أراك عصي الدمع

[ثومه]

:emrose: أخي الكريم ابوحسام
لقد أخجلتني بكرمك الكلثومي الفياض.

لي طلب من حضرتك ان تقوم بتحليل قصيده
أراك عصي الدمع
للشاعر ابو فراس الحمدانى والموسيقار ملحن القصائد رياض السنباطي.
لما تحتوى القصيده علي تفريدات لحنيه وشعريه جميله.
وبالأخص كوبليه......
معللتي بالوصل والموت دونه.
اتمنى ان اكون وضحت سبب مطلبي.
فشكرا لك.
وتحياتي لك اخى الكريم.:emrose:

[عفاف سليمان]

غاليتى ثومه:emrose:
ما اجمل لقاءك بعد ايام كثُر:)
الحمد لله ع السلامه وعوده باغنيه جميله احبها من كل قلبى
اراك عصى الدمع:rolleyes:
واكيد هرجع لها تانى
بعد شرح بعض المعانى
لاستاذنا الالاتى
ربنا يديله الصحه ويسعده كما بيسعدنا
ويارب سهره موسيقيه سعيده مع ام كلثوم
تحياتى لك عزيزتى ولاختياراتك الجميله
اختكم عفاف:)

[الألآتى]

بسم الله نبدأ فى تحليل قصيدة ( أراك عصى الدمع )

شعر : أبى فراس الحمدانى

ألحان : رياض السنباطى

غناء : أم كلثوم

بداية لابد من بعض المعلومات التى ربما يعرفها الكثيرون ..

هذا هو اللحن الثالث لنفس القصيدة .. فلقد لحنها عبده الحامولى ,, وبعده الشيخ زكريا أحمد .. ثم رياض السنباطى

وأشهرهم بالطبع لحن رياض السنباطى ..ربما لأنها هى الأحدث .. وتسجيلاتها متوفرة فى كل مكان ..

نأتى الأن للقصيدة .. بالتأكيد هناك من هم أجدر وأكفأ منى فى شرح معانى القصيدة ..

عارفين عمنا وعم الحبّيبه ( قيس بن الملوح ) بتاع قيس وليلى .. الراجل الصايع الضايع .. إللى مافيش وراه حاجه ..

إلا إنه يقعد يحب فى ليلى العامرية عمال على بطال .. وفى الأخر إديته بمبه وإتجوزت الأخ ورد ..

أهو صاحبنا بتاع أبى فراس الحمدانى .. خاب نفس الخيبه .. رايح يحب لى واحده مُلعب ..

واحده كل شباب الحته بيجروا وراها .. والأكاده إن صاحبنا معتز بكرامته جداً وشايف نفسه تقيل ودمعته عزيزة ..

لكن يظهر إن حبه لهذه الفتاة المتمرسه بهدله وجاب مناخيره الأرض ..

لأ .. وإللى يغيظ أكتر .. الهانم بتسأله إنت مين يافتى .. يقولها أنا إللى ميت صبابة ..

ترد عليه .. أى واحد فيهم .. دول زى العدد فى الليمون ( فهم كُثر ) .. والمصيبه إنها عارفاه كويس ( وهى عليمة ) ..

لأنه زى عمنا قيس .. فاضح الدنيا ودموعه مغرقة الحى والأحياء إللى جنبهم .. وعامله برك ومستنقعات .

سيبكم من الكلام الهجص ده .. ويبقى واحد من إخواننا بتوع الشعر واللغة يشرح لنا المعانى بتفاصيل أكثر إحتراماً ..

نأتى الأن للحن .. وياله من لحن .. عمنا السنباطى بقى ..

راح جاب بيانو وحطه على المسرح .. ولعلها تكون أول وأخر مرة نشاهد بيانو مع فرقة أم كلثوم .

اللحن من مقام الكرد .. ياسلاااااام .. لما الكرد يبقى كده .. بالجمال ده .. أمال الأغانى المهببة بتاعة اليومين دول إللى معظمها كرد .. مش حلوة ليه ؟

تبدأ المقدمة الموسيقية بصولو ( عزف منفرد ) من البيانو .. فى جملة بديعة من جمل السنباطى المتفردة .. وترد عليه الوتريات بكاملها .. بنفس الجملة الموسيقية ..

