الفراشة [الأرشيف] - منتدى سماعي للطرب العربي الأصيل

مشاهدة النسخة كاملة : الفراشة

محمد محمدالعقاد

19/04/2009, 19h16

((الفراشــــة))

أنا روحي فراشة وهيمانة
ف رحاب النور
وكأنها ريشة ونشوانة
ف جناح عصفور
وبريق الضى مخليها تطوى المسافات
من غير جناحات طايرين بيها
بتعدي بحور
وصفاء النفس الشفافة
فوق أي قانون
وانا روحي دي نسمة وهفافة
تسبح ف الكون
هايمة ف ملكوت الرحمن
والكون ترنيمة وألحان
عاشقة وساعات يبقى العاشق
زى المجنون
من سجن الجسم الانسانى
فكت قيدها
وكأن النور الرباني
طالب إيدها
بتصلى صلاة الحرية
من بعد سنين العبودية
وتعود للنفس تذكيها وتطهرها
تغسل أوزارها توضيها من بحر النور
أنا روحي فراشة وهيمانة ف رحاب النور

شعر: محمد العقاد

د أنس البن

20/04/2009, 09h41

الشاعر الرقيق محمد العقاد
أهنيك على هذا النظم البديع الحالم الراقى المتمكن نظما ومعنى
ويا ريت نتعرف عليك أكتر من خلال أعمالك
أهلا بك فى سماعى

Tarek Elemary

20/04/2009, 12h40

أيها الشاعر الجميل محمد العقاد
أهلا بك و أهلا بهذا المستوى الرائع .... أنا قرأتها مرات و أخذتنى موسيقاها و تماسكها ومعناها و جرسها و أنت أبهرتنى بجد و لوكانت هذه المحاولة الأولى يبقى إحنا لازم نوَّسعلك الطريق لتذهب للصفوف الأولى!! أنا عن نفسى خدت جنب ...
فلا تبخل علينا يا صديقى بفيض موهبتك المتفجرة التى تصرخ من هذا النص

أنا روحي فراشة وهيمانة
ف رحاب النور
وكأنها ريشة ونشوانة
ف جناح عصفور
وبريق الضى مخليها تطوى المسافات
من غير جناحات طايرين بيها
بتعدي بحور
وصفاء النفس الشفافة
فوق أي قانون
وانا روحي دي نسمة وهفافة
تسبح ف الكون
هايمة ف ملكوت الرحمن
والكون ترنيمة وألحان
عاشقة وساعات يبقى العاشق
زى المجنون
من سجن الجسم الانسانى
فكت قيدها
وكأن النور الرباني
طالب إيدها
بتصلى صلاة الحرية
من بعد سنين العبودية
وتعود للنفس تذكيها وتطهرها
تغسل أوزارها توضيها من بحر النور
أنا روحي فراشة وهيمانة ف رحاب النور

هناك فقط لفظان كنت أود منك مراجعتهما
هفافة أفضلها (هفهافة) من يهفهف
تذكيها حتما تغيرها إلى (تزكيها) "أنت خير من زكاها" قرآن كريم
و تقبل منى أطيب المنى و أرق تحياتى

عفاف سليمان

20/04/2009, 16h18

الاستاذ محمد العقاد
بعد مساء الخير على حضرتك وعلى جميع اهل ومواطنى سماعى الجميل
جميل هذه المشاركه وإن كانت الاولى لحضرتك بيننا
فالينا بالمزيد من هذه الروحانيات الجميله
فوالله عند قرائتى لها احسست انى انا ايضا فراشه
محلقه فى سماء الله
ما اجمل هذه الروحانيات وهذه الصوروالابداعات
لك وللجميع خالص تحياتى
واوقات سعيده فى سماعى
اختكم عفاف:););)

الحازم

20/04/2009, 17h17

السيد محمد العقاد المحترم
تحية عربية
كلمات رقيقة ومعان حساسة انسالت من فيك العذب اللطيف
جعلت مني أعانق السماء وأرق إلى مستوى الغيوم محلقا من مكان إلى مكان وأنا أستمتع بالصور والاستعارات
التي تمكنت من كلماتك , شكرا لك عزيزي وعقبال القادم , لا تطول علينا ...

