عارفة يا أحلي البنات [الأرشيف] - منتدى سماعي للطرب العربي الأصيل

علاء طه ياسين

04/06/2009, 14h37

آه بَحِبِّكْ ..

مش مجرد صدفة أو لعبة ظروف ..

مش مجرد كلمة من أربع حروف ..

بس مش لاقي قصادي كلمة غيرها ممكنة ..

وآنا متهيألي شوفتك ..

أيوة شوفتك ..

قبل 100 مليون سنة ..

واللي فيا مش هوي ..

اللي فيا حاجة أكبر م الهوا ..

وكمان مليش حق الحياة ..

غير بس لما نكون سوا ..

مهما قولت انى بحبك ..

تبقى مش هى اللى فيا ..

وانتي طبعا حاسة بيا ..

ياللي بتسافري ف خواطري ..

صعب من غيرك أخلي الضحكة تطلع ..

صعب من غيرك أشوف ..

آه بَحِبِّكْ..

مش مجرد كلمه من اربع حروف ..

.............

اللي فيا صعب أقوله ف كلمة واحدة ..

صعب أقوله .. يا حبيبتي ..

إنتي منتيش أي واحدة ..

بس قولي .. يعني قولي ..
عن هوايا .. أيوه قولي ..

قولي عطر ملوش مثيل ساكن في وردة ..

قولي صفصافة وحيدة فارشة ضل علي الغيطان ..

قولي نسمة جاية تترقص علي الشوك والعيدان ..

قولي ينبوع ميه صافيه في الغابات ..

آه ياعصفور البراري

لما تستفرد بعصفورة البراري ..

تبقا بينكم أغنيات ..

عارفة ياأحلي البنات ..

مستحيل ما دمت جنبك ..

ييجي ناحية قلبي خوف ..

آه بَحِبِّكْ..

مش مجرد كلمه من اربع حروف ..

مش مجرد صدفة أو لعبة ظروف ..

آه بَحِبِّكْ

علاء

سعدالشرقاوى

04/06/2009, 14h47

اخى/علاء
ما اجمل كلماتك
وخاصة كلما اقترب ميعاد السفر
وهل هناك اجمل من
مش مجرد كلمه من اربع حروف ..

مش مجرد صدفة أو لعبة ظروف ..

آه بَحِبِّكْ
ارجو التواصل
وسلمّ لى ع الواحات

علاء طه ياسين

04/06/2009, 15h07

والله ياحاج سعد
أنا خايف أرجع من هناك مش علاء ابن ياسين لأ أرجع علاء بن زبيبة ..
النهاردة استلمت جواب الانتداب .. عارف البلد اسمها ايه (موط) .. ربنا يرجعنا من هناك من غير ما نموط ;):mdr:
علي فكرة أنا بأحاول ألغي الندب ده .. الجو حرارة خنقة .. والرطوبة عالية هناك .. بس الناس كويسيين .. عموما ....
ولا مرة حسبت حسابي
وحسابي طلع مظبوط
بعتولي جواب بيقوللي
عايزينك شهر ف موط
هاتنيل اروح وخلاص
وهاسيب قلبي ف أسيوط
دعواتك الطيبة ليا ..
أخوك علاء ياسين

سعدالشرقاوى

04/06/2009, 15h36

علاء طه ياسين

04/06/2009, 16h27

يا حبيبي يابو الشرقاوي
يا راعي شجر التوت
انا لما هاروح هاتغرب
تغريبة بني حتحوت
من أول يوم في اللجنة
حاطينك جوه تابوت
ويا الطلبة بتتعارك
وانت زي الكتكوت
والغش هناك بالجملة
واللي يعصلج هيموت
لكن علي رأيك سيبك
أهو شهر بسرعة يفوت

علاء

Tarek Elemary

04/06/2009, 16h59

الفصل ده عامل هرج و مرج
و ثنائيات كلام و حوارات حتى و لو كانت جميلة
و بديعة و محببة للأذن لكن خارج المنهج
عايزين نلتزم بالمقرر و بعدين ندخل
فى حصص الأشغال و الألعاب
و حصص التدبير الإنتدابى

جميلة يا علاء بلا مجاملة
إنسيابية المتمكن
و عفوية العاشق
الشاعر بالمعنى
و الله رائعة

أيه حكاية الندب دى ؟ إنت بتشتغل ايه؟
على الخاص بقى OK

Tarek Elemary

04/06/2009, 17h05

سافر بسلامه يا علوه

سافر روح نوّر (موط)
,,,,
والدنيا صعب ف بعدك
الله يصبّر اسيوط
,,,,
ويصبر اهل سماعى
اللى ح توحشهم موت
,,,,
وان كن لك عمر ح ترجع
لو حتى ف بطن الحوت
,,,,
سافر واطمّن خالص
والشهر قوام ح يفوت
,,,,
بسلامة الله ترجع لى
وح نقعد تحت التوت
,,,,

سعد

الأرغول الجميل

عاش الإسم و عاش من سمى
يا إيد شغالة بجد و همة
دايما عامل حواليك لمة
حاوى و غاوى و ساحر لينا
و قلوبنا حواليك تترمى

عشت يا عم سعد يا أرغول المنتدى

سعدالشرقاوى

04/06/2009, 17h08

ان كان الامر كذلك
اعمل عليهم قرموط
,,,,
وكلمنى وانا ح اروح لك
ومعايا 200نبوت
,,,,
وساعة ما تشوفنى تنادى
وتقول اتاكو الموت
,,,,
جالكم فتوّة بحرى
متغذى ع البسكوت
,,,,
واللى ح يقف فى طريقى
نهاره مش ح يفوت
,,,,
سعد

محمد المراغى

04/06/2009, 17h11

آه بَحِبِّكْ ..

مش مجرد صدفة أو لعبة ظروف ..

مش مجرد كلمة من أربع حروف ..

اه بحبك
ياللى حبك
الحياه انا بيه ... بشوف
اه بحبك
ياللى حبك
عمره مأعرف بعده خوف
حتى حبك
جوه قلبى .. اترسم
فوق رمش عينى
فوق ملامحى ... والكفوف
حتى حبك
بيه عملت .. المعجزات
وانتصرت على ..... الظروف
حتى علمنى ..
البلاغه
والنباهه
بيه بقيت انا ... فيلسوف
الله عليك يا عم علاء لما تتسلطن تخرج من تحت ايدك جواهر مش كلمات
تقبل تحياتى ومشاركتى ببعض الخواطر متأثرا بشعرك
وترجع لينا من الانتداب بألف سلامه

علاء طه ياسين

04/06/2009, 17h20

الأخ الأكبر / الشاعر الحلو / طارق العمري ..
ناظر مدرسة الكلام الجميل .. والموجه العام علي فصول الشعر والحوارات .. وحشتنا .. ووحشنا كلامك الحلو اللي بيبل الريق ..
والله لما بتزور موضوع من مواضيعي بينور بنور غريب .. الله يكرمك ويخليك ..
أقولك إيه بس .. لولا عارفك مش بتحب المدح فيك مع إنك تستحقه .. كنت قولت فيك كلام كتير ..
تقبل تحيات أخيك الأصغر ..
علاء

علاء طه ياسين

04/06/2009, 17h27

صديقي وحبيب قلبي وأخويا محمد المراغي ..
كنت مستني مشاركتك معايا .. وكنت متأكد إنك هتجيبها .. د انت اللي لما بتتسلطن بتجيب كلام رائع والله ..
حتى علمنى ..
البلاغه ..
والنباهه ..
بيه بقيت انا ... فيلسوف ..
عمري ما كنت هأجيبها ..
سعد الشرقاوي وانت وانا عملنا مثلث برمودا الشعري في الردود علي بعض .. والله أنا باستمتع جدا بالمشاركات مع بعض .. نفسي أخونا الكبير الشاعر طارق العمري يشاركنا مرة بردود شعرية .. ويجبر بخاطرنا ..
علاء ياسين

علاء طه ياسين

04/06/2009, 17h43

العمدة / سعد الشرقاوي
عارفك قدها وقدود
هتسد ف وقت لزوم
وانا برضو الأصل صعيدي
متعلم ضرب الشوم
متغدي حمام وفراخ
متعشي سمك ولحوم
ونخلي عاليها واطيها
ويرفرف فيها البوم
إنت فينك يامراغي
عايزينك مَعْنا اليوم
علاء ياسين

Tarek Elemary

04/06/2009, 17h53

آه بَحِبِّكْ ..

