مشاهدة النسخة كاملة : من قصص الأنبياء
بسم الله الرحمن الرحيم
( نحن نقص عليك أحسن القصص بما اوحينا إليك هذا القرآن )
صدق الله العظم
-----------------------
باختصار إخوتى الكرام إن شاء الله ( إن كان فى العمر بقية )
مع مطلع كل شهر عربى ومن وحى القرآن الكريم نحكى قصة من قصص الأنبياء
فى قوالب زجلية منوعة بين الرباعى والخماسى والسداسى والسباعى
وأحيانا فى شكل سهرة على الربابة أو الإنشاد الدينى
وربما كانت القصة صغيرة فتأخذ شكل الموال
وحتى لا أطيل عليكم نبدأ على بركة الله
والله من وراء القصد
( 1 )
سيدنا آدم عليه السلام
--------------------------
ألفين صلا وسلام على حبيب الله
جانا بالإسلام والخير وشرع الله
وجانا بالقرآن من وحيه راح نحكى
قصص كتير أنبيا منهم رسل لله
قبل بداية الخلق كان الإله وحده
أول ملوشى بداية سبحانة في مجده
ولما أراد للأرض تعمر وتتملي خلق
خلق آدم وجعله خليفته فى أرضه
قالت الملايكة يارب احنا لك نعبد
أما البشر فى الأرض يارب راح يفسد
وربى هوا العليم ماحد يدرك علمه
يعلم الغيب وحده وما حد عليه يشهد
وربى أمر الجميع كل اللى كانوا واقفين
بعد ماسوى آدم وخلقه يا ناس من طين
ونفخ فيه من روحه ودبت فيه الحياة
كل الجموع اللى حاضرة يقعوا لآدم ساجدين
طبعا سجود تكريم مهوش سجود عبادة
لأن ربى وحده له سجود العبادة
كل الملايكة سجدوا إلا اللعين إبليس
رفض السجود لآدم وعصى وبزيادة
ولما انسأل من ربى ليه كان العصيان
عن السجود لآدم غروره لبسه كمان
وقال أنا خير منه مخلوق انا من نار
أما آدم من طين والطين دا شيئ منهان
ربى غضب عليه وطرده من جنته
وكمان جزاء عصيانه طرده من رحمته
قام قال ( رب أنظرنى ) ربى أجابه لطلبه
لحكمة يعلمها ربى ومين عرف حكمته
إبليس وقتها أقسم بعزة المعبود
يوسوس لولاد آدم لجل الخطيئة تسود
وربى وعده النار هوا واتباعه
إلا إذا العبد تاب وكان لربه يعود
وربى يسأل آدم فى الجنة عن حاجات
عشان يقول أسماءها ويقول آدم اجابات
أما الملايكة كانوا واقفين ومش عارفين
سبحانه من علمه والعلم مالو نهايات
جنة طويلة عريضة لوحده فيها آدم
وربى خلق حوا من ضلع من آدم
شافها آدم حبها شكا للملايكة الحب
قالواله راح تكون لك زوجة يا آدم
والمهر لازم تدفع هدية لها بالذات
صلى بقا ع النبى يا آدم تلت صلوات
صلى آدم ع النبى وحوا بقت زوجته
ودا أساس المهور فى جواز لأى بنات
ووسوس لهم إبليس ( وان صفا العدو يغور )
وقال لهم فيه شجرة السر فيها مستور
تخلى اللى ياكل منها يخلد ما يوصله موت
هيا ديا الشجرة ودلهم بغرور
ولما أكلوا منها بانت السوءات
وعرفوا ان الفعل دا من السيئات
وجابوا ورق م الجنة يداروا به حالهم
وسمعوا لوم الإله تذكير بنهى فات
ونزل آدم مع حوا م الجنة مطرودين
على الخطيئة بيبكى سنين قالوا سبعين
وتاب عليه ربنا وتلقى آدم كلمات
وربى تواب رحيم يرحمنا يوم الدين
ونزل آدم م الجنة يقال لأرض الهند
ومنه جات ذرية علشان تعمر أرض
منهم جات أنبيا ورسل كتير ياما
يبينوا للناس الحق فين والفرض
كدا بدأنا بآدم أبو البشر ياخوان
أخطأ ولما تاب تاب عليه الحنان
قصة فيها العظة ياللى انت جيت وقريت
أمانة بقا تدعيلى بالرحمة والغفران
---------------------------------
هانئ الجمل
( 2 )
إدريس عليه السلام
--------------
( موال )
--------------
يارب ياللى مفيش غيرك إله معبود
ارزقنا حبك يارب إليك نتوب ونعود
وارزقنا الصلا ع النبى وشفاعته فى يوم مشهود
إخوانا نحكى اليوم من وحى قرآن مبين
قصة النبى إدريس ودا اسم عربى مبين
وفى العبرية خنوخ والترجمة اخنوخ
أول من خط بقلم من البشر مولود
فى شرح ابن كتير فيه بعض م الدراس
قالوا النبى ادريس هوا النبى الياس
واول من خط الرمل والعلم دا له أساس
عرف علوم الفلك وكمان ميعاد النجوم
وكمان علوم الطب وكتير ياما علوم
أنعم عليه بالعلم الواحد القيوم
والعلم يرفع صاحبه دايما ما بين الناس
نقرا فى بعض الكتب ادريس دا كان فى العراق
عند الفرات مع دجلة ربك كريم رزاق
دعا ادريس فى قومه عصيوه كتير ياما
قام وقال للى تبعه هنمشى فى سلامة
ونسيب لهم الأرض هجرتنا ربى شاء
قالوا هنسيب بابل ونروح بقا على فين
هنمشى بقا من هنا ونلاقى زيه فين
قام قال لهم ربنا يرزقنا بقا غيره
ولما وصلوا لمصر شافوا نيلها شافوا خيره
قاموا قالوا له خلاص قعادنا هنا مضمون
رد ادريس قال لهم شفتوا بقا بابليون
وقعد ادريس وسطهم يؤمرهم بالمعروف
ولهم صيام كل شهر كام يوم اكيد معروف
شدد كمان ع الصلا ونها قوى عن السكر
ووضح زكاة وطهارة بكلام جميل معروف
وربى أخبر عنه انه نبى وصديق
رفعه لرابع سما وكلامنا دا بتحقيق
كدا نهاية القصة ياللى قريت بسلام
أمانة بقا تدعيلى أموت على الإسلام
أما الصراط أعبره وامشى عليه بسلام
وننعم برحمة ربى فى يوم إليه هنعود
-----------------------------
هانئ الجمل
( 3 )
قصة سيدنا نوح عليه السلام
--------------
( على الربابة )
--------------
عليه الصلاة عليه السلام .. محمد حبيبى الرسول الأمين
رسول الهداية رسول السلام .. وأثلج صدورنا بقرآن مبين
من وحيه نحكى يا سادة كرام .. حكاية نبى وأول المرسلين
من بعد آدم وادريس تمام .. نوح ربى بعته لقوم كافرين
أولى العزم منهم مفيشى كلام .. عليه الصلاة عليه السلام
نوح ربى بعته لقوم كافرين .. قالوا دا فقير مين يحسب حسابه
وبيقول جى يبلغنا دين .. طب هوا فين المتاع اللى جابه
واللى معاه دول ناس تافهين .. لازم يطردهم ويلزم صوابه
وقال لو طردت نصيرى دا مين .. إذا ربى أنزل عليا عقابه
لا منكم طلبت فلوس أو إدام .. عايزكم تآمنوا وتلتزموا بابه
وكان قصده يخرجهم م الظلام .. عليه الصلاة عليه السلام
قال الناظم يا سادة يا كرام .... صلوا على خير الأنام .... عندما أرسل الله نوح إلى القوم الكافرين ....
ليدعوهم إلى عبادة الله وإلى صحصح الدين .... كدبوه وقالوا دا فقير .... واحنا عندنا أموال كتير ....
واشمعنا هوا اللى يكون رسول من بينا .... واحنا فينا اللى أحسن منه .... ولازم يطرد التافهين اللى مشوا وياه ....
قال ما أقدرشى لأنى لو طردتهم مين يحوش عنى عذاب الله .... وكل ما يدعيهم يزيدوا فى الإعراض ....
وقالوا له هات العذاب اللى ربك بنا أراد.... كل دا ويزيدوا فى الجدل .... لما انقطع منهم الأمل ....
نوح قعد يدعى الكريم .... صلوا على شفيعنا فى اليوم العظيم
صلوا على طه يا اخوان .. حبوه هوا والديان
حبهم دا تمام إيمان .. ويوم القيامة تنجو من النار
نوح لسه ماشى بيدعى فى قومه .. سنين طويله ما ظهر لومه
وقال لهم ليه تعبدوا دونه .. واستغفروه هوا الغفار
تستغفروا تلقوا البركات .. أموال كتيرة معاها خيرات
ويرزقكم ببنين وبنات .. والمطر ينزل مدرار
وربى يرزقكم جنات .. تلاقوا فيها كل نبات
للميه ما تعملوا حسابات .. ربى هيجعل فيها أنهار
اتعظوا من أقوام سبقوكم .. على فين غروركم هيوديكم
اسمعونى انا ناصح ليكم .. وربى خالقكم أطوار
قالوا له عمرنا لك ما نآمن .. ولا يوم معاك مرة هنهادن
متجيب عذاب ربك لو ماكن.. وللا هوا كلام وهزار
لو كنت صادق هاته صحيح .. عذاب واضح وبشكل صريح
قعادك معانا معدشى مريح .. واللى معاك هلافيت وصغار
قال الناظم يا سادة .... الصلاة على النبى سر السعادة .... لما نوح يأس من قومه خلاص ....
وملقاشى منهم أي إخلاص .... دعا عليهم .... ان ربنا ما يخليهم .... وقال : ( ربى لا تذر
على الأرض من الكافرين ديارا . إنك إن تذرهم يضلوا عبادك ولا يلدوا إلا فاجرا كفارا ) ....
ربنا استجاب لدعاه .... وجاله الأمر من مولاه .... يصنع الفلك بوحى الإله .. ويركبه هوا واللى آمنوا معاه ....
لأن الباقى هيموت غريق .... ويوم القيامة لهم عذاب الحريق .... وكانت أبعاد المركب يا إخوة السماع ....
الطول 300 دراع والعرض 50 دراع .... وكمان 30 للإرتفاع .... وقومه يفوتوا عليه يسخروا منه ....
وهوا برضه يسخر منهم أنه .... شايف غفلتهم .. وانشغالهم بدنيتهم .... ونسيوا الحساب .... ولابد
هيشوفوا العقاب .... وأنا وأنتم نصلى على من جاء بالحق وخير كتاب
على النبى .. صلوا عليه دا سيدى
سيدنا النبى .. صلوا عليه يا حبايب
نوح بقا يأس .. من كفر قومه وابتأس
ودعا فى غسق .. ياخدوا العذاب المناسب
يارب خدهم .. على الأرض ما تخلى منهم
حتى خلفهم .. بيجى كافر وعايب
وربى أمره .. للفلك ينهض يصنعه
ويوسعه .. للمؤمن حاضر وغايب
وعليه يفوتوا .. يقوموا منه يسخروا
ويضحكوا .. عايشين فى غفلة زكايب
لما السفينة .. نوح أتم صنعها
جات الأمارة .. فاض التنور يا حبايب
قام نوح ركب .. وقال لأتباعه اركبوا
وركب كمان .. من كل روح زوج مناسب
قالوا العدد .. فى رواية قالوا أربعين
ورواية ستة .. يا ترى أيه اللى صايب
ونوح ينادى .. ابنه كنعان م المطر
يركب معاهم .. قال له الجبل عنى حاجب
وجا الطوفان .. من فوق الأرض وتحتها
غير السفينه .. مفيشى أبدا مراكب
ونوح بيدعى .. ابنى يا ربى انقذه
ومهوشى ابنه .. لأنه فى الكفر ضارب
قال الناظم يا أخيار .... صلوا على النبى المختار .... لما الطوفان أغرق كل الكفار ....
وماسابشى منهم لا جسم ولا دار .... أمر الله سبحانه وتعالى السما تبطل مطر ....
وأمر الأرض تبلع الميه اللى كانت خطر .... والسفينة رست على الجودى زى ما ورد فى الذكر ....
والجودى جبل موقعه فى ديار بكر .... وديار بكر يا أهل البصيرة .... تقع فى شبه الجزيرة ....
ونزل نوح والناس اللى معاه .... وولاده ملوا الأرض نسل فى أكتر من اتجاه .... وغير ولاده
محدش فى اللى معاه جاله بنات أو بنين .... لأن ربنا أعقم نساءهم قبل الطوفان بسنوات أربعين ....
وربنا سبحانه وتعالى قال فى كتابه المبين : ( وجعلنا ذريته هم الباقين ) .... وأنا وأنتم
نصلى على ختام المرسلين
صلوا عليه .. أصل الصلا دى مكسبى
سيدنا النبى .. هوا الشفيع يا اخوان
لما الطوفان .. جا بآية ومعجزة
على قوم لنوح .. خلا الجميع غرقان
إلا أهله .. واللى معاه فى مركبه
نالوا السلامة .. ودا جزاء إيمان
ما عدا زوجته .. وكانت كافرة وملحدة
وكمان ابنه .. اللى اسمه كان كنعان
ولما غرقت .. كل النفوس المشركة
وقف الطوفان .. بأمر م الرحمن
والأرض بلعت .. الميه ديا كلها
ورست السفينة .. على الجودى بأمان
نزلوا سوا .. ع الأرض لجل يعمروا
وولاده بس .. جابوا نسا وصبيان
من نسلهم .. الأرض عمرت كلها
ناس مؤمنين .. يسبحوا الرحمن
ودى قصة نوح .. يا إخوانى نظمتها
وربى أنعم .. علينا بالقرآن
أوصيك وصية .. ياللى انت جيت هنا زرتنا
تدعيلى دايما .. بالرحمة والغفران
وأزور حبيبى .. فداه روحى ومهجتى
يارب صلى .. عليه فى كل أوان
وربى يسامحنى .. فى ذنوبى كلها
وأقدر أطيعه .. وأموت على الإيمان
---------------------------
هانئ الجمل
سهرة مع الإنشااد الدينى
( 4) قصة سيدنا هود
عليه السلام
-----------------
مدح النبى مكسبى وزيادة جانا النور
يارب لجل النبى اكفينا كل شرور
واقبل صلاتى عليه دايما وكل حضور
وظلنا يوم بظلك يوم صعب كله حرور
وارزقنا شفاعة النبى وشربة من حوضه
اللى عشانه الجميع جى قاعد مسرور
صلوا يا حضار -- على كامل الأنوار
المصطفى المختار -- أحمد رسول الله
جانا بالقرآن -- فيه الهدى يا إخوان
رحمة من الرحمن -- يهدى لطريق الله
وفيه كمان آيات -- فيها العظة يا حضرات
قصص وفيه حكايات -- عن أنبيا لله
الليلة ليها نعود -- ونحكى فيها عن هود
واللى ورد محدود -- عن هود نبى الله
مفيش غير القرآن -- هوا اللى جا ببيان
عن عاد وهود ياخوان -- واللى جرى والله
مفيش كتاب تانى -- مقدس ياخوانى
جاب نص ومعانى -- عن هود نبى الله
إلا القرآن بالذات -- وغيره بقا اجتهادات
وكمان بعض آثارات -- من علم تاريخ ومداه
أما القبيلة دى عاد -- واسم ابوها عاد
جات بعد نوح بميعاد -- لما أراد الله
صلوا على النبى الليلة يا إخوان إن شاء الله
نحكى قصة سيدنا هود عليه السلام .. وعاد دا إسم القبيلة
وكمان عاد يبقا اسم أبو القبيلة واتسمت على إسمه
والقبيلة دى طبعا هيا عاد الأولى .. ويقال ان سيدنا هود هو أول
من نطق العربية .. اتكلم عربى يعنى .. ودى مسألة فيها خلاف
كتير .. ونخلينا فى سياق القصة ونقول :
بعد الصلا ع النبى أحكى لكم عن هود
نبى وجا لعاد الأولى ودا مرصود
جم من بعد نوح وطوفان ما منعه سدود
ربى أراد للأرض تعمر بقا تانى
زادوا البشر فى العدد جات عاد يا إخوانى
عماليق وأجسام شداد من علة ما تعانى
وبيعبدوا الأصنام من دون إله معبود
كانوا يعبدوا الأوثان -- من دون إله ديان
وبنعمة الحنان -- كافرين يا خلق الله
أجسام شداد جامدين -- فى الخير كمان ناعمين
فى البطش جبارين -- ناسيين نعم لله
كانوا فى أرض الأحقاف -- ودا شيء مفيهشى خلاف
يعنى بدون إجحاف -- أرض اليمن والله
عمان شرق موطنهم -- والربع الخالى شمالهم
ونبى الله هود جالهم -- فكذبوا دعواه
يضرب لهم الأمثال -- شوفوا قوم نوح يا رجال
وغرقهم كان مآل -- لكفرهم بالله
ربى أنعم عليكم -- بالزرع فى أراضيكم
وكمان ترعوا مواشيكم -- والفضل فضل الله
وتعبدوا الأصنام -- ليه العقول فى نيام
ماتغركوش ليام -- توبوا وارجعوا لله
استغفروا الغفار -- يبعت لكم مدرار
ويبعد الأضرار -- ويزيدكوا عز وجاه
يشرح كتير ويعيد -- ببراهين مع تأكيد
بوجود حساب ووعيد -- للى عصى مولاه
قالوا هود دا عقله فين -- بيقول كلام مجانين
مخالفنا عقل ودين -- وماشى ويا هواه
إزاى بقا ياخوان -- بعد الموت بزمان
نرجع بقا من تان -- قال ويحاسبنا الله
بقا دا كلام عقال -- دا هود حاله حال
سفاهته مالها مثال -- وأدينا اهو عرفناه
ما بى سفاهة يا قوم -- وكلامكو ماله لزوم
كلامى اهو مفهوم -- وتكالى بس على الله
اسمعوا كلكم -- أنا جاى ناصح لكم
والخير جايبه لكم -- آمنوا بقا بالله
دى نصيحة مجانى -- ومليش غرض تانى
وأجرى ياخوانى -- أحتسبه عند الله
معاهم يا مستمعين -- ما نفعت البراهين
ولا اللى بدا بيقين -- إنه واحد فى علاه
وزيادة فى استهتار -- قالوا هود دا عقله طار
ومرضه دا إنذار-- لأذى كتير هيراه
آلهتنا غضبوا عليه -- علشان كلام جاى بيه
آلهتنا كتير قد أيه -- ويقول دا واحد فى علاه
وهود بقا اتحداهم -- والآلهة اللى معاهم
يصيبوه مرة بأذاهم -- وعناية الله حامياه
العكس هوا صحيح -- وعرفهم تصريح
كلام بدون تلميح -- هيجيلهم غضب الله
قالوا له لو صادق -- هاته ما تضايق
ورينا بقا الخالق -- إزاى يصيبنا أذاه
سيدنا هود عليه السلام زى ما حضراتكم عارفين .. أخلص النصح
لقومه .. وألح عليهم فى طلب المغفرة من الله عز وجل .. وانهم
يتوبوا ويعبدوا الواحد سبحانه وتعالى .. رفضوا .. واستكبروا ..
وكل ما يدعوهم زيادة .. يعرضوا زيادة .. وفى الآخر قال لهم أنا
خايف عليكم عذاب ربنا .. قالوا له هاته لو كنت صادق .. وبدأ
عذاب ربنا .. بدأ العذاب
وربك الجبار -- حرمهم الأمطار
ودا كان لهم إنذار -- أذى هييجى وراه
وهود ينصح بحقيق -- كتير ونشف الريق
التوبة بس طريق -- ترفع عذاب الله
وما التقاش من عاد -- إلا زيادة فى عناد
ولا نصح ولا إرشاد -- هداهم لطريق الله
شافوا فى الجو غيام -- فرحوا وقالوا يا سلام
مطر جى وانعام -- جايبه الريح وياه
والسر ما عرفوه -- دا اللى استعجلوه
عذاب لازم يشوفوه -- جزاء معصية الله
وريح عقيم بتمام -- قعدت تمان تيام
وسبع ليالى دوام -- ع اللى كفروا بالله
تدخل ع الكافر داره -- لو هوا فين قراره
تجيبه ما يلقا قراره -- ولفوق تقوم رافعاه
ترميه ع الراس على طول -- تلقا الراس مفصول
عن جسده ما فى مأمول -- ترجع له تانى حياة
وماتوا كل الكافرين -- من عاد الأولى بيقين
جزاء عصيان مبين -- وكفرهم بالله
وربنا نجا هود -- ومعاه عدد محدود
آمنوا بإله معبود -- وإنه واحد فى علاه
وسكنوا حضر موت -- وفيها علوا بيوت
لحد ماجاء الموت -- لسيدنا هود ولقاه
ودفنوه بعد الموت -- قرب وادى برهوت
وكلامى دا مثبوت -- قاله سيدنا على وحكاه
ياللى سمعتوا قصتنا -- وقضيتوا معانا ليلتنا
إليكوا بقا وصيتنا -- أمانة عليكو بالله
تدعوا لى بالغفران -- واحظى برضا الرحمن
ويرزقنى المنان -- اللطف عند قضاه
واطوف واحج البيت -- وازور اللى انا حبيت
من صغرى له هويت -- مدحه جرانى وراه
وأموت على الإسلام -- واحظى بحسن ختام
واعبر صراطى بسلام -- واجاور رسول الله
وان كان فى العمر بقية -- سهراتنا ليها بقية
عن ياما كتير أنبية -- ورسل كتير لله
------------------------------
هانئ الجمل
( 5 )
قصة سيدنا صالح عليه السلام
-----------------
أمدح محمد صفوة العالمين
عليه صلاتى فى كل وقت وحين
يارب صلى على الحبيب محمد
واسقينا من حوضه مع الشاربين
من وحى قرأنا الكريم راح نحكى
قصة ( صالح ) وثمود يا محترمين
يارب وفقنى ونور بصيرتى
وأعنى يا ربى يا خير معين
( ثمود ) دا اسم لجد القبيلة
على اسمه اتسمت ودا بيقين
وقالوا القبيلة دى تبقا عاد التانية
وزيهم برضو كانوا كافرين
كافرين بنعم ياما كتير للمولى
جنات وزرع ومرعى مع رياحين
بيت المدر يتهد من قبل صاحبه
معمرين فى الأرض ياما سنين
علشان كدا نحتوا الجبال دى بيوتهم
فى النحت تلقا جمال مع تفانين
ونقول كمان ( الحجر ) كان موطنهم
بين الحجاز والشام أثاره ياقيين
لما ( صالح ) لثمود أتى يدعيهم
لعبادة الواحد دا أصل الدين
استغربوا وقالوا قبل كدا كنت عاقل
دلوقتى عقلك قول لنا راح فين
ازاى نسيب دين أهلنا وجدودنا
وربك انت نبقا له مؤمنين
يا ( صالح ) انت مريض كدا يظهر
لو مش مريض تبقا من المسحورين
يقول لهم اتعظوا من قبليكم
شوفوا كفرهم بقا وداهم على فين
الكفر دا أخره عذاب من ربى
فى الدنيا ةالآخرة ويوم الدين
وف مرة كانوابقا الكبار فى ناديهم
قالوا شوف كلامنا واحنا فيه صادقين
م الصخرة دى طلع لنا هنا ناقة
ساعتها تلقانا كلنا مؤمنين
والناقة دى صفاتها كيت مع كيت
جابوا شروط تعجيز كانوا قاصدين
سيدنا ( صالح ) قال سيبونى شوية
وراح يصلى لربى كله يقين
ان الإله راح يستجيب لدعاؤه
يبعت له اية لقوم كانوا ظالمين
ربى استجاب لدعاؤه جات الناقة
م الصخرة طلعت اية بالبراهين
على كفرهم فضلوا ومن بعد اية
إلا شوية من اللى كانوا قاعدين
قالوا امنا بأن ( صالح ) مرسل
ورب صالح احنا به مؤمنين
الناقة جات بالضبط زى طلبنا
ودى قدرة من رب قوى ومتين
والكفرة (صالح ) قام بقا حذرهم
يمسوا الناقة بضر أيها حين
وقال لهم الناقة لها يوم تشرب
م البير وتانى يوم تكونوا شاربين
وف يومها تلقوا لبنها راح يكفيكم
انتو وولادكو بنات كمان وبنين
وقال لهم فى يوم هييجى منكم
كفرة للناقة يقوموا لها عاقرين
وساعتها هيجيلكم عذاب من ربى
لا انتو ولا غيركو عليه تكونوا قادرين
واللى هيعقرها دا واحد منكم
ووصفه واضح تاخدوا بالكم زين
ووصفه هوا أحمر أزرق أصهب
قال الكبار دا المنع سهل يقين
قالوا الدايات يشوفوا القبيلة بطولها
وأى مولود يفحصوه لو مين
واللى يطابق وصفه نقتله حتما
وفضلوا ع الحال دا سنين ماشيين
وواحد كبير جه يوم وجوز بنته
لابن واحد كان برضو م العاليين
خلفوا واد أوصافه كات مطابقة
ولأن أهله من الكبار جامدين
مافى حد جاب سيرة لقتله بتاتا
واللى هيقول هيكون من الهالكين
واسم الولد (قدار ) ويبقا ابن ( سالف )
وهيبقا على راس اللى ىوم عاقرين
كبر ( قدار ) ونشوف بقا اللى جراله
لما (عنيزة ) جات بعرض ثمين
له أى واحدة من بناتها الأربع
ان هوا عقر الناقة كدا خالصين
أما ( صدوق بنت المحيا ) كمان
كانت غنية وبرضه م الكافرين
على ( مصدع ) جات وعرضت روحها
يشرط عقر الناقة أسرع حين
(قدار ) و ( مصدع ) لفوا أقتعوا سبعة
بقوا تسعة هما عصبة العاقرين
ونشوف كمان ازاى بقا عقروها
وسبب هلاك قومهم كانوا موافقين
التسعة كمنوا كلهم للناقة
وسهم (مصدع ) أول التنشين
جه فى ساقها بسرعة جرى (قدار )
كشف عرقوبها بسيف حامى ومتين
الناقة زعقت صوت تحذر ولدها
( قدار ) نحرها ومالو قلب يلين
جرى ولدها على الجبل قام طالع
وقال يا ربى أمى راحت فين
رغا تلاتة وقام ودخل الصخرة
وفيه رواية كمان يا محترمين
ان ابنها جم قطعوه مع أمه
بعد ماعقروه والناس وقوف شاهدين
لما عرف سيدنا ( صالح ) فعالهم
قام قال لهم راح تبقوا م الهالكين
تلات أيام هما اللى باقيين ليكم
والرابع تلقوا هلاكهوا جى مبين
أما العلامة ان الهلاك هيصيبكم
ألوانكوا تتغير تلاتة بيقين
فى أول يوم تحمر منكم وجوهكم
وتانى يوم تصفر دى يراهين
وتالت يوم تسود ودى اخرتكم
أما الرابع انتم أكيد هالكين
والتسعة عزموا يقتلوا بقا ( صالح )
على مسجده راحوا بقلوب جامدين
صخرة كبيرة جات ووقعت عليهم
قبل مايوصلوا كانوا فى الهلاك رايحين
نرجع بقا للكفرة واللى جرالهم
والخوف ماليهم رعب مذهولين
لما الوجوه من الجميع احمرت
وتانى يوم اصقروا محزونين
وتالت يوم كل الوجوه اسودت
قعدوا فى الرايع كلهم كامنين
لاهم عارفين امتى العذاب هيجيلهم
ولا عارفين شكله وهيجى منين
وفجأة جات صاعقة وصيحة قوية
خلت كبار ويا الصغار خامدين
كل الكفار جوا بيوتهم ماتوا
وكأنهم ما كانوا موجودين
إلا جارية وكات كمان مشلولة
تكره (صالح ) كافرة بيوم الدين
جريت ووصلت بعض م العربان
حكت بسرعة اللى جرى بيقين
وقالت أشرب لما شربت ماتت
وحصلت قومها اللى كانوا كافرين
أما ( صالح ) ومعاه رجال كانوا امنوا
ذكروا عددهم ميه فوق عشرين
نجاهم ربى دا جزاء لإيمانهم
ووقف (صالح ) بيكلم الهالكين
بعد ماماتوا يقول لهم قولتلكم
بس انتم كنتم تكرهوا الناصحين
دلوقتى ما أقدرشى أحوش أنا عنكم
انتوا فى عذاب م الحين ليوم الدين
وبعد البعث لكو العذاب من تانى
كل الكلام دا كانوا له سامعين
ونشوف ( صالح ) بعد نجاة من ربى
مع اللى أمنوا مشيوا راحوا على فين
البعض قال مشيوا وراحوا مكة
والبعض قال ع الرملة فى فلسطين
وشوية قالوا لحضر موت كان رحيلهم
وناس قالوا مكانهم بقوا قاعدين
وكدا نهاية القصة يا حضرات
وتحيتى ليكم يا مستمعين
بس الوصية انكم تدعولى
فى قبرى ألقى حنة مع رياحين
وأموت على الإسلام واجاور حبيبى
وانعم بظل الله فى يوم الدين
ووجه ربى به دوام نتمتع
أنا وانتوا واللى يقول معايا أمين
-----------------------
هانئ الجمل
(6 ) و (7) قصة سيدنا إبراهيم وسيدنا إسماعيل
عليهما السلام .. وسهرة مع الإنشاد الدينى
الليلة ليلة رضا ياللى انت جيت بهموم
من بعد مدح النبى مفيشى هم يدوم
والكل صدره انشرح منحة إله قيوم
يارب لجل النبى اقبل صلاتنا عليه
واجعل شفاعته نصيبنا فى يوم شديد معلوم
صلوا يا حضار .. على طه المختار
كتر الصلا أنوار .. فى يوم شديد نخشاه
أحمد حبيب الروح .. بعدك ملانى جروح
اكتم هوايا وابوح .. قلبى الغرام أضناه
عمرى أنا مداح .. وفى البلاد سواح
سكران أنا بدون راح .. روحى فى الغرام شايفاه
امتى الوصال يا زين .. وتحن ع المسكين
واسمعها أنا بيقين .. العاصى دا قبلناه
وله الشفاعة كمان .. قلبه بنا مليان
وجسده ع النيران .. حرم بإذن الله
يا طه راعينى .. حبك تمام دينى
يا سكرى ويقينى .. يا شفيعنا عند الله
عشانك الحصى سبح .. والورد لك فتح
هافضل كدا أمدح .. والمدح دا ماسلاه
ياللى مالكشى ظل .. وسحابة لك بتظل
ارزقنا ربى بظل .. مفيشى ظل سواه
اللهم امين .. اللهم اجعلنا من سبعة تظلهم بظلك يوم لا ظل إلا ظلك ..الليلة
يا إخوان يإذن الله هنقول قصة الخليل عليه السلام .. ومش هنقدر نقولها بمعزل عن قصة سيدنا إسماعيل عليه السلام .. علشان كدا هنقول القصتين مع بعض .. وربنا
يوفقنا .. ونيدأ على بركة الله ونقول :
سيدنا يابو الأنبيا بعراقنا ميلادك
بعدك كتير أنبيا والكل أولادك
وأرض بابل تقول لك جيت فى ميعادك
من بعد ما الخلق ضلوا وعبدوا تانى الأوثان
عاشوا فى دنيا المعاصى وغرهم شيطان
لهم الغواية يزين وغرقوا فى العصيان
جيت انت بالحنفية وربنا زادك
ياللى انتو جيتوا شرفتونا .. فى الحفلة هنا نورتونا
أهلا بكم ياللى جيتونا .. أهلا بكل المستمعين
الليلة قصتنا جميلة .. كتير فيها معانى نبيلة
تسعد بها كل العيلة .. قصة نبى ويا الكافرين
(تارح ) أبوه وهو (ابراهيم ) .. أتى لربه بقلب سليم
أصل الإسلام معناه التسليم .. وهو عند الله الدين
وجوزوه بقا من ( سارة ) .. قصى معاها أيام سارة
ما شافشى يوم منها مضرة .. وزيه عارفة أصول الدين
ارتحلوا كان وياهم ( لوط ) .. ودا ابن أخوه بكلام مضبوط
و (تارح ) معاهم قالوا هنفوت .. بابل هنا وراحوا فلسطين
قلب ( ابراهيم ) ينكر بتمام .. ازاى قومه يعبدوا أصنام
ويقدمولها شراب وطعام .. أصنام لا بتشوف ولا سامعين
ولقا أبوه كان يصنعها .. إزاى الهة هوا بدعها
لا تنفعه ولا بدراعها .. ولا بإديها شر وزين
قام قال له يابا بلاش تعبد .. حجارة وخشب ما فى يوم ترشد
أعبد إله واحد أمجد .. بإديه أمور كل العامين
هيا الحجارة ديا بترزق .. وللا فى يوم عمرها تخلق
دى بتتخلق ازاى تخلق .. افتكروا رب له راجعين
اعبدوه واشكروا فضله .. وشوفوا رزقه وشوفوا أرضه
دا الشكر ع النعمة مرده .. هوا رضا رب العالمين
أرضه أهى امشوا فيها .. شوفوا بدأ ازاى خلقه عليها
وازاى يميتها ويحييها .. ينشئها تانى فى يوم الدين
الجنة للى طاوع ربه .. واللى عصى هوا وذنبه
يغفر إلهى للى طلبه .. واللى يأس دا عذابه مبين
يابا ورايا بقا اتبعنى .. جانى من العلم كتير يعنى
هينفعك وهينفعنى .. يبقا صراطك معدول ومتين
يابا ماتعبدشى الشيطان .. اللى عصى أوامر الرحمن
إبليس عدو بنى الإنسان .. يمشى وراه بس الضالين
واللى يطاوعه كبر ذنبه .. له العذاب ييجى من ربه
بعد مايغرق فى ذنبه .. يتنصلوا منه الشياطين
قال يا (ابراهيم ) سيبك منى .. اهجرنى بقا سيبنى ودعنى
تكفر بالآلهة يعنى .. تفارقنى عليك ماهكونشى حزين
( قال سلام عليك سأستغفر لك ربى إنه كان بى حفيا )
( وما كان استغفار إبراهيم لأبيه إلا عن موعدة وعده إياها فلمل تبين له أنه عدو تبرأ منه إن ابراهيم لأواه حليم )
صدق الله العظيم
وعلى فكرة يا إخوان والد سيدنا إبراهيم اسمه ( تارح ) أما كلمة ( أذر ) فيها اراء
كتير نقبلها كلها ماعدا الرأى اللى بيقول ان كلمة ( اذر) كلمة قبح أو تقبيح .. ليه ؟ .. لأن دا يتنافى مع أخلاق الخليل عليه السلام .. ونشوف سيدنا ابراهيم وهو بيكلم النجوم والقمر والشمس كان قصده أيه .. عاشق جمال النبى يصلى عليه
سيدنا ( ابراهيم ) كدا من يومه .. مسلم موحد قيومه
حب يعرف بق قومه .. ان الإله واحد قهار
النجم شافه قال دا ربى .. لما أفل قال مش ربى
طلع القمر قال دا ربى .. وشوية وغابت الأقمار
والشمس طلعت كانت أكبر .. قال دا ربى دا أكبر
على المغرب ماعادت تظهر .. قال دا مش رب يا حضار
ربى أنا موجود على طول .. عالم الجهر وسر القول
ومافى يوم بيصيبه أفول .. ربى خلق لنا ليل ونهار
قالوا له ارجع أحسن لك .. دا مش كلام نقبله منك
أكيد هتخسر مع عندك .. الهتنا أهيا منها اختار
قام قال لهم كفايكو بهتان .. ما أنزل الله من سلطان
عليكو فى عبادة الأوثان .. دا شرك دى أعمال كفار
هاشوف لى صرفة فى أصنامكم .. اللى مليتو بها معابدكم
مافى يوم هييجى وتنفعكم .. عن نفسها ماتحوش أضرار
وسابوها مرة وكان يوم عيد .. بره البلد الكل سعيد
فاس ( ابراهيم ) مع عزم شديد .. كسر أصنامهم كانوا كتار
وصنم كبير ( براهيم ) سابه .. والفاس على كتفه قام سابه
والأصنام مكسورة فى رحابه .. ومشى ( ابراهيم ) بعدها ع الدار
رجعوا الكفار وشافوا المنظر .. شافوا السليم والمتكسر
قالوا اللى عملها لازم يظهر .. على الملأ دا مفيهشى هزار
قالوا ( ابراهيم ) كان بيقولها .. ضرورى هو اللى عملها
جابوه وسألوه بقا عنها .. قال دا كبيرهم الكسار
حتى اسألوها ان كات تنطق .. ردوا وقالوا دى ماتنطق
لنفسهم بان المنطق .. أحنوا رؤوسهم خزى وعار
وغلطانين زادوا فى عنادهم .. والكفر أصلا بقا زادهم
قالوا ليه سيبناهم لواحدهم ؟ .. علشان يدوقوا أذى الأشرار
اعملوا حفرة ماليها اخر .. بحطب املوها على الآخر
وولعوا فيها والآخر .. نرمى ( ابراهيم ) دا وسط النار
الهتنا ترضى بقا علينا .. الحق جبناه بإدينا
و (ابراهيم ) مش منينا .. وبكدا تبقا أخدنا التار
وكان هناك شر المخاليق .. أول من صنع المنجانيق
إسمه (هيزن ) والخسف طريق .. له فى الأرض ملوشى قرار
والنار كبرت علوها .. ومن بعيد ما قربوها
جابوا (ابراهيم ) حدفوه فيها .. وربى فى الحال خاطب النار
علشان تكون برد وسلام .. على ( ابراهيم ) شوفوا الإكرام
غير قيوده ما فى يا كرام .. تخصه حاجة مستها النار
أيام قعد قالوا أربعين .. فى النار وفيه رواية خمسين
قاعد يسبح يا مؤمنين .. والقلب بالله كله عمار
فى رواية قالوا أمه دخلت .. التار ولإبنها حضنت
كمان باسته بعدين رجعت .. من غير مايصيبها أذى من النار
كل الدواب كانت تطفى .. عن ( ابراهيم ) نا وتوفى
إلا الوزغ ما رضى يطفى .. ينفخ كمان على سيدنا النار
ولما بقا النيران خمدت .. وكل أخشابها احترقت
الناس يتبص قامت بهتت .. شافوا ( ابراهيم ) حى الأشرار
( نعم الرب ربك يا إبراهيم ) دى العبارة اللى قالها (تارح ) والد سيدنا ابراهيم
بعد ما شاف سيدنا ابراهيم سليم بعد النيران دى كلها وبالرغم من كدا
مرضيش يؤمن بدين سيدنا ابراهيم .. وبعد كدا حصلت المناظرة اللى بين النمرود وسيدنا ابراهيم .. والنمرود واحد من اللى ملكو الدنيا .. لأن زى ماحضراتكم عارفين الدنيا امتلكها أربعة اتنين مؤمنين واتنين كفار .. الاتنين المؤمنين ذو القرنين وسيدنا سليمان .. والاتنين الكفار النمرود وبختنصر.. ونشوف المناظرة حصل فيها أيه .. وسيدنا النبى صلوا عليه
سيدنا (ابراهيم ) يدعى النمرود .. لعبادة الواحد المعبود
ما شافشى منه إلا صدود .. وقال أنا الإله يا سامعين
هوا فيه إله غيرى .. الملك ليا ما هو لغيرى
والخير دا كله أكيد خيرى .. فين يا ( ابراهيم ) الهك ودا مين ؟
قال له ربى يحييى ويميت .. قال له انا كمان أحيى وأميت
هاتوا اتنين فى هذا التوقيت .. كان حكمه إعدام ع الاتنين
موت واحد والتانى سابه .. وجهله عظم له جوابه
ونسى الموت له أسبابه .. بيد إله قادر ومتين
( براهيم ) أراد يخرصه خلص .. علشان ما يلقى جواب خالص
ربى هداه لسؤال خالص .. بالشمس اتحدى يا محترمين
ربى يجيبها من الشرق مكان .. هاتها من الغرب ان فيه امكان
على النمرود حط البهتان .. ربك مايهديش الظالمين
سيدنا ( ابراهيم ) هاجر ع الشام .. وزوجته ( سارة ) كمان يا كرام
ومعاهم ( لوط ) مشيوا فى سلام .. علشان يعبدوا رب العالمين
نرجع للنمرود ياخوان .. بعت له ملك رب الأكوان
علشان يؤمن بالرحمن .. مرة واتنين وتلاتة بيقين
مرضيش يؤمن ويعاند .. قال للملك هات لك حاشد
واجمع جموعك وأنا حاشد .. وهنبقا احنا لكو غالبين
جمع النمرود جيشه الجرار .. وقت الصباح والدنيا نهار
أرسل عليه ربى القهار .. جيوش ذباب وبعوض لتنين
خبت الشمس عليهم .. أكلت لحومهم ودماهم
والعضم بس بقاياهم .. أما النمرود فعذابه مبين
دبانة فى منخارة دخلت .. واستوطنت جوا وقعدت
400 سنة مافى يوم خرجت .. عذاب شديد مافى يوم بيلين
أدوية تنفع قالوا مفيش .. إلا على دماغه ضرب البراطيش
تسكن شوية لجل يعيش .. ويرجع له تانى عذابه بيقين
سيدنا ( ابراهيم ) لما هاجر .. للشام بقا لربه مهاجر
علشان يكون عابد ذاكر .. وكل همه أمور الدين
وصل الشام وبشارة بتمام .. الأرض لك منا إنعام
ولولادك طول الأيام .. وكان ( ابراهيم ) بقا م الشاكرين
بنى مذبح شكر على النعمة .. شرق بيت المقدس له قبة
فى التيمن قحط وعلة .. سابوها لمصر قاموا مهاجرين
عن هجرة مصر فيه ياما كلام .. واختلافات فى اراء وكلام
خلاصته رجع منها بإنعام .. و (هاجر ) هدية ( لسارة ) بيقين
فى الفترة دى كان ( تارح ) مات .. و ( لوط ) هاجر ومعاه خيرات
إلى أرض ( سدوم ) ناسها يا حضرات .. كفار أشرار مافى قلب يلين
فى يوم ( ابراهيم ) و ( سارة ) قاعدين .. قالت له مليش فى بنات وبنين
ادخل على ( هاجر ) من دا الحين .. وتجيب ولد لنا قرة عين
حملت ( هاجر ) وغارت ( سارة ) .. ضايقت ( هاجر ) قول كام مرة
خافت ( هاجر ) طفشت بره .. جالها ملك وكلامه مبين
ارجعى خلى بالك طويل .. دا انتى هتولدى ( اسماعيل )
أبو الأمرا فى جيل ورا جيل .. يبقوا اتناشر خلفا وصالحين
ولدت ( سماعيل ) ربك بيريد .. ( سارة ) قالت خدهم لبعيد
خدهم ( براهيم ) وبعزم شديد .. راحوا لمكان مافيه ابن يومين
الصحرا واسعة مالها اخر .. ومفيش بشر ولا طير راخر
قالت ( هاجر ) هات م الآخر .. هتسيبنا هنا وتروح على فين ؟
اذا كان دا بقا أمر من الله .. أبدا ما هيضيعنا الله
مع ابنى وبعينى هارعاه .. ومشى ( ابراهيم ) ماتشوفه العين
يدعى المولى بكل خشوع .. يارب اكفيهم شر الجوع
واديهم قفر مفيشى زروع .. وارزقهم حب العالمين
( هاجر ) معاها تمر فى جراب .. وسقاية فيها ماء لشراب
وترضع ( اساعيل ) ياحباب .. خلص الماء وعطاشا لتنين
( اسماعيل ) عطشان وبيبكى .. بكاه بينبى وبيحكى
و ( هاجر ) لمين بقا راح تشكى .. غير للإله رب العالمين
شافت الصفا طلعت تجرى .. فوقه مفيش ميه بتجرى
ومن عليه نزلت تجرى .. تزلت للوادى بقلب حزين
المروة قدامها جريت .. فوقه بسرعة قوام طلعت
ومفيش ميه من تانى نزلت .. سبع أشواط تمتها يقين
والسعى بقا ركن من الحج .. لمن اراد اتمام الحج
واللى يسيبه ملهوش حج .. تكريم أراده رب العالمين
سبع أشواط ومفيش راحة .. ملك ضرب الأرض جناحه
الميه طلعت بالراحة .. شربت وملت سقاها بيقين
قعدت تقول للميه زم .. ماهى مفاجأة أكبر م الحلم
لولا قالت للميه زم .. كانت تفور وليوم الدين
والحمد لله على عطاياه .. بقت بير زمزم أراد الله
على نيتك تشرب تلقاه .. ربك حقق لك خير بيقين
وبشرها بكلام معناه .. إوعى تخافى ضيعة من الله
وكمان هنا هيبقا بيت الله .. وابنك وابوه هيكونوا بانيين
كبر ( اسماعيل ) وبلغ السعى .. يقدر يقوم بشغل ورعى
راجل ناضج وبفهم ووعى .. زاره أبوه بعدها بسنين
شفتنى ياابنى معاك فى منام .. إنى ادبحك وجاوبنى قوام
قال يابا نفذ أمر العلام .. وهتلاقينى من الصابرين
خد ابنه وياه ناوى دبحه .. على المدبح وهناك طرحه
جاب السكين هم بدبحه .. نزل ملك مع كبش سمين
( وفديناه بذبح عظيم ) صدق الله العظيم .. وطبعا حضراتكم عارفين ان اليهود
محرفين الموضوع دا فى التوراة وبيقولوا ان الذبيح هو اسحاق والموضزع دا مردود عليه .. وننتقل لموضوع تانى ونقول أعوذ بالله من الشيطان الرجيم .. بسم الله الرحمن الرحيم ( إن أول بيت وضع للناس للذى ببكة مباركا وهدى للعالمين )
صدق الله العظيم
جا الأمر لسيدنا ابراهيم والأمر من ربى
لجل مايبنى البيت فى التو بيلبى
يارب لجل النبى اغفر جميع ذنبى
ويبنى سيدنا ابراهيم بعزم وبإصرار
ومعاه سيدنا اساعيل يجمع له الأحجار
والشغل ماشى بنشاط نهار وبعده نهار
وقدم ابراهيم بيعلم فى الصخر يا ربى
سيدنا ( ابراهيم ) واقف يبنى .. ويقول له ناولنى يا إبنى
أنا وانت سوا هنا راح نبنى .. بيت هنا لعبادة الله
أما المكان دا عرفه ازاى .. الوحى جاله من مولاى
وريح بتكنس شفت ازاى .. يحفر وراها وابنه معاه
رفع القواعد بقا م البيت .. وايز حجر لركن البيت
( سماعبل ) قال له اليوم كليت .. وشوية أجيبه بإذن الله
( جبريل ) سبق وجابه على طول .. حجر م الهند ناعم مصقول
كان فى الجنة وجالو نزول .. مع ادم ودا أمر الله
نزل م الجنة ابيض خالص .. وشافه ( ابراهيم ) اسود خالص
سبب سواده كدا خالص .. ذنوب بشر وبيعصوا الله
جه ( اسماعيل ) بقا بعد رجوع .. شاف الحجر فى مكانه موضوع
سأل يابا أيه الموضوع .. قال له انشط منك جابه وياه
فضلوا كدا مدة بانيين .. يارب تقبل لك شاكرين
وتوب علينا تواب ومعين .. ومسلمين خلينا يا إله
أتموا البنا فى سعادة وسرور .. بيت تحت بيت الله المعمور
علشان الأرض تتملى نور .. رحمة كبيرة من عند الله
رجع ( ابراهيم ) لمكانه تانى .. وبدل ( اسماعيل ) ماهيعانى
م الوحدة اتجوز ياخوانى .. من العرب جاره مجاوراه
( براهيم ) فى يوم قام راح زارهم .. خبط بقا على باب دارهم
سألها جوزك بستفهم .. بره وطريقه منيش عارفاه
سألها حالكم قالت شين .. فقر ومفيشى حاجة تعين
وشدة وقحط فيهم عايشين .. عيشة تقرف بختى وعارفاه
بعد مييجى ( اسماعيل ) بتمام .. أقرئيه من السلام
وبلغيه من عندى كلام .. ( غير عتبتك ) دا سامعاه
رجع ( اسماعيل ) بتقص عليه .. قال دابويا يبارك فيه
وطلقها طاعة لأبيه .. فهم كلامه فهم معناه
اتجوز تانى فاتت أعوام .. وراح ( ابراهيم ) يزوره يا كرام
فين ( اسماعيل ) بترد قوام .. خرج متوكل على مولاه
واجب الضيافة خده بالكامل .. سألها حالكم أيه عامل
قالت الخير لنا بيزامل .. عايشين فى نعمة بفضل الله
بعد مييجى ( اسماعيل ) بتمام .. أقرئيه منى السلام
وبلغيه من عندى كلام .. ( إلزم عتبتك ) دا سامعاه
رجع ( اسماعيل ) بتقص عليه .. قال دابويا يبارك فيه
وكلامه دا بيوصى فيه .. إنى ما أفارقك دا معناه
ومات الخليل كلنا ماشيين .. عن عمر كان مية وتسعين
( سماعيل ) واخوه دفنوه لتنين .. مع ( سارة ) قول سبحان الله
وطبعا حضراتكم عارفين .. ان مقامه فى فلسطين
فى الخليل على اسمه يقين .. وبحق كانها خليل الله
كان بيعطى الناس على طول .. بدون سؤال وبدون مأمول
ربى زاده من عنده قبول .. واختاره يبقا خليل الله
أما ( اسماعيل ) بقا لما مات .. دفنوه مع أمه يا حضرات
فى حجر ابراهيم عليهم صلوات .. وتسليمات كتيرة من الله
ودا يا إخوانا ملخص لقصة سيدنا ابراهيم وسيدنا اسماعيل
قلناه لكم فى عجالة خوفا من الإطالة وقبل ما أختم أوجه نظر حضراتكم للآية
أعوذ بالله من الشيطان الرجيم بسم الله الرحمن الرحيم ( وإذ قال أبراهيم
رب أرنى كيف تحيى الموتى ...... ) إلى اخر الاية طبعا الاية فيها كتير بس اللى عايزين توصله ان سيدنا ابراهيم يعلم علم اليقين أن الله يحيى الموتى ولكنه عايز يتنقل من علم اليقين إلى عين اليقين .. ومننساشى إن سيدنا إبراهيم كان أقرب البشر شبها
بسيدنا محمد عليه الصلاة والسلام
صلوا معايا يا صاحبى على النبى العدنان
اللى أتانا نور زى ماقال القران
يارب صلى عليه دايما فى كل أوان
واجعل صلاتنا يارب شفاعة لينا فى يوم
طوله ألف سنة وارحمنا يا رحمن
ارحمنا يا رحمن .. لجل النبى العدنان
يا مبدع الأكوان .. خلقت ليل ةنهار
الليل بنسكن فيه .. ونهارنا عايشين فيه
حقك ما بنوفيه .. وانت حليم ستار
نقابلك بالعصيان .. تقابلنا بالغفران
ارحمنا يا ديان .. ونجينا من النار
ادعو لى ياخوانى .. يغفر لى عصيانى
يصلح جميع شانى .. يسترنى دنيا ودار
صحيح عملت ذنوب ..لكن بارجع أتوب
لمين غيره راح انوب .. ومين غيره الغفار
وكدا خلصت يا خوان .. قصة خليل الرحمن
ودا من وحى القران .. وكمان بعض الأسفار
وان كان فى العمر بقية .. مواضيعنا ليها بقية
عن ياما كتير أنبيا .. بيد الله الأعمار
هانئ الجمل
( 8 ) قصة سيدنا إسحاق عليه السلام
------------------
( موال )
-------------
يارب ياللى بتعلم ظاهرنا والخافى
إرحمنى فى يوم أجيلك عريان خايف حافى
والشمس فوق الراس والأهل بتجافى
واجعلنا ننعم بظلك ظلك مفيشى سواه
بسر بركة نبى هو حبيب الله
كل القلوب لك خاشعة متقولشى غير الله
انت وكيلنا وانت الواحد الكافى
---------------
واقبل صلاتى على طه حبيب الروح
هو حبيبك وهو فى الكتاب ممدوح
من وحى قرانا نحكى ويوفق الخلاق
هنحكى قصة كريم هو النبى ( إسحاق )
ابن الخليل ( إبراهيم ) كريم وإبن كرام
من بعده ذريته ع الطبع برضه كرام
يارب لجل النبى إرزقنا وبإكرام
وخفف علينا يارب ساعة طلوع الروح
-----------------
سيدنا ( إسحاق ) بشارة من ملايكة كرام
لما كانوا رايحين فى مهمة مع إلزام
هيهلكوا قوم ( لوط ) إتمادوا فى العصيان
( سارة ) سامعة البشارة قالت عجوز وعقيم
وجوزى أهوا عجز بقا شيخ كبير ( براهيم )
قالوا لها ليه العجب والأمر دا من الله
واللى فى علمه يكون واللى فى علمه قضاه
ولما ( سارة ) ولدته سمته ( يححق )
والكلمة دى بالعبرى ومعناها : يضحك
نبى وإبن نبى وكريم وإبن كرام
------------------
ولما كبر ( إسحاق ) حبوه يتأهل
بعتوه هناك للعيلة وربنا سهل
وجوزوه من ( رفقة بنت بتوئيل )
ولدت له فى بطن واحدة ولدين جمال يا جميل
الأول اسمه ( عيسو ) والتانى كان ( يعقوب )
( يعقوب ) نزل ورا اخوه كان ماسكه م العرقوب
والأم بتحب أكتر إبنها ( يعقوب )
بعكس ( إسحاق ) وقلبه للكبير ميال
والبكرى كان له ميزات فى الورث مافى جدال
والأب يدعى ل ( عيسو ) وقبله دعا ل (يعقوب )
ودا أمر هنفصله فى قصة نبينا ( يعقوب )
ندعى بقا ربنا يوفقنا ويسهل
--------------------
وعاش ( إسحاق ) فى قومه يقيم أصول الدين
ولما مات كان عمره ميه فوق التمانين
واندفن مع والده فى مغارته فى ( حبرون )
يعنى مدينة الخليل وكدا انتهى مضمون
قصة نبينا ( إسحاق ) ياللى معانا قريت
يارب تكون معانا على النبى صليت
وأمانة بقا تدعيلى بالرحمة والغفران
وأزور واشاهد حبيبى المصطفى العدنان
ونشرب سوا من حوضه واعبر صراطى بأمان
واشفى يارب قلوبنا مفيش غيرك شافى
--------------------
هانئ الجمل
حمدى شبانة
30/09/2018, 20h27
سرد مبسط وجميل
وإسلوب سهل ورائع
ومعلومات عن الأنبياء عليهم السلام
هذا ماخرجت به وأنا هنا أتابع
هذه السلسلة البديعة
( من قصص الأنبياء )
شكراً صديقى دكتور هانى الجمل
ــــــــــــــــــــــــــــــــــــــــــــــــــ ــــــــــــــــــــــــــــ
( 9 ) قصة سيدنا لوط عليه السلام
---------------------------
أبدأ أنا بالصلا على حبيب الروح
اللى اصطفاه ربنا وبأخلاقه ممدوح
نفسى أشوفك يا طه تترد فيا الروح
عليك صلاة ربنا فى كل وقت وأوان
عدد علوم ربنا وما قد يكون وما كان
----------
نحكى الليلة يا كرام قصة النبى ( لوط )
عمه سيدنا ( ابراهيم ) ودا كلام مثبوت
هاجر كمان وياه يعبد وكله قنوت
ولما هاجروا لمصر ورجعوا تانى حران
( لوط ) انفصل عن عمه وكل شيئ بأوان
----------
سيدنا ( لوط ) راح سدوم وأهلها أشرار
هوا عابد ربنا وهما ناس كفار
بيعملوا كل منكر علنا مع الإصرار
وأتوا بفاحشة جديدة ما سبق بها إنسان
رجال تعاشر رجال وسايبين النسوان
----------
فيهم كل العبر وقطاعين طرقات
مابيستحوش من حرام لواط كمان سرقات
ومايكرموش الضيف وبيسلبوه حاجات
أشرار مافيهم رشيد وعاصين الديان
وحب ( لوط ) يدعيهم لعبادة الرحمن
----------
قعد كتير يدعيهم ملقاشى إلا الصد
يبين حرام وحلال مايلقا جواب ولا رد
يقول لهم أفعالكم اخرها هلاك وبجد
قالوا له راح نرجمك اخرس كلام ولسان
أو من هنا نطردك وتروح لأى مكان
----------
وقالوا اطردوا ( لوط ) وأهله دول ناس بيتطهروا
جعلوا الطهارة نقيصة طب دول ازاى فكروا ؟ !!
صحيح دولا أهل فسق بالفاحشة كانوا يظهروا
وقالوا لسيدنا ( لوط ) هات عذاب الديان
اللى انت قلت عليه ورينا حتى بيان
----------
لما الملايكة وصلوا هينفذوا المطلوب
عدوا على سيدنا ( ابراهيم ) شوا عجل كان مرغوب
وبشروه ب( اسحاق ) ومن وراه ( يعقوب )
ضحكت ( سارة ) لأنها عجوز بقالها زمان
كمان مبتخلفش لا بنات ولا صبيان
----------
سيدنا ( ابراهيم ) عرف مبياكلوشى بقا ليه
بعد ما كان سألهم وهما ردوا عليه
قالوا له على البشارة دا أمر الله قاضيه
وقالوا له احنا راحين لناس عاشوا العصيان
راحين نهلك قوم ( لوط ) ودا أمر م الديان
----------
راح نهلكهم جميعا سيدنا ( ابراهيم ) قام قال
بس دا فيهم ( لوط ) قالوا دا ناجى مع الآل
أما مراته العاصية دى زيهم لزوال
وصلوا لسيدنا ( لوط ) فى صورة تلات غلمان
صحة وجمال وشباب و ( لوط ) بهم قلقان
----------
قومه عرفوا إن عنده صبيان بشكل جميل
زوجته اللى راحت لهم وحكت مع التمثيل
اتلموا فوق البيت أو الكبار بدليل
قالوا هاتهم لنا مش قلنا لك من زمان
عندك مفيش حد يدخل ولا تستضيف ضيفان
----------
بره الدار بيطالبوا بالضيفان يؤتوهم
ربك طمس على عنيهم ما قدروا حتى يشوفوهم
( لوط ) بيدافع ويقول بناتى أهمه خدوهم
قالوا له بناتك أيه ملناشى فى النسوان
انت عارف غرضنا وقصدنا الضيفان
----------
قالت الملايكة يا ( لوط ) انت ماتخافشى
مش هيوصلوا ليك وانت لازم تمشى
وخد أهلك وياك بره البلد امشى
واوعا تبص وراك عشان العذاب ألوان
هييجى قبل الصبح والصبح قريب هيبان
----------
جه الصبح وتلاقى القرية سافلها عاليها
والسما تمطر حجارة وجهنم كانت فيها
وكل الحجارة مكتوب أسماء أصحابها عليها
واللى عليه الحجر ينزل يكون عدمان
وزوجة ( لوط ) التفتت صابها حجرها كمان
----------
واحنا هنا لنا وقفة فى كلام سيدنا ( لوط )
فى الموقف اللى عرض بناته ودا مثبوت
يا ترى أيه المعنى والقصد بالمظبوط
هنعرض هنا الآراء وكل المعانى تبان
لأن ( لوط ) دا نبى ومعصوم من العصيان
----------
أول رأى يقول إنه عرض بناته
بس مش الصلبيات ومعنى كلماته
إنه عرض نسوانهم عليهم بكلماته
لأن كل نبى قومه نسا وصبيان
يبقوا الجميع أولاده ودا بدليل وبيان
----------
أما الرأى التانى ودا رأى له حسناته
ان اللى كانوا فوق داره رجالة بس تلاتة
عرض عيهم الزواج من التلاته بناته
الرأى دا أنا أميل له وبرضه يمشى كمان
مع عصمة الأنبيا ونظافة الإنسان
----------
كدا عرضنا القصة وعرضنا بعض أراء
فى القصة تهمنا حتما توضيح بقا لمن شاء
واللى يحب زيادة كتب تنادى قراء
أوصيك ياللى قريت تدعى لى بالغفران
واحظى بشفاعة حبيبى واعبر صراطى بأمان
----------
هانئ الجمل
( 10 ) قصة سيدنا يعقوب عليه السلام
-----------------------------
عليه الصلاة عليه السلام -- محمد حبيبى الرسول الصبور
رسول الهداية رسول السلام -- جاى لينا رحمة جاى لينا نور
للمرسلين هوا مسك الختام -- وهوا شفيعنا فى يوم النشور
وهوا شفانا وبرء السقام -- وهوا شفيعنا فى يوم الزحام
رحمة وشفاعة لكل الأنام -- عليه الصلاة عليه السلام
.............
من وحى قرأنا يا اهل الصواب -- هنحكى قصص راح يحيى القلوب
واللى هيسأل هيلقى الجواب -- هنذكر سير وهنذكر خطوب
ويارب ألهمنى دايما صواب -- ياغفار وماحى لكل الذنوب
أرسلت لينا رسول السلام -- يهدى لطريق الرضا والسلام
يبكى عشانا فى يوم الزحام -- عليه الصلاة عليه السلام
..............
قال الناظم يا سادة يا مستمعين .. اللهم صل على سيدنا محمد النبى الأمين .. بعد استغفار غفار
الذنوب .. هنحكى قصة نبى الله يعقوب.. ويعقوب يبقا إبن إسحاق .. وتوأمه عيصو إبن اسحاق ..
وعيصو الكبير لأنه سبق يعقوب فى النزول .. ويعقوب وهوا نازل كان ماسك عقب أخوه على طول ..
علشان كده سموه يعقوب .. وكان الأب ميال لعيصو والأم ميالة ليعقوب .. صلوا على حبيب علام الغيوب
.........................
أبدأ كلامى بالصلا على محمد -- اللى أتانا بالكرم والمكاسب
يارب صل على حبيبى محمد -- صلاة لخلقه ولمكانته تناسب
.....
إسحاق كبر -- كمان ضعف منه البصر
وف يوم أمر -- ( العيص ) وكلفه واجب
.....
يروح الصيد -- ربك هيرزق بالجديد
ويطبخه -- ويجيبه ساخن وطايب
.....
فى الوقت دا -- هيدعى له دعوة تنفعه
ويباركه -- دعوة حبيب للحبايب
.....
عيصو يدوب -- خرج وأمه نادت أخوه
وقالت له هات -- جديين حلوين م الزرايب
.....
واعمل لأبوك -- أكلة صفاتها كيت وكيت
نفذ يسرعة -- لجل انت ماتبقا غالب
.....
يعقوب عمل -- الأكل ولابوه وصل
وقال اتفضل .. الأكل أهو اللى انت طالب
.....
وكان يعقوب -- حط على إيده شعر جدى
لأن عيصو-- أشعر خالص يا حبايب
.....
قال له انت مين ؟ -- قام رد قال له أنا ولدك
حسه بإيده -- أشعر لقاه اللى جايب
.....
قال الجسم ..... جسم عيصو وملبسه
ودا صوت يعقوب -- وأمر ربى اللى غالب
.....
كل ودعاله -- ورفقة فرحت بدعوته
ووصل عيصو -- فى الوقت غير المناسب
.....
قال له اتفضل -- كل بقا واسمع دعاك
قال مش دعيتلك ؟! -- من ساعة جبت المطالب
.....
قال له مش انى -- عرف يعقوب ان عملته
هتجنى عليه -- على خاله شد الركايب
.....
وصل لخاله -- فى أرض حران قعدته
وله بنتين -- ( ليا ) و ( راحيل ) يا حبايب
.....
(ليا ) الكبيرة -- كانت مش حلوة حقيقة
وقال يعقوب -- ( راحيل ) ياخالى انا فيها راغب
.....
قال له هتعمل -- سبع سنين دا مهرها
قال له موافق -- والسبعة خلصوا اللى طالب
.....
عملوا وليمة -- والناس سهروا فى الفرح
صبح يعقوب -- لقا ( ليا ) فى البيت تواكب
.....
قال له يا خالى -- انت ليه خدعتنى
قال الكبيرة -- الأولى دا شرع واجب
.....
عايز ( راحيل ) ؟ -- سبعة تانى تشتغل
قال له موافق -- والسبعة خلصوا اللى طالب
.....
ودخل بهم -- واتنين جوارى كمان لهم
( ليا ) لها -- ( زلفى ) جارية ومكاسب
.....
و ( راحيل ) لها -- (بلها ) جارية ملكها
كله ليعقوب -- ودا شرع كان وقته غالب
.....
ولما حان -- وقت الرحيل يا محترم
يعقوب رحل -- ومعاه كتير م المكاسب
.........................................
قال الناظم يا سادة .. الصلاة على النبى كنز السعادة .. أما أولاد يعقوب .. وسبحان علام
الغيوب .. ستة رجال وبنت من ( ليا ) واتنين رجال من ( بلها ) جارية ( راحيل ) ..
واتنين رجال من ( زلفى ) جارية ( ليا ) .. ويوسف وبنيامين من ( راحيل ) .. ورجع
يعقوب من عند خاله بخيرات ونسا وأولاد وعبيد .. وأنا وأنتم نصلى على المذكور بعد التوحيد
..........................................
أول كلامى مدحت حبيبى -- هوا دوايا وهوا طبيبى
يارب خلى شفاعته نصيبى -- يوم الحساب ويوم الحشرية
.....
يعقوب راجع بقا مع أهله -- راجع لداره وأمه بأهله
وحنين فى قلبه كتير ينده له -- ما حلى الرجوع دى الغربة رضية
.....
لما قرب من أرض ساعير -- ملايكة قابلته بالتبشير
بعت كمان هيجيب تفسير -- عن عيصو وجاب له أحلى هدية
.....
خلا الهدية على مسافات .. وعبيد سايقينها يا حضرات
تيران وتيوس وكمان بقرات -- وإبل وأغنام فوق المية
.....
عارف ان عيصو مش ناسى كمان -- اللى حصل له منه زمان
قلبه أكيد بالماضى مليان -- طالع معاه من الرجالة ربعمية
.....
يعقوب اتأخر عن عبيده -- مسيرة ليلتين هوا وأولاده
يسأل عيصوا لمين دا ؟ ويعيده -- يردوا دا لسيد سيدنا هدية
.....
يقولوا دى لعبدك يعقوب -- هدية لسيده عيصو دا وجوب
هوا سيده وهوا المحبوب -- وجاى ورانا بعد شوية
.....
ولما بقا اتقابلوا الاتنين -- سجد يعقوب لعيصوا بيقين
قام عيصو حضنه وبكت العين -- وباسه كمان بوسة أخوية
.....
كل اللى كانوا مع يعقوب -- سجدوا لعيصو ودا كان مطلوب
واللى أمرهم كان يعقوب .. علشان أخوه وكمان مراضية
.....
مر كمان على أورشليم -- اشترى مزرعة من شخص مقيم
وبنى مذبح كبير وعظيم -- دا أمر من مولاه ووصية
.....
أما المذبح فسماه إيل -- يعنى إله إسرائيل
طبعا يعقوب هوا إسرائل -- دا الاسم التانى تداوله شوية
.....
ودا بيت المقدس بقا يا اخوان -- بعد كدا جدده سليمان
محفوظ على مر الأزمان -- يارب احفظه من ناس مؤذية
.....
ولدت راحيل بقا بنيامين -- تعبت وماتت بعد حين
دفنوها سبحان رب العالمين -- هوا الباقى وخلقه مفنية
.....
مشى يعقوب رايح حبرون -- عند إسحاق فى رحابه يكون
ومات إسحاق عن عمر يكون -- تمانين ستة وكان فوقهم مية
.....
دفنه العيص ومعاه يعقوب -- وفضل عايش بعدها يعقوب
ووصل لمصر وكان مطلوب -- لما يوسف طلب الأهلية
.....
قعد فى مصر قول لى كام ؟ -- كانوا خمستاشر سنة بتمام
ومات بعدها وخدوه يا كرام -- دفنوه مع أبوه وأكيد دى وصية
.....
بكدا خلصت قصة يعقوب -- يارب اكون وفيت مطلوب
ويارب فرج كل كروب -- عنى وعن أهل وذرية
.....
وإن شاء الله لنا لقاء تانى -- تسمعوا من نظم أخوكم هانى
نتقابل على خير بقا يااخوانى -- إن كان باقى فى العمر بقية
-----------------------------------------------
هانئ الجمل
( 11 ) قصة سيدنا يوسف عليه السلام
------------------------------
أبدأ أنا بالصلا على حبيب الله
اللى الإله اصطفاه من كل خلق الله
أتى بدين الحق يهدى لشرع الله
وجانا بالقراّن من وحيه راح نحكى
قصة ابن الكرام يوسف نبى الله
-----
سيدنا يعقوب له ولاد كانوا عشرة بنين
وله كمان من راحيل يوسف وبنيامين
يبقا العدد اجمالى اتناشر ولد بيقين
كبر يوسف شاف رؤية راح يحكيها لوالده
يا أبت فسر ليا الرؤية دى بيقين
-----
أنا شوفت حداشر كوكب بيسجدوا ليا
والشمس ويا القمر سجود طواعية
قال له معنتش تحكى اللى حكيتو ليا
خصوصا بقا لإخواتك لتتولد أحقاد
ويكيدوا لك يا حبيبى يا أحب الولاد ليا
-----
يوسف كان جميل أصل الإله زانه
وعلمه من علمه وعلا من شانه
أما الحداشر كوكب دول يبقوا إخوانه
والشمس ويا القمر يبقوا أبوه وامه
ودا تفسير رؤيته وبداية أحزانه
-----
إخوان يوسف بيلاحظوا حب أبوهم بيزيد
ليوسف وبنيامين ودى حاجة واضحة أكيد
قعدوا يكيدوا ليوسف والحقد ناره تقيد
قالوا احنا نقتل يوسف أو نطرحه فى الأرض
وأبونا يفضا لنا بدل ما هوا بعيد
-----
أما كبيرهم طلع من بعد طول تفكير
وقال بلاش تقتلوه إرموه هناك فى البير
البير دا جنب الطريق من عنده ناس بتسير
حد يلاقيه راح ياخده نرتاح بقا منه
وتبقا إدينا نضيفة لا دم ولا تعزير
-----
وراحوا لابوهم يقولو هات يوسف ويانا
احنا رايحين نلعب عايزينه يلعب معانا
وليه متأمناشى على اخونا روحنا هنانا
قام قال لهم أنا خايف لياكله منكم ديب
قالوا ياكله واحنا كتير دى عصبة خسرانة
-----
أخدوا يوسف وراحوا فى البير هناك ورموه
وجم بقا قبلها قميصه منه خدوه
وجابوا دم بكدب على القميص دلقوه
وراحوا لايوهم العشا عاملين بقا بيبكوا
قالوا له هتكدبنا ولو صدقنا ياهوه
-----
قالوا كنا بنلعب رماية ونتسابق فيها
وخوفنا قوى على يوسف م اللعبة وما فيها
جنب المتاع راح قعد حاجتنا يراعيها
رجعنا لقينا الديب أكله مخلاشى
واّدى قميصه يحكيلك القصة وما فيها
-----
سيدنا يعقوب شاف قميص يوسف سليم
قال يا سلام ع الديب دا ديب ذكى وفهيم
أكل يوسف من جوه وساب قميصه سليم
سولت لكم نفسكم أمر وأمره يكون
وصبرى صبر جميل وانا استعين بالكريم
-----
فى البير يوسف بيدعى وجات جماعة يا كرام
بعتوا واردهم يسقى والحبل شده بسلام
شاف يوسف صاح فى جماعته بشراى هذا غلام
إخوانه قالوا نبيع قال تاجر أنا شارى
دفع لهم كام درهم وأخده معاه بإلزام
-----
يوسف ابن الكرام بقا يا ناس سلعة
بيبيعوا قيه ويشتروا ونار أبوه والعة
وكل يوم بيزيد جماله فى الطلعة
واّخر واحد اشتراه هوا عزيز مصر
يعنى وزير الملك له سلطة وناس تابعة
-----
وقال لمراته اكرميه ينفعنا يمكن يوم
أو يبقا لينا ولد ومودة بينا تدوم
ولما يوسف كبر وعوده بان مرسوم
زوجة العزيز قررت تاخد غرض منه
جرى منها قميصه اتقطع خايف عذاب قيوم
-----
فى الوقت دا جه جوزها وقريب لها وياه
قالت له كان يراودنى شوف لك عمل وياه
رد يوسف دى بتكدب الحق أقوله والله
هى اللى كات تراودنى لكن أنا مرضتش
إزاى أخون سيدى فى شرفه وأعصى الله
-----
جريت ورايا شدتنى واّدى قميصى مقطوع
وابن عمها شهد شهادة ما فيها رجوع
لو القطع دا من ورا صدقه يبان مسموع
ولو القطع من قدام يبقا كلامها صحيح
القطع شافوه ورا قالوا كيد نسا الموضوع
-----
يوسف ما قالشى لحد بس الخبر كان شاع
يمكن ساعد فى نشره حد من الأتباع
وشوية نسا فى المدينة عملوا ياناس اجتماع
قالوا مرات العزيز عايزة من خدامها
قال أيه يا ناس بتحبه من غيره عايشه ضياع
-----
عرفت دعتهم لبيتها تفاح جابت ماحلاه
وقالت لهم اقعدوا جلوسكو دا ما أسلاه
وطلعت ليوسف قالت له إدخل بقا ياللاه
شافوه سرحوا فى جماله ما دريوا بالسكاكين
وقطعوا أيديهم وقالوا حاشا لله
-----
رغم العزيز كان شايف براءة يوسف بعنيه
قال احتياطى نسجنه هنسيبه بره ليه
لحد ماالناس تنسى فضيحة من حواليه
ويوسف دخل السجن واتنين من المساجين
قالوا عليه نتسلى ونقول حلمنا أيه
-----
الأول قال أنا شوفت أعصر خمر بإمعان
والتانى قالى فسر لى أنا شوفت حلم كمان
شايل خبز على راسى ياكله الطير والغربان
قال فيه واحد راح يبقا ساقى الملك المخصوص
والتانى يصلب وتلاقى من راسه الطير شبعان
-----
قالوا احنا محلمناشى قال لهم قضى الأمر
وميل ع اللى هينجى وهيسقى الملك الخمر
وقال له احكى له حكايتى سجنونى ظلم وغدر
والمسجون جال له افراج واتعين ساقى فى القصر
وشيطانه جه نساه وماجابشى ليوسف ذكر
-----
جه الملك شاف رؤيا وقام م النوم زعلان
طالع من نهر النيل بقرات سبعة سمان
وطالع وراهم سبعة نحاف وهزالهم بان
ومن العجب اللى شافه ان السبعة النحاف
كشروا قوى عن أنيابهم وأكلوا السبعة السمان
-----
وشاف فى الرؤيا كمان وحكاه للناس بيقين
سبع سنابل خضرة وسبعة كمان ناشفين
قال فسروا لى الرؤية وهاتوا علماء الدين
جمعوا السحرة والكهنة والكل كانوا واقفين
قالوا أضغاث أحلام وبتفسيرها جاهلين
-----
قال الساقى ابعتونى ليوسف أجيب تفسير
حكى ليوسف ع الرؤية قال يوسف أمر يسير
سبع سنين راح ييجوا هتلاقوا القمح وفير
كلوا ع القد وسيبوا الباقى جوا سنابله
لسبع سنين ييجوا قحط ويقل فيهم الخير
-----
وكمان زيادة ع الرؤيا ودا من علوم الله
من بعدهم جاى عام الخير كتير ماحلاه
ودا فضل ربى عليا أقول له لكم والله
رجع الساقى وحكى لهم ع اللى سمعه من يوسف
عجب الملك تفسيره وعجبه طريق لنجاه
-----
قال الملك دا يطلع دا يتسجن إزاى
رد يوسف ماطلعشى إلا البراءة معاى
خليه يجيب النسوة يحكوا اللى كان وياى
راحوا للملك وسألهم شفتوا على يوسف أيه ؟
ردت زوجة العزيز الغلطة ديا حداى
-----
عن نفسه أنا راودته ويوسف كان بريئ
وسجنه دا كان ظلم وكلامه كله حقيق
بفعلى ربى جزانى والتوبة ليا طريق
قال الملك فكوه هاتوه هنا ليا
راح يبقا ليا وزير واقرب من أى رفيق
-----
والملك قال ليوسف ياللى انت علمك زاد
فى منصب أيه هتفيدنا تخلى الخير يزداد
قال مسكنى الموارد مالية مع اقتصاد
أحافظ أنا ع الموارد كمان أنميها
واللى يعوز نديله والخير هتشوفه زاد
-----
القحط لما زاد ووصل لفلسطين
اخوان يوسف جم مصر العشرة وكانوا داخلين
على يوسف ماعرفوهوش وهوا عارفهم زين
قام قال لهم فيه أخ ليكو بقا من الأب ؟
قالوا هناك مع ابوه فى بلدنا هناك قاعدين
-----
يوسف بقا قال لهم لما هتيجوا تانى
تيجبوا أخوكم وياكم واتوصا بكم تانى
ولو ماجاشى أخوكم مفيش إدام تانى
وقال للعمال عنده حطولهم تانى بضاعتهم
قيل مايدروا فى رحالهم ويرجعوا تانى
-----
ولما وصلولا لابوهم قالوا له بقا اسمع
أخونا ييجى معانا لو كنا راح نرجع
لمصر فى سنين جايا ويكون لنا مطمع
ان احنا نحضر طعام ويوفوا لينا الكيل
وغير كدا مفيش سفر ومفيش طريق ينفع
-----
ولما قعدوا شوية وفكوا حمولتهم
لقوا بضاعتهم معاهم وشافوا شروتهم
يعنى مادفعوش حاجة وجابوا بغيتهم
قالوا شايف ياّبا إدينا بنيامين
لمصر فى رحلة جايه وكانت إرادتهم
-----
قال ازاى ااّمنكم ما أمنتكم على اخوه
أديكوا بنيامين كمان تضيعوه ؟ !!
ولو انتوا بقا صممتم معاكو راح تاخدوه
إدونى عهد وميثاق إن انتوا له حافظين
وتموتوا دونه كلكم ولا للغريب تسيبوه
-----
ادولوا بقا عهدهم وقال لهم ياولاد
لما توصلوا مصر خايف عليكو حساد
إدخلوا من كام باب دى نصيحة مع إرشاد
ولما وصلوا ليوسف خد بنيامين على جنب
وقال له أنا أخوك ودا سر كشفه بميعاد
-----
وقعد يفكر فى حيلة يقعد أخوه وياه
من بعد ماباع لهم شيئ عند اخوه خباه
فى حمولته اللى تخصه لشيئ فى علم الله
والعسكر ندهوا وقالوا حصلت هنا سرقة
صواع الملك اتسرق فضة جميل ماحلاه
-----
إخوان يوسف يردوا انتوا بتقولوا أيه ؟
احنا مش حرامية ولا الغلط ناّتيه
قالوا لهم اللى سرق يبقا جزاؤه أيه ؟
ردوا أكيد يبقا عبد للى سرق منه
وهوا دا شرعنا واللى كبرنا عليه
-----
يوسف بدا بتفتيش رحالهم قبل أخوه
ملقاشى الحاجة عندهم ولقاها عند أخوه
قالوا له إن كان سرق سرق قبل منه أخوه
قاصدين حكاية يوسف مع عمته من زمان
يوسف نده للعسكر ليا الحرامى هاتوه
-----
إخوان يوسف قالوا له بداله خد واحد
أى واحد مننا واحد قصاد واحد
منقدرشى نرجع لابوه ضاع له زمان واحد
رد يوسف حرام ناخد واحد تانى
اللص ياخد جزاؤه دى شريعة الواحد
-----
أخوهم الكبير قال لهم معاكو أنا مش جاى
إزاى أقابل أبويا أوريله وشى ازاى
هاقعد هنا لما اوصل لنجاة أخويا ونجاى
رجعوا لابوهم يقولوا ابنك سرق يابا
واسأل بلد كنا فيها واسأل مسافر جاى
-----
رجع تانى وقال صبرى صبر جميل
وحزنه عليه اشتد وهم وحزن تقيل
ضاعت عنيه م البكا كتير نهار مع ليل
وكان بيدعى الإله يارب بهم اجمعنى
ربى أجاب دعوته برؤيا افتكرها دليل
-----
ورجعوا اخوان يوسف تانى لبلد النيل
وقالوا جبنا بضاعة وفى لنا فى الكيل
وأبونا راجل كبير سايبينه ويله ويل
ادينا أخونا لله شال تاجه من على راسه
قالوا له انت يوسف ؟ فى الجبهة شامة دليل
-----
قالوا سامحنا ياخونا احنا أكيد إخوان
قام قال لهم متخافوش مسامحكوا ليا زمان
خدوا قميصى معاكو وتانى ارجعوا لكنعان
على وش أبويا حطوه عنيه تشوف النور
وهاتوا كل العيلة كبار مع صبيان
-----
قبل مايوصلوا ابوهم قام قال أنا شامم
الريحة ريحة يوسف أنا صاحى مش نايم
قالوا هتفضل كدا تفكر فى شيئ عادم
كام يوم وصل البشير حط القميص على وشه
رجع له نظره قوام وسبح الدايم
-----
ولما وصلوا لمصر كل ولاد يعقوب
وأمهم وياهم وبالطبع كمان يعقوب
ودخلوا بقا على يوسف سجدوا تحية وجوب
أخد بإيد أبوه وأمه وقعدوا هلى كرسيه
واتحققت الرؤيا وما كان فى علم غيوب
-----
نرجع لزوجة العزيز وزليخة كان الإسم
بعد العزيز مامات وصاب الهزال الجسم
وجمالها راح وانتهى مبقاشى منه رسم
ونظرها سابها كمان ودارت الأيام
أيه بس باقى لها غير توبة تمحى الإثم
-----
يوسف راكب فى الموكب سلطة وعز وجاه
لأنه نائب الملك ومكانته عالية حداه
زليخة واقفة حكوا لها ردت بقول ماحلاه
سبحانه جعل الملوك عبيد بعصيانهم
أما العبيد فملوك عشان أطاعوا الله
-----
ولما يوسف شافها قلبه لحالها رق
بعت لها مرسال على بابها قام راح دق
وقال لها اسمعى يوسف يقول وبصدق
لو كنتى متجوزة وفقيرة لكى إكرام
ولو عازبة يتجوزك قولى لى اّى أو لأ
-----
قالت له لأ أنا عازبة وانا يا سيدى أطول
إنى أبقا زوجة ليوسف واحظى الشرف وأنول
ويوسف اتجوزها ودخل بها على طول
ومن عجب التقاها لساها بنت بنوت
مالمسهاشى العزيز وفحولته كات فى ذبول
-----
يوسف قام وزوجته فى الليل بيدعوا الله
وربى من عليه وأكرمه ولباه
رجع لزوجنه بصرها وجمال قديم وبهاه
ورزقهم الذرية ( ميشا ) و( افرايتيم )
لتنين ولاد أنبيا وعاشوا فى طاعة الله
-----
اّدى قصة يوسف ياللى انت جيت وقريت
وخت العظة والعبرة وعلى النبلى صليت
أهلا ومرحب بيك لو رحت وللا جيت
أمانة بقا تدعى لى بالرحمة والغفران
وأشوف حبيبى النبى وأطوف بأول بيت
-----
هانئ الجمل
( 12 ) قصة سيدنا شعيب عليه السلام
--------------------------------
بعد الصلا ع الحبيب -- يارب نحظى بشفاعته
راح نحكى قصة شعيب -- ولأهل مدين رسالته
-----
كات أرضهم يا كرام -- موقعها فين بإيجاز
كات مما يلى الشام -- نزولا بأرض الحجاز
-----
أشرار كمان طماعين -- ما فى حد ينفع صديق
بيغشوا فى الموازين -- قطاع كمان للطريق
-----
بياخدوا ع الميه عشرة -- من أى واحد معدى
لو حتى قديم عشرة -- والدفع فورى ونقدى
-----
والكيل كمان غشوا فيه -- ماهو والموازين تمام
زايد قوى لو شاريه -- ويبيعه ينقص تمام
-----
وشعيب بينصح يذكر -- إن الحلال اللى باقى
ما حد منهم يفكر -- والقلب مقفول نهائى
-----
وشعيب له حجة واضحة -- هو خطيب لنبياء
بينة وخاصية واضحة -- من عند رب السماء
-----
البينة أيه منعرفش -- جملة ذكرها الكتاب
عن كنهها ما تسألش -- ودا الأدب يا حباب
-----
يقولوا له مش فاهمين -- يعيد فى نصحه إليهم
فى قرارة نفسهم عارفين -- والكفر جوا ماليهم
-----
وقالوا للى وياه -- فى دينا ترجعوا تانى
لترحلوا انتوا وياه -- ومفيش بقا حل تانى
-----
ردوا ماعادشى بإيدنا -- دوقنا حلاوة الإيمان
وان كان ربى يريدنا -- نرجع تانى لعصيان !
-----
إن كان دا فى الغيب مقدر -- هيبقا دا غصب عنا
غير ربى ما حد يقدر -- يجعلنا نترك إيمانا
-----
ومفيشى فى الدين إكراه -- على دينكو ليه تكرهونا
ما شوفتوا مننا إكراه -- وعايزين كمان تطردونا !
-----
يارب احكم ما بينا -- وبين قومنا علمك حداك
بالعدل احكم ما بينا -- مافى عدل أبدا سواك
-----
وشعيب بينصح لقومه -- وبيدعيهم للطهارة
ويهددوه طول يومه -- بالرجم بقا بالحجارة
-----
لولا أهلك بقا يا شعيب -- كنا رجمناك من زمان
قال لهم أنا معكم رقيب -- مدام رفضتوا الإيمان
-----
الصيحة والرجفة جاتهم -- وبيوتهم ماتوا فيها
ودى كات نهاية حياتهم -- كأن لم يغنوا فيها
-----
وأصحاب الأيكة كانوا -- فى حته كدا جنب مدين
على نفسهم برضوا هانوا -- كفار زى اهل مدين
-----
لما شعيب راح حداهم -- برضه بيدعى وصابر
الرد جه من حداهم -- إسمع أكيد انت ساحر
-----
نزل علينا دى السما -- متقطعة لو كنت قادر
سامعهم أكيد رب السما -- وفوق كل عباده قاهر
-----
حر شديد عاش معاهم -- أيام سبعة طويلة
بعدها فيئ جه واتاهم -- نزل نيران مافى حيلة
-----
هلكوا ودا كان جزاؤهم -- جزاء كفرهم والعناد
وفى الاّخرة النار جزاؤهم -- ربك مايرضى الفساد
-----
أصحاب الأيكة ومدين -- فيه رأى فيهم يا زين
دول كلهم يبقوا مدين -- أمة مفيش أمتين
-----
قولنا لكو بقا بالأمانة -- الرأى مع رأى تانى
إدعوا لى ياللى معانا -- فى الاّخرة ألقا التهانى
-----
واحظى بشفاعة حبيبى -- بيمينى اّخد الكتاب
وفى الجنة اجاور حبيبى -- وادخلها وبدون حساب
-----
هانئ الجمل
( 13 ) قصة سيدنا موسى عليه السلام
----------------------------------
الجزء الأول
-----
أبدأ أنا بالصلا على حبيب الله
اللى الإله اصطفاه من كل خلق الله
ودا لطهارة قلبه من بين عباد الله
رسول أتى بالرحمة يهدينا دنيا ودين
أتى بذكر حكيم قراّن كريم ومبين
من وحر قراّنا راح نحكى يا مستمعين
عن واحد من أولى العزم موسى كليم الله
-----
من قديم الأزل ومصر فيها فرعون
استخف بقومه أطاعوه ورضوا بالهون
نصب نفسه إله وأمره هو يكون
أما بنى اسرائيل قالوا هيظهر نبى
وميعاده الأيام دى وربنا هيجتبى
النبى دا مننا ونبقا أهل النبى
بس الموضوع دا سر خليه بينا يكون
-----
فرعون بقا شاف رؤية سلطانه دا بيزول
جمع كل الكهنة يسمعوا منه القول
وقال لهم فسرولى عايز كلام معقول
قالوا هييجى ولد ملكك يروح بإديه
قال اعمل حسابى واليوم دا انا ما اخليه
إنه ييجى أبدا اّدى القرار وما فيه
أى ولد يتولد من ساعته يكون مقتول
-----
فضل ع الحال دا فترة والظلم عم البلاد
وأشار عليه جماعة بيفهموا فى الاقتصاد
علشان الشغل يمشى يلزمنا عمال جداد
ادبح مواليد سنة وسيب سنة تانية
مواليدها دول يكبروا ويبقوا إيد بانية
وبرضه تحت عنينا ما يغيبوا ولا ثانية
فرعون وافق رأيهم مرضيش يسوق فى عناد
-----
وكان فيه راجل صالح اسمه ياناس عمران
وبنته اسمها مريم وماعندهوش صبيان
نفسه يخلف ولد يبقا سند وأمان
ربى أجاب دعوته بعت له ابنه هارون
جه فى سنة السماح لا دبح ولا يحزنون
والحمل التانى ظهر وخافت أم هارون
لأنه لو جه ولد راح يبقا فى خبر كان
-----
ولما تم الوضع وسيدنا موسى اتولد
خافت أمه عليه والوقت عايشاه فى كمد
قام ربنا أوحى لها قومى رضعى الولد
وإذا انتى خوفتى عليه اعمليله صندوق
وحطى الصندوق فى النيل الموج يشيله بذوق
واوعى تخافى عليه هنرده ليكى مرزوق
وكمان هيبقا نبى ورسول يا أم الولد
-----
ونزلته فى البحر وأخته بقا مراقباه
ونسيم يداعب شعره عليه محبة أله
ويوصل الصندوق لقصر جميل ماحلاه
حملوه لصاحب القصر طلع يا ناس فرعون
قال دا ولد اقتلوه ودا أمر حالا يكون
وكانت زوجته عاقر وخلفها مش مضمون
قالت له سيبه لخاطرى زى ابنى أنا حباه
-----
أما الولد راح يبكى عايز يا ناس يرضع
وأى مرضعة تيجى عنها بيتمنع
أخته قالت لهم فيه واحدة راح تنفع
راحت وجابت أمه حملته وله بتضم
مسك الولد صدرها وحنانها له بيعم
وعاد موسى إلى أمه وزال الأسى والهم
قالوا لها ربيه لنا وبعد الفطام يرجع
-----
ولكى علينا الكسوة والأكل والإكرام
وأى حاجة تعوزيها دا مننا إلزام
وكل فترة ليكى من عندنا إنعام
ولما تم الفطام رجع لبيت فرعون
واتربى على إيد أساتذة وبقا فتى موزون
علم وقوة وشباب من شافه به مفتون
وعرف الفرعون مش ابوه وإنه إبن كرام
-----
ماشى فى المدينة فى يوم لقى فى الشارع اتنين
واحد بيضرب التانى وله قوى بيهين
والتانى دا من شيعته والأول من الفراعين
قام اللى من شيعته قال له انجدنى م اللى انا فيه
عايز يشغلنى سخرة ومليشى قدرة عليه
قام موسى زغد الظالم شوف الضربة عملت أيه
الضربة دى قتلته بقا قلب موسى حزين
-----
وقام يستغفر ربه على كل أفعاله
ويقول انا ليه اضربه مالى أنا وماله
وهو ماشى فى الشارع مشغول كمان باله
التقى نفس الراجل به بيستنجد
قال له انت غوى مبين اسكت بقا واهمد
وراح عشان ينجده والناس عليه تشهد
شوفوا الراجل قال أيه والبلوى جابهاله
-----
قال له فيه أيه ياموسى انت عايز تقتلنى
زى اللى قتلته امبارح اللى كان بقاتلنى
هو انا ماشبعتش ظلم تيجى انت كمان تظلمنى
والناس عرفوا ان موسى هو كان القاتل
لخباز الفرعون قام قالوا ما نماطل
لازم نقتل موسى راجل قصاد راجل
قام واحد عنده إيمان راح قال له إسمع منى
-----
إسمع نصيحتى يا موسى سيب البلد وامشى
اجنمعوا وهيقتلوك ودا أمر مايكونشى
ومفيش معاهم حيلة دول ناس ماترحمشى
مشى موسى فى الليل وساب البلد ليهم
مشى وشرق بعيد ماتطوله أيديهم
لقا بنتين بيرعوا راح وسقى ليهم
فى زحمة الرعيان ورجال ماتخدمشى
-----
واحدة م البنتين قالت ياريت يعمل
بالأجر هنا عندنا يا أبتى أيه تعمل
شاب قوى وأمين وفى أى شيئ يعمل
أبوها قام قال لها روحى بقا وناديه
خليه يجيلى هنا علشان كمان أجازيه
بالمرة نسمع منه ونشوف حكايته أيه
يارب حكمك ماشى فى أى شيئ تعمل
-----
وموسى راح فى الضل وقعد يناجى الله
يا رب أنا لك فقير وغيرك أنا ما اخشاه
جات واحدة م البنتين ماشية فى حياء مالكاه
قالت له كلم ابويا عايزك عشان يجازيك
حق ماسقيت لنا ربى يبارك فيك
قال لها قدامك هامشى قالت وراك هاهديك
ولما وصلوا أبوها موسى قعد وياه
-----
وحكى موسى حكايته للشيخ وكان صالح
بعض التفاسير تقول دا شعيب النبى الصالح
قال له نجيت م الظلم علشان راجل صالح
وقال له إسمع يا ابنى عايز أنا أناسبك
أجوزك بنت منهم إن قولت دا يناسبك
والمهر تمن سنين ولو عشرة من عندك
وافق موسى ع الشغل وأكيد دا زوج صالح
-----
ولما المدة انتهت موسى نوى ع الرجوع
وقال أنا راجع مصر زمانه اتنسى الموضوع
وأشوف أهلى وناسى قلبى بهم موجوع
وهو راجع وزوجته ماشيين سوا فى سينا
شاف نار ونور ع الجبل قال دا فرج لينا
وكمان أجيب منها أو ألقا هادى لينا
وانتو خليكو هنا رايح وليا رجوع
-----
طلع موسى ع الجبل واسمه جبل الطور
شاف النيران دى فى شجرة خضرة وفيها النور
وكل ما النار تزيد تكسيها خضرة ونور
وسمع كلام المولى وأمر بخلع نعال
لأنه فى مكان مقدس ومطلوب لبعض اعمال
وربنا اللى اختاره كليم مفيشى جدال
يروح لفرعون ينصح اللى أصابه الغرور
-----------
وإلى اللقاء فى الجزء الثانى من قصة سيدنا موسى عليه السلام
إن كان فى العمر بقية
هانئ الجمل
الجزء التانى
من قصة سيدنا موسى عليه السلام
--------------------------
وكلنا عارفين موسى كليم الله
يعنى فيه أحاديت بينه وبين الله
ومش هنسرد نص هنقول فقط معناه
يعنى أقول قال ربى وأكتب المعنى
وسيدنا موسى قال وبرضه اكتب المعنى
دا مبدأ فى كل القصص كلام وله معنى
ياللى انت معنا ادعى لى وتوفيقى بالله
-----
ربى قال له أيه فى يمينك رد هى عصاى
عليها أنا بتوكأ وأرعى أغنام حداى
ومصالح تانية اعملها طول ماعصايتى معاى
قال ألقها يا موسى سيدنا موسى ألقاها
وبص لقاها حية جرى خايف أذاها
ربنا أمره يشيلها شالها وبص لقاها
رجعت تانى عصاية ماسألش ليه وازاى
-----
وحط إيدك فى جيبك وطلعها من تانى
تلقاها بيضة تنور من علة ماتعانى
دول معجزتين لك يتكرروا تانى
وكدا يبقا انت جاهز تروح بقا لفرعون
قال ما أقدرشى لوحدى ابعت معايا هارون
لهم عليا تار وأخاف أن يقتلون
وأخويا أفصح منى والعقدة فى لسانى
-----
ربى أجابه لطلبه أرسل هارون وياه
يروحوا سوا لفرعون اللى شيطانه غواه
يقولوا له قول لين يفتكر ويخشى الله
رد فرعون وقال لكم إله غيرى ؟
أنا ربكم الأعلى دى جناتى وخيرى
وانا ربيتك فى بيتى وتيجى عابد غيرى
وكمان قتلت القبطى والفعل دا ما أنساه
-----
قال انا عملتها أيام ماكنت ضال
ودلوقتى أنا أدعيك لعبادة المتعال
أنا أريد لك خير افهم بقا الأقوال
فرعون طلب الدليل موسى أظهر الاّيتين
قال فرعون انت ساحر ودا شغل دجالين
وقال اجمعوا السحرة مهما يكونوا فين
يردوا هنا على سحره ويخلوا حاله حال
-----
ميعادنا امتى يا موسى وقتك خده بحرية
رد يوم الزينة والناس ييجوا ضحوية
واجتمعوا فى الميعاد والناس فى حيرة شوية
والسحرة قالوا لنا أجر لو كنا احنا الغالبين
قال فرعون دا طبيعى وتكونوا مقربين
وقالوا هتلقى يا موسى وللا احنا أول ملقين
قال موسى ارموا الأول وانا بعديكم بشوية
-----
رموا الحبال بتاعتهم وعصيان شمال ويمين
وقالوا بعزة فرعون احنا نكون الغالبين
ورمى موسى عصايته بقت تعبان كبير
سحركم هيبطله ربى ربى عليم وقدير
وتعبانه أكل تعابينهم جميعها كبير وصغير
والسحرة اّمنوا بموسى رسول رب العالمين
-------
فرعون قال تاّمنوا من قبل إذن منى
هتشوفوا ازاى عذابى وازاى تخافوا منى
من خلاف اقطع اطرافكم وصلبكم مستنى
قالوا له اعمل مابدالك يعنى هيجرى أيه
دنيا الكل مفارقها وفراقها دا بعده أيه
بعده نقابل إله يغفر لنا وندعيه
قام قال لهم كدا ياما هتشوفوا منى كتير
-----
وشوية مع فرعون قالوا له بقا ازاى
تسيبه كدا بعمايله منتاش إله ازاى
قام قال انا اوريه شغله وكلامه يكون ازاى
قومه اللى عايز ياخدهم راح اوريهم الويل
هاقتل الصبيان والباقى يعيشوا الويل
ودا يبقا إذلال ليهم وارثينه جيل ورا جيل
يروح بقا يشوف نفسه هياخدهم بقا ازاى
-----
وقوم موسى قالوا له قبل متيجى اتأذينا
وبرضه بعد ماجيت شايف أهو اتأذينا
فكرنا لما هتيجى انك بقا هتحمينا
قام قال له اصبروا ربى مع الصابرين
قادر يهلك فرعون ويهلك الظالمين
وفى الأرض يستخلفكم وتكونوا لها وارثين
قالوا له امتى الكلام ده عجل بقا لينا
-----
ولما زاد فرعون فى الظلم والطغيان
أرسل عليه اّيات الواحد الرحمن
وأول الاّيات كانت بقا الطوفان
خلا فرعون وقومه يتحبسوا جوا البيوت
لا يقدروا يخرجوا ولا شغل ولا فيه قوت
فرعون قال لموسى ادعى ربك الأزمة تفوت
وبعدها خد قومك وروحوا فى أى مكان
-----
وبعد الطوفان ما راح رجع فى كلامه فرعون
ولحس كلامه اللى قاله ولا عهد ولا يحزنون
ربى بعت اّية تانية جراد والخراب مضمون
واللى حصل فى الأولى حصل وفى التانية
فرعون قال ادعى يا موسى ووعده بالتانية
والاّية لما بتنزل ما تضر ناس تانية
والضرر يحصل بس لاّل وقوم فرعون
-----
وفضلوا ع الحال دا ياما حصلت كتير اّيات
بعد الجراد القمل والضفادع من الاّيات
بعد الضفادع الدم ما اعتبروا من الاّيات
وفرعون قال لهامان ابنى لى بنا عالى
من فوقه يمكن نشوف إله موسى طوالى
وسخروا قوم موسى فى أيام وليالى
والقصد الاستهزاء من موسى والدعوات
-----
ولما كتر الأذى على قوم موسى أضعاف
وفرعون كتير يؤذيهم ومن موسى ما يخاف
قالوا بقا نسيب مصر حل مفيهشى خلاف
وانتهزوا لأول فرصة وكان لهم يوم عيد
قالوا رايحيين نحتفل وكان دا منهم كيد
واستلفوا كتير م الدهب وحلى ولبس جديد
م المصريين جيرانهم ودى سرقة مافى خلاف
-----
مشيوا بقا وشرقوا وفرعون معندوش خبر
شوية جاله الخبر جمع جيشه ما اصطبر
لحقهم عند البحر وفكر بيهم ظفر
موسى ضرب بعصاته البحر بقا نصين
عبر هو وقومه والأرض يابسه يقين
نزل فرعون وجيشه ورا موسى وقومه عابرين
طبق البحر على فرعون ومحدش من جيشه عبر
-----
واللى غرق أهو غرق والجيش دا معظمه مات
وقوم موسى ينظروا ويشوفوا دى الاّيات
وازاى ربى نصرهم والنصر له علامات
وفرعون بعد الغرق أدى جثته طافية
ربنا أظهره لهم والجثة مش خافية
عرفوه بقا من لبسه ودرعه العلامة وافية
نهاية للمتكبر وياما شوفنا اّيات
-----
بعد ما سيدنا موسى عدا وقومه بسلام
فاتوا بقا على ناس بيعبدوا الأصنام
طلب قومه منه اّلهة وزيهم أصنام
قام قال لهم دا حرام ولسه شايفين اّيات
دول ناس خسرانين وأعمالهم دى حسرات
بيشركوا بالله ياما هيشوفوا عذابات
وأخد قومه ومشيوا رايحيين ليم الشام
-----
وشافوا بيت المقدس وفيه أقوام قاعدين
كانوا كنعانيين وناس تانية وحيثيين
موسى قال لقومه ادخلوا قالوا لأ دا جبارين
مانقدرش دول نحاربهم دول أقوام شداد
ما نقدرشى إحنا عليهم ولو زدنا فى التعداد
كل اللى نقدر عليه نقعد هنا بالكاد
روح انت وربك قاتلوا واحنا هنا قاعدين
-----
طبيعى ربى عاقبهم لأنهم ظالمين
حكم بالتيه عليهم فى سينا ياما سنين
وأما عدد السنين كما ورد اربعين
وموسى طلع الجبل وكانت هناك مناجاة
لأن سيدنا موسى عارفين كليم الله
بعشر كلمات ربنا أمره بها ووصاه
يبلغها لكل قومه ويكونوا بها عاملين
-----
واحد عبادة الله واحد مفيش غيره
اتنين ماتحلفشى بالله ماتخافش من غيره
تلاتة الحفاظ ع السبت والشغل يوم غيره
الرابعة اكرم ابوك وامك بقا على طول
ساعتها هيطول عمرك وهتلقا من الله قبول
الخامسة اوعاك تقتل أو بإيدك يكون مقتول
يعنى لا تقتل دا كلام الرب ما فى غيره
-----
السادسة لا تزنى السابعة لا تسرق قليل أو كتير
التامنة ما تشهدشى زور تراضى وزير أو غفير
التاسعة اوعاك تبص على أى بيت للغير
والعاشرة ما تشتهيش أبدا زوجة صاحبك
أو تشتهى يكون عندك حاجات حدا صاحبك
عبيد أو إماء أو طور أو حتى حمار صاحبك
م الاّخر بقا ما تحسدش الحسد دا وزر كبير
-----
وألى اللقاء فى الجزء التالت إن شاء الله
الجزء التالت والأخير
من قصة سيدنا موسى عليه السلام
---------------------------
أما بقا أكلهم المن بداية النهار
ياخدوا بقا كفوهم لحد اّخر النهار
وطائر السلوى ييجى لعشاهم اّخر النهار
قالوا عايزين يا موسى عدس وبصل مع فول
قام قال لهم استحوا إزاى تقولوا دا القول
الأغذية دى رديئة بقا دا كلام معقول
تستبدلوا الرديئ بنعمة إله غفار
-----
وكمان فى فصل الصيف كان يبقا عليهم غمام
عشان يداروا فى ضله منحة إله علام
دا فضل من ربنا ونعمة مافى كلام
وكام معاهم حجر جايبينه صلب متين
موسى ضربه بعصاه فتح اتناشر عين
يشربوا وياخدوا حاجتهم ولكل سبط عين
ويخزنوا لو أرادوا ليومين تلاتة قدام
-----
وموسى عشان الميقات صام تلاتين يوم
وزادوا عشرة كمان بقوا أربعين يوم
وطلع موسى الجبل يكلم القيوم
قال يارب أشوفك قال له لن ترانى
ولكن شوف الجبل لو استقر ترانى
والجبل بعد التجلى بقا فوقيه تحتانى
وفاق موسى من الإغماء واستغفر القيوم
-----
رجع موسى م الميقات ومعاه الألواح
فيها أصول الدين وطريق إلى الإصلاح
لقى قومه عبدوا العجل قام رمى الألواح
وقال لهم دا حرام الفعل دا ملعون
إزاى تعملوا كدا ومسك بدقن هارون
هارون قال له نصحت ماتظنش بيا الظنون
ولما موسى هدى أخد تانى الألواح
-----
وقال له يا سامرى عملت بقا كدا ليه ؟
قال لميت الدهب مسروق وناصبين فيه
وقبضة كمان من أثر الرسول وضفت عليه
عملت منهم عجل دهب كمان له صوت
دعا موسى عليه ( لا مساس ) لحد الموت
وبعد الموت جهنم هيبقا ضمن القوت
ودا جزاء على فعله وجزاء ماعملت إيديه
-----
وموسى جاب العجل نسفه وكانوا شاهدين
دراه كمان فى البحر ودا كلام بيقين
وموسى قال لقومه انتم أكيد ظالمين
ظالمين بقا لأنفسكم تلزمكم التوبة
علشان عبدتوا العجل تغسلكم التوبة
تقتلوا اللى عبدوا العجل وهى دى التوبة
ويومها كان مشهود وقتلى كتير واقعين
-----
وأما حكاية البقرة راجل كبير له مال
وولاد أخوه عايزين موته فى استعجال
علشان بقا يورثوه وهوه مالوهشى عيال
واحد منهم قتله ورماه كدا فى الطريق
قالوا ياترى دى العملة لعدو وللا صديق
وراحوا يسألوا موسى ندبوه بقا لتحقيق
قال لهم ادبحوا بقرة قالوا دى تريقة وابتذال
-----
قالوا له ليه بتتمهزأ قام قال لهم دا الأمر
قعدوا بقا بيجادلوا ويشددوا فى الأمر
وكل مايشددوا يشتد عليهم الأمر
ويسألوا عن اللون والسن وصفاتها
فى الاّخر التقوها واشتروها دى بذاتها
وهم كمان بدبحوها شاكين فى صفاتها
ودى طباع اليهود .. جدال فى أيها أمر
-----
وبعد مادبحوها قطعوا حتة لحم
ضربوا بها القتيل رجعت له روحه يا عم
وقال قتلنى فلان بكلام واضح للفهم
ومن ولاد أخوه واحد كان القاتل
طمعان بقا فى الميراث ع الدنيا بيتقاتل
خسرت دنياك واّخرة كمان عشان قاتل
ولما راح تيجى سيرتك تيجى مصحوبة بالذم
-----
وف يوم واقف بيخطب فى وسط قومه موسى
سألوه بقا مين أعلم رد أنا موسى
وماردش لله فضله يمكن نسى موسى
ربنا أخبره فيه أعلم فيه عبد م الصالحين
تروح هناك هتلاقيه عند مجمع البحرين
وهناك هيسيبكوا الحوت وفى الميه م السالكين
أخد غلامه والحوت ومشى بقا موسى
-----
أخدوا بقا وجهتهم وفضلوا كدا ماشيين
ولما موسى جاع سأل غدانا يا غلام فين ؟
قال له امبارح الحوت فى البحر م الساربين
قال له عارف المكان رد أكيد عارفه
وقاموا فى الطريق راجعين مدام الغلام عارفه
وصلوا المكان بيقين موسى والغلام خلفه
لقوا راجل صالح قاعد عليه نور الذاكرين
-----
قال له السلام عليكم رد عليه السلام
أنا موسى إسرائيل جى ورايد العلام
تعلمنى بقا من علمك دا فضل مع إكرام
قال مش هتقدر تصبر على المسير وياى
علشان ماعندكشى علم بأيه بقا وياى
ومنين يجيك الصبر والحكمة ديا حداى
قال له إن شاء الله اصبر واطاوعك مفيشى كلام
-----
قال له بقا إن ماشيتنى تمشى ماتسألنيش
واعمل اللى اعمله وعنه ما تسألنيش
استنى لما ابقا أقول لك وبرضه ما تسألنيش
مشيوا شوية كمان قاموا التقوا مركب
عزموا عليهم يركبوا أصحاب المركب
الخضر قام جاب وتد وقام خارق المركب
قال موسى كدا يغرقوا دا فعل مايعجبنيش
-----
قال مش قولت مش هتصبر قال نسيت الحال
ومشيوا وشافوا ولد بيلعب مع الأطفال
الخضر أخده وقتله موسى قال فى الحال
تقتل نفس زكية دا شيئ مايرضيش حد
قال مش قولت لك مش هتصير رد كلامى بجد
إن سألتك التالتة لمسيرنا هنوضع حد
ماتصاحبنيش بعدها وكل واحد فى حال
-----
مشيوا التقوا أهل قرية سألوهم طعام وشراب
ملقوشى منهم رد ولا لقيوا أى جواب
شاففوا جدار متهدم الخضر بناه يا أحباب
موسى قال بعدها كنا بنينا بأجر
الخضر قال دى التالتة خلص مابينا الأمر
تعالا بقا أشرح لك اللى ماطيقتش صبر
عليه بقا راح أقول اسمع بقا دا الجواب
-----
المركب دا كان بتاع عيال مساكين تمام
وكانوا يتبعوا ملك لو شاف مركب تمام
ياخدها كدا بالقوة والغصب والإرغام
حبيت أعيب المركب على مايعدوا عليه
يقوم يشوفه وحش والمركب يزهد فيه
إنما لو كان سليم كان حلى فى عنيه
ويروح ساعتها المركب على المساكين بتمام
-----
أما الواد اللى قتلته كان ابوه وامه صالحين
خوفنا ان كبر يتعبهم ويطلعهم م الدين
أما الجدار كان فى بيت ورث بقا لولدين
وكان أبوهم صالح وهم أيتام صغار
وكان فيه كنز كبير مدفون وتحت الجدار
وعشان بقا مايظهرشى بنيت عليه الجدار
ولما بقا يكبروا للكنز يكونوا واخدين
-----
وتبص للى عملته يمكن بقا تلقاه
يخالف علم عندك علمك له الله
واللى عملته مش منى دا من علوم الله
دا كله أمر ربى وماليش حاجة فى الأمر
الملك لصاحب الملك له الملك والأمر
وكل اللى شوفته بعينك وماقدرتش عليه الصبر
مع علمك يبقوا نقطة فى بحر علوم الله
-----
وعن ميه وعشرين سنة سيدنا موسى مات
وكدا قصة سيدنا موسى وياما فيها عظات
وربى بقا يسامحنى فى اللى اتنسا أو فات
وأمانة بقا تدعوا لى بالرحمة والغفران
واحظى برضا الرحمن واعبر صراطى بأمان
ويكون شفيعنا النبى سيد ولد عدنان
عليه السلام من ربى وأفضل الصلوات
-----
هانئ الجمل
( 14 ) قصة سيدنا داود عليه السلام
-------------------------------
يارب صل على محمد -- واّل محمد
هو رسول الله أشهد -- بعد التوحيد
-----
هنحكى من وحى القراّن -- إن شاء حنان
قصة نبى فى ماضى الأزمان -- وبنظم جديد
-----
داود نبى وشجاع مقدام -- مش عايزة كلام
والحق شهدت به الأيام -- وتاريخ بيعيد
-----
فى صغره كان بقا ويا طالوت -- هيحاربوا جالوت
بشجاعته موت وحده جالوت -- والعزم شديد
-----
ضربه واحده بمقلاعه -- قام جاب داغه
وبسيفه طير له دماغه -- كسب التأييد
-----
بقا ملك على إسرائيل -- وله التبجيل
وكمان نبى ينتهى لخليل -- نسبه بتأكيد
-----
عارف علوم الدنيا ودين -- والعقل يزين
والعدل من رب العالمين -- منحة لرشيد
-----
وساد قومه بقا بالحكمة -- وعدل ورحمة
إجتمعوا تحت راية واحدة -- بقا جيشه شديد
-----
نزل عليه من ربى زبور -- عظات فيها نور
عبر وكان واضح مشهور -- يهدى ويفيد
-----
وربى رزقه حلاوة الصوت -- تفتن ملكوت
جبال وطير والجن يفوت -- يسمع وسعيد
-----
يرجعوا كلامه وياه -- فيه ذكر الله
عطية له بقا من مولاه -- بها وحده فريد
-----
ومعجزة له مع تبيين -- من رب متين
يطرى فى إيده بدون تسخين -- قول أى حديد
-----
يشكله يصنع فى دروع -- وصيته مسموع
يكسب كتير ودا مش ممنوع -- دى صنعة إيد
-----
والأمر جاله ( قدر فى السرد ) -- مهارة بجد
تقب المسمار خليه ع القد -- حديد فى حديد
-----
كدا بقا القطعة متينة -- وصنعة رصينة
تعيش سنين كدا فى إيدينا -- وبدون تيديد
-----
وربى أعطاه حسن بيان -- وفصاحة فى لسان
الرأى ييجى معاه برهان -- والحكم رشيد
-----
وف مرة قاعد فى المحراب -- يعبد وهاب
اتسوروا البدو المحراب -- مافى ذوق هيفيد
-----
طبيعى موقف خلاه خاف -- قالوا ماتخاف
جايين بقا عايزين إنصاف -- وحكم يفيد
-----
أخويا له تسعة وتسعين -- نعجة حلوين
حيلتى أنا نعجة مش اتنين -- وبدون تزويد
-----
بيلح لياخدها منى -- ماشى يلاحقنى
إحكم بقا بينا وظنى -- رأيك دا سديد
-----
قال له أكيد أخوك ظلمك -- وكلامه همك
إزاى ياخد غنمة منك -- فيه عنده مزيد
-----
داود بعدها حس بذنبه -- استغفر ربه
شوفوا داود بقا شوفوا أدبه -- مع رب شهيد
-----
حس بأن الناس عايزاه -- والحكم حداه
بيقضى كتير فى عبادة الله -- فى محرابه وحيد
-----
الناس لها حق فى وقته -- يوزع وقته
ويخلى بعضه لعبادته -- ودا رأى سديد
-----
وربنا غفر له الزلات -- وعده بسعادات
هيبقا له بعض القربات -- من رب مجيد
-----
وأى رواية تانية ياحضرات -- إسرائيليات
إزاى نبى يعمل حاجات -- بتشين ماتفيد
-----
وقصة تانية يا إخوان -- عقب سليمان
وحكمه فيها هو اللى كان -- كان حكمه سديد
-----
أما القصة بدون تطويل -- فيه زرع جميل
وصاحبه يصرف ماهو بخيل -- على زرع جديد
-----
وغنم لواحد داست الأرض -- طول مع عرض
شكوا لداود بقا كان له رد -- قاسى وشديد
-----
صاحب الأرض له الغنمات -- تعويض بالذات
صاحب الغنم سكنته حسرات -- بقا خالى الإيد
-----
وبعده يحكم سليمان -- قال بالإمكان
صاحب الغنم يصلح ماكان -- للأرض يعيد
-----
وصاحب الأرض له الغنمات -- ياخد الخلفات
وكمان لبن والصوف بالذات -- وبدون تبديد
-----
تصلح الأرض ترجع -- كله يرجع
للأصل يرجع دا الأنفع -- ودا حكم سديد
-----
ربى بقا فهمهاله -- وعرفهاله
الكل بقا يرضى بحاله -- والكل سعيد
-----
قبل ماننسى يا أهل الخير -- فيه لغة الطير
داود عارفها بدون تقصير -- وفاهمها أكيد
-----
كدا بقا قصة داود -- قولناها فى حدود
وفقنا فيها ربى المعبود -- ودا بالتأكيد
-----
وأمانة تدعولى يا إخوان -- برضا الرحمن
وصراطى أجرى عليه بأمان -- أعبره ما أحيد
-----
ولو فى العمر تانى بقية -- لينا بقية
قصص رسل مع أنبيا -- يفعل مايريد
( 15 ) قصة سيدنا سليمان عليه السلام
-----------------------------------
بدايتنا هنا بالصلا على الرسول الأمين
رسولنا رحمة لنا ورحمة للعالمين
أتى بدين الحق وهدى وقراّن مبين
من وحى قراّنا نحكى لكم ياخوان
فى سلسلة القصص عن أنبيا الرحمن
قصة نبى وكان ملك هو النبى سليمان
ورث سيدنا داود فى نبوة ورأى مبين
-----
كان بيشارك أبوه فى مجالس الأحكام
وكان له أراّء حكيمة تعكس كتير إفهام
والحكمة منحة ربى تيجى فى صورة إلهام
وكان سليمان حكيم فى الحكم عنده حضور
عارف طباع الساسة والجند ودا مشهور
درس العلوم على والده حافظ كمان الزبور
وعارف لغة الطير منحة إله علام
-----
هنحكى فى صورة صور اللى جرى وما كان
أحداث حصلت فى حينها مع النبى سليمان
ونعرف الحكمة فين ونقدح الأذهان
أول صورة ويانا نملة بتتكلم
تكلم نمل معاها تؤمر كمان تحكم
كأنها ملكتهم ويمكن الله أعلم
شوفوا قالت أيه ووحدوا الديان
-----
يا أيها النمل ( ادخلوا مساكنكم )
أحسن سليمان وجيشه ييجى يحطمكم
ومش هيحسوا بموتكم أدينى قولت لكم
سمعها سليمان ضحك قال ربى أوزعنى
أشكر كتير نعمتك ع الشكر قدرنى
واعمل عمل صالح ترضاه وأدخلنى
فى عبادك الصالحين فضل عظيم منكم
-----
ودا درس من ربنا مقصود به التعليم
لنبى الله ولنا والقصد منه عظيم
إن لله ممالك وفيها خلق فهيم
مهما صغر جسمهم لهم نظام وسلوك
ويسعوا ورا رزقهم ولهم جيوش وملوك
لهم كمان فى البلاغة والمعنى جاى محبوك
إفهم بقا يا ابن أدم وخلى قلبك سليم
-----
أصل مظاهر الملك لما تيجى لإنسان
ممكن بقا تشغله عن أصله واللى كان
وينسى حكمة خلقه وعبادة الديان
ويبقا عمله فى حياته ماشى وفق هواه
وميصلحشى نفسه ويبعد عن مولاه
وتشوف شيطانه يشغله وتبقا حياته ملهاة
ويمكن يجاوز حدوده فى كتير من الأحيان
-----
أما حكاية الهدهد ودا طير بحق عجيب
يمشى أمام الجند ودا مهوشى غريب
عن أى ميه يفتش بعيدة وللا قريب
سليمان قال مش شايفه وللا من الغايبين
يبقا كدا هادبحه أو ييجى بسلطان مبين
شوية جا الهدهد من الجنوب بيقين
وبكل ثقة قام واقف ومن سليمان قريب
-----
وقال له عندى علم لسه عليك غايب
شوفت مرة بتحكمهم رجالة بشنايب
وليها عرش عظيم جميل حوى عجايب
الناس دول فى سبأ ومعاهم الشيطان
زين لهم أعمالهم وبيعملوا البهتان
بيسجدوا للشمس من دون إله ديان
يعلم سر وعلن مافى عنه شيئ غايب
-----
سيدنا سليمان عارف إن الخبر دا يقين
وقال هنشوف صدقه وللا من الكاذبين
علشان كدا ننتظر وللخبر نستبين
خد كتابى فى الحال وبه تطير على طول
توصله لملكتهم بشكل يكون معقول
وكان الكتاب مختصر وفيه عبارة بتقول
( ألا تعلوا على وأتونى مسلمين )
-----
قرت الملكة الكتاب وفهمت اللى فيه
جمعت بقا قومها وحكت جميع ما فيه
وقالت شوروا عليا وقولوا رأيكو أيه
قالوا لها إحنا قوم زى ما عارفة شداد
أصحاب قوة وبأس سالكين فى أى جهاد
شوفى انتى رأيك أيه واحنا وراكى شهاد
وأى قرار تاخديه إحنا موافقين عليه
-----
بلقيس طبعا عارفه الحرب مفيهشى هزار
وأكيد سليمان جاهز وكلامه دا إنذار
وكمان دا صاحب ملك وجيش غاوى الأخطار
قالت على مهلكم هابعت له أنا هدية
واشوف الرسل يرجعوا يقولوا أيه ليا
ويبقا حظنا حلو لو منا قبل الهدية
أما بقا إن رفض هنطيعه صغار وكبار
-----
رد سليمان الهدية وقال جايبين لى مال
أنا عندى أكتر منكم ملكى هبة متعال
رد الرسل بالهدية وقال انتظروا قتال
هاجى لكم بجنود ما تقدروا عليهم
ولا تقدروا تحاربوهم ولا ليكو طاقة بيهم
وتطلعوا من بلدكم أذلة بإديهم
ودا عزم منى أكيد أفعال مهيش أقوال
-----
شوية قال للحاشية مين فيكو يأتينى
بعرشها وبسرعة بكامله ويجينى
عفريت من الجن حاضر قال ماتوصينى
أنا أجيبه لك قبل من القعدة تقوم
وقال اللى فاهم وعنده من الكتاب علوم
قبل ماترمش أجيبه بصوا لقوه مرسوم
قال سبحانك يارب .. يا رب نجينى
-----
وقال نكروا عرشها وغيروا لها فيه
نشوفها بقا تعرفه وللا هتعمل أيه
ولما جات بلقيس قالوا ادخلى بقا فيه
سألوها دا هوا عرشك قالت كأنه هوه
وفكرت فيه ميه على أرضه من جوه
كشفت بقت عن ساقها قال لها بدون قوة
دا ممرد من قوارير ومفيشى ميه فيه
-----
قالت ظلمت نفسى وسمعوها الحاضرين
وأسلمت مع سليمان لرب العالمين
كانت بعيدة عن الفطرة وقومها كانوا كافرين
ولما بقا أسلمت قدام جميع لشهاد
أسلم معاها كل قومها وما عاد فيهم إلحاد
وأهل القصص بيحكوا جواز لها وإشهاد
من سليمان ولكن مفيشى علم يقين
-----
وأما الريح معجزة تحير الأذهان
بأمر الله مسخرة للنبى سليمان
لا قبله ولا بعده سخرها ربنا لإنسان
كانت بتجرى رخاء بأمره حيث يشاء
بتطاوعه فى المرواح تطاوعه كمان إن جاء
لأى مكان بها يوصل ربى أراد له وشاء
سبحانه ربى العاطى ربى كريم حنان
-----
أما حكاية الجياد وكانت صافنات
إستعرضها سليمان ذاكر رب النفحات
لما غابت الشمس وخلاص نهارهم فات
قام قال هاتوها تانى ردوها على سليمان
بقا يمسح على رقابها وعلى رجليها كمان
يمسح بإيدة الشريفة ذاكر إله منان
أما اللى قالوا دبحها وقعوا بقا فى غلطات
-----
أما حكاية الفتنة لسليمان وكان أواب
خلف ولد مش كامل تاب بعدها وأناب
وقال رب هب لى ربى انت الوهاب
طلب من ربى ملك يختص به لوحده
ماحدش بقا يملكه فى يوم يكون بعده
واللى عليه الإله راضى قولوا يا سعده
يزيد له فى النفحات وعليه يكون تواب
-----
وفيه عطاءات كمان لسيدنا سليمان
ربى أذاب له النحاس سخر له كمان الجان
يعملوا له قصور وتماثيل معاها جفان
والجفنة واسعة ياما حاجة شبه الجواب
والجن شغال بجد وإلا يلاقى عذاب
وكل دا بالأمر واللى عصى له حساب
يصفد فى الأغلال ويقعد كدا أزمان
-----
الموت علينا حق ولكل أجل كتاب
لما سليمان مات وهو فى المحراب
وعلى العصا مسنود حتى فى موته مهاب
والجن شغال بجد مادريشى إنه مات
الجن جاهل الغيب عكس كتير خرافات
ودلهم على موته نوع من الحشرات
أكل عصاته وقع وكل أجل له كتاب
-----
حكينا قصة حكيم هو النبى سليمان
فى محاولة يكون المعنى زى ماحكى القراّن
ومن وراء القصد ربى يا إخوان
أمانة بقا تدعولى تيسير كتير فى حساب
وننعم سوا بالجنة ماندوقشى أى عذاب
وارزقنا يارب توبة واقبلنا يا تواب
يا رب لجل النبى اختم لى بالإيمان
---------
هانئ الجمل
( 16 )
قصة سيدنا أيوب عليه السلام
( النظم مهدى إلى روح الفنان الشعبى زكريا الحجاوى )
------------------------------------------------
بدايتنا دايما بالصلاة على النبى
نبى عربى جاى م الأصول الطاهرة
يا رب صل على الحبيب المصطفى
صلاة كتيرة فى الزمان متواترة
يا رب انفعنا بالصلاة على النبى
وارحمنا بيها فى الأولى والاّخرة
الليلة راح نحكى يا سادة يا كرام
قصة نبى فيها المعانى ظاهرة
الإسم أيوب ابن موسى ابن زراح
يمتد نسبه للخليل دى تذكرة
إسرائليات تلقاها فى القصة كتير
تتنافى ومكانة النبوة الطاهرة
وقالوا عشان قبل النبوة بلوته
وجات النبوة لأن نفسه صابرة
أيوب كان له أملاك كتير وولاد كتير
وولاده ماتوا راحوا للدار الاّخرة
ومرض فى جسمه مرض عضال وألم شديد
وزوجته تلقاها كنفسه صابرة
وتقول له ادعى ربنا يشيل المرض
يقول لها دا مرضى لفترة قصيرة
وصحتى ياما عشت بيها من السنين
سبعين سنة صحة وجيوبى عامرة
لما المرض يوصل سبعين من السنين
ساعتها فى الدعا يبقا ليا المعذرة
وحلف عليها يوم بقا ان فارقه المرض
يضربها ميت سوط له ساعتها المعذرة
مرت سنين أيوب صابر فيها ع المرض
ومراته تجرى عليه وزيه صابرة
وف يوم أيوب حصلت له حاجة ألمته
خلت فى نفسه حاجات كتير متغيرة
( إنى مسنى الضر ) قالها لربنا
( وأنت ارحم الراحمين ) دلوقتى واّخرة
كشف ما به من ضر ربنا الكريم
رب الكرم والمرحمة والمغفرة
( إضرب برجلك ) أيوب برجله ضرب
عين ميه طلعت كات زلال ومكررة
شرب منها وكمان منها اغتسل
رجعت له صحته مع العافية الظاهرة
مراته رجعت لما شافته ماعرفتهوش
يا عم شوفتش مبتلى هنا لو ترى
أيام صحته كان أكيد كدا يشبهك
قام قال لها دا أنا أيوب يا صابرة
وربى خفف عنه بقا فى فدو اليمين
ضربها بعشبة كانت جنبه ظاهرة
ومات أيوب سنو تلاتة وتسعين سنة
ورواية قالت عاش أكتر ومين درا
ذو الكفل جا فى رواية يبقا ابن أيوب
وجا بعبادة تكون له هدى وتذكرة
كدا قصة أيوب يا اللى انت سمعتنا
من وحى قراّنا الكريم ومين قرا
أمانة تدعوا لى برحمة ربنا
وأنول فى يوم حسن الثواب والمغفرة
وتقل لى الميزان يا رب برحمتك
واحظى بشفاعة خير من وطأ الثرى
ولو فى العمر بقية مسيرنا نلتقى
نحكى قصص رسل وأنبيا طاهرة
-----------------------------
هانئ الجمل
( 17 )
قصة سيدنا يونس عليه السلام
------------------------
عليه الصلاة عليه السلام .. محمد نبينا الرسول الحبيب
رسول المحبة رسول السلام .. وهوا لقلبى الدوا والطبيب
حبه ضنانى وزاد بى الغرام .. وشوقى كتمته فضحنى اللهيب
فى حبك يا طه جفانى المنام .. وسكرى وفواقى أعيش الهيام
يا طه يا رحمة لكل الأنام .. عليك الصلاة وأزكى السلام
-----
هنحكى الليلادى بفضل الكريم .. قصة نبى كان رايح مغاضب
هنحكيها من وحى قراّن كريم .. ونبحث ونتعب عشان الحبايب
دا يونس ابن متى وحفظه الكريم .. فى ظلمات تلاتة تحت المراكب
حوته أما بلعه ما كسر العظام .. وماكانشى رزقه وأكله حرام
وأثنى نبينا عليه يا كرام .. عليه الصلاة عليه السلام
----------
قال الناظم يا سادة . الصلاة على النبى كنز السعادة . سيدنا يونس يا أهل
التفضيل . كان من أنبياء بنى إسرائيل . كان مرسل إلى أهل نينوى وربنا شاء .
ونينوى تبقا فى الموصل فى أرض العراق . سيدنا يونس راح يدعيهم للإيمان
محدش استجاب . فسيدنا يونس غضب يا أحباب . وسابهم ومشى وهوا فى حالة
الغضب . وأنا وأنتم نصلى على الهادى كريم الحسب .
----------
أول كلامى مدحت محمد -- صلاتى عليه دايما تتجدد
هو رسول الله أنا أشهد -- هو كمان خاتم الأنبيا
-----
ياللى انت جيت لنا رحمة ونور -- تهدينا لطريق النور
بعد التوحيد دايما مذكور -- فى كل أدان تسمعه بشرية
-----
يونس ابن متى نبى وجميل -- من أنبياء بنى إسرائيل
رايح بيدعى نهار مع ليل -- لعبادة الله وإخلاص النية
-----
قاعد بيدعى يلاقى صدود -- وميلتقيشى إيجاب فى ردود
يقول لهم دا واحد معبود -- ما شافشى منهم غير جحودية
-----
غضب عليهم غضبه ماليه -- من بعد لما ما أمنوش بيه
وقال فى نفسه أقعد هنا ليه ؟ -- سابهم ومشى راح يم المية
-----
شاف سفينة راسية قام راكب -- ركاب جايين راكب ورا راكب
كتر العدد ومفيشى لراكب -- مكان متاح ولا بالترضية
-----
وبقت السفينة فى عرض البحر -- وشوية إلا وهاج البحر
وريح تقيل مع موج البحر -- بقت السفينة لعبة فوق المية
-----
بقت السفينة لعبة بتتمرجح -- وأى شيئ فوقها بيتأرجح
قالوا عشان رحلتنا تنجح -- لازم نخف الحمل شوية
-----
هنطرح سهامنا ودا بقا واجب -- واللى تصيبه رميه مناسب
يمكن حدانا عبد وهارب -- من سيده وهو سبب فى أذية
-----
على يونس خرج السهم تمام -- مرة واتنين وتلاتة يا كرام
قالوا خلاص ما علينا ملام -- يونس بقا ارموه فى المية
-----
حالا إلهى بعت له الحوت -- يبلعه سليم مضبوط
لجوفه يعدى ومهما يفوت -- على أى صعب مفيشى أذية
-----
فى الضلمة سيدنا يونس تاب -- رجع لربه تاب وأناب
علشان خروجه لواهى أسباب -- من نينوى ومجاهدشى شوية
-----
قعد فى بطن الحوت بقا كام ؟ -- ربى أعلم بعدد ليام
رواية يوم وتلات أيام -- وفيه أربعين ليلة عددية
-----
قاعد يسبح فى الظلمات -- فى بطن الحوت جوا يا حضرات
وسمع تسبيح لمخلوقات -- كتيرة عايشة جوا المية
-----
وسمعت الملايكة شكايته -- وقال لهم ربى على حكايته
واتشفعوا ليونس ولحالته -- وتاب عليه رب البشرية
-----
وأمر الحوت يلفظه فى الحال -- لفظه على اليابس دون إمهال
ويونس طلع تعبان يا رجال -- تعبان قوى ومفيشى عفية
-----
أنبت عليه ربى اليقطين -- ورقه ناعم وعريض بيقين
م الشمس يحمى يضلل زين -- ويحوش كمان برد الفجرية
-----
وثمره صحى خفيف ومفيد -- للمخ بيفيد بالتأكيد
وعلى المعدة مهواشى شديد -- أليافه مفيدة لقناة هضمية
-----
ولما حس يونس بالراحة -- رجع تانى نينوى بالراحة
شاف الناس سعيدة ومرتاحة -- استغرب قوى من دى الكيفية
-----
أما استغرابه ليه يا أحباب -- نرجع لزمان نشوف الأسباب
كانوا كفروا برب الأرباب -- وما سمعوا ليونس أى وصية
-----
علشان كدا كان سابهم غاضب -- وقال لهم ربى هيعاقب
كل الكفار وأمره غالب -- بعد تلات أيام عددية
-----
سابهم ومشى رجعوا لصوابهم -- رجالة وحريم مع أطفالهم
ودوابهم وكمان أنعامهم -- راحوا الخلا خوفهم أغطية
-----
الكل طلع لله يتضرع -- قلوب مفطورة لله تتطلع
ومن عذابه الكل بيفزع -- والقرية أمنت بالكلية
-----
والقرية ديا نفعها إيمانها -- وربى بفضله كشف بقا عنها
عذاب الخزى هناك فى زمانها -- وفوق كدا متعها شوية
-----
أما العدد فى كتاب مكنون -- كانوا ميت ألف أو يزيدون
والكل كان ليونس ممنون -- صادق فى إيمانه وصادق النية
-----
ويونس قعد والناس أمنين -- والقرية كلها مؤمنين
نهاية عظيمة شوفتوا يا حلوين -- يا رب ارزقنا عطايا إلهية
-----
ياللى انتوا جيتوا وقعتوا معانا -- وسمعتوا القصة هنا ويانا
وصيتكم وبكل أمانة -- تدعوا لى ولو حتى شوية
-----
إنى احظى من ربى بغفران -- ويقبل توبتى الديان
وأزور حبيبى طه العدنان -- وانعم بالضل يوم الحشرية
-----
ولو العمر فيه تانى باقى -- أوعدكم تانى بتلاقى
أنظم كمان وهنسمع باقى -- قصص رسل وكمان أنبيا
---------------------
هانئ الجمل
( 18 ) قصة سيدنا زكريا عليه السلام
---------------------------------
أبدأ أنا بالصلا من قبل أى كلام
على حبيبى النبى للمرسلين ختام
جانا بالشريعة السمحة من لدن إله علام
ولأن أصل الدين عند الله الإسلام
-----
من وحى قراّن كريم نحكى قصص أنبيا
وقصتنا اليوم عن النبى زكريا
يارب وفقنى انظم وكن السند ليا
واجرى لسانى بالحق على طول الأيام
-----
زكريا يدعو فى قومه ما اّمنشى إلا قليل
ما مسه يأس فى يوم بيدعى نهار مع ليل
والسن منه طعن وبالقرعة أصبح كفيل
لستنا البتول على ولدها السلام
-----
كمان مريم قريبته مهوش غريب عنها
فى رواية جوز خالتها ورواية جوز أختها
وأميل للرأى الأول خالتها مش أختها
والعلم عند الله الواحد العلام
-----
زكريا كا مايدخل على مريم المحراب
يلاقى رزق وفاكهة فى غير الأوان ياحباب
منين ؟ ..من عند الله يرزق بغير حساب
فى الحالة دى دعى ربه ومنتظر إكرام
-----
العظم منى وهن ودا شيئ ماهو بيدى
وراسى كلها شيب عشان عمرى بيعدى
وكل ما ادعيك يارب تقول لبيك عبدى
نفسى وريث يورثنى ع الدين حامى وفهام
-----
زكريا فى المحراب وملايكة جايه بالبشرى
يبشروه بغلام وإسمه هيكون يحيى
كمان هيكون نبى تشوفه تسعد وتحيا
قال الكلام دا ازاى ؟ ازاى يكون لى غلام ؟ !
-----
طعنت أنا فى السن وكمان مراتى عاقر
الأمر أمر الله وفوق عباده قاهر
سأل ربنا اّية وموقن طالب ظاهر
لسانك مايتكلم مع قومك تلات تيام
-----
خرج بقا على قومه عايش مع الأذكار
أوحى لهم سبحوا عشية مع إبكار
واستغفروا ربنا هو رحيم غفار
وربى استجاب له لأنه فى الخير سريع مقدام
-----
والقصة الجاية ليحيى هنقولها بالتفصيل
وكدا قصة زكريا بإيجاز بدون تطويل
روايات كتير على موته بس ناقصها دليل
ومات سبحان الباقى لله بس الدوام
-----
كدا نهاية القصة ولسه باقى الدعاء
يارب اغفر لنا واكرمنا وقت اللقاء
واجعلنا بعد الموت عندك نكون أحياء
بعد شهادة ترضاها للعمر تبقا ختام
----------------------------------
هانئ الجمل
Powered by vBulletin Version 3.8.4
Copyright ©2000 - 2025, Jelsoft Enterprises Ltd