حاتلاحظوا إن مافيش إيقاع معانا .. طبعاً .. ماهو السنباطى .. ملك الأدليب .. أو الموسيقى بدون إيقاع ( فالت )

شوفوا بقى وجع القلب .. لما الفرقة تعزف كل المقدمة وكثير من دواخل العمل .. دون إيقاع يضبط الواحدة ..

هذا العبء يقع بالطبع على القائد أو المايسترو .. لأن الفرقة فى هذه الحالة تعزف بناءً على إشاراته ..

طبعاً البيانو مش ساكت أثناء عزف الفرقة .. شغال الله ينور ..

تغنى أم كلثوم ( أراك عصى الدمع ) من الكرد .. وتظل معه حتى ( نعم أنا مشتاق وعندى لوعة ) فنجد تحاور بين الكرد والراست ..

ونفس اللازمة الموسيقية .. وتغنى أم كلثوم نفس المقطع ولكن بلحن مختلف .. من الكرد أيضاً .. ولكن بجملة لحنية مختلفة ..

سنلاحظ أنه ليس هناك رد موسيقى من الفرقة مثل الأخر .. كل الردود مختلفة .. مش ممكن نزهق ..

والجميل فى الموضوع .. إن كل الفرقة حافظة اللحن والردود كويس جداً .. ليس أمامهم نوتة .. بيعملوا عشرتاشر بروفة..

لازمة موسيقية جديدة من مقام الراست .. المقام الشرقى الأصيل .. إسمعوا معى هذه اللازمة .. لقد سمعناها من قبل .. أين ياترى ؟

نعم .. فى أغنية ( عرفت الهوى ) من أغانى رابعة العدوية .. نفس الجملة تقريباً .. ولما لا .. أليس هو نفسه السنباطى .. هو حر .. شغله وهو حر فيه . يقتبسه .. ماحدش حايرفع عليه قضية ..

تغنى أم كلثوم ( إذا الليل أضوانى .. بسطت يد الهوى ) وتظل مع الراست لنهاية الكوبليه أو المقطع ..

ولازمة جديدة من مقام العجم .. يعنى الراجل جاب من الشرق للغرب .. الراست أبو المقامات الشرقية .. والعجم ( المرادف للميجور الغربى ) السلم الكبير فى الموسيقى الغربية .. ولا نجد أى تعارض أو نشاز .. أو حتى غرابة فى الإنتقال ..

تغنى أم كلثوم ( معللتى فى الوصل والموت دونه ) .. من العجم .. ولا يفوت السنباطى أن يلمس بعض حروف الزخرفة والحليات أثناء سير اللحن .. مثل غماز المقام .. وغماز المقام هو النصف تون الواقع بين جنسى المقام .. حاجة كده عامله زى الوصلة إللى موجودة بين قضبان السكة الحديد .. المهم ..

نفس اللازمة الموسيقية من العجم .. وتغنى الست ( وفيت وفى بعض الوفاء مذلة ) ولكن بلحن مختلف طبعاً .. إنتوا عاوزين السنباطى يلحن شطرتين بنفس اللحن .. ليه يعنى .. ماعندوش جمل لحنية تملا قفف ومقاطف .

يتوقف الإيقاع .. وتمهد الفرقة بجملة قصيرة جداً ( مازورة واحدة ) من مقام الحجاز كار ..

لتغنى أم كلثوم ( تساءلنى من أنت وهى عليمة ) ..

نسمع جملة موسيقية شبيهة بجملة المقدمة .. ولكن من مقام النهاوند ..

ونسمع البيانو فى نهاية هذه الجملة يسلم للغناء .. ثم نسمع بعده الكونترباص يسلم بنفس التسليمة .. فكر وخطة وتوزيع موسيقى ..

وتغنى الست ( وقلت كما شاءت وشاء لها الهوى ) .. من النهاوند ..

ونسمع نفس الجملة الموسيقية لتغنى الست ( وقلبت أمرى لا أرانى راحة ) من النهاوند أيضاً ولكن بلحن مختلف كالعادة .

ولكنه ينهى الشطرة بمقام الراست عند ( إذا الليل أنسانى ألح بيا الهجر ) ..

وهنا نلاحظ خطة لحنية جميلة جداً .. أم كلثوم أنهت الشطرة على مقام الراست .. لماذا ..

لأن السنباطى يريد أن تكون الجملة الموسيقية التالية من الراست .. يعنى زى ماتقول ( سلم وإستلم )

والغريب أن الجملة الموسيقية لم تنتهى عند درجة ركوز المقام ( الدو ) ولكنها إنتهت عند قرار الدرجة الخامسة للمقام .. لييييه .

لأن السنباطى يريد أيضاً أن يعود بنا لمقام الكرد .. والكرد فى حالتنا يكون على الدرجة الخامسه للراست .. شغلانة موسيقيين طبعاً ..

الراجل مش عايز يفاجئنا أو يصدمنا .. بيمهد لكل جملة .. غنائية أو موسيقية .. بيجهزنا للسمع ..

المهم .. تغنى أم كلثوم ( وقالت لقد أجرى بك الدهر بعدنا ) من الكرد تمهيداً للعودة لجملة المذهب ( أراك عصى الدمع )

وكأنه فتح قوساً وأغلقه من جديد ..

أرجو أن أكون وُفقت فى هذا التحليل المتواضع .

[غازي الضبع]

والله زمان يا كبير الالاتية
الله ينور

***

يا ريت الأخت ثومة .. تضع لنـا رابط للأغنية ، ويا سلام لو تكتب لنـا الكلمات

[عفاف سليمان]

صباح الخير على حضرتك يا استاذ غازى:emrose:
والله اخدت الكلمه من على طرف لسانى:mdr:
كنت لسه هقول لها كده تضع لنا رابط للاغنيه وكتابتها
واغنيه فعلا رائعه ولى عوده مره تالته لها:o
تحياتى للجميع
اختكم عفاف:)

[ثومه]

:emrose:أخي الكريم محمد
أشكرك علي سرعه استجابتك في تحليل قصيده
اراك عصي الدمع
بأسلوبك الشيق الممتع البسيط
اللي يمتاز بخفه الدم المصريه الاصيله.
سلمت وحفظك الله لمعجبيك ومحبي الطرب الاصيل.
لك عميق شكري يا أبو الكرم اللامحدود.:emrose:

[ثومه]

:emrose:أخي الفاضل غازي
وغاليتي عفاف
شكرا علي مروركم الغالي علي قلبي
والقصيده علي رابط
http://www.sama3y.net/forum/showthread.php?t=20060 (http://www.sama3y.net/forum/هنا)

من حفل سينما قصر النيل
بتاريخ 3 يونيو 1965
وتقبلوا خالص تحياتى.:emrose:

[عادل فؤاد رفاعى]

الله على الاستشارة من ابو حسام وكمان مجانية من راجل دارس ومتعمق فى الموسيقى انا طبعت تحليلك فى هذه القصيدة واغنية كل دا كان ليه على ورق لاحتفظ بهم واقراهم بتمعن وجارى البحث عن تحليلات اخرى لك فى المنتدى حيث انا حديث التسجيل

[الألآتى]

الله على الاستشارة من ابو حسام وكمان مجانية من راجل دارس ومتعمق فى الموسيقى انا طبعت تحليلك فى هذه القصيدة واغنية كل دا كان ليه على ورق لاحتفظ بهم واقراهم بتمعن وجارى البحث عن تحليلات اخرى لك فى المنتدى حيث انا حديث التسجيل



أشكرك حبيبى عادل باشا ..

تجول فى قسم ( دعوة موسيقية على أغنية ) وخاصة فى الصفحات الأولى .. ستجد الكثير من التحليلات .. وأيضاً هناك بعض التحليلات لأغانى عبد الوهاب ..

وهناك أيضاً بعض التحليلات الصوتية .. موجودة فى قسم المبدعون .. فى القسم الفرعى ( أعمال من إنتاج أعضاء سماعى ) ..

[saraya]

شكراً للمجهود الطيب هل ممكن تحليل موسيقي للحن أراك عصي الدمع ألحان أبو علي محمد لو سمحتم أكيد مع الشكر سلفاً

[الألآتى]

شكراً للمجهود الطيب هل ممكن تحليل موسيقي للحن أراك عصي الدمع ألحان أبو علي محمد لو سمحتم أكيد مع الشكر سلفاً

هل تقصد أبو العلا محمد ؟

وهل أبو العلا محمد لحن القصيدة ؟

إذا كان لحنها .. أرجو أن تعطينا رابط لها .. حتى نسمعها معك .. ونحللها .