قصيدة [ الحيطة ] !!

[M O H A M E D]

الحيطة

مــــــن كتــــــر ما بحــب الحيطة
بمشـــــــي أنــــا جنـــــب الحيطة
في الضـــــل مـــــاشي أنـا مـاشي
لا هاممنــي زحمــــــة و لا زيـطة

من صـــغري و انـا احـــب الحيطة
و احـــــب انـــام جنــــــب الحيطة
نـــايم و شـــــــــــايف فــي منامي
أحــــــــلامي ســــاذجــة و عبيطة

و الصبــــــح أمســــك طبـاشيرتي
أرســـــــم و اشخبـــــط ع الحيطة
وردة و علـــــم و قلـــــم و كتــاب
و ولــد بيلعــــــــب بــالكــــــــورة

لعِّيــــــب أنـا و بحيــــب اجــــوان
و لا مــــــرة بيخيـِّــب شـــــــوطة
فـــــرحان و شــــــــايف حــــواليَّا
النــــــــــاس سعيــدة و مبســوطة

الدنيـــــــــا كـــــــانت بالألــــــوان
و طـُــــــرُقها ســالكة و مظبــوطة
شـــــــــاطر و رايـــــــح مدرستـي
و فـ حـــــالي و لا بعمــــــل ظيطة

م المـــدرســــــة ع الجـــامعة أوام
و نتيجتــي مكتوبــــة ع الحيـــطة
فـــرحــت انــا و خــــدت شهـادتي
علـَّـقتها بـإيـــــــدي ع الحيــــــطة

النــــــــــــاس بتصرخ ليه كده ليه
و صــــــوتها عالـــــي ليه من إيه
بيقــــولـــوا فيـــــن حقوقنــــا فين
و أسئـــــــلة تــــــــانية بسيـــــطة

و الــــــــرد كـــــــان بأحلى طناش
عصــــــــــاية و قنبلــــة و رشاش
خـــــرطـــوم و بيـرشرش رشراش
غـــــرَّقنـي و انـــا جنـــــب الحيطة

تفــــــوت شهـــــــور و تعـدِّي ايام
و عينـــــــي بتفتـَّــح يــــا ســــلام
حـــاجــات كتيـــــــــر طلعت أوهام
و كـــــل حــــاجــــة مـش مظبوطة

الظلــــم ســــــــاد ويــا الفســـــــاد
لا ســـــاب تــلال و لا فـــات حيطة
إصـــــلاح و تغييــــــر إيـه يـا ولاد
دا كــــــــلام و ملــــزوق ع الحيطة

مـــــا عـــادش فيهــــا أي أمــــــان
و لا حتــــــى فـــي جــــوة الحيطة
خـــــلاص أنـــــــا قــــررت يا ناس
أسيــــــب مكــــــاني جنــب الحيطة

..

[هاله]

يسعدنى اكون اول من يعلق على قصيدتك الجديده اخى العزيز
بجد رائعه يامحمد
كلام ممتاز ومعبر جدااا عن احداث كتير
هايله يا سلامونى
:emrose::emrose::emrose:

[M O H A M E D]

أنا أسعد بتعليقك و برأيك

و الحمد لله إنها عجبتك

شكراً .. ألف شكر يا لولي
:emrose: :emrose: :emrose: :emrose:

[مصطفى]

أحييك يا سلا مو ني
أسلوب جميل و موضوع أجمل
و كأنك تتكلم بلساني
يبدو أن همومنا فعلا واحدة
:confused:

[ريما]

بص يا فنان

هو احنا زملاء عنبر واحد اها لكن لما يجى البيه امين الشرطه

انا ولا اعرفك ولا شفتك ولا حتى سمعت عنك انت عارف زلومه الاقرع

مبيرحمش لكن كون مطمن هبقى اجبلك عيش وحلاوه هعملهملك فى ريحه شياط

بس بجد بجد باه القصيده تحفه ملهاش حل

حسيت وانا بقراها انى بقرا للفاجومى اللى بعشقه

بجد يا سلامون يوم عن يوم بتثبت انك موهوب فعلا مش سلامون ;)

:emrose::emrose::emrose:

[M O H A M E D]

أحييك يا سلا مو ني
أسلوب جميل و موضوع أجمل
و كأنك تتكلم بلساني
يبدو أن همومنا فعلا واحدة




أهلاً صديقي المثقف مصطفى الحيدوكي
أخيراً حظيت أحد تجاربي الأدبية بشرف تعليقك
شكراً لك يا أخي
و مرورك هو الأجمل
:emrose::emrose::emrose:
و بالتأكيد همومنا واحدة
;)