محمد محمدالعقاد

20/04/2009, 18h33

الاستاذ الفاضل /طارق العمرى
دمت بخير ولك منى أرق تحية وعظيم الامتنان كما أود أن أشكركم على حسن استقبالكم لأول عمل ينشر لى بمنتدى سماعى(الموقر)وهو قصيدة الفراشة.
وعفوا يا سيدى عن وجود خطأ فى الاملاء بالنص نظرا لأننى لم أراجع كتابته على الورد قبل ارساله للمنتدى حيث أننى وللحقيقة أقول لا أجيد الكتابة عليه والذى يقوم بالكتابة هو ابنتى الصغيرة مع أننى وكما ذكرتم سيادتكم فى هذه الملحوظة قد صغتها بنفس الكيفية على الورق لذا أرجوا أن تقبلوا هذا العذر
واقبلوا التحية
الشاعر/محمد العقاد

محمد محمدالعقاد

20/04/2009, 18h40

الشمعة

أول ربيع ما ابتدى وعلينا هل وبـــــــان

قيدنا شموع الفرح واتجمعوا الخـــــلان

والساعة ساعة رضا والحظ واعدنــــــا

ليلة ميلاد النبى نبض القلوب ألحــــــان

قيدنا شموع الفرح من شمعة منقــــــادة

عدى عليها الزمن وضياها بزيـــــــاده

ومهما طال الأجل ما ينطفى نورهــــــــا

جوه القلوب ضيها والحــــــــــب زواده

الشمعة قايدة ونورها ع الدوام باقـــــى

فاقت بنورها القمر والشمس والبـــــاقى

عدت حدود المكان والزمـــــان شاهـــــد

بأن نور النبى جوه القلـــــوب باقــــــى

الشمعة قايدة ونورها ضى ع السكــــــة

عمــــت بنورها الوجود مع إنها ف مكة

منقادة من نوره والدنيـــا بظهــــــــوره

عروسة ف الكوشة فرحــــانة بالشبكــة

الشمعة قايدة ونورها ف الفضا تسابـــيح

لا يوم طفاها المطر ولا يوم طواها الريح

واهى من ميلاد النبى والشمعة منقـــــادة

سبحة وسجادة ركعة ف صلاة تــراويح

الشمعة قايدة ونورها ف السما قنـــــاديل

تهدى قلوب البشر تمحى ظلام اللــــــــيل

والنور ستاير ومفرودة على الدنـــــــــيا

أنظر بعين الرضا تلاقى ألف دلــــــــــيل

أنظر بعين الرضا تلقى الوجود أفـــراح

والدنيا موكب هنا موكب صفا وسمــاح

من يوم ميلاد النبى ولحد آخر يـــــــوم

ذكراه ح تفضل كده بهجه وعبير فواح

شعر : محمد العقاد

Tarek Elemary

20/04/2009, 19h17

الله الله الله الله
أزف للمنتدى فوزه بصيد ثمين من العيار الثقيل
و الإسم على مسمى جينات العقاد ممتدة أخذت من إسمِك فيروس الإبداع فأهلا و سهلا بك إثراءا للمنتدى
لنا عودة أيها الشاعر الجميل مع العمل نفسه فمثل هذا الإبداع من السفه تناوله قبل تذوقه و الإستمتاع به أولاً
و تقبل منى أطيب المنى و أرق تحياتى

عفاف سليمان

20/04/2009, 19h27

الاستاذ محمد
والله انا حسيت من اول لقاء لك
الفراشه انك ستمتعنا بلقاءات نورانيه
روحانيه.....كما تقول تسبح فى سماء الكون
نور الهى عظيم ينور لنا الدنيا ليوم الدين
نور نبينا وحبيبنا سيدنا محمد سيد المرسلين
زدنا نورا وزدنا روحانيات فنحن فى حاجةٍ اليها
نفحات من الزمن الجميل
نفحات عن سيد الخلق اجمعين
ولك وللجميع خالص التحيه والاحترام
اختكم عفاف;)

محمد محمدالعقاد

21/04/2009, 19h11

الله يا طه الله

عاشق وقلبي صبح م العشق دايــــــب دوب
وحبيبى موال فرح يسعد بلحنه قلــــــــــوب
لا أنا أول العاشقين ولا كنت آخرهـــــــــــم
الكل عاشق محمد أكرم نبي ومحبــــــــوب

وف ذكرى خير الورى يحلى الكلام والقول
وكلامي مش ثرثرة لكن كلام معقــــــــــول
ومهوش كلام دروشة ولا كلام عـــــــــادى
ما تصلوا ع الهادي أعظم نبي ورســـــول

