المساعد الشخصي الرقمي

مشاهدة النسخة كاملة : بأحبك

علاء طه ياسين
02/06/2009, 12h40
بأحبك ضحكة وردية
وزي الشمس والميه
وبعدك تبقي أيامي
ليالي عتمة منسية

بأحبك دنيتي وناسي
وشوقي ليكي أنفاسي
ونبض القلب مش ناسي
بإنك حلم ف عنيا

بأحبك ليلي ونهاري
وعاشق فيكي مشواري
ودايما ساكنة أفكاري
وغاوية تتّوّهي فيا

بأحبك زي مين شافك
وانا الدايب ف أوصافك
وباستني علي ضفافك
مراكب شوق معدية

بأحبك شوق مواويلي
وفكرة ف عقلي بتجيلي
بإنك بكره هتميلي
وتكمل دنيتك بيا
سعدالشرقاوى
02/06/2009, 12h53
ياسيدى ياسيدى
بأحبك شوق مواويلي
وفكرة ف عقلي بتجيلي
بإنك بكره هتميلي
وتكمل دنيتك بيا
ايه العظمه دى
الله ينوّر ياعلوه
علاء طه ياسين
02/06/2009, 14h01
حبيب قلبي .. والصديق الصدوق .. سعد الشرقاوي
رجعت تزين مواضيع أخوك علاء بالتعليقات الحلوة كالعادة ..
عودا حميدا ..
وحفظ الله لك صحتك .. ووقاك شر البرد ونزلات البرد ..
علاء
NAHID 76
02/06/2009, 15h13
بسم الله الرحمن الرحيم
أستاذ علاء
اليوم الرتم سريع والايقاع سريع والجمل خفيفه ورشيقه وتقفز فى كل مكان
صورمتحركه رائعه معرفش ليه تخيلت عمرو دياب :mdr:;)
تحياتى
علاء طه ياسين
02/06/2009, 15h46
مدام ناهد ..
أيوه باحبك مليون حبه
هو الحب دا شيء يتخبي
واما عنيا تتوه ف عنيكي
بانسي الكون والناس والصحبة
ايوه باحب باحب بجد
عمري ماحبيت زيك حد
وزرعتيني جناين ورد
لما اتنفض القلب ولبي
ايوه باحب باحبك انتي
ياللي ف شمسي وقمري سكنتي
أحلي مافيكي إنك انتي
بتنسيني مشاكلي الصعبة
علاء
محمد المراغى
02/06/2009, 17h29
يااااااااااااااااااااااااا معلم
ايه الحلاوه والجمال ده
طب سيب لنا شويه افكار ولا مفردات نعرف نكتب بيهم كلمتين زيك
الله عليك يا استاذنا
اخوك المراغى
علاء طه ياسين
02/06/2009, 17h44
محمد باشا المراغي
أمال مين يا عم اللي كاتب قصيدة الضياع مش إنت .. أنا حتي رديت عليك بحتة موال حكاية .. كنت سمعته زمان ..
بعدين أنا هأبدأ معاك دويتو .. أبدأ ورد عليا .. ماشي
أدي البداية
انا قلبي غلس غلاسة
بيقوللي بلاش سياسة
وبيرفض الحراسة
والحبسة في الضلوع
ويدق بدون تأني
ويحب غصب عني
ويطير يحلم يغني
يطير من غير رجوع
كل حياته كذلك
مابين هذا وذلك
يتكعبل في المهالك
ويبكي بالدموع
علاء
سعدالشرقاوى
02/06/2009, 17h44
علاء
لا دا المسئله محتاجه رد تانى
واللا اقول لك00000
محمد المراغى
02/06/2009, 18h02
ما شى يا عم علاء
وانا قلبى جرئ وثابت
فى الحب عنيد ماساكت
ولو كل الدنيا خافت
هو مايخفش حد
اتعلم الملاوعه
ان شالله ادنيا والعه
وان حد قاله اوعى
يقف له بكل صد
علاء طه ياسين
02/06/2009, 18h09
عم سعد
ادخل معانا الأجواء بقاذفات الصواريخ بعيدة المدي بتاعة سيادتك وقول .. سعمنا .. واشجينا ..
كلامك له مذاق خاص
علاء
علاء طه ياسين
02/06/2009, 18h28
هو ده الشغل يا محمد باشا يا مراغي
خد دي
انا قلبي حب حتي
راح عند نجمة شاته
وامّا النصيب تأتي
خدها ف حضن الليالي
نيمها ف قلب وردة
خلي القمر مخدة
غطاها بنسمة شاردة
وحضنها بشوق خيالي
قول .............................
علاء
محمد المراغى
02/06/2009, 18h47
وانا قلبى حب ... لكن
حبيب القلب ... خاين
بنيت له قصور فى قلبى
وزرعت له ... الجناين
وفرشت رموش عيونى
ولعهده كنت ... صاين
أتاريه حبيبى ... ناوى
والغدر فى عينه . باين
علاء طه ياسين
02/06/2009, 19h42
محمد بيه المراغي
مستعد للتواصل
خد دي
انا قلبي ملوش مثيل
طاير وسط النخيل
ساعة لما يميل
يضيع في عيون حبيبته
وتحتله احتلال
ويبقي حاله حال
ولا يجاوب سؤال
وده بس لجل طيبته
علاء
علاء طه ياسين
02/06/2009, 20h15
الأخ الغالي أبو صلاح
لا أعرف كيف تنبش في مفردات اللغة حتي تعثر علي كلماتك القصيرة التي تغني مليون كلمة .. تجعلني كلماتك القصيرة هذه أسافر الي المراعي الخضر والسهول الفساح والحقول المعشوشبة .. استمع أغنيات الفتيان والفتيات في ليالي الحصاد .. وأصغي الي سقسقة عصفور يرسلها في الفضاء الرحب ..
يا اخي أنت تحيطني بعطر ونور كما يحيط سوار الياسمين بمعصم فتاة حسناء
فلك الشكر
علاء
عفاف سليمان
03/06/2009, 00h01
اخى الاستاذ علاء:emrose:
كلماتٍ موسيقيه جميله:)
دمت لمن تحب;)
ودمت لنا شاعرنا
واتمنى ان نرى مزيدا من الابداعات الشعريه الموسيقيه
ولك وللجميع خالص تحياتى وتقديرى
اختكم عفاف:emrose:
سعدالشرقاوى
03/06/2009, 07h44
هيّا فكره مش بطّاله ياعلاء
والله بطبيعة الحال
عمى فلان0000
صاحب الحكايه الجايه
ساب بقيت كلامه لكم تكمّلوه
عشان الحلاوه والعظمه
اللى انتم فيها دى
ربنا يزيدكم محبه
عشان تزيدونا من تجلياتكم
الله ينوّر
علاء طه ياسين
03/06/2009, 10h52
الأخت الفاضلة / عفاف
لا غرابة علي أديبة مثلك هذا التعليق الجميل .. وهذا الدعاء الأجمل .. ولك مثله وزيادة ;):mdr:
أرحب بك صديقة دائمة لمواضيعي ..
بارك الله فيك .. ووفقك وإيانا ..
تحياتي
علاء