مشاهدة النسخة كاملة : صلاح جاهين
aquarius
09/08/2006, 04h25
خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي
ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي
و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي
يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي
أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
عجبي
سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي
كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي
عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي
رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي
ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي
ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي
نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي
علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي
يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي
شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي
أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي
إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!
إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي
يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
عجبي
في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي
الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي
علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي
إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي
نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي
- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي
السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي
وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام يتقــــــــــــاس بالمســـــــــــطرة
عجبي
سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي
الدنيا أوده كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
عجبي
أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي
نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي
يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي
كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
عجبي
ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... و الا يمكن نســـــــــــيت
عجبي
ما حد في الدنيا واخد جزاتــــــــــــــــــه
و لا حــــــــــــــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل ... و أنا النيل بذاته
عجبي
رقاصه خرسا و رقصه من غير نغــم
دنيا . . يا مين يصالحها قبل النـــــدم
ساعتين تهز بوجههـــــــــــــــا يعنـي
يترجرجوا نهديها يعني نعـــــــــــــــم
عجبي
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
عجبي
من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقــــــــتلك
عجبي
جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي
جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي
أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي
يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي
كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي
تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
عجبي
aquarius
09/08/2006, 04h58
قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
عجبي
.. دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي
دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي
-الدنيا من غير الربيع مــــــــيته
ورقة شجر ضعفـــــــانه و مـــفـــــتــته
-لا يا جدع غلطان تأمل وشوف
زهر الشتا طالع فــــــــي عز الشـــــتا
عجبي
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي
سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي
كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي
كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
عجبي
مزيكة هادية الكون فيها انغـــــمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي
إنشد يا قلبي غنوتك للجمــــــــــــــــــال
و ارقص في صدري من اليمين للشمال
ما هوش بعيد تفضل لبكره سعيــــــــــد
ده كل يوم فيه الف الف احتمـــــــــــــال
عجبي
آه لو انا و محبوب جزنا الفضـــــا
في سفينة وحدينا .. واشيا رضـــا
ساعة صفا تعجبنا نرجع لهــــــــــا
و الهم قبل ما ييجي .. يبقي مضـى
عجبي
أنا إله الوجد رب الهيــــــــــــــــام
أضرب بسهم الوهم وهم الغـــــرام
و هم الغرام من كتر ما هو لذيـــــذ
رشقت انا ف صدري جميع السهام
عجبي
حدوته عن جعران و عن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
عجبي
ياللي عرفت الحب يوم و انطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
عجبي
زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي
إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي
يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي
مرحب ربيع مرحب ربيع مرحبــــــــــه
يا طفل يا للي ف دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
عجبي
فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي
غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
عجبي
انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي
انا الذي عشت الزمن مضيعـــــــــه
بروح حزينة معفنة مضعضعــــــه
زرعتشجرة سنط لجل انجــــــرح
لقتها شعر البنت و مفرعــــــــــــه
عجبي
لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي
العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فــــــــخ
عجبي
أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور
عجبي
غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي
ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي
خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
عجبي
كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي
منين أجيبها كلمه متألمـــــــــــــــــة
لعيبه فايره حايره و مصممــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي
أنا قلت كلمة و كان لها معنييـــــــــن
كما بطن واحده و توأمين زي وشين
لو دنيا شر.. التوأم الخير يمـــــــوت
لو دنيا خير .. الشر ح يعيش مــنين
عجبي
أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي
بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــــــــــــان
و كنت في الشارع .. و في الجزمة خرق
عجبي
عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبي
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي
ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
عجبي
حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
و الكون بحاله جوه عقل البشــــــر
عجبي
لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي
ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح و اسقي الفــولاذ
عجبي
غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي
البط شال عدي الجبال و البحــــــور
ياما نفسي اهج .. احج ويا الطــيور
أوصيك يا ربي لما اموت .. و النبي
ما تودنيش الجنه .. للجنه ســـــــور
عجبي
طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي
و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي
عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي
عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــــــــوا
عجبي
احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا
عجبي
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي
في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي
وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي
الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي
يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي
الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي
ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبي
ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لو وحا بحنــــــــــــــــــــــانــي
عجبي علي التاني بإيــــــــه يوحيلــــــــك
عجبي
أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار
عجبي
الأرض شوك أيوه لكين هايش
و الحمرة مش يعني الطريق حايش
دي دمنا السيال .. وبشرة خيـــــــر
ان انتي عايشة و ان كنت أنا عايــش
عجبي
إيه اللي خدته من مرور السنــــــين
يا قلبي الا دمعتك و النيــــــــــــــين
بتئن و ترجع و بتفرح و ترجع تحــن
مع إن مش كل البشـــــــــــر فرحانين
عجبي
اوقات أفوق و يحل عني غبــــــــــايا
واشعر كأني فهمت كل الخبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا
عجبي
عيني رأت مخلوق في غاية البشاعة
أنا قلت له لما تأملته ساعـــــــــــــة
اللذه و الموت علموك اللــــــــــزج
و انا علموني الفلسفة و الشجاعــة
عجبي
غطس وقب الموج نهود بمبي
من ألف جيل جمالات ما تعلم بي
يا قلبي عيب دول امهاتنا القدام
أستغفر الله العظيم ربـــــــــــــي
عجبي
علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و الا فلا
عجبي
ظهر المسيح الحي علي سفح ربـــــــــوة
و نزل بهالة الضي و قعد في قهـــــــــوة
بصوا .. تعالوا .. قالوا خليه في حالــــــــه
الناس في حالهم يا بني .. مالهمش دعوة
عجبي
لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي
يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي
مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي
قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه
عجبي
حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي
بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي
نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟
عجبي
وسط الحطام اتفرجوا يا أنـــــــــام
تمثال ملك . و مبوله م الرخــــــام
لتنين نحتهم نفس أسطي الحجــــر
و كانوا ذات يوم كتلتين لسه خــام
عجبي
عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي
أنا قلبي كورة و الفراودة أكــــــــــم
ياما اتنطح و انشاط و ياما اتعكـــــم
و اقول له كله ح ينتهي في المعـــاد
يقول بساعتك ؟ و الا بساعة الحكم ؟
عجبي
الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي
أهوي الهوي و همس الهوي في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي
يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟
عجبي
الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي
قطي العزيز راقد علي الكنبــــــات
في نوم لذيذ .. و بيلحس الشنبات
و انا كل عين فنجان مدلدق قلــق
صدق اللي قال إن الحياة منابات
عجبي
قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي
سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. و سلام كلام
عجبي
فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
و الممكنات دول محرومين م الكمال
عجبي
aquarius
09/08/2006, 05h03
هات يا زمان و هات كمان يا زمان
غير بسمة الشجعان مامني يــــبان
هو اللي داق الفرحة يوم ثورتـــــه
يقدر يعود و لا ثانية للأحــــــزان ؟
عجبي
عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث
عجبي
يومي علي الله تنتهي و تغيــــب
الشمس و تعود تاني يوم لهاليب
زي الحياة مأساه و من كترهــــا
بقي لا انتهاءها و ابتداءها عجيب
عجبي
علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض
عجبي
أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي
قالوا ابن آدم روح و بدنه كفـــــــــــن
قالوا لأ بدن . قالوا لأ ده روح في بدن
رفرف فؤادي مع الرايات في الهــــــوا
أنا قلت لأ روح في بدن في وطــــــــن
عجبي
حوار تأخر 19 سنة مع..
فيلسوف أولاد البلد..
أبو جلابية واسعة.. وضحكة أوسع..
صلاح جاهين
تخيلته وجمعت قصاقيصه: غادة م. محمود
رسم عالمه: محمد هشام عبيه، أحمد عمار
إمدادات فنية: شريف عرفة
غمضنا عينينا.. فتحنا قلوبنا.. لقيناه هناك.. مستربع في مطرحه. صفينا دمنا، لقينا كلامه بينزل من الأوردة والشرايين.. عشان يدور في السواقي ويوصل لزرع الأرض الطيبة.. في كل مكان. ولما ذكراه هلت علينا، بريحة النيل والعرق والربيع، غمضنا عينينا تاني، فابتسمنا.. واترسمنا عيال بضحكة واسعة.. وعواجيز بشعور شايبة.. وشباب مجانين.. سخنين.. بنهتف للبيت وللدفا والطين.. في صورة واحدة وفي نفس الوقت.
ومع إنه مش موجود بيننا، إلا إننا برضه قابلناه، على الخيط الرفيع الواصل بينّا وبينه. عرفناه دنيا واسعة وعشناه حالة عمرها ما تموت.. عشان كده مش هنقدر نلخصه في حبة كلام، جوه حوار اتخيلناه. فتشنا في أوراقه وفي صوره بنفس الدهشة اللي في عينيه، واللي بدرها أخضر جوانا.. قلبنا الصالون قعدة عربي..وعشنا الحالة.. الحالة اللي مالهاش غير اسم واحد.. صلاح جاهين
..
(صلاح جاهين.. أبو جلابية واسعة وضحكة أوسع)
• اسمه الحقيقي محمد صلاح الدين بهجت أحمد حلمي
• ولد في 25 ديسمبر 1930 فى شارع جميل باشا بحي شبرا.
• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.
• التحق بكلية الحقوق بناء على رغبة والده، ودرس في ذات الوقت في كلية الفنون الجميلة دون علم والده لفترة قصيرة، ثم ترك الدراسة بأكملها وانغمس في العمل الصحفي.
• التحق بروزاليوسف وعمل سكرتير تحرير وظل يرسم بشكل سري إلى أن اكتشفه "أحمد بهاء الدين" -الرجل الثاني بالمجلة وقتها- فأفرد له صفحة كاملة أسبوعيا.
• كتب عددا كبيرا من الأغاني الوطنية وارتبط اسمه بثورة يوليو ومغنيها "عبد الحليم حافظ" وذاعت شهرته من خلال بعض الأغاني مثل "صورة" "السد العالي" وغيرهما.
• كتب السيناريو والحوار لعدة أفلام مثل "خلّي بالك من زوزو"، "أميرة حبي أنا"، "شفيقة ومتولي" و"المتوحشة" كما شارك في إنتاج أفلام "أميرة حبي أنا"، "عودة الابن الضال"، وشارك بالتمثيل في عدة أفلام منها "شهيد الحب الإلهي" عام 62 و"لا وقت للحب" عام 63 و"المماليك" في عام 1965.
• توفي في 21 أبريل عام 1986.
غابة تهب عليها الرياح
قدام كتلة المواهب المتجمعة دي، وقفنا، تأملنا، وسألنا..
يا عم صلاح (http://www.boswtol.com/2004_2005/nabadat/daif_37_02.html) ، يا رسام يا كاتب ويا ممثل.. ياللي الدهشة كانت مالية عينيك الطفلة.. كان همك إيه في حياتك؟.. عملت إيه فيها؟.. شفتها ازاي؟.. باختصار، ازاي بقيت صلاح جاهين؟..
نظرت في الملكوت كتير وانشغلت
وبكلمة (ليه؟)و(عشان ايه) سألت
أسأل سؤال.. الرد يرجع سؤال
وأخرج وحيرتي أشد مما دخلت
عجبي
الحيرة دي هي اللي كانت بتخليك تشوف الدنيا بعين مختلفة.. يمكن عشان كده أختك بهيجة وصفتك بـ"أخيب تلميذ في المدرسة في الرسم". اتمردت على الرسوم التقليدية اللي لسه بيخلوا الطلبة ترسمها في المدارس.. بيوت.. سما.. شجر.. ده حتى ماحدش اكتشف موهبتك غير مدرس الرسم الجديد بتاع المدرسة، اللي كان عنده رؤية مختلفة، واقترح على فصلك الرسم في موضوع بعنوان "غابة تهب عليها الرياح"، وساعتها وضحت عبقريتك في الرسم. حاسس بإيه بعد ما بقيت من علامات فن الكاريكاتير؟ وإيه كان انطباعك لما قدرت ترسم البسمة على وشوش الناس؟
بلياتشو قال إيه بس فايدة فنوني؟
وتلات وقق مساحيق بيلونوني
والطبل والزمامير وكتر الجعير
إذا كان جنون زبوني زاد عن جنوني
عجبي
البلياتشو أكبر دليل على إن الوش المبتسم، مش دايما بيكون وراه إنسان مبسوط، ودي فعلا كانت حالتك يا عم صلاح. إنت جالك اكتئاب بعد النكسة، قلت قبل كده إنها حالة كاملة بتنتابك، وبتهاجمك في أوقات معينة. اتغلب عليك شعور بإنك كنت بتساهم في خداع الناس العاديين. سافرت فعلا لإحدى المصحات النفسية في موسكو وقضيت فيها خمسة أشهر، إلا أنك عدت باكتئاب مضاعف.. ازاي بتشوف الحزن؟
يا حزين يا قمقم تحت بحر الضياع
حزين أنا زيك وإيه مستطاع
الحزن ما بقالهوش جلال يا جدع
الحزن زي البرد... زي الصداع
عجبي
بس إنت كنت بتفرح الناس برسومك وأغانيك، مش إنت اللي كتبت "خلّي بالك من زوزو" و"الدنيا ربيع" و"الحياة بقى لونها بمبي"؟
غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون... وليه
رسمت ورده وبيت وقلب وعلم
عجبي
جميل جدا، وبمناسبة الـ"عَلَم"، كانت ليك أغاني وطنية نطقت باسم الثورة، كنت بتكتب في صف السلطة عكس "أحمد فؤاد نجم" مثلا، عملت لحليم "صورة" و"بستان الاشتراكية" و"بالأحضان" و"أحلف بسماها وبترابها". كنتم مع بعض في خندق واحد، بتتكلموا عن هموم وطن، من غير سكات أو ملل.. أي فنان عندك عندليب، زي عبد الحليم، كنت بتقول له إيه؟
يا عندليب ما تخافش من غنوتك
قول شكوتك و احكي على بلوتك
الغنوه مش ح تموتك إنما
كتم الغنا هو اللي ح يموتك
عجبي
صورة.. صورة.. صورةhttp://www.boswtol.com/2004_2005/nabadat/images/37th/daif_05.jpg
والدك كان رئيس محكمة الاستئناف بالمنصورة، أصر إنك تلتحق بكلية الحقوق رغم علمه برغبتك في الالتحاق بالفنون الجميلة، وعشان كده التحقت –في السر- بقسم التصوير بكلية الفنون الجميلة، وكان "بيكار" وقتها أستاذك في الكلية اللي لما انكشف أمرك، كلم والدك عشان يقنعه بموهبتك وبإن الفن هو بيتك الحقيقي مش المحاماة. لكنه برضه ماغيرش رأيه.. وإنت برضه حبك
ليه ما اتغيرش.. ممكن تعرفنا عليه أكتر؟
أنا كان لي أب، وكان رئيس محكمة
ستين سنة. في قضية واحدة ارتمى
ستين سنة وطلع براءة وخرج
يشكي الحياة والموت لرب السما
عجبي
http://www.boswtol.com/2004_2005/nabadat/images/37th/daif_06.jpg
والدتك كمان كانت من أول المتخرجات من مدرسة السنية. كانت فنانة غير معلنة، بتألف كل سنة مسرحية للبنات وتخرجها وتصمم لها الملابس والديكورات. وجدك كان أحمد حلمي الصحفي المشهور اللي اتسمى الموقف على اسمه. واضح إن الوراثة لعبت لعبتها معاك، حتى ابنك بهاء بقى شاعر زيك.. كنت متوقع له ده؟ وكنت بتوصيه بإيه؟
خوض معركتها زي جدك ما خاض
صالب وقالب شفتك بامتعاض
هي كده... ما تنولش منها الأمل
غير بعد صد ورد ووجاع مخاض
عجبي
الله عليك! وبما إن الموضوع أخد الشكل الشخصي الدافي ده، تتضايق لو عرفنا تفاصيل حياتك اليومية؟ يعني كنت بتصحى على إيه؟.. بتشوف إيه؟.. يومك كنت بتبتديه ازاي مثلا؟
فتحت شباكي لشمس الصباح
ما دخلش منه غير عويل الرياح
وفتحت قلبي عشان ابوح بالألم
ما خرجش منه غير محبه وسماح
عجبي
ده بالنسبة للصبح، طب والظهر؟
زحام وأبواق سيارات مزعجة
اللي يطول له رصيف.. يبقي نجا
لو كنت جنبي يا حبيبي أنا
مش كنت أشوف إن الحياة مبهجة
عجبي
بترجع مهدود.. تعبان.. بتفكر في إيه قبل ما تنام؟
يومي على الله.. تنتهي وتغيب
الشمس وتعود تاني يوم لهاليب
زي الحياة، مأساة، ومن كترها
بقى لا انتهاءها ولا ابتداءها عجيب
عجبي
يا طفل يا للي في دميhttp://www.boswtol.com/2004_2005/nabadat/images/37th/daif_07.jpg
بجد كلامك مابيتشبعش منه، وقعدتك وضحكتك.. وصوتك الحنين ليهم مكان كبير في القلب. كنت طفل حالم، وشاب مليان حماس وراجل طيب. البسمة –رغم الآلام- ما فارقتك،
وبرضه كنت شخصية جدلية في حياتك وحتى بعد مماتك (http://www.boswtol.com/2004_2005/nabadat/daif_37_03.html). لو فرجتنا على صورك وإنت صغير، هتورينا إيه؟
مرحب ربيع مرحب ربيع مرحبة
يا طفل ياللي في دمي ناغي وحبا
علشان عيونك يا صغير هويت
حتى ديدان الأرض والأغربة
عجبي
ولما كبرت، وبقيت شاب أحلامه بلون طمي النيل الوردي، كنت دايما وحيد وساكت؟ كنت بتلاقي جواك عالم كامل يستغرقك ويسرقك من الدنيا؟ ده صحيح؟
أنا شاب عمري ولا ألف عام
وحيد ولكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي
ولما كبرت شوية، موقفك من الحياة اتغير؟
ولو انضنيت وفنيت وعمري انفرط
مش عاوز الجأ للحلول الوسط
وكمان شطط وجنون مانيش عاوز
يا مين يقول لي الصح فين والغلط؟
عجبي
يصعب علينا نسيبك يا عمنا، لكن لو استغرقنا أكتر من كده، ممكن مانعملش حاجة غير إننا نسمع لك. لو قلنالك تنهي الحوار إنت، بحاجة تحب تقولها لنا.. وشوشاية.. نكتبها في ورقة صغيرة ونلزقها على قلوبنا، قبل مكاتبنا، تبقى إيه؟
أحسن ما فيها العشق والمعشقـة
وشويتين الضحك والتريقـة
شفت الحياة، لفيت، لقيت الألـذ
تغييرها، وده يعني التعب والشقا
عجبي
----------
من أعماله السينمائية
تمثيل:
لا وقت للحب
اللص والكلاب
المماليك
حوار:
اللعنه
المتوحشه
خللى بالك من زوزو
شيلنى واشيلك
شفيقه ومتولى
سيناريو :
المتوحشه
خللى بالك من زوزو
شفيقه ومتولى
غازي الضبع
18/04/2007, 12h31
رســــــــــــــالة إلى جندى
يا بن عمى يا للى فى الخط الأمامى
لك سلامى
و سلام أطفالى ، و مراتى ، و أبويا ،
و امى ، و اخوالى و عمامى ...
كلهم فى خير و مشتاقين إليك
كلهم متلهفين ترجع لنا
و كمان من عندنا يسلم عليك
كروان الفجر ، و البط اللى سابح فى القنا
و إبراهيم و حسين و ماتعدش أسامى
يا ابن عمى
يا للى عنوانك فى خط النار بعيد
شِدّ حيلك ، كلنا وياك هنا
مدفعك جبناه حسب وصفك شديد
من دمانا صبّيناه صلب و حديد
قاسي و عنيد
صب منه ع الأعادى كرهنا
خد من الرجعية تارك
خلى كل الدنيا تسمع فرقعة رعد انتصارك
و الجميع يا نور عيوننا فى انتظارك
اتنين صباحـــــــــــــــــا
النور ملو الشوارع
و مليون راديو والع
الساعة اتين صباحا
لكن إيه الموانع !
الخلق رايحة جايه
و الدنيا لسه حيه
مليانه بالهأَو أَو
و زعيق القهوجية
واحد يقول لواحد
خليك يا عم قاعد
التانى يقول له : شكرا
ده انا م المغرب مواعد
فيه سهره لسه عندى
فى بيت فلان افندى
ح ناكل حاجة حلوه
و نشرب تمر هندى
و اللى تروح دالقه جردل
فوق حضرة المبجل
طبعا صاحبنا يزعل
و ينفجر شتايم ...
و الحى كله يوصل
ما بين مصلح و لايم
اللى يقول :
يا جماعة ...
و اللى يقول : يا بهايم
و مطرب الاذاعة
يصرخ ، و ف وجده هايم
و لو طرطقت ودنك
فى وسط دى العظايم
تسمع مسحراتى
بطبله صوتها واطى
بيقــــــــــــــــــــول :
اصحى يا نايم
العلـــــــــــــــم
كم ألف مرة يا علم يا مجيد
قدام صفوفنا مشيت خفيف و سعيد
و مشينا خلفك ننشد الأناشيد
و نشبعك بالحب و التأييد
كم ألف مرة كل صبح جديد
قبل الضباب ما ينقشع و يبيد
شفناك بتصد سارية التمجيد
و هتفنا ليك و حييناك بالايد
يا بؤرة الوطنية و التوحيد
يا مصدر الالهام لكل مريد
موت و تبقى مرتفع و عنيد
على كل شبر ف مصر يا صنديد
و لو فضل فى الدنيا مصرى وحيد
رح يرفعك يا علم يا مصرى أكيد
بكل قلب شجاع و زند حديد
اثبت مكانك فوق علالينا !
فوق كل قمة من جبال سينا !
و على العريش رفرف و كون زينة !
و اكتب فى كل قصيدة سطر جديد .
البنت و الولـــــــــــــد
البنت فارت و الولد خنشر ...
يا داهيه دقّى ! .. ألف بعد الشر ..
يا ريتها كانت نزلة شعبية ،
و الا وجع فى البطن .. يتدبر .
الا اللى نابهم ، كان قضا وصابهم ،
مالوش دوا ، و لا طب ، يا سى أنور .
البنت فى الاعدادى لسّاها ،
كان إيه لزوم الغصن يتدور ...؟
و الا الولد ، ده يا دوب دخل ثانوى ،
ليه خده ينطر شوك ، بدا المنظر ؟
مش لما بس يكملوا علومهم .. ؟
ما كانش يومهم ، يا النهار لا غبر !
لو كان عليا .. لا واد ، و لا بنّيه ،
أخلى فيهم ( مللى ) يتغير ،
غير لما يبقوا أساتذه ، بماهيه ،
و بيت جميل ، مفروش على صغّير !
المجتمــــــــــــع
المجتمع الايام دى مسكين ، عنده برد
مزكوم ، و حالته بالقوا ،
فى الاجزاخانة شفته بيجيب الدوا ...
و سأل على مناديل ورق
و حشر فى جيبه منها طرد
أصله يا عينى قبل ما يروح السبق
خد دش سخن ، و تنه خارج فى الهوا
بقى ده كلام ؟
مع انى ياما قلت له : يا مجتمع
شوف صحتك ، و ما تفتكرش إنك جدع
الجو برد مش تمام
بلاش أمور الشيطنه
بلاش دلع
و اوصف له حالة الجو تانى ، و أنصحه
يقول لى : سيبك ، جو إيه ؟
بونجور يا بيه ...
ما تقول لمصلحة السياحة ، تصلّحه !
آدى يا سيدى المجتمع !
مسـاء الورد
محمد صلاح الدين بهجت أحمد حلمي ، المشهور بـ صلاح جاهين (25 ديسمبر 1930 - 21 إبريل 1986 م) شاعر ورسام وممثل وموسيقي مصري
ولد في شارع جميل باشا في شبرا. كان والده المستشار بهجت حلمى يعمل في السلك القضائي، حيث بدأ كوكيل نيابة و إنتهى كرئيس محكمة استئناف المنصورة.درس الفنون الجميلة ولكنه لم يكملها حيث درس الحقوق.
أنتج العديد من الأفلام التي تعتبر خالدة في تاريخ السينما الحديثة مثل أميرة حبي أنا و فلم عودة الابن الضال، و لعبت زوجته أدوار في بعض الأفلام التي أنتجها. عمل محررا في عدد من المجلات و الصحف، و قام برسم الكاريكاتير في مجلة روز اليوسف و صباح الخير ثم إنتقل إلى جريدة الاهرام.
كتب سيناريو فلم خلي بالك من زوزو و الذي يعتبر أحد اكثر الافلام رواجا في السبعينيات إذ تجاوز عرضه حاجز 54 اسبوع متتالي. كما كتب أيضا أفلام أميرة حبي أنا ، شفيقة ومتولي و المتوحشة. كما قام بالتمثيل في شهيد الحب الإلهى عام 1962 و لا وقت للحب عام 1963 و المماليك 1965.
إلا أن قمة أعماله كانت الرباعيات التي كان يحفظها معظم معاصريه عن ظهر قلب و التي تجاوز مبيعات احدى طباعات الهيئة المصرية العامة للكتاب لها اكثر من 125 الف نسخة في غضون بضعة ايام. هذه الرباعيات التي لحنها الملحن الراحل سيد مكاوي وغناها الفنان علي الحجار.وهو مؤلف كلمات الليلة الكبيرة ولحنها ايضا الراحل سيد مكاوي
ينظر البعض إلى جاهين على أنه متبنى علي الحجار، احمد زكي و شريف منير. كما أرتبط بعلاقة قوية مع الفنانة سعاد حسنى حيث دفعها إلى العمل مع أحمد زكي في مسلسل هو وهي.
قراءة ممتعة أتمناها لكم مع رباعيات صلاح جاهين.... تقديري وأعتزازي
محمد حمام20
30/04/2007, 21h42
انا عجبنى جدا من دواوين صلاح جاهين بحرى
يقول فيه
أخر النهار هفهفت نسمه على الميه
بعودا ليام على الجدعان وعليا
ياصيادين القاروص صيد القاروص غيه
طرحت طرحه لقيت لقيت فى الطرحه جنيه
حلت شعورها وعقدتهم على عينيا
ونزلتنى القرار صرخ الشبار فيا
إرمى الشبك ع السمك ياواد بحنيه
لادق ع الباب واقول للحلو ياجارى
رمى الشبك صنعتى والصبر دا كارى
اصبر على الرزق لما تمتلى بحارى
واصبر على العشق لما تنطفى نارى
ياميت ندامه على اللى البحر مااداله
مفتوح عليه الحنك والكف ماداله
عدى الشطوط والخطوط اللنش عدى له
غفر السواحل ياصاحبى مستعداله
أنا مذهبى الصبر واصبر حتى على تارى
واطعم شباكى وصنارى بصبارى
أنا اعوم على الصبر لما أوصل لآوطارى
والصبر دا مركبى والقلع والصارى
احنا التلامــــــــــــذة
يا عم حمزه ،
احنا التلامذة .
جن و بلاوى مسيّحه من غير مؤاخذه
نكبر ما نكبر ،
الله أكبر .
طول الزمان ع الامتحان داخلين مبارزه !
هل من مبارز ؟
هل من مناجز ،
هل من معارك فى البلد دى ، لسه عايزه ؟
هل من منادى ؟
و نفير جهادى
قال لك : أجل ! .. لسه العجل فى رمله غارزه !
لسه ف طريقنا للأَمال ،
و الرمله من كل جهه ..
زقه مع زميلكم جمال ،
يا عقولنا يا متنبهه !
الرمله حلوه ع البلاج ،
حلوه على باب الفرح ،
لكن لحد كده و بلاش ،
أَحسن شعورى بينجرح .
اسفخص على لون الاصفرار
و الفقر ، والخوف ، و المرض
ماشفته الا و دمى فار ،
و حلمت بيه زال ، و انقرض .
كابس علينا الشئ ده ليه ؟
هو انجليز .. ؟
و الاتتر ؟
دوكهم خطر ، قمنا عليه ،
رياح ما خلتلوش أَتر .
كان برضه أمشير زى ده ،
.. كان برضه أَمشير زى ده ،
كان برضه فبراير كده ،
قمنا جموعا حاشده ،
سلاحنا أَنشودة فدا ..
احنا الجواب ، واحنا الندا ،
و احنا التلامذه المنجده ..
يا عم حمزه ما شتناش ؟
.. الدنيا شافت دمنا ،
حنّه ، على ايدين أمنا ،
حلفت يكون عيد باسمنا ،
عيد ابتدا و لا انتهاش ..
يا عم حمزه ،
(لا ماليف) و همزه
لأَ .. مش عاوزين عيشة و ارثين
و لا دنيا جاهزه .
ده ابو سد عالى ،
شهران ليالى ،
زى التلامذة ف الامتحان .. يا عم حمزه .
بهــــــــــــــــاء ابنى
عينيا بتزغلل ... و عقلى متبرجل ،
و شركة الطيران ... قالت : قوام انزل ،
مسافر اليابان ... و الوقت كالثعبان ..
دى شنطه ، و ده باسبور ... آه يانا يا غلبان ...!
دماغى مخووته ... و طافح الكوته ،
خلاص على السلم ... و بابوس ، و باسلم .
قَاللى بهاء ابنى : ... احكى لى حدوته !!!!
دعايــــــــــــــة انتخابية
آلوه ... آلوه ... يا أمم
تعالالى لالى يا محترم ..
الحمد لله ، انكم
ما بتعرفونيش كلكم .
لو كنتو عاوزين أسطوات
أنا أسطى سواق ( الفيات )
و إن كنتو عاوزين فلاحين
أنا عندى حبة فدادين
و الا انتو عايزين يا ترى ،
مرشحايه مغندره ،
متبدَّره ، و متحمره ،
إذا كان كده ، فأنا ( .... )
رد ...
الشارع قال للحارة :
إخييه ...
ريحتِك طعميه ، و فول و بصارة ...
آييياه ..
كل بيوتك بغدادلى
مافيهاش تكييف
و بيبانك نازله لتحت ، بدال ما هى طالعه لفوق ،
و لا حتى ليكى رصيف ،
سِتّاتك بلدى ، و ليل و نهار ع العتبه
قاعدين كده جوق ....
رِجَّالتك نكته و عجبه ،
و لا يعرفوا ذوق ،
و عيالك دول ،
نسانيس مقاصيف الرقبه ،
.....................
الحاره ردت رد ..
خلى الشارع ينسد !
عيون البقـــــــــــــــر
الزجل ده غزل فى عيون البقر ،
يا حلاوة عيونه الوساع ! ..
ما فيهاش و لا نقطة ضياع ،
فيها ليل ، بس من غير سهر ...
فيها بحر غويط ،
فيها صبر عبيط ،
زى صبر الشجر !
يا حلاوة عيون البقر
شعرا شبهوا عيون حريمهم بها ،
و نا شاعر ، و له واحده بيحبها ...
إنما يستحيل !..
سيبنا م الشعرا ،
احنا ناس فقرا ،
و اللى يعشق فتاه ، فيها م البقرة .
يبقى لمؤاخذة تور !
سكــــــــس أبيل
عطشان يا صبايا ... دلونى على السبيل
فى قلبي ولعه قايده ... من كتر ( السكسابييل )
شكل الصبايا يهبل ... فى لبس المناطيل
رحت لحكيم يداوى ... نار القلب العليل
فتح الكتاب و قال لى ... عندك عقدة خليل
و خليل ده كان عجلاتى ... فى درب المهابيل
اللى قال الكلام ده ... أستاذ عالم جليل
اسمه فاريد و لازم ... نعمل لك تحاليل
يا بهيه و خبرينى ... ع اللى قتل القتيل
قتلوه السود عيونك ... واللا الهَم التقيل
و احكم يا قاضى المحاكم ... بالعدل و الدليل
قال : اللى جيبه فاضى ... ممنوع يعشق جميل
فــــــــــــــزورة
حزَّر فزّر .. واحد ( مِستر ) ،
يصحى من النوم و شّه مزنهر ،
يشرب ( فيتامين ) قبل ما يفطر
يفطر زبده ، و فينو مَقمّر ،
و مربّه ، و بيض بكذا محمّر ،
ثم القهوه لجل يعمّر
ثم لبانه ، ثم يعفَّر ،
ثم يقوم لك كده يتمخطر ،
يكبش أوراق لونهم أخضر
أكوام أكوام ، آخر منظر ..
يملا جيوبه ، و يمشى يفنجر ،
يركب (كاديلاك ) طالعه تزمجر ،
يشرب ( ويسكى ) ملو الأنجر ...
و لا عنده هموم ، و لا متعكر ،
و ف حضرتنا مش بيفكر ،
و إن جت سيره ، لا يتذكر ،
أصله ف نفسه ، و مش متبحّر ،
و لا يعجبهوش اللون لاسمّر ،
غير فى البدله لما بيسهر
... إنما خفه ، و دمه سكر ،
مين بقى هوه ؟ .. مش راح أفسر ،
واضح جدا .. حزّر .. فزّر .
يا وحــــــــــــــــوى
من قبل رمضان بجمعه الهرس دار فى الدار
شالوا الموبيليا و حطوا العفش بالمندار
بالمكنسه دور و بالفرشه سبع تدوار
صبح البلاط زى خد المزمزيل ناعم
و الشقه بصّت لهيلتون نفسه باستحقار
جابو قمر دين و تين و زبيب و صنيبر
و مكسرات فى شكارات مقفولة بالميبر
فاضل فى شعبان تلات ايام يا شحيبر
راح تعملم ايه فى رمضان ابقوا تعالوا لنا
و الكل بات فى حسابات تلخم يهود خيبر
رمضان دخل .. كل عام و انتم بخير قالوا
مشاوير كتير مشو ضروا و اتحطوا و اتشالوا
علشان كنافة ( ميدان الست ) و احتالوا
حتى الولد لما راح و اتهربد القفطان
اضطر ينزل معاه البيه يجيبهاله
و من حوارى ( الحسين ) راحو اشتروا الطرشى
خيار و لفت و بصل و لمون قديم محشى
فوق البوفيه رصّوا برطماناته و لا ساعشى
أَحمر و بنى و بمبه و عنبرى و اصفر
و يومين يا دوبك دخ كله يروح ما يرجعشى
السمن نازل يرفّ ... و كانوا جايبين كوم
و البيت معبأَ بريحه قلى طول اليوم
فيشاوى بالليل و من بدء النهار النوم
و لا شغله و لا مشغلة غير بس ( يا وحوى )
و الكل فاطرين يا عينى و لم لهم فى الصوم .
وكيــــــــــــــل
بهيه ، فى المحاكم ... شدت واحد وكيل ...
عند البوفيه كان واقف ... بيشرب جنزبيل .
و الجنزبيل ده أَصله ... للصوت مالوش مثيل .
مكتوب عليه فمجلد ... (مرافعات هابيل )
يشرب منه المحامى ... يمسح جدع زميل
و يفحم النيابه ، ... و ويقصف النخيل ..
و بهية ماشية جنبه ... فى كوريدور طويل ،
تشرح له ، و هى تبكى ، ... و تبلل مناديل ،
و تقول له : كتير عليا ، ... يقول لها : قليل ،
اتنين ريال يا وليه ، ... مبلغ تافه ضئيل ،
خدى بالك م الفصاحه ، ... و من العلم الاصيل ،
و الإش لما يحصل ، ...مفعول الجنزبيل ..
عنها ، و دخل ع القاضى، ... دخلة أَبو زيد تقيل ،
خبط الترابيزة و قال له ، ... أنا طالب التأجيل
موال لرواد الفضــــــــــــــــــــاء
سألت عن بختى ، قالوا النجم له أحكام ،
نجمك فى يوم يرفعك ، و يضعضك أيام ،
إن مال يمين تتنصف ، و إن مال شمال تنضام ،
و إن تروق دنيتك ، و ياداهيتك لو غام .
نزل الطاعون ع البلد، قالوا النجوم تتلام ،
و الحرب قامت ، قالوا لنا : نجم و ابن حرام ،
واقف فى وسط السما ، شاهر علينا حسام ،
نجوم و ياما قصص .. و نجوم ، و ياما كلام ..
و فجأه فجأه كده ، فجأه مفاجأة تمام ...
انقض م الأرض ع الملكوت ولد ضرغام ،
رائد فضاء .. و اللى بعده .. و بعده .. صبحوا زحام .
احنا البشر فين ، جوم السعد تيجى قوام .
ياللى انتو فوق ، اسبحوها عندنا بنظام ،
و زقوا نجم الحروب ارموه فى برج سلام .
و أما نجمى أنا ...
قولو له يضحك لى ..
و نفضوه لو سمحتم .. إن لقيتو غيام .
مـــــــــــــــــــــدد
بيرم يا تونسى ، بديع أيا خيرى ،
مدد مدد ، يا شيوخنا يا أقطاب ..
احضرنا يا حسين يا شفيق مصرى ،
و النجدة يا عبد السلام يا شهاب ..
يا سعيد يا عبده ، يا مصطفى يا حمام ،
محمود يا رمزى نظيم ، تعال الينا ..
و مدد يا عزت صقر ، يا خليل تظير ،
مدد يا شيخ يونس يا قاضى مدد ...
هاتوا الزجل ، شماريخ ، و صواريخ تطير ،
لسه الحاجات اياها .. ماليه البلد !
كــــــــــــــوكتيل
حفلة كوكتيل دبلوماسية
فى نظمة دولية
أصوات دردشة هادية و نشطة
تشبه فقاقيع شبانيا فرنسية
ريحة السيجار العطرية
بعض الازياء الوطنية
بعض صوى المزة
بعض الكئوسات رايحة و جاية
السوفيتى بيشرب طبعا فودكا
الصينى بيتصور جنب الويسكى
و الأمريكى بياكل كافيار حاف
وصل الضيف الاسرائيلى
ذو الضحكة العسلية
سلم على كل البشرية
و استلم الكاس بحماس فنان
و طلب م الكابتن تلج كمان
و شرب و شرب
كأس الانسان فى كل مكان
كأس الرجالة و النسوان
كأس العواجيز و الشبان
كأس اليابان
لبنان
و كمان لبنان
و طلع بالجزمة ع الترابيزة الجانبية
و مشى بالجزمة ع الأكلات الشعبية
و رقع ضحكة و عمل العملة اللى مش هيه
خلى المطرح تواليت
اتكهرب جو الحفلة الرسمية
و اتقال لا لا ........ لا لا .... لا لا ...
دى غلطة فى الاتيكيت
قصــــــــــــــة فلسفية
كان فيه ولد صغيّر ... عنده انتاشر سنه .
عيّل مفعوص و قصيّر ... و غاوى فَتونه ،
بيمثل دور فى ذهنه ... لشخص عظيم الشأن ،
و يوماتى يحلق دقنه ... مع إنه مالهش دقن .
بالموس و خلاص و يحرت...( المجنون البعيد )
لحد ما دقنه كبرت ... قال لك ده اليوم ده عيد
و وقف قدام مرايته ... يتنط م الفرح
اكمنَّه ( حسب روايه ) ... زى باباه انجرح ..
تَعَ شوفه بقى النهارده ... راجل بيه د الحيط
و صداغه كل فرده ... فيها من القطن غيط ،
يحلف ع النار و الميه ... مهو حالق جمعتين ..
و دى قصة فلسفية ... مغزاها ف كلمتين :
شرم برم ، يا حلوللى ... هأو أو إشّ إشّ ،
ترالاللى ، أمان يالالاللى ... حرنكش ، طظ فش .
أول كلامي سلام ..
يا للتواضع!!!!
"وكان هذا الفيلسوف الجميل مفتوح القلب سريع البديهه. وأذكر اننى استمعت اليه مرة فى برنامج إذاعى اسمه "جرب حظك" سأله فيه مقدمه عباس أحمد: من فى رأيك أعظم رسام كاريكاتير فى العالم؟ فأجاب جاهين الذى كان بدينا، قصيرا، أصلعا، وكأنه كرة ضخمة: الحقيقة أنى كل ما بصيت فى المراية عرفت ان ربنا سبحانه وتعالى هو أعظم رسام كاريكاتور فى الدنيا ! فانفجر الجمهور ضاحكا"
منقول
مع تحياتي
محمود
Adham Osman
08/08/2007, 09h01
فى حب صلاح جاهين
هذة الرباعية إلى زميلتنا فى المنتدى سامية جاهين
لو كان صلاح جاهين عايش
كان جابلك عقد وحلق وغوايش
ولو شاف اللى كتبه عمك
كان عرف إن حبه فى قلبنا جايش
وعجبى
---------------------------------
فصل الربيع دايما عمايله عجيبة كده
بييجى فى وقت غريب وبضاعته محددة
دنيا حلوة وحب ومعشقة .. على رأى أخونا صلاح
بس الأكادة إن مافيش حاجة مؤكدة
وعجبى
--------------------------------
صلاح جاهين ده بنى آدم حكاية
بالكاريكاتير كان لمجتمعنا مراية
لأ ورباعيات وأغانى وتمثيل وإيه !!
لو الليلة الكبيرة لوحدها رصيده .. تبقى كفاية
وعجبى
--------------------------------
يللا بقى إصحى .. بسرعة تعالى ياعم صلاح
إنشالله تركب حاجة كده بألف جناح
إلحق وشوف هل حد فينا جاهين؟
وياترى .. لسه شايفها بمبى ربيع .. واللا إنت كده مرتاح؟
وعجبى
--------------------------------
فى ذكرى رحيله الخامسة عشر
إسمع بقى .. أنا غِرت منك ياعم صلاح
على حب الناس العفى مالى الصدور البراح
ياترى إنت اللى رحت واللا عمرنا إحنا اللى راح
وياترى إنت كنت صنايعى، عطشجى واللا مَلاّح
كل ماأحس إنى خلاص مسكت البتاعة
زى الصابون يظهر لى مليون فُقّاعة
إستعملت كل الكلام وسبتنا كده فى مجاعة
حد ييجى يحل لنا المشكلة دى ياجماعة
رحت الريف لقيتك لامس كل الخضار
وفى السما لقيتك عادد اللى قاعد واللى طار
فى الورش المكن بيلحن كلامك ليل نهار
حتى فى المزيكا كاتب إسمك على الأوتار
ياأهل المعنى من فضلكم أقفوا هنا شاهدين
ده مفلسفلى كل حاجة حتى الدنيا والدين
بعد خمستاشر سنة لسه هنا قاعدين
تتعجبوا على كلام الراجل ده .. اللى إسمه جاهين
أدهم
عماد جمعة
09/10/2007, 02h02
بعض قصائد صلاح جاهين
اتـكلموا .. اتـكلموا .. اتـكلموا ...
محـلا الكلام ، ماألزمه وماأعظمه.
فى البـدء كانت كـلمة الرب الاله ،
خلقت حياه ، والخلق منها اتعلموا …
فــاتــكلمـوا
فى البـدء كـانت كلمـة الـرب الالـه
روح بجناحين شطار ، وصار للكون مداه.
آخر مطافهـا ، جت وحطت ع الشفـاه ،
لما البشر مـلكوا الوجود ، واستحكموا …
فـاتــــكلموا
الـكلمة أيد ، الـكلمة رجـل ، الـكلمة باب ،
الـكلمة نجمـه كهربيــه فى الضبـــاب
الـكلمة كوبـرى صـلب فـوق بحر العباب ،
الجـن يا أحبــاب ، ما يقــدر يهدمــه…
فــاتــــكلموا
الـرمـل مـرمـى تحت قبـة السمـــا ،
مشتـاق لقطـره من المطـر فيها النمــا ،
مـلايين سنين عمــره ماداقهـا ، انمـــا
فيـه كلمـة تقـدر فى المراوى تعومه …
فــاتــــكلموا
فيه كـلمة تقـدر تـزرع البور حـور ضليل ،
وكـلمة تقـدر تـجعل الـكوخ بيت جميل ،
وابـو العيـال والجـلابية الهـــلاهيـل ،
فيه كـلمه تعطيـه مـال ، وكـلمة تهندمـه ،
فـاتـــــكلموا
لكـم السـلام ، يا ملفوفيـن حـول اللـهب ،
يا غواصـين فى القـلب ع الـكلمه العجب ،
فى البــدء كانت كـلمة الـرحمـن سـبب
ومـا عـادش غيـر الحـق كلـمة تتممه ..
فـاتـــــكلموا
عماد جمعة
09/10/2007, 02h04
إلى المفاوض الاسرائيلى
مسـتر اليـاهـو بـن آليســار
ياللـى عيـونـك كلهــا أفكـار
فكـر . . فكـر زى مـا تخـتار
بـس اتـذكـــر
انـك مش وحـديـك المــكار !
ولا انـك وحــديك الـوطــنى
اللـى بيقـول قلبى على وطــنى
وعلى الأطـفال اللى ف وطــنى
وعلى الخضـرة
وعلى النضـرة
وعلى الأزهـار
وعلى الأطـيار
والـدانتيـللا ف شــبابيك الـدار
والبمبنى اللى ف لوحـات رينوار
إلى آخـر قـواميـس الأشـعار !
شـوف يامبجل ..
لـو كـان واحـد فينـا اتمـكن
من صـاحبه ماكنشى كل ده صـار
كان واحـد بس اللـى تـرفرف
اعــلامـه ويلبـس تـاج الغـار
والتــانى يتجــر مسـلســل
خلف المـركبة موسـوم بالعـار
لـكن جـرى ايه ؟
قـاعدين كده ليه ؟
وسـبايا مفيش ليه يـا عزيزى ؟
قال لك ده ماعادشى " فرن ايزى "
حـرب نهايـة القـرن العشـرين
نهـايتهـا فنـاء البنـى آدمـين
المنتصرين والمــنهزمين
والناس اللى واقفين ساكتين
يتفرجـوا على العاب النار.
آدى القصــة
من غيرغصـة
مـن غير ولا حقـد دفـين ولا تـار
علشـان كـده مسـتر بن اليســار
مـوجود ويانــا علـى الطـاولة !
علشــان فشـلت كـل محــاولة
لسـياســة الارغـام والاجـبـار
فى العـالـم كلـه كبـار وصغار !
والان ورينـــا ابتســامـاتـك
ابتسـامات حلـوة ان جيت للحق
انمــا لــو حجبـت نيــاتـك
ح نقـول لك آسـفين لأ .. لأ .. لأ
مســتر اليــاهـو بن آليسـار
أنت مـش وحـديـك المــكار !
عماد جمعة
09/10/2007, 02h06
ألفـيـة ابن دنلـوب
( 1 ) ألفيــة خفيـــة المســـــالك ،
أصـعب من ألفيـة بـن مـــالك .
( 100 ) بالانجليـزى يـا شهـاب الـدين ،
اكتــب مـن الشمــال لليميــن .
( 200 ) والعـربى يـا طـالـب المعـالى ،
فاكتـب مـن اليميــن للشمــال .
( 300 ) معلـومة – والجمـع معلـومـات
العلـم ، لا دلــع ومفهــومـات .
( 400 ) اعلـم هنـا ، ونحـن عند الشـط ،
أهـم شـئ هـو حسـن الخــط .
( 500 ) السن ضع فى الحبر ، واحذر البقع .
إذ ربمـا فـوق الكـراريـس تقـع .
(600) إذ ربمـا فوق الكـراريـس تقــع .
مواظبـاً ، سلــــوكـه حميـد .
( 700 ) باشكـاتبـاً ، إن كان فى الديـوان ،
أو مـن رجـال الطـب والبنيـان .
( 800 ) العلـم – يـا مـولاى – للتوظف ،
لا – يا جعلت فـداك – للتفلسـف .
( 900 ) يقـولهـا العلامــة بـن دنلـب ،
وليـس يبغى – قط – أى مكسـب ..
( 1000 ) فهل الذى كان زمانا قد جبـر ؟ ..
والمبتدأ لو جاء ، هل يأتى الخبر ؟ ..
عماد جمعة
09/10/2007, 02h08
أمانة يا للى
أمانـه ياللى على بـاب الانتخاب داخـل ،
من قبل مســك القلـم ، والخط ، تتماهــل.
اسأل ولادك ، فى سرك ، بكره عاوزين إيه ؟
الحـكم يظـهر ، وتلقى الحــل بالساهـل.
عاوزين أمـان يابا ، عاوزين لاشتراكيـه ،
مدخول كفايــه ، وعدل على الجميع شامل.
الأرض فى ايـدينـا يابا ، وعندنا الفواريـق
عـاوزيـن قلوب ثورويه ، تدح وتناضـل ،
عــاوزين قلوب ثورويه ، تدح وتناضـل ،
عاوزين ايدين ثورويه ، تشقلب التـربــه ،
تخلى عزبتنا تدى الغله بالـــكامـــل ،
عاوزين عقول ثورويه ف مجلس الامــه ،
رايده اللى رايدينه ، عارفه الحق م الباطل ..
اختــار لنا يابـا ، خلق تغيـر الدنيــا ،
ولاعندنـاش فــرق بين الست والراجــل ،
ولاحـد يخدمنـا ، جنب زعيمنـا ، غير يابا
المثقف الثـورى و "الفـلاح" و "العامل" . .
آدى اللــى فيــــهم !
walid_er
23/04/2008, 02h50
وقف الشريط فى وضع ثابت دلوقتى نقدر نفحص المنظر مفيش ولا تفصيله غابت وكل شيئ بيقول وبيعبرمن غيركلام ولا صوت اول ماضغط الموت على زر فى الملكوت بخفه وبجبروت فى يوم أغبر وقف الشريط فى وضع ثابت دلوقتى نقدر نفحص الصوره انظر تلاقى الرايه منشوره متمزعه لكن مازالت فوق بتصارع الريح الىمصعوره انظر تلاقى البلاد اجيال ورا اجيال رفعاها بأستبسال ونزيف دمع سيال على الجبهه وفى عنفوان النضال وقف الشريط فى وضع ثابت خلى المكنجى يرجع المشهد عايز اشوف نفسى زمان وانا شب داخل فى رهط الثوره وانا غضبان ومش عاجبنى جن او انسان قال المكنجى رجوع مفيش عيش طول مافيك أنفاس تعيش بص شوف ركن الشباب فيه الف مليون شب ومش عاجبهم لا واصى ولا أب انظر اليهم وانت تتذكرليه ضربه صابت وضربه خابت وضربه وقفت بالشريط فى وضع ثابت انظر وشوف على المهل براحه الشمس وسط القبه قداحه والقدس واقعه والحرم منداس صوت الجرس والاذان على قلبها حراس وأدى بطلها هل فى الساحه قلب الحجر فى الايد بيغلى حماس قال المكنجى بلوم وانا مكلوم قال المكنجى والشريط شغال ملكش تسأل سؤال انظرو شوف الحق لما أنهان انظر وشوف الان بكره بقى انبارح فى حضن زمان وبعد بكره فوق همومك فات مفيش شريط مأجور ولا خوان ولا شريط له ثبات
من فضلكم انا عايز اعرف هل هذه هي كلمات قصيدة <وقف الشريط> واذا كان هناك اخطاء فى الكلمات
أخي الفاضل وليد
نعم هى كلمات عامية صلاح جاهين ( وقف الشريط في وضع ثابت ) ،، و كلماتها صحيحة كما أوردتموها ..
الملف المرفق ، ل ( وقف الشريط ) بصوت الراحلة سعاد حسني ،
( في مرحلة مرضها الأخير )..
تأمَّل الأداء
عصفور طاير
23/04/2008, 11h43
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولد من جديد
على اسم مصر
***
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة واللا اسمعها مشخوطه
شبكة رادار قلبي جوه ضلوعي مضبوطة
على اسم مصر
***
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد اقوله لحد
القمح ليه إسمه قمح اليوم وأمس وغد
ومصر يحرم عليها .. والجدال يشتد
على اسم مصر
***
قطعوا الأغاني وطارت نشرة الأخبار
دارت على كل دار في الكوكب الدوار
يا حاضرين اعلموا الغايبين بأنه في مصر
اتغير الاسم منذ الآن فأصبح .. مصر
ضحك التاريخ ضحكته المشهور بها واندار
ودخل مناقشة مع الجغرافيا عما صار
هل نعترف بالبيان اللي أذيع العصر
أم ننتظر مصر تطرد إسرائيل بالقسر
وساعتها تحصل بكل جدارة يوم النصر
على اسم مصر***
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء..
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
***
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
***
مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب إسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
***
شفت الجبرتي بحرافيش الحسين وبولاق
بان البلد ماشي زي النمس في الأسواق
بالفلاحين ع المداخل من بعيد وقريب
بالأرنؤوط بالشراكسة بكل صنف عجيب
مترصصين سور رهيب مزراق في ريح مزراق
كأنهم لا بشـر ولا خلقـة الخـلاق
ومصر فلاحة تزرق بين رقيب ورقيب
من غير أبو الهول ما ينهض ناهضة شايله حليب
والصبح بدري الجبرتي ينام وقلمه يسيب
على اسم مصر
***
مصر اللي عمر الجبرتي لم عرف لها عمر
وطلع لقاها مكان مليان عوام وزعر
جعيدية غوغاء يجيبوا تملي وجع الراس
وخليط أفارقه هنادوة روم ملل أجناس
والترك في القلعة والمماليك خدودهم حمر
كان عمرها ستلاف سنة .. كلها سنين خضر
بس الزمان يختلف زي اختلاف الناس
ناس تبني مجد وحضارة وناس بلا احساس
وناس تنام لما يزحف موكب الأحداث
على اسم مصر
***
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
أنـا ربـة الحـب حتـحـور أنـا
أنـا السيـدة المـنـجدة للمـغـرميـن
وكـم مـن محـب ف هـواه انـضـنى
دعـاني وطيـبـت خـاطـره الحـزيـن
على اسم مصر
***
حصان عرابي جميل حصان عرابي أصيل
حصان عرابي رشيق ديله طويل
يسهر مع الخيل طول الليل يتكلم
ويقول أراء رغم إنه ماكانش متعلم
ويقف في عابدين وياخذ زاوية البروفيل
للرسامين يرسموه ونشوفه جيل ورا جيل
ويعدي كالريح على المجاريح ويسلم
وحافره ع الصخر في التل الكبير علم
ولما صابه انفجار القنبلة اتالم
على اسم مصر
***
والمس حجارة الطوابي وادق بكعابي
يرجع لي صوت الصدى يفكرني بعذابي
يا ميت ندامة على أمة بلا جماهير
ثورتها يعملها جيشها ومالها غيره نصير
والشعب يرقص كأنه عجوز متصابي
إنهض من القبر احكي القصة يا عرابي
يطل لي رافع الطهطاوي م التصاوير
شاحب ومجروح في قلبه وجرح قلبه خطير
وعيونه مغرورقين بيصبوا دمع غزير
على اسم مصر
***
مالك سلامتك بتبكي ليه يا طهطاوي
قال لك عرابي انكسر بسلاح أوروباوي
وسلاح أوروبا ماهواش المدافع بس
ده فكر ناقد مميز للثمين والغث
قلناها ميت ألف مرة ألف مرة بصوت جهير داوي
بس الحماقة لاليها طبيب ولا مداوي
ولا حد م الخلق بالخطر اللي داخل حَس
الغفلانين اللي خلوا العقل صابه مس
قالوا الخطر هو فكر أوروبا لو يندس
على اسم مصر
***
أحسنت في القول صحيح يا ولد يا متنبي
جبت اللي جوه الفؤاد عن مصر متعبى
وحكمت بالعدل لكن بعضنا انظلموا
"يا أمة ضحكت من جهلها الأمم"
العلم كان عندنا من صغره متربي
لكنه هاجر وعدى البحر متخبي
لما الإيران هجموا ثم اليونان هجموا
ثم الرومان دمروا ثم التتار هدموا
ثم الجميع كل واحد جه مسح قدمه
على اسم مصر
***
أيها الديكُ رفيع الموضعِ
يا صفيحاً فوق مسمارٍ يدور
صف لنا فعل الرياحِ الأربعِ
قل لنا .. لو كنت تدري ما يدور
قال صه . فالآن ريح الشرق جاءت
تحمل الضوضاء من سوق المزاد
وتغني دون لحن كيف شاءت
أنا ريح الشرق أدعى شهرزاد
أنا أحكي ثم أحكي ثم أحكي
وأمامي السيف كالعشب يميل
وبكائي يتساوى مع ضحكي
طالما كان بأسلوب جميل
ثم ها قد أرسل الغرب رياحه
تزكم الأنف برائحةٍ عجب
وتغني كبغيٍّ في مناحة
أنا ريح الغرب لوني كالذهب
أنا صفراء برمل الصحراء
أدفن الخضرة تحتي دون رحمه
أوصدوا الباب بوجهي الحقراء
حسنا فلتصبح القرية فخمة
ثم ها قد اقبلت ريح الجنوب
بدخان الدهن تسري عابقة
وتغني انني أدعي الهبوب
أنا سوداء كبئر المشنقة
أنا سوداء كأفعى هائلة
كرماد النوم ينثر في العيون
كالعرايا في المروج الموحلة
سعداء .. تعساء ..يرقصون
وتأنى برهة ديك الصفيح
يلقط الأنفاس وهو يترنح
دائراً دورته مع كل ريح
وأخيراً صاح كالأسد المجنح
هللويا ..أقبلت ريح الشمال
في غلالات رقاق راعشه
وهي تشدو بحنو ودلال
ها أنا ريح الشمال المنعشة
إنني وردية مثل العسل
ديدمونا .. هكذا يدعونني
قد عبرت البحر يحدوني الأمل
لعطيل أسمر ..
يخنقني !
ومضى ديك الرياح في دعه
من يمين ليسار يتذبذب
وبدا اضحوكة وإمعه
وهو مصلوب شهيد يتعذب
وعلى رأي المثل
الديك الصفيح
بيدوخ ويا الريح
والديك الصفيح
م البيضه بيصيح
ويقول بالصريح
الفكر فوق في الشمال يا الله الحقوه يا ولاد
لحقوه ولاد من ولاد الأغنيا الأسياد
وهم راجعين رموه في الباخرة في البحر
ونزلوا حكموا في ظل الانجليز والقصر
ومصر في الشمس بتغربل كلام منعاد
عن ابن بنت ابن حنت وطارق ابن زياد
والانجليز راضية بالخطباء وخطب الفخر
خطيب يهز الرؤوس وخطيب يهز الخصر
وخطيب يموت موتة الأبطال قتيل القهر
على اسم مصر
***
والانجليز معجبين بمراسم التأبين
مات مصطفى كامل اتملت البلد صواوين
والمشرقين شوقي جابهم لجل يبكوا عليه
آه لو عرف هم إيه دلوقت وبقم إيه
المشرق الأولاني هو شعب الصين
هزم التخلف بتنظيم اشتراكي رصين
تنظيم يروح اللومان على طول كده برجليه
والمشرق التاني ينحط الحديد في إيديه
مليون شهيد يعني ثورة تخض شوقي بيه
على اسم مصر
عصفور طاير
23/04/2008, 11h48
***
هل مصر موميا جميلة صورتها فوق النعش
يعشقها مجنون ينادي عليها ولا تطلعش
هل مصر نار صفصفت والنفخ فيها محال
والأرض نشعت على رمادها استحال أوصال
سألت أنا الرافعي كان عجٌز ولا بيسمعش
لكن عينيه كانوا يحكولي قصص ما اشبعش
يقولولي ماتخافش مصر بخير وعال العال
مصر الجبرتي ومصر الرافعي حال غير حال
انظر محمد فريد أعظم وأرقى مثال
على اسم مصر
***
خذ الكتاب في يمينك وانظر الترقيم
عند المحبة وعند الموت في حرف الميم
تلقى محمد فريد بينهم مقيم ع العهد
وتلقى وجهه المدوٌر زي قرص الشهد
مليان حماسة وكياسة وجدعنه وتصميم
على إيه مصمم؟ .. يسهٌم زي كل زعيم
ويقول على الثورة اللي وأدوا ثورته في المهد
أنا بابني في السر شيء صعب المنال كالفهد
على اسم مصر
***
محلول مركز من السكر في كباية
وف قلبه خيط يتلضم حباية حبايه
سكر نبات بللورات الماظ بتضوي ضي
وتفضل الألماظات تكبر شوي شوي
لحد ما العقد يبقى في الجمال غايه
ده الحزب في الشعب نضرب به المثل آيه
الصلب والسايل الاثنين سوا ياخيّْ
تنظيم محمد فريد في كل قريه وحيّْ
بللوره بتشع بالثورة اللي يومها جيّْ
على اسم مصر
***
العقد الماظ ورقبة مصر لَيْقاله
ضيٌع فريد كل أرضه عليه وأمواله
وفجأة حاكموه ويالله نفوه عن الأوطان
وحرب عالمية أولى ووفد م الأعيان
وثورة والانجليز انحطوا وانشالوا
مين اللي نظٌم فلول الشعب ده بحاله
ازاي جميع البلاد تنهض في نفس الآن
القاهرة اسكندرية منفلوط اسوان
وبعيد يا ولداه فريد مرمي وحيد شرقان
على اسم مصر
***
السيمفونية اسمها الثورة على المحتل
سنة تسعتاشر اتعزفت في كل محل
تأليف محمد فريد ألفها من سنوات
وكتب لها النوتة بوق وبيانو وكمنجات
عزفوها من غير قيادته وجمعهم ما اختل
غير وقت صرف الأجور لما النفر ينذل
من وقتها وغلوشت نغمات على نغمات
وسعد زغلول زعيم مشغول في الانتخابات
يخطب ويضرب يابده يطبع البصمات
على اسم مصر
***
وف أوضة عريانة فيها كل شيء بردان
رقد فريد وحده بالحمى والهـذيان
وقام وقف ع السرير في تلج المانيا
ينده يا مصر اسمعي اللي مفاق الدنيا
ووصيتي الثورة لاشتراكية والبنيان
ثورة بحق وحقيق مش حركة م الأعيان
ماتغمضوش عن وحوش الغرب ولا ثانية
ح تروح وحوش لنجليز تطلع وحوش تانية
وسقط ونطق الشهادة ونظرته الحانية
على اسم مصر
***
أنا الذي مشيت ادوٌر باشتياق وحنين
على مصر .. والمشي خدني من سنين لسنين
لحد ماسنيـنهـا وسنـيني بقم واحد
وعاصرتها يوم بيوم لم فاتني يوم واحد
وحضرت شاهد عيان مولد وموت ملايين
مازعلت من كلمة قد البركة في الجايين
مين هم دول يا جدع .. ما توحد الواحد
البركة فينا وفي السامعين بالواحد
أنا قلتها بنرفزة .. من غيرة الواحد
على اسم مصر
***
مصر الرمال العتيقة وصهدها الجبار
والنيل كخرطوم حريقه وحيد في وسط النار
في إيدين بشر نمل رايحه وجاية ع الضفة
فيهم مطافي وفيهم كدابين زفة
وفيهم اللي تعالى وقال أنا حكمدار
وكل باب م البيبان مقفول على اسرار
وكل سر بحريقة عايزة تتطفا
من أهلي تندهلي وتقوللي تعا اتدفا
أنا اللي عمري انكتب إلى يوم ما اتوفى
على اسم مصر
***
على اسم مصر ارفعوا الانخاب واملولي
شدوا الوتر ع القمر يا شباب وغنولي
نسكر على حبها بالفن والاحساس
نسكر ودمع الحماس يملا لنا تاني الكاس
احنا يا حلوه الفدا بس اطلبي وقولي
يا سمره بعيون كده وسنتك لولي
وغنوه الحب تعلا ويسمعوا الحراس
يصفروا ويحضروا بفرقة طبول ونحاس
ويتقفل سجن مصر امام عيون الناس
على اسم مصر
***
والمطبعة تدور وتخطف كل إيد منشور
عيش لسة م الفرن طالع ريحته ريحة النور
يا فلاحين يا جنود يا طلبة يا عمال
عدوكم حلف لاستعمار ورأس المال
عاش الطريق لشتراكي قوم يا شعب وثور
وحكمكم حكم اقطاعي عميل مأجور
عاش الكفاح بالسلاح إلى القنال يا رجال
خلوا حياه لنجليز المستقرة محال
والشمس نامت ليلتها وفكرها شغال
على اسم مصر***
القاهرة في اكتئاب والأنس عنها غاب
من عتمة تدخل لعتمة كأنها ف سرداب
أو قرية مرمي عليا ضل هجانة
الحظر م المغربية بأمر مولانا
ومصر في الليل بتولد والبوليس ع الباب
صبية ولاٌدة يابا ولحمها جلاب
طلع الصباح زغرطت في السكة فرحانه
على كتفها مولودتها لسه عريانه
وف لحظة كانت جميع الدنيا دريانة
على اسم مصر
***
على كتفها مولودتها وتجري وتنادي
ياولادي من يوم ميلاد الأرض ياولادي
ينهض لها امحتب بدواه يقويها
وبنتاؤر ينشد الاشعار يهنيها
وسعد زغلول يكح يزلزل الوادي
وعرابي يهمس ومصر ترد بتمادي
تقوله آه برضه ثورة جيش وح احميها
بالدم بالروح بكل حياتي ح افديها
اما الأسامي معنديش غير اسمها
على اسم مصر
***
مولودة كبرت وشبت في تلات تيام
من هبة هبت .. لثورة لبت الاحلام
والعرش عام راح ايطاليا بعيد ورا البراميل
يا هلترى دي حقيقة واللا وهم جميل
ومصر من إمتى كانت حظها بسام
ظهر قميص العرق متشمر الأكمام
أنا شفته عقلي برق وبدأ لصاحبه يميل
نقشت له ف قلبي احلى وأروع التماثيل
بدراعي والمطرقة وبإيدي والأزميل
على اسم مصر
M O H A M E D
23/04/2008, 13h52
قصاقيص ورق ...
قصاقيص ورق
منين أجيب مقص مجنون زيي ، بس نص نص
و اجيب ورق و افضل أقص أقص أقص
أفضل أقصقص ورد من على كل لون
لحد ما اعمل عندي حبة كتير كتير ،
و اركب لي نسمة ، و اطير اطير ،
و احفن و ادردب ع البلاد ، مطر غزير
ينزل يرخ يرخ ، على قرعة بنات أخت البشر
يتسبسبوا ، و يتشيّكوا ،
و يبقوا لابسين - لا مؤاخذة - طراطير .
و يا سلام ..
لو كان كمان معايا وقتيها قلم كوبيا ، طويل
طويل ، طويل ،
أبلـّه من قلبي ، اللي عرقان مـ السفر
و اكتب به و انا طاير ، على خد القمر ..
أنا بحبك يا جميل
قصاقيص ورق
لكن مطر
يرخ ، جامد ، قد ما يحبوا الولاد ،
يادوب كده ،
مقدار ما يجروا ، و يمسكوا
مطر ! .. خطر ! ..
ينزل على اكتاف العجايز ! .. يضحكوا
يشبك في سلك التلفون
هنا ، و هنا ، و هنا ، و هنا ،
على كل لون ،
و اللي في جنازته في التابوت ، يفوت ، يبص ..
يلاقي عالَم ، كله كله كله زينة عيد ميلاد ،
و يبقى فصل ، لكين مفيش بالشكل ده !
لابد من عيد الميلاد
أنا عيد ميلادي مالوش معاد ،
فين الورق ، و النسمة ، و المقص ، و القلم يا واد ..
و الا بلاش ، ده مفيش أمل !
أعياد كتير بيبتدوا ، و بيفرغوا ،
و بيفضل العالم كده ،
مكبوس و دمه تقيل تقيل ...
يا ربنا ،
يا اللي خلقت لنا الأيادي للهزار ، و للعمل ..
ادّيني قوة ألف مليون إيد ،
عشان
أزغزغه !
بشير عياد
29/09/2008, 01h37
بورتريهات للشاعر الكبير صلاح جاهين ، بريشة الفنان الكبير الدكتور خلف طايع ، اصطدتها من على شاشة " القناة الثقافية " ، برنامج " بورتريه ".
ايهاب عامر
02/02/2009, 15h08
السلام عليكم ورحمه الله وبركاته
كلام الليل
لعمنا جاهين
كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده
الليل نجومه كلام
لولي ودهب يا سلام
ونسيمه همس وغرام
والبدر سلطانه
الليل نجومه وعود
يا هنيا للموعود
والصبح كل العهود
ما كأنهم كانوا
الليل نجومه سطور
بيننا وبينه بحور
أول ما ييجي النور
تتهد عمدانه
وينادي كروانه
كلام الليل كده
كلام الليل كده
جميل زي الندى
ييجي النهار ويروح
ما يعود إلا صدى
كلام الليل كده
من ديوان منوعات غنائية
karimtaha33
24/02/2009, 09h26
علي إسم مصر ...
الجزء الأول
...
النخل في العالي و النيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بفتحها زي اللي اتولدت من جديد
على اسم مصر
مصر الثلا ث أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
اسمعها مهموسة والا اسمعها مشخوطه
شبكة رادار قلبي جوه ضلوعي مضبوطة
على اسم مصر
و ترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد اقوله لحد
القمح ليه إسمه قمح اليوم وأمس وغد
ومصر يحرم عليها .. والجدال يشتد
على اسم مصر
و لما زماني رماني عليل
نسيت كل شيء عن حبيبي الجميل
لكن هو أبداً
انا مانساهوش
نسيت مشيته وصوته كان شكله إيه
ورسمة شفايفه
ولمسة إيديه
نسيت نظراته
نسيت لون عينيه
وقوس الحواجب وسهم الرموش
لكن هو أبداً
انا ما انساهوش
نسيت إسمه وحكايته وعرفته فين
وعشنا سوى العمر
والا يومين
وكان م البشر
والا طير بجناحين
نسيت حتى كان له وجود أو مالوش
لكين هو أبداً
أنا ما انساهوش
قطعوا الأغاني وطارت نشرة الأخبار
دارت على كل دار في الكوكب الدوار
يا حاضرين اعلموا الغايبين بأنه في مصر
اتغير الاسم منذ الآن فأصبح .. مصر
ضحك التاريخ ضحكته المشهور بها واندار
ودخل مناقشة مع الجغرافيا عما صار
هل نعترف بالبيان اللي أذيع العصر
أم ننتظر مصر تطرد اسرائيل بالقسر
وساعتها تحصل بكل جدارة يوم النصر
على اسم مصر
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكه الأرض شرق وغرب
وبحبها وهي مرميه جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي و بياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مصر
مصر السما الفزدقي و عصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
رحيلا رحيلا بغير هوادة
رحـيلاً فإن الـرحـيل سعـادة
عبادة
إرادة
سيادة
ولادة
رحـيـلا .. إلى أين لـيس يـهـم
ولـيس يـهـم بأي وسيـلة ..
أجيـراً بلقمـتـي في البـواخـر ..
عـلى واحـد من جيـاد القبيلة ..
على مقعـد في ذرى الجـو فـاخـر
وتمـلأ الكـأس بنت جمـيلة ..
على قدمي .. أو بفكري .. أهاجر
أبادر
أغادر
أخاطر
أسافر
ولـكـن إلى أيـن .. لـيس يـهـم
إلى حيث لا تعبـر الأفـق شمس
إلى القـطب .. أو حلقة الاستواء ..
إلى حـيث يـسمـع لـلجـن همس
إلى بـاطـن الأرض أو في الـفضـاء
إلى مـرفـأ الغـد .. أو أرض أمس
أرى كل شيء ومن أين جاء
وافعل ما قاله القدماء
من الفقراء
أو الحكماء
أو الأمراء
أو الأشقياء
أو البلهاء فليس يهم
لقد قيل وهو الكلام المهم
اللي يعيش ياما يشوف
واللي يمشي يشوف اكتر
شفت الجبرتي بحرافيش الحسين و بولاق
بابن البلد ماشي زي النمس في الأسواق
بالفلاحين ع المداخل من بعيد وقريب
بالأرنؤوط بالشراكسة بكل صنف عجيب
مترصصين سور رهيب مزراق في ريح مزراق
كأنهم لا بشـر ولا خلقـة الخـلاق
ومصر فلاحة تزرق بين رقيب ورقيب
من غير أبو الهول ما ينهض ناهضة شايله حليب
والصبح بدري الجبرتي ينام وقلمه يسيب
على اسم مصر
مصر اللي عمر الجبرتي لم عرف لها عمر
وطلع لقاها مكان مليان عوام وزعر
جعيدية غوغاء يجيبوا تملي وجع الراس
وخليط أفارقه هنادوة روم ملل أجناس
والترك في القلعة والمماليك خدودهم حمر
كان عمرها ستلاف سنة .. كلها سنين خضر
بس الزمان يختلف زي اختلاف الناس
ناس تبني مجد وحضارة وناس بلا احساس
وناس تنام لما يزحف موكب الأحداث
على اسم مصر
أنا اللي اسمي حتحور ... أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
أنا ربة الحب حتحور أنا
أنـا السيـدة المـنـجدة المـغـرميـن
وكـم مـن محـب ف هـواه انـضـنى
دعـاني وطيـبـت خـاطـره الحـزيـن
أنا طيبة انما طبعي صعب
وديعـه .. ولـو ثـرت بـطشـي مـهـول
ما اشـوفش اللي قدامي لو ألف شعب
أدوسـهـم وتجـري دمـاهـم سيـول
و يوم رع ما فات بسناه في السما
وكل العيـون خايفـة تنـظر اليـه
وجـالـه القمـر خلقتـه معتـمة
وعـدى قصـاده .. وضـلم عـليه
يا ويل اللي فتح في ابويا العظيم
يا ويل من تطاول يا ويل من ضحك
يا ويـلك يا مصـر مصيرك الـيم
أنا اللي اسمي حتحور انا ح امسحك
يحـاول يهـديني رع ما اسمـعـوش
وادمـر واطـيـح في البلاد والعبـاد
أنـا الـطيبـه .. كنت زي الوحـوش
سفـكـت دماء البـنـات والـولاد
دبحت المحبين في عز القبل
هـدمت المعابد على المنشدين
قلبت على النحـاتين الجبل
حرقت الغيـطان هم والفلاحين
لحد ما رع نادى ع الآلهة
وقال صـبوا في النهر كل النبيذ
وشفت الميـاه حمرا ومزهزهة
وظنيتها دم الضحايا الـلذيذ
شربت انتقاما شربت شربت
وأنا بالـعن المفتـري والغبـي
وحبـة بحبـة عن الوعـي غبت
ونمت على النيل في ضي أبي
و قمت بكيت من فؤاد أم ثكلى
ونهنهت فوق صدر مصر العريض
على العالم المبدورين جنبي قتـلى
وكان دمعي ينصب في النيـل يفيض
و أقول ليه يا مصر ولادك كدة
يا إمـا المذله يا يتـجبـروا
يا خوفـي يا فـرحة قـلوب الـعدا
ويا نـدمـي لو ما يتغيـروا
و من يومها و النيل في نفس المعاد
يفيض كل عام قبل فصل الخـريف
بلون حمرة الـدم يملا البلاد
ويملا النسـأيـم بعـطر مخـيف
بعطري أنا اللي اسمي حتحور
وعـطري مخـيف وحـنون وطـري
يفـرح بس مـرة في كـل سنة
ويهمس يا مصر اذكـري .. واحـذري
الجزء الثاني
أنا الذي مشيت ادوٌر باشتياق وحنين
على مصر .. والمشي خدني من سنين لسنين
لحد ماسنيـنهـا وسنـيني بقم واحد
وعاصرتها يوم بيوم لم فاتني يوم واحد
وحضرت شاهد عيان مولد وموت ملايين
مازعلت من كلمة قد البركة في الجايين
مين هم دول يا جدع .. ما توحد الواحد
البركة فينا وفي السامعين بالواحد
أنا قلتها بنرفزة .. من غيرة الواحد
على اسم مصر
على اسم مصر ارفعوا الانخاب واملولي
شدوا الوتر ع القمر يا شباب وغنولي
نسكر على حبها بالفن والاحساس
نسكر ودمع الحماس يملا لنا تاني الكاس
احنا يا حلوه الفدا بس اطلبي وقولي
يا سمره بعيون كده وسنتك لولي
وغنوه الحب تعلا ويسمعوا الحراس
يصفروا ويحضروا بفرقة طبول ونحاس
ويتقفل سجن مصر امام عيون الناس
على اسم مصر
والمطبعة تدور وتخطف كل إيد منشور
عيش لسة م الفرن طالع ريحته ريحة النور
يا فلاحين يا جنود يا طلبة يا عمال
عدوكم حلف لاستعمار ورأس المال
عاش الطريق لشتراكي قوم يا شعب وثور
وحكمكم حكم اقطاعي عميل مأجور
عاش الكفاح بالسلاح إلى القنال يا رجال
خلوا حياه لنجليز المستقرة محال
والشمس نامت ليلتها وفكرها شغال
على اسم مصر
القاهرة في اكتئاب والأنس عنها غاب
من عتمة تدخل لعتمة كأنها ف سرداب
أو قرية مرمي عليها ضل هجانة
الحظر م المغربية بأمر مولانا
ومصر في الليل بتولد والبوليس ع الباب
صبية ولاٌدة يابا ولحمها جلاب
طلع الصباح زغرطت في السكة فرحانه
على كتفها مولودتها لسه عريانه
وف لحظة كانت جميع الدنيا دريانة
على اسم مصر
على كتفها مولودتها وتجري وتنادي
ياولادي من يوم ميلاد الأرض ياولادي
ينهض لها امحتب بدواه يقويها
وبنتاؤر ينشد الاشعار يهنيها
وسعد زغلول يكح يزلزل الوادي
وعرابي يهمس ومصر ترد بتمادي
تقوله آه برضه ثورة جيش وح احميها
بالدم بالروح بكل حياتي ح افديها
اما الأسامي معنديش غير اسمها
على اسم مصر
مولودة كبرت وشبت في تلات تيام
من هبة هبت .. لثورة لبت الاحلام
والعرش عام راح ايطاليا بعيد ورا البراميل
يا هلترى دي حقيقة والا وهم جميل
ومصر من إمتى كانت حظها بسام
ظهر قميص العرق متشمر الاكمام
أنا شفته عقلي برق وبدأ لصاحبه يميل
نقشت له ف قلبي احلى وأروع التماثيل
بدراعي والمطرقة وبإيدي والأزميل
على اسم مصر
على عبداللاه
05/10/2009, 02h56
http://membres.lycos.fr/alsh/roba3iatjahin/24.files/image002.jpg
محمد صلاح الدين بهجت أحمد حلمي ، المشهور بـصلاح جاهين
شاعر ورسام وممثل مصري (http://ar.wikipedia.org/wiki/%D9%85%D8%B5%D8%B1) يساري الفكر
نشأته
ولد في شارع جميل باشا في شبرا. كان والده المستشار بهجت حلمي يعمل في السلك القضائي، حيث بدأ كوكيل نيابة و إنتهى كرئيس محكمة استئناف المنصورة (http://ar.wikipedia.org/wiki/%D8%A7%D9%84%D9%85%D9%86%D8%B5%D9%88%D8%B1%D8%A9).
درس الفنون الجميلة ولكنه لم يكملها حيث درس و الحقوق.
حياته
أنجب ابنه الشاعر بهاء من زوجته الأولى تزوج من زوجته الثانية الفنانة منى قطان (http://ar.wikipedia.org/w/index.php?title=%D9%85%D9%86%D9%89_%D9%82%D8%B7%D8 %A7%D9%86&action=edit&redlink=1)
أعماله
أنتج العديد من الأفلام التي تعتبر خالدة في تاريخ السينما الحديثة مثل أميرة حبي أنا (http://ar.wikipedia.org/w/index.php?title=%D8%A3%D9%85%D9%8A%D8%B1%D8%A9_%D8 %AD%D8%A8%D9%8A_%D8%A3%D9%86%D8%A7_(%D9%81%D9%84%D 9%85)&action=edit&redlink=1) و فلم عودة الابن الضال (http://ar.wikipedia.org/w/index.php?title=%D8%B9%D9%88%D8%AF%D8%A9_%D8%A7%D9 %84%D8%A7%D8%A8%D9%86_%D8%A7%D9%84%D8%B6%D8%A7%D9% 84_(%D9%81%D9%84%D9%85)&action=edit&redlink=1)، و لعبت زوجته أدوار في بعض الأفلام التي أنتجها. عمل محررا في عدد من المجلات و الصحف، و قام برسم الكاريكاتير في مجلة روز اليوسف (http://ar.wikipedia.org/wiki/%D8%B1%D9%88%D8%B2_%D8%A7%D9%84%D9%8A%D9%88%D8%B3% D9%81) و صباح الخير (http://ar.wikipedia.org/w/index.php?title=%D8%B5%D8%A8%D8%A7%D8%AD_%D8%A7%D9 %84%D8%AE%D9%8A%D8%B1_(%D9%85%D8%AC%D9%84%D8%A9)&action=edit&redlink=1) ثم انتقل إلى جريدة الاهرام (http://ar.wikipedia.org/wiki/%D8%AC%D8%B1%D9%8A%D8%AF%D8%A9_%D8%A7%D9%84%D8%A7% D9%87%D8%B1%D8%A7%D9%85).
كتب سيناريو فيلم خلي بالك من زوزو (http://ar.wikipedia.org/wiki/%D8%AE%D9%84%D9%8A_%D8%A8%D8%A7%D9%84%D9%83_%D9%85 %D9%86_%D8%B2%D9%88%D8%B2%D9%88_(%D9%81%D9%8A%D9%8 4%D9%85)) و الذي يعتبر أحد أكثر الافلام رواجا في السبعينيات إذ تجاوز عرضه حاجز 54 اسبوع متتالي. كما كتب أيضا أفلام أميرة حبي أنا (http://ar.wikipedia.org/wiki/%D8%A3%D9%85%D9%8A%D8%B1%D8%A9_%D8%AD%D8%A8%D9%8A_ %D8%A3%D9%86%D8%A7_(%D9%81%D9%8A%D9%84%D9%85)) ، شفيقة ومتولي و المتوحشة (http://ar.wikipedia.org/w/index.php?title=%D8%A7%D9%84%D9%85%D8%AA%D9%88%D8% AD%D8%B4%D8%A9_(%D9%81%D9%8A%D9%84%D9%85)&action=edit&redlink=1). كما قام بالتمثيل في شهيد الحب الإلهى (http://ar.wikipedia.org/w/index.php?title=%D8%B4%D9%87%D9%8A%D8%AF_%D8%A7%D9 %84%D8%AD%D8%A8_%D8%A7%D9%84%D8%A5%D9%84%D9%87%D9% 89_(%D9%81%D9%8A%D9%84%D9%85)&action=edit&redlink=1) عام 1962 و لا وقت للحب (http://ar.wikipedia.org/wiki/%D9%84%D8%A7_%D9%88%D9%82%D8%AA_%D9%84%D9%84%D8%AD %D8%A8_(%D9%81%D9%8A%D9%84%D9%85)) عام 1963 و المماليك (http://ar.wikipedia.org/w/index.php?title=%D8%A7%D9%84%D9%85%D9%85%D8%A7%D9% 84%D9%8A%D9%83_(%D9%81%D9%8A%D9%84%D9%85)&action=edit&redlink=1) 1965.
إلا أن قمة أعماله كانت الرباعيات التي كان يحفظها معظم معاصريه عن ظهر قلب و التي تجاوز مبيعات إحدى طباعات الهيئة المصرية العامة للكتاب لها أكثر من 125 الف نسخة في غضون بضعة ايام. هذه الرباعيات التي لحنها الملحن الراحل سيد مكاوي وغناها الفنان علي الحجار.
و من قصائدة المميزة قصيدة على اسم مصر و أيضا قصيدة تراب دخان اللتى الفها بمناسبة نكسة يونيو 1967 . وكان مؤلف أوبريت الليلة الكبيرة (http://ar.wikipedia.org/wiki/%D8%A7%D9%84%D9%84%D9%8A%D9%84%D8%A9_%D8%A7%D9%84% D9%83%D8%A8%D9%8A%D8%B1%D8%A9) أشهر أوبريت للعرائس في مصر
علاقاته الفنية
ينظر البعض إلى جاهين على أنه متبنى علي الحجار (http://ar.wikipedia.org/wiki/%D8%B9%D9%84%D9%8A_%D8%A7%D9%84%D8%AD%D8%AC%D8%A7% D8%B1)، احمد زكي (http://ar.wikipedia.org/wiki/%D8%A3%D8%AD%D9%85%D8%AF_%D8%B2%D9%83%D9%8A_(%D8%A 7%D9%84%D9%85%D9%85%D8%AB%D9%84)) و شريف منير (http://ar.wikipedia.org/wiki/%D8%B4%D8%B1%D9%8A%D9%81_%D9%85%D9%86%D9%8A%D8%B1) . كما أرتبط بعلاقة قوية مع الفنانة سعاد حسنى (http://ar.wikipedia.org/wiki/%D8%B3%D8%B9%D8%A7%D8%AF_%D8%AD%D8%B3%D9%86%D9%89) حيث دفعها إلى العمل مع أحمد زكي (http://ar.wikipedia.org/wiki/%D8%A3%D8%AD%D9%85%D8%AF_%D8%B2%D9%83%D9%8A) في مسلسل هو وهي (http://ar.wikipedia.org/wiki/%D9%87%D9%88_%D9%88%D9%87%D9%8A_(%D9%85%D8%B3%D9%8 4%D8%B3%D9%84)).
رسوم الكاريكاتير
تفوق صلاح جاهين على نفسه في مجال رسم الكاريكاتير خاصة في صحيفة الاهرام حيث كان كاريكاتير صلاح جاهين اقوى من اى مقال صحفى وظل بابا ثابتا حتى اليوم ولم يستطع أحد ملء هذا الفراغ حتى اليوم بنفس مستوى جاهين الذي يتميز بخفة الدم المصرية الخالصة والقدرة الفذة على النقد البناء وبخفة ظل لايختلف عليها اثنان واتمنى ان يصدر عن الاهرام كتاب يحتوى بين دفتيه كافة رسوم جاهين الكاريكاتيرية .
أشهر ما كتب فى رأيى الشخصى الرباعيات .. التحميل بالمرفقات
Powered by vBulletin Version 3.8.4
Copyright ©2000 - 2025, Jelsoft Enterprises Ltd