لا مش أنا إللى أبكى [الأرشيف] - منتدى سماعي للطرب العربي الأصيل

Adham Osman

23/07/2007, 07h32

ياصباح النغمات والكلمات
هو ده ياجماعة اللى إحنا داخلين علشانه - الغذا - طبعا مش لازم يكون غذاء بطون لكن لو موجود مع غذاء الأرواح يبقى تمام يعنى اللى يعزم على أغنية يعمل أوردر ديليفرى مع حاجة ساقعة أو فوار علشان نهضم الغذاء التقليدى وشاى بالنعناع علشان نمخمخ فى غذاء الروح.
كمان عايزين عناوين الأخوة الموسيقيين علشان نديهم كل واحد طريحة أغانى يقوموا بتحليلها بجانب عمنا أبو حسام وبالنسبة للأخوة الداعين إحنا نعمل جمعية واللى يقبض الأول ندخل أغنيتة.
نيجى للجد أولا هذا موضوع جميل جدا وكما قال أخونا محمد سماعى هناك أغنية أو عمل موسيقى فى حياة كل منا كان لها تأثير عظيم أو تحويل فى مجرى حياته وقد يكون أكثر من عمل.
بالنسبة لى أنا أدعوكم (فى دورى علشان الأخت بيبو ماتزعلش) على رائعة محمد عبدالوهاب
لأ مش أنا اللى أبكى
هنا بيتهيألى هيكون فيه كلام عن شكل الموسيقى الغربية فى أعمال الفنان محمد عبد الوهاب

الألآتى

25/07/2007, 04h54

بسم الله نبدأ فى تحليل أغنية ( لا مش أنا إللى أبكى ) .. التى طلبها الأستاذ ( أدهم عثمان ) ..

الكلمات للشاعر ( حسين السيد ) ..

منذ البداية .. نجد أنفسنا أمام عاشق متمرد .. كرامته بتنقح عليه .. واجعاه ..

( لأ مش أنا إللى أبكى ... ولاّ أنا إللى أشكى .... لو جار عليا هواك )

( ومش أنا إللى أجرى ... وأقول عشان خاطرى ... وأنا ليا حق معاك )

الكلام واضح .. واحد مش عاجبه الحال .. بيرفض المعامله القاسية من المحبوب ..

المهم إن صاحبنا بيكمل على نفس الوتيرة .. ( وفاكرنى حاترجاك )

وبعدين بيعلن قراره ( أنا قلتها كلمة ... وكل شئ قسمة ... ودى قسمتى وياك ) ..

فى الكوبليه الثانى .. يستمر مسلسل العتاب ويحكى لنا العاشق :

( من كام سنة لما ... دار الهوى بينا ... فاكر إحنا قلنا إيه )

( مش دى راحة قلبى ... ولا ده أمل حبى ... إللى إتفقنا عليه )

يعنى من الأخر .. المحبوب طلع عيل .. ولم يحافظ على العهد ..

وبعدين ( أنا راح زمانى هدر ... ولا كانش عندك خبر )

وعايزنى أرجع تانى ... لا ..

المسألة واضحة ياجماعة .. مافيش حد حايقدر يحل المشكلة .. صاحبنا راكب دماغة .. ومافيش قوة حاتخليه يغير رأيه ..

نيجى بقى لأخر كوبليه .. وأطول كوبليه .. هو فى الحقيقة مجموعة كوبليهات فى بعض .. لكنها مرتبطة ببعضها ..

بيقول إيه صاحبنا .. هل يستمر فى عناده ؟ .. نشوف ..

نفاجأ هنا .. أن الأخ بيتراجع .. بيدى ( مارشادير ) لورا ..

( أنا موش باعاتبك دلوقت ... أنا بدى أقول ليه ده يحصل )

( علشان نهايتك ونهايتى ... كان يجرى إيه لو كانت أطول )

الله .. إيه لعب العيال ده .. إيه التماحيك دى .. بترجع فى كلامك ياعيل .. مش قادر تستمر على موقفك ..

لأ وإيه كمان .. بيلتمس العذر للمحبوب .. بيدعى إنه مش هو السبب .. السبب هما .. هما مين ؟

العوازل طبعاً .. بيقول له :

( غيروك علموك ... تنسى وتبيع إللى كان )

( بعته ليه تنسى ليه ... فين حبيبى بتاع زمان )

ويتحول الموقف إلى النقيض تماماً .. ويبدأ العاشق فى المحلسة .. فى التمسح .. فى الرجاء ..

( فين قلبك من حبى ليه ... ليه ماسكنش جنبى )

( كان مشاركنى ف عمرى ... ونسى يشارك قلبى )

و ( ماقدرش يعرفنى ... ماعرفش يفهمنى ... وعشان إيه ماعرفش ... ده ذنبك مش ذنبى )

المسألة بقت عتاب رقيق مش كرامة بقى وكبرياء .. وعايزنى أرجع لك تانى .. لا ..

المهم إن عمنا حسين السيد .. أعطانا وجبة كاملة ودرس لكل عاشق مهجور .. علمنا أن الحب ليس فيه كبرياء .. لازم نتنازل شوية ونطاطى .. علشان مانقعدش جنب الحيطة ونسمع الزيطة ..

الألآتى

25/07/2007, 05h23

نيجى بقى للحن ...

الأغنية موزعة توزيع أوركسترالى هارمونى .. مش عارف بصراحة الموزع .. لكن ممكن يكون أندريا رايدر .. أو أى موزع أجنبى من إللى كان بيتعامل معاهم عبد الوهاب فى هذه الفترة ..

سنجد الألآت الغربية ( بيانو ، خشب ، وتريات ) بجانب الألآت الشرقية مثل القانون والناى .. فى تناغم جميل ..

تبدأ الأغنية بنبضات من الكونترباص مع البتسيكاتو ( النقر على الأوتار للكمانجات ) تعقبها جملة من الوتريات بعرضها .. وبعدها تبادليات من الخشب ( فلوت ، بيكالو ) مع مجموعة التشيللو .. ونسمع ( الكلارنيت والباصون والأبوا ) وكلها ألات نفخية ..

ويدخل عبد الوهاب ليغنى .. من مقام العجم ( الميجور ) .. ليه مقام العجم ؟

علشان يدى لنفسه حرية فى الإنتقال بين المقامات .. إستخدم عبد الوهاب الكروماتيك بطريقة بديعة .. والكروماتيك ياسادة .. هو إستعمال أنصاف النغمات المتجاورة .. وتسمى السلالم الملونة .. يعنى لو عندك بيانو .. حاتستخدم الأصابع البيضاء والسوداء على السواء .. هو ده الكروماتيك ..

حانلاحظ كمان .. الجمل المتعارضه ( الكونتربوينت ) .. تسمع جملة من مجموعة من الوتريات .. وتسمع فى نفس الوقت جملة أخرى من مجموعة أخرى من الوتريات .. جملة مختلفة .. وتتلاقى الجملتان فى النهاية .. شغل هارمونيات ..

الخشب عامل عمايلة .. إسمعوا الصفافير طول الأغنية ..( الفلوت والبيكالو ) .. بيصرخوا .. بيزأططوا .. عاملين فرح .. وخصوصاً فى الكوبليه الأخير ..

تعمد عبد الوهاب فى الجزء الأخير من الأغنية أن يقسم هذا الجزء .. إلى شطرات .. وكل شطرة بشكل مختلف ومقام مختلف .. حسب طبيعة الكلمات وما تعبر عنه من مشاعر وأحاسيس ..

إسمعوا الردود بعد كل إنتقالة .. ردود تهيئ المستمع للمقطع التالى ..

أما عبد الوهاب .. فقد نجح أن يتقمص دور العاشق الذى يرفض الهجر .. ويقنعنا أيضاً بتحوله إلى معاتب رقيق .. يتمنى عودة الوصال ..

ملاحظة أخيرة قبل أن ننهى التحليل ..

إسمعوا البيانو مع القانون أثناء الغناء .. بيصاحبوا عبد الوهاب وهو بيغنى .. البيانو آلة غربية مع القانون .. آلة شرقية ..

مش حاسين بأى مشكلة ..

وإلى تحليل أخر لأغنية أخرى ..

Adham Osman

25/07/2007, 06h55

الله ينور ياعم محمد أبو حسام ياجميل
إسمحلى أرفع الكلمات لسبب وهو إن حضرتك سبق وقلت إن الفتوة بيغنى 3 شطرات مش 2 ولا 4 علشان هو فتوة ودى موجودة بقوة هنا كمان الإعادات وهنا لى سؤال لماذا فى اللزمة عند جملة " وكفاية قلبى إنشغل ... على قلب خالى الأمل" عادها مرتين أول مرة وقالها مرة واحدة فى الأخر علما بأنى راجعت الأغنية من مصدرين علشان أتأكد:

لأ مش أنا اللى أبكى ... واللا أنا اللى أشكى ... لو جار عليا هواك
ومش أنا اللى أجرى ... وأقول عشان خاطرى ... ولا ليا حق معاك

تبقى إنت هاجرنى ... وإنت اللى ظالمنى ... وفاكرنى هأترجاك
أنا قلتها كلمة ... وكل شىء قسمة ... ودى قسمتى وياك

وكفاية قلبى إنشغل ... على قلب خالى الأمل
وعايزنى أرجع تانى لا ... أرجعلك تانى لا ... لا لا لا

من كام سنة لما ... دار الهوى بيننا ... فاكر إحنا قولنا إيه
مش دى راحة قلبى ... ولا ده أمل حبى ... اللى إتفقنا عليه

إشمعنى أنا عهدك ... صنته وراعيت ودك ... والعمر داب حواليه
لكن اللى بيحبك ... مالوش تمن عندك ... والغالى يرخص ليه؟
أنا راح زمانى هدر ... ولاكانش عندك خبر
وعايزنى أرجع تانى لا ... أرجعلك تانى لا ... لا لا لا
أنا مش بأعاتبك دلوقتى ... أنا بدى أقول ليه ليه ده يحصل؟
علشان نهايتك ونهايتى ... كان يجرى إيه إيه لو كانت أطول؟
غيروك علموك تنسى وتبيع اللى كان
بعته ليه؟ تنسى ليه؟ فين حبيبى بتاع زمان
فين قلبك من حبى ليه ليه ... ليه ماسكنشى جنبى؟
كان مشاركنى فى عمرى ... ونسى يشارك قلبى
ماقدرشى يعرفنى ... ماعرفشى يفهمنى
وعشان إيه ماعرفشى؟ ... ده ذنبك مش ذنبى
ده ذنبك ... ده ذنبك ... مش ذنبى
تبقى إنت هاجرنى ... وإنت اللى ظالمنى ... وفاكرنى هأترجاك
أنا قلتها كلمة ... وكل شىء قسمة ... ودى قسمتى وياك
وكفاية قلبى إنشغل ... على قلب خالى الأمل
وعايزنى أرجع تانى لا ... أرجعلك تانى لا ... لا لا لا

الألآتى

25/07/2007, 07h50

وهنا لى سؤال لماذا فى اللزمة عند جملة " وكفاية قلبى إنشغل ... على قلب خالى الأمل" عادها مرتين أول مرة وقالها مرة واحدة فى الأخر علما بأنى راجعت الأغنية من مصدرين علشان أتأكد:

لأ .. هو عادها مرتين فى الأول ومرتين فى الأخر ياأستاذ أدهم .. التسجيل الموجود عندى يؤكد ذلك .. أما النسخة الموجودة فى المنتدى .. فهى ناقصة الإعادة الثانية فى الأخر .. ولو لاحظت .. ستجد أن هناك قطع أو مونتاج للإعادة الأخيرة ..

وعموماً .. عبد الوهاب عودنا على ألا نسألة فى أى شئ يفعله .. ولكن كتحليل شخصى للسبب .. سنجد أن طبيعة الجملة الكلامية تحتم عليه ذلك .. لأنه يقول ( وكفاية قلبى إنشغل ) يعنى كفاية عليكم مرتين بس .. وستلاحظ أنه أعاد نفس الجملة اللحنية فى الكوبليه الثانى برغم تغير الكلمات ( أنا راح زمانى هدر ... ولا كانش عندك خبر ) .. تقريباً .. هذه هى الخطة التى وضعها للأغنية .. وبصراحة .. عبد الوهاب يعمل إللى هو عايزة .. يعنى .. كلنا نتوقع أن يعيد الثالثة .. لكنه لا يعيد .. إنه يعمل بنظرية ( خالف تُعرف ) .. هذا هو عبد الوهاب ..

وشكراً جزيلاً على الهدية الجميلة .. أخجلتم تواضعنا ياعم أدهم ..

سماعي

25/07/2007, 10h47

ازف لكم خبر جميل جدا
الفنان القدير عمار الشريعي يتابع منتدنا ومرتاح جدا من مستوى الأعضاء والشغل الي في الموقع
هذا من مصدر موثوق به
وقريبا اقتراحاته لتطوير بعض الأقسام ستظهر في المنتدى
لا اعلم إن كان سيدخل بإسمه الحقيقي ام لا
لقاء سيقع مع احد مشرفينا في خلال ايام

سمعجى

25/07/2007, 17h02

ربنا يبشرك بالخير يا أستاذ محمد سماعى ..
كبير السمعجية عمنا ( عمار الشريعى ) متابع المنتدى
و ( راضى ) عنه ..
هذا خبر ب 1000 سيرفر
و حتى اذا شارك فى المنتدى باسم مستعار ..
فسوف يعرفه الأعضاء بحواسهم قبل عقولهم
الله يبشرك بالخير

unicorn

26/07/2007, 03h25

matar

28/07/2007, 19h03

والله راودني الأمل في أن يصل خبر هذا المنتدى الى الاستاذ العظيم عمار الشريعي وتمنيت في قرارة نفسي أن يكون عضوا به .. وجدير بهذا المنتدى ان يضم بين جنباته نوابغ الموسيقيين امثال فناننا الكبير عمار .. فهنيئا لنا لو تحقق ذلك ..:icon_roll:icon_roll

ولي تعليق بسيط اوجهه الى اخي الحبيب الآلاتي .. ان اغنيه لا مش أنا اللى ابكي اغنيه ذات كلمات رائعه جدا ومليئه بالاحاسيس والمشاعر الجميله التى اظهرها اللحن والاداء في اجمل صوره .. صعب ان اتقبل التهكم على هذه المشاعر الصادقه .. اقترح ولا تغضب مني ان تتفرغ للتعليق على اللحن وتترك التعليق على الكلمات لراضي بك فهو اقدر على ذلك .. والخلاف في الرأي لايفسد للود قضيه .. وارجو من راضي بك الا يرفض هذه المهمه .. ولكم كل حبي وودي .

غازي الضبع

28/07/2007, 20h11

والله خبر جميل

أول نجاح حقيقى للمنتدى ان يبدأ الفنانين فى متابعته
و يبدأوا فى معرفة الاراء الحقيقية للناس فى فنهم
و جايز يعد دخول استاذ عمار الشريعى منتدانا , تبدأ الأصوات الجيدة تدخل ايضا و تعرف إن فى لسة ناس لا ترضى بالهبوط ثم يقدموا حاجات جيدة تطرد الأشكال إياها من الساحة.
بس فى مشكلة إن استاذ عمار حايدخل بأى اسم مستعار و ده حيخللينا نشك فى بعض , يعنى مش بعيد امسك غازى أو محمود و أقول عرفتك يا أستاذ عمار , بتستخبّى منّى؟؟

إطلع من دول أنا هرشتك خلاص.....:mdr:

يا بو مندور يا صاحب القفشة الجميلة ..
عمال أضحك من ساعتها والله ..
تصدق فعلا .. كلنا هانشك في بعض .. بس لعلمك هايبان من الأسلوب والروح
لإن طبعا الأستاذ عمار الشريعي .. ذو روح جميلة معروفة ومميزة ..
وبعدين الكلام الواعي المدروس .. أكيد هايبان ويتعرف ..
الحمد لله رب العالمين
دا والله يا جماعة نجاح للمنتدى .. أو بمعنى أصح .. مزيد من النجاح لإن المنتدى فعلا ناجح والحمد لله
وكمان الأستاذ عمار معروف بخفة الدم ..
.. خفة الدم ..
إممممممممممم
يبقى إنت يا ابو مندور .. وعاملي فيها آرسين لوبين ، ومستخبي تحت اسم Unicorn
:mdr::mdr:

حسن كشك

28/07/2007, 21h22

ياجماعه
مش كل شويه تلوموا عمنا محمد الالاتى على اى تفسير لمعانى الاغانى
اللى عنده تعديل او توضيح يتفضل يقدمه لينا وكلنا هانسمع ونعدل
وخدوا بالكم ان ابوحميد الالاتى بقى صاحبى وحبيبى واى اعتداء عليه يعتبر اعتداء مباشر عليا
احييك با ابوحميد على التحليل الموسيقى للأغنية رائع والله
والموسيقى روعتها فى توزيعها على يد الموزع الرائع اندريا رايدر
واذا كنتوا حريفة سمع اسمعوا الموسيقى التى تتردد خلف صوت عبد الوهاب واسمعوا الناى او الفلوت وهو بيؤدى مقطوعات خفيفة متكررة ورتيبه طوال الاغنية من اول الكوبلية
انا مش باعتبك دلوقت
تحياتى يا ابوحميد على التحليل اللحنى
وشد حيلك شويه فى المعانى اللفظية
والله يجازيك يا دكتور راضى انت وغازى فى المقلب اللى شربتوه للراجل

الألآتى

29/07/2007, 04h29

ولي تعليق بسيط اوجهه الى اخي الحبيب الآلاتي .. ان اغنيه لا مش أنا اللى ابكي اغنيه ذات كلمات رائعه جدا ومليئه بالاحاسيس والمشاعر الجميله التى اظهرها اللحن والاداء في اجمل صوره .. صعب ان اتقبل التهكم على هذه المشاعر الصادقه .. اقترح ولا تغضب مني ان تتفرغ للتعليق على اللحن وتترك التعليق على الكلمات لراضي بك فهو اقدر على ذلك .. والخلاف في الرأي لايفسد للود قضيه .. وارجو من راضي بك الا يرفض هذه المهمه .. ولكم كل حبي وودي .

أشكرك أخى العزيز على التنبيه .. وأسف جداً إذا كان أسلوبى فى شرح الكلمات وصل إليكم بهذا الشكل ..

فى الحقيقة .. أنا الغلطان .. غلطان بجد .. مش هزار ..

لأنه كان من المفروض أن أفصل بين طبيعتى المرحة التهكمية وبين طبيعة الكلمات الحقيقية .. ولكن الظاهر أن كل شئ إختلط ببعضه .. وسبب صدمة لمن يعيشون الكلمات بقلوبهم وربما تمثل لديهم ذكريات معينة .. فجئت أنا وهدمت كل هذا بأسلوبى الساخر .. ( فين الفلكة ياجابر ) .. ولقد قررت أن أقوم بالتحليل الموسيقى فقط دون شرح الكلمات .. على أن يقوم أحدكم بهذه المهمة الصعبة .. وبدأت هذا بالفعل من الأمس .. فى تحليلى لأغنية ( جواب حبيبى ) لليلى مراد ..

وإن كان لكل شئ فائدة .. فهذا النقد الذى تلقيته بسبب شروحاتى الساخرة للكلمات .. أدى فى النهاية إلى إراحتى من هذا العناء وتفرغى للتحليل الموسيقى .. هو عناء بالفعل لمن يعى ويفهم .. فالمسألة ليست مجرد شرح كلمات لغوياً أو نحوياً .. وإنما هى ترجمة مشاعر وأحاسيس الشاعر .. الحمد لله ..

تأكد أننى لست غاضباً أو زعلان .. فأنا جتتى نحّست .. وأصبحت محصناً ضد الزعل .. وإسأل عمنا راضى وأخونا حسن ..

matar

29/07/2007, 18h59

عمنا الكبير الفنان الآلاتي
انحني احتراما وتقديرا لأدبك الجم ..واسجل هنا اعجابي الكبير بصدرك الرحب في تقبل النقد وممكن ان يكون هناك الف عضو يحللوا الكلمات ولكن لن تجد الا عمنا الآلاتي الفنان قادرا على تحليل اللحن دمت لنا ذخرا وعطاء فنيا بلا حدود وجزاك الله عنا الف خير .. مع خالص حبي للجميع:AW04:

الألآتى

04/08/2007, 11h06

طيب .. أوكيه .. ماشى .. أنا معاك طبعاً فى كل ماذكرته ..

لكن .. هل تقصد بكلامك التحليل الموسيقى .. أم تحليل الكلمات ؟؟ ..

وعموماً : أحب أن أوضح شيئاً .. لعل ذلك يفسر أسلوبى فى التحليل ..

لقد درست الموسيقى ذاتياً وبكل ماأوتيت من تصميم وإصرار على التعلم .. عبر سنوات طويلة .. لذا أعتبر نفسى فاشل إلى حد كبير فى ( النحت ) .. لأن صاحب بالين كداب ..

ولقد لاحظت من طول تجوالى فى المنتديات والمواقع المختلفة .. أن دروس وشروحات وكذلك تحليلات الموسيقى .. تتجه أكثر إلى الأكاديمية .. لدرجة أن بعضهم وضع أجزاء من المناهج الدراسية كما هى ( نقل مسطرة ) .. وإذا تابعت منهج التحليل الموسيقى .. وبعض التحليلات التى يقدمها الدارسون .. ستجد نفسك أمام طلاسم ( لغير المتخصصين ) ..

لذا قررت بينى وبين نفسى .. أن أحاول تبسيط هذا العلم لأقصى حد .. وتقديمه فى أبسط صورة للمتلقى .. ليس بالضرورة أن يكون هذا المتلقى دارساً للموسيقى أو حتى يريد دراستها .. ولكن هناك فئة كبيرة تريد أن تتذوق وتستمع مع بعض الفهم .. ومن الظلم أن نعمل على تعقيد المسائل أمام هؤلاء .. بغرض إستعراض معلوماتنا أمامهم ..

وأنا شخصياً لا أحب إستعراض المعلومات .. كما لا أحبذ وضع البيض كله فى سلة واحدة ..

من السهل عليا أن أكتب كلاماً أكاديمياً يحتوى على مصطلحات ورموز .. قد لا يحتاجها المتلقى العادى .. بالرغم من أن هذه الطريقة تعطى القارئ إنطباع أنه أمام جهبذ من جهابذ الموسيقى .. وأستاذ كبير لا ينبغى مناقشته ..

ولكنى تنازلت عن كل هذا فى سبيل توصيل المعلومة من أقصر طريق ..

ولعلمك ياعم أدهم .. أن طريقتى هذه طالماً نالت من النقد والمناقشات من الأكاديميين وحاملى الشهادات ( بعضهم وليس كلهم بالطبع ) .. وبالرغم من ذلك .. فإنى لم ولن أتنازل عن أسلوبى وطريقتى فى عرض المعلومة .. وكل شيخ وله طريقة ..

أما عن تحليل الكلمات .. فلقد قررت ( عن إقتناع ) التنازل عن هذا الشرف لمن هو أجدر منى فى هذا المجال .. وأعتقد أن المنتدى به العديد من الأخوة الأفاضل دارسى الشعر وبحوره وتفعيلاته .. لأننى وبكل بساطة لن أستطيع مجاراة أو مناقشة هؤلاء فى تخصصهم .. أما عن الموسيقى .. فأنا لها ومستعد لمناقشة أى متخصص فيما ذكرته من تحليلات ..

تقبل كل تقديرى أخى العزيز لإتاحتك الفرصة لى لعرض وجهة نظرى ..

mokhtar haider

06/08/2007, 02h03

سمعت من هذه الأغنية أن لها تسجيلين

و أفصل بينهما في مقطع
غيروك علموك تنسى و تبيع اللي كان
في تسجيل أول يقولها مرتين فقط
أما في تسجيل ثاني فيقولها ثلاث مرات... و المرة الثالة سمبوقة بعبارة... آه.... قصيرة جدا... و جننت بهذه اللقطة... و لا زلت أجن في سماعها

أحببت هذه الأغنية كنت اسمعها و عمري 14-15 سنة (1960-1961) في أحد المسابح أيام أواخر االفترة الاستعمارية... كان معظم معتادي هذاالمسبح فرنسيين... و كم كنت فخورا بهذا الروعة التي لا تقارن بجمالها أمام ما كان يدور من أغاني فرنسية و غربية... و اقتنعت نهائيا من يومها أن صوت عبد الوهاب أجمل و أدق الأصوات في البشرية و في كل الأزمان... و لا زلت مقتنعا بهذا

و مما يقوله محمد عبد الوهاب في مذكراته أنه جمع في هذه الأغنية كل ما تعلم من مناهج و اتخذ من علوم موسيقية و أخذ من خبرة طيلة حياته الفنية منذ بداياته

صالح الحرباوي

09/01/2008, 14h49

كلمة شكر للأستاذ الكريم الآلاتي

قد تكون هذه الكلمات غير كافية للتعبير عن الشكر و العرفان للمجهود الجبّار الذي يقوم به الأستاذ القدير أبو حسام الآلاتي.
في الحقيقة، أنا لست في العادة، كثير الميول للمجاملات، و من المؤكد أن قيمة أستاذنا الآلاتي ليست في حاجة لأحد لكي يثني عليها بالشكر و المديح. وأعلم كذلك أن أدبيات المنتدى لا تحبذ هذا المنحى.
لكن أردت و بكل صدق أن أبرز من وجة نظري، دور هذا التحليل و التمحيص للألحان و الأغاني، والذي وجدته من الإبداع بمحلّ.
نحن السمّيعة غير المتخصصين في علوم الموسيقى ، نستمع و نستمتع بالأغاني و الموسيقى بأحاسيسنا الفطرية و عواطفنا البشرية و أذواقنا الشخصية، و كل واحد منا يبني تصوره الخيالي لما يسمعه حسب ميولاته و مشاعره.
و ها قد لمست من تحاليل الأستاذ الآلاتي إضافات معتبرة لمن يبذل جهدا و يستعين بها.
فهي في نظري، تلعب دور فانوسٍ يزيد من إنارة درب نسلكه أو (بلغة العصر) كجهاز (جي. بي. س) يساعد مسافرا على عدم الضلال في مسالك قد تبعده عن الطريق الصحيح.
فأنا يا حضرت الأخ و الأستاذ العزيز الآلاتي و منذ أن اكتشفت هذا الركن من المنتدى، أُقرُّ بأنني أصبحت من المتابعين المواظبين له، و جعلت من أعمالك القيّمة مرفقا ضروريا لكل أغنية حللتها. و أتمنى المزيد من هذه الدراسات.
فلك مني صادق الإعجاب و خالص التقدير.
.م. ص الحرباوي

الألآتى

09/01/2008, 16h03

الأستاذ المحترم الحرباوي ..

لم أتعود ياصديقى على أن أوطن نفسى على قبول كلمات المجاملة .. لأنها قد تصيبنى يوماً ما بشئ من الغرور ( والعياذ بالله ) ..

ولكن أمام هذا السيل من عبارات الشكر والثناء .. لم يبقى أمامى إلا أن أشكرك أخى العزيز على كلماتك الرقيقة .. التى أجد نفسى عاجزاً أمامها .. لأنى لابد من أن أستحقها .. وهذا ماأشك فيه .. فأنا مجرد عاشق للموسيقى .. أحاول أن أنير الطريق أمام إخوانى الذواقة .. وأجعلهم يسمعون الألحان كما أسمعها وأتذوقها ..

أحببت أن يشاركنى أحد فى أسلوب تذوقى للموسيقى ..

أتمنى أن أكون عند حُسن ظنك وظن الجميع .. وأشكرك مرة أخرى ..

حسن كشك

12/01/2008, 07h20

أيوه ياعم حسن ..

الأغانى بالملايين فعلاً .. ولكن الإختيار هو إللى صعب .. ليس سهلاً إختيار أغنية تستحق أن نلقى عليها الضوء ..

منتظر مفاجأاتك ..
ياحضرة المايسترو ابو حسام
بتشكو من ان مافيش حد بيبعت اغان عشان تتحلل
وبتقول منتظر مفاجاتى
وانا كنت عامل عزومة على اغنية ( ابيض ياوردى ) لشادية
ولا واحد عبرنى وانت اولهم
يارجل دى الاغنية حمضت من كتر الركنه
طيب انا سخنتها تانى وحطيت حواليها شوية مخللات ومزه يمكن نفسك تنتفح عليها وتحللها
على كل حال رابطها اهو
http://www.sama3y.net/forum/showthread.php?t=33656

صوت الموسيقى

16/06/2008, 20h18

ممكن حد يقول الغنوة دى كانت سنة كام؟؟؟؟

mokhtar haider

16/06/2008, 22h16

أخي الكريم الاستاذ صوت الموسيقى
عهد الأغنية هذه (لا مش أنا اللي أبكي) يرجع إلى سنة 1959
كلمات حسين السيد

heba123

18/12/2008, 09h40

انا بحب جدا الاغنيه دي و بجد انا بشكر كل من فكر وعمل المنتدي دا لان احنا الجيل الديد بجد يفتقد هذه الاغاني لا الروائع و معظمنا مش يعرف حاجه عن هذه القصائد
انا بجد بشكركم:emrose:

عصام انس

11/01/2010, 18h21

شكررررررررررررررررررررررررررررررررررررررررا

حامد جودة 2

14/01/2010, 23h59

لا مش انا اللى ابكى

ما هذا الذى يقدمه عبد الوهاب فى لحنه الشهير لا مش أنا اللى ابكى؟ هل هذه موسيقى عربية؟

الإجابة أنها لم تكن موسيقى عربية لكنها أصبحت كذلك! لقد بلغ هنا قمة التجديد وقمة الانطلاق فى التأليف الموسيقى

قبل هذا اللحن لم يكن من المتصور أن هناك موسيقى شرقية بهذا الشكل ، إنها تبدو غربية مثل كلاسيكيات الغرب السائدة فى الخمسينات ، إنه يضع موسيقى مختلفة كل الاختلاف عما تعودته الأذن الشرقية ، لقد أصبح لدينا فرانك سيناترا آخر فى الشرق! وهو هنا يحقق أمنية من أمانى سيد درويش ، إنها موسيقى غاية فى الحداثة وهى الموسيقى يمكن أن يتذوقها الشرق والغرب ، وهى من الرقى بحيث يمكن نفاخر بها أمما أخرى لها باع طويل فى الموسيقى ، وهى موزعة أوركستراليا على أصول الموسيقى العالمية ، لقد قفز عبد الوهاب عاليا ، ولا عزاء لمن لا يستطيع اللحاق به سواء من الفنانين أو من الجمهور ، انتهى الأمر وأصبح محمد عبد الوهاب فوق السحاب

ولكى تكتمل الصورة لم يكن التجديد هنا فى الموسيقى فقط ، فقد حملت الكلمات التى صاغها حسين السيد ، صاحب أكبر عدد من الأغانى لعبد الوهاب بين المؤلفين ، معان جديدة قدمت نموذجا فى الحب غير ذلك الذى شاع الغناء له قبل ذلك ، إنه يقدم محبا جديدا يرفض الشكوى والبكاء والتمتع بالعذاب فى الحب ، يحترم ذاته ويقدم كبرياءه على حبه
المصدر : http://arab-music.tripod.com

عفاف سليمان

28/01/2010, 14h15

من مصدرين علشان أتأكد:[/SIZE]

لأ مش أنا اللى أبكى ... واللا أنا اللى أشكى ... لو جار عليا هواك
ومش أنا اللى أجرى ... وأقول عشان خاطرى ... ولا ليا حق معاك

تبقى إنت هاجرنى ... وإنت اللى ظالمنى ... وفاكرنى هأترجاك
أنا قلتها كلمة ... وكل شىء قسمة ... ودى قسمتى وياك

وكفاية قلبى إنشغل ... على قلب خالى الأمل
وعايزنى أرجع تانى لا ... أرجعلك تانى لا ... لا لا لا

من كام سنة لما ... دار الهوى بيننا ... فاكر إحنا قولنا إيه
مش دى راحة قلبى ... ولا ده أمل حبى ... اللى إتفقنا عليه

إشمعنى أنا عهدك ... صنته وراعيت ودك ... والعمر داب حواليه
لكن اللى بيحبك ... مالوش تمن عندك ... والغالى يرخص ليه؟
أنا راح زمانى هدر ... ولاكانش عندك خبر
وعايزنى أرجع تانى لا ... أرجعلك تانى لا ... لا لا لا
أنا مش بأعاتبك دلوقتى ... أنا بدى أقول ليه ليه ده يحصل؟
علشان نهايتك ونهايتى ... كان يجرى إيه إيه لو كانت أطول؟
غيروك علموك تنسى وتبيع اللى كان
بعته ليه؟ تنسى ليه؟ فين حبيبى بتاع زمان
فين قلبك من حبى ليه ليه ... ليه ماسكنشى جنبى؟
كان مشاركنى فى عمرى ... ونسى يشارك قلبى
ماقدرشى يعرفنى ... ماعرفشى يفهمنى
وعشان إيه ماعرفشى؟ ... ده ذنبك مش ذنبى
ده ذنبك ... ده ذنبك ... مش ذنبى
تبقى إنت هاجرنى ... وإنت اللى ظالمنى ... وفاكرنى هأترجاك
أنا قلتها كلمة ... وكل شىء قسمة ... ودى قسمتى وياك
وكفاية قلبى إنشغل ... على قلب خالى الأمل
وعايزنى أرجع تانى لا ... أرجعلك تانى لا ... لا لا لا

http://pictures.brooonzyah.net/fwasel/3.gif
بعد كلمات هذه الاغنيه
لا يقال اى كلام:emrose:
مهما قلنا حلو وجميل ورائع وممتاز
تحياتى لمن اعاد هذه المشاركه الى الاعلى
وتحياتى لكل من يستمع ويستمتع بغناء عبد الوهاب:o
http://pictures.brooonzyah.net/fwasel/49.gif
اسعدكم الله جميعا بكل خير
اختكم عفاف