لقاء الاسكندريه الثالث اللى انا كنت فيه [الأرشيف] - منتدى سماعي للطرب العربي الأصيل

ريما

29/06/2008, 16h29

السلام عليكم ورحمه الله

اولا وحشتونى جدا جدا واخيرا رجعت الى جهازى الحبيب

علشان اكون معاكو من تانى بس فؤجئت ان مفيش موضوع اتفتح عن لقاء الاسكندريه

قلت فى ايه يا جماعه هو انا تاثيرى كان مدمر كدا وسد نفسكو تفتحو الموضوع

المهم قلت افتحه انا يمكن التأثير يخف ويدخلو يردو ويحطلنا الصور على الاقل

نيجى باه لتفاصيل اللقاء

اللقاء كان فى الاسكندريه وكان دعوه كريمه من دكتور حسن فى فيلته فى ابو تلات بالساحل

الشمالى وكان المدعوين كلا من دكتور ثروت غنيم والدكتوره سوزان والدكتور ادور

والاستاذ غازى الضبع والاستاذ محمد الالاتى والاستاذ محمد عفيفى والدكتور انس ومدام ناهد طبعا

والاستاذ محمد ابو مندور واللواء محمد عمر الشهير باللورد ويا رب ما اكون نسيت حد من اللى كانو موجودين

اليوم باه بالتفاصيل الممل من وجهه نظرى

البدايه كان الاتفاق اننا نتجمع فى دليس فى محطه الرمل من الساعه 10 الى 10 ونص صباحا

وكالعادتى لازم احترم معادى جدا فوصلت الساعه 10 وربع بالدقيقه وللاسف رحت ملقتش حد وصل

دخلت دليس استناهم واتصلت بمدام ناهد لقيتهم تايهين عند المعموره والمنتزه

اتصلت بابو مندور لقيت الباشا لسه صاحى ومنزلش اتصلت بغازى كنسل فى وشى :(

المهم قلت انتظر لعل التاخير خير الصراحه زهقت قلت اقوم اتمشى فى النبى دنيال شويه

يكونو وصلو المهم وانا بتمشى لقيت ابو مندور بيتصل بيقلى انتى فين

المهم رحتلهم لقيت ابو مندور مع مدام ناهد ودكتور انس والاستاذ محمد الالاتى

انضميت ليهم وطبعا بعد احر السلامات قعدت جنبهم ننتظر الباقى الى ان هل علينا دكتور ثروت وانضم لينا كمان

وبعدين دكتور ادور وحرمه دكتور سوزان وبعدين قلنا باه يلا بينا ركبنا العربيات واتحركنا من محطه الرمل

ومن حظى السعيد طبعا انى كنت برفقه مدام ناهد ودكتور سوازن ودكتور ثروت غنيم ومقلكوش باه

كنت مبسوطه قد ايه وانا بستمع لكلامهم وحديثهم كنت بجد مستمتعه جدا معاهم المهم رحنا لحد العجمى تقريبا

علشان هينضم لينا اللواء محمد عمر وغازى وعفيفى احنا باه سبقناهم كلهم وطلعنا على ابو تلات

استقبلنا الدكتور حسن عند باب فيلته استقبال حار جدااااااااا وكان اول مره اشوف دكتور حسن

المهم دخلنا وقعدنا وانتظرنا الباقى

كفايه كدا دا الفصل الاول ولنا عوده انتظرونى بعد الفاصل

ريما

29/06/2008, 17h06

عدنا بعد الفاصل

المهم باه هل علينا اول فوج وهو الدكتور انس وابو مندور والدكتور ادور

وبعدهم تانى فوج الاستاذ محمد الالاتى وعفيفى وغازى واللواء محمد عمر

وطبعا قمنا كلنا استقبلناهم دكتور انس ومدام ناهد وانا ودكتور سوزان استقبال حار طبعا

وبكدا باه اكتمل الجروب كله مع بعض وبدانا باه القعده كلنا مع بعض فى احاديث شيقه وممتعه

وكنت فاتحه فاه ومزبهله وببص عليهم زى العته المنغولى كدا والصراحه مش كنت عارفه اتكلم

كنت مستمتعه بالسمع اكتر وطبعا بغناء عفيفى

من وقت للتانى

نيجى باه فى راى فى كل المجموعه وانتظرونى بعد الفاصل تانى

ريما

29/06/2008, 17h39

عدنا والعود احمد وعبد الجبار وخالهم عمو سامى

بصو الصراحه انا كنت مبهوره باليوم كله بس تعالو ننم على ضيف ضيف

وطبعا اولهم المضيف الدكتور حسن بصو لو قلتكم على رقته وزوقه وكرم اخلاقه

مش هوفيه حقه من هنا للسنه الجايه انسان بسيط ورقيق جدا واستغربت جدا انه جد

دكتور ثروت غنيم انسان كدا اول ما يتكلم لازم تفتح بقك وتلعن ابو الجهل اللى احنا فيه

دا زائد بساطته ورقته وكرمه وحنيته الزايده جدا واهتمامه بالاخرين قبل نفسه

واحلى حاجه باه السلطه بتعته انا نفسى معرفش اعملها راجل فوق الوصف

نيجى باه باه لقمر القعده دكتور سوزان ست كدا تتمنى تعيش معاها على طول

خفه دم وجدعنه مشفتش زيهم احساسك انك مع اختك الصغيره مش الكبيره

وهى اللى وصلتنى لحد اهلى فى نهايه اليوم ودا كان شرف ليا طبعا

واعتزاز ان دكتور سوزان بنفسها خايفه على

دكتور ادور باه انسان هادى جدا وديع جدا جدا عيون تشع ذكاء احساسك وانت قاعد انك

عايز تنكش فيه علشان يتكلم وان اتكلم نفسك يكمل وتسمعه انسان جميل بجد متملش من قعدته

دا غير ذكرياته اللى كان بيحكهالنا واحنا مروحين راجل عسل

فاصل ونعود معلش يا جماعه استحملونى لسه راجعه من السفر

غازي الضبع

29/06/2008, 17h47

يا سلام
يا سلام عليكي يا ريما وعلى أسلوبك الجامد في الحكاوي
أنا بقالي نُص ساعة باضحك على طريقة الحكاية
وخاصة فقرة مالقيتش حد مستنيني واتصلت بابومندور لقيت الباشا لسه نايم ، فاتصلت بغازي كانسل عليا :(
ما شاء الله
واضح إننا كنا مشتاقينلك ومنتظرينك على أحر من الجمر :mdr:
أكملي يا ريما
إلهي ينجحلك المقاصد
وانا كمان هادخل أحكي وبقية المجموعة كلها إن شاء الله وفي انتظار الصوّر ..

mohamedafify

29/06/2008, 17h50

اخوانى الاعزاء هذة بعض الصور من لقاء الاسكندرية انا ارفع صور وانتو احكو اللى حصل فى اللقاء عشان انا ايدى تقيلة فى الكتابة مع تحياتى محمد عفيفى ملحوظة فية صورة رفعت غلط لانها مش فى الاسكندرية كانت فى الاسماعلية ارجو لو حد يعرف يشيلها

1

http://www.sama3y.net/forum/attachment.php?attachmentid=96853&stc=1&d=1214766384
2

http://www.sama3y.net/forum/attachment.php?attachmentid=96856&stc=1&d=1214766384
3

http://www.sama3y.net/forum/attachment.php?attachmentid=96857&stc=1&d=1214766384

غازي الضبع

29/06/2008, 17h54

اخوانى الاعزاء هذة بعض الصور من لقاء الاسكندرية انا ارفع صور وانتو احكو اللى حصل فى اللقاء عشان انا ايدى تقيلة فى الكتابة مع تحياتى محمد عفيفى

يا أ. عفيفي
ركّز شوية يا عم الحاج
الأستاذ السيد المشاعلي ماكانش معانا في إسكندرية
إنت جبت الصورة دي منين ؟ :crazy:
وبعدين كبّر الخط شوية يا عم
حَوَلـتنـا :mdr:

mohamedafify

29/06/2008, 18h05

وهذة مجموعة صور اخرى من اللقاء ارجو ان تنول اعجابكم مع تحياتى محمد عفيفى

1

http://www.sama3y.net/forum/attachment.php?attachmentid=96863&stc=1&d=1214766533
2

http://www.sama3y.net/forum/attachment.php?attachmentid=96864&stc=1&d=1214766533
3

http://www.sama3y.net/forum/attachment.php?attachmentid=96866&stc=1&d=1214766533
4

http://www.sama3y.net/forum/attachment.php?attachmentid=96868&stc=1&d=1214766533

mohamedafify

29/06/2008, 18h13

وهذة مجموعة صور اخرى وعليكم كتابة ما حصل فى اللقاء انتم مع تحياتى محمد عفيفى

1

http://www.sama3y.net/forum/attachment.php?attachmentid=96874&stc=1&d=1214766746
2

http://www.sama3y.net/forum/attachment.php?attachmentid=96875&stc=1&d=1214766746

ريما

29/06/2008, 18h24

عدنا من تانى معاكو

دكتور انس طبعا غنى عن التعريف وكما توقعته فعلا بس للاسف

متكلمتش معاه كتير كنت براقبه من بعيد لبعيد راجل جميل كالعاده

مدام ناهد بردو مش عارفه ازود ايه من عندى عليها اكتر ما بيتقال عليها

واحلى حاجه فيها انها كانت بتوصى دكتور سوزى على وانها توصلنى لاهلى فى ايديهم

حسستنى انى بيبى صغير وتايه من ممته

اللواء محمد عمر انسان جميل وبسيط من النظره الاولى تخاف تيجى جنبه علشان صوته عالى

بس لما بيضحك ويهرج معاك بتحسه جميل خالص وطيب جدا

استاذ محمد الالاتى فكرتى بردو متغيرتش عنه انسان بسيط وعفوى صوته على الحقيقه احلى

حافظ كل الالحان والاغانى اللى اتقالت كشكول فعلا زى ما بيقول عفيفى انسان طلوق وجميل

