احبائى اقدم لكم اغنية ماهر العطار
مين يآمن لك مين
الاغنية دى انا ليا عليها انطباعات ... يعنى انا فى خلال فترة عزفى الطويل فى الفرقة الماسية , وطول السنين دى كان ماهر العطار بيشتغل دايما مع فرقة صلاح عرام ويمكن ماعزفتش معاه عشر مرات .... بيكون اما فى حفلة مع نجم من نجومنا وبالذات لما تكون خارج القاهرة وبيكون فيها ماهر العطار ويخلونا نعزف معاه او تسجيل كده ع الماشى .. بس انطباعى ان لو محمد الموجى مثلا حايعمل لحن لفاية احد مثلا ولحن لماهر العطار بيحط خلاصة مخه فى لحن فايزة على اساس انها مسموعة اكتر وماهر العطار ( او نفس الرتبة من المطربين ) بيبقى هو وحظه يعنى ساعات بيطلع لحن يجنن او متوسط .. ومن هنا لما بكتب لحن من النوعية دى يعنى بكتبه على اساس انو سهل نسبيا مش حياخد وقت لما جيت اكتب اللحن ده ( وانا طبعا سامعه اوى من زمان ) بس التركيز ف التدوين بيفرق طبعا بشوفه بدقة متناهية وميكروسكوب .. الاول حسيت انو سريع .. انا اول حاجة بعملها فى اى ملف صوتى بشوف الطبقة بتاعته وتنفع اشتغل فيها على طول ولا محتاجة حاجة .. لقيت اللحن ده بادى اول حرف من لا نصف بيمول ودى مستحيل اكتب منها حايبقى الدليل حاجة مفزعة اولا حا يتعبنى فى الكتابة ويعصبنى وثانيا ماحدش حايعرف يعزفه .. وعندى برنامج ممكن احرك منو التون زى ما انا عايز فكان الصح ساعتها اخلى اللحن يبتى من صول .. ومشى معايا لحد الكولايه التانى وحصلت نقلة لحنية مفزعة ... وبعد ماكتبته .. لاحظت ان فيه فا نصف دييز وصول دييز ولا نصف بيمول ... ومن حسن حظكم انى كنت بعزف مع العمالقة بالليل ومدرس الصبح يعنى بتعامل مع مستويات من الصفر وانت طالع ... لذلك باخد بالى اوى اوى من المبتدئين .. لأن هدفى لو 1000 واحد شاف النوتة يقدر يعزفها 990 منهم ع الاقل .. وإلا ابقا انسان فاشل مايعرفش يتعامل معاه غير عدد محمدو من الشاطرين اوى ( فوق مستوى العامة يعنى ) وقعدت افكر واحسبها ونزلته تون خليته بدأ من فا ... كل المشاكل اتحلت وبقى سهل جدا ... وده درس خطير للمدونين ... ودلوقت الكمبيوتر سهل المواضيع دى يعنى بظلل اللحن كله وبضغطة بحركه للتون المطلوب بس فيه طبعا حاجة فنية خطيرة وهى تعديل المقامات الدليل وعلامات التحويل العارضة ودى طبعا سهلة معايا الحمد لله ... وهنا افتخر انى اقدم نوتة سهلة واللحن حلو جميل على فكرة
رجاء لما حد يرد ما ياخدش اللى كتبته كله يعنى اسم لاغنية فقط بقدر الامكان حرصا على عدم استهلاك عدد كبير من الصفحات فى كلام متكرر
مع طيب تحياتى