[M O H A M E D]

بص يا فنان

هو احنا زملاء عنبر واحد اها لكن لما يجى البيه امين الشرطه

انا ولا اعرفك ولا شفتك ولا حتى سمعت عنك انت عارف زلومه الاقرع

مبيرحمش لكن كون مطمن هبقى اجبلك عيش وحلاوه هعملهملك فى ريحه شياط

بس بجد بجد باه القصيده تحفه ملهاش حل

حسيت وانا بقراها انى بقرا للفاجومى اللى بعشقه

بجد يا سلامون يوم عن يوم بتثبت انك موهوب فعلا مش سلامون




ههههههههههههههههههه أصيلة يا ريما

و عموماً

لـــو كان كلامـي مش مظبوط
و زعـَّـل بـــــاشــا أو ظبُّــوط
سـامحوني أصل انا و دماغي
لســه خابطين في الحيــــــطة

:mdr::mdr:

يظهر اني جيت أكحلها عميتها :mdr:

سلام :emrose:

[ثروت رضوان]

إيـــــــــاك تسلم وتفرط وتسيـــــب مكانك فى الحيطة

ده سيدنا الخضر يا سلامون لجل الولاد عدل الحيطة

وانت رسمت العلم وكتـــــــاب ووردة وقـلم

موش عيب يموت الأمل من خبطتين بالقلم

ده الصبر آخره الفرج مهمــا عنيــــنا الألم

:emrose::emrose::emrose:

[M O H A M E D]

يا ألف أهلاً و سهلاً :emrose:
نوَّرت الصفحة يا أستاذ ثروت
و إيه الجمال ده .. الله عليك :good:


و اقـــول للدمع لا .. إنسـى طريقـك ليَّا
قلبـي نــاوي يعيـــش أحـــلامه المنسية
حتــى لـو في يــوم .. الدنيا قسيت عليَّا
هضحـك في وشهـــا .. و لا ابكـِّي عنيَّا

هتحدى الكون كمان .. و لا شئ هيهمني
همشي في الطريـــق .. أحـلامي هتشدني
لا هستسلــــم و لا .. اليــــــأس يصــدِّني
عارف هوصل في يوم .. و الفرح يضمني

يعني ما تخافش على سلامون ;)

سلام :emrose:

[غواص النغم]

شوفوا الراجل...:chut:
بقى دي متعلقة في الحيطة من 4 ايام وانا اخر من يعلم!!!!
اقول ايه بس
:emrose:
:emrose:
كويسة قصيدة الحيطة
واتمنى لك التوفيق
مش عارف اقول ايه
لو افتكرت ح اجي اكتب لك ع الحيطة ((صفحتك الخاصة))

[unicorn]

برافو يا سلامونى
متهيألى يا سلامون ان الاوان لتعلم فعلى للبحر و الميزان و القافية
لانك المفروض من دلوقتى تتحاسب بجد على ما تقدمه
يعنى انت عملت حاجات حلوة اوى قبل كدة بس كانت ينقصها الحرفية فى الصنعة
و الى حد كير عجبتنا و لاقت استحسان الجميع كبداية جيدة ليك
انما دلوقتى الوضع اختلف
لازم تتخطى مرحلة الهواية و عدم الاهتمام بالاصول اللغوية السليمة لكتابة الشعر
و الا
هاتفضل للابد سجين عدم معرفة هذه الاصول و دة اكيد هايبوظ مجهودك
و تفصيلا:
الهدف من القصيدة هايل و موضوعها حلو اوى
و عجبنى فيها اصطدام احلام الطفولة بالواقع السياسى و الاجتماعى الصعب
متهيألى دة مجمل القصيدة
و كدة انت نجحت فى اختيار الموضوع الهادف بجدارة
تعالى بأة للتنفيذ
ابتديت شرح بساطة الطفولة كويس اوى و الاحلام السعيد اللى فيها
الى ان وصلت الى
لعِّيــــــب أنـا و بحيــــب اجــــوان
و لا مــــــرة بيخيـِّــب شـــــــوطة

انا شايف ان البيتين دول سد خانة و محشورين فى القصيدة بدون سبب و لا علاقة لهم بما قبلهم او بعدهم
و برضه وصلت الى
شـــــــــاطر و رايـــــــح مدرستـي
و فـ حـــــالي و لا بعمــــــل ظيطة