غازى باشا بردو مش عارفه اقول عليه هو زى ما قالو عليه بيبى فيس خالص وشه فيه براءه الاطفال

وعيونه فيها اقتناص الفهود مترقب كل الاشياء من بعيد لبعيد

الفنان عفيفى صوته تحفه على الطبيعه وبدون مايك او مؤثرات صوت واحساسه وهو بيغنى جميل

واحلى حاجه ان كان كل همه هو الغناء تحسه كدا بيتنفس غناء

نيجى باه للاخ ابو مندور الصراحه بردو مش عارفه اقول عليه ايه متهايالى كلكم عارفينه باه

ولحد كدا بس خلاص دا كان اليوم كله واللى حصل فيه بالتفاصيل الممل

ناقص باه الصور ومنتظراها معاكو ومنتظره تعليقاتكو

mohamedafify

29/06/2008, 18h33

وهذة مجموعة صور اخرى وعليكم كتابة ما حصل فى اللقاء انتم مع تحياتى محمد عفيفى

1

http://www.sama3y.net/forum/attachment.php?attachmentid=96882&stc=1&d=1214767059
2

http://www.sama3y.net/forum/attachment.php?attachmentid=96883&stc=1&d=1214767059
3

http://www.sama3y.net/forum/attachment.php?attachmentid=96884&stc=1&d=1214767059

غازي الضبع

29/06/2008, 18h35

والله يا ريما برافو عليكي
على فكرة مهما حاولنا أن نكتب عن اللقاء
لن نكتب مثلما كتبتي بعفويتك وتلقائيتك وشفافيتك
كلامك جميل وصادق ينم عن مشاعرك وأحاسيسك وطيبة قلبك
وعلى فكرة إنتي وصفتي الجميع ما عدا واحدة كانت متألقة جدا في اللقاء
وهي الآنسة ريما
البنت الرقيقة اللي كانت متخصصة في الشاي وتقديم الطلبات طول النهار :cool:
كلنا قلنا عليكي إننا وكأننا نعرفك من سنين
البساطة والصدق يشعان من نظراتك
وأقولك الحق : أنا بقى ماكنتش متوقعك كده
كنت واخد فكرة جوايا عنك
بس الحمد لله طلعتي منتهى العقل والرزانة :mdr:

ريما

29/06/2008, 18h41

فكرتنى صحيح بحاجه مهمه جدا الشاى

على فكره يا جماعه كانو مستغلين سذاجتى وكل شويه يخلونى اعملهم شاى

تقريبا كانو وخدنى بدل الواد نصه صبى القهوه

وبعدين يا غازى افندى رقه ايه انت هتفشر عليهم وكمان عقل طلع امتى دا يا غازى

المهم منتظرين باقى الصور والفيديوهات يا ريت

صباح2015

29/06/2008, 19h13

بسم الله الرحمن الرحيم
أولا أحب أعرفكم بنفسى
فأنا صديقة للدكتورة / زوجة الدكتور / حسن وكنت موجودة باللقاء الذى
تم بفيلا الدكتور / حسن وكنت سعيدة جداً برؤية تلك الكوكبة الرائعة التى سمعت عنها قبل أن أراها ولقد لمست فى الجميع مقدار الصداقة الحميمة التى تربطهم ببعضهم والغريب انها نشأت من الهواء ولكن الفضل كله يرجع الى هذا المنتدى
الرائع والذى أسعدنى أن أكون عضوة جديدة به
لذا أرجو من السادة المشرفين تفعيل هذه المشاركة فى الموضوع لكى يراها الجميع
ولكم تحياتى وشكرى ,,,

mohamedafify

29/06/2008, 19h15

اختى العزيز ريما انتى كما قال الاستاذ غازى نعم الاخت وكنتى فعلا منورة فى اللقاء وقمتىة باعلى واجب معانا شكرا ليكى ولدكتور حسن على كرم الضيافة هو وسيادة اللواء محمد عمر على حسن الاستقبال لنا جميعا اناكنت مستمتع جدا بهذة الصحبة الجميلة من الاساتذة المثقافين اتمنى اللقاء بيهم دوما ان شاء اللة مع تحياتى محمد عفيفى

غازي الضبع

29/06/2008, 19h21

بسم الله الرحمن الرحيم

أولا أحب أعرفكم بنفسى
فأنا صديقة للدكتورة / زوجة الدكتور / حسن وكنت موجودة باللقاء الذى
تم بفيلا الدكتور / حسن وكنت سعيدة جداً برؤية تلك الكوكبة الرائعة التى سمعت عنها قبل أن أراها ولقد لمست فى الجميع مقدار الصداقة الحميمة التى تربطهم ببعضهم والغريب انها نشأت من الهواء ولكن الفضل كله يرجع الى هذا المنتدى
الرائع والذى أسعدنى أن أكون عضوة جديدة به
لذا أرجو من السادة المشرفين تفعيل هذه المشاركة فى الموضوع لكى يراها الجميع
ولكم تحياتى وشكرى ,,,

الأستاذة صبـاح
أهلا وسهلا بكِ بينـنا
المنتدى كله نوّر بوجود حضرتك معنا
ولنا عظيم الشرف بالتسجيل معنا في بيتنا سماعي
تحياتي واحترامي

ريما

29/06/2008, 19h23

مدام صباح طبعا انا متكلمتش عن الكواليس للاسف

وكانت الكواليس فيها حرم دكتور حسن ومدام صباح اللى كنت اعتقد انها اخت دكتور حسن

وحرم اللواء محمد عمر

مش قادره اوصف مدى الاهتمام والتعب اللى تعبوه علشانا ومدى الازعاج والدوشه اللى سببناها ليهم

ناس جميله اوى كنت بحسب الناس دى انقرضت الصراحه صدقونى لو شفتو الناس دى

هتحس ان لسه فى خير وناس جميله فى الدنيا

NAHID 76

29/06/2008, 19h40

بسم الله الرحمن الرحيم
انا داخلة الان وعلى وجه السرعة علشان ارحب بالضيفة الجديدة عضوة سماعى الجديدة من الاسكندرية
اهلا ومرحبا بك زميلة عزيزة
اهلا بك وسط اسرتك الثانية سماعى للطرب
اهلا ومرحبا وسعدنا برؤياك فى لقاء الاسكندرية
رحبوا معى فى الاجتماعيات بصباح 2015
تحياتى

حسن كشك

29/06/2008, 21h34

لقاء رائع بالتاكيد
وفاتنى بالتاكيد
وانا مش عارف ليه حظى سئ فى لقاءات الاسكندرية
لكن على كل حال ..... مسيرنا نتقابل
منورين ياجماعه بجد والله ... ربنا يديم عليكم الصداقة والمحبة
لكن لى ملاحظتين
اولها : انى مش شايف صور خالص لمدام ناهد ولا الاخت ريما ..... ليه ؟؟؟
ثانيها : انى كلمتكم بالموبايل وطلبت انى اكلم كل الحاضرين .... لكن لم يكلمنى الدكتور انس ولا المدام ناهد ولا الاخت ريما ولا الدكتوره سوزان ..... ...ولا اخى محمد عفيفى .... رغم وصولهم ... حسب ماحكته ريما ..... ليه تانى ؟؟؟؟
زعلانين منى ولا ايه
تحياتى للجميع

د أنس البن

29/06/2008, 21h41

يا سى حسن كشك بك
إنت بالذات لايمكن أى إنسان يزعل منك أبدا
وانت عارف السبب

إلا فى حاله واحده فقط
وهى أن لايكون له سابق معرفة بك عن قرب
كلنا بنحبك يا ابو على يا جميل

وبعدين انا لسه ها أكتب عن لقاء اسكندريه كمان وكمان

ريما

29/06/2008, 22h00

استاذ حسن بجد افتقد وجود حضرتك كان نفسى اتعرف عليك عن قرب

وبالنسبه لموضوع الصور هو اكيد فيه صور لمدام ناهد ودكتور سوزان

هتنزل لكن بالنسبالى محدش رضى يصورنى وقعدت اتحايل وهما يقولى ابدا انتى

مش photogenic طب صوره واحده وهما يقولو ابدا ممنوع ودى الحكايه باختصار

نيجى باه للمكالمه محدش جاب سيره اصلا ان حضرتك عايز تكلمنا

بس تتعوض ان شاء الله مره تانى وتكون معانا لايف صوت وصوره

د أنس البن

30/06/2008, 03h03

حول لقاء اسكندريه كمان وكمان

أكيد اختنا العزيزه ريما أعطت الموضوع حقه تماما
وتفضلت بتقديم اسكريبت ممتاز جدا عن هذا اللقاء الجميل
يبقى لى أن أقول عن مفاجاءات هذا اللقاء بالنسبة لى
وأعتقد كل صديق وصديقه من الموجودين فوجئ بانطباعات لم تكن عنده من قبل أو تغاير ما كان يتصوره فى خياله
وفى رأيى الشخصى تلك المفاجاءات هى كلمة السر فى روعة وحلاوة مثل هذه اللقاءات
أولا : الأخت العزيزه ريما كانت مفاجأة اللقاء الأولى بلا جدال
وأعتقد أنه رأى يشاركنى فيه كثير من الأصدقاء
كنت أتصورها بنت شقيه كلمنجيه كثيرة الحركه تفرض نفسها فى أى نقاش وتحاور وتقاطع وتنفعل بصوت مرتفع وإشارات كثيرة بيديها الخ الخ الخ
فماذا وجدت ؟ وجدت أمامى فتاة وادعة هادئة ساكنة خجولة
تمتلئ طيبة لم تتكلم إلا بضع كلمات أو تزيد قليلا , والبضع هو مافوق الثلاثه ودون التسعه , وبصوت خفيض ملئ بالخجل ولا يكاد يسمع إلا عنوه , هل تصور أحدكم ذلك ؟ تلك هى الحقيقه كما رأيتها ورآها كل الزملاء
المفاجأة الثانيه هى الزميله العزيزه الرائعه الدكتوره سوزان(سويت دريم) طبعا التقيت بها من قبل مرتين لكن فى هذا اللقاء فاجأتنى بأنها تغنى وصاحبة صوت بارع تؤدى فى تمكن ألحان الشيخ سيد درويش ووجدتها متعصبة له وتحفظ جميع ألحانه عن ظهر قلب , ولما سألتها فى ذلك أجابتنى بأن خالها وهو أستاذ جامعى هو الذى لقنها تلك الألحان وحفظها لها على نغمات عوده وعلمت منها أن خالها الأستاذ الجامعى أخذ هذه الألحان حفظا ونقلا كما كتبها ابن الإسكندريه الشيخ سيد درويش عن واحد من معاصريه وشيوخه وهو الشيخ خميس وسأترك لها هذا الجانب لتشرحه لحضراتكم بالتفصيل , المهم أنها غنت جزء من دور أنا هويت ودور أنا عشقت ودويتو على أد الليل ما يطول
وغنت مع الآلاتى الليله الكبيره وحاجات كتير ربما تتذكرها هى أو يتذكرها زملائى الأعزاء
وللحديث بقيه .......................

mohamedafify

30/06/2008, 07h10

الاخت العزيزة صباح كنتى منورة اللقاء ومرحبا بيكى ضمن هذة العائلة الجميلة اخوكى محمد عفيفى

احمد البنهاوي

30/06/2008, 08h49

السلام عليكم اخواني العزاء في هذا الصرح الكبير طبعا مش هاكرر الكلام علي روح الود والأخوه التي تتاصل فينا كاعضاء في بيتنا الكبير سماعي فقط انا اريد ان اقول انني كنت اتمني كثيرا ان اكون بينكم لالتقي اخواني الذين سعدت برايتهم قبل ذلك كعمنا الكبير الألاتي واخويا الكبير غازي وطبعا جاري العزيز الأستاذ محمد عفيفي (يا عم غازي عمنا عفيفي قاللي انكو حاولتو تتصلوا بيا بس اعمل ايه مكان الشغل بتاعي مفيهوش شبكة موبايل خالص فمعلش وتتعوض ) وطبعا كان نفسي اتعرف والتقي بباقي الأخوة اللي كانو موجودين واخص منهم بالذكر الدكتور انس الذي اتمني ان التقيه يوما ان شاء الله طبعا سرد الخت ريما للقاء كان ممتع وجميل كان كنا معاكو بالضبط وطبعا الصور نقلت جزء من اللقاء بس الحضور طبعا هايبقي له طعم تاني

اتمني من الله ان انا ماكونش في الشغل اللقاء الجاي عشان اكون معاكم ان شاء الله

NAHID 76

30/06/2008, 09h01

بسم الله الرحمن الرحيم
اخى ودفعتى الفاضل حسن كشك بك
اولا ومبدئيا لا يمكن يزعل منك انسان
اما ان كان هناك سبب جوهرى للزعل
ربما يكون علشان لحد الان معزمتناش فى الاسماعلية
واخى عماد كان وعد بان الزيارة الجاية فى الاسماعلية بمناسبة الصيف والمنجة وحاجة زى كدة
المهم
ان حبو يكون هناك سفير للقلب البيض والطيبة
يبقى هوة
حسن كشك وبس
تحياتى

sweet dreams

30/06/2008, 11h03

السلام عليكم و رحمة الله و بركاته
احبائي اعضاء المنتدى الجميل سماعي، خلوني ارحب اولا بالوردة الجديدة في حديقة سماعي
مدام صباح. و مدام صباح لمن لم يكن معنا في اللقاء الاخير الرائع بفيللا الدكتور حسن كانت هي و زوجته
كالجندي المجهول ، فالكل تمتع باليوم بشكل رائع بسبب مجهودات السيدتان الرائعتان . في صمت و بدون هيصة و زيطةزي ما ريما عملت علشان عملت كوبايتين شاي :mdr:
بجد بجد خلوني اقول لكم انا كمان اد ايه اللقاء كان ممتع و مليان مفاجات . محمد عفيفي مطرب موهوب جدا و خسارة ان مواهبه غير مستغلة ، و مدام ناهد كانت كعادتها مليئة بالمفاجات و محمد الالاتي اللي فعلا حسيت انه انسان رائع من داخله
و مليان بالسلام الداخلي اللي بيشع على تصرفاته و يديك احساس اد ايه هو انسان طيب و تلقائي ،
و ايضا المفاجاة اللي بعدها كانت ان دكتور ثروت و هو استاذي و معلمي في كلية الطب يجيد فن الطبخ
واااااااااااااو و بيعمل سلطة تجنن و صينية كوسة بالباشاميل و تورلي ..... يعني طبخ تقيل مش اي حاجة
المفاجاة التالية كانت يونيكورن اللي اكتشفت انه شاب يحمل صفات كتير غير موجودة في شباب اليومين دول
فهو شاب مثقف فنان مؤدب و على خلق كريم و كمان دمه شربات و يحترم الاكبر منه سنا ز. و بعد شوية حاكمل لكم باقي حكاياتي عن لقاءنا الجميل

unicorn

30/06/2008, 16h04

السلام عليكم
يوم جميل و لقاء رائع قضيناه جميعا ,نسينا به اعباءنا و أعمالنا و حياتنا ,و تفرغنا فقط لهوايتنا و حبنا للسمع و للسماعيين
جددنا فيه صلاتنا ببعض و أعدنا اكتشاف البعض
ضيافة كريمة و دافئة من الدكتور حسن حافظ و حرمه و مجهود كبير بذلوه لنستمتع بهذا اليوم بين شمس و هواء و موسيقى و طرب و ضحكات وغناء جماعى
و شاركتهم مجهودهم السيدة صباح صديقة حرم دكتور حسن و حرم اللورد التى شاركتهم هذا الجهد فى الفيلا,و دكتور ثروت ايضا الذى أصر على ان ينالنا كرمه
و كما تفضل أساتذتنا بشرح تفاصيل اليوم الجميل , لقاء فى ديليس كافيه ثم تجمع فى طريق الساحل الشمالى مع اللورد و غازى و استاذ محمد عفيفي ثم التوجه الى فيلا دكتور حسن بابو تلات
الجو كان رائع فعلا و الجميع متحمس و سعيد بالمقابلة
كان لنا استكشاف مع ريما و دكتورة سوزان و دكتور ادوارد و استاذ عفيفي
ريما و كما تفضل و قال دكتور انس شخصية مختلفة تماما عن شخصيتها فى المنتدى فالمشاكسة و اللعب الذى تظهر به فى المنتدى يختفى تماما وراء خجل و هدوء و رزانة امامنا
و تولت هى نصبة الشاى و المشاريب لتقديمها للجميع
دكتورة سوزان سميعة من طراز خاص ذوقها عالى جدا و حسها الفنى غاية فى الرقى
اما المفاجأة فهى عذوبة صوتها فى الغناء و صوتها بدون أدنى مبالغة فى أذنى مطابق لصوت الفنانة عزة بلبع , أمتعتنا بغناء انا هويت و انتهيت و انا عشقت لسيد درويش ثم أخبرنا دكتور ادوارد بجمال أداءها لغنوة أعطنى الناى و غنى لفيروز , و لم نفوت الفرصة فألححنا لتشدو بها بمنتهى التمكن و الحرفية و طبعا مع اشارات المايسترو أستاذ الاتى
المفاجأة الثالثة عفيفي أو استاذ محمد عفيفي أو المطرب الفنان محمد عفيفي
اولا خفة ظل تؤهله لدور البطولة فى افلام كوميدية فقد استمتعت معه انا و غازى ليومين بقفشات و ضحكات لم تتوقف
ثانيا رجولة و جدعنة و حب لنا يمتلئ بهم قلبه , حقيقة ظل خلال اليومين يتفنن كيف يسعدنا و يمتعنا معه بعطاؤه الفنى العالى
ثالثا و الاهم صوت غير عادى و نفس باسم الله ما شاء الله و قدرة على الغناء المتواصل بلا ارهاق لا تتوفر الا فى فنان قدير و موسيقى رائع
أمتعنا بكثير من الأغنيات بصوته مع ميكروفون و مؤثرات و بدون كلاهما و انتشى كل منا بهذه الحنجرة الذهبية و اطربنا صوته كثيرا و دفعنا جميعا للتصفيق له على روعة اداؤه
كنت اتمنى حضور جميع الأعضاء ليستمع لدندنة دكتور أنس معنا و الى تصفيق مدام ناهد و دكتور ثروت مع استاذ عفيفي و تعديلات المايسترو الالاتى الموسيقية و ذاكرته الفنية المؤرخة لكل الأحداث الموسيقية و ليروا اللورد الذى اهتم بتسجيل كل تفاصيل اللقاء على كاميرا الفيديو و الذى وعد عفيفي بانتاج كليب غنائى له و دكتور حسن و أسرته المبتسمين لنا جميعا و السعادة بنا واضحة على وجوههم.
و تمنينا حضور استاذ كمال عبد الرحمن و استاذ حسن كشك و استاذ محمود عيادى الذين اعتذروا عن اللقاء بسبب اعمالهم و اتصل بنا استاذ حسن كشك و اصر على ان يكلم فردا فردا و يتمنى للجميع يوما سعيدا فى لفتة غاية فى الذوق منه
و مر بنا الوقت سريعا و انتهى اليوم الجميل الذى حلق بنا فوق السحاب لنعود مرة أخرى الى حياتنا و اعباءنا ,و لكن بوعود بتكرار المقابلة و باستمرار الحب بيننا جميعا
شكرا لصاحب الدعوة الكريمة دكتور حسن و شكرا لأهل بيته الكرام على حسن ضيافتهم لنا و شكرا لكل الأعضاء الذين أمتعونا بمجلسهم الرائع و شكرا لضيوف اسكندرية دكتور أنس و مدام ناهد و اللواء محمد عمر و حرمه و أستاذ محمد الالاتى و أستاذ محمد عفيفي و أخونا غازى الضبع و أختنا ريما على تشريفهم للأسكندرية فى يوم اخر من ايام سماعى فى رحابها.

صباح2015

30/06/2008, 18h44

بسم الله الرحمن الرحيم
أخواتى واخوتى الاعزاء
أشكركم شكراً جزيلاً على ترحيبكم لى وطبعاً المنتدى منور بكم ولى عظيم الشرف بوجودى معكم وانضمامى لأسرة سماعى العظيمة
أما عن إنطباعى بعد اللقاء :
السيدة / ناهد : انسانه تتصرف على طبيعتها ـ عِشرية جداً من أول وهلة
السيدة / حرم اللواء / محمد عمر : طِيبة قلب لاحدود لها ـ يفيض منه الحنان
السيدة / د . سوزان : جميلة الروح و شديدة التواضع ـ خفيفة الظل تحب الناس
الآنسة / ريما : هادئة الطبع ـ وردة اللقاء
قاموا جميعهن بالمشاركة بمجهود كبير فى الإعداد .. والتقديم .. وما تلاه

أما الاخوة الافاضل الذين تشرفت بمعرفتهم فإن الحديث عنهم قد يطول لثقافتهم العالية وعلمهم الغزير ومناقشتهم البناءة فى المواضيع المختلفة
إضافة إلى جو الطرب العربى الأصيل الذى ساد المكان
ولكم جميعاَ شكرى واحترامى ,,,

د.حسن

30/06/2008, 22h29

وأخيراً كان اللقاء
وقبل أن أخوض فيه لابد من همستى إعتذار
الأولى لإحساسى بنقص فى الحفاوة من جانبنا بسبب نقص الإمكانيات نتيجة السطو على الفيلا قبل موعد اللقاء بأيام
والثانية عدم قدرتى على توديع الأخوة والأخوات حتى مكان إنتظار سيارتهم لإحساسى بإرهاق وقت مغادرتهم
فأرجو قبول الإعتذارين
اللقاء جمعنى مع من تعرفت عليهم وقابلتهم من قبل وصارت بيننا صداقة قوية وهم د. أنس وحرمه السيدة ناهد - اللواء محمد عمر - المايسترو الآلاتى - الأستاذ غازى
وكل منهم غنى عن التعريف
وجمعنى مع من تعرفت عليهم ولم أقابلهم وهم الفنان محمد عفيفى ذو الصوت الرائع والذى بذل مجهوداً جباراً ليسعدنا بالطرب الأصيل - الآنسة ريما مفاجأة الحفل .. أقصد اللقاء
أذكر أننى يوماً ما وصفتها بالمشاكسة ولكن عند تعرفنا بها وجدناها عكس ذلك وأكتر حاجة عملتها الشاى !!
وجمعنى مع شباب زى الورد وهم أ. رامز وأ. أحمد
وهما من جيل الأمل لمنتدى سماعى
ولن أنسى السيدة الفاضلة حرم اللواء محمد عمر والتى تشرفنا بوجودها مع الأسرة

أما عن أهل اسكندرية فمهما كتبت فلن أوفى أ. د. ثروت غنيم حقه فى كرمه وتواضعه -
د. إدوارد وحرمه د. سوزان التى بذلت مجهود كبير أشكرها عليه - أ. محمد أبو مندور والذى كنا على إتصال للتنسيق حتى فجر يوم اللقاء - أ. حازم البيلى الصديق الصدوق لأبو مندور ولكنه حضر متأخراً بسبب العمل
أما من حالت ظروفهم عن الحضور .. فلى معهم عتاب خاص .. لكن على الخاص
فعلاً كان يوماً رائعاً بكل المقاييس .. فمن يصدق أن يكون كل هذا الحب والوفاء والصداقة أصله هواء أو فضاء أو كما يقولون عالم إفتراضى ولكنه تحول إلى عالم حقيقى

بفضل ... منتدى سماعى

شكراً له ولكم

مع تحياتى

غازي الضبع

30/06/2008, 23h15

والله يا دكتور حسن
احنا اللي مش عارفين نشكر حضرتك إزاي على هذا الكرم الهائل
واحنا كنا لامسين جدا مدى تعب حضرتك وحرمكم المصون في الإعداد لهذا اللقاء
وكذلك الأستاذ الدكتور ثروت غنيم الذي كان يستقبلنا ويقف يراقب احتياجاتنا باستمرار في منتهى التواضع والكرم والحنان
بارك الله فيكم جميعا
أهل اسكندرية .. صحيح أجدع ناس
وطبعا أشكر كل من كانوا خلف الكواليس ، فنحن مقدرين تماما قدر المجهود الذي بذلوه لإخراج هذا اللقاء بهذه الصورة الجميلة الطيبة .
وأنتهز الفرصة كي أشكر كل من حضر اللقاء
الدكتور أنس اللي واضح إنه دكتور شاطر قوي .. سمعته كان بيوصف دوا لعم محمد الآلاتي .. كان بيقول له خد الدوا ده حباية واحد صغيرة كده جميلة جدا هاضيّعلك كل حاجة ..
والله .. أنا في منتهى الإعجاب بهذا الأسلوب الجميل الذي يريح قلب المريض .. شوفوا بيجمّل الاسبرينة إزاي .. عشان الواحد ياخدها وهو مطمّن ..
ويا ريت كل الدكاترة زيك يا دكتور أنس والله
بارك الله فيك
والليدي ناهــــــــد التي كانت الفرحة تظهر على نظراتها كالعادة .
والدكتور إدوارد وحرمه الزهرة والوردة الجميلة الدكتورة سوزان بروحها المرحة الصافية .
وجناب اللورد وحرمه المصون واستضافتهما لنا أنا والفنان ...
الأستاذ محمد عفيفي والذي سعدت بصحبته على مدار يومان كانا في منتهى الجمال ( بس لو ماكانش فيهم ناموس ;) ) ..
وطبعا عم محمد الآلاتي الذي غنّى لنا أغنية جعلتني أدمع من حلاوتها ..
وأصدقائي وبنو جيلي أبو مندور وحازم وريما
وحقيقي اللقاء كان ينقص بقية أعضاء المنتدى الكرام ..
وخاصةً توأم روحي الأستاذ السيد المشاعلي والأستاذ كمال عبد الرحمن ،، وحبيبنا كلنا الأستاذ حسن كشك ..
أتمنى من الله عز وجل أن ينعم علينا بالمودة والمحبة وأن يعيد علينا هذه الأيام الجميلة على خير ..

د أنس البن

01/07/2008, 04h32

حول لقاء اسكندريه كمان وكمان

يبقى لى أن أقول عن مفاجاءات هذا اللقاء بالنسبة لى
وأعتقد كل صديق وصديقه من الموجودين فوجئ بانطباعات لم تكن عنده من قبل أو تغاير ما كان يتصوره فى خياله
وفى رأيى الشخصى تلك المفاجاءات هى كلمة السر فى روعة وحلاوة مثل هذه اللقاءات
وللحديث بقيه .......................

2
حول لقاء اسكندريه كمان وكمان
تحثت من قبل عن مفاجأتين رائعتين فى هذا اللقاء الرائع
الآنسه ريما والدكتوره سوزان
ودلوقتى أقول كلمتين عن المفاجأه الثالثه عن إنسان رغم أنى قابلته قبل ذلك أكثر من مره
إلا أنه فى هذا اللقاء ظهر لى جانبه الإجتماعى والإنسانى فى أعلى تجلياته وهو أستاذنا الدكتور ثروت بك غنيم
هذا الرجل الشيخ الشاب العلامه أستاذ الفارماكولوجيا
الوقور جدا الأنيق جدا
تجلى فى هذا اللقاء ما فى داخله من إنسان
متواضع جدا إجتماعى جدا إلى أبعد الحدود
حتى إنك تتمنى أن يكون رفيقك فى السفر مهما طال
يعنى مثلا لما تنظر لهذا الإنسان وهو يقف فى المطبخ ليعد السلاطات وكان حريصا على أن يشترى بنفسه فى اللحظة الأخيره علب اللبن الزبادى حتى لايصيبها التلف لإعداد أطباق مشهياته ومن قبل أحضر معه طعاما أعده بنفسه فى منزله
ولم ينس بالطبع مع إعداد الطعام أن يعد المواد
التى ستكون مجالا للنقاش بيننا
ماذا أقول عن رجل كان كل همه متابعة الحاضرين وترقب حاجاتهم من قريب وبعيد , ويمر عليهم بأطباق الطعام ويعطيهم بنفسه من البوفيه المفتوح
والأكثر من ذلك وهو العجيب أنه كان يحمل طفاية السجائر
مارا بها على المدخنين ليضعوا فيها بقايا سجائرهم
ويسأل كل واحد عدة مرات عن أى طلب يحتاجه
خلاصة الأمر أنه إنسان فريد وشخصية يندر وجود مثل هذه الصفات مجتمعة فيها فى زماننا هذا
وقد تفضل سعادته وأرسل لى بعض صور اللقاء
أرفعها لحضراتكم وللحديث بقيه ...........

1
http://www.sama3y.net/forum/attachment.php?attachmentid=97069&stc=1&d=1214915013
2
http://www.sama3y.net/forum/attachment.php?attachmentid=97050&stc=1&d=1214886703
3
http://www.sama3y.net/forum/attachment.php?attachmentid=97051&stc=1&d=1214886703
4
http://www.sama3y.net/forum/attachment.php?attachmentid=97052&stc=1&d=1214886703

الألآتى

01/07/2008, 07h50

وسع .. وسع .. وسع .. وسع ..

أنا أزق الطاره وأضرب ميت بمبه .. دنا لُسطى عماره من درب شكمبه

كلما تعددت اللقاءات .. كلما زاذ حبى وعشقى لهذه المجموعة المتفردة ..

هى مجموعة متفردة بالتأكيد .. لأن كل واحد فيهم بلد بحالها .. كل واحد له شخصيته المتميزة التى تختلف عن الأخر .. ولكنهم إجتمعوا على الحب والوفاء والذوق الرفيع ..

لن أتحدث عن تفاصيل اللقاء .. لأن الكل تحدثوا عنه وأفاضوا فى تفاصيله ..

سأتحدث كما عودتكم عن الطعام .. الأكل .. لأن كل واحد لازم ياخد حقه .. الستات الغلابه إللى كانوا محشورين فى المطبخ بين الحلل والصوانى والأطباق .. لكى يعدوا لنا أشهى الأكلات وأطايب الطعام .. لابد من التنويه لمجهوداتهن ..

الفراخ البانيه .. اللحمة الباردة .. الكفتة .. السلاطات .. المشهيات .. كله .. كله .. جميل وطعم ولذيذ .. إن معدتى الحبيبة لا تزال تجتر هذه اللذاذة حتى الأن ..

لأ وإيـــــــه .. الإكتشاف الرهيب .. الشيف الكبير .. الدكتور ثروت غنيم .. الذى إكتشفنا أن له مواهب مطبخية لاتقل عن مواهبة العلمية ..

لقد أحضر معه صنيتان كبيرتان .. الأولى تحوى الكوسة بالباشاميل .. وااااو ... والثانية تحتوى على التورللى اللذيذ .. الذى أعشقه .. ممممم ..

ولقد ظننا فى بادئ الأمر .. أن أهل بيته هن من أعددن هذه الصوانى .. ولكنا فوجئنا أنه هو نفسه من صنع هذا الطعام .. وياله من طعام .. لذيذ بالفعل ..

ده غير طبق السلطة الجميل المتنوع الذى تفنن الدكتور ثروت فى صنعه وتجميله .. صحيح ياناس .. هناك مواهب مدفونه لا تظهر إلا بالمصادفة .. والظروف المواتية ..

الأستاذ الدكتور حسن عبد الحافظ .. صاحب الدعوة والمكان .. الراجل ده صُعب عليا بصراحة ..

لقد علمنا أن فيلته تم سرقتها قبل أيام من اللقاء .. ونتيجة هذا المصاب الأليم .. كانت هناك مشكلة .. كيف يتم إعداد المكان من جديد ليلائم العزومة .. لقد تم تحضير كل شئ وتكملة النواقص فى زمن قياسى .. بحيث لم نشعر بأى نقص فى الإمكانيات ..

الشكر كل الشكر لأخى وحبيبى الدكتور حسن عبد الحافظ .. لإستقباله الرائع وعزومته الشهية ..

الأستاذ الفنان المطرب محمد عفيفى .. الذى قام بمفردة بعمل محطة إذاعية غنائية متكاملة .. فلقد أحضر معه مجموعة من موسيقات الأغانى .. وقام بتشغيلها على اللابتوب .. حيث غنى بطريقى البلاى باك .. وكأننا فى حفل حقيقى وفعلى .. وقام الجميع بأداء دور الكورس للمطرب الفنان .. تخيلوا معى .. كورس مكون من أساتذة جامعات وعلماء وأطباء ومهندسين .. أين نجد هذا الكورس إلا فى هذا المكان وهذا اللقاء .. فهنيئاً لك ياعفيفى بهذا الكورس المتميز ..

ونلتقى بعد الفاصل ..

الألآتى

01/07/2008, 08h13

الدكتور العظيم .. أنس البن وحرمه المصون .. مدام ناهد .. أم المنتدى .. ماذا أقول عنهم ..

يكفى كرمهم الحاتمى وحميميتهم المعهودة .. وحبهم الواضح لكل الناس ..

الدكتور أنس بهدوءه وصوته المنخفض الهادئ .. وعلمه الغزير .. فى كافة المجالات .. لدرجة أنه ينافسنى فى العلوم الموسيقية ..

مدام ناهد .. أو الليدى ناهد .. التى تصر على أنها أكبر منى سناً .. مع أننى أعتقد العكس .. هذه السيدة العظيمة التى لا تنسى الواجب والأصول فى كل شئ .. لاتنسى أن تملأ السيارة بالمأكولات والمشروبات ومالذ وطاب .. وكأننا طالعين رحلة مدرسية .. حنون إلى أقصى درجات الحنان ..

نيجى بقى للدكتورة سوزان ومفاجأتها الحلوة ..

أولاً .. نكتشف فى الدكتورة سوزان .. موهبة الغناء والصوت الجميل المعبر .. الذى يضرب أى مطربة على عينها ..

ثانياً .. مفاجأة الحفل .. الأستاذ الدكتور إدوارد .. زوج الدكتورة سوزان .. أو هى زوجته .. إختاروا إللى يعجبكم ..

بصراحة أول ماعرفت إنه أخصائى نساء وتوليد .. إبتعدت عنه قليلاً .. خشيت أن يكشف عليا .. ويكتشف الفضيحة إللى مخبيها بقالى تسعة أشهر ..:mdr:

نتكلم بقى عن أبو مندور .. العريس الجديد طازة .. لسه بنار الفرن ..

هذا الدينامو الخدوم .. الذى علمنا أنه لم يترك الدكتور حسن لحظة واحدة .. وقام بواجبات الضيافة على أكمل وجه ..

إنسان جميل ومؤدب وإبن ناس كويسين .. وتشعر أنه فلت من هذا الزمن الردئ .. وينتمى بشكل أو بأخر لفرسان الزمن الجميل ..

ولا ننسى صديقة الجميل الأستاذ حازم .. هذا الشاب المخلص الذى أتمنى أن يكون أولادى مثله .. فى أخلاقه وجمال روحه ..

نيجى بقى لحبيب الكل .. وتميمة كل لقاء .. حبيبنا غازى الضبع .. بساطة ونقاء وحب للخير .. هذا الجميل الذى لم أشعر معه بأى فارق فى السن .. أفكاره جديدة دائماً ومتدفقة .. وكأنه حنفية أفكار عايزة جلدة .. مفتوحة على طول ..

بجد .. بجد ياجماعة .. أنا مبسوط .. وكفى .. شوفوا بقى .. لما الألآتى يبقى مبسوط .. يبقى كل شئ تمام ..

نلتقى بعد الفاصل ..

الألآتى

01/07/2008, 08h26

موعدنا الأن مع جناب اللورد ..

سيادة اللواء محمد عمر .. الذى قام بدور كبير فى تصوير وتوثيق اللقاء .. أنا بحب الراجل ده .. وماحدش يسألنى ليه .. لم ولن أنسى عزومته فى شبين الكوم .. العزومة الحاتمية الجميلة .. التى رقصت لها معدتى وزغردت ..

دائماً يحمل معهه شنطة .. أسميها مغارة على بابا .. فيها كل شئ .. ومعظمها أدوات ألكترونية وأجهزة تصوير ..

نيجى بقى للبندقاية والفستقاية الجميلة .. ريما .. حاجة كده زعبله ومش باينه من الأرض .. لكنها لذيذة وظريفة وبنت حلال مصفى .. لم تكن هى نفسها ريما بتاعة المنتدى .. أم لسان زى الفرقلة .. وجدناها إنسانة هادئة .. بنوتة جميلة حلوة .. مش عارف الشباب تايه عنها ليه .. يظهر إنها قاعدة خلف المشربية .. ومابتخرجش خالص ..

وزى ماقالوا الأخوة الأعزاء .. كانت ماسكة البوفيه .. وهاريتنا شاى .. عشرين طقم شاى رايح جاى .. زى مايكون حد فى عيلتها قهوجى .. :mdr:

الشكر أيضا واجب للأخت العزيزة زوجة الدكتور حسن وصديقتها الحميمة .. نشكرهن على تعبهن ومجهوداتهن فى تحضير وإعداد الطعام وخلافة .. ولا ننسى بالطبع السيدة زوجة جناب اللورد .. التى إتجهت مباشراً للمطبخ للمساعدة والعون ..

كفاية كده عليكم .. وشكراً .. شكراً .. أتمنى أن تتعدد اللقاءات وتتكرر .. فى ظل هذه النخبة الجميلة ..

mohamedafify

01/07/2008, 09h04

اخوانى الاعزاء لقد سعدت بوجودى ضمن هذة الكوكبة الجميلة وهذا الكم من العمالقة جواهر مجتمعنا فهذا شرف كبيرجدا لى
اولا ضيافة اللورد لى انا والاستاذ الجميل غازى الضبع فكانت معة الايام تمرفى ثوانىمن حلاوة الوقت
اما اللورد فهو انسان بمعنى الكلمة توقعت انى سوف اتقابل مع لواء يعنى الواحد يقعد منشى ميرىيعنى ولكنى فوجئت انى
تقابلت مع صديق كما لو كنت اعرفة مناكثر من عشرين سنة لتواضة وخفة دمة اللى انا عارف انها مقصودةعشانيخلى الواحد على حريتة وياة على كرمة وحرصة على راحة ضيوفة فقد قضينا ايام جميلة لن انساها
واجى بقى للدكتور حسن زى ما توقعت من قبل ان اتقابل معة انسان محترم جدا وزوق غير عادى ربنا يديم علية الصة هو والاسرة
واجى بقى للانسان الذى دخل قلبى وربع فية ابو مندور كنت متوقع انة سن الدكتور حسن والدكتور ثروت الجميل ولكنى فوجئت بشاب يكتمل فية كل الصفات الحلوة يعنى الجدعنة والكرم والاحساس العالى والمفاجئة صوتة حلو ايضا وبيغنى صح ودة لانة
بيعزف جيتار فانا سعدت بلقاء هذا الانسان المتميز الجميل
واجى بقى للراجل اللى من غيرة معرفش اغنى يعنى اللى كان زبطنى لما كنت اغنى حاجة من غير موسيقى كان يطبل على رجلة ويعمل الموسيقى بصوتة وكان عايزنى اظهر فى احلى صورة يعنى اعنى حلو حتى لما كنت ابعد عن الرتم يزبطن لانى
من غير الموسيقى بتعب شوية شكرا يا احلى الالاتى فى الدنيا واتمنى ان اكون معك فى اى مكان لانك غالى على قلبى جدا
وربنا يديم المحبة
اما الدكتور انس وحرمة الكريم اللى هما بينور اى مكان هما فية فهو عارف غلوتة عندى لانى بحبة جدا جدا
واجى بقى للمفاجئة وهيا الدكتورة سوزان صاحبة الصوت المتمكن التى كانت تغنى بتمكن شديد ادوار سيد درويش وانا نفسى ماعرفش اغنيها بهذا التمكن وسعدت بوجود الدكتور ادورد كان منور القعدة وكان رافع معنوياتى شكرا ليك يا دكتور ادورد
واجى بقى لاختى ريما اللى انا سعدت جدا بلقائها كانت منورة المكان وكانت بتعمل احلى كوب من الشاى وكانت القعدة كلها زى عائلة وريما هى الاخت الضغيرة لكل واحد منا صغيرة فى السن وليس المقام يا ريما ياختى مانا عارفك لاحسن تزعلى منى وعموما انتى زتى معزة بهذا اللقاء
واجى بقى لجنود الكوالس حرم الدكتور حسن اشكرها كل الشكرعلى حسن الضيفة والكرم والاخت صباح العضوة الجديدة فى اسرة سماعى
ومن الحسنات فى هذا اللقاء انى تعرفت على الاستاذ حارم صديق ابو مندور فهو انسان جميل وسميع جامد جدا واتمنى ان التقى بية مرات عديدة هو وكل من كان فى هذا القاء الجميل وارجو ان اكون وفيت الاصدقاء حقهم وما كونش نست حد مع تحياتى محمد عفيفى

د.حسن

01/07/2008, 10h29

غازي الضبع

01/07/2008, 11h14

كلام جميل .. وكلام معقول

ماأقدرش أقول حاجة عنه
لكن ...
فين الصور والفيديو ؟
هو عشان ماكنتش فاضى أصور تعملوا فىّ كده ؟
دا النهاردة التلات .. كل دا الصور بتتحمّض ؟ !!
مازلت فى الإنتظار
مع تحياتى

أنا عن نفسي موبايلي كان فاصل شحن طول اليوم .. فماصورتش حاجة خالص
يا ريت فعلا أحبائنا اللي كانوا بيصورا يرفعوا لنا الصور ..
محبتي

Adel

01/07/2008, 12h34

كان نفسي احضر اللقاء الجميل ده
بس للاسف كان في موضوع مهم اضطرني للبقاء في القاهرة
بس كنت بقلبي معاكم
:emrose::emrose::emrose:

د.حسن

01/07/2008, 13h38

كان نفسي احضر اللقاء الجميل ده

بس للاسف كان في موضوع مهم اضطرني للبقاء في القاهرة
بس كنت بقلبي معاكم
:emrose::emrose::emrose:

نفس الشعور أخى أ. عادل
كان نفسنا تكون معانا كنت نورت اسكندرية
وكنا تناقشنا فى موضوع زيادة حجم المرفوعات للملفات المصورة !!
ولكننا تفاجأنا باعتذرات منكم ومن الأساتذة / السيد المشاعلى وكمال عبدالرحمن وحسن كشك وصديقه الذى أصبح صديقنا محمود عيادى وأحمد الراجحى وسمير عبدالرازق وحسام أبوسالم وآخرون لحسن لو نسيت حد .. يزعل
أتمنى أن نلتقى جميعاً فى اللقاءات القادمة دون إعتذارات
مع تحياتى

sweet dreams

01/07/2008, 19h37

علش اتاخرت عليكم؟ خلوني اكمل لفكم احلى يوم قضيته من سنين:
خلوني اقول لكم كمان مفاجاة ان الدكتور انس ايضا قادر على الغناء و بصوت يشبه صوت عبد المطلب
و بصوت مظبوط جدا كمان. مفاجاة صح؟ اما مدام ناهد دي بجد ينكتب فيها كتب بحالها هي سيدة صالون
بحق قادرة على العناية بكل شيء و بكل الناس بكل بساطة . المفاجاة اللي بعدها كانت اللورد بصراحة كنت بخاف منه
لما يتكلم و بافكر انه بيتخانق مع حد ههههههه بس اكتشفت انه بس صوته عالي كده و لكن قلبه زي الطفل الصغير
و اما بيضحك فعلا بتبان طيبة قلبه. خلوني كمان اقول لكم ان زوجة اللورد ست حنونة و طيبة و صوتها مش بيطلع
و عيونها بتشع امومة و حنان . و مفاجاة تانية اكتشفت فيها ان الاستاذ الكبير غازي الضبع فيه شقاوة من تحت لتحت
تخليك تضحك من قلبك بس المهم انك تراقب حركاته ، ( سوسة ) هههههههه يعني في وسط الناس ما بتسقف و ماسكة الرتم صح للمطرب تبص تلاقي غازي بيسقفغ برتم لوحده مختلف تماما و تلاقي الناس اتلخبطت و هو براءة الاطفال في عينيه ههههههههه
مش باقول لكم سوسة؟ :mdr:
كمان الاستاذ حازم صديق محمد ابو مندور انسان مهذب و فنان و يتمتع بهدوء مريح جدا استمتعنا بصحبته بس للاسف
جزء من اليوم فقط اما باه الاخت ريما فهي كانت البومبوناية بتاعة المجموعة ، حاجة كده صغننة بس لذيذة حسيت انها زي اختي الصغيرة و بعد كده قررت اتبناها ههههههههزاحب اضيف يا جماعة ان اليوم كان رائع لم ينقصنا فعلا الا وجود الباشمهندس حسام ابو سالم اللي حرمنا من وجوده
و السيدة الجميلة نورا نجم . و طبعا الاستاذ حسن كشك اللي مش عارفة ليه دايما مش بيحضر لقاءاتنا. و للحديث بقية

mohamedafify

02/07/2008, 09h57

عزيزى الدكتور حسن هذة بعض الصور التى اخذت فى اللقاء ارجو ان تنول اعجابكم مع تحياتى محمد عفيفى

ريما

03/07/2008, 18h23

من الشمال لليمين فى دليس بمحطه الرمل

استاذ محمد الالاتى وبعدين دكتور ثروت وبعدين دكتور سوزان

وبعدين دكتور انس وبعدين ابو مندور واقف وبعدين مدام ناهد قاعده

وبعدين دكتور ادور

http://www.sama3y.net/forum/attachment.php?attachmentid=97261&stc=1&d=1215109258

unicorn

03/07/2008, 18h53

اسكندرية ليه
http://www.sama3y.net/forum/attachment.php?attachmentid=97264&stc=1&d=1215112746
http://www.sama3y.net/forum/attachment.php?attachmentid=97265&stc=1&d=1215112747
http://www.sama3y.net/forum/attachment.php?attachmentid=97267&stc=1&d=1215112747

sweet dreams

03/07/2008, 19h32

و اخيرا اكيد كلكم لاحظتم اني خليت كلامي عن دكتور حسن للاخر . و ده لاني باوجه له شكر خاص جدا اولا لتعبه و قيامه باجراء اصلاحات عاجلة للمكان قبل وصولنا ليه لانه اكتشف ان عرب المنطقة قاموا بسرقة محتويات الفيللا بالكامل حتى خلاطات الحنفيات و الشبابيك و خلافه. و ثانيا لكرمه الشديد اللي ظهر في كميات الطعام و الفاكهة و الحلويات اللي قدمها . و ثالثا لانه كان طول اليوم يراقب احتياجاتنا و وسائل الراحة اللازمة لكل انسان.
اشكرك يا دكتور حسن على اليوم الجميل اللي لم اغقض مثله منذ زمن طويل ، و اقدم تحياتي و شكري و تقديري للدكتورى حرمكم المصون و لمدام صباح . و اشكر كل المجموعة الجميلة حفظهم الله و حقق امنياتهم جميعا.
و كنا نتمنى وجود الاستاذ حسن كشك معانا و كل الناس الحلوة اللي في المنتدي و ان شاء الله الى لقاء قريب .
تحياتي و تحيات دكتور ادوارد

unicorn

03/07/2008, 19h42

اسكندرية كمان و كمان
http://www.sama3y.net/forum/attachment.php?attachmentid=97280&stc=1&d=1215113885
http://www.sama3y.net/forum/attachment.php?attachmentid=97281&stc=1&d=1215113885
د. ثروت غنيم بيسلم على بعض اصدقائه فى خلفية الصور

unicorn

03/07/2008, 20h25

اسكندرية رايح جاى
http://www.sama3y.net/forum/attachment.php?attachmentid=97283&stc=1&d=1215119392
http://www.sama3y.net/forum/attachment.php?attachmentid=97285&stc=1&d=1215119392
http://www.sama3y.net/forum/attachment.php?attachmentid=97286&stc=1&d=1215119392
http://www.sama3y.net/forum/attachment.php?attachmentid=97302&stc=1&d=1215119392

unicorn

04/07/2008, 01h52

اسكندرية نيويورك
http://www.sama3y.net/forum/attachment.php?attachmentid=97316&stc=1&d=1215136246
http://www.sama3y.net/forum/attachment.php?attachmentid=97317&stc=1&d=1215136246
http://www.sama3y.net/forum/attachment.php?attachmentid=97319&stc=1&d=1215136246
http://www.sama3y.net/forum/attachment.php?attachmentid=97320&stc=1&d=1215136329

unicorn

04/07/2008, 02h03

اسكندرية تانى
و اه
من العشق يانى
http://www.sama3y.net/forum/attachment.php?attachmentid=97321&stc=1&d=1215136839
http://www.sama3y.net/forum/attachment.php?attachmentid=97324&stc=1&d=1215136839
http://www.sama3y.net/forum/attachment.php?attachmentid=97325&stc=1&d=1215137367
http://www.sama3y.net/forum/attachment.php?attachmentid=97326&stc=1&d=1215137367

د أنس البن

04/07/2008, 03h08

اسكندرية كمان و كمان

د. ثروت غنيم بيسلم على بعض اصدقائه فى خلفية الصور

على فكره اللى كان بيسلم عليهم د ثروت بك منهم سعادة رئيس جامعة اسكندريه والتانى أحد فنانى الإسكندريه الكبار لا أتذكر إسمه , ربما يقوله لنا د ثروت .

د أنس البن

04/07/2008, 03h58

اسكندرية كمان و كمان
فى ختام بيانى حول لقاء الإسكندريه
مع الأحباب والأصحاب من السماعيين العظام
أوجه رسالة شكر لكل أبناء الثغر الذين اعتنوا بأضيافهم
وعملوا على إسعادهم وراحتهم
ورسالة شكر خاصه لمضيفنا الكريم د حسن بك وأهل بيته الكرام على حسن وروعة ودفئ استقباله لجميع أضيافه
والحفاوة بهم وسعادته التى أبداها لوجودنا فى ضيافته
ولا أنسى الإسكندرانى الشهم والذى كان له دور كبير فى إنجاح هذا اللقاء الصديق محمد أبو مندور
وشكر أيضا للصديق العزيز والذى تعرفت عليه للمرة الأولى وتجشم معاناة كبيره فى سبيل حرصه على الحضور للحفاوة بنا , ألا وهو د إدوارد وحرمه الصديقه العزيزه د سوزان ( الإسكندرانيه حتى النخاع ) وشكرا لكل الجنود المجهولين الذين أعدوا وجهزوا لهذا اللقاء من خلف الكواليس
ألف شكر لكم جميعا
وإلى لقاء قادم إن تبقى فى العمر نبضة من القلب

د.حسن

04/07/2008, 09h45

البيان الختامى لأعمال اللقاء الثالث بالأسكندرية
---
تم بحمد الله اللقاء الثالث لممثلوا قوى الشعب العاملة بدولة سماعى يوم الجمعة الماضى الموافق السابع والعشرون من يونيو عام 2008 م
وقد تم فيه مناقشة جدول الأعمال بكل بنوده ولقد دارت حوارات ومناقشات واختلافات فى الآراء دون أن يكون هناك أية خلافات وهذا ماأكد عليه المجتمعون فى إنتهاج هذا الأسلوب فى جميع حواراتهم المستقبلية بدولة سماعى
كما أكد المجتمعون على مواصلة المسيرة والكفاح - الغير مُسلح - لتتبوأ دولة سماعى مكانها الطبيعى المرموق بين دول النت وهى الرائدة فى هذا المجال
هذا وقد تم توزيع القرارات التى اتخذت فى اللقاء مقرونة بالصور على كافة الضيوف والأعضاء والمواطنين (أنظر الصفحات السابقة) وقد تم تكليف أ. د. أنس البن بإعلام السادة المشرفين بتلك القرارات لإنشغالهم فى الحملة القومية للتنظيم وقد أشاد اللقاء بعملهم الدؤوب ..
والله أكبر .. والعزة لسماعى
إنتهى البيان - موسيقى عسكرية
جد بقى ... أنحنى إحتراماً وتقديراً وشكراً لكل من تكبد عناء السفر وكل من ساهم ولو بكلمة تشجيع لإنجاح هذا اليوم الرائع الذى أعتبره من أجمل أيام حياتى .. كذلك لكل من سطر كلمة شكر فى المشاركات السابقة .. فالشكر موصول لكم جميعاً
جزاكم الله عنا كل خير وسعادة
مع تحياتى

karawan19

04/07/2008, 11h19

ملحق للبيان الختامى
فى يوم من أجمل الأيام وفى مناسبة من أحلى المناسبات كان لقاء النخبة الرائعة من الأحباء الذين ضربوا المثل فى كرم الخلق والرقى فى التعامل بما يتناسب مع فكر مثقف راقى ومحترم بعيدا عن أى مهاترات أو هيافات أما أحبائنا الذين شرفونا فلابد وأن نسجل أن زيارتهم كانت تشريف كبير لكل الأسكندرية وكما ذكر أخى الدكتور حسن فلابد أن يتسائل أعضاء المنتدى لماذا تكبدو هذا العناء فى السفر – أنه العنصر الأصيل والقناطير المقنطرة من المحبة التى اذا وزعت على كل أعضاء المنتدى تفيض وتزيد ان كلمات الشكر مهما اتسعت لاتكفى - فقد تكبد الدكتور أنس وحرمة الكريمة – هذا الثنائى النادر والذى كانت معرفته مكسبا لا تعادله الملايين - عناء السفر وأى عناء – فقد غادروا بعد الحادية عشرة مساء وكنت قلقا عليهم من صعوبة الطريق ولم يغمض لى جفن حتى وصلتنى رسالتهم بعد الثالثة والنصف صباحا بأنهم وصلوا الى منزلهم بعون الله وحيث شكرت الله وتنفست الصعداء – وكم كان اللواء محمد عمر رائعا – وحرمه - كم كان حانيا وكم كان فى حالة روقان وشفافية رائعة تنطق بالحب وكأنه يحتوى أصدقائه بكل محبة – وقد أحسست بالمشاعر تفيض وتفيض من محمد اللآلاتى هذا الأنسان الرائع النادر أما الأستاذ غازى فحيويته لانظير لها يتحدث فيضا من الأفكار والحيوية تغلفها نظرات المحبة والود وأخيرا وليس بآخر الأستاذ محمد عفيفى الصوت المنطلق والذى يفوق صوته جمالا وقوة كل من يغنى هذه الأيام وصوته البكر يذكرنى بعد المطلب ولم ينسانا الأستاذ حسن كشك الحاضر الغائب الذى أراد أن يشاركنا لقاءنا ولو بمكالمة كان حاضرا معنا بصوته الدافئ المفعم بالحب وأن يطمئن علينا.
لن أتحدث عن أهل الأسكندرية ففرحتهم بلقاء أحبائهم فاقت كل الحدود ولن أتحدث عن كرم الكتور حسن وأهل بيته فقد كنت مشفقا عليهما من كثرة الجهد وتطلعهم لتقديم المزيد والمزيد فشكرا لهما وكم كان محمد أبو مندور رائعا تشعر معه برباط العائلة والمفاجأة الدكتورة سويت دريم التى فاجأتنا بحضورها وزوجها الكريم أماالآنسة ريما فكانت حدوته مصرية أصيلة محتارة تقدم ايه والا ايه فكانت مفاجأة واضافة نورت المكان. أنها أسرة بكل ما تحمله الكلمة وكلمة حق الفضل يرجع لسماعى الذى مكننا من أن نكتشف هذه الكنوز.
وقبل أن أختم أقول لأهل المنتدى ان المنتدى عامر بكل الأمثلة الرائعة خلقا وخلقا وعلى رأى شوقى بك : ألى ما الخلف بينكم الى ما ؟؟؟؟؟

unicorn

04/07/2008, 13h45

و لأختم كلامى حول اللقاء الرائع
لا انسى ان ابدى اسفى على اعتذار استاذى كمال عبد الرحمن عن الحضور و عمى حسن كشك و صديقى العزيز احمد الراجحى و استاذ سيد المشاعلى الذين وعدونا بالحضور و لم يتمكنوا من ذلك بسبب دواعى اعمالهم
كما كنت اتمنى حضور د. محمود رزق الذى اتصلت به كثيرا و تليفونه لم يكن يرد
و كم كنت اتمنى ايضا حضور استاذنا سمير عبد الرازق الذى لم يتح لى شرف التعرف عليه و لا اعرف رقم هاتفه
و صديقنا السكندرى الرائع سامح الباسوسى و الذى يخفى علينا رقم هاتفه خوفا من المعاكسات ( بأوامر من حكومته:mdr:)
و غاب عنا بجسده فقط و لكنه حضر بقلوبنا أخونا الأكبر و استاذنا م. حسام ابو سالم و كم كنا نتمنى رفقته فى هذا اليوم
اكرر شكرى للجمع السعيد الذى امتعنا بحضوره
و تمنياتى بدوام المحبة بيننا جميعا و شوقى للقاءات قريبة فى اسكندرية ان شاء الله

ابو سجى

05/07/2008, 07h36

و صديقنا السكندرى الرائع سامح الباسوسى و الذى يخفى علينا رقم هاتفه خوفا من المعاكسات ( بأوامر من حكومته:mdr:)

والله أنا أتفاجأت باللقاء ده وكان نفسي أكون موجود فيه بس أنا مشكلتي اني بشتغل 12 ساعه وكمان كان يوم الجمعه يوم اللقاء كنت في الشعل
ان شاء الله الجايات أكتر من الريحات
وعلى فكره أنا أديت رقمي للأخت نورا نجم وكلمتني مره في لقاء 25/4/2008 بس تليفوني ضاع وجبت خط جديد وبرضوا يوم 25 أبريل كان عندي شغل
والله يا أبو مندور انا مبسوط يكفي أنك أفتكرتني دي لفته جميله منك
أخوك سامح الباسوسي

abuzahda

01/11/2008, 08h36

إلى مراسلتنا بالإسكندرية

ريـــــمــــــــــــــــا

اليوم باه بالتفاصيل الممل من وجهه نظرى

دلوقت بس عرفت ليه مش بتعجبك قصصي؟

وبالذات فى الشعر عن القصص

لما انتي حكَّاءة بهذه الروعة ؟ وفاضلك تكة وتبقي روائية عظيمة ، مستنية إيه؟

ملحوظة:

أنا بشرب الشاي خفيف من غير سكر ، كباية مش فنجان ،، من فضلك ،،

فؤاد

01/11/2008, 10h41

http://www.sama3y.net/forum/attachment.php?attachmentid=97281&stc=1&d=1215113885

د. ثروت غنيم بيسلم على بعض اصدقائه فى خلفية الصور

عفواً للحذف

فؤاد

01/11/2008, 10h48

ايه يابني في حاجه شغلاك ؟
الآلآتي : لا لا أبداً مفيش
http://www.sama3y.net/forum/attachment.php?attachmentid=114779&d=1225540074

طيب سلامات خلينا نشوفك قُريب ؟
الآلآتي :ايوه ايوه في :(!!!!!!
http://www.sama3y.net/forum/attachment.php?attachmentid=114780&d=1225540074
ملحوظه
أنا بهزر أوعي من الزعل؟

فؤاد

01/11/2008, 15h47

http://www.sama3y.net/forum/attachment.php?attachmentid=97324&stc=1&d=1215136839

أنا بجد بجد بهزر :(
بدون زعل
في شنط كتير في اسكندريه ؟:confused:

ريما

01/11/2008, 17h01

رؤائيه مره واحده يا استاذ سيد ربنا يعز حضرتك

دا من زوق وكرم اخلاق حضرتك لكن لو محتاجين مراسله صحفيه

لجريده حضرتك ومفيش مانع رئيسه تحرير انا تحت امر سياتك

وان كان على الشاى عيونى طبعا مش كوبايه لا ابريق ازاز

بس حضرتك تنور مصر وسعتها لقاء حضرتك هيتعمل من مطبخ

ريحه شياط تحت اشرافى طبعا ودا وعد على فكره بس حضرتك تنورنا

مالك يا فؤاد افندى عمال نازل مشاركات ومالى السيرفر ومستغل ان

مفيش حذف فى الاجتماعيات المفروض نعملك قسم لوحدك تشخبط على مزاجك

عمتا يا عم ولا يهمك ولعلمك دول شنط مدام ناهد اعتقد الاتنين او شنطه منهم

بتاعت دكتور سوزى بس متهايالى الاتنين بتوع مدام ناهد وممكن تسالها هتفيدك اكتر