سعدالشرقاوى
29/05/2009, 06h53
تحت التّوته
(رقم1عمّى امين)
تحت التـوته يامستمعــــين
حكايات يامه فوق العشرين
ح اختارمنها اللـــّيله حكايه
حصلت مرّه لعمّى امــــين
,,,,,,,
عمّى امين دا راجل غلبان
بعافيه شويّه كـــده وبطلان
وقطعة ارض بــيزرع فيها
وعنده جاموسه وحولى كمان
,,,,,,,
تحت التوته قاعد ويّانه
هوّ وابنه وبنــــته بهانه
فاجآه لقينا مراته بتصرخ
وجايّه علينا تقول آه يانه
,,,,,,,,
مالك؟ قالت فيه عربـــيّه
فيها مباحث وافـــــــنديّه
مطافى ونجده وخلق كتير
وناس م الحىّ وم الجمعيّه
,,,,,,,
ولودر ومعــــدّت بالكــوم
قالو لى صحّى امين م النوم
خوفت لا ياخدوا عيالك منىّ
قــوم يا امين كلّمــهم قـــوم
,,,,,,,
قبل ما يوصل واللاّ يجوله
لقـينا امين واقــع من طوله
سيــبنا مراته تفــــــــوّق فيه
وقرص الضغط ابنه يجبهوله
,,,,,,,,
اصحى ياعم امين وتعاله
انت بنيت فى الغيط طوّاله
لمّا بنيتها بدون ترخيص
حدّ شكاك عـملولها ازاله
,,,,,,,,
سمعوا لابنه يقول بقــّين
وبنته تزعّق زعّوقتـــين
وعملوا ازاله للطــــوّاله
واخدوا معاهم عمى امين
,,,,,,,,
بعد ما كان ليّسها بطـــين
عرضها متر وطولها اتنين
البرســـيم بيجــيبه علـــيها
وفيها بيربط له بهمتـــــين
,,,,,,,
شهرين عمى امين بيلــيص
حبّه نيابه وحـــبّه بولـــــيس
رهن الارض وباع الـــــدّار
ومضى اقرار يعمل ترخيص
,,,,,,,
عقد الارض شــريها منـين
وتصوير جوّى سنة تمانين
يعنى مقايسه ورسم كروكى
وخبـير يحسب تمن الطّين
,,,,,,,,,
وشهاده كبيره من الجمعــيّه
تقول الارض ماهش زراعيّه
ومحضر فيك عــند المآ مور
لو ع الصّور تزرع ملوخيّه
,,,,,,,,,
وتجـيب ابنك واللاّ مــراتك
بشـــوال واسع ل ملــــــفّاتك
ويمضى يكون مسئول قدّامنا
انّه يكـــــــــــمّل بعـد وفاتك
,,,,,,,,,
يوماتى السّاعه تمانيه تجـيـنه
وتدفع رسم معايـــنه عليــــنه
غير حلاوتها وغير بكشـيشها
فى قصّ شريطها لازم تدعينه
,,,,,,,,,
باين عـقل صاحبنا اتهفّ
ماشى ودايما ف ايده ملفّ
يوم مدريّه ويوم جمعـــيّه
حتّى الجمـعه ما بطّل لف
,,,,,,,,
سيرته ف وسط الناس انزاعت
حتّى بطاقته ف مشوار ضاعت
جاب الرّخــصه للطـــــــوّاله
وناسى بان( بهايـــــمه) انباعت
,,,,,,,
ويعوّض الله فى الاتنين (الجاموسه وعمى امين)
والى لقاء فى الحكايه (رقم2عمى اسماعين) مع تحيات/سعد الشرقاوى
"] ("http://[URL=http://www.imagehuge.com/show.php/3975_Image697.jpg.html)http://www.imagehuge.com/out.php/t3975_Image697.jpg]
علاء طه ياسين
29/05/2009, 08h36
صاحبي وحبيبي سعد الشرقاوي ..
تحت شجرة السنط اللي في سفح الجبل الغربي .. ظبطت لك القعدة .. ورشيت المصاطب ميه .. وفرشنا الحصر .. وقعدنا نستني حكاية عم أمين .. وزعلنا علي اللي جراله ..
