المساعد الشخصي الرقمي

مشاهدة النسخة كاملة : المايسترو


غازي الضبع
17/05/2009, 09h22
عنـدما قامـوا بتخـدير الأستاذ عزيـز ، ولم يحضـر للحفــل الذي سيـغني فيه ( منعــم ) ..
ارتبك منعم ، وارتبـك الجميـع ، وسألـوا الأستــاذ حسـب الله السادس عشـر عن إمكانيـة قيادتـه للأوركســترا
فنـفى إمكانيـته للقيــام بهذه المهــمة ، لإنها تعتــمد على النــوتة ..
وكـادوا أن يلغـوا الحفــل ، ولم يكن ليغني منعـم .. إلا أن ظهــر الأستاذ جادلــيو قائلا عبارتـه الشهيـــــرة ..
إنت اللي هاتغني يا منعم ..

والسؤال هنـــا ،، أو موضوع النقـاش هنـــا

هــل فعلا للمايسترو دور مؤثر جداً لهذه الدرجة التي تمنع قيـام الحفل أو الأغنيـة لإنه لم يحضر ؟

هل هذا المشهد مبالغ فيــه ؟

ألا تستطيع الفرقة الاعتماد على النوتة المكتوبة أمامهم فقط ؟

ألا يستطيع أحد العازفين أن يقوم بهذه المهمـة ؟

وما دخــل المطرب في ذلك ؟ هـل يغني بنوتة هو الآخـر ؟

هل مجرد حفظه لـ اللحن يغنيــه عن المايسترو ؟

وما هي المؤهلات المطلوبة في المايسترو ؟

وهل تختلف وظيفـة المايسترو من فرقة لأخرى ؟؟

ومن هـم أشهر من عمـلوا كمايسترو لفرق موسيقيـة ؟

نحتــاج للإجابـة على هـذه الأســئلة من أساتذة المنتدى في الموسيقى ؟

:emrose:

سيادة الرئيس
17/05/2009, 11h24
قائد الفرقة الموسيقية
Maestro

الأول يا متعب لازم تعرف معنى الكلمة و طبعا واضح بالعربي
أما بالاتيني Maestro و هى كلمة تعني الأستاذ الكبير في فن ما
يعني ممكن نقول على ( المقص دار ) الشاطر Maestro
و بما إن الموسيقى من أهم الفنون البشرية فقائد الفرقة الموسيقية يطلق عليه نفس التعبير Maestro

و لو دققت حاتلاقيها متخده من الطليانية إللي أغلب مصطلاحات الموسيقى منها و دخلت في كل اللغات

و عشان يبقى كلامنا شافي و وافي لازم نفرق بين القيادة العربية و القيادة الغربية و طبعا الكلام حيكون على التقليدي في كل منهما

القيادة في الموسيقى العربية

لما كانت موسيقانا العربية Monophonic بمعنى أنها أحادية الخط اللحني فإن قيادتها بسيطة و لا تتعدى متابعة الخط اللحني في المدونة الموضوعة أمام العازفين و طبعا كلامي على الفرقة التقليدية التي تصاحب المطربين التقليديين
و في عصرنا الحديث و بعض المحاولات القديمة قاموا بتقديم أعمال مصاحبتها بنيت بنسيج polyphonic يعني متعدد الخطوط اللحنية في الحالة دي العمل بيكون محتاج قائد من النوع الغربي و حااتكلم عنه لاحقا

خلينا في القيادة العربية

طبعا أكيد محتاجه لشخصية قوية ملمة إلمام جيد بأنواع الآلات و شاطر في التدوين و القراءة الموسيقية و يا سلام لو كان مؤلف
بس أرجع و اقول إن القيادة العربية أسهل بكتير من القيادة الغربية
بتكون قيادة الفرقة العربية من خلال المدونة أحادية الخط Monophonic طبعا لا تخلو من فنيات خاصة زي ( مرجع - كودا - سينيو - دبل سينيو - بريما و سكوندا فولتا ...... ) و دي مصطلحات وضعت في الأصل للإختصار في التدوين و عدم تحقيقها في مكانها ينتج عنه خطأ في الأداء و طبعا في كتير من المصطلحات الخاصة بأداء كل آلة زي حركة قوس الكمان أو نبر الوتر بدون قوس و كمان العلامات الخاصة بالتعبير الأدائي و ما إلى ذلك و دي طبعا بتكون بشكل محدود جدا في مدوناتنا التقليدية
و على أساس ذلك الموضع بيكون محتاج واحد إما عازف أو متفرغ للقيادة عشان يطبق المدونة أثناء البروفات و العرض و برضه مش حا اكدب عليك بتكون بطريقة عشوائية إلى حد كبير و يمكن أن لا تتعدى إشارات البداية و بعض الأماكن داخل العمل بها وقفات أو تغيير إيقاعي أو مقامي يكون للقائد فيها دور في توحيد أدائها
و لي رأي أن موسيقانا بقائها Monophonic هو أهم عامل في شخصيتها المتفردة التي تعطى إنفلات للعازف ليقوم بأداء اللحن الأصلي من خلال مخزونه الطربي في الأداء و لذلك أغلبنا يفضل أغاني الحفلات عن أغاني الاستوديو و التي تكون مقننة و لا يقوم العازفيين بالخروج عن الخط الأصلي و الذي هو أساس التغيير ( الطرب )

إذا مهمة القيادة في الموسيقى العربية التقليدية لا تتعدى متابعة الخط اللحني و التدريب عليه و قيادة ذلك في البروفات و العرض و لا أقلل من قيمة ذلك فما ذكرت يحتاج لشخصية لها خبرات و قدرات عالية في فنيات الموسيقى

و زي ما قلت إن هناك أعمال عربية ضخمة يحتاج تنفيذها إلى فرق كبيرة تستطيع أداء أعمال موزعة بأسلوب polyphonic في هذه الحالة يجب أن يكون قائد الفرقة من النوع إللي حا اتكلم عنه بعد ما اشرب واحد شاى و ارجع لك

hasanh
17/05/2009, 12h20
قائد الفرقة الموسيقية







Maestro

الأول يا متعب لازم تعرف معنى الكلمة و طبعا واضح بالعربي
أما بالاتيني Maestro و هى كلمة تعني الأستاذ الكبير في فن ما
يعني ممكن نقول على ( المقص دار ) الشاطر Maestro
و بما إن الموسيقى من أهم الفنون البشرية فقائد الفرقة الموسيقية يطلق عليه نفس التعبير Maestro

و لو دققت حاتلاقيها متخده من الطليانية إللي أغلب مصطلاحات الموسيقى منها و دخلت في كل اللغات

و عشان يبقى كلامنا شافي و وافي لازم نفرق بين القيادة العربية و القيادة الغربية و طبعا الكلام حيكون على التقليدي في كل منهما

القيادة في الموسيقى العربية









http://elalaty.jeeran.com/notes/Maestro.JPG


Maestro ,Composer,and Conductor
The Great Musical Director
Mohammed Alalaty

.
.
.

غازي الضبع
17/05/2009, 12h37
..

حا اتكلم عنه بعد ما اشرب واحد شاى و ارجع لك

يا سلام على كلامك المسكر يا فخامتك
ومعلوماتك الزيادة ، عن المايسترو والأغنية والمنولوج والطقطوقة
هنياً مقدماً ..
منتظرك على نــار .. أنا وكل السادة الأفاضل

سيادة الرئيس
17/05/2009, 13h12
القيادة في الموسيقى الغربية التقليدية

كل آلة لها تكنيكها و طبقتها الصوتية و طابعها الخاصبها
يعني بتختلف مفاتيح التدوين حسب طبقة الآلة و طبعا لكل آلة مصطلحات خاصة بها في التدوين لإخراج إمكانتها التعبيرية

الموسيقى الغربية التقليدية قائم وضعها على تعدد التصويت polyphonic و الذي يصل أحيانا إلى حد التعقيد و طبعا نحط على جنب ما يريده المؤلف من التأثير النفسي لمؤلفته

أرجع و اتكلم عن تاريخ قيادة الأوركسترا و أقول

لا يزيد عمر مهنة قيادة الأوركسترا على 200 سنة و ماكنتش الفرق الموسيقية كبيرة وكانت محصورة في عدد من العازفين لا يتجاوز عدد أصابع اليدين في غالب الأمر
وأخذت الفرق تكبر مع تطور آلات العزف الموسيقي ولاسيما أسرة الكمان التي صارت تضم الكمان والفيولا والتشيلو و الكمان و الكونتراباص

وفي القرن الثامن عشر كان عازفو الكمان و الهاربسيكورد يتولون قيادة الفرقة الموسيقية وهم يعزفون أما في الأوبرا الفرنسية فكان في الغالب الملحن يقف خلف الستارة في المسرح ويوجه الفرقة بصوت مسموع أو يضرب رجله على خشبة المسرح لضبط الإيقاع ومن المآسي التي يرويها تاريخ الموسيقا الأوروبية في هذا المجال أن الموسيقي الفرنسي (جان باتيست لولي) مات بعدما انغرست في رجله خشبة من أخشاب المسرح و هوه بيقود من خلف الستارة إحدى مقطوعاته بعد إلتهاب شديد في جرحه

وفي القرن التاسع عشر ترك قائد الأوركسترا إصدار أي صوت مباشرة بل أخذ يلف ورقة في شكل لفافة طويلة ويقود بها أو يقود بقوس كمان ويدعي قائد الأوركسترا الألماني (لودفيغ شبور) أنه أول من استخدم سنة 1820 م عصا القيادة وبعد ذلك حول قادة الأوركسترا مهنتهم من مجرد منظمي ايقاع عزف إلى فنانين لهم قواعدهم و أسسهم


طيب نرجع لمقومات القائد و هى تنقسم لقسمين

الأول : تقنياته

لازم يكون شاطر جدا في score reading
و ببساطة هوه قراءة المدونة الكاملة و بتكون جامعة كل الآلات الموجودة في العمل بشكل رأسي

http://www.sama3y.net/forum/attachment.php?attachmentid=147912&stc=1&d=1242559976

http://www.sama3y.net/forum/attachment.php?attachmentid=147913&stc=1&d=1242559991

يعني حضرتك تخيل إنه مطلوب منه يقرا السفالة الموجودة فوق دي مع بعض في وقت واحد و طبعا الصور دي لمدونات أعمال من الصفحات الأولى ليها يعني قدام شوية ممكن الصفحات بعيد عن السامعين تسود و تبقى الحكاية عيصه و سترك يارب
و لاحظ كل خط مكتوب أوله إسم الآلة إللي ممكن عددها يزيد عن كده حسب الموضوع
و لا حظ ديما القائد بيقلب الصفحات بسرعة لأن يا حبة عين أمه على كبر الصفحة ممكن عدد الموازير ما يزيدش عن 12 في الصفحة و يقل عن كده في الوقت إن العمل المفرغ لكل آلة بتكون عدد صفحاته أقل

و ممكن إن القائد أثناء إكتشافة العمل يجسه على البيانو و يلعب الكوردات مجتمعه لكل صابع آلة و إديني عقلك

الكلام ده ببساطة شديدة و من غير الدخول في تفاصيل تعقد الموضوع

التاني : روحه

أيوه و ده الأهم لأنك ممكن تسمع عمل واحد لكن بقيادات مختلفه تكتشف إن روح الأداء و الحلاوة مختلفة من قائد للتاني حسب إشاراته الإيحائية و اللي بالطبع بتأثر على أداء العزفين و يطلع منهم إللي هوه عايزه عشان كده ديما بتلاحظ العازفين إن عين على النوته و عين عليه

و طبعا أعظم قائد عرفته البشرية حتى الآن هوه الراحل


Vergesst Herbert von Karajan

http://www.sama3y.net/forum/attachment.php?attachmentid=147914&stc=1&d=1242560003


هذا الأسطورة الذي قل أن يجود الزمان به و له قدرة عجيبة في إخراج أرواح الأعمال كساحر بل أنه يقود الأعمال من غير مدونات
و هوه متخصص أعمال بيتهوفن و اشتهر بذلك حتى من يريد سماع أعمال بيتهوفن يفضل أن يكون هو القائد لما له من باع طويل في موضوع الروح

طبعا علاوة على ذلك تجد القائد ملم بكل تكنيكات الآلات ليس عزفا و لكن أسلوبها و ديما بتشوف إنه بيبص لمجموعة و يشاور بطريقة قريبة من أداء العازف لإخراج ما يريد من خلال المدون

و حديثا قامت عدة أوبرات بوضع كاميرا أمام وجه القائد تنقل من خلال شاشة للجمهور إنطباعات القائد أثناء قيادته

بص يا غازي الموضوع أكبر من كده بكتير و ده القليل منه عن قائد الأوركسترا و اوعدنا يا رب

unicorn
17/05/2009, 15h05
الله على جمال مواضيعك يا غازى ,
استاذنا صلاح علام انت فتحت نفسنا و هاتسيبنا كدة ,
أولا الف شكر على الشرح الجميل الممتع دة
ثانيا اسئلة غازى لسة ما خلصتش
انا كمان عندى أسئلة بعد اذنك ,
بجد فى مايسترو يقدر يقرأ المازورة اللى حضرتك رفعتها و لكل الالات فى وقت واحد ؟؟ طيب تيجى ازاى ؟؟ دة على ما يقرا و يشير للكمنجات يكون التشيلو مثلا خلّصها ؟؟؟
المؤلفات الموسيقية لعلى اسماعيل و فؤاد الظاهرى و أندريا رايدر و عمر خيرت هل يمكن اعتبارها polyphonic؟؟
هل تكفى البروفات الكثيرة بين عازفى الأوركسترا لحفظ نوتة باقى العازفين للاستغناء عن دور المايسترو؟
عبد الحليم كان فى بعض اغانيه بيقوم بدور المايسترو فى المقدمات الموسيقية , هل دة فعلا نوع من الاستعراض كما أشيع عنه ؟؟ أم ان دوره كان ضرورى لضبط الايقاع أو تنبيه العازفين لملحوظاته فى البروفات؟
هل وصل اى مايسترو من ولاد العرب انه يقدر يقود أوركسترا غربى ؟؟؟ و لا لسة ما وصلناش لكدة ؟؟
شكرا جزيلا يا استاذ صلاح
و شكرا جزيلا يا غازى

سيادة الرئيس
17/05/2009, 18h26
هــل فعلا للمايسترو دور مؤثر جداً لهذه الدرجة التي تمنع قيـام الحفل أو الأغنيـة لإنه لم يحضر ؟




بكل تأكيد يحدث ذلك لكن يمكن تفاديه بإستخدام مايسترو آخر أو رائد الأوركسترا لكن لن يكون بجودة من قام بأداء البروفات على العمل


ألا تستطيع الفرقة الاعتماد على النوتة المكتوبة أمامهم فقط ؟


تستطيع و لكن سيفقد العمل روحه و يمكن حدوث أخطاء

ألا يستطيع أحد العازفين أن يقوم بهذه المهمـة ؟

نعم إذا كان مؤهل و قوته في السكور ريدينج تؤهله لذلك

وما دخــل المطرب في ذلك ؟ هـل يغني بنوتة هو الآخـر ؟


المطرب ليس له دخل و ما يحدث لدينا هو لا يزيد عن إستعراض فاشل

هل مجرد حفظه لـ اللحن يغنيــه عن المايسترو ؟

إذا كان غير موزع نعم

وما هي المؤهلات المطلوبة في المايسترو ؟


ما قولنا و مش عايزين وجع دماغ

وهل تختلف وظيفـة المايسترو من فرقة لأخرى ؟؟

بكل تأكيد حسب العمل و نوعه

ومن هـم أشهر من عمـلوا كمايسترو لفرق موسيقيـة ؟

في الموسيقى العربية :

الراحل الأستاذ أوي جدا خالص : عبد الحليم نويرة و له كتاب معتبر في قيادة الفرقة العربية و إشارات الضروب العربية
الأستاذ الراحل الفنان الملحن صاحب ( ما بيسألش عليا أبدا ) : حسين جنيد
الأستاذ : أحمد فؤاد حسن
الأستاذ : صلاح عرام
الأستاذ : صلاح غباشي
الأستاذ : عبد العظيم حليم
الأستاذ : الشجاعي
الأستاذ : يسري قطر و أيضا له كتاب مهم في القيادة

و أسماء كثيرة لا تحضرني الآن

الموسيقى الغربية

الماسترو : إبراهيم حجاج الحاصل على أربعة جوائز عالمية في القراءة الوهلية
الماسترو : عزيز الشوان
الماسترو : السيسي
الماسترو : مصطفى ناجي
الماسترو : الصعيدي
الماسترو : حليم الضبع واضع موسيقات الصوت و الضوء

و أسماء كثيرة أيضا لا تحضرني الآن و كل ماذكرت من أسماء قاموا بقيادة أوركسترات عالمية و أسمائهم تزين أوبرات العالم

و كلمة أخيرة في صورة سؤال تبين مدى أهمية الماسترو و الحدق يفهم ;)

ليه لما غنى عبد الحليم ( التوبة ) و ( حبيبها ) كان القائد : علي إسماعيل ؟؟؟؟؟؟؟

سيادة الرئيس
17/05/2009, 18h47
بجد فى مايسترو يقدر يقرأ المازورة اللى حضرتك رفعتها و لكل الالات فى وقت واحد ؟؟ طيب تيجى ازاى ؟؟ دة على ما يقرا و يشير للكمنجات يكون التشيلو مثلا خلّصها ؟؟؟




أيوه و نص
و تيجي مع الموهبة و المذاكرة بيحط عينه ساعدتك بشكل عام و يقرا و التدريب بيكون على البيانو و يقرا بشكل عمودي في صورة كوردات


المؤلفات الموسيقية لعلى اسماعيل و فؤاد الظاهرى و أندريا رايدر و عمر خيرت هل يمكن اعتبارها polyphonic؟؟


طبعا


هل تكفى البروفات الكثيرة بين عازفى الأوركسترا لحفظ نوتة باقى العازفين للاستغناء عن دور المايسترو؟

في العربي ممكن لكن يستحسن إن يكون في واحد من العازفين لإشارات البداية و النهاية
و في الموسيقى الغربية ممكن أيضا في المجموعات الصغيرة زي ( موسيقى الحجرة ) و الرباعيات و الثلاثيات و الثنائيات


هل تكفى البروفات الكثيرة بين عازفى الأوركسترا لحفظ نوتة باقى العازفين للاستغناء عن دور المايسترو؟

ممكن لكن مش حلو

عبد الحليم كان فى بعض اغانيه بيقوم بدور المايسترو فى المقدمات الموسيقية , هل دة فعلا نوع من الاستعراض كما أشيع عنه ؟؟ أم ان دوره كان ضرورى لضبط الايقاع أو تنبيه العازفين لملحوظاته فى البروفات؟
فزلكة فاضية و خبث من إللي قلبك يحبه
عبد الحليم كان لا يقرأ مزيكا

هل وصل اى مايسترو من ولاد العرب انه يقدر يقود أوركسترا غربى ؟؟؟ و لا لسة ما وصلناش لكدة ؟؟

يعني مش عاجبك كل الأسماء إللي فوق و فيه زيادة عن كده كتير و أنا لي صديق دفعتي إسمه ( حسام شاكر ) هوه حاليا من أهم قادة الأوركسترا في النمسا و لو قعدت أعد لك الشباب مش حا نخلص
و على فكرة الإسماء دي من مصر بس و فيه أسماء هامة أيضا في سوريا و لبنان

الألآتى
17/05/2009, 20h05
أهلاً ياغازى .. وأهلاً بمواضيعك وقضاياك المهمة التى تثيرها بين الحين والأخر ..

لن أضيف شيئاً عما قاله وشرحه أستاذنا صلاح علام ..

فقد أفاض وأفاد .. يكفى أن أؤكد كلامه .. بأن للقائد أهمية كبيرة جداً وخاصة فى الأعمال الموزعة ..

وحتى فى الأعمال التقليدية الشرقية .. وجود القائد ينظم العمل أكثر ..

الألآتى
17/05/2009, 20h12
http://elalaty.jeeran.com/notes/Maestro.JPG



Maestro ,Composer,and Conductor
The Great Musical Director
Mohammed Alalaty

.

أستاذى الدكتور حسن حمدان ..

أشكرك أستاذى لوضعك هذه الصورة .. وأشكرك على كلماتك ووصفك لشخصى المتواضع ..

وإن كانت هذه الصورة ليست هى المقصودة بإستفسارات الأستاذ غازى ..

لأن الفرقة الموجودة فى الصورة .. هى إحدى فرق الموسيقى العربية التابعة لقصور الثقافة ..

وبالطبع هذه الفرق تعزف بنظام المونوفونى .. أى الخط اللحنى الأحادى .. ولا تحتاج لمايسترو ..

والنوتة الموجودة أمامى ليست نوتة قائد ( بارتيتوره ) .. وإنما هى نوتة عادية للعمل ككل ..

ووجودى أمام الفرقة يرجع لكونى مدربهم فى قصر الثقافة .. ومن الضرورى وجودى أمامهم فى الحفلات والمسابقات ..

أشكرك مرة أخرى ..

غازي الضبع
18/05/2009, 08h09
سيــادة الرئيس .. ألف شكر يا كبير .. يا مايسترو :emrose:

حبيبي وصديقي .. ماندو .. الشكر ليك إنت يا جميـل وعلى أسئلتك الهامة التي أثرت الموضوع .. :emrose:

عم محمد الآلاتي .. أخيراً صحيت م النوم .. اصحى بقى يا عم .. ورانا شغل كتيـر :emrose:

غواص النغم
18/05/2009, 12h47
بكل تأكيد يحدث ذلك لكن يمكن تفاديه بإستخدام مايسترو آخر أو رائد الأوركسترا لكن لن يكون بجودة من قام بأداء البروفات على العمل

و كلمة أخيرة في صورة سؤال تبين مدى أهمية الماسترو و الحدق يفهم ;)

ليه لما غنى عبد الحليم ( التوبة ) و ( حبيبها ) كان القائد : علي إسماعيل ؟؟؟؟؟؟؟
هو في الحقيقة وجود علي اسماعيل كان ايضا في أغاني كمال الطويل الوطنية تقريبا حسب ما اتذكر
لكن قد يكون السبب هو ان الموسيقى متوزعة polyphonic?
يعني لها اكثر من خط لحني وتحتاج لقائد فرقة متمكن
هنا ممكن اسئل
هل تختلف النتيجة لو كان قائد الفرقة هو الموزع ؟
يعني لو اغنية جبار اعتقد انها من توزيع اندريا رايدر هل لو غنيت على المسرح تحتاج لوجوده الموزع نفسه؟
ولماذا في رأيك لم يغنيها حليم على المسرح _اقصد اغنية جبار _مع ان هناك من ذكر انه غناها على المسرح

في حديث للأستاذ عادل صموئيل _ الفرقة الماسية_ذكر ان حليم كان فعلا يقود الفرقة وانه دارس للنوتة !!!
لأنني سئلته نفس السؤال ان هناك من كان يعتقد انه بيستعرض على المسرح

هل كان رايدر قائد فرقة موسيقية ايضا؟؟

بعد رايدر و علي اسماعيل من كان يقوم بالتوزيع هل الملحن نفسه يعني قارئة الفنجان مثلا من قام بتوزيعها؟
وهل انتهى هذا النوع من الموسيقى المتوزعة polyphonic
:emrose:تحياتي:emrose:

karawan19
18/05/2009, 23h36
بعض الجوانب الخاصه بالمايسترو
ربما نمر مرور الكرام حينما تذكر كلمة المايسترو ولكن المايسترو فى الحقيقه هو شخصية متفردة وليس سهلا أن يكون الأنسان قائدا موسيقيا.
ولقد طرح أخى الغالى الأستاذ غازى موضوعا رائعا وأنا أعتبره موضوعا للخاصة وليس العامة فى مجتمعاتنا الشرقية ولقد أمتعنى سيادة الرئيس الأستاذ الكريم صلاح علام بشروحاته الرائعة وعلمه الغزير وعرضها فى تناغم جميل فشكرا له فقد استفدت منه وتعلمت كثيرا وأستأذنكم فى أن أكتب أضافة بسيطة عن أحد الجوانب المتعلقة بالمايسترو .
لابد وأن يكون المايسترو ذو موهبة كبيرة ويمتلك ناصية معرفية عريضة وعميقة بالموسيقى بدءا من السولفيج الى التكوينات الموسيقية المختلفة والفنون الصوتية المختلفة
كذلك لابد وأن يتميز بموهبته فى استنباط المعانى كواحدة من أهم صفاته الشخصية وأن يكون منغمسا حتى أذنيه فى فهم معانى المؤلفة الموسيقية للدرجة التى تجعله قادرا على توصيل المعنى الموسيقى للآخرين.
ولابد وأن يكون المايسترو متحليا بالثقافة العامة ولدية معرفة كبيرة بحقائق الطبيعة البشرية بكل أبعادها الى جانب معرفة بعلوم الفلسفة والرياضيات والرياضيات والفيزياء.
ألى جانب هذا فأن المايسترو لابد وأن يتمتع بشخصية رائعة بدونها لايمكنه أن يحقق شيئا وفى اللحظة التى يصعد فيها المايسترو الى مكان القيادة فانه يصير محطا لأنظار أفراد الفرقة أو الأوركسترا بل وأفراد الجمهور من الحاضرين كافة.
وكى يكون المايسترو مقنعا فى أداء دوره القيادى – فأنه يحتاج ليس فقط أن يكون لديه تكنيك عالى المستوى فى ادارة الفرقة ولكن أن يشع من شخصيته وروحه على الحاضرين معه. أن التعبير بالنظرات والأيماءات تعطى استجابات مختلفة من الفرقة الموسيقية فأذا كان المايسترو يملك شخصية متفردة فأن الجميع سوف يتقبله ويتفهمه فورا ولكن على العكس – اذا كانت روح المايسترو ضعيفة فأن تعليماته للفرقة لن تكون ذات مصداقية أو معقولية
وكذلك يجب على القائد أن يكون شخصا متواضعا وأن يكون محترما لرؤية مؤلف العمل الموسيقى وأن ينفذه كما أراده ويجب بالطبع أن يتفهم كل العلامات التى يحتويها العمل المكتوب وكذلك فأن قدرته على أن يقرأ مابين السطور فى العمل الموسيقى هى أحدى قدراته الأساسية.
ويجب أن يتذكر المايسترو أن فرقته أو الأوركسترا يتكون من أفراد لهم أرواح وأنفس متعددة وربما متباينه وأنه يجب عليه توحيد الأتجاهات الروحية لهؤلاء العازفين. وأنه يجب عليه ابداء المشاعر الأنسانية المخلصة لأفراد فرقته
هذه هى بعض صفات المايسترو – وهكذا ليست المسألة مجرد قراءة للنوته.
وطبعا المايسترو العظيم الأسطورة Herbert von Karajan's الذى ذكره الأستاذ صلاح والذى ولد فى سالسبورج فى النمسا عام 1908 هو أحد أعظم المايستروهات فى تاريخ القيادة الموسيقية والذى أصبح ثانى أشهر أبناء سالسبورج بعد بيتهوفن – وهناك أسئلة عن أهمية دور المايسترو : ولدى سيمفونيات بيتهوفن التسعة والتى عزفت بقيادة المايسترو العظيم أرتورو توسكانينى وهو أحد أعظم المايستروهات فى أواخر القرنين التاسع عشر وبدايات القرن العشرين (25 مارس 1867 – 16 يناير 1957 ) والذى كان يمتلك ذاكرة فوتوغرافية جبارة ولدى نفس السيمفونيات بقيادة مايستروهات آخرين وكذلك مثال آخر اذا استمعت الى شايكوفسكى بقيادة "مرافنسكى" وبقيادة غيره وأستطيع أن أزعم أن هناك فرق وأى فرق
وقد ساعدتنى الظروف على التعرف على اثنين من المايستروهات أولها الأستاذ يوسف السيسى والذى عرفته لسنوات وتعلمت منه الكثير فى هذا المضمار وكم تناقشنا فى امكانية تحويل الموسيقى الشرقية للسنباطى الى موسيقى بوليفونية والثانى هو مايسترو لأحد أكبر الفرق الموسيقية الألمانية والذى أسمعته المقدمات الموسيقية لأعمال السنباطى والذى انبهر بها رغم الربع تون وتمنى أن يستطيع وضعها فى نمط أوركسترالى وربما يعزفها فى يوم ما

مع تحياتى

غازي الضبع
19/05/2009, 12h28
أستاذنا الكبير
والعالِم الجليل
الدكتور ثروت غنيم
دائما أقول أن أي موضوع تمر حضرتك عليه فإنه يتشرف بمروركم الكريم وقراءة حضرتك له
فما بالي بموضوع ينال إعجاب حضرتك ، وتزينه بشرف مشاركة حضرتك
أود فقط أن أستفسر من دولة سيادتكم عن هذه المقولة التي تفضلت حضرتك علينا بإخبارنا إياها
.. ولدية معرفة كبيرة بحقائق الطبيعة البشرية بكل أبعادها الى جانب معرفة بعلوم الفلسفة والرياضيات والفيزياء.

أنا أعرف أن العلوم جميعها مشتقة من بعضها أو بمعنى آخر دائما تكون هناك علاقات تبادلية وتكاملية واعتمادية بين العلوم ..
وأكيد هناك علاقة بين علم النغم ، وبين الفلسفة والطبيعة والرياضيات مثلما تفضلت حضرتك وذكرت ..
ولكن أطمع في كرم حضرتك أن تخبرنا بهذه العلاقة .. أو بمعنى آخر .. ما هو العائد على المايسترو من إلمامه بعلوم الفلسفة والرياضيات والفيزياء ؟
ولحضرتك خالص تحياتي واحترامي :emrose:

صالح الحرباوي
19/05/2009, 22h48
سلام و احترام
موضوع في منتهى الروعة كما عودنا أخي الحبيب غازي...
و لقد استمتعت بما تكرم علينا به أستاذنا البارز سيادة الرئيس صلاح علام من شروحات و تفسيرات دقيقة و مستفيضة ...

و قد نلاحظ وجود فوارق جوهرية بين عالم الموسيقى العربية و الغربية مما يجعل موقع المايسترو مختلفا بين الواحدة و الاخرى ....
- يتجلى واضحا دور المايسترو في الموسيقى السمفونية الغربية حيث يعطي بحركاته الإشارات الازمة للحفاظ على الانسجام بين مختلف آلات الأوركسترا و ضبط أداء الصولوهات أثناء المعزوفة و إرساء نبض متناغم بين كل مكونات المجموعة ....
في المقابل لم تكن تلك الموسيقى متداولة في التراث الموسيقي العربي الذي كان يرتكز في جوهره على مرافقة التخت (الذي كان بسيطا) للمطرب الذي كان يعتمد أساسا على طاقاته الصوتية و تمكنه من المقامات و مواهبه في الأداء ...

- أمّا إذا نظرنا إلى الأعمال السمفونية الغنائية مثل الأوبرا فسنرى أيضا أن دور المايسترو يبقى محوريا في تلك الأعمال حتى برفقة عمالقة هذا الفن مثل التينور لوتشيانو بافاروتي و بلاسيدو دومنجو أو السوبرانو ماريا كالاس و مونسيرات كاباليه ...
لكن هذا لا يمكن تصوره في موسيقانا الشرقية إذا تكلمنا على رموزها الكبار ... فهل من المعقول تخيل أم كلثوم أو محمد عبد الوهاب يؤدون أغنية تحت قيادة مايسترو ؟؟؟؟

و لا ننسى أن الفيلم الذي انطلق منه أخي غازي لطرح هذا الموضوع الشيق يتعلق بمطرب مبتدأ و هذا ما جعل المايسترو جادوليو يخشى عليه من الفشل في أول حفل مهيب له في دار الأوبرا ... فقرر مسك العصى و قيادة الفرقة مضحيا بحريته في سبيل نجاح تلميذه ...

غازي الضبع
20/05/2009, 12h14
يا ألف أهلا وسهلا .. بالصديق الفنان المثقف المهندس صالح الحرباوي
كم هو محظوظ هذا الموضوع بمرور كرام الكرام

سمعجى
20/05/2009, 13h06
إيه الموضوع الشِديد ده !

الله ينوّر يا عم غازي ،، فكرتني بالأيام الأولى لدعوة موسيقية على أغنية ،، لما كان التحليل الموسيقي عند عمنا الآلاتي بالحَجز مقدماً :)

" المايسترو " دايماً كانت تفاصيل و فنيّات عَمَله مجهولة بالنسبة لي ،،
ربنا ينوَّر لك طريقك يا سيادة الرئيس ،،

أما ارجَع أقرا م الأول ،، حاكِم الموضوعَ ده عاوز تركيز :crazy:

وَرد عليكم :emrose:

غازي الضبع
20/05/2009, 13h33
مش باقول لكم الموضوع ده محظوظ

فل عليك يا عم كمال :emrose:

غازي الضبع
01/01/2011, 22h16
الله


ده الموضوع ده كان جميل قوي
:emrose:

الألآتى
02/01/2011, 00h09
الله



ده الموضوع ده كان جميل قوي

:emrose:


طيب شد حيلك .. وإفتح لنا كام موضوع زى ده .. خللى العالم تصحصح

محمود العيادى
04/01/2011, 17h52
العزيز الغالي غازي باشا الضبع .... كل سنه و انت طيب اولا .... ايه الجمال ده ياحبيبي موضوع تقيل و ثمين و المشاركه فيه علي اعلي مستوي ثقافي و علمي و اكاديمي و الافاده منه من ناس متخصصه زي سياده الرئيس اللي افحمني من تمكنه علميا من الرد عليك و علينا و الحقيقه انا عاوز اضيف الي المعلومه انه شرقيا عادة الالحان بتكون معمول لها بروفات و تكاد تكون محفوظه و المايسترو بيكون دوره هنا بالاشاره الي البدايه و سرعه وزمن الرتم و كذا الاعاده للجمل الموسيقيه و تحديد الصولوهات الموسيقيه .... و لكن لايصلح ذلك في الالحان الموزعه ... و ايضا هناك بعض الفرق يكون اقدم عازف او قائد الفرقه الذي يمكن القيام بالاشاره الي البدايه و النهايه و خلافه و هانروح بعيد ليه ام كلثوم في فرقتها كانت الاشاره من احمد الحفناوي و الماسيه من احمد فواد حسن ..... لكن انا عندي سؤال لسياده الرئيس ياريت يقرأ المشاركه بتاعتي و يجاوبنا هل اشارات و تشنجات و عصبيات سليم سحاب لها علاقه بالمايسترو . مره تاني زي ما قالك محمد الالاتي خليك لابد في الدره و كل شويه طلع لنا موضوع جميل زي كده ...

حسن كشك
05/01/2011, 10h21
تصدق ياابو فارس ....
وانا بأقرأ الموضوع ده من بدايته .... فرحت جداً بيه خاصة لما لقيت احبابنا الغايبين مشاركين فيه وقلت حلو والله الكل رجع تانى .... لكن اكتشفت ان الموضوع قديم للاسف وأنى ماقرأتهوش قبل كده وانهم مارجعوش ولا حاجه وخاصة كمال عبد الرحمن .... زعلت تانى .
على كل حال يابو فارس ... موضوع جميل واكاديمى اوى ... وفكرنا بالحبايب