أحمد حمد ربنا زاده الكريم وعطــــــــــــاه
محمود ف أهل السما محمود ف أرض الله
مولود يتيم إنما اليتم كان حكمــــــــــــــــة
اليتم فجر ف قلبه رحمة وعز وجــــــــــاه

يا مكة ليكى الشرف يوم ما اتولد فيــــكى
مولود كريم النسب وبنوره يهديـــــــــــكى
نلتى الهنا والمنا يا سعد أيامــــــــــــــــــك
مسك الختام النبى عطر لياليــــــــــــــــكى

الجزع حن وبكى لما إعتلا المنـــــــــــــــبر
والصدر لما انشرح قلب النبى نـــــــــــــــور
رب العباد اكرمة من فوق سبع سمـــــــوات
قال في كتابة...........(إنا أعطيناك الكوثر)

وصانا بالمرحمة والبر والإحســـــــــــــــان
ف الصبر كان ملحمة للحب كان عنــــــوان
للكل كان مدرسة ويا ريتنا نتعــــــــــــــــــلم
ونعيش على سنته والذكر والقـــــــــــــــرآن

مبعوث لكل البشر رحمة وهداية ونــــــــــور
لا قلبه يوم كان حجر ولا كان ف يوم مغرور
يوم فتح مكة عفا عن كل أعدائــــــــــــــــــه
وكان في غاية الكرم مع إنه كان منصـور

الصدق كان منهجه من صغر سنه معــــــــاه
والحق كان مبدأه والعدل والمســـــــــــــاواه
الكل واحد بس الفرق ف التقــــــــــــــــــوى
تقوى القلوب مكرمه الله يا طــــــــــــــه الله

شعر:محمد العقاد

د أنس البن

21/04/2009, 21h07

الله عليك يا محمد يا عقاد يا شاعر .. الله
محلى كلامك على سيد الورى محلاه

Tarek Elemary

21/04/2009, 23h28

أهلا بك أيها الشاعر الجميل و عودٌ أحمد بمدح أحمد
هاتِ ما عندك و لا تدَّخر من شئ و الله ينوَّر على الأمورة اللى انت تاعبها معاك و يا ريت ده لا يؤثر على المذاكرة

الله يا طه الله

الجزع حن وبكى لما إعتلا المنـــــــــــــــبر
والصدر لما انشرح قلب النبى نـــــــــــــــور
رب العباد اكرمة من فوق سبع سمـــــــوات
قال في كتابة...........(إنا أعطيناك الكوثر)

الشطر الأخير مكسور الوزن ممكن تسمحلى أقترح تغييره إلى:
وهبه عظيم الخلق و النهر ليه كوثر
و يبقى المعنى وصل من غير كسر الوزن ((و إنك لعلى خلقٍ عظيم)) و ((إنَّا أعطيناك الكوثر))
ده بعد إذنك طبعا

عفاف سليمان

22/04/2009, 10h24

السلام عليكم ورحمة الله وبركاته
الاستاذ محمد العقاد
اشبعتنا روحانيه ربانيه عن سيد الخلق أجمعين
لك الف الف تحيه ولجميع الزائرين لك وللجميع
كل التقدير والاحترام
وزيدنا بمدحك لنور النبى الحبيب
اختكم عفاف;):)

محمد محمدالعقاد

22/04/2009, 18h27

الشاعر الرقيق/ طارق العمرى
دمت بخير أشكر لكم اهتمامكم برباعيات (الله يا طه الله) ورحم الله امرئ أهدى الى عيوبى فلك منى كل التقدير والاحترام ولا شك أن ما ابديتموه من تصحيح للبيت الرابع (قال فى كتابه.....انا أعطيناك الكوثر) بتلك الرباعية رقيق ومتسق مع المعنى العام للرباعية وهذا ينم عن احساسك المرهف وشاعريتك الفياضة .
إلا اننى قد وجدت لها ما يناسبها لتكون الرباعية كالآتى:
الجزع حن وبكى لما إعتلا المنبر
والصدر لما إنشرح قلب النبى نور
رب العباد أكرمه من فوق سبع سموات
ونال عظيم الشرف بسورة الكوثر
هذا ونرجوا منكم جاهدين أن يتم هذا التعديل بالنص على مسؤليتى الخاصة وكذا ماسبق لكم من ملاحظة فى نص الفراشة لما لكم من صلة وثيقة بأهل المنتدى إدارتا.واشرافا...الخ
وتقبل منى عظيم شكرى واحترامى
الشاعر محمد العقاد

