أصحاب المهن ... أسباب المحن

[Tarek Elemary]

بسم الله الرحمن الرحيم

الأخوة الأعزَّاء روَّاد و أعضاء ومواطنى و أصحاب سماعى
تحية من أعماق القلب صادقة و خالصة و مخلصة لكم جميعا مصحوبة بصادق الدعاء لله أن يمن عليكم و يديم مَنَّه بالصحة و العافية و الستر و بعد ،
أرى على قدر نظرى الضعيف من نافذتى الضيقة على العالم الواسع الكبير أن أصحاب المهن الذين فسدت أخلاقهم بشكل طاغٍ بحيث أصبحوا يمثلون الأغلبية فى كل مهنة هم سبب فساد المجتمع و إحساس الغالبية من الناس بفساد المجتمع و الحياة عموما فى بلدنا العجوز جدا مصر.
قد يختلف معى الكثير من الناس ولا غضاضة فى هذا فالإختلاف مؤشِّر صحي فى حد ذاته و لا يفسد للود قضية أبدا بتاتا البتة و لهذا سنتناول أصحاب المهن تناولا أدبيا فيما هو آت و نعرض وجهات النظر و نتناقش حولها و نتفق ونختلف و هكذا

[Tarek Elemary]

الدكتور مابقاش بِيْطَبَّبْ
بقى فينا عَيْشُة بِيْقَلِّبْ
و احنا بقينا لِيْه سبوبة
و لا فارقة معاه مين يتعذَّبْ
***
بقى قاسى و القسوة مرار
تقولش مقاول أو جزار
و يباصى لتحاليل و أشِّعَة
و عمولته عمولة سمسار
***
يكتبلك أدوية بالزوفة
و عمولته طبعا معروفه
و انت تِكُعْ و مالك حيلة
و العملية بقت مكشوفة
***
ده بقى حال الكل وحالى
و لا هاتخلِّلى رخيص ولا غالى
لو يوم عندك حد إتألِّم
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

على أيَّامنا كان اسمه مُعَلِّم
منه بْنِفْهَمْ و بنتعَلِّم
يُشْخُطْ تِلْقَى الفصل دَه هُسْ
و لا يِقْدَر مَخلُوق يِتْكِلِّم
***
دِلوَقتى بقى أستاذ سيكا
حِصِّته ميلودى أومزِّيكا
أمَّا الشرح ... ياراجل سيبك
مُخْ ولادنا بقى أستيكة
***
التعليم بقى درس و سنتر
إشى مرجع واشى ملزمة أقصر
و الأستاذ بقى برضه مقاول
له تسعيرة إذا كنت هاتقدر
***
و الحصة محسوبة بالفيمتو
أصل الوقت ده يعرف قيمته
عداد والحسَّابة بِتِحْسِب
دَخْلَك كُلُّه لاجل سيادته
***
ده بقى حال الكل وحالى
و لا هاتخلِّلى رخيص ولا غالى
لو عندك حد بِيِتْعَلِّم
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[abuzahda]

أخي الجميل ، الأستاذ طارق العمري
تحلو لي قراءتك ، و قد آنسني حضورك البهي منذ أول إطلالةٍ لك على سماعي
كما آنسني تواصلك عبر البريد و الهاتف ، أثناء أجازتي السماعيّة
و تعجبني طريقتك في حب مصر ،
و لكن
هل نلوم "محامي أرزقي" ؟ و قد تلقى علومه على يدِ نظامٍ لا يعي قيمة العدل ؟
هذا مثالٌ ......
فقِس عليه

[Tarek Elemary]

يا سيدى دعك من كل هذا ..... العود الأحمد هو الأهم
و الأحتفاء بك و به هو فرض عين
حللت أهلا و وطأت سهلا ونحن نهواك شباباً و شيبةً ... طفلاً وكهلاً
و أنا معك لكن النظام هو مجموعة أفراد تم تربيتهم و تعليمهم على يد أفراد أيضا
و الذين سكتوا عليهم أفراد و الذين قاوموهم أفراد الحكاية كلها ان الفرد هو وحدة تكون الجماعة
و تخيَّل حضرتك معى الرسول صلوات الله عليه و سلامه لو قال إنما انا فرد واحد ما عسانى أستطيع أن أفعل
و لكم فى رسول الله أسوة حسنة ... و كل واحد فيما هو عليه قيِّم يتحرى الضمير و العدل و الشرف الشرف الشرف
ستسقط كل اوراق التوت عن المتسترون بها و يفرون خجلا و خزيا و الله أعلم

[Tarek Elemary]

سوَّاق التاكسى يا جمالُه
الله يِيَسَّر حالنا و حاله
و الشرطى الواقِفْ فى الشارع
أجدع منُّه بِجَدْ خياله
***
تشاور يفتحلك تحقيق
و كأنه له سير و طريق
يختار المشوار بمزاجه
و لابد يآنسَكْ برفيق
***
وان قلت العدَّاد يا أخينا
هايقُولَّك إنزِل هَوِّينا
دانت زبون م العصر الحجرى
آخرَكْ تركَبْ حَنطور نَينَه
***
هايقَاوْلَك من قبل ما تركب
و أمَّا هاتوصل تانى ها تِتْعَب
هَايْجَّرَّس أهلك بفضيحة
أحسن تدفع و إوعَاكْ تِغْضَب
***
إستغلال و بَجَاحَة و فِرْدة
و التاكسى يا زيستافا يا قِرْدَة
اللِّى يِحِب النبى يِدِّيها
زَقَّة هانوصل واحدة بواحدة
***
ده بقى حال الكل وحالى
و لا هاتخلِّلى رخيص ولا غالى
لو عندك مَوْعِد و ضرورى
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[د أنس البن]