زمان عبد الوهاب كان بيغني غنوة بيقول فيها ما أحلاها عيشة الفلاح مطمن باله ومرتاح .. هو طبعا دلوقتي لامطمن باله ولا مرتاح .. ويريت علي طوالة ولا حتة خص بناه بتقوم القيامة ويري ما لايراه العراقيون في زمن بوش واوباما .. لأ د فيه غلب التقاوي والكيماوي (السماد للي ميعرفشي) والمبيدات والأعلاف وعلي الحيازة وبره الحيازة وشغل الجمعيات الزراعية اللي انت عارفه .. شغلانة ووجع دماغ ..
وانا كل شويتين أبعت الولد يجيب لي كوز ميه من الزير أشرب علشان أبلع كلامك :) أنا هاشتكيك لأبوك العمدة .. علشان كلامك الحلو خلاني أقعد قدام الكمبيوتر ومش خلاني أقوم أشوف مصالحي ..
ع المسطبة قاعدين شله
نسمع حكاية عم أمين
اللي أكيد بقا دلوقتي
شاقق هدومه وشايل الطين
أستاذ في عرضك ياصديقي
أخدت ودن المستمعين
الله يبارك ف سيادتك
ياعم سعد .. وقولوا آمين
آمين
علاء
سعدالشرقاوى
29/05/2009, 08h54
ارجوك اخى/علاء
نهارك فل
ادخل بفلاشك على دول
همّا دول اصل مصر
عايزين يضيّعو قيمتهم
لكن ربنا معاهم
الشقيانين=العرقانين=
اللى فى الزمن ده متبهدلين
NAHID 76
29/05/2009, 16h14
بسم الله الرحمن الرحيم
كبير القاعده دى كلها الحاج
سعد الشرقاوى
شوف يا با الحاج
لزما وحتما وعن بد تشرح للخلق كلمه يليس الطواله
يعنى يجيب الطين السايح ويعطيها وش أخير تساوى عمليه المحاره اليوم
دى معنى الكلمه للساده رفيع المستوى
والطواله هى ترابيزه السفره بتاعت البهايم الى تباعت علشان عم أمين جرأ على بناء طواله
كان عملها خشب وريح نفسه
بس سيبك أنت احنا فى الانتظار يا خال
مع تحيات عمتك
محمد المراغى
29/05/2009, 16h25
الله عليك يا عم سعد يا كبير
من النهارده بعد ازنك تفسحلى مكان جنبكم تحت التوته
مليش دعوه انا عايز اسمع بقيت الحكايات
يسلم قلمك المبدع
وحكاياتك الجميله
وتقبل تحياتى
عفاف سليمان
29/05/2009, 20h48
الاستاذ سعد الشرقاوى:emrose:
تحت التوته لميتنا كلنا حواليك فى سماعى
حضرنا الشاى وكيزان المى
والهوا هفهف علينا شوى شوى
وانت قاعد وراكن ظهرك على مسند على قاعدة المصطبه تحكى لنا عن عم امين
وكل اللى راح واللى جى
يلاقى كلامك موزون يا خى
ويقول الله ايه الراجل ده\
كلامه يسلطن العقل يا باى:crazy:
قعدوا معانا وشربوا شاى
وانت عمال تحكى للى رايح واللى جاى
ولما جه وقت انتهاء الحكايه
بصيت لقيت الناس فى القاعده مليانه
اتارى اللى رايح واللى جاى
عجبه حوارك يا عم سعد يا خى;)
وربنا ما يحرمنا من حكياتك
ومنتظرين اللى جاى
تحياتى لك وللجميع بقضاء وقت ممتع
اختكم عفاف:)
سعدالشرقاوى
29/05/2009, 21h38
اختنا الاستاذه/ناهد
طوّاله = سفره = بوفيه =ان شاالله طبليه
المهم ان عرضها متر وطولها مترين
وكل ده حيّز الفراغ اللى من اجله ضاع
امين ومواشيه ويجعله عامر
شكرا على الرد وهذا قليل ممّا عندكم
وفى انتظار قصصكم لنستلهم منها الكثير
مختار الحسانين
29/05/2009, 21h50
ازيك قولى وطمنى اخبارك أيه
واخبار التوتة العكروتة يا سعات البيه
بتهز فروعها وتتمايل وتقول الله
على عمى سعيد الشرقاوى وتبوس ف اديه
أشكرك وعلى فكرة أنت بتفكرنى ببيرم التونسى لأنه كان بارع فى نقل مواقف حياتية فى شكل زجل مضحك جدا ....
