تسجيل الدخول

مشاهدة النسخة كاملة : بمناسبة عيد ميلاد عمنا صلاح (الرئيس)

Tarek Elemary
05/04/2009, 14h31
لولا إنك الرئيس ........ كنت قلت ف يوم ميلادك أحلى قول
الكلمة عاملة أرتكاريا ... عاملة حاجز ... كاتبة ممنوع الوصول
ابعدوا يا عامة الشعب الغلابة فيه مهابة وفيه حدود و فيه أصول
آخركوا برقيات تهانى ... فى الصحف أوع المبانى واللى راح يدفع ينول
.............
واللى راح يكتب كلام زى اللئام الزمن ده راح وفات
لانا سيف الدولة هابقى ولا فيكم متنبى كله مات
الزمن ده يا حبايبى زمن اللى يحب يدفع يوروهات أو دولارات
شفت يا سيادة الرئيس ... اللى زيى كيف يشارك بمعانى و كلمات؟!!!
................
هو لوممكن يعنى ... يعنى يعنى لو مافيش فيها تجاوز أو تطاول
سمى نفسك أى اسم ... قول جنابه قول سيادته بس حاول
حاجة تلغى الأرتكاريا والبساريا حاجة غير بنا ومناول
وانا و حياة اللى خلقك هاشعرك بكلام يليقلك ... بس حاول
========================
فى ريفنا الجميل يقال للذى يفعل الأمر من أوله لآخره بناء و مناول
والرئيس لدينا (فى ثقافتنا مش فى بلدنا) يفعل كل شىء و الجوقة كلها كومبارس ينفذون توجيهات سيادته لذا وجب التنويه تفسيرا و تبريرا
د أنس البن
05/04/2009, 17h11
الصديق طارق العمرى
بالطبع اتاه كلامك واضح ومفهوم ولا يستدعى منك التنبيه بطلب رحابة الصدر أو السماح الى ما هنالك
واضح طبعا حسن نواياك
لكن يا صديقى العزيز , لم ضيقت واسعا ولم وضعت الكلمه فى هذا الإطار الضيق الذى جعلها تشير الى معنى محدد والى من نسأل الله أن يجعل كلامنا خفيفا عليهم
واعلم يا صديقى أن الله عز وجل لما خلق الخلق خلق الإنسان أطوارا ، كما علمنى شيخى الأكبر محي الدين ابن عربى , فمنا العالم والجاهل ومنا المنصف والمعاند ومنا القاهر ومنا المقهور ومنا الحاكم ومنا المحكوم ومنا المتحكم ومنا المتحكم فيه ومنا الرئيس والمرؤس ومنا الأمير والمأمور ومنا الملك والسوقه ومنا الحاسد والمحسود الى ما لا يتناهى من الخلق , وبدون ذلك لا تكون حياة أصلا , تخيل مثلا بدنك الذى تعمل أعضاؤه فى صمت فى سيمفونية يعز على أى قلم أن يصفها أو يحصرها فكر , هذا البدن لو تخيلناه بلا رئيس ومنه سمى الرأس لأنه أعلى البدن ويحتوى على مقر الرئاسه الذى يدير شئون الجسم , ماذا يكون حاله لو تعطل ثانية واحده أو اختل آداؤه , ولهذا كان له الشرف والعزه , تلك سنة الله فى خلقه ومشيئته وهذا هو ناموس الوجود فى تلك الدار الفانيه إلى أن يرث الله الأرض ومن عليها , تتبدل الأحوال حيث لارئيس ولامرؤوس ..
Tarek Elemary
05/04/2009, 17h44
الدكتور الموسوعة أنس البن
طبعا أنا أرى الأمر من نفس وجهة نظرك تماما يا سيدى و لكن كانت مجرد قفشة قد تكون لم تصب أو أصابت راحت لحالها
أما الموضوع لدينا فى مجتمعنا العربى فأنت سيد العارفين كلمة الزعيم مجردة مقصورة على محتكرها فى الوطن العربي
فأنت يمكنك أن تقول زعيم الأغلبية أو زعيم المعارضة أو زعيم الثغر على نادى الإتحاد السكندرى لكن زعيم فقط فهذا تجاوز!!!
بل أن أحدهم الغى الرتب بعد عقيد
هذا حالنا العربى لذا وجب التهكم ليس إلا
و دام يراعك مداده عبير يفوح
و تقبل أطيب المنى و أرق تحياتى
NAHID 76
05/04/2009, 18h34
بسم الله الرحمن الرحيم
الاستاذ طارق
طبعا وبعد ما قاله لنا السيد الدكتور أنس
ومع أيمانى بكل ماء جاء به
الا أنى أعتقد أنك تتكلم على زاويه معينه
وهى دائما نقول فى العالم العربى وخاصه مصر سياده الريئس
واعرف انك تقصد التشابه بسياده رئيس الدوله
وليس معنى أخر
لذا قدرت كل كلمه كتبتها لسياده الرئيس
وعلى فكره سبق وألتقيت مع مجموعه من سماعى بالاستاذ صلاح علام
وأبدا لم أستطيع ان انطق بكلمه أستاذ ا صلا
وسلمت عليه وقلت أهلا سياده الرئيس
وطول اللقاء وانا أقول سياده الرئيس وابدا حاولت أقول استاذ صلاح ابدا
لذا أتفهم ما تقصده انت
ولكن مع كل ده
هو سياده رئيس دوله سماعى الكبرى
تقديرى واحترامى
سيادة الرئيس
05/04/2009, 18h59
هوه أنا عملت مشكله و لا إيه

لكن أحمد الله على ( سيادة الرئيس ) عشان نقرا الشويتين إللي فوق

و نحلي بمداخلة سيدنا الدكتور
سيادة الرئيس
05/04/2009, 19h00
ولكن مع كل ده
هو سياده رئيس دوله سماعى الكبرى



إلهي ربنا ما يحرمنا من لسان عصمتك إللي بينقط شهد
abuzahda
06/04/2009, 06h16
طبعا أنا أرى الأمر من نفس وجهة نظرك تماما يا سيدى و لكن كانت مجرد قفشة قد تكون لم تصب أو أصابت راحت لحالها



يعني إيه راحِت لحالها ؟!!!!
يا عم طارق ، دي عندي من يومها ، ما اتعتعتش ...
،
و بعدين "سيادة الرئيس" بتاعنا - صلاح علام - فاهِم إن هيَّ مش هتروح لحالها ......
إحنا بنحبه علشان بيفهم ،
لكِن "سيدة الرئيس" - اللي مش صلاح علام - مش فارقة معاه ، تروح .... تيجي ،
و احنا ، برضو بنحبه ..... و بندعي لـُه : الله يعينه على الفِهم
Tarek Elemary
06/04/2009, 08h44
دى بقى علشان عيد ميلاد الريس اللى بالى بالك



عيد ميلاد سعيد مبارك ... عيد ميلادك يا أفندينا


عيد ميلاد سعيد عليك ... بس مش سعيد علينا


يا بو لبس و شعر شيك ... ليه يابوى دايما ناسينا


دايما السرور ماليك ... و إحنا الإكتئاب مالينا


كلنا فى ظلمك شريك ... إن كان محمد وللا مينا


ربنا م الخير عاطيك ... و إحنا ياللا ... ماعلينا


مش بنحسد معاليك ... بس اهه .. بيصعب علينا


تاكل انت حمام فريك ... و إحنا مش لاقيين عجينة


تمرح انت وولديك ... و احنا مش لاقيين كابينة


عيد ميلاد سعيد مبارك ... عيد ميلادك يا أفندينا
محمودسعد
07/04/2009, 05h30
رائع
رائع
رائع
وانت اروع
ربنا يحفظك ويصونك
ريما
07/04/2009, 05h58
على فكره هى عجبانى جدا الكلام متنظم وجميل
بس مخذى الكلام مش عجبنى باه لانى بصراحه
بحب الرئيس وبحسكو متجنين اوى عليه
عمتا تسلم ايدك نص نص :)
Tarek Elemary
07/04/2009, 13h13
يا عم ده بس من ذوقك
يا فنان بيجرى الفن ف عروقك
يزيدك ربنا إلهام و عفوية
و يجعل ربى حراسه ...
من حواليك ومن فوقك
Tarek Elemary
07/04/2009, 16h54
يزيدك ربنا حب لحبيبنا إياه
و يعينك على محنة هوى رؤياه
بس سؤالى يا ريما يا ست الحسن
هل تتمنى بعد حسابه من ربه تكونى معاه؟!!
ريما
07/04/2009, 17h15
ههههههههههههههههه ليه كدا بس حرام عليك

عمتا الله يسامحك ويسامحه :)

وكمان متلحنه :eek:

بس اقولك على حاجه مش هو اللى غلطان الغلطان

احنا . احنا اللى بندى قفانا علشان نضرب عليه

واحنا بنتظاهر اننا مبسوطين لاننا خايفين

صدقنى انت لو مكانه هتعمل زيه

يا فرعون ايه فرعنك قال ملقتش اللى يلمنى :rolleyes:
Tarek Elemary
07/04/2009, 17h43
أنا لم قلتله أبدا أنا موافق
و لا ف يوم قلت ياريس أنا عاشق
أنا رافض لكل الذل و التسطيح
أنا آسف على إعلام عميل فاسق
محمودسعد
07/04/2009, 20h12
جميله هذه المحاوره الشيقه مابين الاخت العزيزه ريما والاخ العزيز Tarek Elemary

وان كنت اميل قليلا لجمله الاخت ريما اللي قالت فيها ان احنا اللي نستاهل كده واحنا اللي بنعمل في نفسنا كده ويافرعون ايش فرعنك قال مالقيتش حد يلمني
كلام منطقي جدا وسليم وهي دي الحقيقه
واميل ايضا لما قاله اخي Tarek Elemary عن الريس
فهو كلام حقيقي ايضا
وزي مايكون الريس ده ماينفعش يحكم الا الشعب ده
وكفاكي الله شر خاتمته يااخت ريما
Tarek Elemary
07/04/2009, 21h28
جزاك الله عنى ألف خير
Tarek Elemary
08/04/2009, 13h08
يا سيدى عاوز تطاع أمر بما يستطاع
وايش يعمل الديك ف غابة يا عم وسط السباع
يدَّن يقولوا داوِشنا .. ولا حَد عنه حايِّشنا
إلا بتوع البِتاع
هوه الأسد لو سامِعنا ... و شارِينا أو مِش بايِعنا
كان حَد فِينا جاع؟
أو حَد مات فى السفينة ... بعد ما زار المدينة
و ضاع مِعَاه اللى ضَاع
ضاعِت كرامة بلَدنا ... لما رَمينا ولادنا
فى البحر من غير شراع
زمان لما كانت بَلدنا ... و صوت الأدان جِوة مَدنة
ملازنا وسط الضياع
دلوقتى بيفِر منها ... شباب حقيقى يزينها
و اليأس حتى النخاع
مرة على شط قبرص ... و البرد ع البطن يقرص
بعد ما باع اللى باع
فايتك و مرغم يا غالية ... و منايا أوصل إيطاليا
هاربان ما قلت الوداع
و يبيعنى تاجر لتاجر ... يرمينى نصاب لفاجر
سلعة و بقينا مشاع


أكيد هاكملها بعدين منك لله يا عم محمود يا سعد نكشتنى ليه؟
Tarek Elemary
08/04/2009, 15h19
سجَّان بيسقينى مُرِّك ... كرباجه فوق ضهر حُرِّك
هايزول فى غضبة جياع
و أرجع لحضن السواقى ... ألِّم منى اللى باقى
يخِف منى الصداع
Tarek Elemary
09/04/2009, 16h59
يا سيدى عاوز تطاع أمر بما يستطاع
وايش يعمل الديك ف غابة يا عم وسط السباع
يِدَّن يقولوا داوِشنا .. ولا حَد عنه حايِّشنا
إلا بتوع البِتاع
هوه الأسد لو سامِعنا ... و شارِينا أو مِش بايِعنا
كان حَد فِينا جاع؟
أو حَد مات فى السفينة ... بعد ما زار المدينة
و ضاع مِعَاه اللى ضَاع
ضاعِت كرامة بلَدنا ... لما رَمينا ولادنا
فى البحر من غير شراع
زمان لما كانت بَلدنا ... و صوت الأدان جِوة مَدنة
ملازنا وسط الضياع
دلوقتى بيفِر منها ... شباب حقيقى يزينها
و اليأس حتى النخاع
مرة على شط قبرص ... و البرد ع البطن يقرص
بعد ما باع اللى باع
فايتك و مرغم يا غالية ... و منايا أوصل إيطاليا
هاربان ما قلت الوداع
و يبيعنى تاجر لتاجر ... يرمينى نصاب لفاجر
سلعة و بقينا مشاع
سجَّان بيسقينى مُرِّك ... كرباجه فوق ضهر حُرِّك
هايزول فى غضبة جياع
و أرجع لحضن السواقى ... ألِّم منى اللى باقى
يخِف منى الصداع
Tarek Elemary
07/05/2009, 21h51
الله يعينَّا إحنا على التغيير
أو على حسن التعبير
أو على الرضا بالمصير
سعدالشرقاوى
15/05/2009, 21h24
والله يا استاذ/طارق
انت تكتب لنا ونحن نعى ماتقول
ولا يهمنا ان يعى غيرنا او لايعى
المهم اننا ننتظر دائما كل جديد لك
اما عن المضمون فلم يترك استاذى
د/انس شيئا نقوله
اعانكم الله على رسالتكم