المساعد الشخصي الرقمي

مشاهدة النسخة كاملة : عندها قلب ملوش ف الحب

علاء طه ياسين
22/05/2009, 08h58
عندها قلب يحب الراحـــة
ليل ونهار يلعب في الساحة
والأشواق جاية ورواحـــة
وما يعرفشي يدوب ويحـب

عندها قلب ملوش في الشوق
بياخدها ويطير علي فــوق
يرميلها نجماية وطــــوق
لو غرقت في بحور الحـب

عندها قلب طاير في الجــو
لو يضحك دنيتي تحلـــوْ
وأعشق في اللحظة وفي التو
رمشينها الراميين الحــب

عندها قلب لكن مآلمنــــي
مش عارف أبدا يفهمنــي

وبأكلمها وبتكلمنــــــي
أي كلام .. إلا الحــــب

عندها قلب لكن جبـــــار
عالي عالي علي الأســوار
وبيزرع شجرة صبــــــار
وانا بازرعله شجرة حــب


عندها قلب يجوز مكســـوف
مع إنه ع الهوي ملهــوف
وتشبك له الحب حـــروف
ولا يعرف يتهجي الحــب
مختار الحسانين
22/05/2009, 10h06
عندها قلب وفيه شرايين
كاتبة على جداره فلسطين
راسمه على جبينها قطاع غزة
وبتحلم بصلاح الدين
----------------------------------
بتنادى فى صحرا وف رجالها
مشغولة بـ خيلها وب جمالها

مش عارف أكملها هروح أصلى الجمعة يا حبيبى علاء
________
NAHID 76
22/05/2009, 17h45
بسم الله الرحمن الرحيم
الشاعر علاء ياسين
المفروض أعلق على مكتوبك من زاويتين
واحده من زاويه الكلمات والمضمون
جميله جدا هى كلماتك وخاصه الثلاث مقاطع الأولى والثلاث الأخيره
لدرجه انها مش حتى قدره تقرأ كلمه حب
موسيقى الكلمات جميله
متدفقه وفيها أسهاب وكأنكك غير راضى على أن تختمها وعايز تستمر فى وصف هذا القلب
أما الزاويه الثانيه فهى
من هذا النوع كثير
وأيضا رجال
يحبون يأخذون ولا يعطو
لكن لهم قلب ويدق ولاكنهم لا يريدون لدقه أدنى تعب من جهتم يرتاحو والعالم يتعب
عجبى على هذا اللون سواء رجال أو سيدات
تحياتى
علاء طه ياسين
22/05/2009, 19h12
الأخت الراقية والرقيقة المشاعر ناهد ...
اتفق معاكي في الرأي .. الأنانية موجودة .. في بعض الرجال أيضا ... بس المشكلة اننا مش بنختار قدرنا ... القدر هو اللي بيختارنا ... ويخبط علي البيبان ... ويفتح كمان .. ويدخل من دون استئذان .. وبنسميه القسمة والنصيب .. و ..............
حبيبتي أحلي البنات ... وأرضها بعيدة ...
والوحدة تشبه نخيل ... مفهوش ولا جريدة ..
والحب قسمة ونصيب .. ييجي بلا مواعيد
والقلب ساعة الوداع .. مش حمل تنهيدة ..
شكرا أختي ناهد .. وربنا مش يحرمنا منك ... ومن طلتك علي كتاباتي ...
تحياتي وتمنياتي الطيبة لك ..
علاء
علاء طه ياسين
22/05/2009, 19h29
الغالي الغالي أبو صلاح
كلامك الحلو بيخجلني ... وكأنك بتدفعني دفع للتميز والإجادة .. فمن يكتب مثل كلماتك ... من المؤكد أنه صاحب قلب كقطرة الندي علي عود نعناع يانع .. في فجر يوم رائع ...
سألت عنها النجوم ... والليل اذا أمسي
بنوتة كيف القمر ... بتدوب من الهمسة
رموشها تجرح قلوب .. والجرح ميطيبشي
غير لما ست البنات ... تيجي تلمسه لمسه
أرق وأجمل تمنياتي .. وشكرا لك ..
علاء
علاء طه ياسين
23/05/2009, 09h19
بتنادى فى صحرا وف رجالها
مشغولة بـ خيلها وب جمالها
سهرانة بتعد ف مالها
مش مهتمة بقلب حزين
حبيبي مختار .. انا وانت ممكن نعمل قصايد مشتركة حلوة كتير .. اعتبرها تجربة .. فكر وقرر .. وانا وياك ..
تحياتي
علاء
مختار الحسانين
23/05/2009, 12h17
فعلا أنا عملت كدا مع زمايلى فى كلية الطب ، اللى اتعرفت عليهم فى نادى أدب الجامعة ، ساعات تحس انك مش قادر تكمل ، فهو يكون عنده فكره يكملها وهعرض لدا فى المنتدى ان شاء الله ، من الشعر الفكاهى جدا
سعدالشرقاوى
24/05/2009, 20h27
اخى/ابوعلوه
كل يوم عن يوم تحلو
وف اشعارك احسن جو
عندها قلب طاير في الجــو
لو يضحك دنيتي تحلـــوْ
وأعشق في اللحظة وفي التو
رمشينها الراميين الحــب"] ("http://[URL=http://www.imagehuge.com/show.php/3675_Image076.jpg.html)._]http://www.imagehuge.com/out.php/t3675_Image076.jpg[/]
هات اللى عندك غذّينا
يا احلى شاعراشجينا
الله ينورليالينا
علاء طه ياسين
26/05/2009, 09h59
حبيبي سعد الشرقاوي
وبأحبك لما تمر .. وتعلق علي كتاباتي
وبجد بيحلي المر .. وبتتزين غنواتي
ليك مني كل الشكر .. مع خالص أُمْنيَّاتي
علاء
سعدالشرقاوى
26/05/2009, 10h33
اخى/علاء
وحيات عيونك ياعلوه قلبى ليك ارتاح
ماهو انت زيّى تمام عاشق غنا وفلاح
لك كلمه تسكن قلوب الناس ووجدانها
وبياخدوا منها الدوا عشان العليل يرتاح
http:// (http://[URL=http://www.imagehuge.com/show.php/3758_Image031.jpg.html])http://www.imagehuge.com/out.php/t3758_Image031.jpg (http://www.imagehuge.com/show.php/3758_Image031.jpg.html)
علاء طه ياسين
26/05/2009, 10h44
الله عليك الله ... يا عم شرقاوي
فلاح أصيل زينا ... غاوي غُنا .. وهاوي
عاشق حنين الرباب ... ورنة المزمار
ولمة حلوة ف سمر ... ورقص وغناوي
الكلمة منك نغم ... بيشدنا لبعيد
تفتح بيبان الهوي .. نشتاق للمسة إيد
وتدور سواقي الحنين ... ونلف وياها
نعيش ليالي الحصاد .. ولهفة المواعيد
علاء