تسجيل الدخول

مشاهدة النسخة كاملة : يزيد حبى عن الأول

Tarek Elemary
02/04/2009, 07h11
متغربين عنك يا مصر .... و عن عيونك محرومين


و الزمن واقف ما مر .... و الساعات بتفوت سنين


مش بنملك غير خيال .... نسرح و ف عنينا الدموع


نفوق و ف بالنا سؤال .... آمته هايكون الرجوع


و عواطفى ف قلبى دفينة .... ما يدرى بيها الجيران


و انت ف عينى سفينة .... مرساها بر الأمان


أركب و أرمى حمولى .... و أقول بلاش العتاب


أسمع ما انتى تقولى .... أحضن و ابوس التراب


يا غربتى لا تطولى .... دى مصر الطعام و الشراب


و انا سمكة ف بحر الكنانة .... لو اطلع منه أموت


و القصر بره الكنانة .... ف عيونى قبر و تابوت


أرجع ياغربة أمانة .... قبل العمر ما يفوت


و ألاقى الغربة بتكدب .... و بعدى عنك يطول


و مهما القلب يتعذب .... ما يوم عنك ها يتحول


ف نار البعد أتقلب .... يزيد حبى عن الأول


يزيد حبى عن الأول
Islam Eidrisha
02/04/2009, 08h58
و القصر بره الكنانة .... ف عيونى قبر و تابوت
صدقت يا أستاذ طارق
ولا يعرف معنى هذا البيت إلا من تغرب عن الكنانة
دمت لنا ودمت للكنانة
د أنس البن
04/04/2009, 04h36
أخى طارق العمرى
ترجمت فى هذا النص بصدق شديد مشاعرى وأعنقد أنها مشاعر كل مصرى يتغرب عن وطنه , تراه هنا أحيانا كثيره ساخطا غير راض أبدا عن أحواله , لكن عندما يبتعد عن وطنه يكون حاله مثل السمكة التى قدر لها أن تحيا فى الماء وإلا تموت , وقد ذقت هذه المرارة من قبل وأعرف طعمها تماما .. أحييك يا صديقى
abuzahda
04/04/2009, 10h44
متغربين عنك يا مصر .... و عن عيونك محرومين
و الزمن واقف ما مر .... و الساعات بتفوت سنين

يا طارق
ربنا ما يحكم عليك بغربة
اللي بيحصل في مصر ده "واقع طارئ" يا طارق

و هيروح الطارئ و هتبقى مصر
Tarek Elemary
04/04/2009, 17h57
الشاعرالكبير
شرفتنى بمرورك ياسيدى
و أشعر أن الوقت الذى تستقطعه سيادتكم لتقرأ مشاركاتى هو مكافأة تكفينى و جائزة أتمنى أن اكون استحقها

ولكن ....

الغربة مش غربة جسد ...... و لا حد سافر من بلد
الغربة بين أهلك عذاب ...... و غربة الأفكار نكد
...................................
unicorn
04/04/2009, 21h37
أخى طارق العمرى
ترجمت فى هذا النص بصدق شديد مشاعرى وأعنقد أنها مشاعر كل مصرى يتغرب عن وطنه , تراه هنا أحيانا كثيره ساخطا غير راض أبدا عن أحواله , لكن عندما يبتعد عن وطنه يكون حاله مثل السمكة التى قدر لها أن تحيا فى الماء وإلا تموت , وقد ذقت هذه المرارة من قبل وأعرف طعمها تماما .. أحييك يا صديقى
اه يا دكتور أنس , أطلع برة البلد أكاد أبكى كما النساء من الم الوحدة و الغربة و الشوق لترابها
أرجع ,
ياخدنى ظابط مرور مخالفة بدون سبب عشان شكلى مش عاجبه ,
أكره ترابها و هواها و ميتها !!!!!
و لا افيق من دوامة الكراهية الا بذكرى الغربة عن مصر.
أحسنت و الله يا عم طارق
Tarek Elemary
04/04/2009, 22h35
العزيز أبومندور (هكذا وجدت الأقدمون يخاطبونك)
هذا حال الدنيا و سلو بلدنا كما يقال فى ريف بلدنا

إحنا فيها مالناش ثمن
رغم اننا ساعة المحن
احنا الولاد واحنا الصبايا
تلاقينا بين صخور رحاها بنطحن

مش طامعانين منها ف كتير
يا دوب يا دوب حبة كرامة
حضن دافى يضمنا و حبة ضمير
و لاجلها ننسى حتى أهلنا لولا الملامة
Tarek Elemary
06/04/2009, 17h17
عم إسلام ... أنت لسة 35 سنة شباب جميل
مالحقتش تتغرب يعنى
بس حقيقى باين من ردك آهة الغربة
ربنا يديم علينا حضن الوطن بحلوه و مره هو أهون من كنوز الدنيا فى الغربة
و بما إنك إسكندرانى زيى فيه أغية جميلة لرشدى قمر إسكندرانى بيقول فيها
فى الغربة الدنيا توهة و الناس مالهاش أسامى
توهة و لوحدى فيها و مين يفهم كلامى
فكرتنى بيها
لأننى من عشاق رشدى و خصوصا الأغنية دى