قنديـــــل .. العشق و المواويـــــل

[M O H A M E D]

بسم الله الرحمن الرحيم

عن الفنان محمد قنديل أكتب
و لكل محبيه أهدي تلك المحاولة الشعرية


قنديل .. العشق و المواويل

يا اللى هويت الطرب .. تعالى تلقى العجب
نهاود ، سيكا و عجم .. اطلب تلاقى الطلب

يــا اللى هويت مواويل .. اسمع منه يا ليل
دا حبيبه مهره غالــى .. مهره نجـوم الليل

غنّى و قال حدوتة .. عاشت سنين و سنين
و من حـلاوة زمــان .. صنــع فنّـه الجميل

يا اللى انتوا خِـلانى .. تــعالوا مـــــن تــانى
سـمـاح يا اهـل السـماح .. ما العشق خَلانى
أهوى الليل و الأغاني. و حبيبي الأسمرانى
سابنى للشـوق ياخدنى .. ما بين بر و التاني

حكــى حكــــاية بهيـّــة .. مع حبيبـها يــاسين
قــال العشــاق غلابة .. فــي ليـلهم سهــرانين
و امّـا الصبـح بيطُل .. و يقول صبــاح الخير
انسى اللى فات و انقضى ..و سيبك مـ الأنين

أبو سمــرة السكــرة .. أبــو ضحكــة منورة
و غنــوة صغيّــرة .. تحكــي حكــــاية سنين
و نــاس متغربـــــين .. بشــوق مستنظــرين
و يقولــوا ( يـا مهوّن ) .. يحلـى مُـر السنين

غَنّـى للثورة و قـــال .. بــــلادى أحلــى بلد
غَنّــى لكــل بيـــــت .. و لكــــل بنت و ولد
..
حتى الفول المدمس و الزعبوط و الغورية
و الدوار و السـواقى .. و بـحر اسكنــدرية

علشــان سواد العين .. يرخـص لك الغــالي
و معاك تلت سلامـــات .. يا نجــم يا عـالي
خليني بقى على البـال .. يـــا قاسي و ناسي
و قبل ما تبعد عنى .. صبّـح يا حلو يا غالي

ده مش مُجرد غُنـا .. ده كنــز , موروث لنا
حكــايات فيها الحيــاة .. بين الدموع و الهنا


و الكــــون ملك الله .. لا إلــــه إلا الله
و فـ ليلة محمديّـة .. بسمع و اقول الله
و على نبيبنا محمد..صلى ألفين صلاة

قنديل يا صوت النيل .. يا صوت قوي و جميل
و معــاك من الفنـانـين .. شعـــــرا و ملحـنـــين
صــدقي و عبد العظيـم .. و مكـاوى و جــاهين
و نــاس كتيــر تانيين .. أقــــول مين و لا مين !
قضيتــوا العمــر كلــه .. فـي الفـن الأصيــــــل



___

[M O H A M E D]

منذ تاريخ المشاركة السابقة 15/01/2008
و قد كتبت أكثر من تجربة تدور حول " محمد قنديل " و فنه و محبيه
في مجموعة أصدقاء محمد قنديل
هذه المحاولات - مع ما بها من أخطاء - إلا أنها قريبة من قلبي
و وددت أن أحتفظ بها في هذا الموضوع
بعد إذنكم
خالص تحياتي للجميع

[M O H A M E D]

نبدأ من آخر محاولة :

قنديل ..
مطرب الحياة

في نــاس تغنــــــي للقمـــر
و نــاس تغنــــــي للعيــون
و نــاس تغنــــــي للسهـــر
و نــاس تغنـــــي للفنــــون

قنديــل و غنــى لكـــــل ده
قنديــل و غنى لكــــل دول
قنديــل يغني للبشــــــــــــر
قنديــل جماله على كل لون


قنديـــل يغنــــــــي للحياة
و الحـب و الخيـر غنوته
و كــل كلمــة نقول : الله
في غنــــاه بيـرسم بسمته

وطنه و حبيبته و ضحكته
حلمــه و حنينـه و نشـوتـه
شــوقه لحبــايبه و غربتـه
م القلـــب دايمـــاً كلمتــــه

هيمـــان و عينـه في السما
مــن روحــه تطلـع غنوته
قنديــل قــوي صــوته انما
تدوب قلـــوب لــو سمعتـه

