طلبات نوتة أ / عادل صموئيل الجزء الثانى

[علي ثلاثة]

السيد عادل صموئيل
شكرا جزيلا
على كل ما تقدمه من تدوينات
وعلى تشجيعك للمدونين
وتقديمهم وتقديم المساعدة
لهم وهم يذكرون لك ذلك

[نور الصباح]

يا ليل الصب
فيروز
وضعت هذه النوتة في قسم طلبات النوتة لأن الأستاذ عادل تفضل مشكوراً بتصحيح تدويني المتواضع لها ، فجعل النوتة صالحة للنشر بفضل ملاحظاته الجوهرية
بالطبع النوتة ليست مثالية كالنوت التي يكتبها بنفسه ، لكنها وبعد التصحيح أصبحت مقبولة كما وصفها أستاذنا الكبير .
SSSSSSSSSSSSSSSSSSSSSSSSSSSSSSSSSSSSSSSSSSSSSSS

أخوكم
نور الصباح

[waleed_shelly]

شكرا استاذ سيد فخري على نوته ياليل الصب مع تمنياتي لك بمزيد من التقدم والتألق

[حاتم شما]

تحياتي استاذ عادل ولك خالص الشكر على كل ما قدمته وتقدمه وستقدمه لهذا المنتدى الموسوعة
هل لي ان اسأل عن مكان نوتة اغنية ياللي كان يشجيك انيني ان كانت هنا في المنتدى؟ وما هو سبب ندرة نوتة هذه الاغنية مقارنة مع الاغاني الاخرى لكوكب الشرق السيدة ام كلثوم وعبقري الموسيقى العربية رياض السنباطي؟
مع تحياتي

الاخ العزيز
اولا اهلابك فى المنتدى
ياللى كان يشجيك انينى لحن اكثر من رائع وانا احترم اوى كل من يحب او يسألأ عن هذا اللحن لكن لو مشكلة
ان الفترة اللى اتعمل فيها هذا اللحن يعنى الاربعينيات كانوا مش بيستخدموا النوتة .. وحتى لما ظهرت الفرقة الماسية وبدأ استخدام النوتة استمرت ام كلثوم لحد آخر لحظة تستعمل الطريقة التقليدية وهى ان المحلن بيقعد مع الفرقة وبيحفظ لهم اللحن على العود .. لأن انت لما تسمع ام كلثوم فى كذا تسجيل لحفلات لنفس الاغنية وتلاحظ انها فى حفلات بتبدع اكتر من المعتاد والسلطنة العالية فى فرقة ام كلثوم دى بترجع لأن العازف حافظ اللحن بكلحرف فيه مش بيقراه نوتة وللعلم كان السنباطى وهو واحد من العمالقة اللى انا اشتغلت معاهم عشرين سنة مش بيحب النوتة بيحس انها بتقيد الابداع
السبب الخطير ان كان زمان الملحن عبقرى اوى اوى والعازفين عباقرة اوى اوى وهنا ممكن الملحن يعمل اى مايخطر على باله وحايتقال كما ينبغى ... يعنى لما نيجى للدليب بالذات والفرق بينه وبين الجمل اللى على ميزان تلاقى اللى على ميزان محددة باللملى لكن الادليب مفتوح يعنى العلامات الايقاعية بتبقى مش محددة النوار ممكن يكون ازيد شعرة او اقل شعرة وهكذا يعنى انا لما كنت فى الفرقة الماسية كان لو فيه ادبيب هو مكتوب امامنا لكن مش ممكن يوصل لتحديد 100% زى الجمل الوزونة .. بيبقى تقريبى والمطرب حافظ اوى وانا بتابعه من النوتة ولكن ودنى اهم حاجة
ولو جملة موسيقيسة ادليب الملحن كان بيمسك العود ويحفظها لنا بحيث اكون ونا بقراها حافظ بتتقال ازاى
كام فى الادليب ملحوظة لن المطرب لما بيقول الجملة 3 مرات تلاقيه مش ممكن يقولها نقل مسطرة يعدنى بيطول ويقصر فى حاجات معلش آسف للإطالة بس انا احب لما اقول رد اقول الاسباب
وانت لما تسمع ياللى كان يشجيك انينى تلاحظ ان معظنها ادليب ومن هنا ماحدش كتبها لأن مش حاتطلع دقيقة وعاداة اللى بيعزفوا الالحان من النوعية دى بيعزوفوها سماعى ... يعنى انت لو دخلت قسم المبدعون فيه معزوفاتى بعنوان معزوفات على الكمان للأستاذ عادل صموئيل انا عمرى ما بستخدم النوتة لأنها بتقيد الابداع ... ولو فيه لحن مش حافظه ممكن اذاكره شوية ع النوتة بعدين اكون حفظته واسجله من اللى حافظه
مع اطيب تحياتى عادل صموئيل

[سليم العباس]

الأستاذ علي ثلاثة : شكراً لك على الإطراء ، والفضل كله في هذه النوتة المتواضعة يعود للأستاذ الكبير عادل . أما أغنية فيروز سوف أحيا فقد تفاجأت بوجودها فأنا لم أسمعها من قبل رغم حبي الشديد لفيروز ، و معك حق فهي قصيدة رائعة من حيث إبداع الشاعر مرسي جميل عزيز في نظمها و اللحن الرائع للأخوين رحباني والأداء الفيروزي المتقن . أشكرك على اختيارها ، و بما أن كل أركان الأغنية مكتملة يجب أن تحظى بتدوين يليق بها ، أضم صوتي لك لمناشدة الأستاذ عادل كي يدونها ، أو على الأقل تصحيحها ما لم يكن له رغبة لتدوينها أو لم يمتلك الوقت لذلك . تحياتي لحضرتك .

أشكرك أستاذ وليد على كلماتك الجميلة . تحية لحضرتك

و أجمل التحيات و الأمنيات لزهرة هذا المنتدى وعبيره الأستاذ نور الصباح .

و التحيات المستمرة مع كل نغمة جميلة للمبدع الأستاذ عادل صموئيل .

وانا ادعم اخى العزيز
يعنى انا ما احبش الاحتكار انا احب ان كل من يحب يدون يدون واساعده لأن فى الآخر انا بشتغل لصالح الموسيقى والعازفين وكل مايزيد عدد المدونين ده مكسب اكبر وفيه كمان ميزة الاخ عباس من سوريا يعنى اكيد سامع مئات من الاغانى الشامية الشهيرة واللى ليها معجبين كتير وانا مش سامع عنها من قبل
مع اطيب تحياتى عادل صموئيل

[RABAB ZEAN]

استاذنا العزيز بقالي مدة كل ما ادخل ادور علي معزوفة جديدة من حضرتك مش ناوي يسمعنا حاجة جديدة
مع خالص الشكر

[Toqa El Hagrasy]

السلام عليكم
انا كنت طلبت قبل كده نوتة تتر مسلسل بنت اسمها ذات ، انا بقدر تعب الاستاذ عادل صموئيل وبشكره جدا وعارفه انه مشغول الله يعينه ، انا بكرر طلبي تاني لاني محتاجه النوته في اسرع وقت بتاعت تتر مسلسل بنت اسمها ذات ، وشكرا


الاخت العزيزة
اولا انا آسف لتأخرى فى الرد عليكى لأنى زى ما انتى شايفة الظروف انا بلف حوالين نفسى مش من المنتدى فقط ولكن من الدنيا .. انا نزلت الملف وابدتيت اسمع لقيت سهل وماشى وفجأة طلع العفريت يعنى التوزيع والتوزيع اما يكونتحت الميلودى لمعنى ان الميلودى يكون فى الصدارة ( زى شغل زمان بتاع عبد الوهااب والعمالقة ) او يكون التوزيع عالى اوى يعنى تسمعى معجنة او طبق كنافة او بلش كنافة نقول مكرونة اسباجيتى كلو ملخبط فى بعضه ومشكلة التوزيع ان بيبقى فيه كذا خط فوق بعض وانا المفروض بكتب الاساسى بكون مش سامع الاساسى عمومام انا ابتديت اكتب فيها لنك محتاجاها بسرعة بس فيه جزء فى النص قبل صولو الابوا مش فاهم فيه حاجة يعنى التوزيع عالى اوى تحسى خناقة يعنى كتبت صولو الابوا وخارج منو دلوقتى وربنا يستر فى اللى جاى
بس انا نفسى اقول على حاجة المفروض لو انتى بتعزفى آلة واحدة فى نفس الوقت المفروض تعزفى لحن يكون ميلودى بحيث انك بآلتك الواحدة بتقولى الحن كله لكن لما بيكون اللحن موزع انتى بتعزفى حتة منه قد تكون مش كافية للمستمع
واقول لك معلومة التوزيع مش ممكن يتدون ولكن لما بيكون فعلا فرقة عايزة تعمل لحن موزع لازم تجيب النوتة الاصلية اللى عاملها الموزع بنفسه لأن حتى ما ينفعش لو هم مين يعزفوه سماعى ... الكلام ده فى الاوبرا فى اوركسترا القاهرة السيمفونى بيبقى عندهم النوت الاصلية اللى جاية من اوروبا مكتوبة السيمفونية البارتاتورا بتاعة المايسترو وبياخدوا منها كوت كل آلة على حدة مع اطيب تحياتى واكرر اسفى للتأخر عليكى عادل صموئيل

[حاتم شما]

لك الشكر والتحية استاذ عادل على هذه التوضيحات الرائعة كما عودتنا، عموما انا سأحاول تدوين المقدمة الموسيقية بجهد متواضع ومبتدئ وسوف اعرضها على حضرتك لابداء الرأي واذا سمحت ادخال تعديلات عليها واهديها الى هذا المنتدى الموسوعة، فما رأيك، هل أبدأ المحاولة في المقدمة وارسلها لك للتقييم، وجزيت خيرا

اخى العزيز
احنا كان كلامنا على اغنية ياللى كان يشجيك انينى ( اصل الكلام هنا بنتكلم مع الكل عشان يبقوا فاهمين الموضوع )
طبعا انا ارحب واشجع واحفز واناشد كل واحد عندو القدرة انو يكتب او يحاول لأنى انا ما اتولدتش بكتب كذا ولكن حاولت وقعدت احاول ... بس فيه كلمة انا وقفت عندها انكعايز تدخل تعديلات عليها يعنى تعديلات ف حدود ايه ؟ عشان الالحان دى مقدسة يعنى المفروض مانلعبش فيها عموما ورينا حاجة وانا تحت امرك وحقول لك لو التعديلات دى حلوة ولا مش صح
مع اطيب تحياتى عادل صموئيل

[عادل صموئيل]

احبائى

اقدم لكم

تتر مسلسل بنت اسمها ذات

طبعا انا كتبت على اد ما اقدر لأن اللحن موزع توزيع كتير وانا حاولت بقدر الإمكان انى اكتب اللحن الاساسى

مع اطيب تحياتى

[عادل صموئيل]

احبائى
اقدم لكم رائعة الروائع

تحفة رياض السنباطى وام كلثوم

اغار من نسمة الجنوب

اللحن ده مش لحن عادى ... يعنى معمول بحيث ان ماحدش غير ام كلثوم يقدر يقوله .. وبعدين فيه حاجة او عناصر معمولة بطريقة انها تخلى الواحد يتلخبط مايعرفش يحفظه الا لو كان ذومقدرة غير عادية على الحفظ ... يعنى انت لو شفت اى اغنية لأم كلثوم بتبقى لو مذهب و3 كوبليهات بتبقى 4 كيانات منفصلة .. لكن اللحن ده معمول بطريقة بجد كانو فزورة مستعصية .. يعنى كل كوبليه فى بدايته تحس انو شبه التانىلكن بالعكس هو بدييك انطباع انو شبه التانى لكنو مختلف احتلاف كلى عشان يلخبطك .. واكتر اللخبطة ان كل كوبليه بيبتدى بكلمة ياليتنى ... بعد كده الكلام بيتغير والمقام بيتغير
يعنى مثلا تحويلة حجاز على النواة ماتعرفش هى فى الكوبليه التانى ولا الثالث ... انا طبعا بسمعو من زمان اوى من وانا طفل وكنت حافظ اجزاء منه ومن كذا سنة فيه صديقة عزيزة هى مش موجودة دلوقتى طلبت منى اعزف اللحن ده .. اللى خلانى افكر انى اعزفه مع انو من الالحان المستبعدة جدا ومش عليا فقط ولكن ماحدش عزفه او حصل لو تهور انه يعزفه من قبل ... اول حاجة ان الصديقة دى كان سنها 24 سنة سنة يعنى من جيل بعيد تماما عن الشعر الصعب ده يعنى صعب جدا تلاقى شباب ممكن يتذوقوا النوعية دى من الاغانى بعد ما اللى حصل بعد التسعينات افسد الذوق والثقافة وثانيا والاهم كانت الصديقة دى حجة فى اللغة العربية وحافظة دواوين شعر يعنى افادتنى كتير جدا فى قصائد من اهمهم همسة حائرة بتاعة عبد الوهاب .. وانا لما بعزف القصائد من النوعية دى مش عملية نغمات وخلاص يعنى لازم اكون فاهم الشعر كويس اوى اوى عشان اعزفه بصدق واكتشفت ان اكتر من 7 كلمات انا سامعهم غلط يعنى مثلا كلمة الرافد هى قالت لى لأ دى الرابض يعنى كلمات كتير كده انت ممكن تسمعها حاجة وهى حاجة تانية خالص ومش مستعملة ابدأ فى قصيدة تانية وتختلف فى المعنى عن ما انت فاهم ... واهم مافى الموضوع مكسبكم انتم .. يعنى لو لا الصديقة دى وهى مش موجودة من زمان اوى ماكنتش اجرؤ انى ادون الاغنية دى ... لأنى ساعة ماعزفتها كنت باخدها كوبليه كوبليه يعنى اسمعه عشرات المرات بعدين اسجله ولما احس انو خلص ادخل فى اللى بعده يعنى تختلف عن كل اغانى ام كلثوم التانية انا ممكن حلا اعزف 100 اغنية فورا لنى حافظهم لكن دى بالذات لازم الواحد ياخدها حتة حتة لأنها بتلخبط زى ماقلت ... ولو لا انى عزفتها يعنى دخلت جوا الشفرات بتاعتها ماكنتش اقدر اكتبها او اخاف منها
بالطبع اهم شىء فى الموضوع انى حاولت اخليها سهلة على قد ما اقدر والحمد لله ربنا وفقنى وشكلها سهلة واتمنى الكل يعزوفوها بس اكيدالاول تسمعوها من ام كلثوم شوية لن ادائها عايز احساس اكتر من قراءة حروف .. وانا اعتذر عن التشويق والاثارة اللى عملتهم عشان تعرفوا اسمها لأنى فعلا تعبت فيها يعنى اخدت اكتر من عشر ايام تدوين ماحبيتش انزلها مرة واحدة وتاخد وقتها وخلاص
مع اطيب تحياتى