عمي اسماعين(رقم2)

[سعدالشرقاوى]

حكايات تحت التوته
(رقم2عمّى اسماعين)


http://www.imagehuge.com/out.php/t4179_D8B3D8B9D8AF2020D8A7D984D8B4D8B1D982D8A7D988 D98A1.jpg


مرّه تانـــيه كـــنت قاعد
لمّا فاض بيّا الحنـــــــين
نفسى حدّ يقول لى حاجه
كات بتحصل من سنــين
,,,
حسّيت بخطوة حدّ جانى
جـــــه ينادى قــلت مين؟
روحت فارد طولى واقف
قـــلت اهلا ياسماعــــين
,,,
كلمه منىّ وكلـــــمه منـّـه
قال لى قوم وكــّـلنى توت
قلت حـــاضر من عـنــيّه
قعـــدتك وحــشانى موت
,,,
يالله قول لى ع الحـــكايه
لمّا جيت من مصر ماشى
يوم ما بعت القطن كلــّـه
وقلت اتاجر فى المواشى
,,,
قال تعالى اقعد فى ريحى
وخللىّ توتك مش ح ضوقه
يومها كات المعده جامده
وباكل الفجل بعـــــروقه
,,,
كنت قاعـــد مرّه يابنى
والعيال قعــــدين معايه
خدتهم كده بالســــياسه
وقلت فيه مشوار ورايه
,,,
بعد جمع القطن ناوى
انىّ ازور سيدنا الحسين
له حـــــدايا ندر بايت
يومها كان الندر دين
,,,
خدت ست البيت معايا
برضه نادره وجت تزور
من بلــــــدنا قمنا بدرى
وروحنا راكبين البابور
,,,
البابور عــــــــــمّال يزمـّـر
واحنا طبعا فى انبـــــــساط
ع المحطـّـه ف مصر شوفنا
خلق ولا ســــــوق التلات
,,,
عينى اوّل شـئ تـشــوفه
ع المحطــّه شئ كسوف
الحــــريم اجسامها باينه
والشــباب عمّال يشوف
,,,
عزيزه بصّـتلى و قالت لى
احنا فـــين قول ياسماعين
انت جاى تدخل فى سيمه
واللاّ ح تزور الحـــسين؟
,,,
شوف رجالهم ياسماعــــين
وخدين حريمهم تحت باطهم
حتــّى مش متعــــــــفـّرين
ماعندهمش دراس فى غيطهم
,,,
ياختى واحده كبيره شايبه
شايله كلب يادى الكسوف
ياسماعــين استر عـيونك
ع البشر اوعاك تشوف؟
,,,
من غير مؤاخذه البنت ماشيه
مع الولد ماسكين اديـــــهم
لو حد جارهم صدفه شافهم
يقول ياعيب الشــّوم عليهم
,,,
اللى داهنه الوش بوهيه
واللى توبها ماكفهّاش
واللا يمكن غصب عنها
الترزى خد بقيت القماش
,,,
الناس فى مصر بيجروا خالص
ع القدم من غير حمـــير
لا فيه كبير يعزم علينا
بالغدا ولا بالعصـــــير؟
,,,
الحريم دى اشمعنه ماشيه
قالعه توب الحـــشمه ليه
فين راجلهم فـــين ابوهم
عيب وليه ساكتين عليه؟
,,,
قلت مالك بس بيــــــــهم
كلّ واحد عـقله فـــــــــيه
دول حريم مالهمش رابط
واحنا مالنا ونعــــمل ايه؟
,,,
امانه يــــاهل البـــــيت امانه
صونوا مصر فى الموضات
ياحســـــــــــين ياست زينب
دانتوا ليكم معجــــــــــزات
,,,
رحنا نركب واصله تانيه
نحتوا فيها الارض نحت
قالت هيالى مصر فوقنا
واللاّ هـيّا الدنيا تحـــت
,,,
ياسماعين ماتعلــّى صوتك
زحمه يامه ونفسى اسمع
عايزه اطلع فى الطراوه
ياسماعين روحى ح تطلع
,,,
اصل فيه كام قطر واقف
والبشر ملموم علــــــيهم
هوّ دا السّـلــّم ياسمــــعه
اللىّ منــّـه نزّ لــــــوهم
,,,
هوّ كان فيه حدّ قل لى
انّ تحت الارض قــطر
واللاّ بافــهم فى الكتابه
واللا باعرف اقرا سطر
,,,
كنت محــروج من مراتى
وعمرى ما حفرّط فى هبتى
خــفت اسال حدّ حاجــــه
يكـتــشف جـهلى وخــبتى
,,,
قلت لو فى العمر يوم
لازم افهم فى الكتابه
وعرفت العلم نور
وهوّ دا سلاح الغلابه
,,,
فزّى قومى يالـلـــه نطلع
م المحطهّ القــــــطر فات
فيه ولد حسّـــــــيت بايده
فى الزحام لطش الحجات
,,,
قلت لازم اجرى اجـــيبه
التقـــيتها ماسكه أيــــدى
والبشر ملــموم عـلـــــينا
تقول سايبنى لمين ياسيدى
,,,
واللىّ فـيــهم قـلـــبه طيّب
يجرى ويســكـّت عــزيزه
واللىّ عنده فلوس فى جيبه
يمدّ أيــــده يجـــيب بريزه
,,,
قـلت مش عايـــز فـلوس
بدّى ناس ف قلوبها تقوه
يوصّـلونى انا وعــزيزه
لحــدّ تــوتة الــــشراقوه
,,,
بسرعه اهل الخــير خدونا
وركــــّبونا ع البابــــــــور
مارضيناش فى مصر نقعد
دمّى كــــــان عـــمّال يـفور
,,,
دا ف بلـدنا العـــفـّه غاليه
وفيها تعــــــدل كلّ مايله
والمديـــنه سيفها ماضى
عايزه فاضى وايده طايله
,,,
خدت درس العمر يابنى
ورحت نادم ع الليّ فات
من يوميها الجهل سابنى
وابتـــديت اعرف لغات
,,,
(مع لقاء فى الحكايه رقم3)

http://www.imagehuge.com/out.php/t4584_figureGet1.jpg

[Tarek Elemary]

الله الله ما أروعك

إنت لون يابوى لِوحدك
عزيز مُكرَّم جوَّه دارك
حدي يستجرى ينافسك
حد يقدر ييجى جارك
خسران كتير اللى ما حبك
و اللى عمره ما جِه و زارك

[علاء طه ياسين]

حبيبي الغالي علي قلبي عمي سعد
تغيب وترجع بتحفه .. بصراحة شديدة جدا NO COMMENT
ليس لدي اي تعليق علي كلامك النقدي الرائع
ده مجالك .. ودي ساحتك .. إلعب فيها لوحدك .. رقص الملعب كله .. وهات أهداف براحتك .. لا يوجد منافسون .. اعتزل الجميع أمامك ..
رائع رائع رائع
علاء

[مختار الحسانين]

هى الاعلى من حيث التوليفة والحبكة ، وفاقت بكثير ( حكاية عمى أمين ) ، وكما قلت وأقول ، أن بيرم التونسى عايش ، وهذه القصيدة التهكمية البيرم تونسية دليل على ذلك .... مش بسهولة أى حد يكتب بالأسلوب دا بصراحة ..

[سعدالشرقاوى]

ابو صلاح
انا اخو صلاح
وخال البلد دى كبيره عليه
وخاصة من عم الكل
السهل الهادى الحكيم
الذى يعمل بطريقة
لمس القلوب ابوصلاح

[سعدالشرقاوى]

استاذى/طارق العمرى
وحيات ما خللا القلوب تصحى على يدّك
تسيب مسافه لنا وتتخللا عن جدّك
عايزها جنّه تحقق كل امانينه
ياعم حلمك علينه دا حنا مش قدّك
يعنى كل ماتشدّ على حد
اعرف انه فى طريقه للحصول
على التوقيع
ربنا يخليك لنا

[سعدالشرقاوى]

اخى/علاء طه
شوفت الظرف عليه مكتوب
اسم الراسل م المحبوب
خفّيت والبرد راح
وقريت لك احلى الكلمات
وانا زيّك تمام
متاثر بجدّتى
ونفسى فى قسم
للامثال الشعبيه
فى المنتدى
عشان اكتب
بعدالتوته
حكايات جدّتى
حلوه الندّهه ياعلاء
وقصيدة الاخت ناهد

[abuzahda]

مرّه تانـــيه كـــنت قاعد
لمّا فاض بيّا الحنـــــــين
نفسى حدّ يقول لى حاجه
كات بتحصل من سنــين


:emrose:عمّي سعد:emrose:


الله ينوَّر عليك



.

[سعدالشرقاوى]

الاخ/ مختار الحسانين
صباحك فل
انت قاصد تبهدلنى بحكاية
بيرم دى احنا فين وهما فين
انت فين يامخ
دايما انا فى انتظار كلماتك
اللى بتنور المنتدى
واشعارك الجميله
وتواضعك الغير عادى
ربنا يديم المحبّه

[سعدالشرقاوى]

استاذنا العظيم/ابو زهده
تحية اجلال
اننى اضع القصيده
وترسم على وجهى
لا اراديّا (تكشيره)
لاانكر انها خوف وتحسّب
اراها بمروركم
قد انفرجت وبدت عليها الببشاشه
فانتم تحملون خاتم الشعار
دمتم لنا بكل خير

[NAHID 76]

بسم الله الرحمن الرحيم
خالى سعد الشرقاوى
أنا مع الأستاذ علاء
نو كمنت الملعب ملعبك يا خال
سلمنا الامر ورفعنا الرايات
تحياتى

[د أنس البن]

إيه يا اخوانا
ما تكلموا الراجل بالعربى
عم سعد جايب لكم كلام مندى بريحة نوار البرسيم
وف لون سنابل القمح الدهبى
وطعم الزبده الصابحه الفلاحى بتاعت زمااااااااااااااااااااااااااااااااان
تسلم ريشة قلمك البوص يا حاج سعد يا عتره

[سعدالشرقاوى]

الاخت/ناهد
دانتو اللى خفّه واماره
وجمالكو نوّر فى الحاره
مليتوا شاشتى باساميكم
ولقيتنى مكتوب ع الفاره
لقد كتب علاء فابدع

[سعدالشرقاوى]

استاذنا الفاضل
د/انس
لقد افتقدتك منذ مقدمة تحت التوته
فظننت ان القعده تحتها دون المستوى
النهار دا بس ح اكسّر حطب الرّاكيه
واجهّز عدّة القهوه واعيد جمع صحبتى
تحت التوته

[Tarek Elemary]

أنا أحب الدرة المشوى

[عيون المها]

http://up1.mlfnt.net/images/4givqywfry7l5i75ri14.gif

الأستاذ الفاضل و شاعر الأرض الطيبة

http://up1.mlfnt.net/images/g6v902z8mtqpn7lcvup.gif ((( سعد الشرقاوي ))) http://up1.mlfnt.net/images/g6v902z8mtqpn7lcvup.gif




لي شرف متابعة معظم أعمالك هُنـا

و أجلت ردي لحين وضوح شخصية حضرتك في كتاباتك

فـ أنا تعودت عدم استعجال الرد لأرى ملامح الموهبة بتأني



و هُنـا وجدت شاعر يحمل بصمة مختلفة

شاعر ينقد السلبية بمنتهى السلاسة

ما يميز كتاباتك إن طعمها مصري



قرأت حكاية عم أمين

و تألمت لحاله و ما آل إليه

بسبب قوانين عقيمة تُطبق على الضغفاء فقط



و تابعت هنا حكاية عم إسماعيل

قرأت التفاصيل كأني أراها بمشهد مرئي أمامي

تخيلت زوجته و اندهاشها بما رأت


امانه يــــاهل البـــــيت امانه
صونوا مصر فى الموضات
ياحســـــــــــين ياست زينب
دانتوا ليكم معجــــــــــزات

لكن هل وصل عم إسماعيل للحل

عندما انتبه لجهله و عزم على التعليم ؟


قلت لو فى العمر يوم
لازم افهم فى الكتابه
وعرفت ان العلم نور
وهوّ دا سلاح الغلابه



أم وجد هنا الحل الذي يبحث عنه


دا ف بلـدنا العـــفـّه غاليه
وفيها تعــــــدل كلّ مايله
والمديـــنه سيفها ماضى
عايزه فاضى وايده طايله



رائعة حكاياتك تحت التوتة يا أستاذ سعد

و في انتظار باقي الحكايات


لك كل تحياتي

[سعدالشرقاوى]

اختنا الكريمه /عيون المها
اسعدنى هذا المرور العظيم
والذى ينقل صاحبه الى عمق الموضوع
ان مادهش الرجل وايضا زوجته
تم اكتشاف اسبابه مؤخرا
(الجهل بالقراءه وبالكتابه)
والفلاح من سلبيّته انه يؤمن بمقولة
(هوّ بعد ما شاب يودّوه الكتّاب)
فكيف وهى اول الاوامر الصادره
من السماءعلى رسول الله صلى الله
عليه وسلم(اقرا باسم ربك الذى خلق)
لك تحياتى وتقديرى

[سعدالشرقاوى]

استاذ/طارق
انت اللى ح تقابل الضيوف
اعمل اللى انت عايزه
هيّا اساسا التوته على لحف غيطك

[مختار الحسانين]

أنا حسيت أن القصيدة دى وحشتنى

قلت أقراها تانى الصبح النهاردة

يا أخوانا عايزين نحافظ على المواهب الجامدة دى

وان شاء الله فى محاولة عمل اى دوان باسم المنتدى لتجميع ما كتب فيه من اشعار أكون معكم فى المساهمة باى شئ .

أهم شئ فى هذا القسم من المنتدى أن لكل عضو طعم ولون وريحة مختلفة فى تصوره لأحداث الحياة ، اما نظرة الحاج سعيد فهى مختلفة لأنها تعصر لنا روح الريف المصرى الجميل وتظهره لنا فى شكل جميل وقريب إلى القلب .

وفكرة الشخصيات الريفية التى تحكى من خلال قصائدك فكرة جديدة وبديعة ، لأنها عبارة عن مونولوج وحوار رائع

[سعدالشرقاوى]

اخى الاستاذ/مختارالحسانين
والله انا معك
فيما تفكر
وانت انسان محترم وزوّاق
وموهوب
وصاحب خلق رفيع
(سعد لك) ( سعيد بك)

[علاء طه ياسين]

جالك برد ياخال .. يوه ياندامة
دا انت من الأبطال .. وبتتحمل ياما
هزموك حبة برد ..
كده خلوك تتهد ..
شد الحيل أمال .. ألف سلامة
لو عرفت إنك بعافية كنت جيت زورتك .. حمدالله علي سلامتك ..
علاء

[سعدالشرقاوى]

اخى /علاء
لمّا لقيت تليفونك جانى
وانا عيّان وملازم البيت
,,,
رنّة جرسه ف لحظه نادانى
وسحب ايدى لحدّ الغيط
,,,
بعد طريقى نشفّ ريقى
واتحمّلت الصعب وجيت
,,,
عشان احكيلك ع اللى جرالى
لازم تسمع اخر بيت
,,,
لمّا لقيتك ربّى شفانى
وحسّيت انّى خلاص خفيّت
,,,سعد

[علاء طه ياسين]

أخي / سعد
بأحمد ربي وبشكر فضله ..
إنك صحصحت وخفيت ..
انا رنيت طولت الرنة ..
اه يا حبيبي واستنيت ..
حسيت إن الدنيا احلوت ..
لما عليا ياخال رديت ..
أجمل حاجة في يومي سمعتك ..
انا بيك يا حبيبي استكفيت ..
لو حضرتي كان صاحب خطوة
كنت ف لحظة قوام خطيت
وتشوفني وانا قاعد جنبك
نشرب قهوة جنب الغيط
علاء

[محمد المراغى]

حبيب القلب والعين واستاذنا سعد
الاسم سعد لكن ........ النبأ شرقاوى
يحكى حكاوى وهو بطلها ... والراوى
ده محترف ياناس مش غاوى ولا هاوى
الله عليك يا جدع .... بعدك انا مساوى
تحياتى لك يا حج
وتحياتى للحج اسماعيل

[سعدالشرقاوى]

اخى/المراغى
شوف من امته انا مستنيك
وباسال كل صحابنا عليك
عايز اطمّن على احوالك
عايز الدنيا تنوّر بيك
الحمدلله على السلامه يابطل
وماتعوّدش نفسك تقاطعنى كده

[عفاف سليمان]

استاذى الكريم سعد الشرقاوى:emrose:
والله انا اللى نفسى اجى تحت التوته واحكيلك :chut:
حكاوى كتير حصلت لى واشكيلك
من زمن جابنى للدنيا ولا ابيدى
اقول له ليه يا زمن وليه يادنيا جبتينى
اصل بينى وبينك انا امرى عجب
واللى حصل لى يتقال فيه العجب:(
غريبه الدنيا معايا حيرتنى
لا لقيه صديق يوجهنى ولا بتغيتنى
هى غداره دايما معايا
مش عارفه ليه معندانى
وبمكيال الغلب مدوخانى
يا عم سعد نفسى اجيلك
واشكيلك من همومى
يمكن الاقى فيك الاب
اللى اتحرمت منه
من يومى
واقولك يا عم سعد
تحت التوته كلام كتير
يمكن يغسل همى بجد
وده كلامى مش تعبير
يعنى انا بتكلم جد
مش برد على المكتوب
والمكتوب كتير يا عم سعد
واه ياربى من المكتوب
تحياتى لك يا عم سعد
وننتظر ال3 من تحت التوته
اختكم عفاف:emrose:

[abuzahda]

استاذنا العظيم/ابو زهده





تحية اجلال
اننى اضع القصيده
وترسم على وجهى
لا اراديّا (تكشيره)
لاانكر انها خوف وتحسّب
اراها بمروركم
قد انفرجت وبدت عليها الببشاشه
فانتم تحملون خاتم الشعار

دمتم لنا بكل خير


الأرغول الصادِق
:emrose:عمّي سعد الشرقاوي:emrose:

لك ، من قلبي ، محبة يحبها الطيبون

* * * *

و لولا ضيق الوقت ، لكـُنت زهقت مني
أصل اخوانك الكنادوة (على رأي :emrose:عمّنا كمال:emrose:) ، إختصروا ساعات اليوم الواحد
لدرجة انك لو عايز تقسم اليوم - بالعدل - ما بين :
شغل الدنيا , شغل الآخرة
يلزمك اربعين ساعة في اليوم
فما بالك ، و سماعي عايز له زيُّهم ؟!

فكم تمنيت أن أقيم هنا برحاب برج الحمام الذي أنشأته أنت يا عمّي سعد ، فآوت إليه حمائمٌ يحلو للقلب سماع زجْلِها
عمّي مختار الحسانين ، و أخي الأستاذ علاء طه ياسين

ما أحلى العيش بين الريشِ و الزغب

و انا عارف ان الحمام يحب الملاغيّة ، و ده اللي محسسني بالذنب ، لإن الوقت معانِد


كان أبي عليه رحمة الله و رضوانه ، يُذيبُ للحمامِ السُكـَرَ في المساقي ، بعدها يبلل قشّة بماء الزهرِ ، و يغمسها في الماء . و كان الحمامُ يُدمن سُقيَى أبي


و لولا الوقت ، يا عمّي سَعد يا بُرج الحمام ، لأذبت لكم بماء الروحِ عِباراتِ الوجد ، فأنا أتواجد لزجل الحمام ، وجدَ الغائب في الحضرة

لكن عزائي ، أني أرى شغفة القلبِ بينكم ، طارق العمري ، مصر و السودان

و لولا (تااااني : لولا ؟!) ، الحقوق الملكية ، لنسخت كل مايكتبه طارق العمري ليكون مشاركتي معكم ، صيانةً للوقتِ و وصُلاً إلى الجَمال

فلتُحسِنَ الظنَّ في إبنٍ لك إسمه: سيّد

[Tarek Elemary]

يا احلى الناس و أشف القلوب و أصدق المشاعر الإنسان المصنوع من شغاف قلوب الناطقين بالعربية جميعا (لأنه كل من يقرأك يحس بهذا)
كلامك فى شخصى مجروح لأننا (صديقين و حبيبين و شقيقين و كل ما فيه قرب و حب و ينتهى بياء و نون)
أما حكاية الأرغول دى بقى و الله إستوقفتنى كثيرا و قلت فى نفسى ... سامحنى ... يابن الأيه ....
دى أجمل و أعمق و أدق وصف للجميل عم سعد
آلة بصوت شجى شديدة المصرية و القدم و الألفة و و و و
جبتها منين و كمان مع برج الحمام
أنا من المحظوظين فى الدنيا ان أكون من حرافيش النت بتوع سيد أبو زهدة
و مش لاقى كلام تانى
تحياتى المغلفة برقرقة دموع الغبطة و الإعجاب و الشوق معاً

[سعدالشرقاوى]

اختنا الاستاذه/عفاف
عشان كده كنتى غايبه عن صفحتى
وانتى متاكده ان القعده تحت التوته مش ح تحلوّ
الا بيكى
ولمّا بقينا اسره واحده اللى يغيب بيكون ظاهر جدا
حتى اننى مرضت يومين وفوجئت بالحبيب علاء طه
يقتحم علىّ فراشى باتصال مباشر ازاح كل الالم
غريبه الدنيا معايا حيرتنى
لا لقيه صديق يوجهنى ولا بتغيتنى
هى غداره دايما معايا
مش عارفه ليه معندانى
وبمكيال الغلب مدوخانى
يا عم سعد نفسى اجيلك
واشكيلك من همومى
يمكن الاقى فيك الاب
اللى اتحرمت منه
من يومى
وقرات لك الخاطره العظيمه
والتى استحقت ان يشارك فيها
جميع الاسره بحلو الكلمات
وجمّلها اكثر المداعبات الاخويه الجميله
من الاخوه /طارق العمرى/وناهد
حتى زعّلتينى وانت بتقولى مش ح اعمل كده تانى
00تاكدى يااختنا العزيزه انهم مثلى تماما
الكل يتتبع ماتكتبه/عفاف لمجرّدالكتابه
(المهزبه الجميله البليغه)
ولااحساس ابدا بغربه داخل هذه الاسره
والتى يحيطها بالرعايه عمالقة الكلمه
وعناوين الحنان حتى استحوزوا على القلوب
فليس بمقدورى ان افارقهم باى من الاشكال
طوّلت عليكى وعليهم 00آسف للجميع

[سعدالشرقاوى]

العبقريه الاستاذ/سيد
ليس بيدى انى احبك
وياخذ قلبى طابع الاجلال
حينما اتعامل مع هذا الكائن العظيم
فليس من السهل ان اكتب لك
لكنه الاحساس والذى تستطيع
برؤيتك ان تلمحه بين الاحرف
وكل رجائى ان يكون الجزء
الاوفى من الوقت المزدحم
لاشقائكم المحبين فى سماعى
سبقنى استاذى/طارق
فجرّانى ان امسك بقلمى
وازاح عنى رهبة المكان فدخلت اليك
(بالقلم الكوبيه)

[سعدالشرقاوى]

اخى الاستاذ/طارق
نظرا لانك المشرف على الرساله
فلا بد ان تفرض عليك الظروف
المساعده لتلاميذك
ماتحرمش العمر منك ياحبيبى

[Tarek Elemary]

اخى الاستاذ/طارق

نظرا لانك المشرف على الرساله
فلا بد ان تفرض عليك الظروف
المساعده لتلاميذك

ماتحرمش العمر منك ياحبيبى



يا عم سعد يا صحبة ورد
يا سيد الهزل و ملك الجد
و خفة دمك مالهاش حد
و صالون قلبك ماله قد
واسع شاسع ما بيتسد
راجل تعرف معنى الكَد
معنى الذوق وأصول الوِد
و ساعات تكتب مالك نِد
يصع والله عليَّ الرد

تحياتى