النهـــر من شهــده ارتـــوى
طرحت غناوي على ضفـِّته
رق النسيـــم لطيـره و حكى
عــــــــن رقــِّـتـه و حنيـِّــته

راح اشتكــى الليــــل للهوا
من السهــارى مـــع نجمته
و يا نجم عالي قلبـي هوى
و ســلامي عــارف سكـِّـته

أصـــل القلـــوب ليها كـلام
غيــر القلـــوب مـا سمعتـه
ييجـــي القلـــم يكتب سـلام
يغلــــط و تكبـــر غلطـــته

خلــي السلام من غير كلام
و دا مين دا يوصف فرحته
لو شاف حبيبه حس الغرام
و فـ عينــه بـــانت دمعتـــه
04/04/2009

[ريما]

ياااااااااااااااه يا سلامونك لدرجادى بتحب قنديل
وبعدين الزجل دا من زمان اوى دا بقاله سنة يا محمد
هو محدش رد عليها ليه مع انى شيفاه حلو اهو وابن حلال
واعتقد متنظم ( هو انا بسال بس )
عمتا ادينى رديت يا عم لانها فعلا عجبانى جداااااااا
وثانيا علشان اجبر بخاطرك انت بردو صديقى الجميل
يلا عد الجمايل دى ;)

[د أنس البن]

الحلاوه دى كانت مستخبيه فين يا دكتور محمد
أنا فاكرك كاتبها النهارده
حقول لك على حاجه
زماااااان زمان قوى , من شطحات تفكير الشباب خارج دائرة الواقع والمعقول
كانوا إتنين جبابره , أم كلثوم ومحمد قنديل , لما كنت بااسمعهم أقول لنفسى : لاتنين دول يستحيل يموتوا
حقيقى لم أتصور أن تصمت أصوات بهذه القوه وتصبح فعل ماض أو زى مابنقول خبر كان
شكرا يا صديقى على هذا النظم الجميل البديع ...

[يوسف أبوسالم]

محمد السلاموني
الرائع الجميل

محمد قنديل
وذلك الصوت الأكثر من جميل والذي يعد بحق أحد أهم الأصوات التي أنجبتها حنجرة مصر المحروسة
كلما سمعته أزداد ألقا
وكلما سمعته أجدني أتحسرعلى أغاني هذه الأيام وعلى أصوات هذه الأيام
أصوات تتحشرج فيها النغمات وتختنق فيها المقامات
شكرا لك أنك ذكرتنا
بهذا المطرب بهذا الصوت المتفرد
تحياتي

[Tarek Elemary]

يا عاشق حنجرة قنديل
كعشق الآهه فى المواويل
أنا وياك فى عشق الحلو لما يطل
زى البدر لما يزين نجوم الليل
.....
يا غاوى الحرف و الكلمة يا سلامونى
يا ناسج توب حرير بالشعر على مهلك
أخاف أوفيك عليه حقك يلومونى
و أى كلام جميل يتقال هنا ... مش بس تستاهله ... ده يستاهلك

[M O H A M E D]

ياااااااااااااااه يا سلامونك لدرجادى بتحب قنديل
وبعدين الزجل دا من زمان اوى دا بقاله سنة يا محمد
هو محدش رد عليها ليه مع انى شيفاه حلو اهو وابن حلال
واعتقد متنظم ( هو انا بسال بس )
عمتا ادينى رديت يا عم لانها فعلا عجبانى جداااااااا
وثانيا علشان اجبر بخاطرك انت بردو صديقى الجميل
يلا عد الجمايل دى ;)


ههههههههههههه
ربنا يجبر بخاطرك يا ريما
أنا باعد الجمايل أهه
1 ، 1.5 ، 2 ، 2.25 ، 2.5 ، 3.1 ...
معاكي آلة حاسبة ؟؟

[M O H A M E D]

زماااااان زمان قوى , من شطحات تفكير الشباب خارج دائرة الواقع والمعقول
كانوا إتنين جبابره , أم كلثوم ومحمد قنديل , لما كنت بااسمعهم أقول لنفسى : لاتنين دول يستحيل يموتوا
حقيقى لم أتصور أن تصمت أصوات بهذه القوه وتصبح فعل ماض أو زى مابنقول خبر كان


حبيبنا و أستاذنا دكتور أنس
أهلاً أهلاً
بعد استماعي لأكلثوم و أنا في مرحلة التعليم الإعدادي
كنت أبحث عن الصوت الذي يعادلها من المطربين الرجال إلى أن سمعت محمد قنديل
و بصراحة لم أعرف قدره حقاً إلا بعد انضمامي لمنتدى سماعي
قبلها كان قنديل بالنسبة لي مطرب صوته جميل و أدائه رائع فقط
أما الآن فقد اكتشف أن فن قنديل أجمل و أعمق مما تصورت
الفنان ممكن يموت لكن أعماله تظل باقية إلى الأبد
أشكرك جداااااا يا دكتور أنس
و أهديك أغنية من زمان (http://www.sama3y.net/forum/attachment.php?attachmentid=17951&d=1162487317)

[M O H A M E D]

محمد قنديل
وذلك الصوت الأكثر من جميل والذي يعد بحق أحد أهم الأصوات التي أنجبتها حنجرة مصر المحروسة
كلما سمعته أزداد ألقا
وكلما سمعته أجدني أتحسرعلى أغاني هذه الأيام وعلى أصوات هذه الأيام
أصوات تتحشرج فيها النغمات وتختنق فيها المقامات
شكرا لك أنك ذكرتنا
بهذا المطرب بهذا الصوت المتفرد
تحياتي



الشاعر الرقيق و الأديب الجميل
الأستاذ يوسف أبو سالم
أنا الذي أشكرك على كلماتك الجميلة
و قنديل ليس مجرد صوتاً جميلاً
و قد كتبت هذه المداخلة في أحد الموضوعات

قنديل .. ليس مجرد صوتاً جميلاً !

في كل صباح يكفيني أن أسمع صوته الباسم لأتفاءل بيوم جديد ..
و في الليل أغنية أخرى لتزيل عن القلب هموم اليوم الطويل !

عندما بدأت الإستماع لمحمد قنديل .. أول ما أعجبني فيه صوته .. و بعد ذلك انتبهت لأدائه الذي يتفوّق به على باقي المطربين

أما الآن و بعد الاستماع له لسنوات ، اكتشتف أن روعة قنديل تكمن في روعة اختياراته و موضوعات أغانيه ..

بين الأغنية الدينية و العاطفية و الشعبية و الوطنية و الوصفية و الاجتماعية ....

و المُلاحظ أنها جميعها تصدر من شخصية لها فكر و توجه واضح

و قد ساعده في ذلك صوته الذي يفاجئنا بالتلوّن مع كل حالة ..
و قدرته على التحكم في هذا الصوت المتفرد
الذي يشبه ( الشهد ) في حلاوته .. و ( الذهب ) في نقائه .. و ( الماس ) في بريقه ، و ( الحرير ) في انسيابه ، و ( الاسفنجة ) في طواعيتها !

ففي غنائه الشعبي .. يفيض أداؤه بالشباب و الحيوية و خفة الدم - دون ابتذال - !
و في غنائه العاطفي تتفجر كل منابع الحنان لينساب صوته كنهر عذب .. نشرب منه ، و نقول : هل من مزيد !
و في الأغاني الوطنية يتحول صوته لقاعدة لإطلاق الصواريخ !
و في أغانيه الاجتماعية .. لا تملك إلا أن تصدقه .. فهو لا يُمثل عندما يغني على لسان الرجل البسيط أو الفلاح أو العامل .. بل هو هؤلاء جميعاً !

و في الغناء الديني يأخذك معه في رحلة إلى عنان السماء
و كأن صوته لا يصدر من حنجرته بل من روحه !
فلا تلوم الدمع إن ملأ المآقي !

قد يظن البعض أن محبي قنديل متحيّزون له .. بل العكس !
قنديل هو الذي تحيّز لجمهوره الذي أحبه
بدقة اختياراته ، و بإخلاصه لفنه و لا شئ غيره
فنه .. الذي أبدع فيه و أفني فيه عمره ليظل باقياً للأبد .. عسى أن يصادف من يكتشف أسراره !

و أهدي حضرتك يا أستاذ يوسف هذه الأغنية حلوانى (http://www.sama3y.net/forum/attachment.php?attachmentid=109883&d=1223235844)
و ياريت كمان تسمع قصيدة أحببتها (http://www.sama3y.net/forum/attachment.php?attachmentid=133927&d=1138391553)
خالص تحياتي

[M O H A M E D]

يا عاشق حنجرة قنديل
كعشق الآهه فى المواويل
أنا وياك فى عشق الحلو لما يطل
زى البدر لما يزين نجوم الليل
.....
يا غاوى الحرف و الكلمة يا سلامونى
يا ناسج توب حرير بالشعر على مهلك
أخاف أوفيك عليه حقك يلومونى
و أى كلام جميل يتقال هنا ... مش بس تستاهله ... ده يستاهلك


الأستاذ طارق العمري
أشكرك لذوقك و كلماتك الطيبة
و ان شاء الله نجتمع على المحبة الصادقة و الخير
و لإني مش عارف ارد على كلامك الجميل
اسمع الغنوة دي أمانة يا نجم يا عالى (http://www.sama3y.net/forum/attachment.php?attachmentid=76528&d=1203416264)
سلام

[M O H A M E D]

الفرح الليلة يا زنوبة .. و الدنيا عشانك مقلوبة
هذه الأغنية أوحت لي بفكرة .. سرحت بخيالي و كتبتها ..

و بهديها خصيصاً لـ ريما رداً على جمايلها اللي مغرقاني هههه :):)


*** فـــــرح زنــوبـــــة ***


الأولة .. التمــر حنـــة طرح
التانية .. قلب الحبيب انشرح
التالتة .. زنـوبة عملت فـرح

قنديــل و غنَّـى و قــال ، و طوِّل المـوال
مِنـــعم يقول له : علشــــان ســـواد العين
سلاموني قال لأ غنِّي و قـول فاكــــــرين
قـنــاديــلي قال : لأ .. تقولـــهم الاتنيــــن
قنديـل و قال ماشي يا ابو ورد ع الخـدين

طِلـــب و طـل علينــا و قال تلت سلامـــات
مختار حبيبنا وصل و معـاه سبــــع شمعات
و كـل واحــد مننا خد منه شمعــــة منـــوَّرة
حتى اللي و لا عبَّـرونا و لو بكلمـة صغيّرة

منعـــم و لـَــف علينـــــا يفــــــرَّق الشربــات
سـلاموني قال : هـات عنك ، هاوزع للبنـات
قـنـاديــلي قال : يا محمد وزَّع على الشنبـات
و نده لـ ريما من جوة تجيــب الحلــويــــــات

قـنديــــــل و صــوته بيلعلع ، و بيغنــي مــــــداح
حكى لنا أصـــل الحكـــاية .. و يا شادي الأفراح
وقال ده ســر السعــادة .. عمره ما كان في المال
و الناس معــادن أصلـهم .. و الحـب كنـز يا ناس
و خد م الصبر راس مالك .. لو مرة لاموا الناس
و شـــــــر الظــالم اكفينــــا .. يا رب كــل الناس

علـى كــده و الليلــة انتهت ، و اتفــرَّقوا الأحباب
و فجأة طيـف قنديـــلنا غــاب ، فص ملـح و داب
ورَّانا السِّـكة و سبقنــــا ، و بســـرعة رد الـبـاب
آه من الحبايب ، و حبهم يا ريـت كـان له حجاب

24/08/2008

[ريما]

و نده لـ ريما من جوة تجيــب الحلــويــــــات

دا على اساس انى نصه صبى القهوه يعنى يا سلامونى :(

المهم عجبانى جداااااااا وبقول باه تبعتها
لعم محمد بالمره يوزعها ويحطلنا عليها شويه موسيكى وبعدين تنولهانى انا باه احطلك عليها صوتى وشويه زغاريط وبعدين انولهالك باه انت تنزلها فى سماعى ايه رايك اهو من ضيف اون لاين لفرقه عم محمد والسلامونى وريما وننتشر ونتوغل ونقتحم كل المجالات ;)

[غواص النغم]

و نده لـ ريما من جوة تجيــب الحلــويــــــات

دا على اساس انى نصه صبى القهوه يعنى يا سلامونى :(

المهم عجبانى جداااااااا وبقول باه تبعتها
لعم محمد بالمره يوزعها ويحطلنا عليها شويه موسيكى وبعدين تنولهانى انا باه احطلك عليها صوتى وشويه زغاريط وبعدين انولهالك باه انت تنزلها فى سماعى ايه رايك اهو من ضيف اون لاين لفرقه عم محمد والسلامونى وريما وننتشر ونتوغل ونقتحم كل المجالات ;)
موسيكى!!!
آه
ده علشان حضرتك مذيعة اون لاين
والقاف تقلب كاف
احنا بقى عندنا اسمها موسيقى
حلوة ياسلاموني أكمل الألبوم وح انتجه

[ريما]

موسيكى!!!

آه
ده علشان حضرتك مذيعة اون لاين
والقاف تقلب كاف
احنا بقى عندنا اسمها موسيقى

حلوة ياسلاموني أكمل الألبوم وح انتجه

يا منعم يا بنى دا كان زمااااااااان
دلوقتى بقت موسيكى
وبعدين مش عجبك متسمعهاش :mad:
منعم صحيح حمد لله على السلامه:rolleyes:

[NAHID 76]

بسم الله الرحمن الرحيم
الدكتور الماهر أخى محمد السلامونى
قنديل المواويل اراها من اجمل ما كتبت
وقنديل صوته يستاهل وأكثر
عبرت وشمل تعبيرك جميع جوانبه
وتكلمت عن شخصيه وصوت محبوب
فوصل القلوب بدون أستأذان
شكرا على كلامك الجميل ومجهودك الرائع
تحياتى

[M O H A M E D]

موسيكى!!!

آه
ده علشان حضرتك مذيعة اون لاين
والقاف تقلب كاف
احنا بقى عندنا اسمها موسيقى

حلوة ياسلاموني أكمل الألبوم وح انتجه

يا منعم يا بنى دا كان زمااااااااان
دلوقتى بقت موسيكى
وبعدين مش عجبك متسمعهاش :mad:
منعم صحيح حمد لله على السلامه:rolleyes:


هههههههه
توم و جيري .. إزيكم
بما إن منعم رد عليكي يا ريما بالنيابة عني
اسمحي لي ارد عليكي بالنيابة عنه و اقول لك :
الله يسلمك

[M O H A M E D]

قنديل المواويل اراها من اجمل ما كتبت
وقنديل صوته يستاهل وأكثر
عبرت وشمل تعبيرك جميع جوانبه
وتكلمت عن شخصيه وصوت محبوب
فوصل القلوب بدون أستأذان
شكرا على كلامك الجميل ومجهودك الرائع
تحياتى

الله يخليكي يا مدام ناهد ..
أشكرك جداً جداً
و أي مستمع جيد للغناء الشرقي يعرف قدر قنديل
أسعدتني كلماتك الجميلة النابعة من القلب
تحياتي و تقديري

[M O H A M E D]

في منتدى سماعي تعرفت على أصدقاء حقيقيين ، جمعتني بهم المحبة الصادقة
في زمن ندر فيه الصدق
و رغم بُعد المسافات تآلفت القلوب و الأرواح ...



؛؛ تحت القنديل ؛؛

قنـــديل بنـــوره جــابنـا هنــا
مــن غير ميعـاد مكتوب لنــا
إن احنــــا نبقـــى متجمعيــن

مختار ، طِلب ، محمد علــي
أنـوار و بيهـــــا الكـون حِلي
مِنعــم و حمــدان و الوصيف
و كـــل عـــابـر و الا ضيف
فـــي القلــب مقــدارهم عِــلي

تحــت القنديــــل .. متجمعين
ويَّا القناديل .. كده مبسوطين

تحــت القنديــــل .. متجمعيـن
نسمـــع غنــــــاوي العــاشقيـن
تســرقنـا رحلـــة ويــَّـا الحنين

نشــوف حاجات تعصى الكلام
و مهمـــا قلنــــا احنـا في كلام
كلمـــــــاتنــــا برضه قليليــــن

تحت القنديل ...

الدنيــا إيـه لو حتى كان فيها الدموع
بتهون علينا و احنا مع بعض و سوا

تحت القنديل ...

و البعـــد إيه لو حتى بينـَّا ألــف ميل
و قلوبنا صاينة عهدها و عهد الهوى

تحت القنديل ...

هو اللي روحه ساكنة الحبيب يستنى ليه لحظة لقا ؟

تحت القنديل ... !
30/03/2009