بصوت الفنان أحمد جمال [الأرشيف] - منتدى سماعي للطرب العربي الأصيل

مشاهدة النسخة كاملة : بصوت الفنان أحمد جمال

sayed darwish

27/03/2006, 16h39

استحملو صوتى عشان خاطر الشيخ سيد"""""دى اغنية الصاغة الصغيرة""كان سيد محفظها للعيال فى الشارع عشان لما تعدى جليلة يغنوهالها كنوع من التريقة """ يعزف على العود الأستاذ الكبير عمار الشريعى و لى الشرف:::طبعا جليلة دى غير السيدة جليلة عبد الرحيم التى تزوجها الشيخ سيد فى مايو 1919 وانجب منها يحيى الذى توفى وعمره اشهر ثم حسن الذى كان بمنزلة ابى الروحى"""رحمة الله عليهم جميعا

cooldoctor

27/03/2006, 18h36

صوتك أكتر من رائع
أنت مين بالظبط؟؟؟
وعلشان مجهودك العظيم ده هاكتب لك الكلمات

في الصاغة الصغيرة شوفوا العجايب والعجب
على الشمال أول دكان صاحبه جدع اسمه القبطان
عنده حلق خفه وكردان وآدي الحقيقة بتنكتب
تاني دكان سيبك منه والتالت اللي باقول عنه
تاجر شهير ولا فيش منه ولكل شئ دايما سبب
رابع دكان سلم لي عليه دانا قلبي مايميل إلا إليه
والخامس اللي أقبل إيديه ده يساوي طب كيل دهب
أما بقى ساتت دكان استنى عنده يابو القمصان
تلقى اللي فيه قاضي النسوان عمر اللي زيه ماينعتب
بيقولوا مرة عمل خلخال ينفع ركاب لتلات بغال
سألت مين لبسه ياعيال قالوا جليلة أم ركب
ماعرفش إن كان دا معلم ولا دا للعشاق سلم
صبرك عليه بكره يضلم وتشوفوا فيه كل العجب

sayed darwish

27/03/2006, 19h22

العفو يا دكتور"""""انا اسمى احمد جمال و من مجاذيب سيد درويش:::اسكندرانى"""غنيت انا المصرى فى حفل افتتاح مكتبة الأسكندرية"""و اهو دا اللى صار فى افتتاح الأوبرا::::عملت اغانى سيد درويش فى مسلسل زمن عماد الدين مع الأستاذ عمار الشريعى:::::واخيرا مثلت دور سيد درويش فى مسلسل مصر الجديدة مع الأستاذ محمد فاضل:::::و خدام تراب رجلين الشيخ سيد يا دكتور

sayed darwish

28/03/2006, 16h57

يا مصر يحميكى لأهلك.......شوفو جمال الكلام و رشاقة اللحن.......وعود الأستاذ عمار يا جماعة ,,,,سلاسل دهب والله.....

cooldoctor

28/03/2006, 20h13

وياريت تضيف عليهم

آدي اسبرتو الفابريكه
استدياوليتو ياما
أسعد الله التماسي
اطلع من دول أنا مش منهم
الأوستيك فوق صدرك يضوي
الجطن وما أدراك ما الجطن
الله على شكلك وحلاوتك
ألفين حمد الله على سلامتك
عرفت أخرتها ويا حبي
قوم ياحبيبي بقينا الصبح
والنبي لآيس وياك ياغزال
يالذيذ ياأخضر
إيه العبارة
بونجور ياهانم
تهموني في حبك
قلبي يعشق للمحاسن
ماتطلعيش فيها ياهانم
وأنا مال ماهي اللي قالتلي
يا أها يا أها قال إيه بتغير من بنتها
يابو الشريط الأحمر
يالابس على السترة نجمة
أهي دي الليالي الحلوة صحيح
بني مصر مكانكمو تهيأ
صابحة الزبدة
عيد وزأطط ياواد أنت وهو
فنا وانتقام غضب ودم
هات ياساقي الحميا
لفيت أنا كل الدنيا
نادرة وحصلت ويايا
ياسلام على طولك

وعلى فكرة كل الأغاني دي ليها تسجيلات بس أنا مش قادر أوصل لها
ياريت لو قدرت تسمعنا أي حاجة منها بصوتك الحلو ده

sayed darwish

30/03/2006, 18h05

الأغنية دى يا اساتذة لها معايا قصة طويلة شويتين .. غنيتها فى حفل الأفتتاح الرئيسى لمكتبة الأسكندرية , كان الأوركسترا ضخم ومن دول كتيرة اوى..المايسترو من النرويج .. بعد الحفل ما انتهى قال لى انه قاعد فى اسكندرية يومين كمان وطلب منى انى اخده و اعرفه على سيد درويش .. وماكانش مصدق انه توفى من 79 سنة .. يعنى كان فاكر ان اللحن ده معمول مخصوص للأفتتاح عام 2002 .. اما هذا التسجيل فهو من مسلسل زمن عماد الدين ايضا .. توزيع عمار الشريعى

mp3تم تحويل الملف الى صيغة
رفع 167 مره قبل التغيير .. أنس

cooldoctor

31/03/2006, 19h03

وأبدأ بلحن من أشد الألحان اللي لحنها خالد الذكر وأبدع فيها عمنا أحمد
سنة 14 في الوقت اللي كان الناس بتعاني من بداية الحرب العالمية وأزمة نقص وغلاء الجاز
كان المطربين بيغنوا للحب والهجر واللوع
وكان سيد درويش بيغني للجاز

استعجبـــــوا يافنديه اللتر الجــــــــاز بروبيه

مابقاله اليوم شنه ورنه واللي بيبيعه له كلمة
ياما ناموا كتير ناس في الضلمه وصبح أغلى م الكولونيه

دا تمن اللتر يساوي صفيحه واللي يطـــوله اليوم بفضيحه
مأمـــــــور القسم يدي نصـــــيحه ماشيــــه قدامه داوريه

مين كان فاكر إن دا يــــجرى حتى الكبريت بقاله ذكرى
وقزازة اللمبه خـــــــدت شهرة بفرنك ونص وشـــــــوية

cooldoctor

31/03/2006, 19h08

نشيد مصرنا وطننا
لحنها سيد درويش خصيصا لأوبريت كليوباترة ومارك أنطوان بس السلطانة شالته
من ساعة ماسمعت اللحن ده أول مرة وبالذات بالأداء الرائع والتوزيع الجبار لعمنا عمار وأنا عينيا بتدمع
وأنا حاسس إن كلكم هتتأثروا زيي لما تسمعوه

مصرنا وطننا سعدها أملنا
كلنا جميعا للوطن ضحية

أجمعت قلوبنا هلالنا وصليبنا
أن تعيش مصر عيشة هنية

عزك حياتنا ذلك مماتنا
يامصر بعدك مالناش سعادة

لولا اعتقادنا في وجود الهناكنا عبدنا النيل عبادة

cooldoctor

31/03/2006, 19h14

لحن عجيب للغاية
عبد الوهاب كان بيقول عن لحن كلمة ياساتر إنه يتمنى تنسب ليه بدل كل مالحنه

مونولوج الشيطان
من رواية البروكة
ألحان سيد درويش
كلمات عبد العزيز أحمد
مقام كرد

كان الشيطان بيعزم يوم على ابن الناس

عايز يجيبله نحس اليوم م الديل للراس

ضرب نفـير في نار السعير أبو مين يطير
جريم عليه يشوفوا إيه وبين إيديه وقفم كده
كان نني عينهم ياساتر بيدق شرار
جه راح باعتهم بأوامر من حاكم النار
نزلم على الأرض جماعة ملو الهوا كله ف ساعة
سموم حسدهم لداعة واخدينها من عين الشيطان
ده ربنا أكبر منهم بعت ملايكة تجننهم
هبطوا من الجنة في إيدهم حظ وغنى ورحمة وغفران
مرضى هي تشفينا فقرا هي تغنينا
اللي مراته شردوحة بتغجر ولا لحوحة
وعاوز يتخلص منها بالعافية تبعده عنها
دي حكاية أزلية ورواية أبدية
واخدها من أخويا وارثها عن أبويا
شوف بختك في مراتك زي أختك وحماتك
قلت لهم عملوها سعادتهم لقيوها

مالناش أبدا غير بروكتنا هي حيلتنا

cooldoctor

31/03/2006, 19h19

سيد درويش بيقلس على الفقيه
وبيتناول الأحداث اللي كانت وقتها من انتهاء الحرب وفتوى عدم تحريم أكل لحم الخيل وأزمة التجار
قمة في الكوميديا وقمة في الأداء يابوجمال

اقرأ ياشيخ قفاعة تلغراف آخر ساعة

اللي في جورنال البورص
وأنا أبقى أحلق ذقني إن ماكنتش ترقص
ترقص ترقص ترقص

الصلح صبح قلسطة والعيشة هتبقى قشطة

ياقساتذة قولم إش
ياقساتذة قولوا براوة دي الحرب خلاص فينيشٌ
فينيشٌ فينيشٌ فينيشٌ

بعد أكل التسقية والسلطة والطعمية

اللي بتهد الحيل
نرقع لنا اقتين ثلاثة من لحم الخيل ارقع
ارقع ارقع ارقع

ومادام الضاني غالي وكذلك العجالي

مش لازم ندقق
حصانا أو حمارا أوبغلا مش راح نعتق قبدا
قبدا قبدا قبدا

ياما بكرة حنبقى نقلّس ع التجار لما تفلس

وزي مانتفلق
يتفلقوا هما كمان واحنا نضحك هقهق
هقهق هقهق هقهق

يالا نقلوظوا العمة ألا مودا ونستحمى

بصفيحة كالونيا
ونسافر على أوروبا نتفرج ع الدنيا
دنيا دنيا دنيا

ستاتها قلماظية ماتقولش مهلبية

قبدا قبدا إيش جاب
قربت أسيح قربت أسخسخ قربت أتكهرب الحق
الحق الحق الحق

سيبك م الفقهنة خالص من بكره هتبقى لابس

بدل العمة كاسكيت

فوزافي قالت ايه كسكليا ياعلي يابتاع الزيت
روميو وجولييت في البيت
قرشت مرشت هرشت قرشت وقالت أقعد

ياحلاوتها فيري جود

cooldoctor

31/03/2006, 19h28

في المرحلة التي اختفى فيها سيد درويش وبعد عن الوسط الفني وظل سيد درويش في عزلته الأسرية حتى صادفه أحد أصدقائه المقربين الذي بادره بالحديث:
أنت فين ياسيد .. الكل بيدور عليك
وهمس في أذنيه:
دي بتدور عليك في كل حتة
فرد عليه سيد في يأس:
قول لها ياسيدي إنه مات واعمل معروف ماتجيبش سيرة لحد أنا فين لحد مايهدى الجو
وشاع خبر وفاة سيد درويش بين محبيه ومعارفه حتى فاض به من عزلته وانطلق من سجانيه هاربا إلى الحرية وفوجئ به أحبابه فعاد إليهم وإلى فنه مشحونا بقدرات فنية خلاقة أذهلت الجميع وذهلت هي لوجوده أمامها بعد أن فقدت الأمل في رجعته .. وبادرته قائلة:
دول قالوا لي أنت مت ياسيد فضحك .. وغنى لها:

ياناس أنا مت في حبي جم الملايكة يحاسبوني
حدش كده قال
أول سؤال سألوني عليه كان السبب في لوم العزال
قلت اللي أحبه الحق عليه خلى اللي عمره ماقالش أهو قال
وبقينا أمثال
قالولي إيه أصل غرامك وليه حبيبك مش وياك
مين دا اللي حلل هجرانك بكيت وقلت العشق هلاك
حدش كده قال
ياعيني ع اللي عشق واحتار وقضى طول عمره في أفكار
ياخدوه قوام م الدار للنار ماينجدوش إلا الستار
حدش كده قال

cooldoctor

31/03/2006, 19h35

طقطوقة خفيف الروح من أجمل مالحن سيد درويش

خفيف الروح بيتعاجب برمش العين والحاجب

غمزلي مرة بعيونه لقيت الحب مضمونه
حرام إن كنت أنا أخونه وعشقي له من الواجب

تملي يحب يشغلني بسهم اللحظ والنني
وأخاف أتقل يخاصمني ويهجرني ويحرمني

خفيف الروح بيتعاجب برمش العين والحاجب

sayed darwish

01/04/2006, 21h25

تنتصر وترتفع
شوفوا الهارمونى يا جماعة

على قد الليل ما يطول

sayed darwish

01/04/2006, 21h48

DOUR YOUM TARAKT EL 7EBB,,,,
دور يوم تركت الحب

sayed darwish

01/04/2006, 22h51

العربجية - تسجيل حى من حفله

ياريت مكان وتاريخ الحفلة ولو فى مناسبة معينة نعرف إيه هى
اخوك رؤوف - الباشا

mp3تم تحويل الملف الى صيغة
رفع 216 مره قبل التغيير .. أنس

sayed darwish

01/04/2006, 23h08

بكرة يا بنتى - حفلة
مطلوب بيانات الحفلة
مكان - تاريخ - مناسبة

mp3تم تحويل الملف الى صيغة
رفع 257 مره قبل التغيير .. أنس

د أنس البن

03/04/2006, 08h15

الله
الله
الله
الله
الله
اللهم صلى على حضرة النبى
ربنا يحميك ويحرسك ويبعد عنك ولاد الحرام يا ابنى
دا إيه الحلاوه والجمال والعذوبه دى . فنان ورب الكعبه ياأستاذ أحمد . والله لما سمعتك بدأت أتفاءل وقلت والله الدنيا لسه بخير وطول عمرك يا مصر ولاده رغم العكاره والعفاشه اللى انتشرت الأيام دى والغثاء الذى هو كغثاء السيل اللى بنسمعه ليل نهار من شوية عيال بيسموا نفسهم فنانين زورا وبهتانا . لكن ارجع وأقول فأما الزبد فيذهب جفاء وأما ماينفع الناس فيمكث فى الأرض.أدعو الله تعالى أن يحفظك أنت ومن هم على شاكلتك

sayed darwish

03/04/2006, 08h57

nafs el7afla ya asatza.........bent elyoum

sayed darwish

09/04/2006, 20h47

إفتتاحية أوبريت شهر زاد (شهو زاد) من حفل بمكتبة الأسكندرية يوم 7-10-2004 فى ذكرى عم سيد .. كلمات بيرم التونسى ..

mp3تم تحويل الملف الى صيغة
رفع 206 مره قبل التغيير .. أنس

Emad Botros

28/02/2012, 01h48

الاستاذ جمال حيشرفنا في New York يوم السبت الجاي ٣ مارس ٢٠١٢. بقالنا مده هنا في الغربه مسمعناش الشيخ سيد. معلومات الحفله هنا: http://alwanforthearts.org/event/827 (http://alwanforthearts.org/event/827)