برضه و فى حالى ولا باعمل زيطة دى حاسس انها مالهاش لازمة
و بالعكس غيرت مفهوم الطفولة اللى مرتبط بالتأكيد باللعب و اللهو و الدوشة او ( الزيطة )
يعنى محاولتك لاستخدام لفظ متفق مع قافية القصيدة و حشره بالعافية فيها ,
الى حد ما اتلف ما وصلته الينا الابيات السابقة
و فى زيها مقطع او مقطعي كمان حسيت انهم محشورين فى القصيدة بالعافية
المعنى لازم يبقى سالك يا سلامونى و ماشى ببساطة
مش عشان استخدم لفظ ما عاجبنى اقوم احشره فيها بالعافية و بدون لازمة
نيجى للوزن
ابيات كتير مش موزونة يا سلامونى
و بدون حصرها و عدها
الميزان مهم جدا
و كان نفسى اخونا الكبير كمال عبد الرحمن يعلمنى و يعلمك اصول الميزان السليم
انما هو مش موجود
لازم نتعلم الميزان السليم لاى قصيدة
لان البيت المكسور فى الصنعة الشعرية ذنب لا يغتفر
فى بعض الالفاظ غير سليمة لغويا
و اظنك غلط فيها بدون قصد
مثل:
لعِّيــــــب أنـا و بحيــــب اجــــوان
و لا مــــــرة بيخيـِّــب شـــــــوطة
انت بتتكلم عن نفسك و لا عن غائب؟؟؟؟؟
لو عن نفسك تبقى ( باخيّب) لو عن غائب يبقى ما تقولش ( لعيب انا )
يعنى
اكتر ما عجبنى فيها الموضوع و زى ما قلتلك النجاح فى اختيار الموضوع لوحده شئ جميل جدا
لكن نفسى يا سلامون تتعلم حرفية الصنعة الشعرية الجيدة
واضح ان فيه افكار شعرية هايلة فى راسك
و اظن انها بتقلق نومك كمان من كثرتها
بس لابد ان تخرج فى قالب شعرى سليم ياسلامون
و ان شاء الله تمتعنا بيها اكتر و اكتر

[M O H A M E D]

مش عارف اقول ايه
لو افتكرت ح اجي اكتب لك ع الحيطة ((صفحتك الخاصة))


:)

إنت تنور أي مكان و تكتب في أي صفحة تعجبك ..

تحب تاخد دراعي تكتب لي عليه ؟ :mdr:

حبيبي منعم .. ربنا ما يحرمنا منك أبداً

:emrose: :emrose:

[مصطفى]

أهلاً صديقي المثقف مصطفى الحيدوكي
أخيراً حظيت أحد تجاربي الأدبية بشرف تعليقك
شكراً لك يا أخي
و مرورك هو الأجمل
:emrose::emrose::emrose:
و بالتأكيد همومنا واحدة



بدون مبالغة يا سلا مو ني... فأنا مجرد هاو متيم و ما زلت أسعى جادا لتنمية معارفي و بالتالي الارتقاء إلى درجة المثقف الحقيقي...
بالنسبة للتجربة قيد الحديث، أردت أن أعبر لك عن مدى إعجابي بها لأنها فعلا تستحق التنويه، و كما قال الأخ أبو مندور فقد أحسنت اختيار الموضوع، و أتفق معه حول البناء الشكلي للقصيدة... فالعروض قانون موحد للشعر العربي يجب مراعاته باهتمام كي نحافظ على التناغم الموسيقي للكلمة... و كما قال أمير الشعراء:
و الشعر إن لم يكن ذكرى و عاطفة :: :: أو حكمة، فهو تقطيع و أوزان
مع متمنياتي لك بمزيد من التألق
:emrose:

[M O H A M E D]

نيجي بقى لأبو مندور
أهلاً أهلاً
يا دي النور :emrose:
و الا بلاش اكتب لك بيتين شعر يطلعوا مش موزونين و تزعل :mdr:
بالتأكيد أسعدني تعليقك و نقدك
و اسمح لي بالرد

لعِّيــــــب أنـا و بحيــــب اجــــوان
و لا مــــــرة بتـخيـِّـب شـــــــوطة

غلطة إملائية غير مقصودة
و انا ما كتبتهاش سد خانة و لا حاجة
كنت بقصد منها ان كل شئ سهل تحقيقه و مفيش مشاكل
و الكورة ( الحياة ) مش معانداه
و بعدها قلت ان الناس سعيدة و مبسوطة
طبعاً دي نظرة الطفل
و لما قلت :
شـــــــــاطر و رايـــــــح مدرستـي
و فـ حـــــالي و لا بعمــــــل ظيطة

