طلبات نوتة - الصفحة 51

**عاصم المنشاوى** · #**501** 29/10/2010, 07h48

الأصقاء....صباح الخير عليكم

قصيدة "النهر الخالد"...لحن وغناء الموسيقار /محمد عبد الوهاب...فى عام 1954 جنبا الى جنب قصيدة اخرى وهى "الروابى الخضر"للممثل أحمد خميس...وقصيدة النهر الخالد من تأليف :محمود حسن أسماعيل الذى ولد فى فى بلدة النخيلة بأسيوط ...نفس قرية الخارج عن القانون "عزت حنفى "والتى حول الفنان /أحمد السقا قصته لفيلم تحت اسم "الجزيرة" سبحان الله على مصر !!!!ماذا كانت تنجب زمان ...وماذا تنجب الآن ...المهم ولد الأستاذ الشاعر محمود حسن اسماعيل عام 1910 وتوفى فى 1977 فى الكويت ...وله ابنة هى المذيعة "سلوان محمود"...صاحبة قطرات الندى....وقد غنى له عبد الوهاب قصائد أخرى منها "دعاء الشرق" و"مصر نادتنا فلبينا نداها"...وأم كلثوم"بغداد ياقلعة الأسود" والتى ظلت لفترة النشيد القومى للعراق...من تلحين السنباطى...برضو كان زمان....وغيرها...
-اما النهر او النيل فهو ال "اترو عا" اى البحر الأعظم عند قدماء المصريين ...وهناك فى محافظة الجيزة شارع الكورنيش اسمه حتى الآن "البحر الأعظم" ومع مرور الزمن تحولت "التروعا"الى "الترعة" ولايزال الناس يطلقون على النيل اسم "البحر" نظرا لأتساعه وعرضه....والمتعلمون فقط يطلقون عليه "النيل "وهى كلمة لآتينية"نيلوس"...اما النيل بالنسبة للمصريين القدماء فقد كان شيئا مقدسا ...ولكى تدخل الجنة بعد الممات...لابد ان تحلف امام أوزيريس "انك لم تلوث النهر".....وهو مصدر حياتهم نظرا لأن 95% من مصر صحرا ء لاتعرف المطر....ولذا تجد حب المصريين للنيل يظهر جليا بعد ان استردت مصر عافيتها وشخصيتها بعد الأستقلال سنة 1922 وظهور المد القومى المصرى والأعتزاز بمصر ...ولد جيل عبد الحليم وبليغ والموجى وقنديل والطويل ونجيب محفوظ ونشأ فى هذا الجو أم كلثوم وعبد الوهاب ورامى وشوقى وطه حسين وحافظ ابراهيم ونجيب محفوظ وكل عمالقة ورموز مصر..لذا تجد النيل موجود وبقوة...مثلا " ياتبر سايل بين شطين ياحلو ياأسمر" "انا النيل مقبرة الغزاة" قصيدة النيل""عطشان ياأسمرانى محبة""شمس الأصيل""الصبح بدرى والنيل بيجرى والزرع باسم جميل"
- لكن بعد موت النيل بعد بناء "السد العالى" وهو كارثة بيئية وصحية.على مصر..مخالفة للطبيعة الربانية...نسى المصريون شكل النيل ولم يعودوا يشعرون به ....ولذلك اتحداك لو لقيت أغنية تتحدث عن النيل...بعد سنة 1970
_طيب السؤال دلوقتى ...ايه اللى خللى عمنا /عادل صمويل
ينوتها لنا ...؟؟؟الأجابة بسيطة ...انت ناسى انه احد احفاد المصريين القدماء وعنده حنين وشوق لمصر الجميلة بتاعة زمان ....

**عادل صموئيل** · #**502** 29/10/2010, 11h38

اخى العزيز عاصم
اشكرك على المحاضرة الجميلة دى واشكرك انك كتبت اسمى المتواضع فى نفس الورقة اللى كتبت فيها اسماء الناس العظام دول كلهم واللى انا بحاول اعمله انى بحاول اخلى المد بتاع الناس العظام دول يبقى ويفضل زى ما هم مش طلعوا من فراغ ولكن هم امتداد لناس عظام قبلهم من 5000 سنة وهم استلموا الميراث بتاع اجدادهم وكبروه ونموه وزودا الثروة وكان من حسن حظهم او من حسن حظ البشرية ان على ايامهم كان فيه تسجيل وتدوين يعنى حفظ كامل للتراث وده مع الاسف ماتوفرش طول القرون الماضية غير فى القرن العشرين , يعن مثلا الموسيقى المصرية كانت ايه من 2000 سنة ماحدش يعرف بالتحديد لأن ماكانش لا فيه لا تسجيل صوتى ولا تدوين , كانت بتتناقل ووتوارث عن طريق الحفظ والتلقين والطريقة دى خطيرة جدا لأن مع التناقل ممكن تنقص حتة او تزيد حتة , ولكن المسيقيين العظام اللى قبل حتى ولادة عبد الوهاب حاولوا يجمعوا كل اللى قدروا عليه وبعدين جه واحد عظيم جدا ( وكان صديقى جدا ) اسمه عبد الحليم نويرة كانت خطة حياته هى محاولة جمع التراث وتقنينه يعنى ضبطه علمياً بدون ان يفسد وكان من فضل ربنا على الفن ان الراجل ده كان واصل يعنى الحكومة ساعدته وانشأ فرقى الموسيقى العربية اللى كان لها افضل الأثر على استمرار اااالقوالب الموسيقية اللى كان ممكن تنقرض واهم شىء عمله الراجل العظيم ده انه قرب القوالب الموسيقية التى من الممكن ان تكون صعبة او غير مستساغة لجيل الخمسينيات والستينيات بعد ما سمعوا عبد الحليم وام كلثوم يعنى بعد ما الموسيقى تطورت شوية وبقت اسرع يعنى الدور كان ايام محمد عثمان فى العشرينيات بيتغنى فى ساعة مع انه بالضبط كان لا يزيد عن خمس ابيات شعر , ووصلت ام كلثوم انها فى الساعة بتغنى قصيدة 30 بيت فيها 500 جملة موسيقية مثلا , هنا جاء العظيم نويرة وضغط الدور فى عشر دقائق مع الإحتفاظ بكل رونقه وجمالة ولكن بطريقة تشبع العصر , وجه عبد الوهاب وطور كل شىء حتى طور غناء ام كلثوم , يعنى سنة 1960 كان جمهور حفلات ام كلثوم كلهم فوق الاربعين يعنى اللى متعودين على قصائد رياض السنباطى
جاء المبدع عبد الوهاب واعطى ام كلثوم دم جديد وشباب جديد , خلى جمهور حفلات ام كلثوم كل الاعمار ولما الشباب اللى متعود يسمع عبد الحليم وشادية حس ان ام كلثوم بقت بتغنى اغانى شبابية واقبلوا عليها ابتدوا كمان يحبوا قصائد رياض السنباطى مرة فى احدى حفلات ام كلثوم كان زميلى واستتاذى فى الكلية الاستاذ محمد نصر الدين وهو رابع كمنجة فى فرقة ام كلثوم شفنا عدد كبير جدا من الآنسات الحلوين قال لى فى ودنى الحاجات الحلوة دى ما شفناهاش فى حقلات ام كلثوم إلا بعد الحان عبد الوهاب قبل كده كان كل الستات عواجيز , النهاردة مع الأسف كل واحد بيبحاول يطور الموسيقى بيفسدها ويخربها اكتر ما هى خربانة وانا حسيت انهم مش عايزين يطوروا لكن لما أفلسوا وما لقوش الحان ابتدوا يخربوا فى التراث , يعنى انا بمجهودى المتواضح بحاول انقذ ما يمكن إنقاذه وهو انى جمعت كل خبراتى والمدارس الكتير اللى اتعلمت منها واخترعت مدرسة جديدة وهى تبسيط النوتة الموسيقية بالذات للهواة والمبتدئين بحيث ان النوتة الصعبة اللى مش ممكن يعزفها غير المحترفين ممكن يعزفها ملايين الهواة واقول لكم على سر الاغانى اللى بكتبها ما تفرقش مع المحترفين لأن كل همهم الفلوس يعنى بيبحثوا عن الشغل فى الاغانى الجديدة لكن المستفيد الاول من النوت بتاعتى الهواة وهم امتداد بقاء زمن الفن الجميل , وعجبنى كلماتك عن النيل يعنى بحكم ان اختى الدكتورة امال صموئيل من كبار علماء الآثار وانا بكتب لها كل شغلها على الكمبيوتر اتعلمت كتير عن الحضارة الفرعونية وكان اهم شىء عند جدودنا القدماء النيل وكان تلويث النيل ده من اكبر الكبار اللى تخلى الواحد يخش النار ومع الأسف النهاردة كل واحد عايز يتخلص من اى حاجة بيرميها فى النيل مرة فى التليفزيون شفت مصنهع بيخلرج مخلفات سامة وعامل ماسورة بتصرف المخلفات فى النيل طول النهار تخيل ماسورة بيتنزل مادة سائلة سامة لونها زى اللبن وبتنزل كل يوم مواد سامة فى النيل يعنى انا بستغرب الناس الملايين اللى بتمر عليهم المياه دى عايشين لسه ازاى لأن الكلور اللى بتحطه شركة المياه لتطهير المياه من بعض الميكروبات البيسطة مش السموم الكتير حتى الكلور لو زاد عن حده بيبقى ضار بالصحة , فيه كمان حاجة انا بحس انها مخجلة بس مضطر اقولها خلال السنوات من 1930 لحد 1980 كان المشاهير اللى بتتكلم عنهم الناس مين ؟
يعنى ناس عظام واوسمة على صفحات التاريخ , النهاردة المشاهير هم الحرامية واصحاب الفضائح يعنى الصور المشرقة اللى زى زويل حاجة نادرة جدا وحتى بتتوه اخباره وسط القصص المقرفة زى واحد ملياردير بعد مايصرف عشرات الملايين على مطربة درجة تالتة بعدين يتهم فى قتلها وتحس ان الجميع عايز يطلعه براءة , او ملياردير عنده مش اقل من خمسين مليار ولسه بيقاتل عشان يمتص قوت الجياع حاجات غريبة وكفاية كده
مع اطيب تحياتى

**عادل صموئيل** · #**503** 29/10/2010, 22h58

اقدم لأخى العزيز نور الصباح نوتة
زى نور الشمس
مع اطيب تحياتى

**عادل صموئيل** · #**504** 31/10/2010, 13h14

احبائى
اقدم لكن اليوم نوتة لحن من احلى الاغانى العاطفية واكثرها مشاعراً
اغنية
حنين
لوردة , هذا اللحن مع انه مظلوم لأنه كان فى احد الافلام والاذاعة لاتذيعه كثيراً , ولكنه لحن يوقظ المشاعر , انا عزفته مع وردة فى التسجيل من حرارة اللحن كانت تغنى وهى تبكى , وهنا احب اذكر ان كل مطرب له عصر ذهبى , وكان العصر الذهبى لوردة ايام كانت متزوجة بليغ حمدى , يعنى كان يلحن لها لحنا رائعاً كل اسبوعين , يعنى كان فيه دويتات رائعة فى الفن الجميل زى شادية ومنير مراد وليلى مراد واحمد صدقى مثلاً , وكلمة دويتو يعنى ملحن يعمل لحن ومطربة ثم تتكرر التجربة بعد ذلك عشرات المرات وجمال الالحان يزداد , ( لأن كتير ايضا حصل ان ملحن ومطرب يستمرا معا ولكن الالحان الاخيرة اقل من الاولى ) , وانا كعادى او اساس خبراتى النظرة الشمولية يعنى انظر الى الصورة من كل الزوايا واحيانا افكر فى الخلفية التى قد لا تبدو واضحة او لا تسلط عليها الأضواء
انا اشكر الأخت العزيزة ياسمين الشام لأنها طلبت هذه الأغنية ونزلت التسجيل لأنى كنت اتمنى ان ادون هذا اللحن الجميل , واتمنى ان تسمعوا هذا التسحيل غير غناء وردة ركزوا جيدا على الكورس او الكورال , تجدوا درجة عالية جدا من السلطنة غيير مسبوقة من قبل , يعنوا تحسوا فى ادائهم بفرديات مطربين كبار مش مرددين وراء مطرب , واذكر من هؤلاء السيدات اسماء : بوسى وكيتى وانشراح على سبيل المثال , ولما اتكلم عن بوسى اسمها الاصلى بثينة عبد الغنى السيد ( وطبعا مفيش اتنين عبد الغنى السيد ) , وكيتى دى كانت من مجموعة كبيرة من الأجانب فى مصر كانت تعيش بكثافة وتداخلت مع المصريين حتى اصبحوا مصريين وكانوا خبيط من الجنسيت يعنى يونانيين وايطاليين وارمن وروس ابيض وعدد كبير من اهل الشام , وكان الكثير منهم بيعملوا فى مجال الفن ومن اشهرهم الراقصة كيتى وكاميليا , ومن اشهرهم ايضا الكومبارس والراقصات فى افلام ليلة مراد , يعنى لما تشوف الافلام القديمة كان الراقصات نوعين , يعنى تشوف امامك خمسين راقصة لو بيرقصوا شرقى بيبقوا عوالم لكن اللى بيعملوا او بيشتركوا فى الاستعراضات تلاحظ ان معظمهم اجانب يعنى البياض والعيون الخضراء , وبوسى وكيتى وانشراح دول اشتركوا فى معظم الاغانى يعنى من ضمنها عاشق الروح وطوف وشوف وشوف بقى , اقول ايضاً على سر نميس كان الكورال بيحبوا بليغ حمدى لنه كان اكتر واحد بيشغلهم يعنى من النادر ان تخلوا اغنية لبليغ بدون كورال بعكس الآخرين
المهم اتمنى ان تسعدوا بالأغنيية واكرر شكرى للأخت العزيزة ياسمين الشام لأنها اختارت لى ولكم هذا اللحن الرائع
مع اطيب تحياتى

**Anitta** · #**505** 03/11/2010, 14h49

احب تقديم نوتة حلوة يا بلدى لمن يحتاجها لانها حلوة وارجو مراجعتها

**عادل صموئيل** · #**506** 03/11/2010, 23h29

احبائى
اقدم لكم بناء على طلب الاخ العزيز عزت شحاته اغنية وطنية من العيار التقيل جداً جدا
مصر التى فى خاطرى
طبعا انا اللحن ده عزفته مليون مرة بس لما كتبته لقيته اصعب من ما كنت متخيل , ممكن عشان انا شاطر شوية فى العزف بيطلع من غير ما افكر لكن فى التدوين لابد ان ادقق اوى واكتشفت حاجات كتير فيه
فيه ملحوظات مهمة جدا لأنى كنت فى حفلات كتير تبع وزارة التربية والتعليم بس شفت مشاكل كتير واخطاء خطيرة احيانا اتمنى ( اولاد عادل صموئيل ) ما يعملوهاش
اول شىء عند بداية الغناء ( مصر التى فى خاطرى ) كانت من التلامذة بتطلع مايعة لأن لو ايقاعها تافى تافى يعنى كروش منقوط ودوبل كروش , عايزكم تدققوا فى تفاعيل ام كلثوم تلاقها مش بتقول التافى محددة يعنى مرة كده ومرة كروش وسكتة دوبل كروش ودوبل كروش , يعنى انا كتبت كده بس ما حبيتش اتفزلك عشان تبقى سهلة عليكم قى التنفيذ
يعنى انت اولا احفظ النغمات كويس واحفظ التقطيع بتاع ام كلثوم يعنى مصر التى فى خاطرى مش غنائية مدلعة عاطفية ولكن عسكرية شوية . واخطر واسوأ عيب بيحصل البريكات اللى فى الكوبليهات لما بيقف الإيقاع يعنى المدرس بيبقى مش فاهم البريك اد ايه والتلميذ مش فاهم حاجة طبعا والبريك بيطول والتلميذ عمره ما بيركب صح على الإيقاع لما يدخل تانى وبتحصل لخبطة واطباق بتتكسر وحاجات كده , فى الاماكن اللى فيها البريك انا كاتبها على الرتم مش عامل بريك لأنها مضبوطة يعنى ما تعملش بريك اابدأ اللحن ماشى زى الفل , وبعدين البريك اللى عملته ام كلثوم لما دخلت على الرتم هى نفسها دخلت دخلة انا ماعجبتنيش يعنى زى ما تركب القطار بعد ما يكون سرعته زادت ومالهاش داعى طبعاً , مع اطيب تحياتى واتمنى تكون رسالتى وصلت عادل صموئيل

**عادل صموئيل** · #**507** 07/11/2010, 12h45

احبائى
اقدم لتلميذتى المجتهدة انيتا
الجمل الموسيقية الثلاثة الأساسية من موسيقى قضية عم احمد لعمر خيرت
يعنى انا مش بحب اكتب النوع الحديث من الموسيقى لأنى بحس انها تتسمع بس لأن التوزيع بيغطى على اللحن الأساسى اولا وثانياً انك انت بتبقى سامع عشر اصوات وانت بتعزف آلة واحدة فى نفس الوقت يعنى بتعزف صوت واحد منهم واللى بيسمع بيحس اللحن فاضى من غير الزحمة اللى فيه بعكس مثلا لما تعزف اغنية من بتوع زمان ممكن بآلة واحدة تعزف اللحن كله وبتكون مشبع للسامع
وفيه مشكلة خطيرة فى الموسيقى والاغانى الحديثة , فى الأغانى بتاعة الزمن الجميل انا كمدون موسيقى محترف المفروض لما بسمع اللحن اهم شىء اللحن يكون صريح يعنى ايه صريح : يعنى من اول جملة انا لازم احس ان الللحن بياتى او نهاوند مثلا وبسرعة انا لازم احس ان الميزان 4/4 مثلا لأن اول شىء انا بكتب الاميزان والدليل
بعدين الصراحة فى اللحن ان طول ما انا بسمع ابقى سامع ان النغمة دى مى بيمول او سى ناتورال بما لايدع مجال للشك عشان اكتب وانا مستريح , لن الراحة هنا معناها انى اقعد نص ساعة اكتب كوبليه او مثلا صفحة ونص , اما الموسيقى الحديثة والاغانى الحديثة بيبقى اللحن مش صريح يعنى بيراوغ , هنا فى السطر الثالث الجملة بتاعة القانون
هى المفروض انها جملة سهلة جدا جدا لكن هو مشخلعها الشغلعة اللى فيها دى طلعت روحى بس لازم اكتبها لن اللحن كده يعنى ماينفعش اكتبها سادة من غير الشخلعة لأن الناس سمعوها كده , المشكلة اى سامع سى بيمول مثلا اكتبها انتم عارفين ان الكمبيوتر ممن بعد ما اكتب كل مازورة بضغط على المسطرة اسمع المازورة , طبعا بيساعدنى كتير جدا جدا فى الألحان الغربية ( او اللى مافيهاش نغمات شرقية لأن الكمبيوتر مش بيغنى النغمة الشرقية وبعتمد على عينى اكتر انى اراجع النوتة ) المهم ان الكمبيوتر بيغنى اللى انا كتبته اسمع الاقى حاجة تانى ارجع للتسجيل الاقيها سى بيمول ارجع للى كتبته الاقى مش مظبوط , طبعا مفيش عفريت ولا حد عامل لى عمل ومخبيه فى صباع رجل نملة , ولكن عدم الصراحة فى التوزيع الحديث يعنى النغمة الأصلية سى بيمول بجد بيحط تحتها كذا نغمة بتخلى النغمة مش صريحة زى مثلاً فى الألوان فيه لون احمر لو جه عليه ابيض بيبقى بمبى , او ازرق على اصفر يبقى اخضر , المشكلة لو اللون التانى يبقى مش كفاية بيطلع الوان غريبة مالهاش اسم يعنى بتسمع مثلا فستقى او فحلقى او تركواز او شانجاه
دى ممكن تبقى حلوة لما تشترى بلوزة صوف مستورد شيك يعنى ممكن تبقى اناقة , لكن فى الموسيقى انك تشك النغمة دى ايه دى مصيبة يعنى بتطلع جيل اذنه الموسيقية تالفة , يعنى انا شخصيا زمان من 35 سنة سنة كان بيجى لى طالب يقول انا بغنى يا استاذ ممكن تسمعنى الاقيه حلو وفيه كتير حلوين يعنى بيغنى لى حتة عبد الوهاب حتة عبدالحليم وكده ,
طبعا لما بيسمع عبدالوهاب بتبقى النغمات صرريحة يعنى ال سى سى والمى بيمول مى بيمول وبتتربى اذن المستمع على النغمات الصحية , النهاردة لو جه واحد يقول لى نفس الكلام عارفين طبعا حا يغنى لى ايه حاجة لتامر دياب او عمروحسنى ( الأسامى مش تفرق لأن كلهم زى بعض بيتساووا فى الخيابة وماحدش منهم عمل حاجة بقرش يفتكروه بيها بعد ما يموت زى اقل مطرب زمان ) طبعا اللى بيغنى اغنية لتامر طبعا تامر دى بيقول اصلا ال لا بيمول خاسسة يعنى نغماته اصلا مش مضبوطة طبعا اللى حايقلده حا تنقص كمان يعنى بيعلموا الشباب الخيابة بعكس العمالقة كانوا بيعلموا الناس فن , كفاية عليكم كده فاصل ونعود
مع اطيب تحياتى

**عادل صموئيل** · #**508** 08/11/2010, 06h03

اخوتى الأحباء
بناء على طلب الأخت الفاضلة غادة عبد الرحيم اقدم لكم نوتة من اروع اناشيد محمد عبد الوهاب الوطنية
طول ما املى معايا او ( حى على الفلاح )
وانا اكرر تقديرى للمدرسين اللى بيطلبوا الحاجات الجميلة والصعبة دى عشان ينفذوها فى مدارسهم لأنها اولا احياء لأغانى الزمن الجميل التى لن تعوض وثانياً عشان الطلبة ( اللى حايغنوا او يعزفوا او حتى اللى حايسمعوا ) يحسوا ان فيه كنوز عندنا المفروض يسمعوها ويحسوا بيها وان مش الدنيا كلها هى الأغانى اللى بتتعمل دلوقتى
ولما نتكلم عن النشيد ده نلاحظ ان كل عمل عظيم مكن نتكلم عنه كتير او ممكن يكون له قصة , يعنى العمل ده مش لحن طلع وخلاص يعنى الحان دلوقتى واحد كتب كلمات اى حاجة وواحد لحنها اى حاجة واتسجلت وخلصت , انا شخصيا حضرت كل الاعمال العظيمة اللى اتعملت من اول سنة 1970 , لكن زملائى فى الفرقة المسية واللى كانوا اكبر منى بتلاتين سنة حضروا كل الاعمال اللى قبل كده وكنت بقعد معاهم اخليهم يسترجعوا الذكريات ويحكوا لى القصص الغريبة اللى مرت عليهم , وكمان تعاملى المباشر مع كل الملحنين العمالقة خلانى ممكن استكشف قصة لحن او الشىء الغريب اللى فيه بمجرد ما اسمعه , واللحن ده انا من السمع بس اكتشفت الإعجاز اللى فيه , يعنى عبد الوهاب كان مش بيلحن وخلاص ولكن لازم يبتكر فكرة غريبة وجديدة ويحطها فى كل لحن , والفكرة الغريبة هنا او الصاعقة انه فكر يختار مقام الصبا ويحطه فى نشيد وطنى وايه كمان نشيد حماسى , يعنى حاجة فوق التخيل لسبب ان مقام الصبا مقام اكتر مقام حزين فى الموسيقى العربية , بمعنى لو عايز المستمع يبكى قسم له شوية صبا , وتانى فكرة عبقرية فكر فيها انه ما استعملش المقام فى مكانه الطبيعى على الدوكاه لأنه هنا حايكون حزين اوى بطبيعته , وضع مقام الصبا على النواة عشان يبقى حارق , يعنى الشىء الحزين حط عليه شوية شطة عشان ما يفقدش الطابع بتاع النشيد انه حماسى ,
ولما تسمع اللحن انا اكتشفت حاجة الكورال نكهتهم مش نكهة كورالنا فى مصر ( واللى كنت بشوفهم واسمعهم كل يوم وحافظهم وحافظ صوتهم واحد واحد , لما تسمع الكورال افتكرت اغنية فيروز وصوت الرجال وهو بيردوا عليها فى اغنية راجعين ياهوا , وقلت آه هم دول بتوع فيروز , واكتشفت مع نفسى ان الاغنية دى متسجلة فى لبنان على فرقة فيروز وبالطبع التوزيع للأخوين رحبانى من حاجات خفيفة او لمسات فى وسط اللحن ما حدش بيعملها غير الأخوين رحبانى كان اكتشفت وسط اللحن كام دوم وكام تك ودول ما حدش بيعملهم غير حسن انور فقط , اكتشفت انه ممكن يكون استدعى حسن انور لبنان عشان يسجل معاه اللحن , يعنى مش كولمبس بس اللى بيكتشف , ولما الكورال بيعيد جملته فيه آهات ودى نكهة لبنانية خالص تحس الجزء ده من الحنجرة الصوتية مش بنستعمله ف مصر تحس فيه نكهة اشجار الأرز ورائحة حقول التفاح بتاعة لبنان
اهمشىء لما نيجى للنوتة اول سطر ده اللحن الأساسى وتانى سطر ده التوزيع اللى عليه , يعنى انت لما تنفذ اللحن ممكن تعزف اول سطر وتحط معاه التوزيع لو توافر لك آلات مع بعض ولكن لو على آلة واحدة انت ممكن تعزف السطرين ورابعض لأن التوزيع جملة جميلة جدا انا بحب اعزفها لوحدها , وده درس خطير خطير للى بيعكوا اليومين دول ويقولوا توزيع وهو بيلطسوا الألحان , يعنى التوزيع لازم يكون جملة لحنية جميلة مش نغمات ورا بعض لا لحن او شكل لها , وكمان شوف التوزيع اد ايه يعنى فى جزء صغير من اللحن مش ما اول اللاحن لآخره لنك حاتشتت المستمع عن الجمل الأصلية الجميلة جدا لو حدها من غير اى شىء معاها و يوجد فى رابع سطر تالت مازورة جملة صغيرة ديول العلامات من تحت , ده توزيع على غناء الكورال , انت مش ملزم تعزفه إلا لو عندك كورال شاطر ما يتلخبطش لما يسمع حاجة غريبة وهو بيغنى , وعموما انا ما احبش اقفل على المواضيع , يعنى بعد ما كورالك يحفظ اوى جرب تعزف الجملة دى لو ما اتلخبطوش اعمل اللى تشوفه ,
طبعا انا آسف للإطالة يعنى انا مش قلت تنويه عن اللحن ولكن قلت محاضرة لكن بجد اللحن الواحد بيحتاج الواحد يكتب عنه كتاب مش كده ولا ايه ؟
مع اطيب تحياتى وورونى شطارتكم عشان افرح بيكم

**sami_eleshmawi** · #**509** 09/11/2010, 08h34

تزداد قيمه الانسان بمدى اهتمامه بالاخرين
لذا اتقدم باحترامى وتقديرى لكل المشاركين بالمنتدى خاصه الاستاذ عادل
واتشرف بتقديم مشاركه متواضعه من تدوينى اتمنى ان تنال الاعجاب مع حبى واحترامى
سامى

**sami_eleshmawi** · #**510** 09/11/2010, 08h35

[تزداد قيمه الانسانبمدى اهتمامه بالاخرين
لذا اتقدم باحترامى وتقديرى لكل المشاركين بالمنتدى خاصه الاستاذ عادل
واتشرف بتقديم مشاركه متواضعه من تدوينى اتمنى ان تنال الاعجاب مع حبى واحترامى
سامى