من سباعيات الجمل

[hany57]

( 1 )
الفقر مش عيب مدام تبقا النفوس عالية
والرزق فى الغيب ومكتوب فى السما العالية
يمكن خالى جيب بكره معاه تلال عالية
مش كل من يوم ركب فرس بقا خيال
ولا كل من يوم كتب قصيد بقا زجال
ولا كل من له شنب يتعد م الرجال
شوفت الرجولة أدب وشهامة مع أخلاق
وصانا سيدنا النبى بمكارم الأخلاق
ولا يزين الرجال إلا كرم لخلاق
واللى ملوش أخلاق نفسه منين تكون عالية

[hany57]

( 2 )
يا خسارة ع اللى ماصانشى ملحنا وعيشنا
ويجيب سيرتنا ولحم كتافه من عيشنا
ودايما ناقصنا علام مهما كتير عشنا
وانا فى الكلام طول عمرى واخد بالى وحسيس
زينة الرجال الأدب وصاحب الأدب دا حسيس
وانا اللى غلطان لنفسى لما افتكرته حسيس
وبإيدى ناولت الخسيس ملحنا وعيشنا

[hany57]

( 3 )
باعتب عليك يا زمن سرقت ليه عمرى
غرتنى ليه بالشباب ضيع سنين عمرى
نسيتنى ليه الحساب لو انتهى عمرى
ياللى عملت المعاصى ماتنساش التوبة
وان رجعت المعصية إردعها بالتوبة
والعبد أيه يغسله من ذنبه غير توبة
ويارب توبة قبل ماينتهى عمرى

[hany57]

( 4 )
يا خسارة ع الصاحب لما تنخدع بقا فيه
من بره شكله ملاك وجوه ابليس فيه
وما كنت أصدق يوم كل العبر دى فيه
أتارينى ياما انخدعت والشكل كان خداع
ظهر لى فى صورة غلط الأصل فيها خداع
وانا كنت على نياتى صيد سهل لأى خداع
ولما وقع القناع بانت الندالة فيه

[hany57]

( 5 )
طول عمرى شايل الحمول ما قولت اّه يانى
أخاف يقولوا عليا كبر وبيعانى
والهم يصعب عليه يفوتنى وحدانى
بسهم كل المصايب الدنيا صابتنى
نشانها جه فى الصميم فى القلب صابتنى
وانا اللى قولت زمان من بعد ماصابتنى
( العين صابتنى ورب العرش نجانى )

[hany57]

( 6 )
اللى زهد فى صداقتك سيبه وشوف غيره
يمكن يكون أحسن لك المشى من غيره
واللى يحبك حبه ماتفضل عليه غيره
واللى اشتراك اشتريه لو ييجى وللا يروح
مدام مخلص معاك افديه ولو بالروح
واللى لمصلحته صاحبك قول له يغور ويروح
واهو ندل ويروح لا يلزم هو ولا غيرة

[hany57]

( 7 )
ناديت أنا ع الحظ يمشى معايا مرضيش
وروحت أقول للمال يزورنى يوم مرضيش
ودورت أنا ع الصاحب دقيت بابه مرضيش
وأنا اللى ياما أخلصت وشيلت معاه فى الهم
ولما شافنى كدا فاتنى وغيرى أهم
إحنا سمعنا مثل عن حالنا ويا الهم
( قال أيه رضينا بالهم والهم بنا مرضيش )

[hany57]

( 8 )
ياللى مشيت بالأصول ما حد يغلط فيك
علشان ماشى بالأدب والأدب دا طبع فيك
وبعيد عن الشر دايما وناسه كلهم تجافيك
الراجل الحر تلاقيه يمشى فى المعدول
ولا يفكر فى يوم يمشى فى البطال
وصاحب العقل دايما فى الكلام معدول
واللى بلا عقل ملهوش إلا فى البطال
واذا خطبت لإبنك اخطب وفى المعقول
وسيبك من اللى كلامهم فاضى وكمان بطال
وطول ماعينك على ابنك دايما هيمشى عدل
والفرع يطلع سليم لأن أصله عدل
زمان سمعنا مثل وكان كلامه عدل
إمشى فى طريقك عدل يحتار عدوك فيك

[hany57]

( 9 )
الشبعة من بعد جوعة إوعاك فى يوم تماشيه
دا مهما يشبع تلاقى الجوع مأثر فيه
مهو كل إنسان كدا أصله يرد عليه
أما الجوعة بعد شبعة ماينسى شبعه فى يوم
دايما بيكرم ضيفه لو حتى كان معدوم
والشبعة من بعد جوعة مايبر نفسه فى يوم
واللى فى يوم يقصده مايرد حتى عليه

[hany57]

( 10 )
قبل ان تحب الجمال شوف قبله جمال الروح
مش كل حلاوة تشوفها وراها حلاوة روح
ماهو أصل طول البكا علمنى طول النوح
مع الجمال الحقيقى قلبك يعيش فى فرح
وتلقا شجر المحبة زهر بسرعة وطرح
وافرز مشاعرك كويس مش كل رقصة فرح
دا الطير بيرقص فرح وبيرقص م الألم مدبوح

[hany57]

( 11 )
حبيبك اللى يحبك حافظ عليه وداديه
لو شوفته مخلص معاك إوعاك تفرط فيه
وازرع له شجر الوداد ومن المحبة ارويه
ودارى على شمعتك تلقاها دايما تقيد
وعشان ماتقضى الحوايج اقضيها بالكتمان
الصبر عند الشدايد ينفع أكيد ويفيد
ولما تطلع سرك منين ييجى الكتمان
وعشرة ع الشجرة خير منهم واحد فى الإيد
واللى يبيعك بيعه واعلنها بدون كتمان
وخلى عملك يوافق نيتك والقصد
واقبل الإعتذار عن فعل من غير قصد
زمان سمعنا مثل منه الحبيب القصد
( الورد مهما دبل يفضل عبيره فيه )

[hany57]

( 12 )
ومين يا عمر من بعدك راح يسمع الموال
ويعشق كلامه المزهر اللى سبق ما اتقال
وكنت عمدة سماع وتبان خلى البال
دى نهاية البشر ونهاية المخاليق
وحكم رب العباد على العباد الموت
لو هو فوق السرير أو ماشى وسط طريق
لا يعرف ساعته امتى ولا أرض فيها يموت
يارب لجل النبى ماتنشف لنا فى يوم ريق
وارحمنا م السكرات اللى تصاحب الموت
ماعدش ليا رفيق فى الموال من بعدك
وازاى يطيب لى السماع فى الدنيا من بعدك
رب السما أعلم بى أشكى إليه بعدك
واتيتموا من بعدك الغنوة والموال

[hany57]

( 13 )
بيع قليل الأصل ولو غرمت عليه
علشان طبعه خسيس مافى حاجة تملا عنيه
يحقد على النعمة وينكر يوم صرفت عليه
ولما تعشق إعشق قمر وجميل
تسعدك منه ابتسامة وقلب لك بيميل
ودور على الأصل ماتصاحبشى إلا أصيل
إبن الأصول لو يميل أصله يرد عليه

[hany57]

( 14 )
بتبكى ليه ع اللى راح بأيه البكا هيفيد
خد منه عبرة وعظة وشوف اللى جى جديد
واستوعب الدرس فى دماغك وعيد فيه وزيد
ومفيش غير اللى فى إيدك يغنيك عن الحاجة
وسيبك بقا من الدين دا أمر من الحاجة
ولو مشيت على قدك ماهيلزمك حاجة
ولو لك حدا الكلب حاجة إوعاك تقول له يا سيد

[hany57]

( 15 )
علشان الدنيا زايلة أكيد طبعا ماتلزمنيش
وواحد أخلاقه مايلة ولو إبنى مايلزمنيش
واللى قلبه مايصفى فى يوم ليا مايلزمنيش
شوفت كتير م الدنيا وبحور الهم عديتهم
وسامحت ناس ظلموا وعمرى فى يوم ما عديتهم
واحد فى الألف هتلاقى لو الحلوين عديتهم
وسيبك من اللى عديتهم قلة ذوق ما يلزمونيش