مش مجرد صدفة أو لعبة ظروف ..

مش مجرد كلمة من أربع حروف ..

بس مش لاقي ف قاموسى كلمة غيرها ممكنة ..

وآنا متهيألي شوفتك ..

أيوة شوفتك ..

قبل 100 مليون سنة ..

واللي فيا مش هوي ..

اللي فيا حاجة أكبر م الهوى ..

وكمان مليش حق الحياة ..

غير بس لما نكون سوا ..

مهما قولت انى بحبك ..

تبقى مش هى اللى فيا ..

وانتي طبعا حاسة بيا ..

ياللي بتسافري ف خواطري ..

صعب من غيرك أخلي الضحكة تطلع ..

صعب من غيرك أشوف ..

بس ليه يا حب عمرى
ليه باشوف فى عنيكى خوف
ليه تمللى حاسة باللوم و الكسوف
خايفة منى .. مستحيل
مستحيل أنا قلبى
على غيرك يلوف
مستحيل يا دقة القلب
اللى غنت ع الدفوف
يا إختيار القلب
من بين الألوف
آه بَحِبِّكْ..

مش مجرد كلمه من اربع حروف ..

.............

اللي فيا صعب أقوله ف كلمة واحدة ..

صعب أقوله .. يا حبيبتي ..

إنتي منتيش أي واحدة ..

بس قولي .. يلا قولي ..
عن هوايا .. أيوه قولي ..

قولي عطر ملوش مثيل ساكن في وردة ..

قولي صفصافة وحيدة فارشة ضل علي الغيطان ..

قولي نسمة جاية ترقص علي السنابل والعيدان ..

قولي ينبوع ميه صافيه في الغابات ..

آه ياعصفور البراري

لما تستفرد بعصفورة البراري ..

تبقا بينكم أغنيات ..

عارفة ياأحلي البنات ..

مستحيل ما دمت جنبك ..

ييجي ناحية قلبي خوف ..

آه بَحِبِّكْ..
مش مجرد كلمه من اربع حروف ..

مش مجرد صدفة أو لعبة ظروف ..

آه بَحِبِّكْ

علاء

تحياتى

محمد المراغى

04/06/2009, 17h54

إنت فينك يامراغي
عايزينك مَعْنا اليوم
علاء ياسين

العركه ده يا جماعه انا فيها بكل ..... حماس
وهأجيب الشومه معايا ويمكن راح اجيب الفاس
وهأخلى الدنيا تولع وهأخلى الناس .... تحتاس
بس أعرف ليه العركه . وزعلان على اى اساس

علاء طه ياسين

04/06/2009, 18h13

الأخ الأكبر/ طارق العمري
وبأحبك أيوة بأحبك
وبأشوفك شمسي وقمري
لما ع النت قابلتك
كان أجمل حاجة ف قدري
وأنا وسعد الشرقاوي
ومراغي أخونا تالتنا
بنقول الأخ الأكبر
دا حبيبنا طارق العمري
تقبل شكري الصادق العميق علي تزيين كلماتي بكلماتك الرقيقة .. وتعديل أوضاعها ..
الأخ الأصغر
علاء ياسين

علاء طه ياسين

04/06/2009, 18h30

السبب يا محمد باشا يا مراغي هو ..........
انا طالع شهر مراقبة
في امتحانات الثانوية
ودي طبعا ياسي محمد
أشياء مفروضة عليا
وهواجه فيها متاعب
تشبه معركة حربية
والطلبة بقا الرزلين
دول ييجوا 90 %
وأهالي بيمنعوا عنك
الأكل وحتي الميه
وتغششهم بالعافية
أو تتحمل يا عنيا
والأمن هيعمل ايه
قدام ثورات همجية
ودا غير الاستراحات
دي حكاية طويلة شوية
اذا غششت ونخيت
هتعيش أيام ذهبية
أما لو تعمل راجل
تلبس في اللجنة قضية
أو بره اللجنة خناقة
وحاجات بقا متنقية
واذا مت محدش يسأل
وتروح ياحبيبي ضحية
علاء

محمد المراغى

04/06/2009, 18h54

لا يا عم بجد يا عينى دانت فى ورطه ياعنيه
من حقك تشكى وتبكى .وتعملك الف قضيه
لو منك اسيب الطالب وقول احنا فى حريه
احسن مأروح ببلاش ومحدش يدفع .. ديه
اما لو قلبك جامد وهتعند بس..... شويه
ياريت قبل ما تسافر ابقى اكتب لينا وصيه

سعدالشرقاوى

04/06/2009, 19h02

انا كنت ناويلكم نيّه
للصبح ويبقى شويّه
,,,,,
كان نفسى الفسحه تطوّل
ومراغى يردّ عليّه
,,,,,
بس الاستاذ يضربنى
بالفلكه على رجليّه
,,,,
وح افكّراعمل حاجه
والعركه تكون قانونيّه
,,,,,
ح استاذن منكم ساعه
بس ح اسهّركو شويّه
,,,,,
سعد

علاء طه ياسين

04/06/2009, 19h14

الي محمد المراغي ..

انا فعلا خايف جدا
خايف خالص يا مراغي
لحسن ضربة من شومة
تنزل وتدش دماغي
أو واد صايع حنكوش
ينزل ضرب علي صداغي
ولا ينفع سعد ولا انت
قدام المد الطاغي
والست الهانم حرمي
هتقول انا بعت مصاغي
علشانك ياابو عيالي
بس انت أكيد الباغي

علاء

محمد المراغى

04/06/2009, 19h28

متخفش يا ... عم علاء
ربك ان قدر..... شاء
بس انت خللى .. بالك
وحل المشكله .. بذكاء
وان حد وقف قصادك
قطعه اجزاء .. اجزاء
واحنا هندعيلك . ديما
ربنا يحميك .. يا علاء

علاء طه ياسين

04/06/2009, 19h30

الي الحاج سعد
سهرنا يا بو التفانين
وياك إن شالله سنين
باقي أسبوع يا حبيبي
وهاكون مهموم وحزين
وانت ومحمد طبعا
قاعدين .. قاعدين .. قاعدين
وانا رايح موط متغصب
ولوحدي هاشيل الطين
علاء

سعدالشرقاوى

04/06/2009, 19h42

علاء طه ياسين

04/06/2009, 20h31

الحاج سعد الشرقاوي
الحاج محمد المراغي

اليوم انتهي يا حبايب
نتقابل بكره العصر
ونقف في الساحة طابور
نهتف يحميكي يا مصر
يا بلاد العزة يا بلدي
وجمايلك ملهاش حصر
علي كل الشعب العربي
يا منورة زي البدر
لو مر تصيبك حاجة
نديكي عمر العمر
دايما رايتك مرفوعة
حتي لو كنا المهر
مش عاوز أسكن فيلا
مش عاوز أسكن قصر
أنا عايزك إنتي يا بلدي
تبقي أيامك نصر

علاء

Tarek Elemary

04/06/2009, 20h45

هيالى الاستاذ روّح

وح تبقى 100الميّه
,,,
ان كان الامر كذلك
نتقابلو الحصّه الجايّه
,,,
ومراغى يكون ويّانه
ونسهر للصبحيّه
,,,
ياتلف الصور وتدوّر
على حتهّ واطيه شويّه
,,,
وان حكمت قوم تنقابل
ان شا الله فى المنوفيّه
,,,
وان كنت بكره مسافر
ابقى انعس فى العربيّه
,,,
وان جه الاستاذ طارق
ح الدّاره ولو فى الميّه
,,,

سعد

شايفك ياطويل ياأبولاسة
يا مقضى الحصة وناسة
و كلام فى خارج المنهج
و لا كلمة فى الكراسة

و هاتهرب فين يا مشاغب
يا مالى الفصل متاعب
و قلبت المدرسة كازينو
قهوة و مسرح وملاعب

عفاف سليمان

05/06/2009, 08h00

اللي فيا حاجة أكبر م الهوا ..