محمد محمدالعقاد

25/04/2009, 11h00

((مصر المحروسة))

موال

تلت حروف مستحيل القلب ينســـــــــــــــــاهم

نسج القدر منهم اسمك وحلاهـــــــــــــــــــــــم

عشق اللسان نطقهم وشفايفى عشقـــــــــــاهم

منايا أفضل كدا عاشق حروف اسمـــــــــــــــك

ولاجل حسنك أعيش العمر ما اســـــــــــــلاهم

أغنية

ميت ألف بوسة وبوســـة *** على جبينك يا عروســــــة

يا ولاد مصر المحروســة *** هاتوا جاوى وبخروهــــا

الشمس عن يمينهـــــــــــا *** والقمر من جبينهــــــــــا

دين السماحة دينهـــــــــــا *** هاتوا جاوى وبخروهــــا

توب المحبة توبهـــــــــــا *** كحل العيون ترابهـــــــــا

هيمان قلبى ف دروبهـــا *** هاتوا جاوى وبخروهـــــا

العــــــزة والكرامـــــــــة *** فوق الجبين علامـــــــة

باقية ليوم القيامـــــــــــة *** هاتوا جاوى وبخروهـــا

شعر: محمد العقاد

محمد محمدالعقاد

25/04/2009, 11h05

((بكرة أحلى))
موال

قالوا شاعر قلت أيوة والكلام الحلـــو ذادى
قالوا عاشق قلت أيوة والغرام دوب فــؤادى
قالوا مين تبقى الحبيبة اللي قلبك مال اليهـا
لو بعيدة أو قريبة تلقى روحك بتناجيهــــــا
قلت بلدي الله عليها بكره يبقى أحلى بيهــا
أغنية

عاشقين يا ناس بكـــــــــرة *** عاشقينه بالفطـــــــــــرة
والعشق له قـــــــــــــــــدرة *** تحيى الأمل فينـــــــــــــا

طول م الأمل شـــــــــــجرة *** راح نقطف الثمـــــــــرة
صدق القلوب قمــــــــــــرة *** تضوي ف لياليــــــــــنا

طول م الايدين قــــــــادرة *** تنسج خيوط بكـــــــرة
ح نلاقى ميت فكــــــــــــرة *** تسبق خطاوينـــــــــــا

عاشقين ولا نـــــــــــدرى *** إيه اللي جاى بكـــــــرة
لكن على فـكــــــــــــــــرة *** العشق يكفيــــــــــــــــنا

شعر : محمد العقاد

Tarek Elemary

26/04/2009, 09h29

أستاذ محمد ... إنت راجل جميل و حساس و فنان و الطيبة بترقص بين حروفك
أنا مبسوط بتفاعلك و مشاركاتك و دايما فى إنتظار جديدك
الأغنية جميلة و الموال حلو لكن ليه مش بالطريقة المتعارف عليها للموال يعنى كان ممكن ينتهى بالقافية اللى بدأت بيها مثلا بس ده ما يقللش من تمكنك يا راجل يا عجوز
على فكرة أنا لست من طاقم المنتدى كما تخيلت حضرتك و ده شرف لو كان حقيقى لكن أنا يشرفنى التفاعل معك كمتذوق ليس إلا و أنا على رأى عمنا صلاح جاهين
أنا أحب أقول الشعر فى الحلوين
و الحلو أقولله يا حلو ف عيونه

محمد محمدالعقاد

26/04/2009, 16h18

إهداء :الي ساحة المنتدى

((مساء الفل))