سعدالشرقاوى
29/05/2009, 21h52
شقيق الروح الاستاذ/محمد المراغى
بعيدا عن الرد وما اسعدتنى به من طيب الكلمات
لاانكر عليك, واقسم لك اننى لم اتمالك دموعى
وانا اقرا ردك على الاخت /ناهد فى قصتها
العظيمه (ونفس وما سواها )واحسست ساعتها
بتلاقى الارواح على الود والمحبه
الف الف مليون سلامه على عيونك ونور البصيره
والقلب هو الاهم وهو الذى جعلنى اراك مع انىّ
لم القاك مرّة فى حياتى
لااكثر عليك حتى لا اثقل على عينك واسال الله لك
دوام الصحة والعافيه
سعدالشرقاوى
29/05/2009, 21h59
اختنا الاستاذه/عفاف
ان ماكتب من رد يفوق احداث
الحكاوى تحت التوته
ولكنى ساظل زعلان حتى ارى التوته
مرسومه بقلمك الفنان فى شئ من
ابداعاتك العظيمه
سعدالشرقاوى
29/05/2009, 22h09
الاخ الاستاذ/ مختار
بيرم مين ياعم خليّنا على قدّنا
فى الغلب اللى احنا فيه
دا عمّنا بيرم يوم ما قال
(ياهل المغنى دماغنا وجعنا
دقيقه سكوت لله) كان بيخاطب
جيل ام كلثوم وعبدالحليم ,ايه
رايك لو عاش فى زمن 0(رجب
حوش صاحبك عنىّ) كان قال لنا
أيـــــــــــــــــــــــــــــــــــــه
عايزين حاجه يا استاذنا
ماتغيبش علينا بتجلياتك
عفاف سليمان
29/05/2009, 22h21
اخى الاستاذ سعد الشرقاوى:emrose:
بعد صباح الخير على حضرتك وعلى جميع اهل ومواطنى سماعى الجميل
سعدت بردود حضرتك على كلماتى البسيطه :)ولكنى اخشى ان اكتبُ شيئا يكون دون المستوى او الا يليق بجمال هذا المنتدى:chut:
ولك خالص تحياتى وتقديرى
والينا بالمزيد من القصص والحكايات
تحياتى
اختكم عفاف:)
مختار الحسانين
29/05/2009, 22h38
عمى الحاج سعيد
ما وصل الينا من هذا العصر الجميل هو افضله وأجمله ، اما الردئ منه فلا يمكن أن تقوم شركات الانتاج بتسجيله وحفظه فضاع بطبيعة الحال ، اما الان ونحن فى عصر اليوتيوب والنشر الالكترونى ، مع سهولة التواصل والحفظ والنشر .
من وجهة نظرى أن لكل عصر بيرمه وجاهينه من الشعراء ، فالفن متصل غير منفصل ،،،،
Tarek Elemary
30/05/2009, 06h15
عم سعد يا جميل
أنا أسيبك يومين أرجع ألاقيك عامل تجمهر و خلية تحتية و تنظيم لقلب نظام المنتدى؟
الكلام الرائع ده محتاج تعمله فى مشاركة واحدة
يعنى الحكاية الأولى و تحتيها الثانية و الثالثة للتواصل و سهولة القراءة و المتابعة فى مكان واحد لأنه كما تعرف لتداخل المشاركات تتوه و تتفرق المواضيع
و فى الإنتظار
تحت التوته قاعد ويّانه
هوّ وابنه وبنــــته بهانه
فاجآه لقينا مراته بتصرخ
وجايّه علينا تقول آه يانه
هما دول اللي خلوني حزين جداً
أبنه
وبالأخص بنته بهانه
مش ممكن تكون عمر بنته بهانه :(
شي 4 أو 5 سنين
وتكون لابسه الجلابيه وتجري :(
ومش عارفه حاجه علي اللي بيحصل :(
غير أنها تنظر لأبوها ولأمها بدهشه وخوف :(
شكراً
ياأستاذ سعد
شكراً
سعدالشرقاوى
30/05/2009, 12h42
استاذى/طارق عمرى
(بضم العين)نظرا لان التشكيل شاحح فى السوق
يطول انتظارى لاستنير بالنقد والتوجيه وابراز
السلبيات وخاصة من عين ترى مالا نراه
لكن يبدو لك (مافيش فايده فيّه) او(مصعّب عليه
الامتحان) او(لم يصيبنى الدور)
او(لم تكن تتوقع ان يصادفك غشيم صنعه)
مع انك لسّه حالا واخد ايد واحد حبيبى للاسفلت
وعندى امل انى ح امشى عليه لو عرّفتنى
والله انا ع الترابه وطريق بلدى العشرين الف
نسمه ترابه – ويجعله عامر
وم الاخر لو ان هناك رائحت ورد فى داخل
شوال خيش يسهل ايجاد السلهّ ان شاء الله
لكن الخوف يكون كله خيش
عارفك مش ح تريّحنى
واخيرا0000
ساخطئ حتىّ تصوّبنى
واعوجّ حتىّ تقومنى
واصبر حتىّ تقيمنى
اعمل اللى تشوفه مع ادارة المنتدى
لاضافة رقم1مع المقدمه ليتثنى لىتكملة
الخمسين حكايه لوالكلام تنفع
ان ابقانا الله
الانىّوالله اعجز عن ذلك
تلميذكم/سعد
سعدالشرقاوى
30/05/2009, 13h02
الاخ الفاضل الاستاذ/فؤاد عبدالحميد
ماتزعلش على بهانه
مهما كانت صغيره فى السن
كان يجب ان يعرفوا جميعا بالايحاء
الماده رقم000000
من قانون000000
لسنة000000
الـّـتى لم تستثتى ال00000
حتيّ ولو (طوّاله)
المهم فى الاجراءات
انا اصلا لمّا بافرح بيتوه منيّ الكلام
وهيالى كلهّ زيىّ ح يموت ناقص علام
ولسانى بيفلت منى ويهطرش بالكلام
الهى يديمها فوضه ويحفظها م النظام
Tarek Elemary
30/05/2009, 13h15
استاذى/طارق عمرى
(بضم العين)نظرا لان التشكيل شاحح فى السوق
يطول انتظارى لاستنير بالنقد والتوجيه وابراز
السلبيات وخاصة من عين ترى مالا نراه
لكن يبدو لك (مافيش فايده فيّه) او(مصعّب عليه
الامتحان) او(لم يصيبنى (يصبنى) الدور)
او(لم تكن تتوقع ان يصادفك غشيم صنعه)
مع انك لسّه حالا واخد ايد واحد حبيبى للاسفلت
وعندى امل انى ح امشى عليه لو عرّفتنى
والله انا ع الترابه وطريق بلدى العشرين الف
نسمه ترابه – ويجعله عامر
وم الاخر لو ان هناك رائحت ورد فى داخل
شوال خيش يسهل ايجاد السلهّ ان شاء الله
لكن الخوف يكون كله خيش
عارفك مش ح تريّحنى
واخيرا0000
ساخطئ حتىّ تصوّبنى
واعوجّ حتىّ تقومنى
واصبر حتىّ تقيمنى
اعمل اللى تشوفه مع ادارة المنتدى
لاضافة رقم1مع المقدمه ليتثنى (ليتسنى) لى تكملة
