تسجيل الدخول

مشاهدة النسخة كاملة : مذكرات أم كريم

afaf
14/05/2006, 09h04
أم كريم دي هي أنا للي مش عارفني
علاقتي بالطرب
لا اجيد عزف أي آلة موسيقية ولكني مستمعة جيدة
ويرجع الفضل لزوجي أبو كريم عنده ودن موسيقية حساسة جدا
لما كنت لسة في بيت أهلي ماكنتش باسمع اغاني
وعلى ايامي زمان البنت لو بتسمع أغاني معناها إنه في قصة حب
وطبعا ده عيب وفيه قطع رقبة :sad:
مرة لقيت الوالدة عليها رحمة الله بتسمع اغنية جينا الدار نسأل عالحبايب لقينا الدار تبكي عاللي غايب
وكانت تبكي بكاءا قطع قلبي والسبب إن جدي اللي هو والدها اتوفى بعيدا عنها
الكلام دة كان في الستينيات من القرن الماضي
ومازلت لحد النهاردة ابكي لو سمعت تلك الأغنية :sleep:
ابكي أمي وأبويا وكل اللي اعرفهم وغابوا عني بسبب الوفاة أو السفر
وإلى اللقاء في الحلقة القادمة
Ossama Elkaffash
14/05/2006, 09h27
الاخت الفاضلة ام كريم
ربنا يخليلك كريم وابوه
همسة من كاتب له كتب برده

اكتبي واتحفينا انت بتكتبي حلو قوي
وياريت تعملي بلوج تكتبي فيه للناس جميعا
مع تحياتي
سماعي
14/05/2006, 09h48
ممكن قوي أعملكم قسم فيه بلوج للأعضاء على سرفر سماعي
رايكم إية؟
ما ياخذ لا وقت ولا مساحة كبيرة
afaf
15/05/2006, 06h06
تعليقاتكم اسعدتني
وكانت حافزا احتاجه لمواصلة ذكرياتي مع الطرب
الحلقة الثانية
عندما كنت طفلة كنا نذهب لقضاء الصيف عند جدي وجدتي لأمي
وأخوالي في ذلك الوقت كانوا في مراحل التعليم المختلفة
كنت الحظ حركة غير عادية في بعض الأمسيات
تجهيزات وترتيبات واستقبال الأصدقاء ونقل المذياع من الصالة إلى
غرفة الجلوس
:wacko: وكنت اتعجب من هذا الذي يحدث
وبعد سنوات عرفت السبب
كانوا يستمعون إلى حفلة أم كلثوم
ومن وقتها عرفت من هي أم كلثوم ولكنني لصغر سني لم افهمها
أول مرة أشعر بتأثيرها علي عندما كنت بالجامعة
استعرت دفتر محاضرات زميلة لي وكانت متزوجة حديثا
وجدت في آخر صفحة كلمات أغنية لسة فاكر
قرأتها عدة مرات وأدركت أن زميلتي تمر بأزمة
لم تصارحني بشئ ولكن كلمات الأغنية فضحت ما حاولت التستر عليه
وقبل نهاية العام الدراسي حصلت على لقب مطلقة
ولكن الله القدير العادل رزقها زوجا خيرا منه ووظيفة في منظمة دولية
والبنين والبنات
ولو استعرت منها اليوم دفترها
:blush: ياترى ماهي الأغنية التي سوف اجد كلماتها في آخر صفحة
Ossama Elkaffash
15/05/2006, 08h20
الاخت ام كريم
استمري كلامك جميل وبسيط يا ريت فعلا تعملي بلوج لانه معظم البلوجات هايفة
انتي بتعملي حاجة اسمها التدوين بجد زي الجبرتي
يعني نقدر نقول انك جبرتي الفترة دي
وبصدق
وياريت لما تعملي البلوج الخاص تطولي اكتر لان الحدوتة حلوة ومبنشبعش منها

تحيات ابو يحيي
afaf
20/05/2006, 04h51
الحلقة الثالثة
مدرسة الفقراء
اختي مدرسة انجليزي في مدرسة لغات بمصر الجديدة
التلامذة بتوعها قالوا لها : احنا يا ميس رحنا رحلة لمدرسة الفقراء امبارح
:sleep:وكنا حنعيط عشان صعبوا علينا ومدرستهم وحشة أوي
أختي وهي بتحكيلي الحكاية دي سألتني: عارفة قصدهم إيه؟
قلت طبعا...راحوا ملجأ أو مؤسسة الأحداث
قالت لي : طب خدي الصدمة دي...راحوا مدرسة حكومية
ضربت على صدري وقلت : يانهار مالوش لون...مدارسنا اللي اتعلمنا فيها
:ohmy: اسمها دلوقت مدارس الفقرا...إيه اللي جرى يا عالم
انا غايبة عن مصر منذ عام 1976..والأجازات اللي باقضيها في مصر
قصيرة ويادوب نزور قرايبنا ونجري على المجمع نجدد الإقامة
ومشوارين تلاتة لشركة الطيران ..وهب وطارت الأجازة
المهم احكي لكم الجزء الخاص بالموسيقى:
سرحت في مدرستي الإبتدائية الحكومية دخلتها سنة 1959
اسمها مدرسة السيدة خديجة في شرق القاهرة
كان فيها غرفة للموسيقى: بيانو ضخم....دواليب مليانة آلات موسيقية
وأول درس اخدناه كان التعريف بأسماء الآلات
كنا حوالي 35 في الفصل....وكل واحد كان معاه آلة
وغنينا النشيد دة:
آدي الكستانت اهو.....وآدي الرق كمان
وآدي المثلث........صوته جميل رنان
أما الجلاجل........زي البلابل
وآدي صوت الطبلة......أعلى من صوت أبلة

انا كنت ماسكة الجلاجل وكنت مبسوطة جدا..والدليل إني لسة فاكرة النشيد
اللي مر عليه 47 سنة
مدرستنا الحكومية واعتقد كل المدارس في ذلك الوقت كانت على اعلى مستوى
:laugh: بس كان ناقصنا حمام سباحة عشان ماكونش كذابة
ونسيت اقول إن المدارس الخاصة أيامنا كانت شتيمة وعار
كان اللي مايجيبش مجموع يدخل مدرسة خاصة والشاطرين بس هم اللي يكملوا إعدادي وثانوي
في مدارس حكومية
وهنا يجب ان نفرق بين الخاصة والأجنبية
المدارس الأجنبية(الإرساليات) دي كانت مدارس اللغات
السيد المشاعلى
20/05/2006, 22h29
المذكرات جميلة فعلا ياأم كريم..سننتظر كل يوم حلقة
meshail
21/05/2006, 00h32
أسلوبك جميل فعلاً و بيفكرنى بأسلوب سلسلة روايات إسمها ما وراء الطبيعه باعشقها(تشبيه للأسلوب و ليس المحتوى) أنا منتظر البقيه
afaf
23/05/2006, 09h07
الحلقة الرابعة

انا ...و..بوسي
من يجي كدة 15 سنة كنت في بيت العائلة بالقاهرة
وهناك قابلت واحدة كانت زميلة أختي في إعدادي ..وقبل ماتمتحن الإعدادية
كانت اتجوزت وقعدت في البيت
الست دي كانت جايبة معاها بنتها الصغيرة وكان عمرها مابين 3 أو 4 سنين
وكعادتنا يا ستات بدأت الحوار مع الطفلة
اسمك إيه يا كميييلة انت ؟
البنت: اسمي بوسي
انا: بتروحي مدرسة ؟
بوسي: باروح الحضانة
انا: واخدتي إيه في الحضانة يا بوسي ؟ ...اناشيد يعني
بوسي: اخدنا حاجات كتيرة أوي
انا: طب ياللا سمعينا حاجة من اللي حفظتيهم
بوسي توشوش أمها
الأم: قوليه يا بوسي
بوسي: كداب يا خيشة كداب أوي...انا كنت فاكراك فهلوي
واسترسلت بوسي في الغناء لغاية ماقلت لها :
كفاية كدة وقولي حاجة تانية اخدتيها في الحضانة
بوسي: ولعها ولعها...شعللها شعللها
أنا: بوسي يا حبيبتي..عايزة نشيد من بتوع الحضانة
البنت استغربت وراحت موشوشة مامتها تاني
الأم وهي بتضحك : ماهو ده اللي بياخدوه في الحضانة اليومين دول
انا: كلام إيه ده.....معقول ؟؟
الأم: كل ماروح اجيب البنت من الحضانة اسمع الأغاني دي
من الكاسيت اللي موجود في الفصل

بعد سنة من الواقعة دي قابلت واحدة صديقة للعائلة
وكانت معاها بنتها فاطمة اللي اشتغلت في إحدى الحضانات
قلت فرصة اكلمها في حكاية الأغاني دي
انا: تصوري يا فاطمة إن في حضانة بتشغل كاسيت وفيه أغاني هابطة للعيال
فاطمة: طب ما إحنا كمان عندنا كدة
انا : وليه بس كدة ..إن كان ولابد سمعوهم أغاني اطفال
فاطمة: مش بيحبوها ...وبيفضلوا يزنوا ويوجعوا دماغنا
ولما نحط الشريط اللي حضرتك بتقولي عليه هابط..العيال بيسكتوا
وممكن يناموا كمان
انا باكلم نفسي : ياترى الجمهور عايز كدة
???????????
!!!!!!!!!!!!!!!!!
Ossama Elkaffash
23/05/2006, 09h21
صح يا مدام عفاف يا ام كريم
الجمهور عايز كده
وانا بس عايز اقول لحضرتك ان الذوق العام كائن حي
والناس تختلف والاغاني دي فيها جانب لطيف وعشان كده بيحبها الاطفال
وانتي كتابتك جميلة جدا جدا
بس ارجوك رجاء خاص من اخ اصغر مقاما والله اساسا بلاش استخدام التاء المربوطة محل الهاء
لان دول حرفين مختلفين تماما ومحدش من الاخوة العرب بيعمل كده غيرنا احنا يا مصريين

محبتي لابو كريم وكريم يا ام كريم يا جبرتي المنتدى
السيد المشاعلى
23/05/2006, 19h21
أخى العزيز دكتور أسامة
قرأت الحلقة الرابعة من المذكرات ولم ألحظ أى خطأ فى استعمال الأخت أم كريم للتاء المربوطة إلاّ فى كلمة كده وأظن هذا خطأ بسيط وأشكر لك غيرتك على الكتابة العربية
Ossama Elkaffash
24/05/2006, 07h32
الف شكر يا استاذ سيد وطبعا حضرتك معايا ان وجود خظأ واحد وتكراره وخاصة مع شيوع هذا عند الجميع امرا يستحق التنبيه
وانا فقط اود لام كريم المبدعة كمالا ادبيا هي قادرة عليه
وانت عارف ان نقص القادرين على الكمال عيب كبير قوي قوي

مش كده ولا ايه؟
afaf
24/05/2006, 08h45
أولا
الشكر الجزيل لكل من أضاف تعليقا على ما كتبته
تشجيعكم لي يدفعني للغوص في الذاكرة ونفض ما تراكم عليها من صدأ أو غبار
ومحاولة تقديمه في صورة ترضيني وترضيكم

ثانيا
الشكر العميق للدكتور القفاش فقد نبهني للأخطاء الإملائية
التي وقعت فيها ومعه كل الحق فالفرق شاسع بين الهاء والتاء

ثالثا
لا أحبذ العامية في الكتابة
إلا أن العامية المصرية بالذات تستهويني
في الغربة تكون العامية قريبة للقلب
و
رابعا
المفاجأة
أنا
















مش مصرية :wavetowel:
الباشا
24/05/2006, 17h17
رابعاالمفاجأة
أنا


مش مصرية :wavetowel:

مش مفاجأة - انا وجدتها تفسيرا لعبارة سابقة ذكرتيها عندما قلتى
كل اجازة نجدد الإقامة
أنا إستعجبت - قلت إقامة إيه اللى تتجدد فى القاهرة؟؟

المهم اكرر كلام إخوتى .... إستمرى ربنا يخليكى
أنا إبتديت آخد على المسلسل الجميل دا
afaf
02/06/2006, 03h25
الحلقة الخامسة
الفن المرعب
ماتستغربوش العنوان..فعلا في نوع من الغناء كنت باموت في جلدي من الرعب لما باسمعه
كان عمري وقتها 3 أو 4 سنوات وكنا نسكن في ضاحية من ضواحي القاهرة..منطقة هادئة جدا وعدد السكان قليل ..يعني زي مابيقولوا لو رميت
الإبرة تسمع رنتها
وفي عز الظهر اسمع صوت الدفوف اللي بيخلع القلب من مكانه وصوت ستات بيغنوا كلام مش فاكراه ولا كنت فاهماه وشوية شوية الصوت يقرب
من سور الجنيينة وبالطبع بيعلى اكتر والاقي ماما شايلة رغيفين وفاتحة الباب
ومناولاهم للستات دول
شفت شكلهم وعرفت فيما بعد أن دول من الغجر اللي كانوا مشهورين بالسرقة وخطف العيال والنصب والدجل
الستات دول كانوا تلاتة واحدة شايلة شوال بتلم فيه العيش والتانيين كانوا شايلين الدفوف
طبعا خيالي صور لي إن الشوال ده بيحطوا فيه العيال المخطوفين
وبما إن اسنان الغجريات كانت من الذهب فهذا دليل على إنهم بياكلوا العيال
وتمر الأيام ويدخل التلفزيون مصر ويقدم الفن الشعبي وفرقة زكريا الحجاوي وخضرة محمد خضر وقصة أيوب المصري وناعسة اللي باعت شعرها
وقلت هي دي اللي كنت باسمعها من الغجر
واستمر معايا الخوف من الدفوف والفن الشعبي فترة ليست بالقصيرة
بالذات إني كنت دايما باربط بين ابو شوال وابو رجل مسلوخة وبين ابو دراع
الفنان الشعبي المعروف وقتها
afaf
12/06/2006, 06h04
أستاذي أسامة القفاش
أنا في انتظار النقد
الهاء والتاء المربوطة بيطلعولي في الحلم
باحاول قدر المستطاع عدم الخلط بينهما
ويارب تكون ذكرياتي فيها متعة لجيلي
وتأريخ لفترة لم يعشها جيل الأبناء والأحفاد
afaf
12/06/2006, 06h12
الحلقة السادسة

300بشرطة


دي نمرة الأوتوبيس اللي قضيت فيه 5سنوات ..8 شهور في كل سنة

25 يوم كل شهر...مرتين في اليوم...وكل مرة مابين ساعة إلى ساعة ونص

احسبوها على مهلكم...وشوفوا أد إيه من عمري راح وعدى يا حبايبي في الأوتوبيس

الفترة دي كانت مابين 1972 و 1976 ..يعني سنوات الجامعة
في الفترة دي ناس التقت على المحطة.. وبعد فترة اتخطبوا... وسنة كمان كانوا متجوزين
ولما وصلت البكالوريوس كان في منهم شايلين عيالهم......برضه في الأوتوبيس
في رحلة العودة من ميدان التحرير كان بيطلع الجماعة بتوع جلدة للساعة وحجر للولاعة
ومشط كبريت للي عايز يخلص من حماته....وسكر النبات اللي بيجلي الصدر ويشفي
من كل الأمراض
وكل ده يا حضرات كلام متلحن واصوات بعضها مقبول والبعض لأ
بس كان أجمل صوت سمعته في الأوتوبيس صوت بنت عمرها حوالي 8 سنوات
ومعاها اخوها وأختها اللي أصغر منها..العيال دول كان شعرهم أشقر وعيونهم زرقاء
طبعا الأوتوبيس في بداية الخط بيكون رايق وفاضي وبياخد له 20 دقيقة
لغاية لما السواق والكمساري ياكلوا طبق المكرونة ويحبسوا بكباية الشاي
المهم كانت البنت تبدأ ب: حلوة صلاة النبي.....عاشق جمااااااااال النبي
وبعد كدة تفضل تمدح في حضرة النبي عليه الصلاة والسلام
وتاخد اللي فيه القسمة وتنزل مجرد ما السواق يشغل العربية
صوتها لسه بيرن في وداني من جماله وحلاوته
كتير بافكر فيها وأسأل نفسي ياترى في حد اكتشفها واصبحت مطربة
والحد ده ممكن يكون محمد العزبي أو عمار الشريعي لإنهم كانوا من ضمن
الركاب
وياترى هل إختارت لنفسها اسم فني؟ واتعلمت كلمتين لزوم المقابلات الصحفية
وفبركة حكاوي عن الميردي دييه... ولا السكركير اللي اتعلمت فيها ؟
اصل كلهم بيعملوا كده اليومين دول
راقصة مشهورة قالت في لقاء تلفزيوني إن تخصصها في فن الباليه

ويظهر إن عمنا أحمد فؤاد نجم شاف الحلقة دي وماكدبش خبر
وراح طالع في برنامج بتاعه وقال إن فلانة دي أمها عالمة وشربت فن الرقص
الشرقي من منبعه ومنذ نعومة اظفارها في شارع محمد علي
afaf
19/06/2006, 08h16
الحلقة السابعة
مرة يضحكني ...ومرة يبكيني

وأنا طفلة كان أحد أخوالي في المرحلة الثانوية
خالي ده ماكانش بيفتح كتب المدرسة أبدا معظم السنة
وكان عنده كتيبات أغاني فريد الأطرش ..هي دي اللي بيذاكرها
وكان يجيب مشط ويحط عليه ورقة شفاف ويعزف أغاني فريد
بواسطة هذا المشط..شوية يعزف وشوية يقلد صوت فريد
اللي بيتداخل معاه صوت جدتي وهي بتقول
والله عمرك ماحتفلح لا في الدراسة ولا في الغنا
سيب الهباب ده وامشي ذاكرلك كلمتين ينفعوك
دي كانت الطريقة اللي اتعرفت بيها على أغاني فريد الأطرش
والمرة اللي حبست فيها دموعي بالعافية كنت في الأتوبيس إياه
وكان الوقت مابين العصر والمغرب..كنت راجعة من الكلية وأيامي
كان في حاجة اسمها ساعات الذروة ولتوضيحها للجيل الجديد هي ساعات
الزحام في المواصلات وكانت بتكون مرتين بس في اليوم
مابين الساعة السابعة والثامنة صباحا ومابين الثانية والثالثة بعد الظهر
غير كده بيكون الأوتوبيس شبه فاضي
المهم كان الأوتوبيس هادي وكنت قاعدة في الكرسي اللي جنب الباب
السواق طلع ومعاه راديو ترانزستور- وماحدش يسألني يعني إيه
ترانزستور كل اللي اعرفه إنه راديو صغير بيشتغل بالبطارية القلم
وبعدين السواق الذي تعدى الأربعين ربط الراديو بحتة سلك في العمود اللي
علي يمينه وشغل الراديو..وإذا بفريد يغني اغنية ياحبيبي طال غيابك
وإذا بالسواق يبكي وهو يشاركه الغناء
مش عياط عادي..لا ده كان نحيب بصوت عالي ودموع ومناديل
وكان عايش في جو لوحده لدرجة إنه كان بينسى يقف في المحطات
فضلت مركزة نظري عليه...وحسيت إنه بيعاني فعلا من فقد حد
عزيز عليه وإن اللي فرقهم أكيد الموت
ياترى مين...أكيد إبنه أو بنته...وكان نفسي اطبطب عليه
وأقول له معلش يا عمو وكفاية قطعت قلبي
المرة اللي ضحكت فيها دي كانت من حوالي اربع سنين
كنا في ماليزيا وصادف عيد الاستقلال..
وكانوا حاطين سماعات ضخمة جدا في الشارع وسمعنا
أغنية يازهرة في خيالي وقلنا ياترى مين من العرب اللي بيغنيها
لما قربنا لقيناه شاب ماليزي هو اللي واقف بيغني
وطبعا ضحكنا عشان مااتوقعناش إننا نسمع فريد في ماليزيا
وفرحنا إن الأغاني العربية لها رواج ومعجبين حتى في الدول التي لاتتحدث العربية
وبعد ما سلمنا عليه وشكرناه طلبنا منه إنه يغنيها تاني وقد كان
MOHAMED ALY
20/06/2006, 19h41
الاخت الفاضلة / ام كريم
تحياتى
اسلوبك فى الكتابة راقى و شيق ... انه السهل الممتنع ... و حكاياتك تخاطب فى نفوسنا و ذاكرتنا حكايات شبيهة ... بل مثيلة
تحياتى لشخصكم الكريم و لمواقفكم التى تمثل موقف المرأة التى نعرفها اما و اختا و زوجة و بنتا
aabadry
21/06/2006, 19h06
الاخت ام كريم
تحياتي
انا كنت معاك في نفس المنطقة و اعرف مدرسة السيدة خديجة
و ركبت الاتوبيس اياه معاك
الله يجزاك خير رجعتينا سنين طويلة في الماضي اللي كان كله حلاوة
و ايام سعيدة في منطقة جميلة و ناسها حلوين
و بالمناسبة زوجتي خريجة مدرسة السيدة خديجة
تحياتي و انتظار كتابة باقي الخواطر باسلوبك السهل الممتنع و الممتع
تحياتي لاسرتك الكريمة
afaf
30/06/2006, 09h21
يا سلام ع الجمال يا ام كريم
تعرفي ان الاغاني المصرية والافلام المصرية كانت منتشرة في شرق آسيا في اندونيسيا والملايو وحتى الصين في المنطقة المسلمة بسبب حبهم لسماع العربية؟؟

اتمنى أن يمتد حب اللغة العربية إلى حب العرب أيضا
ولكن ممارسات بعض الإخوة العرب هناك قد تعطي صورة منفرة لكل ماهو عربي
afaf
30/06/2006, 09h28
الاخت الفاضلة / ام كريم


تحياتى
اسلوبك فى الكتابة راقى و شيق ... انه السهل الممتنع ... و حكاياتك تخاطب فى نفوسنا و ذاكرتنا حكايات شبيهة ... بل مثيلة

تحياتى لشخصكم الكريم و لمواقفكم التى تمثل موقف المرأة التى نعرفها اما و اختا و زوجة و بنتا

بارك الله فيك أخي الفاضل

تشابه الذكريات هو الذي دفعني لأن اكتبها لجيلي
لنستعيدها سويا
كنت اكتب في منتدى قبل هذا وعندما عرفوا عمري
قال احدهم لي انني من العصر الحجري
:mdr: :mdr: :mdr:
afaf
30/06/2006, 09h35
الاخت ام كريم

تحياتي
انا كنت معاك في نفس المنطقة و اعرف مدرسة السيدة خديجة
و ركبت الاتوبيس اياه معاك
الله يجزاك خير رجعتينا سنين طويلة في الماضي اللي كان كله حلاوة
و ايام سعيدة في منطقة جميلة و ناسها حلوين
و بالمناسبة زوجتي خريجة مدرسة السيدة خديجة
تحياتي و انتظار كتابة باقي الخواطر باسلوبك السهل الممتنع و الممتع

تحياتي لاسرتك الكريمة
بما أننا من نفس الحي فقد ارسلت للسيدة حرمكم رسالة خاصة
ارجو ان تكونوا قد اطلعتم عليها
nagwash
22/07/2006, 07h31
تابعت بلهفة كل مذكراتك قد ايه شيقة و مفعمة بالصدق و الشفافية كلماتك كانها بلورة سحرية اسقطتي عليهاقطرات ندية فاضحت صورة نقية لكنز ننتظر منه المزيد

على فكرة تقريبا ظروفنا متشابهة انا كنت مثلك بغربة عن الوطن و بالاخص السعودية بفترة طوييييييييييلة و اعي جيدا احساس الكلمة المصرية برتمها الرخيم القديم
شكرا لك كتير امتعتيني بحق
يا ليتك ما تغيبي عنا
afaf
04/09/2006, 19h11
الحلقة الثامنة
يوم ما أذنت في مالطة

الصيف اللي فات مشيت مع أختي مدرسة ابنها لتسديد الرسوم
المدرسة مدرسة لغات
المدخل الخارجي من الجرانيت ..وعلى جانبيه نباتات الزينة
ومن الداخل افتكرت نفسي دخلت بهو فندق خمس نجوم
ارضيات رخام...ديكورات فخمة...حاجز زجاجي خلفه حمام سباحة
شاشات تلفزيون تعرض توم وجيري....مقاعد مريحة...باقات زهور طبيعية
تزين المكان
قعدنا في إنتطار الدور
لاحظت أن الكرتون صورة بدون صوت...قلت في بالي احسن...عشان الدوشة
وكمان مكتب المديرة موجود في هذا البهو...وأكيد مش عاوزة إزعاج
ولم يمر خمس دقائق على هذا الهدوء...وكأنهم ارادوا الترحيب بي
وإذا بصوت من بتوع اليومين دول ينطلق مش عارفة من فين بالتحديد
صوت مسرسع يخرم طبلة الودن...مش ودني أنا بس..ده يخرم ودن السادة
المقيمين خارجها كمان
ومن حظي إن قعدتنا طولت..وسمعوني غصب عني ودون إرادتي شوية اغاني
إنما إيه ...نقاوة
اغاني هابطة بكل معنى الكلمة..مكانها في كباريه أو غرزة
ونظرت في وجوه أولياء الأمور ولم اجد أي إمتعاض
قلت أمتعض أنا ..وأمتعضت
بس برضه لسه متغاظة...نطيت من مكاني ومشيت لموظفة الإستقبال
أنا: ممكن أقابل صاحب المدرسة ؟؟
الموظفة: هو مش موجود
أنا: طيب ممكن المديرة؟؟
الموظفة: لسه ماجاتش
أنا: طيب أي حد مسْول ؟
الموظفة: مافيش حد
أنا: أنا كان عندي ملاحظات عن المدرسة..ومادام مافيش حد
ابقوا شوفوها منشورة في بريد الأهرام
الموظفة المسكينة خافت وقالت لي : دقيقة واحدة يامدام
ودخلت للمديرة اللي كانت موجودة فعلا
الموظفة: اتفضلي قابلي المديرة

المديرة سيدة في الأربعينيات محجبة
وبعد الديباجة المعهودة من ثناء على جمال المدرسة..وأدب ورقة الموطفات
أنا: بس لي ملاحظة ومن مصلحة المدرسة والمجتمع إني أقولها
المديرة: ياسلام ..ده إحنا يشرفنا إننا نسمع الملاحظات دي..
أنا: الحفيقة أنا أول لما دخلت حسيت إني دخلت فندق درجة أولى
بس بعد كده شعرت إني راكبة ميكروباص... أو واقفة عند محل عصير قصب
بسبب إذاعة الأغاني الهابطة الفاضحة التي لاتليق بمدرسة
إن كان ولابد من إذاعة.. قدموا أغاني حفلات المدرسة..أو موسيقى هادية
المديرة: ألف شكر يامدام عفاف على النصيحة الغالية دي.. وأنا أول لما أشوف
(.....بيه) صاحب المدرسة حانقل له ملاحظتك
لما خرجت من عندها وحكيت لأختي الحوار...ضحكت وقالت لي:
اكيد إفتكرتك مجنونة ..كل الناس اللي عيالهم في المدرسة ساكتين
وإنت اللي جاية ضيفة رايحة تقدمي إقتراحات:mdr:
وفعلا أختي كلامها طلع صح
لإنه فات سنة لحد النهارده...وكإنك يابوزيد ماغزيت
:(
محمد الحمد
16/01/2007, 22h12
الست الفاضلة أم كريم تجولت في هذه الحديقة كثيرا وطاب لي المقام وما اردت الخروج
اسلوب بسيط وجميل وسرد أجمل في إنتظار الغيم وهطول المطر
نهني أنفسنا بك

تحياتي
Tarek Elemary
12/04/2009, 14h19
الست الرائعة دى راحت فين؟
يا ريت حد من أهل المنتدى يرجعهالنا تانى إن كانت و كنا من أهل الدنيا ربنا يمتعكم جميعا بالصحة و العافية
دى حدوتة لوحدها
د أنس البن
12/04/2009, 15h36
شكرا يا طارق على سؤالك عن الست ام كريم
الحقيقه هي من قدامى الأعضاء وعادت بعد انقطاع طويل منذ بضعة أشهر , ولما شفت إسمها فى المتواجدين فرحت وعملت لها ترحيب فى الإجتماعيات لكنها لم تدخل بعد ذلك , نتمنى من الله أن يعيدها إلينا ثانية وأن يكون المانع من وجودها خيرا إن شاء الله لأنها من الزميلات الفضليات اللواتى نعتز بهن ..
رائد عبد السلام
12/04/2009, 16h05
والله يادكتورنا الكريم..
ياما ناس لهم قيمة
بييجوا سماعي ...ويرحلوا ....
دون أن يكلف أحد خاطره ....ويسأل عليهم
والبقية ...تأتي
عفاف سليمان
19/04/2009, 09h17
صباح الخير عليكم جميعا
تصدقوا ان طريقه كتابتها اعجبتنى
وفكرتنى بمواقف وطرائف اللى كنت عملتها
بس لو كنت عملت مثلا موضوع مواقف وطرائف حدثت لى انا لوحدى
وكنت دونت فيها كل المواقف اللى كتبتها
وكان الرد هيبقى كانى بكتب قصة حياتى كما فعلت الاخت ام كريم
اكيد اكيد مكنش اتحذف الموضوع
وكان هيبقى المواقف اللى تخصنى انا
لكن معلش قدر الله ماشاء فعل
ويارب تعود لنا وتكمل لنا سرد قصتها مع الحياه
تحياتى للجميع
اختكم عفاف;):)
afaf
08/07/2009, 08h08
الأفاضل محمد الحمد ..طارق العمري..رائد عبد السلام
وسميتي العزيزة عفاف سليمان

أشكركم جزيل الشكر على الإطراء
وأشكر الدكتور أنس على السؤال
واعتذر عن الغياب الذي طال عن هذا المنتدى الرائع
بسبب ظروف السفر والترحال
عفاف سليمان
08/07/2009, 08h28
:emrose:اهلا وسهلا بالغاليه:emrose:
نورتى بعودتك ويارب عوده حميده:) ونقراء لك
يومياتك الجميله التى استمتعنا بها فى فتره غيابك
اهلا بكِ عزيزتى ونورتى من جديد المنتدى
واتمنى ان نرى الجديد والجميل منكِ
سعدت بوجودى بينكم
وسعدت باسمى واسمك ادام الله لكِ وللجميع ولنا العمر الجميل والمديد
اختك وشريكتك فى الاسم والحب والموده عفاف:)