يـا عـم كـبَّـر

[M O H A M E D]

يــا عــم كـبَّـر

يـا عـم كبـَّر .. يـا عـم كبـَّر
يا عم بكــرة الحـــال يتغيـَّــر
أصل دوام الحــال دا محــال
و الدنيا ما بتدوم على حــال
يعنـي الســـارق و المحتــال
عمر حياته ما تبقى حــــلال
و اللي بيفتــي و اللي بيظلم
و اللي بيقـــوِّل في كــــــلام
فــاكـر نفسه خلاص متحكـِّم
و انــــه بيقـدر ع الأيـــــــام

سيبــــك م الدنيـــــا التعبانة
سيبــــك م العقـــــــل التعبان
سيبك منها ، دي بقت غابـة
و التــعبان لابــــس إنســـان
و التعلــــب بسبــَـــــع لفـَّاته
بيخلـَّص كده ع الغــــــــزلان
سيبـــــــك منها ، و لا تتّاخد
من نفســـك و تتـُــوه ويـاهم
حـاسب على لونك من لونهم
و مـا أسهــــل خلط الألـــوان

حــاسب نفســــك انت و بس
غيَّــر نفســــــــك انت و بس
فـُـوت في طريقــك
رُوح لمصيــــــــرك
شوف غلطك غمّض عن غيرك
عينـــك عــن غيـــــرك تتشــال

بص على النجمـــــة العاليــــة
اسعـــــــــى للعالـــــي هاتعلــى
قلبــك ، عقلك همـَّا ســــــلاحك
همَّـا القــــــوة في كـــل زمـــان

اتعلـــــم من النبــــع الصافـــي
اتعلــــم تـُصدق و تـــــــــوافي
اتعـــوِّد ع الخيــــر و الحـــــق
اتعلــــــم تبقــــى إنســـــــــــان

ارجــــــــع لكـــــــــلام المواويل
اشجينـــــي و غنـِّي يــا ليــــــل
الــدنيا مشــــــوارها طويــــــــل
و الأحــــلام مش عايــزة كــلام
الأحــــلام عايـــــــزة أعمـــــــال
و الأعمـــــــــال محتاجة رجــال
و الراجــــــل من كلمــة يبـــــان

و الكلمــــــة لمـــا بتتقـــــــــال
خـــرجــــت من إيدك يا لســان
دخلـت طوَّالــي على كتـــــــابك
ركبت قطـــر ، و حجزت سطــر
و لا شــئ يمحيهـــا يا غلبـــان

كبَّـــــر تكبـــر ، فكـَّــر تقــــــدر
دا كل شــئ في الدنيــا صغيـــر
حتـــى الأزمــــــات و الأحــزان
بشويــــة صبـــــــر و إيمـــــان

خليـــك طيِّــب ، بكــــرة قريـِّـب
بكــــرة البــــاطل ظنـــه يخـَيِّـب
حتــى و لــو بــــان الكسبـــــان
شمـــس الحـــق في يوم بتبــان

انـــت صغيـــــر ، هــــو صغيـــر
كـــل الكـــــــون دا يـا عم صغير
نقطـــة في بحــر ، رزاز متطيـــر
سبحـــــــــانه هــــــو الرحمــــــن

[سعدالشرقاوى]

ياسلام-ياسلام-ياسلام
ياسلمونى
ايه الحلاوه دى
اتعلـــــم من النبــــع الصافـــي
اتعلــــم تـُصدق و تـــــــــوافي
اتعـــوِّد ع الخيــــر و الحـــــق
اتعلــــــم تبقــــى إنســـــــــــان
قريتها اكتر من مره
دى مش قصيده دى مجموعة حكم وامثال
ماتحرمناش من جميل كلامك
ياكبير

[غواص النغم]

و الكلمــــــة لمـــا بتتقـــــــــال
خـــرجــــت من إيدك يا لســان
دخلـت طوَّالــي على كتـــــــابك
ركبت قطـــر ، و حجزت سطــر
و لا شــئ يمحيهـــا يا غلبـــان

فكرة جميلة
ايه الجمال والحلاوة دي
هو انت كاتبها من البحر القصير_بس ماتقولش _ لسمعجي :(
متى كتبت هذه القصيدة ؟ياريت تكتب تحتها التاريخ
وعلى فكرة في القصيدة لمحة من الفلكلور الجميل ملاحظه هنا:
الأحــــلام مش عايــزة كــلام
الأحــــلام عايـــــــزة أعمـــــــال
و الأعمـــــــــال محتاجة رجــال
و الراجــــــل من كلمــة يبـــــان


زي القمحة عند الطحان والطحان عاوز مش عارف ايه ...الخ:crazy:
لاح اقولك موزونة ولا معدولة انا فرحت بها
كالعادة في انتظار سمعجي وبقية الشعراء الأفاضل وتعليقهم على القصيدة
:emrose:تحياتي:emrose:

[مختار الحسانين]

رائعة والله يا أستاذ ، فيه بعض الكسور البسيطة فقط ، ربما أكون غلطان ، لأنى لو سمعتها بصوتك هيكون الوضع مختلف ، لكن فيها كما قال الأستاذ سعيد فى رده السابق حكم وامثال وفيها خبرة انسان

[unicorn]

يا عم منعم موزونة ,
هى صحيح عندها إعاقة كدة فى كام بيت ,
و "بتزُك" على رجل واحدة فيهم كدة زى نتاية العنكبوت
بس ما دامت من الموزون أبو كلام موزون سلامون
تبقى موزونة و على الصراط المستقيم كمان ,
جميلة و نقية زيك يا سلامون

[Tarek Elemary]

عزيزى عاشق القنديل الجميل
هايلة القصيدة دى معانيها و تركيباتها اللفظية

[علاء طه ياسين]

سيبك منها ، دي بقت غابـة
و التــعبان لابــــس إنســـان
و التعلــــب بسبــَـــــع لفـَّاته
بيخلـَّص كده ع الغــــــــزلان
جميلة خالص .. فكرتني بالموال القديم ..
عجبي علي ناس بأطباع الذئاب عايشين
وحوش بتفتك ويبقي الاسم بني آدمين
بس مش كده إحنا بنظلم الوحوش ... الوحوش طبيعتها الافتراس ... ربنا خلقها كده ... لكن البني آدمين أشد فتك من الوحوش ..
تمنياتي الطيبة ليك
علاء

[يحيى زكي]

انـــت صغيـــــر ، هــــو صغيـــر
كـــل الكـــــــون دا يـا عم صغير
نقطـــة في بحــر ، رزاز متطيـــر
سبحـــــــــانه هــــــو الرحمــــــن
__________________


صدقت والله ياسلامونتي في كل ماقلت وكتبت وسطرت


لكم حبي واعزازي
-----------

[NAHID 76]

بسم الله الرحمن الرحيم
أخى الفاضل محمد السلامونى
عن جمال كلامك قالو كتير
بس أنا عيزه أقول وحشتنا وتأخرت علينا
حمدا على تواجدك
تحياتى

[M O H A M E D]

السلام عليكم و رحمة الله و بركاته
أشكر كل من شرفني بالمرور ،
و من أسعدوني بتعلقاتهم الكريمة

الأستاذ سعد الشرقاوي
هذا من بعض ما عندكم ..
و الحمد لله إنها عجبت حضرتك .. دا شئ يسعدني و يشرفني
و أهلاً بك معنا في المنتدى أخاً و صديقاً و شاعراً
كل الشكر و التحية
:emrose:

صديقي عبد المنعم
ما علينا من البحور و الأوزان .. خلينا في الفكرة
و فعلاً انا قصدت في جزء أقتبس فكرة " البيضة عند الفرخة .. و الفرحة عايزة قمحة و القمحة عند الـ...... إلخ "
للتأكيد على فكرة ان أي واحد له هدف في حياته عشان يوصل له في مراحل ، و كل مرحلة تؤدي للي بعدها
و عشان كده مش لازم الواحد يلتفت لصغائر الأمور
و بالنسبة لتاريخ كتابتها .. فبصراحة ماقدرش أحدده بالظبط لإني مش بهتم أدوّن التاريخ على أي شئ بكتبه
لكن تقدر تعتبر - مجازاً - تاريخ نزولها المنتدى هو تاريخ كتابتها لإنه تاريخ ظهورها للنور :)
تسلم لم لي يا صديقي

الأستاذ مختار الحسانين
أشكرك يا أخي .. أسعدتني بكلماتك الجميلة
أسعدك الله
:emrose:

صديقي محمد أبو مندور
الله يخليك يا جميل بس بعد إذن سعادتك في سؤال محيرني
ليه اخترت " نتاية العنكبوت " بالذات دوناً عن باقي المخلوقات في تشبيهك البليغ ؟؟ :mdr:
شكراً لمرورك المنعش

[M O H A M E D]

الشاعر الجميل الأستاذ طارق العمري
أشكرك يا عاشق الجمال
تحياتي و تقديري لحضرتك
:emrose:

الأستاذ علاء طه ياسين
صدق من قال الموال .. و صدقت فيما قلت
كفانا الله شر هؤلاء
شكراً لمرورك العطر .. و أهلاً بك في بيتك سماعي
:emrose:

الأستاذ يحيى زكي
تأكد أني ابتهجت و فرحت و سعدت بحضورك يا راجل يا طيب
تقديري و احترامي .. و محبتي لك لله في لله
:emrose:

