رواية إش ـ 1919

[cooldoctor]

أولا : رواية إش
عرضت بعض ألحانها الموجودة عندي وهي
طقطوقة يابو الكشاكش - لحن البوابين - لحن السياس - لحن الفقية - لحن بائعة الورد
وهذه الرواية قدمتها فرقة نجيب الريحاني في الثالث عشر من يناير عام 1919 وهي من تأليف بديع خيري وألحان سيد درويش
ملخص الرواية
كشكش بك يفقد كل أمواله على مائدة القمار ويضطر إلى الإستدانة من أحد الخواجات - صورة الإستعمار - وعندما يعجز عن سداد دينه يلجأ إلى بيع أملاكه ولكن القدر ينجي كشكش من الإفلاس حينما تهبط عليه ثروة يرثها في اللحظة الحرجة.
وقد أفلس كثير من المصريين بنفس الطريقة في تلك الفترة إذ كان الواجة الجشع المرابي يقدم القروض بفوائد باهظة، وكان يجلس بجوار موائد القمار يتصيد ضحاياه فإذا ما عجز المصري عن تسديد ديونه استولى المرابي على أرضه وبمثل هذه الحيل استطاع اليونايون أن يستحوذوا على مساحات كبيرة من أجود الأراضي
ألحان الرواية 16 وهم بالترتيب
أهل الأموال ليه دايما سايقنها علينا - لحن لمامين السبارس والكتبة
ياخراب بيت أمك ياعطية - لحن الكتبة وأم عطية
تكايدني ليه يارد البدع - لحن العوالم والآلاتية والكتبة
اكتب ياسيدي في السطر الوسطاني - لحن عريضة الكتبة إلى الحربية
طقطوقة يابو الكشاكش كان جرالك إيه
هيليهالا - لحن البوابين أو الجوار في مصر
طقطوقة اوعى يمينك اوعى مشالك - لحن السيَّاس (البوتو)
طقطوقة احنا أفندم تجار العجم - لحن الأعجام
هنيئا للغة الفصحى - لحن الشعراء
اقرأياشيخ قفاعة - لحن الفقية
طقطوقة ياسلام يابنات على أنس الليله دي - لحن العمد وكشكش
نبين زين - لحن ضاربة الودع 1
استدياوليتو يامالاديتو - لحن ضاربة الودع 2
طقطوقة ياورد يافل ياياسمين - لحن بائعة الورد
كشكش جردوه - لحن كشكش في المزاد
نشيد يامصر يحميكي لأهلك - نشيد الختام

[cooldoctor]

طقطوقة يا بو الكشاكش لفتحيّه أحمد ونجيب الريحانى
الجميع: يا أبو الكشاكش كان جرى لك إيه يا هل ترى
دقنك شابت في المسخرة وأمور الفشخرة
بـــنت: قلبى انحرق يحرق قلبك
أموت في دي الأيمان حبك
يابابا امتى اكون جنبك
واهشكك و افرفشك وامزك واغمزك
الحق
لا لا لا
الحق
لا لا
وعمل لنفسي الكافية دية غير المسخرة
الجميع: يا أبو الكشاكش كان جرى لك إيه يا هل ترى
دقنك شابت في المسخرة وأمور الفشخرة
ماري : فداك يابية روحى وعنيا
صحة سعادتك بالدنيا
متع مزاجك بلا هرية
دي عزبتك فى جزمتك
أموت أنا فى عمتك
أيوه
دانا والنبى فى عرضك
دا الحب جوه قلبي
عامله ستين القنطرة
الجميع: يا أبو الكشاكش كان جرى لك إيه يا هل ترى
دقنك شابت في المسخرة وأمور الفشخرة
كشكش : حاتسخسخيني يامضروبة
ماكنت قلت ياواد نوبة
البنات: معلش من بعد النوبة
كشكش : الحسن دا مافيش كده
شايف داهو ماجولش نو
أيوه
حاقع
أيوه
دانا والنبي ف عرضك
الجميع: يا أبو الكشاكش كان جرى لك إيه يا هل ترى
دقنك شابت في المسخرة وأمور الفشخرة

طقطوقة يابو الكشاكش كان جرالك إيه
غناء نجيب الريحاني وفتحية أحمد
من رواية إش
تلحين سيد درويش
تأليف بديع خيري
مقام عجم

http://www.sama3y.net/forum/attachment.php?attachmentid=2797&d=1134376760

[cooldoctor]

هيليهالا - لحن البوابين أو الجوار في مصر

هليهاللا
هليهاللا قالت لي برامه يادنيا زفت ملعونه
الموده ابن ملعونه هيلانه جاريه زربونا
بلاوي جوكه مَسْكِندَه عجايب جوكه مَسْكَجِنا
هي هي هي هي هي
يادنجي دنجي بتهدمي تعالي يابكيته الطمي
أحيه عليه أحيه عليه م الغلب العيشة الزفت دي
أكالكادْوَه بلا زاره منا م الخازوق اللي شعوطنا
الهدمه اخص ع الهدمه جاب لنا الضرب بالصرمه
عشماوي اهلك اسيادنا ويُخرُبْ بيت اللي زعلنا
هي هي هي هي هي
سلام على أيام دُنْجُلا يارقص دلوكه من جلا
الله عليه الله عليه يرحم أيام الحظ النكتة دي
تجيه ضربة في عين اللي جابنا من السودان ع المصرو
المصرو أكله بالهمو ملوهية طظ في طعمو
اللَهمه ينعل أبو أمه الويكه دي مافيش زيو
هي هي هي هي هي
نجيبو بوظة ونشربي لذيذة هالص يادين النبي
الله عليه الله عليه أنا أحب الحاجة الحلوة دي

[cooldoctor]

لحن السيَّاس من رواية إش
اوعى يمينك اوعى شمالك اوعى الأزمة توقف حالك
اوعى وشك اوعى ضهرك اوعى فوقك اوعى تحتك
اوعى الكوكايين يلحس مخك اوعى سبق الخيل لايطسك
يمينك شمالك اوعى
ياللي ماشيه خطوه خطوه طالعه فيها عامله حلوه
غطي إيدك غطي رجلك غطي وشك غطي صدرك
إوعي تترقصي ف السكه إوعي تقولي لي ألا فرانكه
إوعي تتغمزي بعينيكي والناس ملمومين حواليكي
الراجل لو بصبص ليكي إيه ذنبه دا الحق عليكي
يمينك شمالك اوعى
ورده ورده ورده ورده يافندي حوده حوده
ياللا وسع بلاش زحمة
اسمع اسمع مني كلمة
إن كنت صحيح بدك تخدم مصر أم الدنيا وتتقدم
لا تقول نصراني ولا مسلم ولا يهودي ياشيخ اتعلم
اللي أوطانهم تجمعهم عمر الأديان ماتفرقهم
يمينك شمالك اوعى

لحن السيَّاس
غناء سيد درويش والمجموعة
من رواية إش
تلحين سيد درويش
تأليف بديع خيري
مقام جهاركاه
Song Ewaa Yemeenak Ewaa Shemalak
Singer Sayed Darwish
from the play Esh
Composer Sayed Darwish
Lyrics Badee'a Khairy
Maqam Gaharkah

[cooldoctor]

لحن الأعجام
الجميع:
احنا أفندم تجار الأعجام
حضرنا من شان جبنا بضاعة تمام
بيعوا أنتيكات بيعوا مقويات
بيعوا مفرفشات بيعوا منعنشات
حاجات محتاجات
من شان سواحين من شان سواحات
آمان
سجادة بساط عليه السلام
مافيش واردات من بلاد أعجام
مادام فيه حروبات سكات مقطوعات
مرزاخان مسكين كان يكسب ألوفات
دلوقت أفندم مش لاقي لقمات
مش لاقي هدمات
آمان
فيه عندي منزول يصطل عشرة يوم
إذا كانوا دقوا طبول مش يصحى م النوم
امسك حبة نشوق ضيع حميات
امنع عكوسات امنع تفليسات
يطلع لك عفريت بتاع الستات
في واحد ساعات
آمان
كشكش:
شيش بيش دوسة جهار محبوسة جلبهار
فلتوا العيار يابتوع مولد الفار
تطلعوا بالليل ولا بالنهار
لابسين لي طراطير مواجير ولا ازيار
حمص لب فشار جاتكم نايبة عشار
تيجي سبع تمتار
آمان
http://www.sama3y.net/forum/attachment.php?attachmentid=4523&d=1139960988

[cooldoctor]

لحن الفقيه لسيد درويش والمجموعة
اقرأ ياشيخ قفاعة

اقرأ ياشيخ قفاعة تلغراف آخر ساعة


اللي في جورنال البورص
وأنا أبقى أحلق ذقني إن ماكنتش ترقص
ترقص ترقص ترقص



الصبح صبح قلسطة والعيشة هتبقى قشطة


ياقساتذة قولم هش
ياقساتذة قولوا براوة دي الحرب خلاص فينيشٌ
فينيشٌ فينيشٌ فينيشٌ



بعد أكل التسقية والسلطة والطعمية


اللي بتهد الحيل
نرقع لنا اقتين ثلاثة من لحم الخيل ارقع
ارقع ارقع ارقع



ومادام الضاني غالي وكذلك العجالي


مش لازم ندقق
حصانا أو حمارا أوبغلا مش راح نعتق قبدا
قبدا قبدا قبدا



ياما بكرة حنبقى نقلّس ع التجار لما تفلس


وزي مانتفلق
يتفلقوا هما كمان واحنا نضحك هقهق
هقهق هقهق هقهق



يالا نقلوظوا العمة ألا مودا ونستحمى


بصفيحة كالونيا
ونسافر على أوروبا نتفرج ع الدنيا
دنيا دنيا دنيا



ستاتها قلماظية ماتقولش مهلبية


قبدا قبدا إيش جاب
قربت أسيح قربت أسخسخ قربت أتكهرب الحق
الحق الحق الحق



سيبك م الفقهنة خالص من بكره هتبقى لابس


بدل العمة كاسكيت



http://www.sama3y.net/forum/attachment.php?attachmentid=4647&d=1140279456 (http://www.sama3y.net/forum/attachment.php?attachmentid=4647&d=1140279456)

[cooldoctor]

لحن بائعة الورد من رواية إش بصوت سيد درويش وحياة صبري
يا ورد على فل وياسمين الله عليك يا تمر حنة
ياللي عاوج لي طربوشك فوق الجبين على سنجة عشرة
ماتحط لك حبة ياسمين في عروة الجاكتة رخره
قرب هنا تعالى عندنا
خد ورد يا بيه خد فُلة يا بيه
الورد لون صدر المرمر ياللي تميل قرب عليه
الورد لونه أبيض وأحمر الله عليه خد لك هديه
قرب هنا تعالى عندنا
خد ورد يا بيه خد فُلة يا بيه
خدلك هديه لحبيبتك م الورد دا زينة الجناين
تخليها تدوب في ريحتك وتبقى من ضمن الزباين
قرب هنا تعالى عندنا
خد ورد يا بيه خد فُلة يا بيه
وحياة أبوك لم تكسفني خد لك عودين دانا اسمي نرجس
والله ان ما كنت تنفعني لازعق وأقول راجل مفلس
قرب هنا تعالى عندنا
خد ورد يا بيه خد فُلة يا بيه
الورد ألوانه تبهج فوق الغصون وسط الجناين
والفل دا والبنفسج يفرح كمان قلب الحزاين
قرب هنا تعالى عندنا
خد ورد يا بيه خد فُلة يا بيه

لحن بائعة الورد
من رواية إش
غناء سيد درويش وحياة صبري
تلحين سيد درويش
كلمات بديع خيري
مقام عجم
Song Rose seller
from the play Esh
Singer Sayed Darwish feat. Hayat Sabry
Composer Sayed Darwish
Lyrics Badee

http://www.sama3y.net/forum/attachment.php?attachmentid=5504&d=1142027199 (http://www.sama3y.net/forum/attachment.php?attachmentid=5504&d=1142027199)

[Ahmed SM]

عزيزي (cooldoctor) لا اجد من الشكر كلمات نعبر عما اريد قوله لك عن المجهود الرائع الذي تقوم به في المنتدي وفي هذا الباب من كتابة كلمات الاغاني الذي استمتع به وبتقاصيل الروايات ولتسمح لي بان اضيف هذا الرد فقط حتي يكتمل الموضوع

لحن السيَّاس من رواية إش حسب الملف المرفوع من الاستاذ (راضي http://www.sama3y.net/forum/showthread.php?t=31421 ) كانت كلماتها كالاتي

اوعى يمينك اوعى شمالك اوعى الأزمة توقف حالك
اوعى وشك اوعى ضهرك اوعى فوقك اوعى تحتك
اوعي لجيبك من الحرامية اوعي لروحك من الحانويتة
اوعى الكوكايين يلحس مخك اوعى من الحصان لايطسك
اوعي للروماتيزم في رجلك اوعي الجوزة تطير عقلك

يمينك شمالك اوعى

ياللي ماشيه خطوه خطوه طالعه فيها عامله حلوه
غطي إيدك غطي رجلك غطي وشك غطي صدرك
إوعي تترقصي ف السكه إوعي تقولي لي ألا فرانكه
إوعي تتغمزي بعينيكي والناس ملمومين حواليكي
الراجل لو بصبص ليكي إيه ذنبه دا الحق عليكي

يمينك شمالك اوعى

ورده ورده ورده ورده يافندي حوده حوده
ياللا وسع بلاش زحمةاسمع اسمع مني كلمة
إن كنت صحيح بدك تخدم مصر أم الدنيا وتتقدم
لا تقول نصراني ولا مسلم ولا يهودي ياشيخ اتعلم
اللي أوطانهم تجمعهم عمر الأديان ماتفرقهم

يمينك شمالك اوعى