الدكتور مابقاش بِيْطَبَّبْ
بقى فينا عَيْشُة بِيْقَلِّبْ
و احنا بقينا لِيْه سبوبة
و لا فارقة معاه مين يتعذَّبْ
***
بقى قاسى و القسوة مرار
تقولش مقاول أو جزار
و يباصى لتحاليل و أشِّعَة
و عمولته عمولة سمسار
***
يكتبلك أدوية بالزوفة
و عمولته طبعا معروفه
و انت تِكُعْ و مالك حيلة
و العملية بقت مكشوفة
***
ده بقى حال الكل وحالى
و لا هاتخلِّلى رخيص ولا غالى
لو يوم عندك حد إتألِّم
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

الصديق طارق العمرى
ما قلته فى أبياتك أقل كثيرا جدا مما هو حاصل فى هذا الزمان العجيب , والمساوئ التى ذكرتها شئ هين تقاس بالصغائر إذا ما كشفنا الغطاء عن الكبائر وما أبشعها
كان نفسى أعيش فى زمن الطب فيه بدون أجر على أن تتكفل الدوله بالطبيب بحسب مايراه مطلوبا له مهما كان , كما تفعل بعض دول العالم المتقدم مع القضاه , تعطيهم مايريدون مهما كان دون أن تحدد لهم راتبا , والأولى أن يكون الطب كذلك لأنه من العار فى رأيى أن تكون رعاية صحة الإنسان مشروطة بمقابل مادى قل أو كثر . وهذه ليست مثاليه ولكنها حقيقه

[Tarek Elemary]

دكتورنا الإنسان دكتور أنس
أنعم الله عليك بمرهف الحس و نبل المشاعر و سعة الصدر و الأفق
أتفق معك يا سيدى تماما فيما ذهبت إليه فى هذه المهن تحديدا (القاضى) و (الطبيب) و (المدرس) و( الباحث العلمى شريطة أن يعمل فى مشروع له هدف نبيل لصالح الجميع و ليس هدفا فئوياً)
نعم يا سيدى ساعتها سيعمل هؤلاء بحيادية و بغير ضغوط و لا عناء و مشقة و سيحصل المجتمع على أسمى خدمة تصل به لأسمى درجات الإزدهار.
تخيل سيدة مجتمع ينعم بالعدل الحقيقى، و يكفل لك العلاج كما يجب، و التعليم كما يجب ثم هناك فرق بحث تعمل بصدق و دوافع حقيقية على تنمية المجتمع و تقدمه
هكذا دخلنا إلى اليوتوبيا و المدينة الفاضلة و لكن ما علينا سوى أن نحلم و نحاول و نحاول و نحاول
و يكفينا شرف المحاولة و ما لا يدرك كله لا يترك كله
هذه حكمتى المفضلة
و تقبل منى أطيب المنى و أرق تحياتى

[NAHID 76]

بسم الله الرحمن الرحيم
من نافذتك أستاذ طارق
أرحب وأهلل معك بعوده سيدى أبو زهده
وتقديرى لترحابك يا استاذ طارق
موضوعك دسم ومليان وكتير سوف يشاركوك المجال
أما ما قلت عن الطب والاطباء
دى قطره فى بحر
هو فيه أيه بعد سرقه الاعضاء البشريه
والمعلم
ده كان زمان لسه فاكر كان زماااان كان زمااان
أما سواق التاكسى
حدث ولا حرج عن كل شيئ
تقديرى للموضوع
وتحياتى الممزوجه بالتقدير لحسن وأنسانيه وفطنه سيادتكم

[Tarek Elemary]

يا سيدتى طاب صباحك قبل مسائك
و وقاك الله شرأصحاب المهن المستغلين
و أشكر لك حسن إطرائك و أتمنى أن أستحقه
و شكرا

[Tarek Elemary]

البيه البواب يا جَمَاعة
يبدأ مظبوط زَىّْ الساعة
همة نشاط إخلاص وتفانى
هادى و طيب غير الطاعة
***
بعد يومين تلاقيه بيطَنَّش
سَمَعُه تِقِيل ونضيف و مِرَوِّش
بَقَى سمسار لِشُقَقْ و مُنادى
على كل الشارع بيكَوَّش
***
تناديله يعمل مش سامع
وان راح المشوار مش راجع
و ان قلت فلوسك تداويه
تبقى صحيح بقى راجل لاسع
***
بقى بلَّاعة وعمره ما يشبع
و لا زوق و لا شدة بقت تنفع
وان كنت من النوع الحامى
يا هاتِتْشَلْ يا إمَّا هاتِبْلَع
***
ده بقى حال الكل وحالى
البوَّاب بقى حلم خيالى
يا تعيش فى مشاكل وتعانى
يا تطنش وتقول وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

الفاكهة أشكال و ألوان
و أنا مُعْجَب بيها و ولهان
تطلب ايدها من الفكهانى
تسمع منه طقم حنان
***
و يلِفَّك لَفْ الحَلَزُون
جوِّة الكيس سِر و مدفون
ترجع بيتك نافخ ريشك
جايب فى البرازيل مية جون
***
تِفْتَحْ كِيسَكْ تِلْقَى عَفَانَة
الفاكهةكُلَّهَا تَلْفَانَة
شَكْلَكْ يِبْقَى بْجَدْ يَزَعَّل
عَنْد الحُرْ دى تِبْقَى إهانة
***
و تْرُوحْلُه يِزَعَّقْ و يْبَوَّقْ
يُشْخُطْ و يْقُولَّك ما تْرَوَّق
أنا عَبَّيت قُدَّامك حاجتك
من وِشْ القَفَصْ المِتزَوَّقْ

***
ده بقى حال الكل وحالى
مش قادر أنسى اللى جرالى
الفكهانى خدعنى و فاتنى
نادم على تَغْفِيلى ليالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[علاء قدرى]

سيدى الفاضل الاستاذ طارق العمرى

ابداعك هذا طرقا على باب مؤصد من الاف الاعوام
خلف هذا الباب (موتى احياء؛او احياء كالموتى)
حينما اقرا لعمنا بيرم التونسى...نجد ان الامر هو الامر
بل اقسى و امر.......

اذا نحن لا نريد ان ندرك انى موتى ...وعلى اقل الاحتمالت مرضى
نبحث عن داء

الحل ان نعى ان(امة لا تقرا....ماتت و ليس فى طريقه للموت)
تقبل اعجابى ؛و تقديرى...فى انتظار صاعقة اخرى
لندرك اننا ما زلنا احياء

[Tarek Elemary]

أستاذ/ علاء قدرى
مرورك الكريم أعلى شأنى و رفع قدرى
أستشف من حديثك سيدى مدى همِّك بالشأن العام و الهمِّ المجتمعى و مدى عمق ثقافتك أيها النبيل
و تقديرك لى وسامٌ على صدر صفحتى تتجمَّل به و تزهو بين الصفحات
دمت ذخرا و فخرا لبلدك و أهلك و ذويك
و تقبل منى أطيب المنى و أرق تحياتى

[عفاف سليمان]

الاستاذ الشاعر
طارق
بعد مساء الخير على حضرتك وعلى جميع اهل سماعى الكرام
جميل ما كتبت
وارجوا ان تضيف عليهم
الشغالات
اى الذين يقمن بتنظيف المنازل
والمحامون
الدكاتره اللذين يدرسون العلم
وكل شغلهم الشاغل
من اشترى او اى كميه بيعت له هذا العام من الكتب
ولو متوزعتش الكميه تبقى سنه سوده ع الطلبه
الامتحان يجى فوق مستوى الطالب المتوسط
وتصحيح الورق
يا سلام
لو ماده الطالب لابد ان ياخد فيها امتياز
ياخد مقبول
وده حصل معى شخصيا
ولو حاولت تتظلم
مين يقدر يراجع الدكتور فى قراراه
وكتيررررررررررر
ربنا يعينك وتتكلم عن السلبيات اللى فى مجتمعنا
واكيد فى باقى المجتمعات
تحياتى لحضرتك وللجميع
اختكم عفاف:emrose::cool:

[Tarek Elemary]

بَاشَا ما يِعرف عُمره بشاشة
كل الخَلْق أذاه تِتْحَاشَى
يمشى تقولش طاووس يتعاجب
مع انه ابن الأسطى عماشة
***
كل الناس فى عيونه لِمَامة
و لا عادشى مَرُوءَة و لا شَهَامة
يِعْمِل ع المساكين فَرعون
و المَسْنود يِبْقالُه نَعَامة
***
ظَالِم حَالِم يِوْصَل فوق
على رَقَبِة أَيُّها مَخلُوق
نِدْعِى المَوْلى يُلطًفْ بِينَا
فى ظِلِّ قانونَّا المخروق
***
لَوْ شُفنَا بِعْنِينَا الواقْعَة
حادثَة خناقة حَرِيقَة ووالْعَة
بِنْبَلَّغ بالإسم الوهمى
خَايفِين مِن مِرْوَاح بِلا رَجعة
***
ده بقى حال الكل وحالى
الكُل يقولَّك وانا مالى
خايفين من بشوات الشرطة
أصحاب سطوة يا بوى و معالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[علاء قدرى]

الاخ المبدع/ الاستاذ طارق العمرى
كلماتك كالمطرقة....تضرب بلا رحمة
نعم
لابد من تعرية الواقع حتى نجد مكمن الداء
ولكن
حين اتحدث الى اى انسان فى هذه البلاد(متعلم/امى/مثقف/جاهل/مهذب/همجى/ظالم/مظلوم/حاكم/محكوم)
اجده يقول بلدنا خربت؟ خربوها ولا الاية
وحين
ابحث بجديةاصل لتلك النتيجة( هناك 80 مليون معول يهدم فى تلك البلد) كل على قدر همتة
تلك التى قال الله عنها فى قرانه الكريم
ادخلوها بسلام امنين
اين الدواء؟؟؟؟؟؟؟؟؟؟؟؟؟؟
من وجهة نظرى المتواضعة جدا الدواء فى اول ايه فىالقران نزلت على سيدنا محمدصلى الله عليه و سلم
اقرا
جحدناها فكان.......ما كان
تقبل مداخلتى..بسعة صدر الشاعر الرحب
ولك منى فائق التقدير

[Tarek Elemary]

الألمعى النابه المثقف الحصيف الرصين الأستاذ/ علاء قدرى
أصبت كبد الحقيقة يا سيدى
أتفق معك تماما تماما و أضيف أن العبء الأكبر يقع على المثقف و المتعلم فهو الحصان الذى عليه جر العربة نحو المستقبل المشرق عبر الطرق الآمنة
و لك تحياتى و عظيم إمتنانى

[Tarek Elemary]

دُكتور و مُهندس فى الصَنْعَة
بِيَاكُلْهَا أثناءْ مَاهِى وَالْعَة
بَصْمَجى ولا يِقْرَا و لا دِيَاوْلو
وأجدَع من خريج الجامعة
***
كل ده مقبول و مافيش مانع
نحترم الصنعة و الصانع
و نقَدَّر كل صاحب مهنة
لا عليه نِتْجَنَّى و لا ندافع
***
لكن لمَّا يتاجر فينا
و بقصد يزَوِّد بلاوينا
تروحْلُه العربية بتمشى
يِدْخُلَّك فى موتور و كاتينة
***
و اشى دينامو ولَّا اسبراتير
و فرامل و عامود كارتير
و فتيس و مقصات و سلِندَر
ده غير ركْنِتُه و التأخير
***
و القصة طقم البوجيهات
أو قول تلميع القُطاشات
و كلام يِتْقَضَّى بتَلَتْ أبيض
هوه يِدَفَّعَك الألوفات
***
ده بقى حال الكل وحالى
الميكانيكى تعبنى ليالى
خلانى أتمنى أرجع أمشى
ولا أزور ولا عمى و لا خالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!

[علاء قدرى]

استاذنا الشاعر الكبير/ طارق العمرى
واضح جدا هنا و فى دى بالذات انك (زبون محترف)عندالميكانيكى.:mdr:
استمر فى كشف الغير مستور
دعنا نخجل من انفسنا
وعلى فكرة ؛ تعجبنى جدا مقولة ان الانسان هو الكئن الوحيد الذى يخجل
لانة الوحيد الذى يفعل ما يستحق الخجل؟؟؟؟؟

انا هنا .......حيث انت
وتقبل تحياتى

[Tarek Elemary]

أستاذ/ علاء
أولا شاعر و قلنا ماشى أهى من المشاعر
إنما كبير دى يبقى سب و خطأ فى حق الشعراء اللى بجد
أما مسألة زبون فأنا زبون عند كل أصحاب المهن عاليه ماعدا الشرطة طبعاً و إلا ما كانتش تشرفت بحضرتك هنا نهائى
و الله الحكاية بقت لا تحتمل و الضمير هاجر نحو الغرب و أيضا نحو أقصى الشرق و تركنا لإحساسه بالغربة بيننا فى رأىِ المتواضع هو الضمير ليس إلا
و تقبل تحياتى:emrose:

[Tarek Elemary]

شرَّانى و كِشَرى و مِتْعافى
يِرْحَمْنا خَفِيٌّ الألطافِ
من سكاكينه قبل لسانه
و لا نحتاج إسعاف و مطافى
***
الواحد فينا يحوِّش شهر
علشان يقدر يدفع مهر
كيلو بتلو و حتة عضمة
و يعمل شوربة عوم كالبحر
***
تروح و تشاور ع اللى ف نِفسك
يقولك وسع حاسب وشك
يقطعلك حتة على مزاجه
و انت تخاف لا ينُط ف كرشك
***
تاخد اللحمة ف ايد معاليك
لأم عيالك تفرح بيك
و تدارى على الكنز البقرى
و تقفل بابك و الشبابيك
***
ياللا يا عيلة الليلة وليمة
كله بيحلم بالتقسيمة
و الفتة و الشوربة يا عينى
فرصة نحس يا ناس بالقيمة
***
تانى يوم و ف كل الأخبار
صورة كبيرة للجزار
متسلسل بحديد و أساور
كان بيبيعلى لحم حمار
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!

[Tarek Elemary]

الرقيق الأنيق / أبوصلاح
يقولون" الجواب يبان من عنوانه" و هذه المداخلة رسمت لك صورة بديعة لدى و نادرا ما خاب حدسى و هذه من منن الله على عبده الشاكر لفضله
سعدت بك و بمرورك و تشجيعك يعنى لىَّ الكثير لو تدرى
تقبل منى أطيب المنى و أرق تحياتى

[Islam Eidrisha]

شكرا يا أستاذ طارق على هذا التشريح المجتمعي البديع
ومن وجهة نظري ليس فقط أصحاب المهن فكلنا أصحاب مهن وإنما المنظومة ككل أصابها العطب والفساد فسكن الخراب نفوس العباد والبلاد إلا من رحم رب العباد.
استمر يا أستاذ وحبذا لو سددت قلمك لتلك المخلوقات والكائنات الغريبة علينا ممن يدعون زورا وبهتانا باسم الفنانين والمطربين الذين ينعقون كالبوم ليل نهار حتى افسدوا علينا حياتنا في كل مكان ولا حول ولا قوة إلا بالله

[Tarek Elemary]

أستاذ/ إسلام ... بعد التحية و السلام و الشكر و عظيم الإحترام
إنت مكشوف عنك الحجاب أو بتقرا أفكارى و فى الحالتين أنت مميز و ملهم
شكرا على تشجيعك و تقبل مشاركتى لك الرأى بعطب المنظومة ككل و ربنا ينفخ فى صورة من يحاول الإصلاح و يعينه يا رب

[سمعجى]

رائِع و الله يا عم طارق

يخرج منك الشِعرُ منساباً و تلقائياً
كأنما " قـُدَّ " مِن حرير
و روحك الساخِرة حاضرة بقوة
و شطارة الصَنعة " الشكل " لا تطغى على الفكرة ،،
و العكس صحيح

بورِكتَ يا شاعِر :emrose:

[Tarek Elemary]

الآن أصبح لهذه المشاركة معنىً و قيمة
الله يشرف مقدارك و لا يحرمنا من عطفك يا سيدى
و دمت لنا مشكاةً و قنديلاً و مَعِيناً ننهلُ من و لا ينضب

[Tarek Elemary]

صوت أسوأ من أنكر صوت
و اسمه يا زَعْبُّولَّة يا شَحْتُوت
و كإن مافيش مطرب شعبى
إلا أما يكون جاهل موووت
***
لبسة مشجر شكله مْبَعْجَر
مش بيغنى ياناس دا بْغَجَّرْ
أو يبقى يا بيئة يا سفروت
فجأة يْصِير النجم الأشهر
***
كلماته ما تبيعش بطاطا
و كاتبهاله الأسطى حناطة
و لا معنى ولا صوت و لا صورة
ملوخية ببيتزا و سلاطة
***
حاجة لا تنقرى و لا تنشاف
حفرة من حفر الإسفاف
لو مجبر إنك تسمعها
إلحق و أطلبلك إسعاف
***
و أهو بقى مَلْوْ العين و الشاشة
فاكر نفسه خفيف و فراشة
ساكن فى الأحياء الراقية
واكل أحلى باتيه و بغاشة
***
ده بقى حال الفن و حالى
التافه بقى فوق فى العالى
و الأصلى المتأصِّل فنه
ضايع مُتَرَدِى الأحْوالِ
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!

[Tarek Elemary]

نِجم الجيل أو جَبَلْ الفَنْ
صرصار فى الودنين بِيْزِنْ
قَصَّة و لُوكْ وحَبِة مَيك اب
شَكل و سِيما الواد الجِنْ
***
نَحنُوح سَافل آخِر حاجَة
و بْيِلْمَع و الشَعْر ألاجَة
أما الصوت بقى حاجة بِتْسَرسَع
هِىَّ الناس لِلصوت مِحْتَاجَة؟!!
***
يِكْفِينا الطَّلة و تَسْرِيحْتُه
ولَّا طريقة لِبْسُة و رِيحْتُه
ولَّا المُزَزْ الِّلى بْتِتْرَمَّى
على عربيته يا حَظُّه يا بَخْتُه
***
بَقَى نِجْم ف سيما و إعْلان
قبل الإسم لَقَبْ فَنَّان
و مجلات و جوايز يامه
و نْسِينَا شَجِّىْ الألحان
***
فِرِغْ الفَنْ من المضمون
كُلُّه بيلعب ع المضمون
و تهون المقامات و المغْنَى
و التَطْرِيب و الحَرْف يْهُون
***
ده بقى حال الفن و حالى
التافه بقى فوق فى العالى
و الأصلى المتأصَّل فنه
ضايع مُتَرَدِى الأحْوالِ
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!

[علاء قدرى]

الشاعر العزيز/الاستاذ طارق
بجد سؤال محيرنى
لمل بيرم التونسى يقول ((((( فى زمن الفن الجميل)))))
ياهل المغنى دماغنا و جعنا دقبقة سكوت لله
دة احنا شبعنا كلام ماله معنى ياليل و يا عين و يا اه؟؟؟؟
يااااااااااااااااااااااااااااااه
الكلام ده ايام الست؛و عبد الوهاب ؛وفريد ؛و جميع اعلام الغناء؟؟؟؟؟؟؟؟؟؟؟؟؟؟
ده لو ماكنش المطرب مطرب و ابن مطرب ؛ما كنش يعرف يعتب طريق الاذاعة؟؟؟؟؟؟؟؟
و كمان موش عاجب الاستاذ بيرم؟؟؟؟؟؟؟؟
امال لو عاش الايام دى كان انتحر كمدا ؛و غيظا
امال اللى احنا فيه دلوقت ده ايه ؟
اكيد صوت النادبات على حالنا المايل
اكشف يا عمنا طارق عن بلاوينا ؟؟؟؟ و قول مخبى اية كمان
انا حيث انت
و تقبل سلامى

[Tarek Elemary]

عزيزى علاء بك
الحمد لله أن بيرم تحديدا لم يرى ما نحن فيه و إلا كان سوط قلمه طالنا نحن لسكوتنا على ما نحن فيه فصدق من قال:
نعيب زماننا و العيب فينا
و ما لزماننا عيبٌ سوانا
أحسن خلينا كده نرثى لحالنا و بلاش سلاطة لسان قلم عم بيرم
و تقبل تحياتى

[Tarek Elemary]

صاحب مال صاحب أعمال
و إستثماره فى كل مجال
فجأة تلاقى العمل الوطنى
يبقى شعاره بحكم الحال
***
لَفْ الدايرة بِمِسْك و عُود
أحلى كلام على أحلى وُعُود
بَسْمَة و رَحْمة و خير بالكوم
ينجَحْ .. و يوَلِّى و ما يْعُوُد
***
بَقَى عُضْوْ فى مَجْلِس و مْوَقَّر
رَكَبْ الكُرسى خلاص إتْغَنْدَرْ
بَقَى هَتِّيِفْ من ضِمن الجُوقَة
لاَجْلْ مصَالحُه .. يِهِدْ الأَزْهَر!!
***
نِفْسُه مِنِ الأول فى حَصَانَة
لا تْقُوللِّى عَمَلْ عام و أَمَانة
وَاخِدْ قَرْضْ بْكام مِلْيُون
وِدِى حَاجَة لُزُوم الشُغْلاَنة
***
جاهِز بِالْبَاسْبُور فى التَوّْ
يِشِيلُوها تِلْقَاه فى الجوّْ
قَاصِد أىّْ مكان فى الدنيا
فلوسنا فى جيبة يقول هَأْأَوْوْ
***
ده بقى حال الوطن الحالى
النَصَّاب بَقَى فوق فى العالى
و الوطنى المَهْمُوم بِجْرَاُنه
ضايع مُتَرَدِى الأحْوالِ
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!

[علاء قدرى]

(صديقى) و لسان حالنا /المبدع ا/طارق
نحن نهيبه تركها الفرعون الاول لمن يستطيع ان يمتطينا
ويزرع الخوف فينا؛و من قديم الازل و هناك محاولات لكى نكون فراعين
و لكنها محاولات خفية لا تطفو بصاحبها على السطح الا حين يصل ال حد الاشباع؛ و بعد مص دماء الناس
(الجميع هو هذا الرجل)
الا من عصم ربى

[علاء قدرى]

الاخ الفاضل /ابو صلاح
الفضل العظيم لهذا المنتدى الرائع ؛ و مبدعونا الذين حركو ركود المشاعر التىتعتلينا من كثرة ما نلقى فى هذا العالم من غث؛ و هلس يطلقون علية ابداعا؛و فنا؟؟؟؟
نحن هنا نتلقى الثمار التى يطرحها مبدعونا ؛ فنلتهمها كمن لم يرى طعاما قط
كلماتهم بضعة شمعات تنير لنا ما نلقاة من ظلمة
لك منى خالص الود ؛ و الحب

[Tarek Elemary]

(صديقى)

فاتحة كتابك شرف عظيمٌ لى
علاءُ قَدْرى على يَدَيْكَ أكيدُ
و مرورُ لحْظِكَ هَاهُنَا تمجيدُ
و سَنَا ضِيائِك ينثرُ التنويرَ
فقط الحفاظَ على الودادِ أريدُ

و تقبل تحياتى

[Tarek Elemary]

يسمع منك ربنا
وتكون شومة قاصمة تذهب بهم بلا رجعة أو تفيقهم و إيانا من هذا الكابوس و المسلسل الرتيب الممل الطويل المكرر السمج اللانهائى ال..... زهقت

[علاء قدرى]

صديقى الشاعر /الاستاذ طارق

اريد منك وصالا.......لا مزيد
يكفينى القا ان اكون فى صفحتك

[Tarek Elemary]

صديقى الجميل
مرورك يسعدنى و يرطب حر صيف صفحتى و يزين كتاباتى
أدام الله عليك خفة الروح
و شكرا جزيلا

[Tarek Elemary]

صديقى ..... و لك ما تريد و أكثر
و أنت عندى آمِر و أنا مطيع

[Tarek Elemary]

وزنه ضايع حسه زور
حَرْفُه تَايِّه فى البُحور
فاكر انِّه رغم جَهْلُه
المعَرِّى و عب صبور
***


فاكر ان الشعر آفية
كلمتين بالسجع كافية
و ان حاولت تقولُّله كلمة
تسمع الأباحة شافية
***


يا سلام على تعبيراته
و لَّلا تمجيده لذاته
فاقد النور و البصيرة
صوته ساكن فى وداناته
***


صفر فى حروف الهجاء
لو بدأ ماله إنتهاء
تشوفه لو يمدح فى ذاته
ربنا يزيح البلاء
***


الحروف قهرانة منه
كان أملهم يوم يِفِنُّو
يعملوا أغنية حلوة
مش يعفرتهم بجِنُّه
***


حتى علامات السكون
فتح نصب ويش يكون
سيباويه مين يابنى وسع
نحــن مقبرة الفنون

للأسف الشديد صادفت أحدهم بهذا المنتدى و يا ليتنى لم أتواصل معه فأنا من اخطأ و ليس لى من عذر

[علاء قدرى]

اخى و صديقى الشاعر الجميل /طارق
عرفناك شاعرا ذو قلب طيب؛و حس مرهف ؛و ذوق جميل؛
وشهد بجمال شعرك اساتذة المنتدى/الشاعر الكبير كمال عبد الرحمن؛و الاديب الرائع سيد ابو زهده؛و رائد الشعرالاستاذ رائد عبد السلام ؛و الدكتور المعلم و المربى د/انس ؛و غيرهم كثير من محبى شعرك؛
فلماذا تنجرف وراء نقد يكتبه العابرون هنا وهم اقل بالاف السنين الشعريه ممن اثنواعلى شعرك؛دون زيف او تحيز؟؟

ارجوك لا تدع قلمك يهجوا من يجهل شانك؛اولهم راى مخالف لرايك
وادعوا بالحلم ؛و العلم؛و الخبرة.....اناسا قد ينقصهم الخبرة
هذا نداء من قلب يحبك
و يحب من احبك

[Tarek Elemary]

صديقى و أخى علاء
و الله معك كل حق فيما تقول و لو تبدلت الأماكن لقلت ما قلت
لكن المشكلة أنها ظاهرة ليس فى الشعر فقط بل فى شتى مناحى الحياة تجد المدعين صوتهم أعلى و لكن لا يسمعون أبعد من آذانهم و هم لا يشعرون فآثرت أن يخرج إنفعالى رصدا للظاهرة فى صورة شعرية فهى الأداة التى أملك و ما قصدت بها هجاءا و ما سميت أحداً و لن أسمى
يا سيدى أنا أشغل وظيفة مدير مالى بشركة من الشركات العملاقة و يأتى إلى خريج على لحم بطنه كما نقول و يدعى أنه أعلم من بلبع (يلقب دكتور محمد توفيق بلبع برب التكاليف)فى التكاليف أو أفقه من د/ عبدالعزيز حجازى أو حازم حسن فى تقفيل الميزانيات و يحكى لك عن صولاته و جولاته و هو خام و أنا أضحك داخلى بمرارة حيث أحس أنه يستغبانى أو أننى فى نظره من يمكن كروتته فى مهنتى.
ما قصدته أن الإدعاء صفة و المدعون كُثُرْ و ما الشعر إلا مجال و والله الذى لا إله إلا هو ما اعتبرت نفسى أجيد نظم الشعر للآن مع كامل إحترامى لشهادة من أثق فى علمهم و مقامهم فى هذا الشأن
إنما أنا هاوٍ و قبل كل هذا متذوق للغة شعرا كانت أو نثرا أو حتى مقالة بلغةٍ رصينة
كان والدى رحمة الله عليه مديرا لمرحلة التعليم الأبتدائى بالبحيرة و كنا و أخوتى نعاقب إذا أخطأ مذيع نشرة الأخبار فى التشكيل و لم يرده أحد منا (والله حقاً) و كان دوماً ما يكون المرحوم أحمد سمير كثير الأخطاء فى التشكيل فكنا نعتبرها حصة نحو و ليست نشرة أخبار.
قد تقول فلما لا تغير القناة و تستريح أقول لك و من يجرؤ على هذا فقد كان الأسد يرمقنا بنظراته و نحن خمسة أشبال ذكور بلا إناث أنا ثانيهم ترتيباً و أقربهم لقلب أبيه باللغة العربية فقد أحببتها منذ صغرى تجنباً للعقاب أولا و حبا لقرب والدى ثانياً
سرحت و أسهبت و أطلت فسامحنى و إغفر لى هذه المباهاة
وإعلم أنك فى نقدك أقرب إلى من مدحك فالمرؤ مرآة أخيه و أنت أخٌ كريم
و تقبل تحياتى

[عيون المها]

http://www.l5s.net/upgif/0GB86159.gifhttp://www.l5s.net/upgif/0GB86159.gif
الشاعر المرهف ذو الحرف المستنير


((( طـارق العمـري )))



تابعت معظم أعمالك بالمنتدى
و أرجو أن تلتمس لي العذر لتأخري بالرد
فأنا تحكمني الحالة المزاجية في الكتابة
و تلك الحالة لا سلطان لي عليها
و حضرتك أعلم مني بها


http://www.l5s.net/upgif/ZJk86159.gif


جئت هنا بعد أن تشبعت بكتاباتك الرائعة
لمست فيك موهبة قوية و إحساس عالي
تابعت ردودك المنغمة على الأعضاء
تابعت مساعداتك لهم و حتى دون طلب منك
قلة من يملكون تلك الروح الرائعة
أحييك عليها يا شاعر

يا سيـدي
أروع ما في أشعارك أنها تحمل شخصيتك
أنت لا تشبه أحد
تتميز كتاباتك بالبساطة و العمق
شاعر السهل الممتنع
معظم أشعارك تحمل هموم وطنك
أراك توضح باقتدار مساوئ السلطة و سلبية الشعب
رسالتك تصل إلينا سلسة من خلال أبياتك
لكل قصيدة هدف يظهر جلياً بين ثنايا الكلمات


و هنا وجدت نقدك لمن يسيئ لمهنته
استطعت ببراعة تصوير أفعالهم السيئة
تملكتني الدهشة مع نقدك لكل مهنة
جذبتني المعاني فتقاسمت معك الألم
و أرجو أن تزودنا بمن يسيئ لباقي المهن
فـ و الله برغم الألم و الحزن الذي يعتريني إلا أن كلماتك تطربني
أبدعت في تناولك لأصحاب المهن
سأنتظر جديدك دوماً


دُمت و دامت إبداعاتك يا مُبدع


لك كل تحياتي

[Tarek Elemary]

سيدتى المفعمة بالنغم الملغومة بالأريج الناعمة كجناحات الفراش
يعلم الله أن كلماتك جاءت فى وقت كنت فيه فى مفترق طرقٍ ضبابية فى معظمها فكانت ضياءا و إلهاما بل شلالا من الشفاء على سقم الروح و البدن معاً.
كثيراً هى المرات التى كنت أمر على إبداعات أساتذتى السامقين فى علياء المنتدى و أقرأ مداخلاتك التى فى عرفى هى مشغولات من الدرِّ نادرة منظومة بعناية بدءاً من التنسيق مرورا بالتعبير نهايةً بالعقل المستنير و أقول لنفسى أما آن أن تعطف يمنة أو يسرة على مشاركةٍ لى و تترك عبقها يعطر المكان أباهى به الآخرين؟
يا سيدتى كثيرون من يحسون بالكلمة و يشعرون بالفن
قليلون هم من يملكون حسن التعبير عن مشاعرهم
أقل منهم من تصل تعبيراتهم إلى قلوب المتلقين
أنت من قلائل جداً بهذا المنتدى
وجودهم ينشر البهجة
و يأسر العقل
أشكر لك مرورك و ما أغدقت على من كرمٍ و فيضِ عطفٍ كنت أرنو إليه خصوصاً فى تلك الأيام.
شكراً لك
شكراً

[علاء قدرى]

يا محاسن الصدف :mdr:
طلعنا اوالد مهنه واحدة :mdr:
انا كمان مدير مالى بشركة فى القاهرة يعنى بصرة :mdr:
مع ان مفيش علاقه اطلاقا بين الادب و المحاسبة
عموما فبل مابدخل باب الشركه؛باخلع راسى واحط مكانها سلة مهملات:mad:
وان خارج باحط راسى الحقيقيه مكانها
عموما جبته لنفسك يا حلو
عايزين حاجه كده منك عن كارانا العسل
(اتامرون الناس بالبر و تنسون انفسكم)
ده الجار اولى بالشفعه
عموما انا احبك كثيرا ؛و احترم شدة تواضعك التى يعلمها الكثير رغم قدرك
يا ليت لى قلم كقلمك

[Tarek Elemary]

صديقى ... إوعى تقول الكلام ده
أكبر علاقة بين المحاسبة و الشعر عم كمال السمعجى و أنت و لا أنسى فاروق جويده ايضا .... لأ صحصح معايا ده طلع الشعراء لازم يكونوا خريجى تجارة مش دار علوم أو لغة عربية.
و بعدين الشعر تجارب يا صاحبى و عواطف و أحاسيس و مشاعر .... مش كده؟
طيب مين اثناء الكلية كان عنده وقت يعمل كل ده .. هه .... طبعا تجارة ... مقبول مقبول مقبول أنا مرة جبت جيد بابا قاللى بأمارة أيه ده أنت مصاحب الدكاترة و المعيدين؟!!!
رفيق السلاح إنت تأمرنى فى أى شئ
تحياتى

[Tarek Elemary]

سيدتى ...
الله المستعان على كل شئ هو الموفق ندعوه سبحانه أن يلهمنا و ييسر لنا الطريق لما يحب و يرضى فهو ولىُّ ذلك و القادر عليه
ربنا يساعدك و يعينك على الدكاترة و تصلي لما تأملين بعونه و بركته جل و علا
أطيب المنى و أرق تحياتى

[Tarek Elemary]

http://www.l5s.net/upgif/0GB86159.gifhttp://www.l5s.net/upgif/0GB86159.gif

الشاعر المرهف ذو الحرف المستنير


((( طـارق العمـري )))



تابعت معظم أعمالك بالمنتدى
و أرجو أن تلتمس لي العذر لتأخري بالرد
فأنا تحكمني الحالة المزاجية في الكتابة
و تلك الحالة لا سلطان لي عليها
و حضرتك أعلم مني بها


http://www.l5s.net/upgif/ZJk86159.gif


جئت هنا بعد أن تشبعت بكتاباتك الرائعة
لمست فيك موهبة قوية و إحساس عالي
تابعت ردودك المنغمة على الأعضاء
تابعت مساعداتك لهم و حتى دون طلب منك
قلة من يملكون تلك الروح الرائعة
أحييك عليها يا شاعر


يا سيـدي

أروع ما في أشعارك أنها تحمل شخصيتك
أنت لا تشبه أحد
تتميز كتاباتك بالبساطة و العمق
شاعر السهل الممتنع
معظم أشعارك تحمل هموم وطنك
أراك توضح باقتدار مساوئ السلطة و سلبية الشعب
رسالتك تصل إلينا سلسة من خلال أبياتك
لكل قصيدة هدف يظهر جلياً بين ثنايا الكلمات


و هنا وجدت نقدك لمن يسيئ لمهنته
استطعت ببراعة تصوير أفعالهم السيئة
تملكتني الدهشة مع نقدك لكل مهنة
جذبتني المعاني فتقاسمت معك الألم
و أرجو أن تزودنا بمن يسيئ لباقي المهن
فـ و الله برغم الألم و الحزن الذي يعتريني إلا أن كلماتك تطربني
أبدعت في تناولك لأصحاب المهن
سأنتظر جديدك دوماً


دُمت و دامت إبداعاتك يا مُبدع


لك كل تحياتي





يا أيها الطيفُ المُوَّشَّى بالخيالِ هل رقَّت الأقدارُ فى يوم لحالى؟
أنا لم أزل سحر الجمالِ يهزُّنى و يُزيدُ وقدُ البين من نار إشتعالى

[سعدالشرقاوى]

استاذى/طارق
اسمح لى برد كمّه واسع وخطوطه بالعرض
خدتنا ويّاك للغابه
ودخلت ف وكر ديابه
خليّتنى على اعصابى
والخوف عمره ماكان عيبه
,,,,,,,,
عايزك تطلع بسلامه
وتجيب حكايات باليامه
واللىّ ماتعرفش تجيبه
على راسه اعمل له علامه
,,,,,,,,,
القيت على كاهلك حملا ثقيلا ودخلت من هذه الزاويه
متسعة الحوارى مترامية الاطراف متشعبة الازقّه
فارجوك ارجوك ارجوك خليك فيها شويه
فمجتمعنا فى حاجة ماسّه الى ذلك
تلميذكم/سعد

[Tarek Elemary]

جزاك الله خيرا
يا راجل يا محترم يا أصيل
يابن النيل و شمس الأصيل
و شموخ النخيل و القلب لما يميل
للقوية و المنديل و كلام يشد الحيل
يا عم سعد

[Tarek Elemary]

عايزأقولك إن حاله كان زمان أفضل كتير
كات مشاكلة باشا ظالم تحت أمره كام غفير
النهاردة فوق دماغة ألف باشا و 100 امير
كان زمان يشبع بلقمة و يرتوى من أى زير
النهاردة المية ساقعة طالعة من لفريجيدير
بس بالأمراض يا صاحبى و الوباء يارب جير
غموا عينا يا عم سعد و موِّتوا فينا الضمير
صورولنا زمان ده نار و النعيم جاى بالجِعِير
أونطجية ملِّكوا الفلاح و برضه صبح أجير
باعوا مستقبل ولادنا يا بلدنا وإنت فى النزع الأخير