاية من حكايات الأطفال ويقول الفار مابقاش يخاف من القطط ....... وننصت له وننساق وراءه فى لقطات سنيمائية مبدعه أو حركات على المسرح يمينا ويسارا وفجأة يظهر فى لقطة كبيرة على الشاشة وينظر الى الكاميرا أو يقف فى مقدمة المسرح موجها كلامه للجمهور ويصرخ فينا بل يصفعنا على وجوهنا ويقول جاتكوا الـقـرف قطط رمم مفيكوش دكــر...................
ثم يعود مرة أخرى ويكمل الحدوتة بخفة دم ويقول قاعدين فى بيت مفيهوش كتب ولا ورك فرخة محمّرة ......... فننصت له وننساق وراءه مرة أخرى فإذا به يظهر لنا مرة اخرى فى لقطة كبيرة على الشاشة أو ينتصف فى مقدمة المسرح ويصرخ ويصفعنا مرة اخرى ويقول آهــــ يا قطط متخلفة مفيكوش دكــر............ ويعود ليحكى مرة أخرى ثم ينهى هذا العمل الفني المميز بعتاب ساخر ويقول بقى دى النهاية يا قطط .......ثم فى نهاية الصفحة هذه الصورة المعبرة والمكملة للمشهد .
طريقة العرض وقسوة الكلمات وجرأة التوجه كلها ضرورية ومقصودة لعلنا نفيق .
تحية لك يا شاعر ، ويا فارس على خشبة المسرح ويا مخرج كادرات السينما الرائعة ، تحية لك يا فنان يا ناصر .

محمودسعد

02/10/2009, 11h56

انت كل الروعه
ياناصر القط عالفار ؟
يابن دويدار

ناصر دويدار

03/10/2009, 01h41

[QUOTE=Tarek Elemary;360330]يا بن الذين يا أكبر القطط

عامللى فيها فار يا بن دويدار
طب ابقى استلقى وعدك بقى
بسم الله ماشاء الله يا عم ناصر
رائعة و فى الوريد و مفعولها خلانى أهز ديلى و أمد إيدى أتحسسه هو ديل فار و لا قط

منك لله يا دويدار خليت العقل حار و مليت دماغى نار ... أفكار أفكار أفكار
><><><><><><><><><><><><><><><><><><><><
شكراً يا صديقى كلنا قطط فى هذا العالم ما بنعملشى حاجة غير اننا ننونو عشان تبطل تتكلم عن الأحلام وعن الناس اللى بتحلم حتى لو كانوا قطط ... ويلا بقى انت والقط علاء نتقابل فى أى وطن

ناصر دويدار

03/10/2009, 01h50

بسم الله الرحمن الرحيم
أستاذ ناصر دويدار
بعد ان كتبت تعليقى الأول دار بخلدى الاتى
أن الفيران قدرت تعرف نقطه ضعف القطط
وقامت بالدخول لها من هذا المنطلق
وقدرت عليها وسيستها
فتركت القطط المذعوره الميدان للفيران تلهو وتفعل ما تشاء كما يحلو لها
ما هى الفيران أكلت
حق للفيران تفعل ما تشاء
تحياتى
"""""""""""""""
بسم الله الرحمن الرحيم
الحقيقه يا أستاذ طارق يا عمرى موضوع الاستاذ ناصر دويدار فى الوريد
على الدم على طول
وشوف جمال ناصر دويدار وهو بيقول الفيران سكنت الوطن
والله عال على خيبه القطط
برافو ناصر دى فى العضل وتحت الجلد
تحياتى
$$$$$$$$$$$$$$$$$$$$$$$$$$$$$
شكراً لحضرتك جداً على الأنفعال الإيجابى تجاه القطط وما تفعله بها الفيران ولاد الفيران وانا سعيد جـداً جــداً لأنى أتشرفت بتعليقين أجـمل من بعض وفعلا ياهانم الفيران برطعت وكلت وبقت الفيران السُمان وماعدش ينفع فيهم لا مصيدة ولا سم مفيش غير أننا ندعى عليهم يعيشوا فى صناديق الزبالة وأحـنا يا قطط نعيش فى الوطن والشمس والبحر والحرية
أشكرك تانى ياهـانم المنتدى كـلـه

ناصر دويدار

03/10/2009, 02h04

[QUOTE=سعدالشرقاوى;360378]العين الثاقبة

واللغز المحيّر
الشاعر الجميل
الاستاذ/ناصر دويدار
فعلا كان المثل
(غاب القط العب يافار)
وبعد كده كان للمثل رؤية اخرى
(بقى العجل بسعر امّه)
وعلى السريع راى المثل ان
(القوالب نامت والنصاص قامت)
والظاهر ان القط اللى عايز يتقطقط فى زماننا
لازم يصاحب فار
مع انه كان بيبص عليه فى السقف يقع بالايحاء
ماعدتش قلّة حياء
ماعدش عيب ولا عار
والمكتشف واعى
بلقطة فلاش مايعملهاش غير دويدار

خليهم يقرقضوا بمخمخة
}}}}}}}}}}}}}}}}}}}}}}}}
أولا ً : انا مبسوط لأن الصور الجديدة فعلاً صورة عـمدة
إنما الصورة القديمة دى مش واكلة معانا لكن بسم الله ما شاء الله على صورة العمدة دى وعشان كده الأمثال نازلة ترف علينا وصـح عندك حـق كان القط زمان يبص بصة للفار يقع مكانه دلوقتى الحال أتغير فعلاً وإن غاب الفار العب يا قط وبالذمة شوفت دلوقتى فار بيخاف من قط دلوقتى عملوا معاهدة سـلام مع بعض وبقوا بيشتغلونا قال إيه أتفاقية تعاون مشترك ووئام وسلام إجتماعى يلا يا عمدة زمن الفيران هنعمل إيه لا مصيدة نافعة ولا سم نافع شباشب بقى ولا إيه ،شكراً يا عمدة مـصــر

ناصر دويدار

03/10/2009, 02h14

[QUOTE=عمر زهران;360352]أولاً :عايز أقولكم على الأستاذ ناصر دويدار انا قابلته فى الأسماعيلية وكنت فاكر حقابل راجـــل عجوز لكن بصراحة لقيته شباب زينا وبيلبس البناطيل الساقطة وعايش لدرجة أنه قـالى أنا أصلع وتخين وأسمر ولابس بدلة قعدت أدور عليه ساعــة وهو قاعد قدامـــى بالجينز والحركات وعامل الموبايل صامت وانا زى الأهبل رنيت عليه 100 مرة ولما صعبت عليه خدنى بالحضن

يااااااااااااااااااه بجد لاقيت فنان مثقف فاهم واعى ويكلمك فى أى موضوع بنفس الحماس رياضى أجتماعى ثقافـى وأنا ما اعرفش انا كنت مشدود لشعره ليه اكتشفت انه زى اخويا عمى قريبى صاحبى حد كده قريب منك وبصراحة عشت يومين معاه وعرفته بكل أهلى وأصحابى لدرجة أنهم بقوا أصحابى وأهله أكتر منى وعرفت أن الأنسان ده لازم يكون شاعر كبير .اناحبيت اقول ده للمنتدى مش عارف ليه وأنا بشكره على العيدية الجميلة وكل سنة وهو وفريق العمل فى الجريدة بتاعته بخير الأستاذ أبو المجد والأستاذ حسين الطيب وانا مش هعلق على الفار والقطط لانى سمعتها منه 10 مرات لان ده حالنا كلنا بقينا قطط والفار بقى بيسكن فى الوطن شكراً يا عم ناصر
.,.,.,.,.,.,.,.,.,.,.,.,.,.,.,.,.,.,.,.,.,.,.,.,., .,.,.,.,.,.,.
انا عايز اقولكوا الأول أن عمر الأسماعيلاوى خد من فريقى ماتش كورة خُمـاسى 8/4 وكان معايا لاعيبة على قدهم وحظه حلو أن ماكنش معايا طارق العمرى كرأس حربة وعلاء قدرى كلاعب وسط الملعب وبينى وبينكم عملت فى فريقه عمايل وعلى فكرة فريقه كله تحت السن واحنا داخلين كلنا على مرحلة الكهولة لكن بصراحة الإسماعيلية وناسها وفنونها الشعبية والسمسمية والخضار اللى مغطى البلد حاجة تفرح أما الأخ عمر فا أزاى مش عارفنى وانا أبو زهدة شردنى بالكراسى اللى كنت قاعد عليها فى اول لقطة سينمائية ليا فى المنتدى وتوقعت أنه حيعرفنى على طول لكن عذره أن الصورة مش عارف راحت فين وماشفهاش وبصراحة قضينا مع الشباب يومين روووعة روحنا فايد وفنارة وكلنا سمك وعلى الرغم من أنه كل ما يكتبلى تعليق عايز العيدية وعايز نفحة حاسب على الليلتين بشجاعة وشهامة أولاد البلد لكن ياواد انت مستغرب إنى بلبس جينز إيه كنت فاكرنى جى بالشورت والفانلة وبعدين حكاية البناطيل الساقطة ماهى كلها بتسقط إيه الحكاية ع العموم يا عم عمر أبو المجد وحسين بيشكروك جداً وعايزين يشوفوك انت وشلتك فى القاهرة قريب عشان نعمل الواجب وكل سنة وانت واهلك بخير

ناصر دويدار

03/10/2009, 02h22

[QUOTE=علاء قدرى;360430]اخى و صديقى ناصر :emrose:
حين يقمع الشرفاء؛ ويجرم الحياء؛ ويكرم الاغبياء
تعمى الفوضى
وحينئذ ينتشر الوباء
فيحق للفئران ان تفعل ما تشاء
اما عن قصيدتك التى لى شرف الاستماع اليها منك سابقا
فهى لا تقل ادهاشا و روعة عن باقى قصائدك
فيها عمق الرؤية ؛ وخصوصية المفردات؛ وسخرية التامل من اختلال الموازين ؛ و عبثية الاشياء التى نمر عليها مر الكرام و لا نلقى لها بالا ؛ ولا تستفز فينا سوى الدهشة ؛ وبعض النكات ؟؟ رغم عمق الماساة
هذا زمن الرويبضة ؟؟؟؟؟؟؟
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
يا صديقى علاء مشكلتنا أن أحنا بحلقنا فى الحياة أزيد من اللازم عشان كده وقعنا فى مصيدة الفهم وأنت من الناس اللى فاهمة وعارفة ومتأكدة من العبث اللى احنا عايشينه لكن يا صديقى بنحاول نجمل قُبح الحياة بكلمة حلوة هنا بقصيدة هناك برسالة حــب لبنت ساكنة فى بلكونة الروح وأهى دنيا حنعيشها يا أطيب قـط عرفته فى حياتى كل سنة وأنت وكريم ومامة كريم بخير وبصحة

ناصر دويدار

03/10/2009, 02h30

[QUOTE=abuzahda;360441]يــــــــــــــــــــاااااا :emrose:دمــــــــااااااغك:emrose: المصيدة !

يا جدع ده انت زي ما تكون غايب بقالك سنة ،
و من محاسن الطوالع ، إنك راجع مع استئناف الغالي طارق:emrose: ، نشاطاته ذات الجهات الأربعة

* * *
أما عن الفيران ، فهي تفكرتني بالحكمة المصرية التليدة :

القوالب نامت و الـِّنصاص قامت

و إن كانت تلك الحكمة ، على عبقرية تكثيفها ، لا تعدو عن كونها مجرد إقرار بوضع مايل - بعيد عنك - إلا أنها تؤكد ما عرضته أنت تفصيلاً ، على مر العصور

الظاهر إنها حكمة ربنا ، سبحانه و تعالى ، إن كل زمن يكون له فيرانه و قططه

فما أكثر فئران اليوم ، يا عم ناصر:emrose: ، يا صائدهم
******************************
أولا يا أبو زهدة كل سنة وانت طيب انت واهل بيتك
ثانيا الصورة الجديدة من وجهة نظرى أهــم صورة فى ألبومك أولاً الإضاءة فى الخلفية عبقرية والنظرة تتسم بالبراءة والعُمق وإنتظار القادم الجميل بأذن الله هى صورة محتاجة قصيدة شعر عن بكرة والأمل والجاى
ثالثا إيه حكاية دمنهور معاك الحكاية معلقة خالص شكلك كده يا معلم هناخدلك شقة فى ميدان الساعة قدام الاوبرا ومكتبة البلدية وهتعيش جنب كيمو لحد ما نلم بعضنا انا وشلتنا اللى فى القاهرة ونيجى نعيش الحياة أما بقى يا سيدى حكاية القط والفار يابو السيد فادى حكاية بقت تزعـل مش عايزين نتكلم فيها خلينا مبسوطين أحسن وسلامك وصلنى بنفس حرارته من علاء قدرى
وإن شاء الله نتقابل قريب جداً ولو مانزلتش أجيلك انا مخصوص

ناصر دويدار

03/10/2009, 02h41

[QUOTE=القمر الساهر;360444]مازلنا مع الشاعر المميز والفنان ناصر ، مازلنا كالعادة مع كلمات مؤثرة وصور معبرة .
شعرت مع هذه الكلمات بأننى أجلس أمام شاشة سينما أو فى قاعة مسرح فقد بدأ الشاعر ناصر وكأنه يحكى لنا حكاية من حكايات الأطفال ويقول الفار مابقاش يخاف من القطط ....... وننصت له وننساق وراءه فى لقطات سنيمائية مبدعه أو حركات على المسرح يمينا ويسارا وفجأة يظهر فى لقطة كبيرة على الشاشة وينظر الى الكاميرا أو يقف فى مقدمة المسرح موجها كلامه للجمهور ويصرخ فينا بل يصفعنا على وجوهنا ويقول جاتكوا الـقـرف قطط رمم مفيكوش دكــر...................
ثم يعود مرة أخرى ويكمل الحدوتة بخفة دم ويقول قاعدين فى بيت مفيهوش كتب ولا ورك فرخة محمّرة ......... فننصت له وننساق وراءه مرة أخرى فإذا به يظهر لنا مرة اخرى فى لقطة كبيرة على الشاشة أو ينتصف فى مقدمة المسرح ويصرخ ويصفعنا مرة اخرى ويقول آهــــ يا قطط متخلفة مفيكوش دكــر............ ويعود ليحكى مرة أخرى ثم ينهى هذا العمل الفني المميز بعتاب ساخر ويقول بقى دى النهاية يا قطط .......ثم فى نهاية الصفحة هذه الصورة المعبرة والمكملة للمشهد .
طريقة العرض وقسوة الكلمات وجرأة التوجه كلها ضرورية ومقصودة لعلنا نفيق .
تحية لك يا شاعر ، ويا فارس على خشبة المسرح ويا مخرج كادرات السينما الرائعة ، تحية لك يا فنان يا ناصر .
:::::::::::::::::::::::::::::::::::::::::::::::::: ::::::::::
يا سلام يا قمر يا ساهر انت فعلا الوحيد اللى مسكت خيوط اللعبة على فكرة دى مسرحية (الــفــار والـقـطط ) ودى نهاية المسرحية . انت فعلاً مسكت الدرامــا بتاعت النـص لأن صديق ليا لما سمعها هو اللى خلانى أعملها مسرحية يعنى انا كنت كاتب النص وبعد كده حولت درامــا النـص إلى مسرحية شعرية بتحكى الواقع الحقيقى للقطط مع الفيران وبتحكى حروبهم وسلامهم وتطبيعهم وترقيعهم وتلوينهم وانا فعلاً سايب النص فى أتـحـاد الـكـتـاب وخــد إجازة من أربـع سنيين ويدينا ويديك طولة العُمر وياريت نشوف فــار يطبع المسرحية لأنها من وجهة نظرى ممكن تغير حاجات كتير وأهمها أمثالنا الشعبية المصرية العربية المتحدة وانا فعلاً مبسوط جداً من النظرة التحليلية السريعة التى نفذت فى عُمق النص وعلى فكرة سبقك من وجهة نظرى الأستاذة /ناهـــد لأنها هى الأخـرى أكتشفت صميم العلاقة بين القـط والـفــار أنا بشكركم جــداً ومش عــارف هل ممكن نعمل مساحـة للمسرح فى المنتدى ولا لاء شكراً يا قمر يا ســاهر وكفاية بقى سـهـر لأن الساعة دلوقتى الخامسة صباحاً

على عبداللاه

05/10/2009, 04h29

ناصر دويدار

06/10/2009, 22h03

انت كل الروعه

ياناصر القط عالفار ؟
يابن دويدار
______________________________
شكراً يا فنان مرورك خلى للكلام معنى
يا ملك المغنى
غنى وسمعنا
وقول على افراحنا واوجاعنا
بعدنا كتير عن الغنا الأصلى
وحياة الطرب اللى بجد
رجعنا

ناصر دويدار

06/10/2009, 22h08

الاستاذ / ناصر دويدار

قريتها مره قلت اكتبلك رد
لقتنى تانى للقرايه مستعد
قريتها تانى وقلت أرد
لقتنى تالت جاى معاى شوق وود
ليك يا أحلى غصن ورد
انت بقه ابقى استعد
دى الفيران هتهد كل الكون دا هد
واى حد
يقول عليهم نص كلمه
هيردوا رد
إن العيوب ماليه القطط
خوف على كدب ورشاوى
كلهم قاعدين عواله على القهاوى
يبقى الفيران بقى حقهم باقى الوطن
اللى سابوه قططه .. ولا أيه ؟؟
__________________________________
الجزمة اللى طايرة فى وش أكـبر فـار
مسحت شوية حـزن فى عيون القطط
وأنا مبسوط لمرورك وانفعالك بالقطط والفيران
شكراً يا عم على ومستنى منك الكتير

على عبداللاه

07/10/2009, 20h13

هتصدقنى إنى قريتها يمكن 8 مرات
وكوبتها وطبعتها
وحاسس انها جت على الجرح بجد
انت رائع
وأكتر من رائع
يا جدع أنا آسرنى زوقك وردك وفرك العالى
خد لك ورده أخر حاجه
:emrose:
ملقتش غيرها هنا
الفيران قرقضوا الباقى