أعمال أحمد فؤاد نجم

[MOHAMED ALY]

فى سبعينات القرن الماضى و عندما كنا طلبة فى المرحلة الجامعية ارتبط اسم نجم بالعديد من القصائد التى كانت ممنوعة . و يحضرنى الان قطعة كتبها نجم عن عبد الحليم حافظ و هو بلديات نجم و زميله الملجأ . اكتب الان من الذاكرة و لا يوجد عندى نص مكتوب فارجو التصحيح فى حالة الخطأ



لما ليمو الشخلوعة الدلوعة الكتــــــــكوت
الليلة هيتنهد و يغنى و يمـــــــــــــــــــوت
يشيلوه قال على لندن علشان جده هناك
من بعد ما يتلايم على دخل الشـــــــــــباك
و يهرب اموالك و يقول لك اهـــــــــــــــواك
يا شعب يا متلوع منتاش لاقى الـــــــــــقوت

[samirazek]

عندما تطاول احد شعراء السلطه على بيرم التونسى استلمه عمنا احمد فؤاد نجم وعلى غرارعبد الله النديم وقال فيه
الشاعر الأوكره

أنا الأديب لما أتكلم ما باخليشى

لأني جاهل
وفاجومي
ومخ مفيشي

وأي تغيير في حياتي

ميتعبنيشي

وأنا اللي قولي على

نولى


مش من بره

الله الله يابدوي

مش من بره

***

وأبدأ كلامي عن الأشعار

واللي زانوها

بيرم وخيرى

وكل الناس اللي صانوها

أما الكلاب عند الجواسيس

واللي خانوها

فدول كلاب

وماينذكروش

هنا بالمره


الله الله يابدوي

هنا بالمره

***

ياعم بيرم وحياتك

واللي أماتك

وخلا الناس مآبين

عايشيين على مقالاتك

وواد مباحث يتطاول

(احيانا كان الشيخ يغير ويقول قواد مباحث يتطاول)

على مقاماتك

لاجعل من الشعرا الأندال

مسخه وعبره

الله الله يابدوي

مسخه و عبره

***

فى كل مولد يامباحث

لفلفت حزام

ورقصت تبع المزيكة

وكنست مقام

وصاحبت كل الألاتية

ومشيت

خدام


لكل عالمة وشبشبها

حسب الأجرة

الله الله يابدوي

حسب الأجره

***

حرباية يابن الحرامية

مية المية

على كل لون جاهز تركب

ع التسقية

أما انت مالح ومزبط

وابن غبية

وحصانك اللي راهنت عليه

يخسر بكره

الله الله يابدوى

يخسر بكره

***

الطبل غير الشعر يا واد

ماتهبلشي

وأى شخص يكون شاعر

مايطبلشي

ياتقول كلامك
من جواك

يا متقبلشي

ملعون ابوك طالع نازل

شاعر أوكره

الله الله يابدوى

شاعر أوكره

والأوكره كما تعلمون هى مقبض الباب ولكنه يقصد بها هنا تلك الأوكره او الطفاشه التى يستخدمها اللصوص
كلام ابو النجوم هنا يصلح لكل الأزمان الرديئه ... ويسرى على كل مستكتبى السلطه شعراء كانوا او صحفجيه الا ليت من يعتبر
***
بعد التعديل

[عصمت النمر]

مصر تانى
قصيدة لم تنشرمن قبل ولم يشمله اى ديوان لنجم
بخط يده
وهذا سبق لمنتدانا
******
مصر تانى
*
ياواد يامرمر
يامرمرانى
اخضر خضرضر
واخضرانى
ياشمع مصرك
فى بهو قصرى
احب مصرك
تحب مصرى
نعشق فترشق
ف القلب حبة
نسقيها حبة
تطرح محبة
نسقيها تانى
ياقلبى يانى
يازهر نادى
آدى انت وادى
تشرب حبابة
تعطش صبابة
دا حب غابة
ياقلبى يابا
احلم وخضر
والصبح بدر
تشرب نداها
تسرح مداها
شجر اغانى
ياقلبى يانى
ياما انت رايق
والحب سايق
عليك دلاله
الحب ماله
حلق حرامه
على حلاله
مين فينا حاله
حلال زلاله
ومين مرافق
ومين منافق
ومين بقلبه
ومين بماله
الحب ماله
ياحبابينه
اختل شرعة
وانسب دينه
آهين يابلبل
يابو البلابل
انفض جناحك
والصبح قابل
حتلاقى بكرة
وبعد بكرة
نوارة تطرح
شجر شجرجر
ع الارض جرجر
ع البحر مكسى
وتلاقى تاكسى
وتلاقى مسرح
فى كل مطرح
وتقول يابابا
وتقول ياماما
ويحكى ان
وكان وياما
وتبقى سيرة
ونبقى ذكرى
عشان دا كله
بنحب بكره
ونعيش قبل الهنا بثوانى
مع ان بكرة
له
مصر تانى
ياقلبى يانى
*
نجم
23/3/1984

[gamalsidki]

أنا أيضأ من عشاق نجم .. وأرى أنه من أنجب شعراء العامية المصرية على مر تاريخها. ورغم حبى لكثير من شعراء العامية المصرية قدماء ومحدثون إلا أن لنجم موقع خاص فى القلب لأسباب كثيرة منها أنه يحتفظ فى شعره بسخرية مصرية الطابع تماماً عى اللغة والتركيب والمفارقة.. فيها الضحك والمرارة فى آن. ورغم أن كثيرون من شعراء العامية المصرية عظماء فعلاً ( فؤاد حداد ، جاهين ، سيد حجاب ، بتاع الملوحة ، نجيب شهاب الدين ، محمود الطويل .. إلخ ) إلا أن لنجم طابع خاص .. طابع لا نجده سوى لدى بديع وبيرم ونجم .

لن أرغى كثيراً رغم أن ذكر نجم يذكرنى بالمثل اللبنانى الشهير : سيرة وانفتحت !! أى أننى قد أظل أرغى تلاتة أيام متواصلة. فلنؤجل الكلام الآن وإسمحوا لى أن أشكر الأستاذ النمر على القصيدة المجهولة تلك .. فرغم أنى من حفظة نجم لم أسمع عنها قبل الآن فشكراً جزيلاً له وبهذه المناسبة إسمحوا أن أهديكم فصيدة نجم التى كتبها فى حرب لبنان الأخيرة فقد يكون البعض لم يسمع بها ..
جمال صدقى .. والقصيدة آهى

جنوب لبنان


إلى الخضرة ...
عيون الأهل والأوطان
وعفوا
عن سبب جهلي
تمام الإسم والعنوان
وعفوا
كوني أتشرف
باني اليوم اراسلكم
ولا أنزل منازلكم
أنا إنسان بسيط
مجهول
ماليش في الهيئه شان وكيان
لانا دكتور من الجامعه
ولا شاعر
ولا فنان
ولا محسوب من المحاسيب
ولا باتحط في الإعلان
ولا عالم
ولا عالمه
بتطلع صوري في الجرنان
أدينا في العذاب صحبه
وفوق نفس الطريق
سايرين
ومهما تبعد الصحبه
أكيد واصلين
ومتقابلين

أخويا زناتي
كان منكم
ويتكلم كتير عنكم
حكى لنا زمان
" وكان موجود "
عن الزعتر
وعن مسعود
وعن سلمان
وعن سلمي
حكاوي تشيب المولود
وعن عبله
وعبير الورد
وعن عنتر
هزيل العود
وعن إنسان
يبات إنسان
ويصبح في الصباح
طوربيد
زناتي يجز على نابه
وهو بيحكي لصحابه
ولاد الكلب دول يا ولاد
مناظر
إنما أوغاد
نهار مالمو لمتهم
برمتهم
ورمتهم
وعبوا الغدر ف سلاحهم
وسنوا سنان خيانتهم
نهارها الجو كان إسود
سواد بصفار
وجوف الأرض بيطلع
خراب ودمار
وكان يوم القيامه صحيح
على الأطفال
وع المجاريح
وكان برضك نهار أغبر
على الأندال
وعكس الريح
لأن الشهدا م الثوار
لاولوا الضهر
والأدبار
ولا خانوا الحمي والدار
عاشوا كبار
وماتوا كبار
وفوق الخد بسمتهم
دي الحاجه إللي كادتهم
ويسكت لحظة يتأمل
ويرجع تاني ويكمل
ولاد الكلب آخ منهم
يبيعوا بالدولار دينهم
ولاد الكلاب آخ منهم
حييجي اليوم وأحاكمهم
وراح مسكين
فىذات مره
ما نالش مرامه بالمره
زناتي الباقيه في حياتكم
خدوه لارناكا
مات بره
خدوه ازاي
ومات ازاي
أهم قالوا انه كان رايح
يدافع عن شرف بلده
زناتي
إللي اتولد مظلوم
وعاش محروم هنا ف بلده
خدوه قبرص عشان رايح
يدافع عن شرف بلده
ومهما نقول
ومهما نعيد
حنفتل
والسلب حيزيد
خلاصة القول ومعنى القصه والموال
سلامى للجميع واجب
نسا ورجال
خنادقكم
بنادقكم
وبرضه عشمنا فى الأتي
وهلبت القريب آتي
أخوكم فى الكفاح والهم
وبكره
فى السلاح والدم

حمد فؤاد نجم

[MOHAMED ALY]

البتاع


يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !

وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول

وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول

[Sami Dorbez]

ورقة من ملف القضية

إنت شيوعي
أنا مصراوي
إنتو مصايب إنتو بلاوي
ممكن أعرف مين الأول بيكلمني
إحنا نيابة أمن الدولة
دول مين
دولة مصر
مصر العشه ولا القصر
أيوه حنبدي ندور ونلف حاجه تنرفز خالص
إف
مالك ... شايل طاجن خالك
لم لسانك ما تخرفش
أنا ما اقصدش اهانتك طبعا
أيوه استعبط
لاما اعرفش
إيه رأيك في سفارة كوريا
إيه رأيك في قضية مصر
مصر ف وحده
هى وسوريا وليبيا ولازم ييجي النصر
ييجي منين وازاى ولمين
آدى كلام الشيوعيين
أنا من حقي
حق ف عينك
أنا بتكلم بيني وبينك
يعني كلام بره التحقيق
إذا كانش يسبب لك ضيق
طيب قول
مين مسئول ؟
مين مسئول عن إيه يا إخينا
ع إللي جرى لنا ف غزه وسينا
أنت شيوعي أكيد وطاوعني
فض دمغك من دي قضيه شعبنا جاهل
مهما تقول له
مش حيآمن بالشيوعية
ما الشيوعية فى فيتنام
إيه رأيك فيهم يا همام
مش بطال مش بطال
لكن إحنا .. ورانا عيال
طب ما نحارب لجل عيالنا
يطلعوا أسعد من أجيالنا
إنت الظاهر مخك فاضي
وحتتعبني معاك ع الفاضي
وأنا بحبحت معاك بكفايه
إبقي اتفلسف عند القاضي
هى قضيه ؟
لأ ملوخية
أمال فاهم إيه آمال هى الدولة دى لعب عيال
ممكن أعرف أنا هنا ليه
أيوة حتعرف
أمال إيه
يوم خمسه وعشرين الماضي
إيه مشاك عند التحرير
تحرير إيه يا جناب القاضي
أنا مش فاضي
بكره تصير
بطل غلبه وجاوب دوغري
أنا غلباوي كده من صغري
كل الشيوعيين أمثالك
آخر غلبه وقله ذوق يحصل إيه لو تمشي ف حالك
فاكر نفسك مين
ما تفوق
لو راح افوق
مش من مصلحتك
أنا معجب جدا بصراحتك
إيه رأيك فى حكايه الطلبه
حاجه عظيمه بشرة خير
إنت دماغك ينفع جزمه
وانت لسانك ينفع سير
إخرس قطع لسانك سافل
كتر خيرك
مخك قافل
مين وداك بقي عند الطلبه رايح ضمن المندسين
رحت أناقشهم واسمع منهم
تسمع منهم إيه يا سي طين
دول عايزين الدنيا تولع علشان أصلا
مش فاهمين
هى الحرب يا عالم لعبه
دى بتتكلف بالملايين
وأنت حتدفع إيه من جيبك
امال ح ادفع من جيب مين
إنت حمار وخدوك فى مشمك رحت هناك زى الباقيين
عاملين لجنه
وقال وطنيه
مش ممكن دول وطنيين
وجماعة أنصار الثورة
وفلسطين وهباب الطين
ما نخلينا يا سيدي في حالنا
مالنا ومال الفدائين
هو إحنا اللي نهبنا بلدهم
دول عالم صيع فاقدين
قتلوا الراجل عند الشيراتون
وإحنا إللي طلعنا القاتلين
وصفي التل دا كلب وخاين
اهو كل العالم خاينين
واحد صاحبي مراته مرافقه
وهو مرافق
ييجي عشرين
أمريكا بتزعل وبتحرن
هو إحنا يا عالم ناقصين
مش نستعبر
م إللي جرالنا
ونعيش بقي زى العايشين
دي عيال عملا للشيوعيه
وإحنا عدو الشيوعيين
ورق دمك بس يا بيه
مين مساعدكو بقالكو سنين
بيساعدونا صحيح يا سي بعجر
علشان أصلا مش فاهمين
إحنا حيلتنا منين نديهم
ونسددهم بالملايين
يمكن يعني قضيه مبدا
مبدا مين وزكايب مين
هي دى عالم تعرف مبدا
دولا باقول لك
ناس مجانين
اخترعولنا السد العالي
علشان نبقي اشتراكيين
إشتراكيه هناك ف بلدهم
وإحنا ف دارنا
نعيش حرين
عايزين الفلاح الجاهل
يتساوى بالمحترامين
وكمان قال
تحديد ملكيه
أبو ألفين
يدوه خمسين
شغل ملاحده وعالم كفره
ومخالفين أحكام الدين
والعمال رخرين اسم الله
فاهمين روحهم
بني آدمين
ناس عايزين الحرق بولعه
دا كله من الشيوعيين
نشروا لنا الأفكار السوده
أولاد الكلب الملاعين
مين وداك بقي عند الطلبه
انطق قول
اتكلم مين
هما إيه مطالبهم ؟
انت حتستجوبني يا شاطر
لأمش قصدى
بس أنا باسأل
كانوا طالبين كراريس ومساطر
ولا مطالب ميه الميه
كل الشعب مآمن بيها
دول طالبين حرب وشعبيه
مين مجنون بقي
حيمشيها
عايزين يدوا الرتش سلاح
عشان تحصل فيها مجازر
أنا لو أشوف حلوف فلاح
شايل شومه
لازم اهاجر
لازم بينه وبينك دم
دم ف عينك
هس اتلم
ثم نحارب ليه
وبايه
بسلاح ما يموتش بعوضه
ورق دمك بس يا بيه
الحرب ضروره ومفروضه
واهو نفس سلاحنا المظلوم
في فيتنام دابح أمريكا
دى طبيعه أرض يا بني آدم
بطلوا بقي كدب وبولوتيكا
طب ما الهند بنفس سلاحنا
فى باكستان
بعزقت الغرب
رأيك يعني ضروري ان إحنا
وحتما يعني نخش الحرب
طيب
حاضر
فين المخبر
حتغير رأيك
بالضرب

[Sami Dorbez]

حلا ويللا

حلاويلا يا حلاويلا .. يا خسارة يا حول الله

الثوري النوري الكلمنجي .. هلاب الدين الشفطنجي
قاعد في الصف الاكلنجي ... شكلاطة و كاراميلا ..

يتمركس بعض الايام ... يتمسلم بعض الايام
و يصاحب كل الحكام .. و بسطعشر ملة ..

حلاويلا يا حلاويلا .. يا خسارة يا حول الله

يا حلاولو لو شفتو زمان .. مهموم بقضايا الانسان
بيتكتك لتقول بركان .. و لا بوتجاز و لا حلة ..

حلاويلا يا حلاويلا .. يا خسارة يا حول الله

اش حالك يا قريبي اليوم .. واش جاب التفاح للدوم
و اش جاب الأوضه ببدروم ... للعربية و فيلا

حلاويلا يا حلاويلا .. يا خسارة يا حول الله

جرانين و مسارح و ادارة .. و معلق طلبة و زمارة
يسلك اهو بيزمر .. يعطل يجيبوا المنافيلا

حلاويلا يا حلاويلا .. يا خسارة يا حول الله

وا ترستق هلاب الدين .. بقى عاقل جداً و رزين
و ياعيني علينا يامجانين .. عشنا و متـنا بعلة

حلاويلا يا حلاويلا .. يا خسارة يا حول الله

[Sami Dorbez]

لا صوت يعلو فوق صوت المعركة

علشان لا حباب
وصاحبها
واحد نصاب
دا معلم
أبدا كداب
وبيكسب
من غير أسباب
والصحبة
خنازير وكلاب
وأنا وأنت
نطلع م الباب
سلام يا جدع
لا صوت يعلو فوق صوت المعركة
كل الجهود كل الزنود للمعركة
ألحان جنان تعزف نشيد المعركة
وكمان لجان عشان عيون المعركة
سلام يا واد للست معمع معركة
وكمان سلام لأهل بيت المعركة
سندات جهاد جداد عشان المعركة
لازمن جميع الناس يساعدوا المعركة
طبعا جميع الناس يساعدوا المعركة
مخلوق مفيش إن لم يعيش للمعركة
واموت قتيل ولا فيش بديل للمعركة
حاكم ضروري وإن حتماً معركة
طبعا ضروري وإن حتما معركه
سلام علشان لأن حتما معركة
خطاب خطير يشرح مصير المعركة
عشرين خطاب كمان عشان المعركة
جندنا جيش مليون عشان المعركة
جندتوا ديشيلون عشان المعركة
وخبزنا عيش اسود عشان المعركة
وأكلنا عيش اسود بلون المعركة
الشعب جاع الشعب صاع دي معركة
نجوع نصوع راضيين عشان المعركة
إذ إن بن تن ترن المعركة
هرشت مخي هي فين المعركة
إخرس يا واد واهتف لتحيا المعركة
أهتف لإية مش لما اشوف المعركة
إمسك بوليس جاسوس خسيس
ما سمعتناش بنقول ياتيس
لا صوت يعلو فوق صوت المعركة
إهتف يا واد لا صوت يعلو
هي فين المعركة
اهتف يا واد لا عوت يصلو
هي عين المفركة
يا همبكا في البمبكا
علي بمبكا في الهمبكة

[Sami Dorbez]

الفوازير


شاعر بيتخن من بوزه
ممكن تخوف به عيالك
نازل يقزقز أزا أوزو
حتتك يمينك وشمالك
بقي مليونير
واللي يعوزه
يلقاه في إيده
عقبالك
وخلي بالك من زوزو
وخلي زوزو من بالك

***
يا ولية عيب اختشي
ياشبة إيد الهون
دانتي اللي زيك مشي
يامرضعة قلاوون
مدحتي عشرين ملك
وميت وزير ورئيس
مروان
وعبد الملك
والمفتري
وعتريس
بتغني بالزمبلك ؟
ولا انتي صوت إبليس
من أول المبتدأ
حتي نهاية الكون؟
***
اللورد بن اللورد بن اللورد
ابن اللورد
متأصل في الثروة
لا أونا سيس
ولا فورد
حيطبق بسلامته
قوانين لا شتراكيه
ويدافع (( من عشمه ))

عن صوت الحريه
واهي كوسه
علي باميا
علي قرع استامبوللي
بتفرع يا بلدنا
علي وش التسقيه

***
سكرتير عموم مصر
وافهم كلامي
تعدد مناصبه
ولا تنتهيش
وجيه بالوراثه
وجاهل عصامي
جمع جهل طايل
وإيه ؟
من مفيش
وكان أصله ظابط
وحول حرامي
ويكتب أدب
بس ما يتقريش

***
لماليمو الشخلوعه
الدلوعه الكتكوت
الليله حيتنهد
ويغني ويموت
يشيلوه قال علي لندن
علشان جده هناك
من بعد ما يتلايم
علي دخل الشباك
ويهرب أموالك
ويقولك أهواك
يا شعب يا متلوع
ع الهدمة وع القوت

***
ينسونه المتبعتر
ما لقاش أب يلمه
إبن امه
بس امه كانت اجدع من أمه
باع نفسه بخسارة
ما قابلش المعايرجي
كان مالك أفكاره
واتعين تفكيرجي
والحاجه اللي تحير
طب إيه اللي اتغير
كان كاتب سرايرجي
واتحول شماشرجي

***
يكون في عون الصحافه
الله يكون في العون
لمالك يا دود القرافة
يا رمه يا ملعون
ينهش لحوم الفرايس
في الضلمه
يا وطواط
والكلمه عندك بضاعة
أما الشرف مطاط
بريئه منك بلدنا
مسلمين واقباط
ولا انت موسي
ولا انت
من كلاب فرعون
***
مجاول وشاعر
وبياع ملوحه
وتاجر غناوي
وسمسار بنات
نعيمه وزكيه وعطيات وتوحه
ومخبر مودك
علي التجريرات
حضر من بلدهم
بمقطف ملوحه
جبر
واشتراله
تلات تاكسيهات
يتوب علي دي البلد
منك وأمثالك
ما عدش لينا جلد
علي سو أفعالك
الفن للمعركه
عبيته في البلا ليص
وصحافة المعركه
في الكدب والتهجيص
ومليت طريق الهرم
يا عرص
بالتعريص
ما دام ما فيش للهرم
صاحب
هنيا لك
***
لأن الصراحه ف بلدنا قليله
بفضل المباحث
وأدب الرموز
جعلها اللئيم ابن بنت اللئيمه
شعار يرمي تحته السموم كيف يعوز
وبهدل اصول
الصراحة العظيمه
وخلا الندوب
في الحقايق
يزور
وحرم وحلل
وكتر وقلل
وسمى القبيله الذليله
حليمه
وقال ع السكوت ع الهزيمه
يجوز ؟

[Sami Dorbez]

هلا بالحب

هلا بالحب يا لمه هلا به
يصبي القلب
ويخليه صبابه
يدوس ع الشوك
ويوصل للآماني
ونرجع للهوي بعد المتاهه
هلا بالحب يا لمه سفاين
عليها الحنه من خضر الجناين
تجوب البحر وتطوف ع المواين
تلم الشمل
ويزيدوا الصحابه
هلا بالحب يا لمه حمامه
تشيل الشوق
على جناح السلامه
وترسم للهوي
مليون علامه
فى ضي النجمه
وف طي السحابه
هلا بالحب يالمه سواقي
تصب الغنوه
تسرح فى المساقي
أدوق واسقي حبيبي
واللى باقي
يكفى اللمه
ويفيض ع الصحابه
هلا يالحب يا لمه يحبينا
يزود حينا
أنور وزينه
هلا بالحب يجرحنا يداوينا
ونرجع للهوي
بعد المتابه

[Sami Dorbez]

بيرم



يابحور هايجين مايجين

ماشيين في طريقك دايما

وح نفضل كده ماشيين

ع الدرب اللي انت سلكته

بالليل والناس نايمين

وان كنا نقول ونزود

ونجود في المضامين

بيكون الفضل لبيرم

أسس واحنا الطالعين

وح نرجع تاني نغني

ونقول ويا الملايين

يا بهيه وخبرينا .. ع اللي جتل ياسين

[Sami Dorbez]

الفول وا للحمة

عن موضوع الفول واللحمة صرح مصدر قال مسئول

ان الطب اتقدم جدا والدكتور محسن بيقول

ان الشعب المصري خصوصا من مصلحته يقرش فول

حيث الفول المصري عموما يجعل من بني ادم غول

تأكل فخده في ربع زكيبه والدكتور محسن مسئول

يديك طاقة وقوة عجيبة تسمن جدا تبقى مهول

ثم اضاف الدكتور محسن ان اللحمه دي سم أكيد

بتزود أوجاع المعدة وتعود على طولة الايد

وتنيم بني ادم وتفرقع منه المواعيد

واللي بياكلوا اللحمة عموما حيخشوا جهنم تأبيد

يادكتور محسن يامزقلط يامصدر ياغير مسئول

حيث ان انتو عقول العالم والعالم محتاج لعقول

مارأى جنابك وجنابهم فيه واحد مجنون بيقول

احنا سيبونا نموت باللحمة وانتو تعيشوا وتاكلوا الفول

مارأيك ياكابتن محسن مش بالذمة كلام معقول

[Sami Dorbez]

اسكندرية


يا اسكندريه
بحرك عجايب
ياريت ينوبني م الحب نايب
تحدفني موجه
على صدر موجه
والبحرهوجه
والصيد مطايب
أغسل هدومي
وأنشر همومي
على شمسه طالعه
وأنا فيها دايب
كأني فلاح في جيش عرابي
مات ع الطوابي
وراح في بحرك
كأني نسمه فوق الروابي
م البحر جايه
تغرق في سحرك
كأني كلمه من عقل بيرم
كأني غنوه من قلب سيد
كأني جوا المظاهره طالب
هتف باسمك
ومات معيد
كأني صوت النديم
في ليلك
بيصحي ناسك
يشدوا حيلك
كأني طوبه من بيت في حاره
كأني دمعه
في عيون سهارى
كأني نجمه فوق الفناره
تهدي الحيارى
والبدر غايب
يا اسكندريه
يامصراويه
على سن باسم
على ضحكه هاله
البحر
شباك ومشربيه
وانتي الاميره
ع الدنيا طاله
يا اسكندريه عاشق
وبدوي
ارتاح في حضنك
والود ودي
يكون كلامي
عربون غرامي
وبالمحبه
ناخد وندي
يا اسكندريه فيكي الغلابه
ع الرزق يسعوا ولايناموش
صبح صباحهم
رجع مساهم
وزاد شقاهم
ومارتاحوش
يا عيني ع اللي الزمان تعبهم
وضاع تعبهم
ومالتقوش
نزل شبكهم
في بحر طامي
طلع شبكهم
على فاشوش
وفيكي بين البشر
ديابه
وفيكي فوق البشر
وحوش
وفيكي ناس مغرمين صبابه
لو خان زمانهم
مابيخونوش
وفيكي خمري
سلمت امري
ما اقدرش اشوفه
وما انيلوش
سمك يا بني يا اسكندراني
في العشق واحد
مالكش تاني
سمك يابني يا اسكندراني
في الحسن ساحر ومعجباني
سمك يابني
والعشـق غيه
تبدأ بنظره
تبقى ملاغيه
وكل عاشق وله بهيه
وكل شاعر وله اغاني
وأنا اللي عشق الصبايا كاري
أعشق وأغني ما اقدرش اداري
واي نظره بتجيب قراري
وايشحال عيونك
يا الاسمراني

[Sami Dorbez]

هما مين و احنا مين

هما مين واحنا مين
هما الأمرا والسلاطين
هما المال والحكم معاهم
واحنا الفقرا المحكومين
حزر فزر شغل مخك
شوف مين فينا بيحكم مين
احنا مين وهما مين
احنا الفعلا البنايين
احنا السنة واحنا الفرض
احنا الناس
بالطول والعرض
من عافيتنا تقوم الارض
وعرقتنا يخضر بساتين
حزر فزر شغل مخك
شوف مين فينا
بيخدم مين
هما مين واحنا مين
هما الامرا والسلاطين
هما الفيلا والعربيه
والنساوين المتنقيه
حيوانات استهلاكيه
شغلتهم حشو المصارين
حزر فزر شغل مخك
شوف مينا فين بياكل مين
احنا مين وهما مين
احنا قرنفل على ياسمين
احنا الحرب حطبها ونارها
واحنا الجيش اللي يحررها
واحنا الشهدا ف كل مدراها
منتصرين او منكسرين
حزر فزر شغل مخك
شوف مين فينا بيقتل مين
هما مين واحنا مين
هما الامرا والسلاطين
هما مناظر بالمزيكه
والزفة وشغل البولوتيكا
ودماغهم طبعا استيكه
بس البركه في النياشين
حزر فزر شغل مخك
شوف مين فينا
بيخدع مين
هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعة ف اوضه
هما بياكلوا حمام وفراخ
واحنا الفول
دوخنا وداخ
هما بيمشوا بطيارات
واحنا نموت
بالاوتوبيسات
هما حياتهم بمبي جميله
هما فصيله واحنا فصيله
حادي يا بادي يا عبد الهادي
ياللي عليك قصد الغنوا دي
لما الشعب يقوم وينادي
يا احنا ياهما في الدنيا دي
حزر فزر شغل مخك
شوف مين فينا
حيغلب مين

[Sami Dorbez]

انا اتوب عن حبك ؟


أنا اتوب عن حبك أنا ؟
أنا لي ف بعدك هنا ؟
دنا بترجاك
الله يجازيك
يا شاغلني معاك
وشاغلني عليك
وان غبت سنه
أنا برضه أنا
لا اقدر أنساك
ولا لي غنا
ولا اتوب
عن حبك أنا
زي ما يحلالك
زي هواك
سهرني عليك
سهرني معاك
دنا عمري ما اخاف من هجرك يوم
ولا قلبي بيفرح ونا وياك
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا اقدر أنساك
ولا لي غنا
ولا اتوب عن حبك انا
أنا لا اتمنيت
ولا قلت يا ريت
ولا بعدك عني
جعلني سليت
دنا كل منايا أدوق اللوم
ويقولوا علي الناس
حبيت
وان كان أمل العشاق القرب
وأنا أملي ف حبك
هو الحب
وان غبت سنه
أنا برضه أنا
لا أقدر أنساك
ولا لي غنا
ولا اتوب عن حبك أنا
تخاصمني كتير
نصالحني كتير
كل دا يا حبيبي ما لوش تأثير
توصلني سنين
تهجرني سنين
ما تغيرنيش
دنا حبي كبير
وان كان أمل العشاق القرب
أنا أملي في حبك
هو الحب
وان غبت سنه
أنا برضه أنا
لا اقدر انساك
ولا لي غنا
ولا اتوب
عن حبك أنا

[Sami Dorbez]

اصحي يا مصر

اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
***
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر
***
اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر
***
واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر

[Sami Dorbez]

شيد قصورك

شيد قصورك ع المزارع
من كدنا وعمل إدينا
والخمارات جنب المصانع
والسجن مطرح الجنينه
واطلق كلابك
في الشوارع
واقفل زنازينك
علينا
وقل نومنا في المضاجع
ادي احنا
نمنا ما اشتهينا
واتقل علينا بالمواجع
احنا اتوجعنا
واكتفينا
وعرفنا
مين سبب جراحنا
وعرفنا روحنا
والتقينا
عمال وفلاحين
وطلبه
دقت ساعتنا
وابتداينا
نسلك طريق
ما لهش طريق
ما لهش راجع
والنصر قرب من عنينا
النصر أقرب
من إدينا

[Sami Dorbez]

اتجمعوا العشاق


اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر
****

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة

*******

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر

[Sami Dorbez]

بتكات


بوتيكات النات كوا النَّات

وشقق مفروشه وعمولات

يا حلاوه الناوه كوا الناوه

يا بلدنا يا آخر فتاكات

بوتيكات النات كوا النات

**

شبيك لبيك فتح مخك

لبيك شبيك غمض عينك

حتقفّل مخك ح نطخك

ونلوشك لو تفتح عينك

ركب قرنين تركب مازدا

وتعيش سلطان في البرواز دا

مش عاجبك فالجبنه الفازده

والعيش والفول والكرَّات

يا حلاوه الناوه كوا الناوه

يا بلدنا يا آخر فتاكات

بوتيكات النات كوا النَّات

مين فيكوا ما يعرفش عليوه

شيّال المينا الكحيان

في ثواني اتمول واتحول

بقي مسيو عليوه عليَّان

إزاي؟

ما هي بوظه ومفتوحه

على حس ولاد المفضوحه

وأرانب صاحيه ومدبوحه

تتأستك تبيع البنوكات

يا حلاوه الناوه كوا الناوه

يا بلدنا يا آخر فتكات

بوتيكات النات كوا النَّات



حتقول الفقرا ومشاكلهم

دي مسائل عايزه التفانين

وأنا رأيي نحلها رباني

ونموّت كل الجعانين

وبهذا ما حدش

ح يجوع

لو نعلن هذا المشروع

وح نقفل هذا الموضوع

نهائياً

ونعيش في تبات

يا حلاوه الناوه كوا والناوه

يا بلدنا يا آخر فتكات

بوتيكات النات كوا النات

[Sami Dorbez]

كلمتين


كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين

****

شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين

****

قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين

*****

أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير بشاير
زهرة الصبار يا سلمى
يا نسيم الشوق يا طاير يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين

[عصمت النمر]

اتجمعوا العشاق


اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر
****

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة

*******

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر




***
عزيزى ابو السيم
هذه القصيدة للشاعر زين العابدين فؤاد وله ايضا قصيدة الفلاحين بيغيروا الكتان بالكاكى
لذا لزم التنويه

[Sami Dorbez]

حصريا..



أحمد فؤاد نجـــــــــم ضيف فــــــــــــي المنظــــــمة التـــــي انتمي اليها (منظمة التايير العالمية) في تونــــــــــــس بدعوة من نقـــــــــــــــابة المحامين في 2007.07.01 ....
هذه صور أحمد فؤاد وهو يستمع الى شعراء من تونس...

[Sami Dorbez]

حبيب الملايين يلقي بعض القصائد في مقر المنظمة في نفس اليوم تونس 2007.07.01 على الساعة السابعة مساء..

[Sami Dorbez]

أحمد فؤاد نجم وسامي دربز في أغنية "غنوة سلام" (http://www.sama3y.net/forum/showthread.php?t=21343)..

[Sami Dorbez]

أحمد فؤاد نجم وفي يده مشموم فل تونسي...

[ramzy]

كتيّب الكتروني يحتوي على 23 قصيدة لنجم وكذلك لقاء صحفي معه


1- حلاويلا
2- جيفارا مات
3- سقطت سايغون
4- يا عرب
5- اتجمعوا العشاق
6- غابة
7- برولوج
8- نكسون
9- هما مين و إحنا مين
10- دلي الشكارة
11- القواد الفصيح
12- عالمحطة
13- البحر بيضحك ليه
14- كلمتين ( إلى مصر )
15- فاليري جيسكار ديستان
16- الممنوعات
17- التحالف
18- ورقه .. من ملف القضية
19- أغنية السلام ..
20- يا فلسطينية
21- بوتيكات
22- طلع الصباح
23- المسحراتي
24- بقرة حاحا
25-أوأه
26- جائزة نوبل
27- مرحبا
28- نويت أصلي
29-لا نحالف
30- بيان هام
31- دور يا كلام على كيفك دور
32- نشيد الكروان ( إلى الشعب )
33- مقابلة صحفية مع الشاعر

[Sami Dorbez]

أحمد فؤاد نجم يهدي قصيدة للشاعر التونسي الكبير
*علي الاسود المرزوقي*



ولا مرّة (http://www.sama3y.net/forum/showpost.php?p=126866&postcount=9)

[abdallah.dou]

فيه قصيده لنجم بيقول فيها
احمد افندي محمد حامد عبدالعال
عنده عيله كبيره مراته وست عيال
عنده حسن و حسين و سعيد و نوال
و المقروصه لواحظ و قدم الخير وصال

انا مش فاكر منها غير كده
حد عنده النص الكامل من عشاق نجم
موضوع نجم موضوع شيق
و ياريت اللي يقدر يجيب حاجه يجيبها

[جابر الحسيني]

قصيدة جديدة للشاعر أحمد فؤاد نجم


نؤيد سيادتك


نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة ثانية نبيعها خلاص

نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده ف إيده الخلاص

نبايع سيادته و لا حد غيره
كفايا علينا نبرطع في خيره
و نوم شعب مصر العظيمة و شخيره
يقول للحرامي ما تسرق كمان

نبايع سيادته و ابنه و حفيده
مفيش زي فكره قديمه و جديده
خرابك يا مالطة حيحصل بايده
و مين فيكي يعني بيسمع آذان

نبوس إيد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و مين غير وجودك حقيقي نضيع

دي مصر بتاعتك و احنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تأمر و احنا نطيع

في جزمة سيادتك كلابك يبوسو
و فوق الغلابة بجزمهم يدوسو
و شعبك ليلاتي يا ريس غموسه
مذلة و مهانة و حوجة و مر

لكن يعني ما دمنا شعب انتساب
و دايما و أبدا ف حالة غياب
متعملش لينا يا ريس حساب
دي عزبة سيادتك وفيها انت حر

و دستور مدستورش مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش و ضارب جذوره

و إيه يعني تهري جتتنا البلاوي
يوماتي كوارث، فضايح رشاوي
كفايا علينا، القعاد في القهاوي
بنستنى، لما الوريث ييجي دوره

[يحيى زكي]

60 قصيده من أشعار
أحمد فؤاد نجم

[MAAAB1]

صباح الورد

أحمد فؤاد نجم


الأعمال الشعرية الكاملة



http://www.sama3y.net/forum/attachment.php?attachmentid=140164&stc=1&d=1239061630

[MOHAMED ALY]

اليوم أول أيام عيد الأضحى المبارك .. كل عام و أنتم بخير ... و بمناسبة الفتة و اللحمة و الذى منه ...



موال الفول و اللحمة



عن موضوع الفول و اللحمة صرح مصدر قال مسئول



إن الطب اتقدم جدا والدكتور محسن بيقول



إن الشعب المصري خصوصا من مصلحته يقرش فول



حيث الفول المصري عموما يجعل من بني ادم غول



تأكل فخده في ربع زكيبه و الدكتور محسن مسئول



يديك طاقة و قوة عجيبة تسمن جدا تبقى مهول



ثم اضاف الدكتور محسن إن اللحمه دي سم أكيد



بتزود أوجاع المعدة وتعود على طولة الايد



وتنيم بني ادم وتفرقع منه المواعيد



واللي بياكلوا اللحمة عموما حيخشوا جهنم تأبيد



يا دكتور محسن يا مزقلط يا مصدر ياغير مسئول



حيث ان انتو عقول العالم والعالم محتاج لعقول



مارأى جنابك و جنابهم فيه واحد مجنون بيقول



احنا سيبونا نموت باللحمة و انتو تعيشوا و تاكلوا الفول



مارأيك ياكابتن محسن مش بالذمة كلام معقول

[عميد]

السلام عليكم:::

من مذكرات «الفاجومى» التى يتحدث فيها الشاعر الكبير أحمد فؤاد نجم عن مسيرته مع الشعر والناس والدولة ....

[بشير عياد]

زينب أحمد فؤاد نجم
بمصاحبة
أبيها
الشاعر الكبير
تغنّي
" دولا مين " ؟؟؟
نقلا عن
قناة " الجزيرة "

[سمير الشال]

أحمد فؤاد نجم
كان من القلائل - وإن لم يكن الوحيد
الذي كان يصرخ في وجه السلطة المصرية قبل الثورة ,
ولا كان بيهمه قاضي ولا جلاد ..

لذلك
كل كلامه بعد الثورة مهضوم كتير
على قول إخوانا اللبنانين
:)

___

هنا يقول أن مبارك أسوأ رئيس في تاريخ البشرية
- وكلام كتير تاني .. إسمعوه


YouTube - ‫ظ†ط¬ظ… ظٹط¤ظƒط¯ ط£ظ† ظ…ط¨ط§ط±ظƒ ط£ط³ظˆط£ ط±ط¦ظٹط³ ظپظ‰ طھط§ط±ظٹط® ط§ظ„ط¨ط´ط±ظٹط©‬‎ (http://www.youtube.com/watch?v=M69RPXDOxlQ&feature=player_embedded)

.

[bacel1]

عذراً على التطفل ولكن يبدو أنه ثمة بيت ناقص, هذا من أجل التوثيق, والبيت هو(بعد يديك طاقة وقوة عظيمة)


لحمة نباتي ولا في الحاتي (؟) تاكل قدرة تعيش مسطول

هذا من أجل الحفاظ على تراث نجم وشكراً لكم

[عدي يوسف]

إذا الشمس غرقت

في بحر الغمام

ومدت على الدنيا موجة ظلام ومات البصر

في العيون والبصاير

وغاب الطريق

في الخطوط والدواير

يا ساير يا داير

يا ابو المفهومية

مفيش لك دليل

غير عيون الكلام

[بشير عياد]

اتجمعوا العشاق


اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر
****

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة

*******

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر




أخي الفنان الكبير سامي دوربز
هذه الأغنية / القصيدة من أعمال الشاعر الكبير زين العابدين فؤاد وليست لنجم ( كما أشار أخونا الدكتور عصمت النمر في الصفحة السابقة ) ،،، فنرجو حذفها ، وحذف مشاركتي هذه

[بشير عياد]

بشـــيـر عيـَّــاد يشكرُ أهل هولندا،
ويهنئ أبا الثوّار الأعظم الأكبر من جائزة نوبل:
أحمد فؤاد نجم..الفاجومى.. نجيب محفوظ العاميّة المصرية !!
جريدة " فيتو "
العدد 85 - الثلاثاء 17 سبتمبر 2013 م
****************************
http://www.vetogate.com/588272#.Uj2wrdLTrUk