يا لولي يا غالي

[غازي الضبع]

الست فايزة أحمد
تغنت وشدت بهذا اللحن الجميل
والحقيقة أنا كنت لا أعلم مَن مُلحنها وإن كنت أرجح أنه عبد العظيم محمد أو محمود الشريف ، ولكن عرفت من عمنا الأستاذ مختار أنه الموسيقار محمد كامل ..
ودائما يشدني في أي أغنية اللحن ثم الآداء ثم الكلمات
ولكن هذه الأغنية كسرت القاعدة عندي فشدني في المقام الأول
آداء الست فايزة رحمة الله عليها
حقيقي منتهى التمكن والتأثر
توجد بعض الكلمات تسقط من أذني ، ولذا يا ريت أحد الأعضاء يتطوع ويكتب لنا كلماتها .
وأتمنى أن يحللها لنا أساتذة المنتدى الكرام الأستاذ محمد الألاتي ، والأستاذ صلاح علام ، والأستاذ عادل صموئيل .
وأتمنى أن تنال إعجابكم ..


وهذه بعض الكلمات ، وعذرا إن كان بها أخطاء .
يا لولي يا غالي .. يا لولي الندى
كده النسمة تيجي ، وترميك كده
على الزهرة دي ، وعلى الغصن ده
يا لولي يا غالي يا غالي يا لولي الندى
***
يا لولي .. يا لولي يا دمع الأحبة
تفتح عليك الزهور حبة حبة
تسبح لربك ، في غنوة محبة
يا محلى صباحك يا لولي الندى


حمل الأغنية من هنا (http://www.sama3y.net/forum/attachment.php?attachmentid=21893&d=1167876116)

[mokhtar haider]

الله الله الله الله الله ....
ثم الله الله الله الله
و برده الله الله الله الله
و كمان الله الله الله الله
و ألف مرة كمان
عندما استمعت لها لأول مرة بإذاعة القاهرة في بداية الثمانينيات أو أواخر السبعيينات..... سقطت في ذهول... وقلت .... مش معقول جمال بهذا الشكل في هذه الدنيا.... هي قطعة من الجنة.... و كل مرة اسمعها زاد حبي لها و علاقتي الشخصية بها
الحقيقة أنني و جدت نفسي فيها... و قسط كبير من شخصيتي و وجداني و ذكرياتي و شدني اسم محمود محمد كامل ملحنها اسمعه لأول مرة يشبه اسم استاذي محمود كامل معد برنامج ألحان زمان بإذاعة القاهرة
و لم أنس أبدا هذه الأغنية لغاية يوم ما شتريت الشريط سنة 1991 في الخارج و كانت سعادتي كبيرة يومها و في كل مرة اسمعه أعسد اكثر و أكتشف أكثر محمود كامل... سحر نغي غير معقول... خصوبة إبداعية تجنن

واكتشفت في نفس المرحلة الزمنية تقريبا أغنية أخرى من ألحانه هي أغنية صورتنا و احنا سوى لمحمد عبد المطلب... و أكدت أن لحن فايزة لم يأت بالصدفة أو كان شعلة.... بل له أرضية من العبقرية و الروح الجمالية الغير محدودة... و زاد تأكدي بهذا لما انبهرت بأغنية الحلو اللي شاغل بالي لكارم محمود و توقفت مطولا أمام جمال الغصن الأول منها... و منها صرت دائما أترقب أي لحن منه لا أعرفه و أتمعن في سماعه
أشكرك يا غازي على هذا التذكير.... أنا ماشي أجدد حبي لهذا الملحن
ما لكم يا مصريين تتناسوا هؤلاء العبقريين.؟؟؟ معقولة؟؟؟ صدقوني يا جماعة انتم الخسرانين

[mokhtar haider]

و مما يلاحظ في شكل الأغنية و مضمونها أنها تنقسم على 4 أغصان كاملة مختلفة اللحن و المقام يتخللها المدهب الأول.... و قلما سمعنا هذا الشكل من الأغنيات الذي استعمله محمود كامل في بعض الحانه و من قبله محمد القصبجي....
و يكاد هذا النوع من الغناء أن يسمى حديث غنائي يشبه المونولوج في مضمونه و اختلاف صوره و بعيدا على الطقاطيق التي تشبه لها ية إلا أن الطقاطيق تتضمن فصلين و 3 عامة

و اللي يحب يسمعها يروح للصفحة ال6 و ما يليها من الموضوع المخصص لفايزة أحمد في قسم أهل المغنى

