زعيم التحفجية ، عمرو باشا [الأرشيف] - منتدى سماعي للطرب العربي الأصيل

مشاهدة النسخة كاملة : زعيم التحفجية ، عمرو باشا

abuzahda

11/01/2009, 03h57

http://img301.imageshack.us/img301/754/avatar20543451tw2.jpg

يا تحفجية

شوفولي الكينج "عمّورة"

أبو عين ذكية

معاه بنّورة مسحورة

عطانا صورة

وخبّا في الجراب صورة

برواز بقلبي ..
لصورته ، حافظ الصورة

نادولي "عمرو" ..

دا سِيد الفن و "التحفة"

والرُوح إليها تِجـِد السَعيْ

و بتِحفـَى

و القلب يترك مواجيعه ، ولوْ صدفة

رأى "تحفة" و شاف "صورة"

و التحفة خزّان اتملا لّتِمُّه بْوِدَاد
و الفن عايز "تحفجي" يتِمُّه بمعاد
و الفرْح تِمُّه لِعَند "عمرو" ، يارب عاد !
دا صعيدي عاد
و تَمْ البـِدْع في الصورة

أمَّا "المزاد" ، غزوة شطارة

يا تحفجية

لو "واحدة" راحت ، بُكره لازم

تحفة جاية

و "الحظ" ، شماعة الْخسارة
في القضية
و الحرب يحسمها "الجرس"
لو قال : تِري

و التحفة بتحب "الجدع"
و بتشتريه
تجري عليه
بتدلَّع و منصورة

أصل البلاد اللي ماتولد تحفجية
مكسورة
و اللي عيالها تحفجية
ما تنكِسِر
و الكَسْر عند التحفجي
راح ينجِبِر
ياجابر المكسور ياربي ننجبر

ولافيش هشاشة
و عمرو باشا ، نشوفه
و ناخد معاه صورة

فؤاد

11/01/2009, 07h57

يااااااااااااااااه
ليتني خُلقت شاعراً
كنت قلت في التوحفجي (عمرو )
أحلي وأجمل وأرق
وأعذب
كلام
لأبو
قلب
أرق
من فجر الياسامين
أخي وحبيبي
( عمرو )
:emrose::emrose::emrose::emrose:

Islam Eidrisha

11/01/2009, 08h26

الله ينور يا أستاذ سيد على هذه اللفتة الجميلة الذكية والعين الثاقبة
لو كل اللي في المنتدى شعرا وكتبوا في الأستاذ عمرو شعر برضو شوية عليه
مبروك عليك يا عمرو بك هذه الديباجة التي تستحقها
على فكرة يا أبو وجد
أنا اسمي إسلام بس بيدلعوني يقولولي يا عمرو :mdr::mdr:

أحمد شوبكى

11/01/2009, 09h14

والله ياعم سيد الواحد مش عارف الغلابة اللى زينا هيروحوا فين فى وسط الموهوبين أمثالكم ،، ( حضرتك وعمرو وسمعجى والآلاتى ،،، وغيره ، وغيره - ربنا يزيد ويبارك ) لكن بنقول زى ما ربنا أنعم عليكم بنعمة الموهبة فهو برضه لم ينسانا وأنعم علينا بنعمة معرفة حضراتكم ،،، ربنا يخليكم لينا وما يحرمناش من عطاء موهبتكم المتدفق

حبيب قلبى عمرو باشا ،،، يا بختك ياعم ،، ماشية معاك ( ده مش حسد ده قر بس :mdr:)

جرامافون

11/01/2009, 09h32

abuzahda

13/01/2009, 02h40

والنبي يا عم سيد ليه الزنقه دي ؟
وانا داخل اكتب مشاركة اتكعبلت واتلخفنت
ومش بس كده ده أنا تهتهت وكمان
تعطلت لغة الكلام ..(خالص)
شوف الظلم يا عم سيد
عملاق زيك وشاعر واديب وفيلسوف يمتلك
كل كنوز التعابير المتسبكة بصلصلة
مصرية خالصة مستوية علي وجيد فرن بلدي
.. ده غير
درر القول
وسبائك الحروف
واسرار التراكيب
كل القوة دي قدام الغلبان المحتاس التهتهان ده ــــــــــــــــ>
ده مش يبقي حرام يا عم سيد ؟
طيب حط نفسك مكاني
ايه العمل يا ربي ؟
اقول شكرا .. ماينفعش
ميرسي .. دمها تقيل
شوفلي صرفه يا عم
سيد الله يخليك

الغالي أوي ، عمرو
الحمدلله إنها عجبتك
و عجبت الغالين
إسلام و فؤاد و الشوبكي

* * *
* *
*
صدفة خدتني على "مذكرات مجنون" ، بدأت اكتب "القصيدة" من الصفحة التالتة ، تقريباً
تاني يوم اتصلت بصلاح وسمعتهاله ، جبر بخاطري و شجعني على رفعها
وانا بقرا "مذكرات مجنون" إفتكرت إقتراحك على صلاح بمنحي المواطنة ، وافتكرت ردودك على الموضعات اللي صلاح كان بيكرمني برفعها من فضله
حطيت كل ده جنب بعض ، وحمدت ربنا على نعمة خلقه لأمثالك يا عمرو
يعني ما الدنيا لسة بخير اهو
لسة فيه ناس بتفكر في غيرها (بالخير)
لسة فيه تحفجية ، شُغلتهم يدعبسوا عالجـَمال و ويطـْعِموا ،بيه،عيوننا
:emrose:
وانا بقرا "مذكرات مجنون" شفت كل التحفجية اللي قابلتهم في حياتي ، خليتني لفيت على الزمالك و البستان السعيد ، ماسبتش صالة . حتى الجاليريات بتاعة التقليد و الجديد. حتى بتوع العاديات و البردي و الفضيات.
ياراجل ده انت فكرتني بام السَّعد و ام الهنا في العجوزة.
وفضلت اخبط دماغي علشان افتكر بلد نواحي القناطر فيها شوية تحفجية شُطـّار.
:emrose:
واتخنقت من صاحبك اللي شاركك في كنز فاروق. اللي فرج عليه الناس (باين عليهم خرتية) و النبي ياعم عمرو لما اجيلك ماتعرفنيش عالراجل ده، أحسن انا عتابي نيلة خالص
:emrose:
فكرتني وانا دايخ (على مدار تسع سنوات) على حد يبروزلي "جايكوندا إيبسون" ياخلوْ بال اللي شغل بسمتها و سدل صوابعها (بإبرة وخيط)

وبعد ده كله تقوللي انا "زنقة" ؟ أمال اللي انا فيه ده إيه. ياراجل دا انا من عجزي بادارى في الشعر. هجيب منين كلام اعلق بيه على اللي انا شفته في مذكراتك يا "مجنون" ؟ ولاَّ علشان سعادتك "مجنون تحف" تقوم تجنني "أصلي"؟:crazy:

يااااا فخامته ، ظبَّط ملف الصوت ياصلاح
(الليلة كل محاسيب فخامتك ، اهو)

سيادة الرئيس

27/01/2009, 11h59

عمرو باشا حبيب الكل و حبيبي

تستاهل كل الماسات إللي نظمها حبيبي ( سيكا ) ( صائغ ) الكلام

يسلم إللي كتب و المكتوب له

غازي الضبع

27/01/2009, 12h37

من فرط جمال المكتوب والكاتب والمكتوب له
مش عارف أقول إيه ؟؟
تسلم لنا يا عم سيد يا جميل :emrose:
ويسلم لنا زعيم التحفجية عمرو بك :emrose:

abuzahda

27/01/2009, 13h21

عمرو باشا حبيب الكل و حبيبي

تستاهل كل الماسات إللي نظمها حبيبي ( سيكا ) ( صائغ ) الكلام

يسلم إللي كتب و المكتوب له

أفهم من كده
إن "الصوت"
عاجب "جلالة" فخامتك ؟

abuzahda

27/01/2009, 13h22

من فرط جمال المكتوب والكاتب والمكتوب له

مش عارف أقول إيه ؟؟
تسلم لنا يا عم سيد يا جميل :emrose:

ويسلم لنا زعيم التحفجية عمرو بك :emrose:

يكتمل الجمال ، بحضورك
يا عم غازي
يا جميل

فؤاد

27/01/2009, 15h51

من فرط جمال المكتوب والكاتب والمكتوب له

مش عارف أقول إيه ؟؟

آه .... يالمكتوب .... آه ياعيني ;)