دعوة لسماع فنان أصيل بيننا

[غازي الضبع]

يوم الجمعة الموافق 31/8/2007
كنت قد اتصلت بالفنان الجميل عم محمد الآلاتي كي أذهب إليه أزوره وكان ترحابه شيء معهود عنه ..
اتفقنا أن نتقابل في محطة المؤسسة والحقيقة رحت له متأخر عشر دقايق :o لكنه استقبلني استقبال جميل .
وركبنا وذهبنا إلى بيته ..
دخلت إلى حجرته بل إلى صومعته .. لالا .. إلى مملكته ..
مش عارف أوصفها بإيه .. ليتني أملك ربع ما يملكه الأستاذ سمعجي من بلاغة في الوصف والكلام ..
مملكة جميلة جدا ، تحتوي على الكمبيوتر الخاص به ، محطوط داخل ترابيزة كمبيوتر عجيبة ، لا يملكها إلا هذا الفنان الآلاتي . . ترابيزة بها زرار للـ Volume وعدة جاكات زي بتاعة كروت الصوت أعتقد إنها للتوصيل بالأورج أو أي جهاز خارجي ، ومتوصلة بسماعات ( ما شاء الله ولا قوة إلا بالله )
ووراه مكتبة ثرية جدا بالعديد من الشرائط المتنوعة التي تنم على ذوق صاحبها ، وجانبه مكتبة أخرى ولكن من السيديهات تحتوي على برامج صوتيات وبعض أعماله الفنية ، وفي جانب الحجرة أقصد المملكة الأورج الجميل بتاع عم محمد ..
بصراحة .. دا بس اللي أخدت بالي منه لإني منذ دخلت وأنا وشي في الآرض :o;)
المهم .. اتكلمنا في البداية عن الموسيقى والأعمال الموسيقية لعم محمد وتقريبا ما فاتش علينا سوى خمسة دقائق .. وإذا بجرس الباب يدق ..
زيارة ليك يا بابا ( ده حسام ابن عم محمد )
خليه يتفضل ( ده عم محمد بدون أن يعلم مين )
وإذا به الفنان والمطرب الجميل سامح حسني
إنه مطرب جميل جدا ..
جميل في كل حاجة .. صوته ، فنه ، ذوقه ، كلامه ، وسامته ، ثقافته ، .... ، .....
فعلا فنان ..
وهو مطرب فنان جديد في بداية طريقه ..
عمل كذا فيديو كليب على الفضائيات ( محترمة جدا )
وله ألبوم في الطريق إن شاء الله
وهو بجانب أنه مطرب فهو أيضا ملحن .. وقام بتلحين كام أغنية سمعها لنا .. عجبوني جدا
فعلا أنا حبيته في الله هذاالمطرب الجميل ..


- يتبع -

[سمعجى]

أخى الفاضل المهذب
الأستاذ غازى ..

أشكرك يا رجل ، لأنك فيما كتبت ، ( صحبتنى ) بدون قصد منك
الى تلك الصومعة التى ينطلق منها عالم ( أبو حسام )
و أهم ما طالعتُهُ فيها ، هو ملامح حبيبى محمد الآلاتى ..

أتعرف أين يكمن السر ؟!.. و لابد أنك عارفه ..
انه فى ثلاث كلمات .. الصدق و التلقائية و البساطة
تلك معايير كافية( من وجهة نظرى ) لجعل الأرواح مؤتلفة مع من هم على قَدْرها ..

تمنيت لو كنت معكما ..
لا لشىء الا لأنعم بصفاء انسانى مفتقد..

