الأدباتى

[حمدى شبانة]

الأدباتى والتعمير
ـــــــــــــــــــــــ

صحيح غريب أمر بلادى
متكوِّمين ... داخِل وادى
من عهد والدى وأجدادى
بيكرهوا عيشة الصحرا
الله الله يابدوى جاب اليسرا

الإنجليز نصبُو خيَّة
وقالوا : مصر زراعية
والصحرا مافيهاشى مَيَّة
ولافيها راح نِزرع ثمرة
الله الله يابدوى جاب اليسرا

وعشان كلامهُم مش معقول
أقول : بلدنا عرض وطول
الميَّة تِوصَل لها على طول
غير الآبار وغير المَطَرة
الله الله يابدوى جاب اليسرا

والحال أكيد حيكون أصلَح
لمَّا الصحارَى .. تُستَصْلَح
نبنى مصانِع و ( نفلَّح )
والدولة تبدأ من بُكرة
الله الله يابدوى جاب اليسرا
ــــــــــــــــــــــــــــــــــــــــــــــــــ ــــــــــ

[سعدالشرقاوى]

وتظل هكذا رسالة الادباتى
اضافة وبناء
دمتم ودامت روعتكم ادباتى العصر
عمنا /حمدى شبانه
لكم كل تقدير

[حمدى شبانة]

وأنت أيضاً واحد من الشعراء
الذين حافظوا معى على بقاء هذا الفن
الجميل ... فن الأدباتى

شكراً شاعر الوطن

أستاذ سعد الشرقاوى

[حمدى شبانة]

( الـنـيــل )

أنا الأديب إقرا ياجميل

تروينى ميَّة نهر النيل

شريان بلدنا ولينا سبيل

ونعمة من رب القُدرة

الله الله يابدوى جاب اليسرا
ــــــــــــــــــــــــــ
حِكمة زمان قالها ( هيرودوت )

من غير وجودك مصر تموت

ف الوادى بتمُر وبتفوت

تِسقى البشر تِروى الثمرة

الله الله يابدوى جاب اليسرا
ـــــــــــــــــــــــــــــ
لينا معاك أجمل حكايات

ومهما عُمرنا عدَّا وفات

بنفتِكِر أجمل أوقات

نسمة لطيفة ونور قمرة

الله الله يابدوى جاب اليسرا
ـــــــــــــــــــــــــــــ
حبيبى كان ويايا قاعد

على ضفِّتك ونتا الشاهد

ومهما عنَّك نِتباعِد

من تانى بتجيبنا الذكرى

الله الله يابدوى جاب اليسرا

[حمدى شبانة]

( عَـلَـم بَـلَـدنا )

ـــــــــــــــــــــــــ

رمز البلد الله أكبر

ألوان تلاتة بتعبَّر

ف أوِّلُه اللون أحمر

يرمز لشهدا ف كام ثورة

الله الله يابدوى جاب اليسرا
ــــــــــــــــــــــــــــــ

إسود دا لون الإستبداد

مُحتَل كان هدفُه استعباد

ف عصر ابويا والأجداد

على الوطن أيام غُبرة

الله الله يابدوى جاب اليسرا
ـــــــــــــــــــــــــــــــ

أبيض يالون المُستقبَل

( ياورد بلدى ) مابْيِدبَل

والنسر قلبه ماحيقبل

إلاَّ بمصر تعيش حُرَّة

الله الله يابدوى جاب اليسرا

[حمدى شبانة]

الأدباتى والتعليم
ـــــــــــــــــــــ

أنا الأديب والمولى عليم
أتمنى نهضة فى التعليم
عقل ولادنا يبقا سليم
دول هُمَّا مستقبل بُـكـرة
الله الله يابدوى جاب اليسرا
ــــــــــــــــــــــــــــــــــ

نهتم بعقول أولادنا
علشان مانخرُج ببلدنا
م الجهل اللى استعبـِدنا
من شرق آسيا خدوا عِبرة
الله الله يابدوى جاب اليسرا
ـــــــــــــــــــــــــــــــ

مناهِجنا محتاجة لتغيير
ودراسة يلزمها تـطـوير
ومُدرسين ينسوا الطباشير
الشَرح محتاج للخِبرة
الله الله يابدوى جاب اليسرا
ــــــــــــــــــــــــــــــــــــ