عارف بقى التلميذ المهذب المؤدب المجتهد اللي بيعمل واجبه
و مصدق االلي بيكتبه في كراسة التعبير عن التقدم و الرقي و الإزدهار
و اللي بيسمع الكلام .. هو ده اللي انا اقصده
و ده ما يتعارضش أبداً مع طبيعة الطفل في لعبه و جريه و حتى دوشته اللي بيطلعها في لعبه
أقصد الإنسان المسالم الملتزم في كل شئ .. اللي ماشي جنب الحيطة ،
المشغول بحاله و مش شاغل نفسه باللي بيحصل حواليه
لا سياسة و لا غيره .. ( في حاله )
و ينتقل من سنوات الدراسة ليصل للجامعة و يحصل على الشهادة اللي يكتشف عدم قيمتها
و يعلـَّقها هي كمان على الحيطة
و يبدأ بقى ينزل يشتغل بعيداً عن دراسته
و يشوف الحياة على حقيقتها ، بمشاكلها و همومها ..
و يتصدم في كل شئ
و يقرر في النهاية انه لازم يسيب الحيطة ..
و يتخلى عن حالة اللامبالاة و يبدأ يطالب بحقوقه
هو ده اللي اقصده بالقصيدة

و اللي وزنتها سماعياً .. و اعتقد انها إلى حد كبير موزونة
بس المشكلة ان سيادتك كمان مش عارف في الأوزان
أنا بقول نستعين بصديق
أو نروح نوزنها في السوق .. إيه رأيك ؟ :mdr:

على كلٍ سعدت بتعليقك

و على فكرة .. فكرة القصيدة دي قلقتني في نومي فعلاً ;) .. عرفت منين ؟

[ريما]

شـــــــــاطر و رايـــــــح مدرستـي
و فـ حـــــالي و لا بعمــــــل ظيطة

عارف بقى التلميذ المهذب المؤدب المجتهد اللي بيعمل واجبه
و مصدق االلي بيكتبه في كراسة التعبير عن التقدم و الرقي و الإزدهار
و اللي بيسمع الكلام .. هو ده اللي انا اقصده
و ده ما يتعارضش أبداً مع طبيعة الطفل في لعبه و جريه و حتى دوشته اللي بيطلعها في لعبه





طب هو المطلوب كدا انك تكتب من الاول

انك طفل وشايل سنجه او برطمان كله

ازى تبقى طفل هادى وفى حاله يا جدع

كدا خلفت شروط التيفوله وممكن نطلعك منها خالص يلا اعتذر

وقول حرمت ومن بكره مطوتك فى جيبك وسجايرك فى ايدك

وصباحو منجهه;)

[د أنس البن]

الصديق محمد السلامونى
إصطياد بارع لفكره تحكى من خلالها مشوار الحيطه ,
وآآآآآآآه م الحيطه , فعلا كل أمور حياتنا لا نستغنى فيها عن الحيطه
لأنها الستر وكاتمة السر وهيه الضل وسندة الضهر ساعة العصارى مع نسمة هوا
وعليها برواز شهادات النجاح وصور الأحباب وألبوم الذكريات
عليها ساعة الحائط ام بندول وجرس زى ساعة بج بن
والحيطه زى ماقلت كانت وسيلة الاعلام من أول مجلات الحائط واحنا فى اعدادى وثانوى وأفيشات الأفلام زمان لما كنا بنتفرج على الراجل وهوه طالع على السلم بيلزقها على الحيطان , ولما كبرنا كتبنا عليها المنشورات وخرجنا عليها كل براكين الغضب
ولما كبرنا أكتر بقينا نتسند عليها , ماهى المفاصل خلاص ضربت فيها الخشونه
يبقى نسيبها ازاى ونفارقها ازاى , وهيه صاحبة فضل علينا من أول ماتولدنا , لغاية لحظة النهايه .............
والله الحيطه دى استحملت منا كتير أكتر من اللى قلته واللى ماقدرتش أقوله منعا للإحراج ..........
سلمت يا سلامونى

[M O H A M E D]

أستاذي و حبيبي دكتور أنس:emrose:

إضافة رائعة و رؤية من زاوية مختلفة

شكراً لحضورك الذي أسعد به أكبر سعادة

سلمت لنا .. و دمت بألف خير :emrose:


والله الحيطه دى استحملت منا كتير أكتر من اللى قلته واللى ماقدرتش أقوله منعا للإحراج ..........

;):mdr: