تغنوا معايا ؟ . ( متجدد )

[hany57]

تغنوا معايا ؟
الإخوة والأخوات
السلام عليكم ورحمة الله وبركاته
أيه رأيكم أحاول أكتب وبعدين نغنى سوا
نبدأ إن شاء الله

[hany57]

( 1 )
تفتكر أرجع أحبك
--------------------

تفتكر أرجع أحبك .. بعد كل ما شفت منك
وللا قلبى وكنت نبضه .. ييجى يوم ينطق بإسمك
افتكر واقعد وفكر .. جرب النسيان هتقدر
إنما يرجع زمانى .. تانى ويغطيك حنانى
إوعا دا يخطر بفكرك

افتكر لما اتقابلنا .. لما ضميتنى بعنيك
يومها ملكتك مشاعرى .. سيبت روحى بين إيديك
كنت فاكرة انك حبيبى .. كنت بجوارحى بحبك
قلت ما فى واحدة غيرى .. تيجى يوم تشاركنى قلبك
شفت غدرك بعدها .. وواحدة تانية تقول لها
اللى ياما قولتهولى .. وكل يوم سمعتهولى
افتكر واقعد وفكر .. جرب النسيان هتقدر
إنما يرجع زمانى .. تانى ويغطيك حنانى
إوعا دا يخطر بفكرك

بعها لما افترقنا .. بعد انا ما شفت غدرك
قلت راح ترجع لى تانى .. كنت ناوية كمان أسامحك
كان شعورى بين وبين
كان غالبنى لك حنين
قلت برضو بينا عشرة
وحب كان عمره سنين
قلبى قال لى اصبر عليك .. نزوة ومسيرها تروح
والزمن ممكن يداوى .. فى القلوب ياما جروح
التقيتك زى ماانت .. مافى حاجة اتغيرت
تفتكر أرجع احبك ؟ .. مشاعرى فيك اتحيرت
افتكر واقعد وفكر .. جرب النسيان هتقدر
إنما يرجع زمانى .. تانى ويغطيك حنانى
إوعا دا يخطر بفكرك

بعده جيت تعتذر .. قلت نبدأ من جديد
وقلت ما أقدرش انتظر .. يوم تكونى عنى بعيد
أنا قلت دا اتغير خلاص .. وللا يعنى جى ليه ؟
حن للحب القديم .. والنعيم اللى ماليه
فتحت له صفحة جديدة .. من وراه ناديت عليه
قام نادانى بإسم تانى .. ما دريت ساعتها باعمل أيه
لسه خاين زى ما انت
راح ما بينا بيدك انت
مستحيل أرجع لحبك
حب أيه دا الغدر انت
افتكر واقعد وفكر .. جرب النسيان هتقدر
إنما يرجع زمانى .. تانى ويغطيك حنانى
إوعا دا يخطر بفكرك

-----------------------------------

هانئ الجمل

[hany57]

( 2 )
فيه حاجة بينّا اتغيّرت
----------------------
جى ليه كل السنين الحلوة راحِتْ وانقضِتْ
هتقول ايه وفر كلامك فيه حاجة بينا اتغيرت

بعد ما نسيتنى فرْحى
بعد ما سببت جرحى
وسِبْت لى وحدى الدموع
ويا نار جوّا الضلوع
دلوقتى جاى ناوى الرجوع
ما أقدرشى أبدا
ما أقدرشى أبدا
فيه حاجة بينا اتغيرت
----------------------

فاكر زمان كنا أنا وانت سوا
نبعين حنان قصة بيعشقها الهوى

كان قلبى يجرى ويبتسم لما يشوفك
وعنيا روحها تتبعك ونورها طيفك
والفرحة بينا تتقسم ساعة لقانا
والنظرة منى تسعدك يا روح وليفك

وما كنت احس الفرحة إلا وانت جنبى
وكفاية إسمك يبقا غنوة يقولها قلبى
وبعدها جيت مرة واحدة وفتنى
لا عملت حاجة ولا انت حتى عاتبتنى
وسِبْت لى وحدى الدموع
ويا نار جوّا الضلوع
دلوقتى جاى ناوى الرجوع
ما أقدرشى أبدا
ما أقدرشى أبدا
فيه حاجة بينا اتغيرت
----------------------

قلت الحنين بكرة يجيبك تعتذر
فاتت سنين وفضلت ياما أنتظر

وكل لحظة ألقا فيها قلبى داب
ليله طويل وفـ إيده كاسات العذاب
وعنيا تمسح دمعها بدموع جديدة
وقلبى يسأل ليه حبيبى عنى غاب

لو كنت جيت يمكن ساعتها كنت اسامحك
وغيابك انسى بكل تعبه كمان أصالحك
وارجع بشوقى زى يوم ما قابلتنى
ولا كنت هسأل ليه حبيبى فتنى
وسِبْت لى وحدى الدموع
ويا نار جوّا الضلوع
دلوقتى جاى ناوى الرجوع
ما أقدرشى أبدا
ما أقدرشى أبدا
فيه حاجة بينا اتغيرت
----------------------

دلوقتى قول لى جى ليه وبعد أيه
جى تشوف القلب اللى قسيت عليه

ما خلاص بقا الدمعة نشفت من زمان
سيبنا الشقا ونسينا أيام الهوان
والقلب حالف باللى شافه من قساوتك
ما عاد يقول لك أى يوم كلمة حنان

تيجى تروح مبقاشى فاضل أى حاجة تهمنا
لا فرح دايم فى الحياة وبرضه زايل حزننا
ومسيرى هنسى يوم كمان ما قابلتنى
وانسى كمان فى عز فرحى تركتنى
وسِبْت لى وحدى الدموع
ويا نار جوّا الضلوع
دلوقتى جاى ناوى الرجوع
ما أقدرشى أبدا
ما أقدرشى أبدا
فيه حاجة بينا اتغيرت
----------------------

هانئ الجمل

[فاضل كانار]

ماقدرشى ابدا ماقدرشى ابدا ربما مختلة الوزن قليلا . والافضل شئ مثل:
لأ مستحيل .. لأ مستحيل.. فيه حاجة بيننه اتغيرت..
لكن شعر بديع جدا

[احمد محمد مصطفي]

بارك الله فيك

[hany57]

واحشنى
------------------------
ياما نفسى حبيبى أقولهالك واحشنى
بس لما باشوفك ايه بيجرالى أيه
تلقا قلبى يطير عليك وحدى يسيبنى
واللسان ينسى الكلام والنطق ليه
آه حبيبى لو ايديك لمست ايديا
أنسى كل الدنيا أنسى ازاى وليه
ما انت فى غيابك واحشنى
وف وجودك شيئ يحوشنى
إنى أقولهالك واحشنى

إوعا تانى تغيب حبيبى تفوتنى وحدى
لو تغيب قلبى عليك قلقان وخايف
فى الغياب سيرتك دى أحلى حاجة عندى
قلبى يحيا ان جيبت سيرتك وانت عارف
يبقا اسمك نبض ليه يشهد بحبه
وياه تقوله وتعزفه منى الشفايف
ما انت فى غيابك واحشنى
وف وجودك شيئ يحوشنى
إنى أقولهالك واحشنى

يا حبيبى بسرعة ياللا قوام تعالا
عينى واحشاها تشوف نظرة عنيك
والهيام فى الحب مش محتاج قواله
نفسى اشوفك ياللى قلبى بيناديك
لو تحس بقلبى راح تعطف وتيجى
قد أيه هتشوفه بيفكرنى بيك
ما انت فى غيابك واحشنى
وف وجودك شيئ يحوشنى
إنى أقولهالك واحشنى

شوف حبيبى لما جيت روحى زارتنى
لما تبعد تبقا روحى تايهة منى
نفسى تقعد أو تاخدنى معاك ياريتنى
أبقا طيفك أبقا لحنك لو تغنى
ياما نفسى يا روحى اكون انا حتة منك
وقتها ارتاح ويهدى منى ظنى
ما انت فى غيابك واحشنى
وف وجودك شيئ يحوشنى
إنى أقولهالك واحشنى

--------------------------------------

هانئ الجمل

[ابو الحسن 7]

ممتاز لكن تحتاج الى كثير من الاتقان والصقل
اتمنالك مستقبل باهر
تحياتي ...

[hany57]

ضحكت عليا
( أصل الغنا شعبى )
--------------------
ضحكت عليا بالقوى
مع انى مش طيب قوى
ضحكت كتير .. كتير كتير
كتير كتير .. كتير قوى

اسمع وشوف اللى جرى
من غير عتاب ولا نأورة
العبرة خدها مقشرة
وهتستفيد كتير قوى

الحب دا ما خطر لى يوم
عايش لوحدى بدون هموم
حياة جميلة ياريت تدوم
والحب دا يبعد قوى

كان ليا جارة فى سكتى
ازاى دى عرفت نمرتى
تليفونى رن فى فتحتى
سمعت صوت بكا بالقوى

حاولت أعرف منها
سبب بكاها وحزنها
شكت لى قلة بختها
وقالت لى حظى قليل قوى

قلت لها اهدى الدنيا ليل
قدامنا صابح يوم طويل
مفيشى شيئ بقا مستحيل
والحل بكره نشوفه قوى

قابلتنى اخر غندرة
والوش واخداه سنفرة
متزوقة ومتعطرة
ملامحها تضحك بالقوى

قلت لها احكى حكايتك ايه
قالت لى حزن وساكنه فيه
حزنى منيش جديدة عليه
ليا معاه كتير قوى

تقول كلام وكتير تعيد
ماسمعت منها قول مفيد
قلت ياواد مهوش بعيد
يمكن بتحبك بالقوى

شكلى عامل باسمع لها
عايز أشوف أنا صدقها
وصرحت لى بحبها
أما أنا تقلان قوى

وسيبتها وروحت أنا
قلت ياواد بلا عكننة
الحب دا يتعبنى أنا
وأنا اعز راحتى بالقوى

قلت خلاص نفض لها
رنت كتير طنشتها
بعتت رسالة فتحتها
يا سيدى انا احبك بالقوى

قلت ولو مش سكتى
أحافظ أنا على سمعتى
جات لى تقول لى يا دهوتى
شايفنى تلقيحة بالقوى

طلبى بسيط مش هاتعبك
علشان أنا اتعلقت بك
لما أرن وأطلبك
بلاش طناش كدا بالقوى

وقالت لى خليها تليفونات
وافقتها وردى السكات
وتتصل ياما ساعات
تحكى حاجات هايفة قوى

وانا ردى كلمة واحدة اه
ولما اغير تبقا إيه
ما سألتها فى مرة ليه
تحكى بكلام واضح قوى

وتقول لى عايز وزنى كام
باعمل ريجيم هابقا تمام
ولما أوصل للمرام
ساعتها أبقا طعمة قوى

كانت تقول وما تختشيش
وتقول لى ليه متحبنيش
ورغم انك متحبنيش
بس انا بحبك بالقوى

وتقول لى لابسة شفتشى
اسمع حاجات منها اختشى
لحد ماصوابى مشى
وسايرتها ومش بالقوى

وجيت فى يوم وطلبتها
ردت وانا كلمتها
عايز أقابلك قلتها
قالت لى انسى دا بالقوى

فكرتها بكلامها كان
قالت لى دا أصله زمان
نزوة وراحت وكان وكان
وانا طبعى احب اجدد قوى

وبعدها بس بيومين
لمحتها مع واد تخين
على خدها كمان دمعتين
ودا صيد جديد سهل قوى

إحذر يا واد صنف النسا
مفيشى نية كويسة
كيدهم لوحده مدرسة
أساتذة فى الكيد بالقوى

تقرب لوحده تبهدلك
لو ملت يوم ما هتعدلك
انفد بجلدك قلت لك
واجرى بسرعة وبالقوى

----------------------

هانئ الجمل