[Adel]

حرام عليك ياغازي
دي أحب أغنية في الدنيا لقلبي
صدقني لو قلت لك اني مبقدرش اسمعها من غير عيني ما تدمع
ليا معاها ذكريات عزيزه قوي علي قلبي
مخك مايروحش بعيد ذكريات مع والدي الله يرحمه
:emrose::emrose::emrose::emrose:

[غازي الضبع]

الله الله الله الله الله ....
ثم الله الله الله الله
و برده الله الله الله الله
و كمان الله الله الله الله
و ألف مرة كمان
عندما استمعت لها لأول مرة بإذاعة القاهرة في بداية الثمانينيات أو أواخر السبعيينات..... سقطت في ذهول... وقلت .... مش معقول جمال بهذا الشكل في هذه الدنيا.... هي قطعة من الجنة.... و كل مرة اسمعها زاد حبي لها و علاقتي الشخصية بها
الحقيقة أنني و جدت نفسي فيها... و قسط كبير من شخصيتي و وجداني و ذكرياتي

عمي الحبيب / سي مختـار
لما كتبت هذه الصفحة كنت باحب الأغنية دي جدا جدا
والآن وبعد أن قرأت تحليل ووصف حضرتك للحن والملحن ازداد إعجابي وحبي لها جدا جدا جدا جدا
أما أنا باطرب جدا بدخلة الست فايزة في : يا لولي يا غالي يا لولي الندى ..
اللحن فيها مؤثر بشكل لا يوصف
وتمكنت منه الست فايزة تمكن رائع .. وكذا بقية الكوبليهات ..
أشعر بنشوة جميلة في كلماتك يا عم مختار ..
وأتمنى أن تواصل الكلام ، وكذلك يدخل كبار موسيقيين المنتدى لتحليل لحنها ..

[غازي الضبع]

.. أنا ماشي أجدد حبي لهذا الملحن
ما لكم يا مصريين تتناسوا هؤلاء العبقريين.؟؟؟ معقولة؟؟؟ صدقوني يا جماعة انتم الخسرانين

أقول لحضرتك الحق
وإن كان عارا عليا
أنا الصراحة أول مرة أعرف محمود كامل :(
وأتمنى مزيدا من المعلومات عنه

[غازي الضبع]

حرام عليك ياغازي

دي أحب أغنية في الدنيا لقلبي
صدقني لو قلت لك اني مبقدرش اسمعها من غير عيني ما تدمع
ليا معاها ذكريات عزيزه قوي علي قلبي
مخك مايروحش بعيد ذكريات مع والدي الله يرحمه

:emrose::emrose::emrose::emrose:

أخيرا دخلت دعوة موسيقية يا حاج عادل
عموما . نورت القسم يا باشا
ها
إيه بقى الذكريات بتاعتك مع الأغنية
وماذا تشعر حينما تسمعها ؟؟؟

[Adel]

يكفي اني أقولك ان ده الاسم اللي كان بيندهلي بيه والدي الله يرحمه
يا لولي ياغالي
اللهم ارحمه واسكنه فسيح جناتك
كفايه علشان مش عارف اكمل بجد
:emrose:

[mokhtar haider]

أقول لحضرتك الحق
وإن كان عارا عليا
أنا الصراحة أول مرة أعرف محمود كامل :(
وأتمنى مزيدا من المعلومات عنه


الخلل مش منك أخي الاستاذ غازي.... أنا طرحت هذا السؤال قبل هذا اليوم... و باقي لغز علي طول حياتي.... ما ذا حصل في مصر حتى يصل الوضع بهذا الشكل؟؟؟
كثرة الإنتاج الغنائي؟ الزحمة بين المطربين و بين الملحنين؟؟؟ خلل في طريقة تقديمها؟؟؟ أو تصنيفها و إذاعتها؟ ما ذا بالضبط؟؟؟ حضر سياسي من حيث السياسة الثقافية؟ إيجاد تيارات و توجهات و توجيهات ؟؟؟

كجزائري من العادي او المعقول أن لا أعرف محمود كامل حتى الثمانينيات حتى و لو كنت من المتتبعين... لكن ما هواش عادي أنه يبقى غير معروف في مصر مثلا و الإذاعة المصرية تمتلك جميع تسجيلاته و أغانيه... ما ذا حدث؟؟؟ أفهم بس يا عالم :mdr::mdr: ؟

[غازي الضبع]

يكفي اني أقولك ان ده الاسم اللي كان بيندهلي بيه والدي الله يرحمه

يا لولي ياغالي
اللهم ارحمه واسكنه فسيح جناتك
كفايه علشان مش عارف اكمل بجد

:emrose:

تعيش وتفتكر يا عادل
الله يرحمه ويسكنه فسيح جناته
وأنا آسف إذا كنت قلبت عليك مواجع
واعتذاري سيكون قيّم جدا بإذن الله
حيث سأقرأ له الفاتحة ، وأناشد كل من يدخل هذه الصفحة أن يقرأ له ولموتى المسلمين جميعاً الفاتحة

[mokhtar haider]

يكفي اني أقولك ان ده الاسم اللي كان بيندهلي بيه والدي الله يرحمه
يا لولي ياغالي
اللهم ارحمه واسكنه فسيح جناتك
كفايه علشان مش عارف اكمل بجد
:emrose:


الله يرحمه و يحسن إيه يا عادل... آسف ما شفتش اللي جاء قبل مداخلتي الأخيرة... كفاية عليك يا عادل تقرا له الفاتحة و تدعي له... و تملي دماغ القمر الملاك اللي في الصورة بأحلى الذكرايات و أجمل النغمات و أعذب الأسامي... و يكون قلبه مليء بالمحبة يا رب زي أبوه الحاج عادل إلهي يدي له طولة العمر...

[unicorn]

و الله كلامك صحيح يا غازى
انا اول مرة آخد بالى منها
رائعة فعلا يا لولى يا غالى
و كلام عم مختار عن ملحنها محمود محمد كامل
خلانى أركز مع لحنه الجميل فيها
و فى غنوة طلب , صورتنا و احنا سوا
حاجة جميلة اوى و رايقة و نقية جدا
شوقتونا لكلام عم محمد الالاتى عنها

[abuzahda]

الله يا أستاذ غازي ياحلو أوي

رجعتنا للصباحات الحلوة
لراديو القاهرة "زمان" بعد "حديث الصباح"
الله يا أستاذ غازي
عبأت صدورنا برائحة الـ "شاي بحليب"
و الشوق للجريدة
و
تبادل الصمت ، احتراما" لـ:
"يافتاح يا عليم ، يا رزاق يا كريم"
و
"صباح الفل" يحملها الدفء من قلوب الطيبين إلى القلوب الطيبة

الله يا أستاذ غازي


ستي فايزة أحمد
خير من عبر عن "البنت المصرية"
مع إنها مش "نجاة الصغيرة"

:emrose:
"زمان" ، كان يغنى فيه لقطرات الندى
أنعم و أكرم به من "زمان"

:emrose:
حدثني قلبي من قبل : أنك تحب الورود
يا أستاذ غازي
الآن صدق قلبي
http://img507.imageshack.us/img507/421/12rs8.gif
أنا من حالك سيدي
أحب الورود
و أضْعَفُ من الندى
http://img338.imageshack.us/img338/4260/41170744du5.png




بوركت يا أستاذ غازي

[الألآتى]

بسم الله نبدأ فى تحليل أغنية ( يالولى ياغالى )

كلمات : توجد معلومتان بخصوص كاتب الأغنية .. الأولى تقول أنه عبد الفتاح مصطفى .. والثانية تقول أنه مصطفى عبد الرحمن .. إبحثوا أنتم بقى .

ألحان محمود كامل

غناء : فايزة أحمد

قبل أن نبدأ فى التحليل .. يجب أن نفرق بين محمود كامل المؤرخ الموسيقى .. وبين ملحن هذه الأغنية .. محمود كامل عازف العود .. وصاحب صورتنا سوا لعبد المطلب ..

إذا كنا تحدثنا عن مقام الكرد .. هذا المقام الجميل والمظلوم فى زماننا هذا .. حيث معظم الألحان التافهة من هذا المقام ..

إسمعوا معى .. كيف يفعل ملحن موهوب مع مقام الكرد ..

تبدأ الأغنية بلازمة موسيقية جميلة جداً .. تبدأها الوتريات ( بعرضها ) فى أدليب جميل ( بدون إيقاع ) .. ثم يعزف القانون نغمتان فقط كنوع من الإنذار .. لبدء دخول الإيقاع .. والإيقاع هنا هو إيقاع الفوكس .. ويسمى ( الفوكس تروت ) أى قفزة الثعلب ..

نسمع محاورة جميلة من القانون والوتريات .. حيث تعزف بطريقة النقر بالإصبع على الأوتار ( بستكاتو ) ..

ثم تدخل الفرقة بكاملها لتعزف نفس الجملة الموسيقية ..

وجدير بالذكر أن هذه المقدمة الموسيقية .. سيستعملها محمود كامل طوال الأغنية .. بإعتبارها لازمة بين الكوبليهات ..

تغنى فايزة ( يالولى ياغالى .. يالولى الندى ) من نفس مقام الكرد .. مع إستعمال حساس المقام .. ونسميها ( عُربة ) خارج سلم المقام .. فتعطينا إحساساً بديعاً وكأن قلوبنا إتخطفت ..

يرد الكورال ( النسائى ) بنفس المذهب .. ثم لازمة موسيقية .. هى نفس المقدمة الموسيقية التى سمعناها من قبل ..

وتغنى فايزة ( يالولى يادمع الأحبة ) ..

ودعونا نتوقف هنا قليلاً .. لنشرح المقامات المستعملة فى هذا الكوبليه ..

تبدأها فايزة ( يالولى يالولى ) من الكرد .. ثم ( يادمع الأحبة ) من الحجاز .. ثم ( تفتح عليه الزهور حبه حبه ) من العجم ..

إيه ده كله .. خناقة ؟

هى مش خناقة ولا حاجة .. لو جمعنا الحجاز ويليه العجم .. سنحصل على مقام إسمه ( زنجران ) .. وهذا هو ماإستخدمه عمنا محمود كامل فى الجملة اللحنية .. وهو مقام غير شائع وقليل الإستعمال ..

ثم يعود مرة أخرى للكرد .. حتى نهاية الكوبليه ..

نفس السيناريو .. الكورال ثم اللازمة الموسيقية .. نفس اللازمة ..

تغنى فايزة ( يالولى يالولى تجيبك نسايم ) .. من مقام شاهناز ..

ولايجب أن نفزع من هذه المسميات .. فكلها مقامات عادية .. ولكن عند إلتحام جنس مقام بجنس أخر .. يتغير مسمى المقام ..

ومقام شاهناز عبارة عن جنسى حجاز .. يعنى حجاز فى حجاز .. عادى ..

ويمكن أن نسمى هذا المقام بإسم أخر إذا تغيرت درجة ركوزه .. فيكون إسمه ( شد عربان ) .. إذا كان أوله من درجة اليكاه ( قرار النوا ) .. الصول يعنى .. هذه هى الموسيقى العربية وخزعبلاتها ..

المهم .. تغنى فايزة من الشاهناز .. برغم من أن طعم الجملة يعطى إحساساً بمقام ( النوا أثر ) .. يادى الحوسة ..

ربنا يجازيك ياغازى ..

تكمل فايزة ( وأول ماتلقى الوجود لسه قايم ) .. من النهاوند .. وبعدين عمنا محمود كامل يروح مدينا طلقة مفاجئة بدخول البياتى فى جزئية صغيرة جداً .. وهى ( تلفك نسايمك ) .. أنا مش متأكد من اللفظ .. كلمتان فقط من البياتى .. ثم يعود سريعاً للكرد .. وكأنه خايف يستطرد مع البياتى ..

نفس الكورال ونفس اللازمة الموسيقية ..

وتغنى فايزة ( يالولى يالولى فصوصك قالولى ) .. من النهاوند .. ثم تغنى ( ياريت واحدة منك ) من العجم .. ثم يعود للكرد حتى نهاية الكوبليه ..

نفس الكورال ونفس اللازمة الموسيقية .. مع تغيير التسليم .. لماذا ؟

لأنه إستعمل مقاماً جديداً ومن درجة ركوز مختلفة .. مقامنا الجديد هو الحجاز كار .. حيث تغنى منه فايزة ( يالولى يالولى ياأجمل تحية ) ..

ثم نسمع الراست لأول مرة فى الأغنية عند ( بفتنه لعيونها .. وفرحة لعنيا ) .. ويعود سرعاً للكرد عند ( تنور وتضوى يالولى الندى ) ..

خلصت الأغنية .. وخلصت معاها ..

شوفتوا بقى .. الكرد ممكن يتعمل منه إيه .. شوفتوا الحنية .. شوفتوا الجمال ..

سمعتوا معايا فايزة .. سمعتوا التلوين فى الصوت والقدرة على أداء أصعب الجمل ..

ياللا .. بألف هنا وشفا ..

[abuzahda]

كلمات : توجد معلومتان بخصوص كاتب الأغنية .. الأولى تقول أنه عبد الفتاح مصطفى .. والثانية تقول أنه مصطفى عبد الرحمن .. إبحثوا أنتم بقى .

يأ أستاذ محمد الألاتي يافنان يا كبير
تنفيذاً لأوامركم السامية ، بحثنا ، فوجدنا أنه:

التقي الصالح
الأستاذ عبد الفتاح مصطفى
رحمه الله
كان يقيم بشارع المقسي بحي ساحل روض الفرج
فلما انتقل من الشقة الأرضية
عمَّرها مسجداً لأبناء الجوار

كان رحمه الله ، أكثر أعضاء لجنة إختبار المذيعين بماسبيرو تشدداً لفرط غيرته على اللغة العربية

قال ، رحمه الله:
كانت أم كلثوم تقرأ "لسة فاكر" وأنا أحذر الجزء الذي ستطلب تعديله
فلما فرغت منها ، قلت لها:
أيوة ياست ! فين الجزء المطلوب تعديله
بينما كانت هي المرة الوحيدة التي لم تتدخل فيها الست لتعديلٍ في كلمات الأغنية

يا أسـتاذ محمد
بقول لسعادتك عمل شقته مسجد ....
هو يوصف اللولي كدة ، غير حد بيصحى الفجر ؟
:emrose::emrose::emrose::emrose:
يارب البحث يكون عجبك يا أستاذ

[الألآتى]

أشكرك أخى العزيز أبو زهدة .. بحث رائع ومعلومات ثرية ومفيدة ..

أشكرك للتوضيح ..

[غازي الضبع]

الله يا أستاذ غازي ياحلو أوي


حدثني قلبي من قبل : أنك تحب الورود



والله إنت اللي حلو يا أستاذ
بس حضرتك عرفت منين إني باعشق الورد
...
اسمح لي أهدي حضرتك هذه الباقة
http://www.sama3y.net/forum/attachment.php?attachmentid=115740&stc=1&d=1068373546

تحياتي

[غازي الضبع]

إذا كنا تحدثنا عن مقام الكرد .. هذا المقام الجميل والمظلوم فى زماننا هذا ..
والإيقاع هنا هو إيقاع الفوكس .. ويسمى ( الفوكس تروت ) ..



تبدأها فايزة ( يالولى يالولى ) من الكرد .. ثم ( يادمع الأحبة ) من الحجاز .. ثم ( تفتح عليه الزهور حبه حبه ) من العجم ..


لو جمعنا الحجاز ويليه العجم .. سنحصل على مقام إسمه ( زنجران ) ..

ثم يعود مرة أخرى للكرد .. حتى نهاية الكوبليه ..

.. من مقام شاهناز ..

ومقام شاهناز عبارة عن جنسى حجاز .. يعنى حجاز فى حجاز
...
.. فيكون إسمه ( شد عربان ) .. إذا كان أوله من درجة اليكاه ( قرار النوا ) .. الصول يعنى ..

المهم .. تغنى فايزة من الشاهناز .. برغم من أن طعم الجملة يعطى إحساساً بمقام ( النوا أثر ) ..

تكمل فايزة ( وأول ماتلقى الوجود لسه قايم ) .. من النهاوند ...
طلقة مفاجئة بدخول البياتى فى جزئية صغيرة جداً البياتى .. ثم يعود سريعاً للكرد ..
وتغنى فايزة ( يالولى يالولى فصوصك قالولى ) .. من النهاوند .. ثم تغنى ( ياريت واحدة منك ) من العجم .. ثم يعود للكرد حتى نهاية الكوبليه ..

.. مقامنا الجديد هو الحجاز كار .. حيث تغنى منه فايزة ( يالولى يالولى ياأجمل تحية ) ..

ثم نسمع الراست لأول مرة فى الأغنية عند ( بفتنه لعيونها .. وفرحة لعنيا ) .. ويعود سرعاً للكرد عند ( تنور وتضوى يالولى الندى ) ..




كرد .. حجاز .. عجم .. زنجران .. شد عربان .. راست .. نهاوند .. بياتي .. شاهيناز :crazy:
***
إيه كل ده :eek:
يا خبر أبيض
إيه فرقة المقامات دي كلها
أنا ماكنتش متخيل إن الأغنية دي مركبة ومعقدة كده
الله يكون في عونك يا عم محمد
والله أنا حاسس بالتعب اللي تعبته في تحليل هذه الأغنية
ربنا يخليك لينا
دا الملحن محمود كامل ده طلع حكاية كبيرة
والله أنا مكسوف إني أول مرة أسمع عنه
بس حقيقي الأغنية رائعة جدا
وتحليلك كان غاية في الروعة والجمال يا عم محمد

[mokhtar haider]

يا استاذ غازي
أنا قلت لك أن الأغنية ذي حديث غنائي إن صح التعبير مش أغنية بسيطة و لا طقطوقة و نوهت عن ثرائها نغما و نصا
مليئة الصور المختلفة تتطلب نغمات مختلفة

أنا كنت حبيتها كاملة في جميع أغصانها لهذا السبب... غنية.... غنية جدا جدا جدا

و لا يمتلك هذا القدرة من التلحين إلا اللي ملكاته اللحنية غزيرة... مش فقيرة

[غازي الضبع]

سؤال يا جماعة بعد إذنكم
هل تغنت فايزة أحمد بهذه الأغنية في إحدى الحفلات ؟؟؟؟؟؟؟
أم أنها موجودة بهذا التسجيل فقط ؟

[غواص النغم]

جميلة الاغنية
وطبعا أ.محمود كامل عملاق الموسيقى وله عدة الحان جميلة اخرى
بالنسبة لهذه الاغنية فهي مختارات الإذاعة
ويوجد لها تسجيلين
الأول طويل ومدته ربع ساعة او عشرين دقيقة مش متأكد
والثاني موجز للأغنية حوالي 8 دقائق تقريبا
والأخير هو الذي يذاع كثيرا بالإذاعة لو جت مناسبة وتمت إذاعته
واعتقد ان التسجيلين موجودين بالمنتدى
والغنيه جميلة جدا ويكاد كل كوبليه ان يكون اغنية لوحده كقطرات الندى
ولكن الموسيقار العبقري محود كامل جمع هذه الاغنيات او القطرات في لحن موسيقي رائع
جميل اختيارك يا اخي غازي وماقلتش عن ذكرياتك مع الغنوة؟
طبعا هي من النوع الاغاني الوصفية والتي برع فيها العبقري عبدالفتاح مصطفى
:emrose::emrose:تحياتي:emrose::emrose:

[mokhtar haider]

حبيبي الاستاذ غازي
نسبة لتسائلك عما إذا غنت فايزة هذه الأغنية في حفل... الله أعلم لكن ما أظنش... لأن لو فعلت لارتكبت خطأ
الأغنية يا استاذ متكاملة لحنا و آداء و موسيقيا و هندسيا من حيث التسجيل و تحضير للتسجيل... كله كان مضبوط أثناء التسجيل حسب ما سمعنا
هذه الأغنية تتطلب تركيز خاص في عزفها و آداها و استماعها ... و لا تتحمل الزحمة
لا أظن بنسبة 99 في المئة أن فايزة كانت تظيف لها شيء لو قدمتها في حفل و لا حتى يستفيد منها المستمع أكثر من النسخة الإذاعية
الأغنية ذي أحادية عامرة فيها طرب و جو نفساني تأملي... أيوة أكرر جو نفساني تأملي ...تسيطر سيطرة تامة على مستمعها... يسمع و ما يتحركش و ما ينطقش و لا حتى ياخذ نفس :mdr: أيوة...يسمع و بس... تسمعها و انت لوحدك تحاورها و هي تحاور أفكارك و أسرارك و ذكرياتك ... لو قدمت في حفل يمكن كانت تفقد شيء من سيطرتها و بالتالي تسقط

الملاحظ أنه فيه أغاني من هذا النوع لا تحتاج تسجيل ثاني أو تقديمها في حفل... أمثال صورتنا و احنا سوى لعبد المطلب... كليوباترا و الكرنك مش عارف مين غناهم :mdr: لست قلبي و ضي القناديل لحليم ... يا بخت حبيبي و راحت ليالي و بعدين معك لصباح... قلبي حبك يا سلام لاسماعيل شبانة (و لو انه غناها في حفل و ما أظافش لها حاجة بالعكس)... أمانة يا نجم و يا اللي انتو خلاني لمحمد قنديل ... الدنيا فيها المنى و وحياة محبتك لعبد العزي محمود.. و غيرهم يا استاذ غازي... و كفاية كدا يا غازي أنا لسه صاحي من النوم و مش عارف ألم أفكاري :mdr:...