الأستاذة الفاضلة مدام ناهد
الله يخليكي يا ست الكل ..
و المنتدى دايماً منور بيكم .. بارك الله فيكم
:emrose:

[unicorn]

ليه اخترت " نتاية العنكبوت " بالذات دوناً عن باقي المخلوقات في تشبيهك البليغ ؟؟ :mdr:
شكراً لمرورك المنعش


سلامون سلامون ,
أنعش الله صباحك و مساك :cool:,
يا باشا عشان نتاية العنكبوت عندها 8 رجلين و برضه بتعرج :mdr: ,
بحبك يا سلامونى
مهما الناس لامونى

[ابو سجى]

سلامون سلامون ,
أنعش الله صباحك و مساك :cool:,
يا باشا عشان نتاية العنكبوت عندها 8 رجلين و برضه بتعرج :mdr: ,
بحبك يا سلامونى
مهما الناس لامونى



من يوم ما دخلت المنتدى عمري ما ضحكت من مشاركه قد الموجوده في الاقتباس ده
اولا نحللها
سلامون فيها تنوين غريب وفي نفس الوقت معروف القصد بيها مين
اما نتاية العنكبوت لها 8 أرجل وبتعرج لأ هي المفروض بتزك
واخر حاجه الافيهات بتاعة الاستاذ محمود عبد العزيز ولا كانت ع البال ولا ع الخاطر

ثانيا بعيدا عن الضحك والمزاح
عارف يا سلاموني دلوقتي اصبح الناس اللي نفوسها ضعيفه كتير معظم الناس بتبص تحت رجليها لكن بقى نادر اللي عنده بعد نظر وبيفكر في طاعة الله
ويمكن ده شوفته في قصيدتين لك من قبل (سؤال قبل النوم، أغرب المخلوقات)
لكنك ابدعت بوصفك للواقع الذي يزداد سوءا
واصبتنا بالاحباط :mdr:

[M O H A M E D]

سلامون سلامون ,
أنعش الله صباحك و مساك ,
يا باشا عشان نتاية العنكبوت عندها 8 رجلين و برضه بتعرج ,
بحبك يا سلامونى
مهما الناس لامونى



:mdr::mdr:

سلامون سلامون
رز بلبــنٌ
أكـَـله مني أبو مندور

عسلٌ عسلٌ
لو مبتهــجٌ
تلقى كلامه فرح و سرور

لو مكتئبٌ
ابعده عنه
خد لك ساتر و ابني بحور

أبو مندور
أبو مندور
في الحشرات عالم مغمور

:mdr::mdr:

[غواص النغم]

سلامون سلامون ,
أنعش الله صباحك و مساك :cool:,
يا باشا عشان نتاية العنكبوت عندها 8 رجلين و برضه بتعرج ,
بحبك يا سلامونى
مهما الناس لامونى

ياريت تكب لنا مذكرات مختصرة عن السيدة الأرملة السوداء :cool:
او مسز عنكبوت
:mdr::mdr:

[M O H A M E D]

من يوم ما دخلت المنتدى عمري ما ضحكت من مشاركه قد الموجوده في الاقتباس ده
اولا نحللها
سلامون فيها تنوين غريب وفي نفس الوقت معروف القصد بيها مين
اما نتاية العنكبوت لها 8 أرجل وبتعرج لأ هي المفروض بتزك
واخر حاجه الافيهات بتاعة الاستاذ محمود عبد العزيز ولا كانت ع البال ولا ع الخاطر

ثانيا بعيدا عن الضحك والمزاح
عارف يا سلاموني دلوقتي اصبح الناس اللي نفوسها ضعيفه كتير معظم الناس بتبص تحت رجليها لكن بقى نادر اللي عنده بعد نظر وبيفكر في طاعة الله
ويمكن ده شوفته في قصيدتين لك من قبل (سؤال قبل النوم، أغرب المخلوقات)
لكنك ابدعت بوصفك للواقع الذي يزداد سوءا
واصبتنا بالاحباط :mdr:



الله يخليك يا سامح .. بس انت فاجئتني انك فاكر ( سؤال قبل النوم ) !
كويس انك فكرتني بيها .. دي قديمة قوي :crazy:
بس ما تفكرش اني ما دمت بتكلم عن الواقع بعيوبه و قبحه أبقى انا تمام و زي الفل .. أبداً
دا انا بكتب الكلام ده لنفسي أولاً
و ربنا يكفيك و يكفينا شر الإحباط
و الواقع زي ما جوانب مظلمة ، فيه جوانب مضيئة
شكراً يا اسكندراني .. و ابقى تعالى تاني
:mdr:
سلام
:emrose: