سعدالشرقاوى
27/05/2009, 18h54
حكايات تحت التوته
مجموعة حكايات من اعداد/سعدالشرقاوى
المقدّمه
انا تحت التوّته عامل ضلّيله
سقف نباتى وارض نجـــيله
لمّت كلّ حبايب العــــــــيله
فى صحبه جميله تحت التوته
,,,,,,,,,
وعلى الدّاير مصطبتـــين
كـنّا عملــــناهم بالطّــــين
عليها مخدّه وجوز بطاطين
للىّ يكوّع تحت الـــــتوته
,,,,,,,,
على ناصيتها ربطنا غدانا
وعقدة حطب القطن معانا
لمّا الشاى والســــكّر جانا
عدلنا هوانا تحت التـــوته
,,,,,,,,
واهو جار منها زرعنا خضار
فلفل شطّه وفول وخـــــيار
تعوز العيش الحاف م الدار
وكلّ غاموسنا تحت التوته
,,,,,,,,,
تحت التوته الجوّ جميل
حتّى ولو نسهر باللـــيل
لمّا الدنيا علــــينا تمـــيل
نجرى ونقعد تحت التوته
,,,,,,,,,
ساعة الراكيه ماتولع فيها
يضــــيع البرد وبتدفــّـيها
وطعم درانا المشوى مليها
وكيــفك تقـعد تحت التوته
,,,,,,,,,
تحت التوته بتقــــــعد نوبه
فى عزّ الصيف تلاقيها رطوبه
مجلس عـرفى واللاّ خطوبه
كلّه بيحــــــصل تحت التوته
,,,,,,,,
تحت التوته بالم عـــيالى
واقابل عمّى واضيّف خالى
وانسى همومى واريّح بالى
ساعة ماقـــعد تحت التوته
,,,,,,,,,
اصلها طالّه على الزراعيّه
وكلّ الناس بتــــــمرّ علـــيّه
وزرعى ف ارضى بيضحك ليّه
وانا باتفـــرّج تحــــت التوته
,,,,,,,,
تحت الـــتوته بنـــتعلـّم
من بعــض لمّا بنــتكلـّم
نسمة صيف ياسلام سلّم
تردّ الروح تحت التوته
,,,,,,,,
وكلّ ما حدّ يعدّى عليّه
لازم يقعد فيها شــــويّه
ياخد نفسه ويشرب ميّه
ويفرح بيّه تحت التوته
,,,,,,,,,
ونبعت ساعه البت بهيجه
لعمى محمد ابو خديـــجه
علشان ييجى ونلعب سيجه
ولو يغلــــبنا تحت الــتوته
,,,,,,,,
كلّ يومين ح احكيلكو حكايه
حصلت ويّا الناس ومعايه
واللـّى يشكّ ف كلمه ورايه
اقول له اتفضّـل تحت التوته
,,,,,,,,
بينها وبين الدّار ميت خطوه
فى دماغ ارض الاستاذ عطوه
املى اشوفكم يوم على سهوه
ونشرب قـــــهوه تحت التوته
,,,,,,,,,
تحت التوته تلا قوا معايه
ميت حدّوته والف حكايه
وكلّ واحد عـــنده روايه
لمّا بنـــــقعد تحت التوته
,,,,,,,,,
وانا باوعـدكم بعد يومين
تقروا حكاية عمّى امين
واحد م النـّاس القاعـدين
دايما عـندى تحت التوته
,,,,,,,,
والى لقاء مع الحكايه( رقم1) بعنوان (عمّى امين)
http://www.imagehuge.com/out.php/t3675_Image076.jpg
علاء طه ياسين
27/05/2009, 19h32
عمي سعد ....
بس التوتة خلاص قطعوها
والأرض المزروعة باعوها
واللمة تحتها منعوها
الله يرحم ستي التوتة
احكي وقول عنها يا شرقاوي
واحنا هنسمع أحلي حكاوي
افتح ياللا جراب الحاوي
طلع منه كتاب التوتة
مين غيرك يحكي حكايتها
احكي ولكن من بدايتها
وانا هأهتف لك فيي نهايتها
سعد يا سعد .. ياعاشق التوتة
مستني حكاياتك ..
علاء
مختار الحسانين
27/05/2009, 22h15
أولا أحب أشكرك من أعماق قلبى على هذه الأشعار التى تعود بذاكرتنا إلى أيام كانت جميلة ، وهذه صورة للتوتة بكاميرة العبد لله فى قريتنا ، منتظر قصة عمى أمين
http://www.sama3y.net/forum/attachment.php?attachmentid=149549&stc=1&d=1243462449
NAHID 76
28/05/2009, 06h29
بسم الله الرحمن الرحيم
صباحك فل ياسى سعد يا شرقاوى
بمنتهى الصراحه بعد ما قرأت التوته معدش ينفع نقول أستاذ سعد
عمى يا كبرنا هو كده
إيه العظمه دى أيه الجمال ده كله مسبتش حاجه مبتحصلش تحت التوته
جمعت من الشاى للعيش للدره للخطوبه للمجلس العرفى
إيه يا شيخ من غير زعل
ميفهمش كلامك الا الى عندهم التوته وشجرتها وما تجلبه كمان التوته لما تثمر ولا تترحمش من الهز ولق العيال بالطوب علشان ياكلوا التوت
مش ممكن هذه التلقائيه وهذا الجمال فتحت نفسنا على الصبح
خلى بالك من اللى جايه دى
صباح الخييير
ملحوظه وصورتك الموجوده الان وان كانت فى جامع الا أنها معبره عن منظر القعده تحت التوته
NAHID 76
28/05/2009, 06h35
بسم الله الرحمن الرحيم
وأنت ياسى علاء نعمل معاك أيه
عمك الشرقاوى أتكلم عن الماضى أيام التوته
وبسرعه البرق تقلشى كنت مستنى أتكلمت عن تغير الحال والأيام وما فعلوه بالتوته
أيه هى حكيتكم معانا على الصبح
أيه العفويه والتلقائيه والجمال ده كله منكم أنتم الأثنين
ربنا يحرسكم ويخليكم للمنتدى وأحنا نستمتع بجمال كلامكم
أستمر أخى علاء
أتحفنا عمنا الشرقاوى يا كبير
وفى أنتظار أول حكايه تحت التوته والى عنده حكايه ميبخلش
تشربو شاى
تحياتى
Tarek Elemary
28/05/2009, 07h01
عم سعد ... الجميل
المستغرق فى المحلية و العاشق لبيئته المحلية المحلاة بطعم الريف و رائحة الطمى عند رى الشراقى فى حر الصيف
أنا صحيح إسكندرانى لكن أصل و جذور العائلة من فلاحين إيتاى البارود بحيرة و بهم أشرف و أرفع رأسى أن اصلى فلاح
و فى عرفى الخاص أن المصرى الذى لا أصل يربطه بالصعيد او الفلاحين فهو مسكين أبتر من موروث ثقافى و جذور اصالة ممتدة عبر الزمن
أعشق حياة الريف و التوت و الجميز و شجر اللبخ حتى السنط و روائح الشجر المميزة اعشق الذرة المشوى فى الحقل على الراكية أعشق التوت الطازج أعشق صيد السمك من الرَيَّاح
كل هذا يعطيك ثراءاً و عمقاً و نكهة خاصة .... ناهيك عن التجارب و المزيج السكانى و التجربة الحياتية الثرية لسكان الريف و الإشكالية الأزلية بين الريف و الحضر و حركة السكان من و إلى كلٍ منهما ... و نظرة قاطنى كلٍ منهما للآخر
أنت تعبير بصدق و بعفوية و جمال عن الريف الجميل و الفلاح الفصيح العفوى المثقف الواعى و الخبير الذى ينطق بالحكمة و يجرى على لسانه المثل
بارك الله فيك و دامت مشاركاتك الرائعة
سعدالشرقاوى
28/05/2009, 07h46
اساتذتي الكرام
من اعاد لاحساسى رائحة الطين وطمى النيل
اخى الاستاذ/علاءطه ياسين
ومن انعش قلبى بحسّه المرهف وايقاعه المميز
اخى الاستاذ/مختار الحسانين
ومن دفعتنى بعمقها الواسع فى جمال الطبعه
التى حبانا بها المولى عز وجل
الاستاذه/ناهد
وقائدالدفّه ولاشك ان له البصمة الاولى على
عقد الاتفاق لبناءهذه النهضة الفكريه لاعضاء
هذا المنتدى العظيم الشاعر الكبير
الاستاذ/طارق العمرى
ما اخر ردودى عليكم الا اننى
فى جلسة خاصّه مع (عمى امين)
صاحبالحكايه( رقم1الذى اضحكنى وابكانى)
فالتمس منكم المعزره
انا تحت التوّته عامل ضلّيله
واهو جار منها زرعنا خضار
فلفل شطّه وفول وخـــــيار
تعوز العيش الحاف م الدار
وكلّ غاموسنا تحت التوته
ولا تحلفني
ياأستاذ سعد
نفسي نقعد انا وانت في هالضليله
بس علي شرط ....... :o
يكون معانا الأستاذ
كمال
( سمعجي )
والشرط الثاني
أن يكون عندك تسجيل
علشان نسمع
فايزه ;)
الله الله يا عم سعد يا شرقاوي
آهو دا اللي بيسَمّوه " الشِعر الأصيل " اللي له طعم و ريحة زىّ فاكهِة زمان ،،
و كفاية إنك خطفتني " مِن حُجرةٍ أسمنتية معبقة بدخان السجائِر " ، إلى " تحت التوتة حَداكُم " ،،
كما أنك " عَتـَقـْتـَني " مِن عاهة " شِبه مُستديمة " ، تجعلني أقرأ الشِعرَ ، و كأنـّهُ " عَيِّنة " تحت " الميكرسكوب " ، و هو ما يؤثـِّرُ على لذة التـَلـَقي و حلاوة التذوق
ربنا يديم عليك فِطرتك و بساطتك :emrose:
ولا تحلفني
ياأستاذ سعد
نفسي نقعد انا وانت في هالضليله
بس علي شرط ....... :o
يكون معانا الأستاذ
كمال
( سمعجي )
والشرط الثاني
أن يكون عندك تسجيل
علشان نسمع
فايزه ;)
ياااا سلام يا فؤاد يا حبيبي
إنها " غاية المُراد مِن رَبِّ العِباد "
و نغني " مع حبيبتنا فايزة " :
يامّة يا هَوايا ،، يامّة يا هوايا يا مّة
الهوا بعتـَر ضفايري ،، إيه قصدُه معايا يامّة
إيه قصدُه مَعاااااايا
( :emrose: )
عم سعد ... الجميل
المستغرق فى المحلية و العاشق لبيئته المحلية المحلاة بطعم الريف و رائحة الطمى عند رى الشراقى فى حر الصيف
أنا صحيح إسكندرانى لكن أصل و جذور العائلة من فلاحين إيتاى البارود بحيرة و بهم أشرف و أرفع رأسى أن اصلى فلاح
و فى عرفى الخاص أن المصرى الذى لا أصل يربطه بالصعيد او الفلاحين فهو مسكين أبتر من موروث ثقافى و جذور اصالة ممتدة عبر الزمن
إيتاى !
مِنوَّر يا بـِلد ،،
آدينا طلِعنــا بحراوِيّة زىّ بعض
و لي أصدقاء أعزاء مِن جماعِة " الحِنــّاوي " في نِكلة العنب
دلوقت بس عرِفت سِر جَمَــال و حيوية أشعارَك يا فنـــّان
:emrose::emrose::emrose:
و نغني " مع حبيبتنا فايزة " :
يامّة يا هَوايا ،، يامّة يا هوايا يا مّة
الهوا بعتـَر ضفايري ،، إيه قصدُه معايا يامّة
إيه قصدُه مَعاااااايا
( :emrose: )
والهوي بتاع التوته خدني ........ورماني .....;)
وأحنا ماشين بين الغيطانِ
(( معلش أنا كترت أوي في المشاركه بس هنعمل أيه في الأستاذ سعد خلاني أطلع كل اللي عندي :( ))
سعدالشرقاوى
28/05/2009, 12h26
اخى الفاضلا/الاستاذ فؤاد
نوّرت المكان وازدادت التوته حسنا وجمالا
وخاصة انها كانت تحلم باستضافة العمالقه
عمى الحاج/سمعجى
واخى الكبير/طارق
وياحبذا لو كان بصحبتكم
عمّى /ابو زهده
وخالى /ابو صلاح
واستاذنا د/انس
وكل الحبايب
لكن معزرة لا يتاح لى الان شرايط فايزه احمد المطلوبه
غير انها تغنى تحت التوته الان فى محاولة خباثه
مع امّها المتعطرصه فاضطرت ان تدخل عليها بكل الحيل
لاقناعها (باين عليه غلبان وحدّ م الجيران وصف له قليّتنه
اسقيه ينوبنا ثواب والاّ ارد الباب والا اناديله يامّه)فوجب علينا التدخل
الفورى لحل هذه المشكله
عفاف سليمان
28/05/2009, 17h12
مساء الخير على حضرتك يا استاذ سعد
الله على حضرتك والله كلمات جميله
وفكرتنا بايام جميله كنت ازور بلد زوجى
وعندهم ماشاء الله غيطان جميله بلد اهل ابيه وكنا نجلس فى النجيله للغيط
ونشوى ذره وشفت عيدان الملوخيه الجميله والباميه
والخضراوات
وذكرتنى وانا عمرى 14 عام سافرت بلد ابى رحمة الله عليه
واخذتنى اختى لابى الى الغيط التى تملكه او الارض التى تملكها والمزروعات من الخضر كل شىء من الارض
مفيش حاجه بيشتروها من بره
والله كانت ايام جميله واوقات اجمل
حضرتك ذكرتنا بيها
ياريت يوم واحد بس يعود منها;)
لك وللجميع خالص تحياتى
وننتظر المشاركات التى جمعتك بحكايات اهل البلده:o
تحت
التوته:crazy:
اختكم عفاف:)
رائد عبد السلام
28/05/2009, 17h39
حكايات تحت التوته
مجموعة حكايات من اعداد/سعدالشرقاوى
تحت التوته تلا قوا معايه
ميت حدّوته والف حكايه
وكلّ واحد عـــنده روايه
لمّا بنـــــقعد تحت التوته
,,,,,,,,,
وانا باوعـدكم بعد يومين
تقروا حكاية عمّى امين
واحد م النـّاس القاعـدين
دايما عـندى تحت التوته
,,,,,,,,
والى لقاء مع الحكايه
( رقم1)
بعنوان
(عمّى امين)
الله عليك يا
عمدة
إحنا بقي مستنيين أول حكاية
والصورة دي تحت التوتة
علشان القعدة تحلــوّ
http://www.sama3y.net/forum/attachment.php?attachmentid=149621&stc=1&d=1243533314