(يا مسافر وحدك)

[Egy_LoveR]

السلام عليكم

أشهر من نار على علم....لحن عايش منذ أكثر من نصف قرن! ايه اللحن ده وايه الملحن ده....اغنية جميلة...كلمات رقيقة ولحن مثير للجدل والاعجاب

انا مش عارف احطهالكو بصوت عبد الوهاب وللا محمد الحلو وللا نجاة وللا ميين...على العموم كلهم موجودين في المنتدى...أنا حاهطها بصوت نجاة...وهحط موسيقى الاغنية بتوزيع انا شخصيا بحبه...
هنا :
http://www.sama3y.net/forum/attachment.php?attachmentid=14283&d=1155246952
بيعجبني التوزيع ده بالذات والآلات بترد على بعض من اول الدقيقة 02:50
ثم صوت الكمان المليء بالشجن...اسمعوها

صوت الجيتار الكلاسيك ده اقتباس....وايه يعني...الناتج النهائي ابداع

وهاهي بصوت نجاة
http://www.sama3y.net/forum/attachment.php?attachmentid=48227&d=1187043074

طبعا معنى الاغنية وكلماتها كلها شوق ولوعة وألم لفراق المحبوب...واللحن بياخدك في دنيا تانية
بس اللحن ده في حاجة مميزة....شخصيا ده من أكتر الالحان اللي شفتها (بيترقص) عليها..! هي و موسيقى ألف ليلة وليلة..

حتى عند الاجانب...حتى لو لدينا تحفظات على الرقص الشرقي...أقصد ان حتى الاجانب اللي بيرقصو الرقص الشرقي بيستدخمو الاغنية دي كتيير...

بانتظار تحليلاتكم للاغنية واللحن

[هاله]

اخونا الكريم
اختيار موفق من حضرتك
الاغنيه رقيقه جدا فعلا
ورغم انى مش من عشاق عبدالوهاب الا ان تلك الاغنيه من الاغانى التى احبها واستمع لها لعبدالوهاب
وعندك حق فى حيرتك فعلا فعندما تغنى صوت الحب نجاه هذه الاغنيه تغنيها باحساسها الراقى الرقيق
ورغم ان محمد الحلو كان له مذاقه ايضا بغناؤه لتلك الاغنيه الا انها تختلف كل الاختلاف بصوت عبد الوهاب
شكرا لاختيارك اخى الكريم
وتقبل تحياتى

[Egy_LoveR]

الاخت لولي
شكرا على مرورك الكريم...

نسيت أحطها بصوت عبد الوهاب !
http://www.sama3y.net/forum/attachment.php?attachmentid=48228&d=1187043074

[سيادة الرئيس]

الله الله يا عم العاشق على الإختيارات

فكرتني بالشوية دول بتوع عم الأبنودي

أما بعد ... فوصلنا خطابك شمّينا فيه ريحة الأحباب ربنا ما يوري حد غياب

يا مسافر وحدك

و كلام في سرك أخوك في الغربه لوحده و ما تعرفش أد إيه الغنوه دي بتأثر في معاميع عواطف أحشاء بطين قلبي الأيمن و الأوسط و الأيسر و الأعلى و كل بطيناته علاوه على الشريان التاجي

و بعد العواطف و الزي منه نرجع لموضوع الغنوه و طبعا الكلام بتاعها مش محتاج كلام

المقام الأساسي

نهاوند كردي

http://www.sama3y.net/forum/attachment.php?attachmentid=87403&stc=1&d=1211133654


المقدمه الموسيقية فيها ذكاء وهابي في تأكيد ( تيمه ) و تخيلي أنه بدأ الغناء بشكل خفي من أول نوته من المقدمه الموسيقية و يحاول في ( غنائه الخفي ) أنه يكرر ( يا مسافر وحدك ) و يخليك تنطقها قبل ما هو يغنيها

يقوم قايل التيمه على أساس المقام ( جوابه ) و بعدين على ( خمسته الهابطه ) و بعدين يرجع يقولها على أساس المقام تحت بس يكمل الجمله ( وفايتني ) و كل ده حضرته لسه ماغناش ( أكرر إن ده تخيلي )

و تكمل المقدمه بهذا التحضير عشان يشرح موضوعه غنائا و في نفس المقام ( نهاوند كردي ) و بنفس طريقة المقدمه ( أساس جواب - خمسه هابطه - أساس تحت ) و ده بيدي إحساس النداء على إللي مسافر وحده

و في آخر نداء متكرر ( يا مسافر وحدك ) بيركز بالكاف على تالتة المقام وده بيدي إحساس بعدم الركوز و يقوم مزوده فيروح بيك في ( وفايتني ) و يركز على ( الصول ) عشان يزود عدم الركوز و التوتر المطلوب عشان بعد كده يريح ودنك في طلبه و سؤاله ( ليه تبعد عني و تهجرني )

و بعدين ترجع المقدمه مره تانيه و في نفس المقام

ودعني

برضه خمسه و ركوز نصفي

من غير مايسلم

بيعمل قفزه و هابيه ( صول : مي بيمول ) تشرح قد إيه موضوع من غير ما يسلم واجعه يا حبة عيني

و كفايه قلبي أنا مسلم

نغمات متتاليه تشعرك بإنكساره و تسليم قلبه
لا و ابن اللئيمه ما يسكتش يقوم مغزل تغزيله ( بياتيه ) في الإعاده

دي عنيّه دموعها بتتكلم

في ( سكوانس ) متتابع عشان يرجعك لندائه و ترجيه

يا مسافر وحدك و فايتني ليه تبعد عني و تهجرني

OXOXO

ياحضرات المستمعين الموضوع حا يخش في شرح مواجع و إنتظار على نار شوق و حاجات من دي و بتاع و كده

يبقي لازم كراسي عشان نقعد و نفهم إيه موضوع الراجل ده

و راح جايب أحلى كرسي في الأغنيه و مقعدها على واحده كبيره

بياتي النوا

و يروح من أول مزيكة الكوبليه مقعد حضرتك على تحويل جميل و مش جنس بس لا ده المقام بكل قواته و جنسيه الأصلي و الفرعي يعني من فوقه لتحته

و بطريقة التسليم القديم المتكرر يبدأ يشرح موضوع الإنتظار و الحجات من دي و بتاع و كده

و لما يخلص لوع الإنتظار و الحجات من دي و بتاع و كده

و من أول ما ينطق

بس

يرجع بينا للنهاوند عشان يعيد ندائه

يا مسافر وحدك و فايتني ليه تبعد عني و تهجرني

((( ربنا ما يوري حد غياب )))

[abuzahda]

http://img213.imageshack.us/img213/6856/2794vn6.gif
((( ربنا ما يوري حد غياب )))


ربنا يسمع منك يا ابو علي يافنان أوي و سمّيع أوي ومتواضع أوي ، وكل حاجة حلوة أوي يـــــــاغالي أوي أوي أوي

[Egy_LoveR]

أستاذ Abuzahda شكرا جزيلا على المرور

استاذ صلاح....تسلم الايادي على التحليل الجميل ده
الاغاني دي بتوجع المتغربين اوي انا عارف...اصلي كنت في غربة زمان! وبصراحة أكتر واحدة كانت بتاثر فيا داليدا وهي بتقول قلبي مليان بحكايات فاكرة يا بلدي؟

كان الله في العون

موضوع التيمه ده جميل اوي في الاغنية....تحويلة البياتي...وابداعه في البياتي بيعجبني جدا
وطبعا لما اللحن يعبر عن الكلام بالذات في (من غير ما يسلم) عشان يوصل الفكرة بالزبط...جميل عبد الوهاب ! :)

شكرا
أتمنى تكون العزومة عجبتكم

[abuzahda]

http://img172.imageshack.us/img172/7920/maleegypthf4ho3.gif

و الله انا اللي لازم اشكرك ياعم (محب مصر) وادعيلك من قلبي ربا يكتر من أمثالك ، وربنا يخليلنا سيادة الرئيس (أبو علي ) مجمع الحبايب . وعلشان أغيظكوا أحب أقول لكم إني أملك امتياز معرفة أبو علي ، معرفة شخصية . بس انا في كندا وهو في الامارات ..... يـــــــاخســــــارة
http://img136.imageshack.us/img136/3461/ba20a22b44zc3.gif

[سيادة الرئيس]

يا مسافر وحدك و غايظني

أي و الله يا حبيبي يا سيد واحشني

و بعدين إنت ما تظهرش غير في المسافر وحده

[abuzahda]

تصدق فخامتك :
أنا لو جالي ولد هسميه "سماعي" إعترافاً مني بفضل هذا المنتدى الذي تشرفه فخامتك بالمرور اليومي ..