قالتلي مع السلامة [الأرشيف] - منتدى سماعي للطرب العربي الأصيل

علاء طه ياسين

31/07/2009, 09h16

السيد نورالدين

31/07/2009, 14h35

شاعرنا الغنائي الأستاذ / علاء طه

أحب أقولك تسلم أيدك على كل كلمه بتكتبها

وانا متابع كل قصيده بتكتبها هنا بالمنتدي وفعلا أنت قمة الأبداع

بس محتاجين حد يغني الكلمات الحلوه دي

والقصيده دي بجد روعه
بس بعد إذنك حاول تشوف البيت الشعري ده

لأن فيه إختلال وأتمني رأيي ميزعلكش

فاكراني هأمد ايدي

خالص تحياتى

السيد نورالدين

علاء طه ياسين

31/07/2009, 14h53

أخي الشاعر
السيد نور الدين
:emrose:
يارب يخليك علي كلامك الحلو ده ...
وانا والله باكتب علي قدي ..
أروح فين انا جنب الشعرا الكبار اللي المنتدي مليان بيهم ..
أما الملحنين والمغنيين ..
انا كتبتلهم استغاثة في أحد ردودي علي والدنا الغالي
د. أنس :emrose:
وبالنسبة للشطرة اللي حضرتك نوهت عليها ..
انا مش زعلت والله ..
بالعكس ..
ده اسعدني ..
لأنه معناه إن حضرتك اهتممت بالقراءة والتفكير والنقد ..
وده شيء يفرحني مش يزعلني ياراجل أبدا أبدا ..

انا باقرا الشطرة دي "فاكراني هَمِدّْ إيدي "
بدون نطق حرف الهمزة ..
كده يمكن الاختلال يتظبط شوية
لو الاختلال باقي أغيرها ..

أتمني أشوفك دايما في مواضيعي ..
ومش تحرمنا منك ..
انتوا أساتذتنا .. واحنا بنتعلم منكم ..
اقبل مني الزهرة دي عربون مودة ومحبة :emrose:

علاء

عفاف سليمان

03/08/2009, 12h15

....

قالتلي مع السلامة
قولتلها مع السلامة
فاكراني بعد منها
هابقي زي اليتامي
....
فاكراني هامد ايدي
أقول لله ياسيدي
وحبها ف وريدي
هيعلم 100 علامة
....
فاكراني خلاص هاضيع
أو هارجع أكون مطيع
وابقي الحمل الوديع
واقابلها بابتسامه
....
فاكراني هاموت وراها
أو هاترجي ف هواها
انا مش محتاج رضاها
ياما اتحملت ياما
....
فاكراني هاعيش ف نار
والحزن يكون لي دار
ولا يجيش النهار
وأمشي ف سكة ندامة
....
قالتلي مع السلامة
قولتلها مع السلامة
ومشيت وف قلبي دمعة
باقية ليوم القيامة
....

علاء

اخى الاستاذ علاء :emrose:
بعد مساء الخير عليك وعلى الجميع
اكيد اكيد هى اللى خسرانه:rolleyes:
قلب كله دفى وحب وحنان
اكيد اكيد هى اللى ندمانه
على فراقك ونار الاوجاع
واكيد اكيد هى اللى هتدور عليك
لجمال حنانك واحساسك انا بحييك:)
لك خالص التقدير وللجميع اسعد الاوقات
والينا مزيدا من الابداع
اختك عفاف:emrose:

علاء طه ياسين

03/08/2009, 12h36

أختي الطيبة
عفاف
...
الحمد لله علي سلامتك
فينك
مش بنشوف ردودك ليه من فترة
.....
عموما
رجعتي
ورجعت معاك الردود الحلوة البريئة الطيبة
اقبلي مني الزهرة دي
:emrose:
.........
قالولي كتير بلاش هي
وانا باعند وباتحدي
مخدتش لحظة بكلامهم
وقولت مجاتش علي واحدة
وحبيتها لكن قلبي
بقي مجروح بشوك وردة

....
علاء

عفاف سليمان

03/08/2009, 12h47

هديه مقبوله لك كل التحيه:emrose:
وكلمات جميله تستاهل :o
ان تغنى والله
اما عن تاخرى كنت مسافره:crazy:
فى المصيف وجيت
واتمنى لك وللجميع كل الخير
تحياتى لك وللجميع
اختك عفاف:)

ام مدحت

03/08/2009, 16h10

الاستاذ/علاء طه ياسين
والله وقلبك جمد
وبقيت تشوّح وانت بتقول مع السلامه
عموما كده يمكن تحبك اكتر
ماتخافش يا ويلد

ناصر دويدار

03/08/2009, 22h39

انا عايز اقولك انت شاعر جامد جداً
عندك الاحساس عالى والمزيكا بتاعتك مفيهاش مشاكل
والملحنيين موجودين بس أفضى لك شوية وكل شئ هيتحل
بس فى مشكلة انت بتكتب اسهل شكل فى الأغنية
ده بيعمل معاك حالة من التواتر يعنى انت عندك القدرة انك تكتب كل يوم اغنية والشكل ده مع الوقت هيستنفذك من ناحية المضمون لان الموسيقى هى اللى بتاخدك لنهاية الشطرة فا ساعات كتير بتكون مضطر انك تقفل الشطرة بسطر غير منطقى ومالهوش دعوة بالمعنى انا عايزك تجرب المذهب والكوبليهات
وتجرب أشكال تانية فى الأغنية عشان المعانى تكتر وتاخد براحها معاك انما انت شاعر فاهم بتمتلك ادواتك معندكش كسر باين فى الموضوع لكن عايزك تتعب شوية لانك بعد شوية خايف عليك تشطب لان الشكل ده سهل ومغرى ركز شوية وعلى فكرة بداية الغنوة جامدة جداً بعد كده ضعفت فى مناطق ودى ملحوظة فى كل شغلك لأنك حابب تكتب كل يوم
أهدى شوية
الملحنيين موجودين والمطربين موجودين
وأحنا موجودين والاذاعة موجودة ومع فرصة انى اقابلك عايز ك تحضرلى نصوص أوديهالك الإذاعة تخش لجنة وربنا يوفقك لانك شاعرجميل

NAHID 76

04/08/2009, 18h22

بسم الله الرحمن الرحيم
الشاعر الغنائى علاء ياسين
كالعاده كلماتك جميله والموسيقى فيها ناطقه
وسعدت جدا بكلام الأستاذ ناصر دويدار
خليك معاه على الخط
متعرفش ايه اللى يكون
أنت شاعر ناجح
تحياتى
يا رب احمى قسم تجارب أدبيه

علاء طه ياسين

05/08/2009, 12h52

السيدة الفاضلة
أم مدحت
:emrose:
قلبي مش جمد ولا حاجة
دي بس حلاوة روح
شكرا خالص علي ردك
تمنياتي الطيبة ليكي
بالحياة السعيدة
في ظل الأسرة الكريمة
:emrose:
علاء

علاء طه ياسين

05/08/2009, 12h53

الأستاذ الفاضل
ناصر دويدار
:emrose:

لك مني كل الحب والتقدير
اسمح لي ..

أولا :
أشكرك جزيل الشكر علي قرائتك لقصائدي
وعلي هذا النقد المتخصص الرائع
الذي - وحق لا إله إلا الله - أسعدني جدا
وصدقت يا سيدي أنا أحب أكتب بصفة مستمرة
وكما قلت أنت تأتي البدايات قوية
ثم تتوه المعاني بعد ذلك فتضعف القصيدة في بعض الأحيان
فشكرا علي هذه المداخلة النقدية
التي ستجعلني إن شاء الله تعالي ألتفت مستقبلا
إلي هذه الملاحظات
التي أبديتها علي ما أكتبه
ثانيا :
أشكرك أيضا علي دعوتك الكريمة لي
وهذا لا يصدر إلا من شخص كريم
وإن شاء الله تعالي سوف نلتقي
وفي النهاية
ربما يعجز اللسان عن كلمات الشكر فلا يجد إلا كلمة واحدة هي
شكرا
:emrose:
علاء

علاء طه ياسين

05/08/2009, 13h02

السيدة المدهشة دائما
مدام ناهد
:emrose::emrose:
ولا يحلو أي موضوع من مواضيعي التي أكتبها ..
إلا حين تمرين عليه ..
وتكتبين ما تكتبين ..
حفظك الله ورعاكِ ..

أهدي إليك بداية قصيدتي القادمة

يا سارحة في ضل النخيل ..
قلبك الطيب واخدني ..
للي دايما مستحيل ..
.....
.....
يا حبيبتي ..
عمر قلبي بالمشاعر والغناوي ما كان بخيل ..
وانا الهلالي وانتي ناعسة ..
انتي ست الحسن وعنيكي السبيل ..

علاء