وكمان مليش حق الحياة ..

غير بس لما نكون سوا ..

مهما قولت انى بحبك ..

تبقى مش هى اللى فيا ..

وانتي طبعا حاسة بيا
استاذ علاء:emrose:
ما اجمل الكلمات التى تخرج من قلبك لتدخل الى قلوبنا
كلمات جميله من زمن الحب الجميل
ربما تقابلتم من الف الف سنه
وربما لحبكما لا وجود له هنا
لان حبكما يوجد فى عالم اخر
فى زمن اخر
زمن الحب الجميل
زمن الرومانسيه
زمن فيه كل شعراء الكون:)
يغنون للحب ويعيشون للحب
فربما انتم من اهل هذا الزمن
فكيف جئتم الى زمننا هذا
كلماتك اخى جميله:)
لا تحرمنا منها ولا من احساسك الرائع
لك اجمل تحيه ولجميع اهل سماعى
اختكم عفاف:cool:

علاء طه ياسين

05/06/2009, 08h54

الأخت الرائعة / عفاف

فربما انتم من اهل هذا الزمن
فكيف جئتم الى زمننا هذا

الحب موجود في كل الأزمنة .. وحين يحب الولد .. أو تحب البنت .. حبا حقيقيا .. يتحول هذا الوجود الخانق .. وهذا الزمن المادي .. إلي أحلام تغني أغنيات مدهشة .. وتتحول الدمعات والأحزان إلي أفراح ترقص في ضوء القمر .. ويتحول الإرهاق اليومي والمعاناة .. إلي دروب من شجر الصفصاف والنخيل والتوت والفل والياسمين ..
والحب يا سيدتي يجوب الأرض والسماء .. شرقا وغربا .. مع الأعاصير في الغابات والبحار .. مع الصواعق في ليالي الشتاء الممطرة .. مع السحر في أهداب الفتيات .. مع خصل شعر علي كتفي صبية .. مع ملامح رجولة في فتي صغير .. مع عشبة حقل مدسوسة بين شفتي بنت صغيرة تلهو في الحقول ..
ونحن لا نختار متي نحب .. ولا من نحب .. ولا كيف نحب .. وحين نحب تختلف جميع الأشياء .. وتزداد قدرتنا علي الاحتمال .. وفي الحب ننسي كل اللغات لا تبقي إلا لغة واحدة هي لغة الصمت .. وفي الحب ننسي كل ما تعلمناه في حياتنا ولا يبقي إلا ما يعلمنا الحب إياه .. والحديث عن الحب يطول ..
ومثل ما قال أحمد شوقي في مسرحية كليوباترا (الحياة الحب والحب الحياة) .. والحياة بلا حب حياة قاسية جافة .. أقرب للموت ..

انا قلبى خلاص
ياحبيبى خلاص
بقى عايش بس عشان يهواك
شوفتك حسيت
انى انا حبيت
ولقيت يا حبيبى حياتى معاك
ايام وسنين
وانا كلى حنين
وفـ قلبى غرام يملى الدنيا
من غيرك مين
هاسهرله ومين
غيرلى حياتى كدا فـ ثانيه
لو هاوصف ليك
احساسى انا بيك
ولا اى كلام هايكفينى
من يوم ماعنيك
قالت ايه فيك
وانا عايش ليك كل سنينى

تحياتي وتمنياتي
علاء

عفاف سليمان

05/06/2009, 09h10

اخى الكريم علاء
اعلم ان الحب لابد منه:mdr:
وانه موجود فى الدنيا مع كل ما فيها من الالام واهات
ولولا الحب ما بقينا فى الحياه
ولولا امل الحب ما حيينا الحياه
ولولا انى احب ما عشت يوما فى الحياه
ولولا حبيبى لكنت عرفت معنى الاه
ولولا الصبر لما عشقت فيه الحياه
ولولا حبه لما تمنيت كل يوم اعيش معاه
تحياتى لك اخى علاء:emrose:
وهذه مداخله بسيطه منى:)
تحياتى للجميع
وربنا يديم عليكم الحب
اختكم عفاف:cool:

علاء طه ياسين

05/06/2009, 12h33

الأخت الرائعة .. عفاف ..
ولولا الحب ما بقينا فى الحياه
ولولا امل الحب ما حيينا الحياه
ولولا انى احب ما عشت يوما فى الحياه
ولولا حبيبى لكنت عرفت معنى الاه
ولولا الصبر لما عشقت فيه الحياه
ولولا حبه لما تمنيت كل يوم اعيش معاه

أسعدتني المداخلة .. أقولك سر ..

فاكر وانا كنت صغنن .. حبيت شجرة صفصاف
فاردة في الغيط ضلتها .. وهواها كان هفهاف
في الحر بانام تحتيها .. ومكنتش منها باخاف
واتمرجح وسط فروعها .. والعب بورقها الجاف
ومكناش نزعل أبدا .. ولا يحصل بينا خلاف
وتقوللي بأحبك جدا .. وأنا قلبي فيه أضعاف
وكبرت وقطعوا الشجرة .. دبحوا قلبي يا عفاف

سعدت بمداخلتك
شكرا ..
وتحياتي وتمنياتي الطيبة لك بحياة سعيدة هانئة
علاء

علاء طه ياسين

05/06/2009, 17h35

الجميل الطلة / أبو صلاح
أسعدني تعليقك (شقاوة قلم) .. بس إحنا هنروح لكم فين .. النجوم مهما حاولت لن تطول القمر .. وأنتم أقمار ندور نحن في أفلاكها ..
وسأظل أتعجب علي تعليقاتك ومن أين تاتي بها ..
لكأني بك زهرة يانعة علي قمة جبل تنظر من أعلي تتأمل ما تحتها وتنثر عطرها الخالد قليلا قليلا فيحس الكون بتخدير رائع ..
أيها المغلوم بالدهشة ..
تقبل مني هاته الوردة :emrose:تعبيرا بسيطا عن حب كبير
علاء

رائد عبد السلام

06/06/2009, 17h39

واللي فيا مش هوي ..

اللي فيا حاجة أكبر م الهوا ..

وكمان مليش حق الحياة ..

غير بس لما نكون سوا ..

مهما قولت انى بحبك ..

تبقى مش هى اللى فيا ..

وانتي طبعا حاسة بيا ..

ياللي بتسافري ف خواطري ..

صعب من غيرك أخلي الضحكة تطلع ..

صعب من غيرك أشوف ..

آه بَحِبِّكْ..

مش مجرد كلمه من اربع حروف ..

حلوة ياعلاء ....زي بقية أعمالك

الله ينور ياشاعر

:emrose:

ربنا يقويك علي مشوار العمل
آهو برضه تشوف بلد جديدة

وعلي رأي سيد حجاب :

إيه يابلاد ياغريبة
عدوّة ....واللا حبيبة ؟؟

علاء طه ياسين

06/06/2009, 18h17

الشاعر الكبير الممتع / رائد عبد السلام
أنا والله العظيم فرحان جدا جدا بتعليقك علي مشاركتي ..
أنت قمة شامخة من قمم الشعر .. وكلماتك لي تاج علي راسي .. ووسام علي صدري ..
وكلماتي عنك مهما كانت لن توفيك حقك .. أنت يا سيدي الرائع واحد من قافلة صغيرة تسير وهي تدري بدروب ومسالك صحراء الشعر التي يضل فيها أمثالي .. ودائما ما تكتشف أرضا جديدة تمهدها لنا .. لنرتادها بعد منك ..
تقبل مني التحية والشكر ..
وكافئك الله بالصحة والستر .. كما كافئتني بدعائك لله أن يقويني علي مشوار العمل ..
دعواتي لك برضا الله عنك
علاء