بارككما الله و أدام صحبتكما القائمة على المود و الحب ....
ليس أكثر

[غازي الضبع]

نرجع بقى لعم محمد الآلاتي
هذا الفنان الجميل ..
حكى لي عن نبذات عن حياته الشخصية ..
وعن جزء كبير من حياته الفنية ..
سمعنا جزء قليل من أعمال عم محمد .. ( بصوته ) ..
خللوا بالكوا من بصوته دي ..
لإن له مكتبة كبيرة جدا من الأعمال الفنية المغناة بصوت عم محمد الآلاتي .. وكم آخر من الأعمال الموزعة منه.. توزيع غاية في الجمال والإبداع ..
وطبعا كعادتي تناولنا الحديث عن عبد الوهاب معشوقي الأول في الموسيقى
ثم سمّعنا الفنان سامح موسيقى قمر 14 وتناولنا تحليلها أنا وعم محمد ..
طبعا انا بوصفها وصف مستمع كده على أدّي .. إنما عم محمد ما شاء الله عليه .. وضح لنا كل نقاط الجمال اللي في الموسيقى ..
وتناولنا الحديث عن السنباطي ، وموسيقاه
ثم تحدثنا عن المقامات الموسيقية ، وهنا ركنت أنا على جنب ..
لإن الأستاذ الآلاتي موسوعة كبيرة كما قالها عنه الأستاذ محمود رزق من قبل ..
كما أن الفنان سامح حسني أيضا له في التمييز بين المقامات ..
وإن كان طبعا مش زي الآلاتي .. لكنه ذو معرفة ودراية جيدة بالمقامات .. ودا طبيعي مادام بيلحن ..
.........
المهم ..
كل ده على الكمبيوتر ..
........
ومن تطرقنا عن المقامات الموسيقية .. قام الأستاذ الآلاتي إلى الأورج كي يسمعنا الفرق بين مقام وآخر .. وكيفية الانتقال بين المقامات دون نشاز ..
وكيف كان يفعلها الأستاذ عبد الوهاب ، ومنير مراد .. وطبعا كل الملحنين ..
لكن كان أكثر الأمثلة مضروبة على الأستاذ عبد الوهاب ومنير مراد ..
إلى أن أعلن المطرب سامح حسني عن حبه للفنان محمد فوزي ، فعزف عم محمد أغنية تمللي في قلبي
وغناها معه الفنان سامح حسني ..
في هذه اللحظة فقط وجدت أن شبكة المحمول أصبحت موجودة بعد ان كانت مقطوعة منذ وصلت ، على الفور اتصلت بالأستاذ حسن ( الإسماعيلاوي ) .. واللي كان موصيني أن أحدثه أول ما نصل في بيت عم محمد ..
وسمعته على الهوا ما كان يعزفه عم محمد ، ثم أخذ يسلم عليه ..
وإن شاء الله لابد وأن نجتمع جميعا مرة أخرى - يا سلام لو في المركب زي ما باحلم - وتستمعوا جميعا لفن عم محمد وتمكنه في العزف على الأورج ، وشرحه الوافي ..
كانت فعلا سهرة جميلة ..
ولإني ضيف مش تقيل استأذنت بدري كانت الساعة 3:10 صباحا ..
فعلا ما حسيناش بالوقت ..
نزلت أنا وسامح .. قعدنا اتكلمنا تاني عن الفن والفيديو كليب واتعرفنا أكتر ببعض
وحكا لي سامح عن لحظة وقوفه أمام الفنان الراحل حسن أبو السعود كي يستخرج كارنيه نقابة المهن الموسيقية .. وكان معاه في نفس الدفعة الفنانة بشرى والمطرب عماد بعرور ومطرب آخر لا أتذكره ، وعدد كبير من الممتحنين .. ولم ينجح سوى الفنان الجميل سامح حسني ، والفنانة بشرى ..
سيبنا بعض لكي نروّح في تمام الساعة الرابعة والنصف صباحا .. لإن الفجر كاد أن يؤذن له ..
فعلا .. كانت سهرة جميلة جدا
فنية دسمة بكل ما هو مغذي للروح
زادها جمالا حضور وتشريف ذلك الفنان الجميل سامح حسني ..
بها أحداث أطول وأكثر بكثير مما قلته . واستفادات فنية وغير فنية كثيرة جدا
شكرا عم محمد الآلاتي ..
وإلى أن نلتقي جميعا إن شاء الله ..
لكي تكون هناك صفحة جديدة اسمها لقاء الأحبة 2

[غازي الضبع]

حبيبي الأستاذ سمعجي
يا أستاذي الفاضل .. ويا كريم علينا بكلامك الرقيق العذب الحنون
والله ..
إني أحبك في الله
وكم تمنيت أن يكون كل البشر مثلك
ذلك الإنسان المثقف الواعي المهذب ذو الذوق الرفيع
ذو الخلق السامي ، والآخلاق الحميدة
خسارة إن الدنيا ما فيهاش غير سمعجي واحد ..


