المسحراتى [الأرشيف] - منتدى سماعي للطرب العربي الأصيل

hany57

06/05/2019, 00h12

( 1 ) عامل اليومية
-----------------
مسحراتى
والقلب خالى
والصحة عندى
دى رأس مالى
شغلى بدراعى
على أكل عيشى
طول يومى ساعى
وفى الليالى
حافظ كرامتى
ودمى حامى
لا أمد إيدى
فى يوم لعمى
ولا لخالى
----
وأى شغل
مهوشى عيب
مدام حلال
أجره يطيب
والرزق قسمة
شربة ونسمة
ولقمة حلوة
وفلوس فى جيب
-----
وبعد شغلى
بعد شقايا
أرجع لبيتى
رزقى معايا
ألقى حبيبتى
فارشة عشايا
أقعد وناكل
أنا والعيال
لقمة هنية
والأشية عال
وأبوس إيديا
والشرب شاى
-----
وان حد جالى
لشغل باكر
من غير ما اعربن
تلاقينى فاكر
م الصبح بدرى
أصحى لشغلى
أجرى بسيط
لا ف يوم أماطل
ولا أقول يا سادة
الشغلة كبرت
واطلب زيادة
قنعان برزقى
واللى حدايا
شكرا يا ربى
لسترك معايا
اصحى يا نايم
يا نايم اصحى
وحد الحنان
اصحى يا نايم
يا نايم اصحى

hany57

06/05/2019, 23h58

( 2 ) الصيادين
--------------
مسحراتى
مجدافى إيدى
والبحر فرشى
وغطا يا سيدى
م الفجر قايم
بفلوكة عايم
واقول نشيدى
-------
وأرمى غزلى
ع المغرمين
غزلى حنين
لكن متين
مفيشى منه
لو حتى فين
غازله بقلبى
ودموع عنيه
ع اللى سابتنى
وروحى هيه
بلطية كانت
ساكنة فى قلبى
سابت شبكتى
والذنب ذنبى
من يومها تاهت
والبحر عالى
وطيفها ساكن
عقلى وخيالى
قلبى ولسانى
نادوا تعالى
أصعب عليكم
لو شوفتوا حالى
ودا مش بإيدى
-----------
ندرن عليا
لو روحى ترجع
ما تشوفوا مرة
عنيا تدمع
وقلبى يرقص
وكمان يغنى
والدنيا أنسى
حتى التمنى
ولا ليا مطمع
---------
كفايا عليا
ترحع لى روحى
وتشفى قلبى
وكل جروحى
واعمل عزومة
لأ قول وليمة
أكل كتير
وحاجة قيمة
مشوى ومقلى
وأهدى نارى
وصيادية
والرز كارى
والكل ياكل
ما فى حد يرجع
اصحى يا نابم
يا نايم اصحى

hany57

07/05/2019, 23h42

( 3 ) أساتذتى
-------------
مسحراتى
ولسه فاكر
لأستاذى فضله
منيشى ناكر
من شرحه أفهم
ويمكن أحفظ
من غير مااذاكر
-----
ألف رحمة
على الجميع
من رب قادر
بصير سميع
لأساتذة ياما
منهم فهمنا
وعلمونا
وسبب لخيرنا
كانوا أساتذة
واّباء كمان
منهم شربنا
حب وحنان
وغاصبك أدبهم
تبقا مطيع
-----
ولما طالب
منا يغيب
أستاذه يسأل
ماجاشى ليه
ولو ما اقتنعشى
منا بجواب
يقابل أبوه
ويقول له ليه
ابنك ماجاشى
ولقيته غاب
إن شا الله خير
سبب الغياب
ولو مريض
بيروح يزوره
مايسيبه إلا
لو بان سروره
ويقول له فاته
فى دروسه أيه
-----
كانوا أساتذة
مفيشى منهم
جاد الزمان
ببعض منهم
شعلة حماس
والعلم زانهم
طول عمرى ياما
اتعلمت منهم
ألف رحمة
ونور عليهم
والفاتحة أوهب
و( يس ) إليهم
يارب اجعل
القبر ليهم
م الجنة روضة
واكرم ماّلهم
اصحى يا نايم
يا نايم اصحى

hany57

08/05/2019, 23h45

( 4 ) جو مصر
-----------------
مسحراتى
وكلامى بلدى
مالقيتشى زيك
أبدا يا بلدى
فى سحر جوك
وحلاوته عندى
-----
يا جو هادى
من نبع صافى
دايما حنين
مانتاشى قاسى
واّدى الطبيعة
جايه توافى
من سحر عطرك
تيجى العوافى
وكأن ربى
خصك بسر
النسمة منك
نفحة وبر
عيان يجيلك
يلقا شفاه
ومايلزموش
أى مشافى
النسمة منك
تنعش فى صيف
والتانية تيجى
وشتاها دافى
-----
مصر يا حلوة
مين بس قدك
الكل غنا
على سحر خدك
واّدى نيلك
من بعض شهدك
وشجر وخضرة
والجو ساحر
لوحة فى الجمال
مالهاشى اّخر
وموجة هادية
وضلة نادية
أنا لك يا ربى
حامد وشاكر
-----
اّدى ( الجواهرى )
جاى م العراق
لسحر جوك
زاده اشتياق
قال فيكى شعر
وصف ووفاء
قال عليكى :
لله درك
دا سحر أيه
يمتلكه جوك
حتى الطبيعة
تيجى لعندك
تقوم تتمصر
ودا صنع ربك
تمشى بكيفك
وبدون رياء
عليك ألف رحمة
باابن العراق
متنبى عصرك
رمز العطاء
اصحى يا نايم
يا نايم اصحى

hany57

09/05/2019, 23h49

( 5 ) النت
------------
مسحراتى
والنت فاصل
فين الحبايب
أيه اللى حاصل
وفيه جديد ؟
طبعا أكيد
لما أقرا ليهم
أكون سعيد
من موضوعاتهم
أنا باستفيد
ولما أقرا ليهم
أرد عليهم
وأحب ردى
يكون تواصل
-----
النت نعمة
وشيئ حنون
أنا قريت
فى كتاب مصون
( ويخلق ما لا تعلمون )
كل النعم دى
صنعة إله
والسر فيها
بين كاف ونون
وأى نعمة
علشان تدوم
يلزمنا نشكر
والرب نذكر
ولا يصيبك
همس الجنون
وتقول طبيعة
أو علم عالم
كله بإذنه
ياللى انت فاهم
والنعمة عارف
إزاى تصون
-----
النت عالم
كبير عجيب
فيه البعيد
تلقاه قريب
تفسير تلاقى
تجويد كمان
سير صحابة
وعبر زمان
وابتهالات
مفيش كدا
يسمعها قلبك
تجلى الصدا
وتروى روحك
بعد الصدى
تلقا موسيقى
ومسلسلات
أغانى قديمة
وفيديوهات
وأشعار جميلة
كتبها شاعر
من قلبه كاتب
ومن المشاعر
اصحى يا نايم
يا نايم اصحى

hany57

10/05/2019, 23h39

( 6 ) النجارين
---------------
مسحراتى
وفاتنى نومى
م الصبح بدرى
أحضن قدومى
أصل النجارة
صنعة وشطارة
دكانتى قلبى
من جوا حارة
عدة بسيطة
منشار وفارة
وشاكوشى جنبى
ودقه نبضى
وأقول يا ربى
عنى فى صومى
-----
أزميلى سنه
للشغل جاهز
واللى يعاملنى
هو اللى فايز
وقلبى أبيض
وخشبى أبيض
بربوب مسحته
وغيرتى تحته
وزانه شغلى
والحب جايز
-----
شباك حبيبى
دا عندى غية
بخشب معشق
ومشربية
ومكان لقلة
تشفى العليل
ميتها سكر
وسلسبيل
وعين تراقب
برموش وحاجب
والقلب دايب
وشكلى الدليل
-----
وباب محبة
م الحب داب
عمره ما يقفل
لو خلى غاب
هافضل أحبه
لو شعرى شاب
برضه أحبه
واغفر له ذنبه
وان فاتنى حبه
فاتنى الصواب
اصحى يا نايم
يا نايم اصحى

hany57

11/05/2019, 23h39

( 7 ) المغرور
--------------
مسحراتى
وبشوقى راجع
أحب ناسى
خلقى التواضع
وأحب أقرا
فى علم نافع
-----
مغرور وشوفته
ويتغر ليه
لا أبص يمه
ولا أناديه
ولا عمرى أسأل
بيعمل أيه
-----
أصل علاجه
من فوق تعامله
وتشوفه دايما
تحرق له دمه
كأنه حشرة
والناس تذمه
-----
يمكن ساعتها
يعقل يفوق
ولما يلقى
دواه يروق
ويعرف انه
كان أصله طين
وربى خلقه
من ماء مهين
ومهما يعلا
فوق السحاب
مسيره يرجع
يوم فى التراب
يرجع لأصله
نهاية لفصله
فى دنيا فانية
وبعدين حساب
-----
دا ملك ربى
والكل ملكه
والكبر توبه
مين فيه يشاركه
طب قول لى انت
مهما عليت
أو اتغنيت
أو افتريت
هتساوى أيه
فى بعض ملكه ؟
اصحى يا نايم
يا نايم اصحى

hany57

13/05/2019, 00h00

( 8 ) النيل
------------
مسحراتى
وبأقول يا ليل
على شط أسمر
ساحر جميل
حلو فى صباحه
حلو فى مساه
عايشين فى خيره
فاتنا أساه
لو منه تشرب
أكيد هترجع
لازم ضرورى
وتقول يا نيل
-----
أسمر سمارة
بلون بلدنا
حلو فى جماله
فى جمال ولادنا
منه شرابنا
ومنه زادنا
طول عمره ماشى
وكمان بيجرى
مايقفشى أبدا
ممكن يهدى
ولو تشوفه
ساعة العصارى
تقول يا روحى
ياما نفسى أدارى
واخبى جمالك
ليحسدوك
واسمى واصلى
لو ينظروك
قالوا عليك
فى كلام قديم
دا مصر هبتك
وانت عظيم
كلام قريته
فى كتب ولادنا
-----
وياما غنوا
أسمر جميل
ونخيل بشطه
وشمس الأصيل
والناى يغنى
وقلوب تميل
مع نسمة حلوة
وهبوب عليل
وصوت لثومة
يقول يا نيل
أقول لك أيه
يا عين يا ليل
اصحى يا نايم
يا نايم اصحى

hany57

13/05/2019, 23h58

( 9 ) الموظف
--------------
مسحراتى
والحمل زاد
راح تعمل أيه
يابو الولاد
اّدى المرتب
واّدى السداد
-----
عايز عليه
خمسة مرتب
عشان السداد
ويدوب يقرب
يامين يشوف لى
طريق ومهرب
ولأمتى بس
التجار هتصبر
على دينى ليهم
وأنا مقدر
اّدى المرتب
فين اللى يعذر ؟
-----
اّدى المرتب
من غير سداد
ممكن يمشى
ودا بالكاد
لخمسة منه
مع السهاد
-----
من بعد خمسة
كله ديون
يا خوانى همسة
فين الحنون
اللى يشيلنا
من الجنون
لو حد تانى
هنا فى مكانى
هيعمل أيه
فى ضغط جانى
وسكر كمان
منه بعانى
غير الظنون
-----
أصل الخلاصة
مفبشى حل
وليه الموظف
كدا بينذل
وأعمل أيه
قول لى يا سيدى
لا رشوة باخد
ولا امد إيدى
عايش بشرفى
وبالأمانة
لكن البطون
أهى جعانة
ولأمتى هاصير
متشوفوا حل
اصحى يا نايم
يا نايم اصحى

hany57

15/05/2019, 00h12

( 10 ) العاشر من رمضان
-----------------------
لزى النهارده
زاد بى الحنين
لذكرى عطرة
ومن سنين
يوافق اكتوبر
فى ستة منه
من عام ألف
وتسعمية
وضيف كمان
تلاتة وسبعين
ربى نصرنا
نصره المبين
-----
عشنا يوم
فوق الزمان
من بعد ما
صابنا الهوان
جاتنا الكرامة
دقت بيبان
-----
لما عبرنا
م الخوف جدار
وحصون منيعة
عز النهار
وكان وعد ربى
الإنتصار
-----
وكان عبورنا
على أساس
علم وخبرة
ودم ناس
روحهم فى ايدهم
حبوا بلدهم
وترابها أغلى
من أى ماس
-----
تدريب كتير
ياما سهروا قادة
وخطط تحرر
ليهم عبادة
وشغل واضح
وفيه مخبى
وتصميم أكيد
على وعد ربى
يا إما نصر
وإما الشهادة
-----
والله أكبر
صيحة أسود
وصوتها أعلى
من البارود
والنصر كان
تاج للزمان
وصفحة تاريخ
بشرف تسود
-----
وكان انتصارنا
وكأنه بدر
بعتاد بسيط
على جيش لغدر
وكان وراه
شيطان كبير
وربى كان
لينا النصير
وراح ظلام
وجانا فجر
-----
يا ذكرى غالية
وتاريخ نضال
كتبه التاريخ
بدم الرجال
بالذكرى نفخر
والسيرة عنبر
ولربى نشكر
تحقيق اّمال
اصحى يا نايم
يا نايم اصحى

hany57

16/05/2019, 00h05

( 11 ) كتاب الشيخ محمد
----------------------
مسحراتى
والله زمان
كنا صغار
عشنا الأمان
فينا شقاوة
وفينا حنان
-----
للشيخ محمد
كتاب كبير
فيه المصاطب
فرشه حصير
سيدنا كان
راجل كفيف
قاعد نضيف
شتا وصيف
ونفسه عالية
علشان عفيف
وتملى صايم
فطاره خفيف
مهوش كتير
-----
ولما ييجى
ميعاد صلاة
يقوم يفوتنا
يروح الصلاة
وكان بيدن
وإمام يصلى
وفى المياتم
يقرا تملى
بصوت جميل
كله خشوع
ممكن تشوف
فى عنيه دموع
خايف الإله
-----
وعريف كمان
لاّخر الهجاية
معانا لوح
ومعاه دوايه
وبعد ما يكتب
يقول : ورايا
اّدى الألف
زى العصاية
وال ( ب ) طبق
من تحته نقطة
ويفضل معانا
لاّخر الهجاية
-----
بعد الهجاية
الحفظ ييجى
وأنتقل
وكأنه عيدى
لسيدنا هاوصل
أحفظ ويشرح
وكمان يفسر
وف طه يمدح
وأحس رحمة
وأحس شوق
وتملى أسرح
وساعات أفوق
وياريتها ترجع
أيام زمان
والشيخ محمد
أبو قلب كان
عامر يا سيدى
اصحى يا نايم
يا نايم اصحى

hany57

17/05/2019, 00h08

( 12 ) صبى القهوة
------------------
مسحراتى
قال أيوا جاى
وشيشة عندك
ومعاها شاى
متيجى ياابنى
على عينى جاى
-----
فيه عندك أيه ؟
فيه عندى سحلب
وقبل منه
يا ألف مرحب
يا أحلى بيه
-----
وينسون تملى
للصوت بيجلى
لا فى بحرى زيه
ولا فى قبلى
يخلى صوتك
صوت نقشبندى
وباقى منه
تلقيمة عندى
أعمل يا بيه ؟
-----
وكركديه
وارد الصعيد
ضغطك يظبط
ودا شيئ أكيد
ويخلى قلبك
زى الحديد
سيدى قولت أيه ؟
-----
وعندى حلبة
حصى جديد
ومهما كان ال
إمساك شديد
كوباية واحدة
أكيد تفيد
أطلب يا بيه ؟
-----
وشاى بفتلة
مخصوص وكشرى
على ميه بيضا
ومنيشى حشرى
سكره بره
يجيب المسرة
ما أجيبه أبدا
لأى افندى
أشر يا بيه ؟
-----
وعندى شيشة
عجمى وحمى
تومباك وورقة
فيه قد كمى
ومبسم جديد
أهو يا عمى
تولع يا بيه ؟
-----
وعندى ساقع
كنز وإزاز
يارب يشرب
معاك العزاز
دا يوم ماترجع
لنا م الحجاز
إن شا الله يا بيه
اصحى يا نايم
يا نايم اصحى

hany57

18/05/2019, 00h01

( 13 ) المولد
--------------
مسحراتى
مدد يا سيدى
الشوق نادانى
شيالله ياسيدى
نظرة يا سيدى
لك واللى زيك
فاتحة يا سيدى
-----
يا سيدى نظرة
الواد بذاكر
على روحه قافل
ولأكله ناكر
سهر ليلاتى
وصحوه باكر
ضهرك يا ست
قدام شويه
هو انتى رايحه
وللا انتى جايه
قافلة الطريق
عاملة لنا ضيق
عدينى بس
وانا ليكى شاكر
-----
اسمع يا حمدى
شيخنا إسماعيل
م السنطة هو
وشاعر جميل
الشعر حافظ
منه الكتير
درس فى الازهر
فى أحلى جيل
حافظ لشوقى
ولإبراهيم
ومعلقات
وكتاب قديم
لألف ليلة
والكل عيلة
وكمان مجود
ذكر الحكيم
قراءات كمان
عشرة وسبعة
حافظ المتون
والشرح تابعه
وراجل فهيم
-----
ياللا يا صبحى
متقولشى بدرى
ورانا مروة
الصبح بدرى
لازم نخلص
قبل الشروق
أحسن تلاقى
الورق حروق
تروح الطماطم
ماتجيب تمنها
ويبقا نابنا
تأجير غيطانها
وتعبى يروح
ما أخدت أجرى
اصحى يا نايم
يا نايم اصحى

hany57

18/05/2019, 23h40

( 14 ) ليالى الغربة
------------------
مسحراتى
رجعت لى روحى
ومنى طابت
خلاص جروحى
من يوم ما قولت
يا غربة روحى
-----
كنت فى غربة
ومضطر ليها
وف قلبى حرقة
وباداريها
وأخاف شماتة
من الرجال
ولما أبقى وحدى
مفيش محال
دموعى تنزل
كما العيال
مشتاق يا روحى
نفسى أجيلك
وانسى همومى
مافى حضن غيرك
الغربة مرة
للى يقاسيها
-----
كتر العيال
دا أحنى ضهرك
ولسه شابة
وعايزة مهرك
يا طاهرة ياللى
العشق طهرك
اّدى ولادك
عايشين فى غربة
وكل واحد
له من كربة
بس المهم
رضاكى انتى
ببسمة منك
تقوى عزيمتى
يا أمى يا غالية
يا حلوة انتى
يا كل أهلى
وزوجتى وخالتى
يا ولد بيلعب
وتحاوره بنتى
والكل حبك
-----
خلاص يا حلوة
يا أحلى أمانى
ما عنت أقول
يا غربة تانى
حبك دا يغنى
عن أى زاد
مهما خايلنى
طيف البعاد
وكفاية نيلك
نهر الوداد
ورمشه لخضر
أبو ميه سكر
لو أى واحد
منه بيشرب
يرجع له تانى
اصحى يا نايم
يا نايم اصحى

hany57

20/05/2019, 00h28

( 15 ) الفلاحين
-----------------
مسحراتى
وسمارى لونها
وكل خيرى
من قلب طينها
أعشق ترابها
واعشق حنانها
-----
دا الأرض غالية
وحته منى
رواها عرقى
ومن قبل منى
أبويا وجدى
وابقوا احكوا عنى
هى حياتنا
وحياتنا ليها
نوهبها عمر
والعمر فيها
وتجود علينا
لما نجيها
ولما أسرح
أنا باناجيها
ولما اروح
أنا فكرى فيها
هى حياتى
وليها أغنى
-----
ولما أمشى
فى وسط زرعى
وأبص ليه
ألاقيه بيفرح
أشيل الغريبة
من قلب منه
واراعيه بشوق
قدامى يطرح
والحب بينا
لغة عيونا
أما الكاّبة
ملهاشى مطرح
وافضل أدادى
وعليه أحافظ
واعمل تقاوى
لجل اما تنجح
فى دورة تانية
بتقاوى بلدى
من أجل ولدى
وبالحب أشرح
واقول يا ولدى
يا أملى وسندى
على اللى خلقك
خلى اعتمادك
ساعتها تعلا
قيمة بلادك
ويبقى قرارها
فى ادين ولادها
واوعا يفوتك
تخلى قوتك
من أرض بلدك
بدل سهادى
وجرح بادى
وييجى يوم
تلقا الأعادى
حواليك تزوم
وكلابها تنبح
اصحى يا نايم
يا نايم اصحى

hany57

21/05/2019, 00h09

( 16 ) المروءة
---------------
مسحراتى
وكنت ماشى
فى الليل أسحر
والجو قاسى
سمعت صوت
يبكى هموت
مرة بيعلا
ومرة فى خفوت
أنا رحت يمه
أشوف اللى همه
وأيه اللى غمه
وتعب لى راسى
-----
لقيت بنية
فى عمر الزمان
رغم الدموع
والحزن بان
تلقى عنيها
ويبان عليها
اّثار قديمة
لعز كان
-----
يا ترى يا بنتى
أيه اللى نابك
وفيكى دبلت
زهرة شبابك
وما حد شافك
وعمل حسابك
وليه بكاها
مابينتهيش
ومين كفيلها
وازاى تعيش
وليه الرجولة
مبتختشيش
ومين يا حلوة
فقدك صوابك
-----
أبص ليها
لقيتها بريئة
قولت يا بنتى
قولى الحقيقة
قالت لى سيبنى
فين حظى هاته
وكل أهلى
فى الخلق ماتوا
قولت لها إسمك ؟
قالت المروءة
اصحى يا نايم
يا نايم اصحى

hany57

22/05/2019, 00h06

( 17 ) الشهر الفضيل
------------------
مسحراتى
صوتى جميل
واخدينها خدمة
جيل بعد جيل
ماشى أغنى
أسحر حبايبى
فى شهرنا
الشهر الفضيل
-----
إذا كان رجب
شهر الإله
وشعبان شهر
رسول الله
وشهرنا
يبقا رمضان
كله فلاح
تقوى وإيمان
فيه المراقبة
تراويح كمان
شهر يساعدنا
على الفضيلة
لأنه منحة
من الإله
-----
شهر جميل
أوله رحمة
من الرحيم
رحمة وسعت
كل شيئ
وبذنب عبد
إزاى تضيق
وأما وسطه
للمغفرة
فيه ذنوب كتيرة
ومتلتلة
يغفرها ربى
هو الغفور
ما فى غيره يقدر
يبدلها نور
واّخره عتق
من النيران
فى رقبتنا نلبس
طوق للأمان
يشاوروا علينا
فى الجنان
ويقولوا
عتقاء الرحمن
اصحى يا نايم
يا نايم اصحى

hany57

22/05/2019, 23h49

( 18 ) طبل المسحراتى
------------------------------
مسحراتى
وأحب طبلى
وعلى رأى عمى
( المشى طاب لى )
ويحلا أكتر
ومعايا طبلى
طبلى دا صاحبى
أشكى له همى
لا مرة صاح بى
وحرق لى دمى
ولا قال لى سيبنى
تعبان يا روحى
عارف اّلامه
ويعرف جروحى
هو دوايا
وأنا طبيبه
زى الحبيب
مراية حبيبه
ما صاحبشى غيرى
فى مرة قبلى
-----
ورق طبلى
مش أى رق
دا من مشاعرى
وف قلبى دق
عليه أطبطب
يطرح غناوى
نغم فى ذاته
للشعر غاوى
والمدح يسمع
فى اللى هيشفع
يشاركنى مدحى
بأجمل إيقاع
ومعاه ألاقى
أجمل سماع
ولو سمعته
فى مرة جنبك
تلاقى صوته
يدخل فى قلبك
ويقول له رق
-----
يا طبل عايش
صاين الوداد
لا شكيت سهرنا
ولا السهاد
عايش وصاحى
مانتاش جماد
وعشان أصيل
عايش معانا
فى سحورنا طايف
وتبات حدانا
ولا يوم هجرت
ولا اشتكيت
ولا نويت
تشوف البعاد

hany57

23/05/2019, 23h30

( 19 ) المساجد
----------------
مسحراتى
وشايف المساجد
فين اللى راكع
فين اللى ساجد
فين اللى قلبه
مليان حنان
فين اللى قلبه
عامر إيمان
فين اللى قلبه
مليان خشوع
وعيونه تاهت
وسط الدموع
فين اللى يقرا
وقاعد يجود
فين اللى صلى
فين اللى سبح
والرب شاهد
-----
فين اللى كان
ييجى بسبح
قبل الاّدان
يقيد الفانوس
نوره حنان
وكان يوشح
بصوت رخيم
ولما تسمع
تعيش فى رحمة
من الرحيم
-----
والقلب يسرح
فى نعم إله
أنعم علينا
نطلب رضاه
بقلب خاشع
وفكر تاه
-----
دلوقتى شوفت
المسجد بيبكى
لما هجره
اللى كان يصلى
كلام وأقول لك
عليه يا خلى
رطب لسانك
بذكره تملى
وصل دايما
على الشفيع
ولكل سننه
خليك مطيع
ولو يا صاحبى
للجنة رايد
ادعى كتير
بقا وانت ساجد
وخلى قلبك
شغله المساجد
اصحى يا نايم
يا نايم اصحى

hany57

24/05/2019, 23h23

( 20 ) الكدب
---------------
مسحراتى
وكلى طيبة
ما أقولشى يوم
بلسانى غيبة
وعمرى ما اكدب
دا الكدب خيبة
-----
عرفت مرة
واحد عاشرته
لا يوم بهته
ولا يوم جرحته
وكنت دايما
أتمنى راحته
واشقى عشان
ألقاه سعيد
وأدارى شمعى
علشان يقيد
لحد مرة
ماشوفت خيبته
لقيته يكدب
وعلشان ايه
بلاش اقول
والستر ليه
أولى وأحسن
وربى أعلم
أخلاقى أيه
-----
الكدب ممكن
يفنى بلاد
وتبقا كلمة
أصل الفساد
وتقوم معارك
بين العباد
بلد بحاله
راح ويا كدبة
وللأسف
احنا ساعدنا
ولا حوشنا عنا
ولا كان بإيدنا
مع انه يبقا
بلدنا احنا
وياما جينا
وياما رحنا
وكان يطيب
لينا جروحنا
ومن عز خيره
ياما فرحنا
جه العدو
ولخيره باد
اصحى يا نايم
يا نايم اصحى

hany57

26/05/2019, 00h06

( 21 ) السنارة
-----------------
مسحراتى
والفكر سارح
عمرى ما افكر
فى لفظ جارح
والصبر مهنة
وأعرف أسامح
-----
وقت ما أفضا
اّخد غدايا
وشاى فى ترمس
وراديو معايا
وسنارة حامية
اصحى يا سامية
غيرك دى راحت
فى البحر تاهت
سنارتى جاهزة
وطعمى كافى
ونفسى اعشم
بجو صافى
وأشوف هنايا
-----
وقصاد بلدنا
على فرع نيلنا
وتحت شجرة
ضل قبالنا
وسنارتى أرمى
وناسى همى
والصبر يصبر
وأنا معاه
فين لما تغمز
سنارتى احس
فيها الحياة
أبعد واقرب
شغلة مجرب
أشد وارخى
لا السمكة تهرب
والسر جوه
وعارفه نيلنا
-----
واما يخلص
وقت العصارى
ألم حاجتى
وارجع لدارى
ألقا حبايبى
بقا فى انتظارى
وحشونى والله
غبت عليهم
هم اللى ليا
وأنا اللى ليهم
ودا شعورى
ومش هادارى
اصحى يا نايم
يا نايم اصحى

hany57

26/05/2019, 23h47

( 22 ) الحدادين
----------------
مسحراتى
وسندانى كتفى
ياما تحمل
هوا وكفى
وعشت عمرى
للصنعة أوفى
-----
والنار قصادى
زهر الربيع
وحديدى قاسى
وفيه المطيع
ومهما يقسى
عمره ما ينسى
دقة شاكوشى
على طول يطيع
-----
صنعة شطارة
ازاى يلين
ليك الحديد
عمرى قضيته
فى دروس معاه
يمكن تفيد
وليه بس خلى
قاسى تملى
وعنى بعيد
ونارى قايدة
ومفيشى فايدة
وكل يوم
شوقى يزيد
فى قلبى حبيبى
مانفعنى حبى
وحبيبى قلبه
أكيد حديد
-----
كات صنعة حلوة
يا مين يقدر
ولما صابها
سهم المقدر
زبونا نسانا
ومافى حد جانا
ولا حد زارنا
ولا حد يعذر
-----
دلوقتى تلقا
بقا كله جاهز
مافى حد يسأل
ولا حد عايز
يعمل له حتة
والفن لفتة
ومين قولوا لى
طول عمره فايز
اصحى يا نايم
يا نايم اصحى

hany57

28/05/2019, 00h32

( 23 ) الحفيد
--------------
مسحراتى
دلوقتى بلعب
مع اللى لعبه
عمره ما يتعب
فى أى حتة
فى الشقة يلعب
-----
مسحراتى
عايش طفولته
عايش شبابه
عايش كهولته
ولعبى أبدا
عمرى ما فته
طول عمرى دايما
أجرى وألعب
-----
كنت زمان
وانا فى صبايا
أصحابى تلعب
ألعب معاهم
أجرى وراهم
يجروا ورايا
ونفوسنا حلوة
نضحك ونلعب
-----
ولما كبرت
المسئولية
اللعب خف
عنى شوية
ولما أرجع
واقعد فى بيتنا
أشوف طريقة
وبرضه ألعب
-----
وربى وهب لى
وجم ولادى
ألعب معاهم
كبروا قصادى
أعلم واربى
أشخط وادادى
ولما كبروا
ودا كان مرادى
كنا بنخطف
كام يوم يا سيدى
ألغى ارتباطى
وأفك قيدى
ومع بعض بس
نقعد ونلعب
-----
أما النهارده
حبى جديد
خلانى اطير
لفوق بعيد
ومخلى قلبى
دايما سعيد
دا حب غالى
فوق فى العلالى
حب الحفيد
ولولا شغلى
لاقعد معاه
اليوم بطوله
ألاغيه ويلعب
اصحى يا نايم
يا نايم اصحى

hany57

28/05/2019, 23h58

( 24 ) السواقين
----------------
مسحراتى
عينى ع الطريق
وعشان مصحصح
خادنى رفيق
شافنى مؤدب
بقيت صديق
-----
على مهلى سايق
وأجرى ليه
ولما أهدى
راح يجرا أيه
خصوصا معايا
حبايب كتار
وعشان خاطرهم
وفيهم كبار
على مهلى أمشى
لاجل الصغار
ينادوا يا عمو
هوا دا أيه ؟
-----
والخلفة حلوة
ياللى داريبى
وانا برضه والله
راضى بنصيبى
واذا ربى شاء
وف يوم أراد
ينعم عليا
بالولاد
راح يبقا دايما
طول يومى عيد
وأسمى سامية
وكمان سعيد
وأدعى لسامية
وسعيد حبيبى
-----
ولما أركب
نقلى التقيل
تلقا يمينى
هو الدليل
وليا سرعة
ما أعديهاش
بدون رادار
مااتخطيهاش
فارد المشمع
وكابينتى تلمع
ولا يوم أسرع
وأروح بلاش
أو اعيش عليل
اصحى يا نايم
يا نايم اصحى

hany57

30/05/2019, 00h25

( 25 ) الليل
---------------
مسحراتى
مصاحبنى ليلى
سكوته صاحبى
سهره خليلى
فى فرحى وبكايا
وأقول فى غنايا
يا عينى يا ليلى
-----
يا ليل يا ساكن
يابو شعر داكن
ترخيه علينا
تنام الأماكن
ولما تتعب
فى الصبح بدرى
وتروح تنام
ويجينا فجرى
تروح وتيجى
تانى فى ميعادك
ولا حد يعرف
سبب سهادك
قالوا عليك
أبو الغلابة
من غير قراية
ومن غير كتابة
موال سمعته
ياما من زمان
من شيخ يليل
وبعود كمان
يا ليل يا ليل
يابو الغلابة
يا ليل يا ليل
ميت صبابة
يا ليل يا ليل
وحشونى يابا
يا ليل يا ليل
والدنيا غابة
يا ليل يا ليل
يابو الغلابة
يا ليل يا ليل
يا جميل ولكن
قالوا فيك نحرس
من غدر ساكن
والغدر دا
من بعض ناس
والطبع فيهم
هو الأساس
يبقا لا ذنبك
ولا عيبة فيك
واحد يحبك
غيره يعاديك
وواحد فى حضنك
على جنبه راكن
اصحى يا نايم
يا نايم اصحى

hany57

31/05/2019, 00h30

( 26 ) أغانى الصباح
------------------------
مسحراتى
مزاجى عال
ماشى أسحر
والكل قال
سمعنا غنوة
نغمتها حلوة
يابو الفنون
يا مسحراتى
وكل ليلة
غنوة جديدة
فيها النهاية
دايما سعيدة
وأغنى ليهم
وأنده عليهم
قوموا للسحور
صحوا العيال
-----
بعد أما اسحر
أروح يا شاطر
اّخد سحورى
وأصلى حاضر
وأقرالى ساعة
فى ذكر الحكيم
وأدعى ربى
ستره يديم
وبعد ساعة
اشوف الإذاعة
لما يشقشق
نور الصباح
والناس بتصحا
كله يصبح
فايزة تغنى
اّه يا نسيم
الفجر صبح
وقنديل يدندن
يا حلو صبح
ولو انت قاعد
فى يوم حدانا
تسمع لثومة
فى الراديو جانا
يا صباح الخير
يا للى معانا
والصبح طبعا
نعمة إله
ونجاح سلام
غنت شذاه
صبح الصباح
الصباح ما حلاه
-----
وقنديل يجينا
من تانى بدرى
واسمع جماله
فى الصبح بدرى
والنيل بيجرى
والزرع باسم
اصحى يا صايم
كانت أغانى
فيها انشراح
أسمعها دايما
ساعة الصباح
أفضل أغنى
وانسى اللى راح
وانسى اللى فاتنى
وفات جراح
ما عمل لى خاطر
اصحى يا نايم
يا نايم اصحى

hany57

01/06/2019, 00h04

(27 ) ليلة القدر
----------------
مسحراتى
وجاى فى ليلة
فى العمر كله
دى أحلى ليلة
بس نصادفها
وتبقا ليلة
أدعى كتير
إله قدير
وذنوبى أعدد
عنها أتوب
وربى يغفر
ليا الذنوب
ويبقا عمرى
فى الصبح ليلة
-----
يا ليلة غالية
تيجى فى عشر
أواخر منه
وتكون فى وتر
ليلة لوحدك
فيكى العبادة
والطاعة دايما
يبقوا زيادة
وعند ربى
هيبقوا خير
من العبادة
فى ألف شهر
-----
رايقة نجومك
دايما بتلمع
وسماكى صافية
وملايكة تسمع
قراّن يرتل
فى القبر يشفع
فيكى القيام
فيكى الصلاة
والكل راجى
رحمة إله
رافعين ادينا
طالبين نجاة
وحده إلهى
مافى سواه
ونقول يا رب
انت العليم
أذنبنا أيوه
وانت الرحيم
وعيون كتيرة
م الخوف بتدمع
اصحى يا نايم
يا نايم اصحى

hany57

02/06/2019, 01h45

( 28 ) الموبايل
----------------
مسحراتى
وباقول ألو
لو فيه كلام
يفيد ياهوه
أو فيه مباركة
أو فيه تهانى
أو فيه تعازى
أو لو يعانى
واحد مريض
عنا بعيد
وعليه بنسأل
ونقول ألو
ماتبقاشى شغلة
طول النهار
والليل بطوله
بنقول ألو
-----
شايل معاك
موبايل فى إيدك
دى نعمة والله
كتير تفيدك
خليه لوقته
عند الضرورة
لو شيئ مهم
محتاج مشورة
وفلوس بتدفع
وتروح عليك
فى كلام ورغى
طب أيه يفيدك
-----
يا صاحب الموبايل
خف الكلام
دا مش تسالى
ولا للحرام
ولا للمعاكسة
ولا للغرام
ولا ساقية دايرة
من غير نظام
شايفك بتشحن
بفلوس كتير
زى اللى عنده
مال كتير
راح اشترابه
كله حمام
وجه وطلقه
طار الحمام
اصحى يا نايم
يانايم اصحى

hany57

03/06/2019, 00h50

( 29 ) تسابيح والثورة
-----------------------
مسحراتى
وقلبى دايب
اّجى ليلاتى
لكل الحبايب
اّجى للى حاضر
وابن اللى غايب
واّجى ماشى
مفيش ركايب
وقلبى يسبقنى للمكان
وطبلتى طبلة الحنان
زى اللى وقفوا
فى الميدان
بيحبوا مصر
وقلبى عليهم
والعمر ابيعه
وأشتريهم
والرب يعلم
أيه اللى بيهم
عايزينها حرة
مصر الأمان
وخيرها يبقا
جوه البيبان
لو زرعوا عود
أخضر يبان
عايزينها رمز
فى قلب العروبة
يكمل بناها
مش ناقصة طوبة
واللى سرقها
يقول دى توبة
عايزينها وردة
تفوح عبير
كبيرها يعطف
على الصغير
وصغيرها
يحترم الكبير
والكل إخوة
وعنده نخوة
عايزينها سلطة
فى ايدين ولادها
اليوم فى ايده
وبكره سابها
وييجى اخوه
بالانتخاب
والكل يحضر
مفيش غياب
تزوير مفيش
ولا بلطجة
ديمقراطية
لاّخر مدى
ومفيشى منع
لصوت أو صدى
عايزينها حلوة
زى الأمانى
ونبض قلبى
هو الأغانى
عروسة عايقة
ومتوهانى
بتقول باحبك
يا معجبانى
عروستى حلوة
ومن زمان
عنيها ليا
شطين حنان
وعقلى ليها
ترباس أمان
أخاف عليها
من أى نسمة
لو فيه مشقة
فى عمل وشقة
متشوفشى منى
غير أحلى بسمة
خلاص دى هانت
والشدة زالت
والفجر شقشق
والطير يزقزق
فرحان سعيد
بتاريخ جديد
والكل يلقا
حياة كريمة
ويلقا فسحة
مسرح وسيما
وشباب يلاقى
فى ايده المهور
يعيش حياته
بدل اللى فاته
ينسى اّهاته
عاشها دهور
وبدل بطالة
لكل عاطل
ومفيش بطانة
تقعد تماطل
دى صحوة حلوة
وماتخافيش
ومصر باقية
ماتنتهيش
دى مصر أقوى
من أى ريح
وماتخافيشى
يا تسابيح
اصحى يا نايم
يا نايم اصحى

hany57

03/06/2019, 23h20

( 30 ) ليلة العيد
------------------
مسحراتى
وكنت ليلاتى
اّجى أسحر
أطوف عليكم
وأغنى ليكم
والكل يسهر
قوام وعدى
رمضان يا خلى
وديا عادته
كدا تملى
يفوت بسرعة
كدا خفيف
قدامنا يمشى
كأنه طيف
ندعى بإيمان
يارب
بلغنا رمضان
نتمنى دوامه
وعلى صيامه
ربى يقدر
-----
بعد وداع
شهر الصيام
وربى يسر
لينا القيام
يارب كتر
لينا الثواب
خفف علينا
ساعة الحساب
يارب ارحم
فى يوم مقدر
-----
واليوم دا وقفة
وبعده عيد
والله زمان
يا أحلى عيد
ما شوفنا روحك
حلوة تطل
وسعادة منك
دايما تهل
بقالى فترة
شايفك حزين
طب فين زمان
زاد بى الحنين
للعبة حلوة
وأشتريها
ومرجيحة ترقص
وأعلا بيها
وأخويا واختى
وحمدى ابن خالتى
ومعانا فهمى
وبنت عمى
ونبقا لمة
فى البيت حدانا
وسامية جايا
تعيد معانا
وكنا نخرج
معانا العيدية
نجرى ونلعب
واللعب غية
ونقع ونجرى
والرب يستر
اصحى يا نايم
يا نايم اصحى