ارجو الاهتمام لو سمحتم [الأرشيف] - منتدى سماعي للطرب العربي الأصيل

مشاهدة النسخة كاملة : ارجو الاهتمام لو سمحتم

مصطفى عادل سعد

26/03/2009, 20h38

abuzahda

26/03/2009, 22h03

بداية الكلام أنا إسمي منه فيه عندنا مادة التربية العملية المفروض نعمل قصة ونألف عليها نشيد بإختصار القصة بتتكلم عن أرنب ماسمعش كلام ماماته و خرج من البيت عشان يلعب مع اصحابه وراح الغابة و كان فيه تعلب مراقبه وعايز يهجم عليه ويأكله فجري الأرنب وجت ماماته وانقذته وجرت به للبيت فإعتذر الأرنب لماماته وبس
لو سمحتم ممكن لو حد بيعرف يألف ممكن يكتب نشيد مناسب للقصة دى بليييييييييييييييييييييييييز لو سمحتم

مرحب ، أخي مصطفى عادل سعد (منه فيه)

أخي الكريم ، لا حظت أن هذه أول مشاركة لك ، كما لا حظت استعجالك لدرجة أنك لم تشرح لنا :
هل في مادة التربية العملية (وليست التربية العملي) يطلبون من مدرسي المستقبل أن يكونوا مؤلفي قصص و أناشيد؟ ، أم هذا "نشاط" إضافي ؟
و هل لو كان حد بيعرف يألف هنا ، و ربنا فتح عليه بالمطلوب ، هل ستخبر المشرف على تدريبك بالحقيقة؟
(أخي هذا ليس تحقيقاً معك ، بقدر ما هو خوف على مستقبل التعليم في بلادنا)
كما أنك لم تخبرنا عن "المادة" التي تدرّسْها ، و لا عن المرحلة العمريّة لـ"جمهور القصة" ، و لا عن مستواهم الإجتماعي. حيث أن الغناء لأطفال "نادي الشمس" -مثلاً- يختلف عن الغناء لأطفال "نادي القمر" .
أرجو أن يتسع صدرك يا "أستاذ" لرجُلٍ له "أطفال" يتمنى لهم مدرسين كالّـذين أنعم الله علينا بهم من قبل .

ثم أنك يا أخ مصطفى عادل سعد ، لم تحدد:
هل تريد أغنية واحدة ؟ أم تريد كتابة نص موازي (يعني الحكاية كلها تكون بالغناء) ؟

على كل حال
(علشان شكلك كده زهقت)

أرنوبي يا أجمل أرنوب
عن حركاتك ، إمتى تتوب
لو يعني التعلب كان شافك
كان ينفع جري و لا هروب ؟
أرنوبي يا أجمل أرنوب

أرانيبو شقاوتك مش هيَّ
للتعلوب قدّمت هديّة
كان يكلك من غير ملخوية
طعمَك للتعلـُوب محبوب
أرنوبي يا أجمل أرنوب

مصطفى عادل سعد يحِبَّك
لو تِعْقـَل و تذاكِر كـُتبَك
عايزك تنسى يا أرنب كدبك
أحسن بُكرة تبات مضروب
أرنوبي يا أجمل أرنوب

و لا فيش خسايّة و جزراية
و لا غنوة هقولها و لا حكاية
شوف آخرة دلعك ويّايا ؟
الديك يدّن وقت غروب !
أرنوبي يا أجمل أرنوب

..............................
بالذمة يا راجل حد يغني "ملخوية بالأرانب" ؟ ! و إيه دخل "الديك" في الموضوع ؟ مع إن الحكاية كلها خارج "العِشة" ؟!

معلش يا درش ، دي (كتبتها مع الرد كده بدون تقليّة) أهي تنفع تصبيرة على ما تجاوب على الأسئلة اللي فوق ....
فوق يا درش

و لك محبتي و تمنياتي لك (بإنك تجاوب) !

ملحوظة: هيجيلك أحسن منها ، و ممكن متلحنة كمان . و لو مش مصدقني ، طوِّل بالك و خدلك جولة في سماعي ، هتدعيلي

أخوك سيد أبو زهدة

سمعجى

27/03/2009, 10h42

بداية الكلام انا اسمي منه فيه عندنا مادة التربية العملي المفروض نعمل قصة ونألف عليها نشيد بإختصال القصة بتتكلم عن ارنب مسمعش كلام ماماته و خرج من البيت عشان يلعب مع اصحابة وراح الغابة و كان فية تعلب مراقبة وعايز يهجم عليه ويأكلة فجرى الارنب وجت ماماته وانقذته وجرت به للبيت فإعتذر الارنب لماماته وبس
لو سمحتم ممكن لو حد بيعرف يألف ممكن يكتب نشيد مناسب للقصة دى بليييييييييييييييييييييييييز لو سمحتم

أنا بقى يا عمي سيد ، قريتها :
بداية الكلام أنا إسمي " مِنـّة " ، فيه عندنا مادة التربية ..............

و ذلك ، لعدم وجواد فواصل أو تشكيل ،،

و أيـّاً كان الطالب ،، فالمطلوبُ " لا يُطلـَبُ "

و مع كامل احترامي للأرنب اللي ما سمعش كلام " ماماتـُه " ، إلا أني أنصح القائمين على التعليم ،، بقلب طاولة المناهج رأساً على عَقِب ، و القيام بتغيير " راديكالي " ،
بعد الفشل الذريع في هذه المؤسسة " التعليم " ، و التي دأب القائمون عليها ، على وضع العربة أمام الحصان ،، فلماذا لا نجرب " النقيض "

أدعو " الطالب " ، أن يقرأ " ما بين السطور " في " أرنوبي يا أجمل أرنوب "

أو ، فليجرب " الرؤية التقدمية " للعبد لله ، و التي تستعرض وجهة نظر
" التعلب المسكين "

تعلب غلبان

أنا تعلب غلبان ،، دايماً شقيان
طالِع عين أهلى ف كل مكان ،،
كان نِفسي أعيش على طول شبعان ،،
و أحِس بإن الغابة أمان

لكن اعمِل إيه في الجوع ،،
و النبي قوللي يا إنسان

أنا تعلب غلبان
مش غاوي مشاكِل
و مُعَرض زى ما باكل ،،
أتـَّاكِل

يفطر بيا أسد ما فطرش
أو فهد على الجوع ما صَبرش

وَ لنفرِض مثلاً إني ،،
ذاتْ يُوم قررت أتوب
عن أكل الفـَرّوج و الأرنوب
و أكون عندكوا محبوب
تفتكروا هاعيش ازاى ؟!

عاوزينـِّي ابقى نباتي ؟!
و أغيّر من نزعة ذاتي
دنا كنت أموت في خلال أسبوع
من كتر الجوع

أنا مش شرير ،،
و باربي عيالي بكل ضمير
كل الإشكال
إني للفِطرة أسير ،،
مُجبَر ،، من غير تخيير

يعني من الآخر ،،
محكوم بالفطرية الحَتميّة
و النزعة اللحميّة ،، القـَدَرِيّة
و الأرنب " زىّ ما قال ابو زِهدة "
أنا باكلو بدَمّه ،، و انتوا بتاكلوه بالملوخية

طاب ليه ما طلعتِش كلب لولوووو
متربي ف عِز و خير
آكل بلوبيف ، و اتحمى بشامبووو

أو كنت طلعت ف دنياكم ، قطة سيامي
و أنـُول الدَّلـَع السامي
و لا تسمع وِدني غير : بابي و مامي

أنا تعلب مؤمن ،، مش كافر
و اللي خلق لي أنياب و ضوافر
قادر يسخطني حمار

و ساعِتها الشعرا ، يكتبوا فيا الأشعار
عن طيبتي ،، و عن خيبتي
عن صوتي " المُنكَر "
أو ضهري المركوب
عن صبري اللي غلب أيّوب

قادِر ،، لاكِن ما سخطنيش
يبقى بلاش شغل الدراويش
و ما تشتِمونيش
و لا تنقدونيش

الفرق اللي ما بيني و بينكم
إن انا مش خاين و لا غدّار

لكن انتوا تربوا الأرنب ،
و تحسسوا عَ الفروة بحِنيّة
و اما يربرب
تمشي السّكينة على رقبته
مصحوبة بحُسن النـِّيّة !

يا سلام عَ البني آدمين
اللي بيخترعوا القوانين

عاملين التقسيمة بكل يقين
" التعلب شرير ،، و الأرنب مسكين " !

ياما نِفسي اتعشى بواحِد منكم
و يكون مليان و ملظلظ
و أشوف الرعب ف وِشه
بعد ما كان متعنطظ

آل شرير آل :)

http://www.sama3y.net/forum/attachment.php?attachmentid=137299&stc=1&d=1238153945

يحيى زكي

27/03/2009, 10h42

عم سيد يازعيم شعراء المهجر

والله ياشيخ شوقتنا لاكلة مل
وخية بالارانب والدمعة الحمراء وطبق الكشك المتين

واقترح عليك ان تذهب للامتحان بدلا عن مدرس المستقبل

لك الله يابلدي ويا احفادي الله يكون في عونكم

مع حبي واعزازي

==========================
عاشر من الناس كبار العقول
وجانب الجهال أهل الفضول
واشرب نقيع السم من عاقل
واسكب على الأرض دواء الجهول

يحيى زكي

27/03/2009, 10h53

أنا تعلب غلبان ،، دايماً شقيان
طالِع عين أهلى ف كل مكان ،،
كان نِفسي أعيش على طول شبعان ،،
و أحِس بإن الغابة أمان

لكن اعمِل إيه في الجوع ،،
و النبي قوللي يا إنسان

أنا تعلب غلبان
مش غاوي مشاكِل
و مُعَرض زى ما باكل ،،
أتـَّاكِل
================================
عم كمال يامالك اليراع الذهبي

لا املك الا ان اقول(انا المصري كريم العنصرين)
واقول لدرش(قوم يامصري)
لنا الله ولكم حبي واعزازي
===================================
عاشر من الناس كبار العقول
وجانب الجهال أهل الفضول
واشرب نقيع السم من عاقل
واسكب على الأرض دواء الجهول

unicorn

27/03/2009, 14h09

و أيـّاً كان الطالب ،، فالمطلوبُ " لا يُطلـَبُ "
(((((أدعو " الطالب " ، أن يقرأ " ما بين السطور " في " أرنوبي يا أجمل أرنوب ")))))

http://www.sama3y.net/forum/attachment.php?attachmentid=137299&stc=1&d=1238153945

قريت ارنوبى امبارح و استلقيت ضحكا من عم سيد ,
مش عايز يبقى خواجة ابدا يا اخى , لا كندا و لا سكاربرو عارفين يغيّروه
لسه برضه مصراوى جِنِّى
اكتر حاجة مقربانى منك يا عم كمال , انى زيك ,
باحاول ارى الوجه الآخر للعملة ,
ليه صحيح التعلب شرير ؟؟
عشان بياكل الارانب ؟؟
طيب ما البنى ادم كمان بياكلهم , يبقى البنى ادم شرير ؟؟؟
شفت يا اخ "مِنُّه فيه" , أو يا أخت منّه
مشروع التربية العملية بتاعك فتح لنا آفاق فلسفية جديدة ازاى ؟؟
بس السؤال ,
هاتعرفى توصلى لتلاميذك وجهة النظر دى و لا لأ ؟؟؟؟؟؟!!!!!!!!!!!
هاتعرفى تقوليلهم التعلب مش شرير و لا حاجة , لانه جعان و عايز ياكل , زى الارنب ما بياكل الجزرة
هاتعرفى تشرحى الحقيقة و لا لأ ؟؟؟؟ !!!!!
و لا هاتلتزمى باللى مكتوب فى الكتاب , و التعلب هايفضل شرير ؟؟
طيب لو عايزة تلتزمى باللى فى الكتب , ليه اضطريتى انك تخرجى عن المنهج بسؤالك عن غنوة تحكى حكاية الارنب ؟؟؟
هو المنهج ما فيهوش الكلام دة ؟؟
أم إن المطلوب ان المدرس لهذه المرحلة يكون صاحب نوع من الابداع و يقدر يرتجل هذا اللون من القصص أو اغانى الاطفال ؟؟؟
ربنا يوفقك يا أخت منَّه و أهلا بيكى

ايهاب عامر

27/03/2009, 14h48

السلام عليكم ورحمه الله وبركاته
عم سيد ابو زهده الفنان
اخونا سمعجى الشاعر الفيلسوف
اختنا منه صاحبه شراره بدايه الموضوع الرائع
ابتدينا بسؤال مختلف على شرعيته
وانتهينا بفلسفه ومنطقيه
طب والله الموضوع جميل
تسلم ايديكم
تقبلوا جميعا خالص تحياتى

سيادة الرئيس

27/03/2009, 20h56

أجمل حاجه في الموضوع ده

مش حاقدر أقولها

الألآتى

27/03/2009, 21h34

أجمل حاجه في الموضوع ده

مش حاقدر أقولها

أيوه .. إن صاحب الموضوع مش موجود ..

سيادة الرئيس

27/03/2009, 21h47

أيوه .. إن صاحب الموضوع مش موجود ..

لا و الله يا عم مش ده

دي حاجه كده أكيد قالها سيد و سمعجي آخرها ( ........ بس يالا )

الألآتى

27/03/2009, 22h28

طيب خلاص .. طلعت أوت ..

إبقى قولها لى فى ودنى ..

سيادة الرئيس

28/03/2009, 10h56

يا عم من غير ودان

أنا أقصد إن ساداتنا كتبوا و قالوا لينا

الألآتى

28/03/2009, 11h34

طب ماتزقش .. مانت عارف إن مخى تخين ..

برضه أنا عايز أسأل .. فين صاحب الموضوع إللى إسمه مصطفى .. أو ( منه ) مش عارف ..

يعنى عمنا سيد أبو زهده .. وأستاذنا كمال عبد الرحمن .. شمروا عن سواعدهم .. وإستجابوا لطلب الأخ ..

لكن الأخ .. فص ملح وداب ..