موال

يا مجمعين الحروف فوق الســـطور معنى

يا مدويين القلم في كتــــابة الأشـــــــــــعار

من النهارده صبح فيه ساحة تجمعنـــــــــا

يخضر عود الأدب وتفتـــح الأزهــــــــــــار

أغنية

يا مسـاء الفل مسا الأنــوار**** بستان الفن طرح أزهـــــار

أشكال والوان وعبير فتـــان ****له سحر جنان ولغاه أسرار

يا مساء الفل على السمار

جمعنــــــــا الفـــــــن ورواده**** والحلم اتحقق ف ميعــــاده

شبكنا الايد والكل سعــــــــيد**** والعــــزم حديد بدأ المشوار

يا مساء الفل على السمار

جمعنا الفــن واصحابــــــــــه ****والليلة عايشين ف رحابــه

صحبه وأحباب وقلوبنا شباب**** وفتحنا الباب خدنا التيـــــار

يا مساء الفل على السمار

جمعنـــــا الفن بألوانـــــــــــه ****ف قلوبنا مكانه وعنوانـــه

لياليه أفراح وعبير فـــــــواح ****والفن براح رؤيا وأفكــــار

يا مساء الفل على السمار

شعر: محمد العقاد

محمد محمدالعقاد

26/04/2009, 16h21

إلى أطفال وشباب ورجال وشيوخ غزه إلى الثكالى من الأمهات والى ربوع غزه الحبيبة إلى كل صوت يعلو بالحق مستشرفا الغد المشرق
أهدى هذه الأغنية

صوت الحق

إعلا يا صوت الحـــق **** جلجل بقولـــة لأ

واصمد في وجه الريح

زلزل كيان الظلــــم **** قولها بملو الفـــم

وبرأي حر صريــح

ودع زمان الخـــوف **** وكفاية ضرب كـفوف

اصرخ بلأه وصيـــح

واثبت على المـــبدأ **** آن الآوان تنطـــــــــــق

والنطق عربي فصيــــــــح

ضـــى النهار شقشق **** عصـــافيره بتزقزق

عامله الغصون مراجيح

اعـــلا يا صوت الحق **** جلجل بقولــــة لأ

واصمد في وجه الريح

شعر: محمد العقاد

NAHID 76

28/04/2009, 16h13

بسم الله الرحمن الرحيم
الاستاذ محمد العقاد
جزيل الشكر على اهدائك الاغنيه لساحه المنتدى
والجمال كله فى معانى كلماتك
تحياتى

د أنس البن

28/04/2009, 18h57

د أنس البن

29/04/2009, 16h46

يا سلام على الصدق والجمال والتمكن
ما شاء الله
رائع يا أستاذ محمد يا عقاد
يا رب أكثر من هذه المواهب الحقيقيه وبارك فى أصحابها
وعافنا وارحمنا من غثاء السيل الذى ملأ الوادى

محمد محمدالعقاد

29/04/2009, 18h48

إهداء:إلي كل المجاهدين في فلسطين من أجل الحرية ومن أجل غد أفضل لهم مني هذه الكلمات

مش ح اسلم

مهما حاولتم ياســــــــادة **** تسلبوا منى الإرادة

مش ح اسلم

تلبسوا توب الأمانـــــــــة **** تنصبوا فخ الخيانــة

مش ح اسلم

تنزعوا منى الأمــــــــــان **** تقتلوا الحلم اللي كان

مش ح اسلم

شمس بكرة جايه جايـــه **** مهما طال الليل عليه

مش ح اسلم

شعر : محمد العقاد

محمد محمدالعقاد

29/04/2009, 19h26

تساؤلات طفل برئ في عيد الأم
أغنية

ليه بس النهارده **** بكروت المعايده
نهاديكي يا أمي؟
ليه بالذات ف مارس **** تحتفل المدارس
بعيدك يا أمي؟
مع إن الحكايه **** طول م انتي معايه
أيامك عيد يا أمي
المولى ف كتابه **** فاتح لينا بابه
بدعاكي يا أمي
ورسول السلامة **** وصى عليكى يامه
في حديثه يا أمي

شعر: محمد العقاد

د أنس البن

30/04/2009, 08h54

هذه الأيقونه للعزيمه والإراده والإصرار
ممكن يطلع منها لحن جميل جدا ..
تقريبا أنا متصور بناء الجمله اللحنيه ..
إنت فين يا سامى يا دربز يا فنان ؟....

سعدالشرقاوى

30/04/2009, 15h54

يامساء الفل على عيونك
والسحر الناطق فى جفونك
وكلامك شهد وم الاخر
بيعبر عن بهجت لونك
نرجو المزيد/سعدالشرقاوى

Sami Dorbez

01/05/2009, 00h21

الله عليك يا اخي محمد والله كلام في الصميم
;)

عفاف سليمان

02/05/2009, 16h05

السلام عليكم ورحمة الله وبركاته
الاستاذ محمد
كلمات جميله تنم عن احساسك الجميل
لاخواننا فى فلسطين
اللهم الهمهم الصبر
اللهم امين
كلمات لحنيه موسيقيه جميله
لك وللجميع خالص التحيه والتقدير
اختكم عفاف:emrose::cool: