الأستاذ أدهم عثمان يرثى مشاركاته المحذوفه [الأرشيف]

راضى

23/05/2007, 12h42

صباح الخير يا دكتور راضى

هذة مرثية فى مشاركاتى المحذوفة

أشكيك لمين .. وإنت القاضى?
الله يسامحك .. هو أنا فاضى?
أرجع أكتبهم تانى ( ده من باب المناكفة بس)
وبرضه حبيبى يادكتور راضى

القصد أشارك واللا .. ماأشاركشى?
واللا أزوركم خَبَّا .. وأشيل وأمشى
وإياك تقوللى .. إنت مالَكَشى
أو تِشهِر فى وِشِى سيف ماضى

الحكاية بقى .. إن أنا هيمان
فيكم وفى .. "ياشادى الألحان"
واللى مِصَبّرنى .. "كان ياما كان"
ومهما حصل أنا .. مش زعلان

طيب فين تواشيح النقشبندى؟
مع إنهم كانوا من عندى
جامعهم بأكتافى وزندى
وعلى فكرة ألاقى فين متقال .. وفين شندى؟

برضه أنا عايز أنجح .. وأجيب مجموعى
وأكمل ال 1500 .. مشاركة بتوعى
أصل أنا مثابر .. وفريد من نوعى
وهأشارك بالرغم من .. عطشى وجوعى

خَلَّصت كلامى وفى آخر المَتمّة
يمكن الحكاية ماهيش تامة
هتفضل حقيقة لكن هامة
عِرفتَك كريم .. حاضر وماضى

لحضرتك الحق فى طرحها إن أحببت

وهذة رباعية لسماعى

إلى سماعى
ياسيدى هات الموسيقى وأسمعنا
حاجة جميلة .. كده إتمتعنا
طقطوقة . موشح . دور . بشرف
بس المهم ... يكون ليها معنى
وعجبى

أدهم عثمان

د أنس البن

30/05/2007, 09h24

سعادة الصيدلانى
أدهم أبو عفان
أواسيك من كل قلبى
وروحى وكيانى
ولكل مشاركاتك
الصبر والسلوان
كبر دماغك يا صاحبى
وإنسى كانى ومانى
دا العبره مش باللى راح
العبره بالجاى تانى
أنس البن ....

Adham Osman

31/05/2007, 05h05

على رأيك يا دكتور انس

إبن آدم على دى ودى فرح وأسى
إبن يومه يفرح وهموم كتير بتتنسى
وفى قلبه يعمل جرد كل عام
يستف الأفراح ويكنس الأحزان بالمكنسة
وعجبى

أدهم عثمان

أين أنت يادكتور راضى؟

hossamabousalem

03/06/2007, 06h52

اخى الكريم دكتور ادهم اسمحلى ان اشارك فى تلك المرثيه التى ابتكرها استاذنا دكتور راضى
اخى الفاضل
والصيدلى الكامل
نجيب النجباء
امير الامراء
من اذا مشى فى الصحراء
خشيته الذئاب فلا تسمع لها عواء
واذا نزل المدينه سلطت عليه الاضواء
واذا مشى فى الشتاء
هطلت عليه الامطار
فاصلح الله له الاجواء
واذا نزل الريف راته الخراف
فحيته ماء ماء

معلش يادكتور ادهم شارك بعد كده بحنيه
وبلاش جشع عاوز توصل بسرعه للاف وخمسميه
كان فى التليفزيون زمان اعلان عن الست سنيه
اللى سايبه الميه ترخ ترخ من الحنفيه
معلش بقى نجيلك فى الخميس والا الاربعين والا فى السنويه؟

Adham Osman

03/06/2007, 07h08

والله ياحسام باشا أنا عاجز عن الشكر على مواساتكم لى على المفقودين
وأتقبل عزائكم على الأثير لأنى لم أستطع تدبير دار مناسبات متوسطنة بين مصر والمنصورة وإسكندرية علشان نجمع الشمل الجميل ده لكن كل ماأستطيع قوله هو

أسلم لأمر ربك والقضا
كشيمة من آمن برسوله وأهتدى
وأطمع فى نظرة عين الرضا
فالخبر لايجىء أبدا بلا مبتدا

فى إنتظار البرقيات والورود

أدهم

سامية

03/06/2007, 09h50

السلام عليكم ورحمه الله وبركاته
بصراحة امتعتوني بمشاركاتكم الجميلة دي وبصراحة نفسي اشترك معاكم فى مواساة الدكتور أدهم فى حذف مشاركاته لكن لاحظت اني لازم اشارك على نفس النهج ودى محاولة مني أتمنى تلاقي القبول

يا دكتور أدهم يا صيدلي وفنان
يالا بسرعة اعمل مشاركات كمان وكمان
أنا شايفة أعضاء كتير سبقوك بزمان
همتك واضرب رقم قياسي فى اقل الازمان
وعزائي لمشاركاتك اللي راحت فى خبر كان

إمضاء تلميذة فى مدرستكم
والله الموفق

عصام اللباد

03/06/2007, 12h53

ومزيج الشفا يا حكيم الدوا عندك
النكته والضحكه والكلمه سوا عندك
يتبدل الضيم فرحه وبحر، ونسمة هوا عندك
والله لو كان بايدي يا جميل الروح
ما كنت أحزف لك، ولا كنت ابداً اعاندك

عصام اللباد

khedr

03/06/2007, 15h51

واجيب منين ناس
لمعناه الكلام يتلوه
وعلي اللي جري يشهدوا
سبع شرقاوي
الاسم الادهم
لكن النائب صيدلاني
:eek:
جدع اسمر من بلدنا فارس مغوار
قام بمشاركاته يهد الاسوار
ويشارك
لكن كله طاااار
ياعيني ع الجدع
يلاقيها منين والا منين
:chut:
وعجبي عليك يا لادهم
وعيني عليك
وعلي مشاركاتك
وهتلاقيه منين
والا منين

unicorn

03/06/2007, 16h30

عزاء واجب
اخونا الدكتور ادهم عظم الله اجرك يا اخى فيما فقدت ,
و ابدلك الله مشاركات خيرا منها
جعلها الله فى ميزان حسناتك و جعلها لنا عظة و عبرة ان شاء الله

كل ابن انثى و ان طالت سلامته*** يوما على الة حدباء منقول
فان حملت الى القبور جنازة*** فاعلم بانك بعدها محمول

unicorn

03/06/2007, 18h12

سقط سهوا فى عزاء مشاركات الدكتور ادهم عثمان
عزاؤنا انها مع مشاركات الفنانين و المبدعين و الادباء

Adham Osman

04/06/2007, 06h08

شكر وذكرى

الأخوة الأعزاء شكر الله مواساتكم جميعا ولاأراكم الله مكروها فى مشاركة لديكم.

والله ياأخوانى أنا أحسست أنى لم أفقد مشاركاتى بعد مارأيت مدى عمق المشاعر لديكم.

لكن لو المسألة بالجمال ده أنا هأضربلى كام مشاركة فشنك كل كام يوم وبرضه أخونا الكبير د. راضى حامد يحذفهم بس أقولكم حاجة أنا إتحذفلى كتير وقليل مالقيتش طعم زى طعم حذف الدكتور راضى.(حتة فى السريع كده)

وأخيرا أشكر كل من واسانى وأتمنى أن يكون ماحدث عظة لى وعبرة لأمثالى.

أخص بالشكر

د. راضى حامد
د. أنس البن
الأخ العزيز حسام أبوسالم
الأخت العزيزة سامية
الأخ العزيز شلال الغناء
الأخ العزيز عصام اللباد
الأخ العزيز خضر
الأخ العزيز unicorn
الأخ العزيز عبدالسميع
_________________________

فخر ونسيب

سمونى أدهم الشرقاوى وده إسم علينا عزيزِِ
اللى حارب العدا بالعربى والإنجليزى
قلت أعمل زيه وأقول كرامة ومبادىء
لكن الظاهر إن الحكاية بقت فرى إيزى
وعجبى[/FONT][/CENTER][/SIZE][/B]

Adham Osman

08/06/2007, 06h00

تشكرات خاصة

إلى الأستاذة

الأخت العزيزة .. صاحبة الكلام البلسم .. سامية
لجل كلامِك ده ... مشاركاتى هاتكون حامية
لما شاركت الأول ... أهدافى كانت سامية
لكن الحذف علينا شرط ... ولازم نقبله
ولو كنا ... من بلاد نامية
********
إلى الأستاذ عصام اللباد

ياعم عصام اللباد يافنان أنا مش قدك
إنسان جميل قوى سوا فى ضِحكتك أو جَدّك
بتفرش السعادة للناس والبسمة على خدك
والله ياشقيق الروح لأبعتلك حمام الدوح
شايل سلامى لك، وفى ثانية ... أكون عندك
********
إلى عمى حسام أبوسالم

شكرا لإبن السوالم الغالى ووصفه حسام
والكرم أصيل عنده والأخلاق وكُبر المقام
ونصيحته الغالية دى ينضرب لها السلام
وصح ... اللى فات مات ياصاحبى
وعمرى ماهأقف مطرحى ... وهأبص أنا لِقُدام
********
عزيزى Unicorn

وقفتك معايا كانت وقفة رجالة وكان لها عظيم الأثر وعزائى أننى أصبحت بشهادتك فى مصاف الفنانين والأدباء والمبدعين.
المعاصرين طبعا مش الراحلين واللا قصدك غير كده.
********
إلى عزيزى خضر صاحب الموال وصاحب أحلى كلام يِنقال

ولما قالوله ياأدهم ... ليه بتشكى ليه
قال ولما إنحذف شغلى ... عملتم إيه
حكموا عليه ينحذفله... 15 مشاركة فى ثانية
شارك بغيرهم ونفد ... والفحص جارى عليه

أدهم

عصام اللباد

10/06/2007, 02h00

سقط حرف العطف وانكسر البيت
والنصحيح هنا:

والحبيب المصطفي يا شيخ ما تقفَِّل العزا
ولا تقول لي المنتدى بس سيكا ومزيكا
ولا فيها كيت ولا كذا
دا انت قلبت الميتم فسحه والحذايف منتزه
وبعد ما شبطنا فيك واتشعبطنا وبِطْلِت النرفزه
عايز تخلى وتخلع وتفك يا هندزه؟

سايق عليك النبي،
بحق العيش والملح والحذوفات
بحق الصحبه والصهبه والمزه والمزمزه
بحق اللب واللباد والقز والقزقزه
بحق الصحبه والصهبه والصعلكه،
.. والتلمذه،

خليها دايمه وما دايم غير وجه الكريم
والعزا عبره، وفي الحذف عظه.

يا أساتذتي الأساتذه، أنا
العزاء الدائم هكذا، أحبذا.

عصام اللباد

Adham Osman

10/06/2007, 06h20

أستاذى عصام اللياد

تحية عطرة لك ولكل أحباء سماعى ولكل من يحب الشعر والزجل والمناكفة بالكلمة من الدماغ

ولى فى كلامك رباعية تنطبق على الحال

لماذا الأيام - الأيام دى - كده متسربعة؟
زمان كات قعدة ومشاريب وسلامات مربعة
سنة تروح وسنة تيجى .... دلوقتى
فى يوم ... السنة تخلّص فصولها الأربعة
وعجبى

أدهم

unicorn

10/06/2007, 21h42

صنعت فى الرثاء اخى ابياتى
و بنيت الصوان من الكلمات

و جئت القيها عليك لعلها
تشفـى القلوب و توقف العبرات

اخذوا غالياتك من الضلوع و
القوها بقسوة فى سلة المحذوفات

فيا مشاركة الحبيب امانة
تسلـمى على المشاركات بناتى

و قولى لهن اباكن عليل
بالفراق ولا يرى من ليله غفوات

يا ادهم لا حزن و من حولك شلال
طرب و عبد السميع و الالاتى

و جاءتك سامية فى الصوان مولولة
ببكاء عين و لطم و صوات

واتاك خضر وعصام بأبيات
وعـــــلا نحيبهما و أسمعوا الاهات

يا ابن ابى عفان و نصحى لك
فى صوانك اولى من سكاتى

لا تنسى ان اصدرت مشاركة
ان تتلوا عليها الثلاث المعوذات

و علق عليها قبل ان يراها الناس
خرزا ازرقا و حدوة عاديات

و يا حبذا ان اقمت للاسياد
زارا ليحمونها بأشتوت و اشتات

الذنب ذنبك ان لم تحذر هنا
من بأس انياب ضوارى الغابات

فعجبا رأيت و لن ترى مثلهم
و ان طفت دوما على المنتديات

فالديب و النمر و حيدر امسوا
اخوانا يعيشون فى تبات و نبات

و اجمعوا العزم بعقد مبرم
يشبعوا الجوع من لحم المشاركات

فلن اعجب ان افطروا بعزائى
هذا و ادعوا انه من المنقولات

و اكفنا يا رب شر من هاموا
علينا بأستيكة لا تبقى الكلمات

واجعل كلامى عليهم خفيف
فلست بحمل شلوتا و لا ركلات

و يا سلة المحذوفات ردى بناتنا
و اطلبى الاجر من رب السموات

Adham Osman

11/06/2007, 08h57

أحبائى عصام بك اللباد والفنان unicorn

ماضاع حق وراءه مُطالب

وهذة رباعية تصبيرة

الأمل مازال موجود
(أن نستطيع أن نحصل على رفات مشاركاتنا بعد حذفها ونقبرها بمعرفتنا على الأقل)

فى يوم دقوا الوتد ... عملوه علامة حدود
وقالوا سيبوه ... بكره هياكله الدود
فاتت سنين ولقوه ... مِزَرّع
وفارش خضار ... وبين شجر الجناين معدود
وعجبى

أدهم

Adham Osman

14/07/2007, 06h49

فى يوم 28\6 الماضى بدأت رفع الشرائط التى أفرج عنها فى الذكرى الخامسة لرحيل العندليب وتحتوى على الأغانى الوطنية التى كان محظور بثها فى عهد الرئيس السادات لأنها من عهد الزعيم جمال عبد الناصر والأهم منها التعليق بصوت الإعلامى جلال معوض يؤرخ للأغانى ولمصر وللوطن العربى لأن الأغانى معظمها مرفوع من قبل لكن ماينفعش نشيل الأغانى ونسيب التعليق لوحده للحفاظ على سياق الموضوع والإسترسال ولقيتهم محذوفين بعد أن رفعت باقى الشرائط فى يوم 7\7 وأنا كنت منتظر طوال المدة من 28\6 حتى 7\7 حتى أرى رأى السادة المشرفين ولم يرد أحد فأعتبرتها موافقة ضمنية على رفع باقى الشرائط ثم بعد حوالى ساعتين باى باى.
أسيب حقى طبعا لأ
فبالتالى كان لازم تظهر المرثية الثانية مع كل إحترامى وتقديرى لكل السادة المشرفين لحساسية وضعهم للحفاظ على المنتدى مع الحرص على مراعاة شعور كل الأعضاء (يعنى الشرائط دى ممكن يحذف مكرراتها فى أكثر من 15 مشاركة بأكثر من 10 أعضاء على الأقل وده شىء حساس لكن ممكن كلها تستنى إذا كانت الشرائط شىء مميز)

ده مهما حذفوا ومهما ضاموا
الشكر ليهم ودمتم وداموا
أعضاء المنتدى العزيز
وشكر خاص للأستاذة هامو

تعبت جدا علشان أجيب
تلات شرايط للعندليب
تفكرنا بالزمن اللذيذ
يحذفوا كده من غير سمع .. ده شىء عجيب !!

هو فيه إيه؟ إيه الحكاية؟
لازم نحيب ولازم شكاية
واللا أنا محتاج تعزيز؟
ياإما حذف وشطب ونكاية

لأ بقى ده إستقصاد
مش كل من دوّر وصاد
تعدموه كما الإنجليز
إمال يعنى إيه وقت الحصاد؟

دول تلات شرايط عمرهم 25 سنة
كانوا فى خزانة بمعرفتى أنا
لأ .. بلاش .. أرجوكم .. بليييييز
تحرمونى فى ثانية من لحظة هنا

عالعموم هأكشف راسى وأقول ياهادى
عاللى حذف المميز وساب العادى
وكده بقى فيه تمييز
وماحدّش يزعل وأنا برضه راضى

ملحوظة لم أرفع هذة المرثية إلا بعد تأكدى أن الشرائط عادت إلى نوادر عبد الحليم وده من باب الشكر والمناكفة للأستاذة هامو زهرة المنتدى ليس إلا.

أدهم

سمعجى

19/07/2007, 06h17

مشاركة وجدانية للمحذوفات الأدهمية :
القطر فاتك .. ولا حد غاتك .. ما فاضلشى ليك .. غير محذوفاتك
ومحذوفاتك دى محذوفاتنا .. هى الفنون روحنا وذاتنا .. بس انت كمل مشوار غاياتك ... وساعتها تنسى لوعة آهاتك .. وتفتكرنا بمحذوفاتك ..
.:mdr:

Adham Osman

19/07/2007, 06h32

عمنا سمعجى ياجميل

عندك حق مانبصش ورا أبدا دايما نبص للى جاى أكيد هايكون أحسن

عجبى على الإنسان كده كده ... مرزوق
ربنا خلقنا وجعل لكل كائن ... حقوق
الوحيد اللى مستعجل هو إبن آدم
مع إنه ممكن يتعلم من أى مخلوق
وعجبى
أدهم

سمعجى

22/07/2007, 02h35

مرثية ( سمعجى )
للمحذوفات الأدهمية
القصيدة من بحر ( البسيط )

يا أدهما قد رثاك الناس فى أسف ..... اذ بات جهدك بعد الجهد محذوفا

زرعت وردا و ريحانا بروضتنا..... فبات زرعك بعد النضج مقطوفا

فلا تعش فى ربوع الغن منكسرا.....منكس العرف مثل الديك (منتوفا)

عرش(السماعى)عريق شامخ أبدا....فكن جسورا ولا يحزنك ( تكتيفا)

فــك القيــود و كـن نفسـا محلــقة ......و لاتـبـيـتن محـزونـا و مأسـوفا

يكفى التصفح والتحميل يا رجلا ......يدرى بأن(الصبا)أشهى من النيفا

وانهـل من البحر درا لا نفـاد له ...... و أشبـع السـمع تلحيـنا و تأليـفا

يكفى المكوث على أبواب أيكتهم ......آل السماعى(ألا قد زدت تشريفا)

الكونت(راضى)رأىالاسهام مبتسرا...و(البن)قد كيف المحذوف تكييفا

مشاركات تصفى فى ( فلاترهم).....اذ يصبح الحذف تلو الحذف مألوفا

هم يحجبون غثاء السيل عن أذن.....باسم (الجديد)غزاها الغث تجريفا

يمضون أسرى لـفن لا حدود لـه .....يرجون حـبا ولا يـرجون تخـويفا

دع عنهم اللوم هم أدرى بصالحنا....ان(طنشوك)فقم واشكو الى(الفيفا)

unicorn

24/07/2007, 04h39

استاذنا الدكتور ادهم عظم الله اجرك يا سيدى تانى
و حيث انك عملت هذه المرثية من باب المناكفة
دى برضه من باب المناكفة مش خسارة فيك:mdr:

جئناك يوم الحذف اخى برثاء.....و من يومها مفتوح باب العزاء
و باتت عيناك تجود بدمع غزير....كأنها جواب سقيا صالح الدعاء
هون عليك و ارفق بحالك إنما..... ايامنا أخذ يوم الى يوم عطاء
و ارفق بحال من جاءوك من .....سفر و لم يذوقوا وضيمة الغداء
على لحم بطن من صبح يومهم...وعلى قلبك جالسون حتى العشاء
فإن كان من صنع الحاتى طعامكم.....دعوا لفقيدكم بجنات و علياء
و إن جئت به من كشرى التحرير.... فلأسفل سافلين جاءه الدعاء
اشترى اخرة الفقيد بأكلة دسمة.....تشبع بطون من جاءوك غرباء
او قم ابا عفان و ائتنا برومى..... و مرقته على ملوخية أو بازلاء
و ان لم تجد فلا بأس بدجاجة ....من بعد ذبح و نتف ريش و شواء
الا تشترى للفقيد الجنان بفرخة....يتيمة و ان كانت كسيحة عرجاء
إذن فأتنا بالفول اللعين و اخوانه......فها قد خاب فى اللحم الرجاء
الفول خلفى اينما ذهبت و ان ....كنت معزوما على اعراس امراء
ولا تنسى يا اجزخانجى الفن..... ان تؤتنى معه لداء الهضم دواء[/SIZE]

mokhtar haider

27/07/2007, 13h27

يا سلام عليكم يا جماعة شوقتوني و فضلت معاكم:mdr::mdr: الصبح كله لغاية ظهر الجمعة... ممتازين .... هو العزاء و الرثا ء دايما عندكم على هذا الشكل؟؟؟ فكيف تكون معكم مواضيع فرح و سعادة؟
استاذ أدهم عثمان أنا أهنيك و مرحب و سعيد بيك عقبال المليون مشاركة و خلي حبيبنا راتضي يحذف ... أكيد هاتفضل منها حاجة تطلع منا ابتسامة حلوة
إحذف يا عم راضي... دا الاستاذ غاوي كلام حلو ما يتشبعش.... خليه يقول بآ

عصام اللباد

28/07/2007, 18h59

يا عم medicano
سيب الناس تكتب،
كفايانا موازين الحكومة.

وخد عندك
واحدة مكتوبة بميزان الحجر.
واوعى تزعل مني.

*****
*****

شكراً يا أدهم عْ الرسالة و عْ السؤال.
أنا كويس! ماشي! ومش بَطَّّال.
إنت قول لي أخبارك وكيف الحال.

إن شا الله صحتك بُمْبُن يا خال.
طايب والمزاج طيب وعال؟

وقول لي إيه أخبار النضال؟
وكيف أحوالك وأحوالكم؟ رجال؟

عسّاكم لسه متبتين
وفْ وِش العِدَا شلال؟

دُول ما وراهم إلا ذم
وهَم وغم أو فَتل الحبال،
لتعليق المشانق للحقايق
أو عموم حذف المقال.

والرقابة عندهم شَبَه الكتابة
(الكتابة اللي بالرجل الشمال)

ما تزعلشي أبداً يا صاحبي؛
ودايماً افتكر اللي قال:

"الحق حق، ...
دايماً ما يعلى ويِنتصِر
والخيبة مهما تمرح
تِرْمَح لأخرتها الزوال."

عصام اللبّاد

egygirl

02/08/2007, 07h58

Adham Osman

03/08/2007, 07h37

لقد دخلت المنتدى ولا كان فى بالي
وكتبت مشاركة ولقيتها محذوفالي
زعلت مفهمتش وقلت يا لهوبالي
دي مشاركة بسيطة فى منتدى أغاني الأطفالِ
حذفها الأستاذ راضي .. ولم يبالى
ورأيت استاذنا أدهم يرثى محذوفاته
وكأنه يرثي لحاله وحالي
مش زعلانة يا ولاد بلادنا خلاص
بس حد يفهمنى حكاية الـ 1500 مشاركة
أحسن افضل اعيط لو محدش جاوب سؤالي
:crazy:

الله ينور ياأستاذة egygirl
والبداية كانت من أستاذنا الدكتور راضى فهو فتح المجال للمتضررين أمثالنا للتعبير عن رأيهم فى حذف مشاركاتهم وطبعا المسألة تحت باب التنظيم وعدم التكرار والجودة لكن لابد لنا أن نطالب على الأقل بإحياء ذكرى المحذوفات ولو مرة كل عام.
أما بالنسبة لل 1500 مشاركة فدى كانت من واحد غشيم فاكر الحكاية بالكثرة.

أدهم

Adham Osman

03/08/2007, 07h59

الأخ الحبيب يونيكورن
ياأخى عزائك له طعم تانى والمسألة بقت محتاجة وقفة ننفض هدومنا ونقعد تانى.
ياأخى نظمك جميل ومليان بالروائح المسبكة وأنا لما قريتها جعت جدا وقلت إيدى على كتف عمنا يونيكورن ونروح عند أى حد محذوفله ونتغدى أو نتعشى ويبقى أخدنا بخاطره برضه.
آسف على التأخر فى الرد ولكن لظروف خارجة عن إرادتى ولكن خد دى علشانك إنت مخصوص

الزهرة قالت للنحلة آى آى
أصبرى ده الربيع زمانه جاى
النحلة ردت من كسوفها ... أعمل إيه؟
وإنتى عبيرك ماله زى
وعجبىأدهم
ملحوظة : أتمنى من الأخوة المشرفين أن يضموا هذا الموضوع للموضوع الذى بدأه أستاذنا الدكتور راضى للمرثية الأولى وكمان فتح إدارة صغيرة على جنب كده لرفع المعاناة عن متضررى الحذف.

سامية

03/08/2007, 22h01

Adham Osman

06/08/2007, 05h26

صباح الخير ياأستاذة سامية
الله يسعد أوقاتك ويصلحلك أحوالك وينولك اللى فى بالك.
طبعا دى مش قصيدة شحاتة ولا حاجة بس إنتى دايما رافعة روحنا المعدنية ومن كرمك وجود أخلاقك شايفة الدنيا والناس كلها جميلة وكل الناس تستاهل التقريظ بالضبط زى إخواننا المشرفين اللى هاريينا تقريص.
طيب أنا من باب الفنطزة قلت أعمل راجل لارج ونجمع المرثيتين على بعض ويبقى موضوع واحد على بعضه فنجرة بق يعنى.
إخواننا المشرفين ماصدقوا راحوا على طول عاملينها شوفى حضرتك طالما فيها حذف تلاقيهم قوام طيب ماأهو أنا برضه مع الطلب ده طلبت إنشاء إدارة لإعانة أسر المحذوفين فين هى بقى؟.
القصد أشكر حضرتك بالأصالة عن نفسى وبالنيابة عن إخوانى فى المنتدى على الكلام الجميل اللى حضرتك قلتيه علينا.
عموما إحنا وقعنا مع ناس طيبين مشتركين فى كتير من الخصال والإهتمامات والتضحية سمة غالبة علينا كلنا بدليل كم الوقت الذى يقضيه كل واحد منا لإحضار أغنية جميلة ليشارك فى جمالها الآخرين.

طول عمرى بأتمنى أحقق حلم ولو صُغَيّر
وجريت فيها طول وعرض ... قبل ما تِتغَيّر
فى الطريق ساعدت ناس كتير لجل ماتِوَسّع
لاحققت أنا حلمى ... ولافضلت أنا صغير
وعجبى

راضى

22/08/2007, 18h55

العزيز الدكتور أدهم
إسمحلى أسبقك وأرفع قصيدة

شهر الجهاد
أو
المعرى يصوم فى مصر المحروسه
للدكتور سراج الدين السيد الحلفاوى

غير مجد فى ملتى وإعتقادى أكل فول أو إلتهام زبادى
وشـبيه أكل التحابـيش إذ قيس بشـم الهواء فى أى نادى
إنما الأكل كفتةٌ أو فـراخٌ فى صـوانٍ رائحـات غـوادِ
وعكاوى طواجنـا وبرامـــا وكبــابا مشعشعــا فى الفؤادِ
والزغاليل قد حشين فريكــــا كل ومزمز ولا تقل للأعادِ
****
صـــاح هذى بطوننا تهضم الدبش فأين الكلاوى والأكبادِ
إن بكت تلكمُ الحمامة هاتها وإشوها لى فى سياخٍ شدادِ
ذاك شهر الصيام أقبل يسعى ذاك شهر التقى وشهر الجهادِ
جاهد النفس وإنهها عن الطعام ليس فيه كوارعا أو فخادِ
لا تعف نفسك الأكولة شيئا مالنا والزهد والزهادِ
****
ذى موائد الرحمن خمس نجومِ فتصيدها زمالكا ومعادى
كل إن إستطعت من الفطور للفجر لا تبال مقولة الحساد
لا تبالى بمدفعِ أو سحورِ كل وطنش ودع منادٍ ينادى
****
كل وهيص فإن تمت فشهيد فى عداد الأولياء والعبادِ
بئسه الموت من هزالٍ ولكن حبذا الموت تخمة يا ولادى
أنا إن مِتُ أطعمونى ستاكوزا أصحو من تانى خلاص كله عادى
كل فان الحياة مضمار حشرِ فإغتنم فيه ما تطول الأيادى
كل فإن الحياة حـــلم قصــيرٌ بعده رقــدةٌ بكـــل الرقــــــادِ

hossamabousalem

23/08/2007, 18h18

والله يا دكتور أدهم باتمنى يتحذفلك كل فترة كده كام مشاركة على الماشي :mdr:
علشان نستمتع بالكلام الحلو ده وبالمواهب الجميلة دي
انا متابعة الموضوعين الخاصين بحضرتك
والله امتعتونا فعلا .. مش عارفة ادعيلك بايه دلوقتي
ربنا يثبت مشاركاتك .. ولا تتحذفلك مشاركاتك
طيب قولي انت لاني محتارة بجد :crazy:
رائعين والله رائعين
مع خالص تحياتي

بعد اذنك ياساميه هانم انا باتمنى كل مشاركات اخويا وحبيبى دكتور ادهم تتحذف
علشان نطلع اللى جواه
ده كام مشاركه اتحذفوا عمل عليها توبك يفوق الوصف يبقى لو انحذفت كل مشاركاته هايبقى التوبك شكله ايه؟
عاوزين نجرب وانا شخصيا مستعد اتوسط عند دكتور راضى باشا انه يمسك الاستيكه بتاعته ويبدا الشغل
ايه رايك يادكتور راضى فى الفكره دى؟ طبعا عجبتك جدا وجايه على هواك وبالذات انها هاتكون من نصيب اخى وحبيبى دكتور ادهم
ايه رايك يادكتور ادهم موافق؟ اعتقد دكتور راضى راح اشترى علبه استيكه كامله وبيسن سنانه
انا منتظر ردك الكريم
تحياتى اخى الحبيب دكتور ادهم

Adham Osman

24/08/2007, 16h29

السلام عليكم ورحمة الله وبركاته
والله العظيم وحشتونى يادكتور راضى
لأسباب خاصة بأبنى عمرو كنت محروما من دخول المنتدى طوال الأسبوع الماضى وهأنا ذا أعود وكلى شوق للقياكم جميعا.
أشكر حضرتك على قصيدة د.سراج الحلفاوى فهو كما أشرت له من قبل صاحب باع أدبى كبير.
وهنا أنا بين خيارين إما أرفع المسحراتى أولا أو بخيل فى رمضان.
وأظن أخونا غازى فتح أوضة الفقى الخاصة برمضان وكانت فى عزبتنا هذة الأوضة مفتوحة طوال العام ليقرأ فيها شيخ مسجدنا يوميا ورده من القرأن ولكن تكون فى أوجها فى رمضان حيث يتصدرها أجدادى وأعمامى مفتوحة للضيوف والمشايخ من كل حدب وصوب يقرأون القرأن ويتسامرون من بعد صلاة العشاء والتراويح حتى السحور وعادة مايكون مبكرا حتى يستطيعون قيام الليل وصلاة الفجر فلما لاتأخذنا إلى هناك إلى أوضة الفقى فى المنتدى ؟.
وهذة هى
المسحراتى

ياللا إصحوا ياأهل بلدى الكرام
أحياكم الله بالخير لكل عام
ع الباب أهو جالكم شهر الصيام
صيام بالنهار وليله قيام

أيامه خفيفة تعدى كما الريح
أحسنلك تاخدها قرأن وتراويح
غفورٌ رحيمٌ والكلام صريح
من تمهم بالتمام فاز بالصحيح

شهرٌ كريمٌ ياريته يدوم
كله رحمة ومودة على العموم
نبينا أمرنا والعبد ملزوم
وإوعك تكَسَّل لتبقى محروم

تلاتين يوم بالكمال والتمام
وإنت ياإبن بلدى ياشهم ياهمام
شوف طلبات العيال والمدام
وإشرح وفسر الحلال م الحرام

فى رمضان بطنك دايما مُستريح
لاتعانى المغص ولاتشكى من ريح
تاكل تقيل وفى فراشك طريح
ده أكبر غلط ترتكبه بصحيح

التمر سُنة ولابأس الياميش
وإوعك فى يوم تقول مامعاييش
لحسن حماتك تحلف ماأجيش
وتعيش شهرك ع المَية والعيش

المدام فى عشرة هتطبخ المَرَق
وييجوا عشرة وتفَصًّل الخَلَق
والعشرة الأخارى هتُبرٌم الحَلَق
الكحك ياحلاوته سبحانه من خَلَق

ياريتك لو تعديه كله معزوم
تاكل بهمة وتنسى الهموم
هتلقاه عَدَّى يوم بعد يوم
بس تلحق نفسك وتجيب الهدوم

كده وصلنا ليوم العيد
وكله هايلبس جديد فى جديد
وحضَّر الفًطرة والمحفظة الحديد
مش لازم أكرر وأقولك وأعيد

آه نسيت أتكلم معاك ع الفلوس
هتجيب للعيال كل واحد فانوس
وواحد لحماتك لتجيبلك كابوس
وأدينى قلت وياللا والسلام

وياللا إصحوا ياأهل بلدى الكرام
----------------------------
أدهم

Adham Osman

24/08/2007, 16h40

بخيل فى رمضان
كل رمضان أقول ياميش مانيش جايب
ترد أم العيال إعمل حساب للى غايب
والضيف والصايم واللى مالوش نايب
طَلّع الفلوس وإشترى .. ياخواتى دى عجايب
بقى المسكين كمان له نفس راخر
ياكل زَفَر ويحلّى بياميش فى الآخر
ويقعد جنبى ضيفى ويقوللى إِتَاخر
ناولنى البطة دى!! صدقنى دى مَسَاخِر

ماله الواحد يخش بيته ويقفل على طول
بعد العصر يمسك السلطة ويعمل مشغول
وهى لقمة أو لقمتين من طبق الفول
أكل نوع تانى غير كده مش مسئول

قال يقولك رمضان كريم ويحب البراح
دى خزنة فلوسى مقفولة ملهاش مفتاح
تاكل قليل بطنك تستريح وتعيش مرتاح
مش صوانى وحلل مالصبح .. قول يافتاح

ياسيدى .. ياما أكلنا وشربنا كويس
العيال تتعود عالأكل وكده مش كويس
حلو لما تاكل وتشرب وتصبح مفلس
لأ وفى العيد كمان تجيب فطرة وملبس

ياعم إسمعنى ده أنا صوتى إتنبح
أنا آخرى لفة قمر وإتنين كيلو بلح
ياريت لو كمان ييجولنا مِنَح
وهأجيب أنا السكر لو وقتى سمح

ماتصدقشى كلامى ده أنا كنت بأهزر
هو فيه رمضان من غير مانتسلَّى ونفَزَّر
إصرف مافى جيبك وماتخافشى تِتعذّر
ربك هايفرجها بس من غير ماتبذَّر

نيجى للجد ولو للكلام إعادة
رمضان ده شهر مجعول للعبادة
والخير فيه كتير وما يقطعها عادة
نجيب مكسرات وياميش وفطرة بزيادة

وكل عام وأنتم بخير
أدهم

Adham Osman

24/08/2007, 17h37

السلام عليكم ورحمة الله وبركاته ياعم حسام ياجميل

أخيرا المنتدى نوّر بيك تانى.
أول مرة رجعت يوم 27 وبعدين يوم 1 وبعدين قعدت 14 يوم لحد يوم 15 لاحس ولاخبر وأنا عايز أطلبك ومكسوف تكون بتتضايق من كتر الإلحاح وبعدين ظهرت بأوراق الورد الجزء الثانى وده معناه إنى مراقبك ومستنيك ترجع لكامل عافيتك ونبتدى الكلام من أول وجديد.
أولا بالنسبة لأوراق الورد الجزئين كل كام يوم أطلعهم على الكمبيوتر فى الصيدلية أقرأهم على مهلى علشان أرد عليك أو أقولك حاجة عنهم لسانى أخرس تماما ومش قادر أقول مش قادر ومش عارف ليه ؟
لأ أنا عارف ليه لأنى مريت بتجربة شبيهة بتجربة حضرتك وطبعا ماعرفتش أكتب اللى جوايا زى ماحضرتك كتبت لكن كل إحساس إنت قلته أنا حاسس بيه تماما وهذا هو قدر الرجال الفرسان مايقدروش يبوحوا بإسم الحبيبة ولا يقدروا يقولوا كل اللى جواهم وأنا واثق تمام الثقة إنك فرملت قلمك وإنت بتكتب علشان ماتقولش حاجات كتيرة ياريت ماتحبسهاش قولها زى ماهى لأن ده شعور جميل خسارة يتحبس.
ثانيا إنت جاى تهدى النفوس مش كده و بتسخن الناس فى المنتدى على الحذف طيب ياعم حسام طيب.
وإليك وإلى الأخت سامية وإلى كل إخوتى فى المنتدى هذة الفضضة.

فضفضة

هو إسمه شعر واللا .. إسمه زجل
وهنقبض تمنه كاش واللا .. بالأجل
وإن كان بحق وحقيقى واللا .. دجل
المهم إنه يفيد وأقوله .. من غير خجل

بأحب أكتب عن الحب .. الكلام
سوا كان تجربة أو .. من غير علام
بس يكون له معنى مش رص .. والسلام
وأكتشف كل مرة .. إنه ليكى يامدام(مراتى طبعا وماتودوناش فى داهية)

ودى قصة عن بنت حلوة .. الولد شافها ومال
فى عينه هى آية كاملة .. من الجمال
أمنية هى واللا أحلام .. واللا آمال
والقصة دايما ناقصة .. من غير إكتمال

ودى عن استاذ نموذج .. حبته البنية ومالت
حكت عنه للمخدة والمراية .. وياما قالت
وآهى برضه قصة .. السعادة فيها إستحالت
وقالت عنها المدام بتاعته .. غمة وزالت

هى قصة واحدة أعرفها .. عايشة فى بالى
المحبة والإخلاص والعشق فيها .. كان خيالى
بلا تفاصيل وماأقدرش .. أفسح ليها المجال
أطرافها لحد النهارده فى السما .. نجوم تلالى

أنا العشق والهوى ليا دوا .. موصوف
أحب أحب وأنعشق كده .. من غير كسوف
زى الوليد قلبه طازة .. ومايعرفش خوف
ولما يحصل تظهر مراتى .. والعلاج معروف

نرجع بقى للزجل .. أبو الكلام موزون
يقولوا حكيم أو .. أتوصف أنا بالجنون
المهم أقول أبقى عايش .. والقلب يفضل حنون
وكلامى يبقى مكانه .. مكان الجفن للعيون
وسلامى لأحبابى
أدهم

سامية

25/08/2007, 08h47

السلام عليكم ورحمه الله وبركاته
يا خبر يا دكتور أدهم .. انا لو أعرف ان مشاركة حسام باشا هاتوصلنا للجمال ده.. كنت طلبت من حسام باشا واترجيته يعمل المشاركة دي من زمان
على العموم المفروض اعضاء المنتدى الكرام مايسبوش حضرتك ابدا
كل يوم يكتبوا مشاركة جديدة بموضوع سيادتك علشان الابداع ده يوصلنا
وكل يوم نشجع الدكتور راضي على الحذف علشان حضرتك تبدع وتوصلنا الروائع دي
يعني من الاخر كده حضرتك هاتتحفنا كل كام يوم كده بحاجة جميلة زي دي
ولا تحب نوصل الموضوع للمدام وأهو كله تهدئة نفوس يا دكتور ;)
انت عارف أهل الخير كتير .. هاتكتب لنا ولا نقول ؟؟ :mdr:
مع خالص تحياتي

hossamabousalem

25/08/2007, 09h23

الاوله لادهم رفع ملف قلنا عال
والتانيه حملناه وقلنا شغال
والتالته كتبناله وقلنا ملفك اخر جمال
والرابعه لادهم فرح وفرح معاه ام العيال
راح لادهم الصيدليه وفتح النت ولقى المحذوفات
فتح لادهم عنيه وبحلق واعاد النظروقال خيانه
ده انا ضيعت فيهم جهد وعرق وعدد من الساعات
بعد تعبى وشقايا وفرحه ام العيال الاقيهم فى الزباله
راحت من خد لادهم فرحه واختفت الغمازات
وحل محلها عالخد حزن وشرب قهوه ساده بدل مالشربات
ليه ياعم راضى عليه موش راضى
ده انا عمرى ماكنت مؤذى ولا سادى
ودفنت القتيل وفتحت له نصبه سموها عزا
كل واحد دخل يعزينى ووصل حزنى للسما
من كتر حزنى وسيل دموعى خايف
وعيونى تدبل وابقى موش شايف
ده ربنا بحالى وبحال محذوفاتى عالم
وكفايه اللى بتعمله فى حسام ابو سالم

سامية

25/08/2007, 09h47

السلام عليكم ورحمه الله وبركاته
بسم الله ماشاء الله كل يوم بنكتشف حاجات جديدة وجميلة باعضاء منتدانا الكرام
ايه الجمال ده يا استاذ حسام .. والله اكتر من رائع
ومنتظرين الدكتور أدهم يرد بحاجة لا تقل جمال لانه فنان بالفعل
واذا كان على الاخ عادل واللي على حسب كلامه حضرتك مشرده في المنتدى كله
ارجو من سيادتك تكمل تشريد ولا ترحمه اطلاقا :cool:
ولو محتاج مساعدة تحت أمرك :mdr:
عفوا يا اخ عادل .. الزعل مرفوع
:mdr: :mdr:
مع خالص تحياتي