الخمسين حكايه لوالكلام تنفع
ان ابقانا الله
الانىّ والله اعجز عن ذلك
تلميذكم/سعد
يا عم سعد يا شقى يا خلبوص يا كبير
أولا : انت لون جميل و بتلعب فى ملعب لوحدك تماما لا منافس لك فيه و مش محتاج نقد خالص ... فقط شوية توجيه لغوى و هجاء و التشكيل كما قلت
لكن انت تتمتع بعمق و تجارب حياتية و معاشرة أنماط من البشر ذوى سلوك متباين و لديك بُعْد دينى كخطيب مسجد او مقيم شعائر كما فهمت من ردود سابقة فكل خيوط العملية متوافرة لديك و تمسك بتلابيبها جيدا
موضوعاتك حية و حيوية و نقدك لاذع و تناولك أخَّاذ و حضورك طاغٍ و محبب للنفس و تتمتع بألفة مع قرائك تحسد عليها
ربنا يزيدك يا عم سعد يا شقى يا عفرييييييت
سعدالشرقاوى
30/05/2009, 13h36
استاذى/طارقالعمرى
عليه النعمه لازم اشرب شربات
وابدا اسجّل اللى جاى واللى فات
انت ما كتبتش فى اصحاب المهن
عن المشايخ وانا عندى السركله
بس ارجوك لاتنسى باقى المهمه
ادامكم الله لنا نورا نهتدى به
ومبروك علينا الاسفلت
سعدالشرقاوى
01/06/2009, 16h26
الوالد الاستاذ/ مصطفى زقزوق
سررت جدا بمرور سيادتكم
بعد ان افتقدتك كثيرا
والحمد لله على سلامتكم
نوّرت الصفحه
متعكم الله بالعافيه
فانا اشم فيك رائحة الكعبه المشرفه
وربنا يجمعنا فيها على خير
سعدالشرقاوى
02/06/2009, 10h38
استاذى/ابو صلاح
باشوفك من بعيد جاى
قلبى يرتجف
لانك تلامس القلوب
بانفاسك الهادئه
ونبراتك المعبره
باقل الحروف
فانت حقا استاذ
M O H A M E D
07/06/2009, 00h42
تحت التّوته
تحت التـوته يامستمعــــين
حكايات يامه فوق العشرين
يا حــاج سعـــــد يا وش السعد
كـــلامك ورد ، ينقــَّــط شــــهد
حــروفـــك زي طــــريق ممتد
و فيه الخُضــــرة على الجنبين
احكـي و قول و احنـا السامعين
احكــي و قول حكــــــاية الطين
أصل الأرض و أصلي و أصلك
احكي حكــــاية البنـــــي آدمين
ســـامع صوتك .. ســـامع قلبك
بيدندن أشـــــــواق و حنيــــــن
تحت التــوتة و تحت الشجــرة
عن نــــــــاس دايمــاً منسيين !
( :emrose::emrose::emrose::emrose: )
سعدالشرقاوى
11/06/2009, 18h41
الاخ الاستاذ/محمدالسلامونى
نوّرت الدنيا
وحشتنى جدا
:crazy:
قلت اسآل عته حبايبه
كان املى انّ يدلوّنى
اتاريك فى بعادك عنهم
خليّتهم جم سالونى
,:crazy:,,
دى الوقت افرح واتهنىّ
واجفّف دمع عيونى
واقول مبروك ياعنيّه
عشتى وشوفتى السلامونى
:emrose::crazy:
علاء قدرى
11/06/2009, 22h18
:emrose:عمنا الشاعر سعد الشرقاوى :emrose:
اكمل موسوعة الحكايات
كما سبق شاعرنا المحبوب طارق فى( اصحاب المهن)
ده نقد جميل لاوضاعنا
وكشف حساب لاوجاعنا
سردك شعرى جميل
فياض كما النيل (زماااااااااااااااااان)
احكى لنا ؛و اضحكنا؛و اوجعنا
يمكن نستحى من افعالنا؟؟؟؟
فى (الخص) مستنى باقى الحكايات
سعدالشرقاوى
12/06/2009, 23h33
الاستاذ/علاء قدرى
ياريس انت نوّرت التوته وزينت صفحتها
بمرورك عليها
وربنا مايحرمنا من زوقك وانسانيتك العظيمه
واخلاقك الكريمه يااستاذ علاء
سعدالشرقاوى
16/06/2009, 05h25
الاستاذ/محمد السلامونى
الشاعر الفنان
متعدد المواهب
حتى المداخلات
فيها عطاء وريحتك الحلوه
ربنا مايحرمناش منك