وأشكرك شكرا جزيلا على كلامك الرقيق

تحياتي ومودتي واحترامي

[غازي الضبع]

يااااااااااااه
نسيت أقول لكم على حاجة مهمة جدا
عارفين إيه أكتر كلمة قولتها لعم محمد واحنا قاعدين عنده في البيت ..
كلمة : يدوم يا عم محمد
الراجل قدم لنا ييجي تسع مشاريب منوعة
بيت كرم وأهل كرم

[الألآتى]

إيه ياعم غازى الفضايح إللى إنت عاملهالى دى ..

إنت بتعمل دعاية للصومعة بتاعتى ..ولا لشغلى ولا بتعمل دعاية لبيتى ولا إيه بالظبط .. ;)

أنا محرج جداً ياغازى .. :o المفروض إن الحاجات دى عادى جداً .. مش محتاجة تحكيها ..

إن شاء الله تتكرر الزيارة وأتشرف بيك كمان وكمان .. :)

[غازي الضبع]

لا يا باشا
المرة الجاية عندي أنا
ولا نسيت وعدك ليا
وإن شاء الله هايبقى معانا الحبايب كلهم
أنا هاتصل بحسن الإسماعيلاوي عشان نربط مع بعض اللقاء ده - يمكن يعملها المرة دي ويجيب معاه إن شالله مانجاية واحدة -
وطبعا الدعوة عامة للجميع ..
بس إن شاء الله ربنا يتمم فرح أختي على خير
ونفوق بقى للحوارات دي ...

سلام يا كبير الآلاتية

[الألآتى]

عندك فين ؟؟ فى 15 مايو ؟؟

والله لما تعمل إيه .. أنا عيل .. إنت تيجى إنت والحبايب إن شالله ميت مرة عندى .. أشيلك فوق دماغى .. وإنت عارف يعنى إيه ..

أنا إجتماعى قوى ياغازى .. وبحب الناس .. لكن مسألة الخروج دى صعبة جداً عليا .. مش عارف حاتفهمنى ولا لأ ..

[غازي الضبع]

هافهمك طبعا يا باشا
وعلى فكرة يا عم محمد .. طبعا أنا سعدت جدا بتليفونك .. بس عايز أقولك إن ماكانش فيه داعي أبدا لهذا
إنت تدخل في أي موضوع وتأمرني على طول وأنا أنفذ ..
وبعدين إنت اللي جبته لنفسك هاتلاقيني كل ويك إند لاجيء عندك ..
ومش هاجي لوحدي .. هاتلاقيني جايب لك معايا الأحباب كلهم .. وأديك جربت أنا بانزل الساعة كام :mdr:

[الألآتى]

غازى ..

أنا قلبى وبيتى يساع من الحبايب مليون .. تعالى إنت بس .. ومالكش دعوة .. وهات كل الحبايب معاك ..

على فكرة .. إنت لسه مادقتش السحلب بتاعى .. أنا بعمل شوية سحلب عجب ..

[حسن كشك]

عمنا المايسترو
وحبيبى غازى

اولا شكرا لك ياغازى انك وفيت بوعدك وكلمتنى من صومعة المايسترو وسمعت صوته وكنت ساعتها فى ميدان الاوبرا لكن كانت ورايا مشاغل مكنتش عارف اهرب منها لكن الحمد لله نابنى من الحب جانب وسمعت صوتك
وصوت المايسترو وصوت الفنان سامح حسنى - وان كان على المانجه وعد شرف تكون معايا فى الزيارة الجاية لكل من يحضر
والله وحشتونى اوى

[غازي الضبع]

ماشي يا بو علي
إن شاء الله في الزيارة الجاية عند الألاتي .. تجيب معاك زيارة لصاحب البيت ، ولصاحب صاحب البيت .. حكم أنا أعز المانجة قوي ..
واعمل حسابك على أننا هانغني إن شاء الله ، وهانعبي شريط واحنا قاعدين ..
يعني سلك زورك ، وإديها يانسون ..
واستعد لليلة مش هاتنساها أبدا ، فعلا هاتنبهر من هذه الصومعة الجميلة ..
استعد لسهرة مع الألاتي ..

...
وإنت كمان وحشتنا جدا

[غازي الضبع]

السلام عليكم ورحمة الله وبركاته
أيها الأخوة الكرام
إن بيننا كنز كبير جدا
صدقوني بدون أي مبالغة
بيننا رجل فنان كبير .. منجم فن وجمال
منبع للأصالة والتذوق
وأنا أشفق على كل من لم يسمع أعماله
ومهما كتبت وقلت عنه ، مش هاقدر أعطيه حقه وقدره الذي يستحقه
أدعوكم أيها الأحباء الكرام
إلى الاستماع إلى أعمال من تنفيذ الموسيقار الجميل الفنان
محمد الآلاتي (http://www.sama3y.net/forum/showthread.php?t=28706)

[احمد البنهاوي]

السلام عليكم ورحمة الله وبركاته كل عام وجميع اعضاء المنتدي بخير ازيك يا استاذ غازي واحشني انت والمنتدي كتير بصراحه انا ماسمعتش حاجه للأستاذ محمد الألاتي بس باين عليه من المبدعين فعلا وكفايه خفة دمه اللي شفناها يوم زهرة البستان عموما مستنيين الأستاذ محمد يطل علينا بخفة دمه ويطلعلنا حاجه كده نسمعها من اعماله رغم ان راينا معروف مسبقا وكل عام وانت بخير

[غازي الضبع]

أهلا بيك يا حضرة الظابط
يا سيدي ما عندك أعماله مرفوعة هنا في المنتدى
الرابط هاتلاقيه في كلمة محمد الآلاتي اللي فوق :rolleyes:

[احمد البنهاوي]

معلش يا عم غازي تاثير الصيام بقه كل سنه وانت طيب :confused:

[mero]

والله نفسى الفنان الكبير ده يتكرم ويوزع لى اعنيه لى ويكون له جزيل الشكر

[فاتنة]

استاذ محمد الآلاتي اكبر كنز في منتدى سماعي

فهو رمز للابداع بأجمل الاغاني التي قام بتلحينها وغنائها

تحيـــــاتي له ولفنه العظيم..;)

[الباشاقمرزمان]

السلام عليكم ورحمة الله وبركاته

أولاً: أنا سعيد جدا جدا جدا بهذا الموضوع لأخونا غازي الضبع اللى مش عارف هو فين الآن وله طريقة سلسة وتلقائية في الوصف وهذا هو الموضوع الثاني بعد حكاية السيارة السيات اللى سمع معاها موسيقى القافلة لمحمد عبد الوهاب.

ثانياً: استمتعت بتحقيق أمنية طلبتها منذ دخولي المنتدى وهى أتعرف على الشخصيات العملاقة هنا فلكل مقام مقال واعرف حدودي ايه لكن لا حس ولا خبر وهذا الموضوع أضاف لي كثير عن الاستاذ محمد الألآتي أبو حسام المزيكاتي وهذا الموضوع يستحق التثبيت تحت عنوان هؤلاء هم العمالقة في المنتدى حتى يتعرف عليهم أمثالي من المستجدين بدلا من الحيرة بس أحب أضيف شئ إن أخونا الضبع نسي يقول إن أبو حسام صاحب مصداقية مع النفس وصادق وآمين مع نفسه و أخلاقياته تعكس ذلك في تلقائية وبساطة وسلاسة لطيفة وروح طيبة جداً وبصراحة باتعرف عليه من خلال كلامه وأسلوبه وباعتز به جداً جداً جداً وبانتهز حالة الكرم واقول عايز اشرب سحلب وأكل لا أكل ايه ما تنفعش مع المانجة الاسماعيلاوي اقول الهط مانجة وده عشان اشوف عم حسن اللى بحس بأنه معلم أصيل في روح ابن البلد ومش بيحب الحفلطة والمنظرة وطبعا رسمت ده من خلال كلامه وصورته هو عمنا الآلاتي وهمة قاعدين على القهوة وقال بيشربوا سفن أب


يارب تتحقق أمنيتي ويتثبت الموضوع ده من اخونا اللى اشترى السيات وساكن في فيصل جنبي غازي الضبع.

[غازي الضبع]

السلام عليكم ورحمة الله وبركاته

أولاً: أنا سعيد جدا جدا جدا بهذا الموضوع لأخونا غازي الضبع اللى مش عارف هو فين الآن وله طريقة سلسة وتلقائية في الوصف وهذا هو الموضوع الثاني بعد حكاية السيارة السيات اللى سمع معاها موسيقى القافلة لمحمد عبد الوهاب.

ثانياً: استمتعت بتحقيق أمنية طلبتها منذ دخولي المنتدى وهى أتعرف على الشخصيات العملاقة هنا فلكل مقام مقال واعرف حدودي ايه لكن لا حس ولا خبر وهذا الموضوع أضاف لي كثير عن الاستاذ محمد الألآتي أبو حسام المزيكاتي وهذا الموضوع يستحق التثبيت تحت عنوان هؤلاء هم العمالقة في المنتدى حتى يتعرف عليهم أمثالي من المستجدين بدلا من الحيرة بس أحب أضيف شئ إن أخونا الضبع نسي يقول إن أبو حسام صاحب مصداقية مع النفس وصادق وآمين مع نفسه و أخلاقياته تعكس ذلك في تلقائية وبساطة وسلاسة لطيفة وروح طيبة جداً وبصراحة باتعرف عليه من خلال كلامه وأسلوبه وباعتز به جداً جداً جداً وبانتهز حالة الكرم واقول عايز اشرب سحلب وأكل لا أكل ايه ما تنفعش مع المانجة الاسماعيلاوي اقول الهط مانجة وده عشان اشوف عم حسن اللى بحس بأنه معلم أصيل في روح ابن البلد ومش بيحب الحفلطة والمنظرة وطبعا رسمت ده من خلال كلامه وصورته هو عمنا الآلاتي وهمة قاعدين على القهوة وقال بيشربوا سفن أب


يارب تتحقق أمنيتي ويتثبت الموضوع ده من اخونا اللى اشترى السيات وساكن في فيصل جنبي غازي الضبع.


الباشا قمر الزمان
أولا أشكر سيادتك على ذوقك
ثانيا أشكر فخامتك على أنك ذكرّتنا بهذا الموضوع ذو الذكريات الجميلة
وثالثاً أعدك بأننا سنلتقي قريباً لنتشرف بحضرتك بإذن الله
خالص تحياتي واحترامي :emrose:

[الباشاقمرزمان]

الباشا قمر الزمان
أولا أشكر سيادتك على ذوقك
ثانيا أشكر فخامتك على أنك ذكرّتنا بهذا الموضوع ذو الذكريات الجميلة
وثالثاً أعدك بأننا سنلتقي قريباً لنتشرف بحضرتك بإذن الله
خالص تحياتي واحترامي :emrose:
أخي الكريم الفاضل/ غازي الضبع
أولاً: سعيد جدا بردكم الجميل والذوق الرفيع
ثانياً: معروف عنكم دماثة الخلق والأدب الجم لكن معاليكم أخجل تواضعي وأثقلت كاهلي ياصاحب العظمة والمقام الرفيع بوصفك لي بالسيادة والفخامة واجعل البساط أحمدي يا قاطن ش فيصل فنحن جيران ويسعدني أنا أن أشرف بك في بيتي المتواضع لكي أنضم لمجموعة القهرنة على حد تعبيركم على ما أذكر ولكن الدعوة مؤجلة إلى أوائل شهر 7 حتى عودتي بإذن الله حتى لا تقول أنها عزومة مركبية وبعدين انت شربت 9 مشاريب عند أخويا أبو حسام انا حاخليهم 10
بس اوعى تيجي بالسيات ههههههههههه

لك منى خالص الشكر والتقدير لشخصكم الجميل:emrose::emrose::emrose: