بأحبك يا مصر

[علاء طه ياسين]

يا مصر اللي لابسة ثياب الحداد
وواقفة حزينة ف وسط البلاد
بتبكي عنيكي لعجز الولاد
وتنزل دموعك ولا حد داري
....
نسينا ليالي الحصاد في الغيطان
وطلة قمرنا وكان ياما كان
نسينا الكنايس نسينا الآدان
وقعدة محبة في ساعة عصاري
...
كفاية علينا نحب البنات
نطبطب ندلع نبوس الواوات
ونبقي جميعا كده كائنات
تعيش في المقابر وتحت الكباري
...
كفاية علينا مهند ونور
وغنوة بتتقال في يوم العبور
وقدام طابونة بنعمل طابور
وملعون أبوه السلوك الحضاري
....
ولما في مرة بندخل مولات
نمصمص شفايف ونمشي ف سكات
ياخدنا طريقنا لسوق التلات
وفي السكة نغرق في طفح المجاري
.....
علي رغم هذا باحبك يا مصر
...
بأحبك يا مصر التاريخ والحضارة
جوامع معابد كنايس عمارة
ومملوك بسيفه بيصد غارة
تدمر هولاكو وزحفه التتاري
....
وأحبك يا مصر الحسين الإمام
وزينب رئيسة الديوان والمقام
وقلبي معلق من ألف عام
ورا مشربية في عصر الجواري
....
واحبك يا مصر السهر في الليالي
وقهوة عليها بنقعد نلالي
وناعسة الجميلة في سيرة الهلالي
ونجماية شاردة علي سطح داري
...
وأحبك يا مصر السكك والدروب
وطيبة وبراءة بتملي القلوب
وعشة علي النيل ف ساعة الغروب
وزفة وزينة هناك في الحواري
.....
وأحبك يا مصر الهرم والسواقي
وترعة بتسقي الأراضي الشراقي
وبنوتة حلوة ف ساعة التلاقي
ونظرة عنيها هجوم انتحاري
....
:emrose:
علاء ياسين

[Tarek Elemary]

علاء طه .... الشاعر الذى أحببت شاعريته و موسيقاه و تلقائيته و موهبته
الآن الآن يا علاء
هذا هو الطريق .... و هذه هى المحبوبة
التى نهوى من ينافسنا على حبها
و التى يتسع قلبها لعشاقٍ لا نهاية لحصرهم
========================
رائعة القصيدة
و طازجة الكلمات و الأحاسيس
و نابعة من قلب عاشق حقيقى
يقيناً هناك المزيد

[Tarek Elemary]

وأحبك يا مصر الهرم والسواقي
وترعة بتسقي الأراضي الشراقي
وبنوتة حلوة ف ساعة التلاقي
بتهبط في قلبي هبوط انتحاري



ونظرة عنيها هجوم إنتحاري
أنا شايفها كده
كل واحد و نظرته يا جميل الروح و النفس (ما عجبتنيش بتهبط)

[علاء طه ياسين]

أخي الكبير وحبيبي
:emrose: طارق العمري :emrose:
...
الشاعر بيقول ..

أسير خلف ركاب القوم ذا عرجٍ
مؤملا جبر ما لاقيت من عوجِ
فإن لحقت بهم من بعد ما سبقوا
فكم لرب السما في الناس من فرجِ
وإن ظللت بقفر الأرض منقطعا
فما على أعرج في ذاك من حرجِ
...
باحاول أبقي زيكم ..
ويارب أكون ..

:emrose:

مصر النيل والشمس الطالة ..
وغيطان سمر تضم الغلة ..
والنسماية الحلوة الهالة ..
علي شجرة توت في الفجرية ..
هي دي مصر ..

دي اللي جاية ..
ونظرة عنيها هجوم انتحاري ..
حلوة جدا ..
اسمح لي باستعارتها ووضعها مكان
بتهبط في قلبي هبوط انتحاري
ده بعد إذنك طبعا ..

علاء ياسين

[NAHID 76]

بسم الله الرحمن الرحيم
بلادى يا بلادى
بحبك يا بلادى
بحبك يا مصر
يا مصر بحبك
مفهاش شك على الأطلاق
نقول عنها العيوب الكتير وهى فى دمنا تسير
وبرده مش بننسى لها الكثير
من الجمال والمحبه
والحضاره واللمه
برعت فيها علاء
وعلشان جمالها غيرت لون الخط لها مخصوص
كلمات معبره
أحساس عالى
انتقاء للكلمات
تجديد فى أتجاه الكتابه
موسيقاك دائما هادئه ورشيقه
بتقفز شويه هنا وشويه لمصر
تحياتى بعدد نجوم السما

[سعدالشرقاوى]

ياحبيبى يا أستاذ/طارق
فاكر يوم الأسفلت؟
الله يضحّكك زى مافرحتنى
والله جميل وكل حاجه لك حلوه
:emrose:
الآن الآن يا علاء
هذا هو الطريق .... و هذه هى المحبوبة
التى نهوى من ينافسنا على حبها
و التى يتسع قلبها لعشاقٍ لا نهاية لحصرهم

بصراحه ياعم علاء
عجبتنى جدا
والتجلىّ المره دى
كان فى ساعة صفاء
ودى بركة رمضان
شوفت لمسة أخوك طارق
عملت ايه فى المعنى
الله عليكم
ربنا يسعد كل ايامكم

[علاء طه ياسين]

سيدتي المدهشة
مدام ناهد
:emrose:
أسجل تقديري لك ولكل كلمة تخطها يدك الكريمة ..
وتسلم عينك اللي قرأت كلماتي دي ..
و ربنا يا رب يجعلك سعيدة و مبسوطة دايما على طووووووووول ..
يا ست الكل ..
......

هديتي لكي :emrose::emrose::emrose:

علاء ياسين

[علاء طه ياسين]

صديقي وأخي التوأم
سعد الشرقاوي
:emrose:
انت شخص محترم خالص ..
وأصيل حتي النخاع ..
وصدقك غامر كلماتك ..
و أنا أعتز أن يكون لى صديق مثلك ..

:emrose:


دا كلامك معجون احساس ..
وقليبك دا حتة ماس ..
وصداقتك ع العين والراس ..
مقدرشي استغني أكيد عنكم
.....
والعمري دا الواد الفارس
ع الكلمة الحلوة قاعد حارس
والفن يا سيدنا دا مدارس
وانا غاوي أتعلم منكم

علاء ياسن

[رغـد اليمينى]

بأحبك يا مصر التاريخ والحضارة
جوامع معابد كنايس عمارة
ومملوك بسيفه بيصد غارة
تدمر هولاكو وزحفه التتاري
....
وأحبك يا مصر الحسين الإمام
وزينب رئيسة الديوان والمقام
وقلبي معلق من ألف عام
ورا مشربية في عصر الجواري
....


وأحبك يا مصر الهرم والسواقي

وترعة بتسقي الأراضي الشراقي
وبنوتة حلوة ف ساعة التلاقي
ونظرة عنيها هجوم انتحاري
....



http://www.dwn1.com/wedw/omo53986.gif (http://www.dwn1.com/)

شاعر الجنوب صاحب الحروف العذبه المُغناه


((( علاء يــسَّ )))


مساء النيل


فى البداية دعنى أهُنئك وأُبارك لكَ لآمرين

الاُول : بمُناسبة شهر رمضان الكريم اعاده الله عليكم

وعلى أسرتك الكريمة بالخيروالصحة والعافية واليمن والبركات


>>><<<<


الثانى : لحصولك على تأشيرة سماعى المميزة

( المواطنة ) للإستمتاع والتجول بدولة الفن

العريق والأدب الآصيل بلا تقيد أو حدود، تنبأت لكَ

بها وها أنذا أول المُباركين لكَ فهنيئاً لكَ وهنيئاً

لنا بِكَ أيها الفنان العاشق النبيل :emrose:


وبعد


(( باحبك يامصر ))

رغم الكبوات ، رغم التراجع والإنهيار الذى بدأ

كمسلسل بعدأن إنكفأت مصرعن قيادتها..

للعروبة فهى لم تنم ، ولم ينهارهذا الشعب العظيم ..

ولكن إصرارنا يقوى بنا جذوة الإيمان فى أن تعود هذه

السامقة على رأس الأمة العربية..

نعم ... سأظل أوفى حتى وإن تنفى يا مصر ؛وأكتب

بقلبى أُحبك وأتمسك بكِ حتى النهاية ..


تحياتى أيها الرائع

فقدأطربتنى كلماتِكَ الرقيقة

وسطورك التى حملت عبق النيل..

إحترامى لقلمِكَ الدفاق الذى يرسم أجمل المعانى

بشفافية ونقاء،، :emrose:

http://www.dwn1.com/wedw/omo53986.gif (http://www.dwn1.com/)

[ناصر دويدار]

تحياتى لك تحية خاصة بمناسبة الشهر الكريم من الواضح
أن أدبك الجم جعل كل من يمُر على القصيدة يتحدث
عن قصيدة أخـرى لـيس لها مكان
ومع تقديرى لك لى بعض الملاحظات السريعة نظراً لضيق الوقت والخُلق أيضاً 0
أولا انا قدام قصيدتين أو فكرتين أو معنيين متضادين مختلفين بينهما مساحات شاسعة وفراغات مملة
شوف يا سيدى مصر مش لبسة توب الحداد
ولاهى حزينة فى وسط البلاد
أمال تبقى العراق إيه ؟
وفلطسين إيه؟
والصومال إيه؟
وبلاد كتيرة همها غير معلن يبقوا إيه ؟ ( بيكحوا تراب)
وأزاى عينيها بتبكى عجز وإذا كنا أحنا عاجزين بكل تاريخنا اللى أنت بتحكى عنه فى الموضوع التانى من القصيدة أمال مين السليم مفيش عاجز بيحلم
وبيكتب شعر لبنات
مين اللى نسى الحصاد والكنايس والآدان
(هبوط أضطرارى فى اللغة من خلال مباشرة فجة )
كفاية علينا مهند ونور
نطبطب ندلع نبوس الواوات
وغنوة بتتقال فى يوم العبور
إيه إيه إيه إيه
يكونش أنت مش عاجبك يوم العبور كمان
أن أحنا نغنى له
أنت كمان مش عاجبك أجمل حاجة فى تاريخنا الحديث
إيه !
عاوزنا نلطم على خدنا عشان أحنا أنتصارنا
ولما فى مرة بندخل مولات
نمصمص شفايف
ونمشى فى سكات
ياخدنا طريقنا لسوق التلات
لحد كده وأنت بتتكلم فى موضوع تانى خالص عن ناس
تانية
عن بلد تانية مش عجبك فيها أى حاجة خالص
وأنت حــــر
أنت وأى حد مش عاجبه البلد
هو حر هو الآخر
لكن مش عايزين ندخل فى مجاملات ليس لها
أى علاقة بالشعر ولا بالبلد نفسها لان مصر
مش لابسة توب الحداد
ولاحزينة وسط البلاد ولا بتعيط عجز
مصر التانية اللى أنت بتحبها واللى أحنا بنحبها
بس مش عشان سهر الليالى
وقعدتنا ع القهوة نلالى
ولاعشان ناعسة وبهية وست أبوها
ولا عشان السكك والدروب
ولا عشان البنات الحلوة
اللى نظرة عينيها هجوم انتحارى ولا عشان النيل
والهرم والتاريخ والجغرافيا والفلسفة والمنطق وعلم النفس
وكتاب المجاملات
أحنا بنحب مصر عشان البنى آدم المصرى العزيز العفيف الشريف المكافح اللى بياكل لقمته بعرق جبينه
اللى بيربى عياله من حلال
اللى بيصوم ويصلى ويدخل الكنيسة
ويدخل الجامع ويمشى مع بنات
ويستغفر ربنا
صحيح أن مبادرتك مختلفة عن شعر الحب والهيام والعواطف
لكن أنت دخلت منطقة (كلها ألغام)
وأنا شخصياً نصحتك نصيحة أخوية
بعيدة عن المجاملات اللى هى من عنية
أسطورة المنتدى وأعظم شاعر فى المنتدى
وقرة عين المنتدى وصديق المنتدى أنا قولتلك أصبر على نفسك شوية
الشعر مش مزيكا وبس وإلا كان يبقى شعرا كتير ماعندهاش كسر يكونوا أكبر شعرا
فى مـصــر
نصيحتى الأخيرة
ليك
أستنى شوية على نفسك لأن أنت عندك حاجة ما تضيعهاش وسط التحدى الغريب فى أنك تكتب كل يوم
قصيدة وأسأل على على مهدى وحسن أبو عتمان
ومحسن الخياط وعصام عبد الله وإسماعيل الحبروك
ح تعرف أن كل واحد كتب غنوة أو أتنين أو أربعة ودخل التاريخ من أوسع أبوابه
عشان كانوا عارفين يعنى إيه مصر
ويعنى إيه كفــاح
ويعنى إيه شعر
ويعنى إيه فنان
تحياتى لك
خالصة
بريئة
مفيهاش مجاملة ولا زيف
أخوك 000
ناصر دويدار

[علاء طه ياسين]

السيدة المبدعة
رغد اليميني
:emrose:
..
الوردة التي فجر نداها ينطق من نقائه ..
والنهر المنساب في طرقات الغابات رقة وعذوبة ..
:emrose:
وكل عام وأنت بخير ..
أعاد الله هذا الشهر الكريم عليك وعلي أسرتك باليمن والبركة ..
وأشكرك جدا جدا علي تهنئتي بالمواطنة ..
وأصافحك بيد الشكر والإمتنان ..
وصدقيني أنني لم أنتبه إليها إلا حين لفتي نظري أنت إلي ذلك ..
فلك كل الشكر والتقدير ..
وأشكرك على كلماتك الرقيقة ..
التى تنهمر كشآبيب مطر علي أرض قاحلة ..
وأدام الله عليك إحساسك المرهف ..
فهو زادنا في حياة خلت من المشاعر ..
:emrose:
دعواتي لك ولأسرتك بالسعادة ..
علاء ياسين

[علاء طه ياسين]

أخي الفاضل الأستاذ
ناصر دويدار
:emrose:
جزيل الشكر أقدمه لك علي هذا النقد البناء ..
الذي أسعدني جدا جدا ...
فقد هداني لأخطائي ..
ووضح لي أمورا كانت غائبة عني ..
لك كل الحق فيما تقوله ياسيدي ..
وسوف أحاول إن شاء الله تعالي ..
أن أدقق في اختيار كلماتي ومعاني ما أكتبه ..
وأن أصبر كثيرا حتي تخرج أشعاري بشكل لائق ..
لك شكري وتقديري العميقين ..
وأعتز بمشاركتك جدا جدا
وأتمني أن تكون نقطة بداية صحيحة لي ..
وربنا يسعد أوقاتك..
وهذه هدية مني لك :emrose:
علاء ياسين