الأدباتى

[حمدى شبانة]

شخصيات الأدباتى
ــــــــــــــــــــــــــــــــ
جميلة بوحريد

أنا الأديب جاى الليلة
ومعايا شخصية ( جميلة )
لها ف الكفاح قصَّة طويلة
بسببها قامت الثورة
الله الله يابدوى جاب اليسرا

سِـت وإنَّما تسوَى رجال
قضت حياتها كفاح ونضال
بالثورة يتغيَّر الحـال
والإحتلال يطلَع برَّة
الله الله يابدوى جاب اليسرا

( حكموا عليها بالإعدام )
لاكن ضمير العالم قام
وخفِّفوا .. الحُكم قوام
( للسجن ) إقرا وخُد عبرة
الله الله يابدوى جاب اليسرا

العِبرة ثورة على جاير
أبطال ولادِك يا ( جزاير )
الإحتلال أصبح حاير
مِشى وساب أسوأ ذكرى
الله الله يابدوى جاب اليسرا

ذكرى تمنها صعب شديد
كان التمن ( مليون شهيد )
( جميلة ) شافت عهد جديد
من سجنها صبحت حُـرَّة
الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــ

محمد على

أدباتى أنا راجع تانى

شخصية هامة وعجْبانى
( باشا ) وأصلُه ( ألبانى )
ف عصره مصر كانت كُبرى
الله الله يابدوى جاب اليسرا

أسس لنا دولة قويَّة
غزا الجزيرة العربية
وصلت لِحَدْ ( الدرعيَّة )
جيوشُه دايماً منتصرة
الله الله يابدوى جاب اليسرا

علشان ماينعم بالسُلطة
قام للماليك دبَّر خطـة
ف القلعة جمَّعهُم أورطة
كانت مَدْبَحَة ضـد الأُمـرا
الله الله يابدوى جاب اليسرا

صاحب بصيرة ورأى سليم
أسس لنهضة ف التعليم
كفاية جهل وفِكر قديم
أرسل بعوث تدْرِس برَّة
الله الله يابدوى جاب اليسرا

للنهضة خطَّط وفكَّـر
قال الزراعة تتطوَّر
النيل بدال مابيتهدَّر
لابُد نبحث عن فـكـرة
الله الله يابدوى جاب اليسرا

حفر تِرَع تتملى ميَّة
وزادت المساحة الزراعية
جعل السودان مصريَّة
عرفت ليه ياللى بتقرا ؟
الله الله يابدوى جاب اليسرا

عظيم وجالنا فى ميعادُه
حَكَمنا هوَّة وأولادُه
وبعد منهُم أحفاده
لحد ما قامت ثورة
الله الله يابدوى جاب اليسرا
ـــــــــــــــــــــــــــــ

[حمدى شبانة]

شخصيات الأدباتى
ـــــــــــــــــــــــــــــــ
الحسين بن على

جدُّه النبى إقرا وتابع
وأبوه الخليفة الرابع
وأمُّه منها الخير نابع
آدى النسب آدى الأُسرة
الله الله يابدوى جاب اليسرا

ثاير وكان ف العزم شديد
قال الخلافة مش ل ( يزيد )
الحق راجع لينا أكيد
عزيمتى أقوَى من الصخرة
الله الله يابدوى جاب اليسرا

حق الخلافة ( لآل طالب )
وبيها أنا لازم اطالب
جَمَّع صحابه وحيحارب
وف كربلاء كانت الحسرة
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــ
شكسبير

الليلة جايب شخصية
أعمالُه كلَّها عالمية
كتب بلُغة إنجليزية
وف الأدب صاحب شُهرة
الله الله يابدوى جاب اليسرا

ف الشعر أبدع بـ ( سوناتات )
ومسـرحِـيَّـاتُـه بالـذات
إتمثِّلت ياما بلُغات
أنا شاهدت يا حضرات
( عطيل ) و ( ماكْبِثْ ) كام مرَّة
الله الله يابدوى جاب اليسرا

ياريت يا صُحبة نبقا نشوف
أعمال كتبها أديب معروف
( هاملت ) و ( حلم ليلة صيف )
دى مسرحيات مُعتبرة
الله الله يابدوى جاب اليسرا
ــــــــــــــــــــــــــــــــــــ

[حمدى شبانة]

شخصيات الأدباتى
ــــــــــــــــــــ
أحمد بن حنبل

شخصية الليلة اتحمِّل
سجنُه ( الخليفة ) شوف إتأمِّل
ف ( المحنة ) صامد وكمِّل
فقيه وكان صاحب فكرة
الله الله يابدوى جاب اليسرا

ولمَّا سجنُه ( المأمون )
قال دا رأيى مهما يكون
وربنا معايا ف العون
العلم نور لو كان قطرة
الله الله يابدوى جاب اليسرا

خرج من السجن وهوَّة
أكتر من الأوِّل قوَّة
و( مذهبُه ) و( علمُه ) أهوَّة
حيعيش لنا دُنيا وآخرة
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــــ
سيد درويش

أديب وأدباتى ... فنَّان
غاوى طرب غاوى ألحان
جايب معايا .... يا خلاَّن
فنان مجاش منه عشرة
الله الله يابدوى جاب اليسرا

فنان وقال أكون بادى
أترك ( قوالب ) أجدادى
لحَّن لنا ( بلادى بلادى )
وف الموسيقا عمل طفرة
الله الله يابدوى جاب اليسرا

لحَّن وغنَّالنا بصوتُه
قدِّم كمان ( أوبريتاتُه )
أصل الموسيقا دى حياتُه
و ( زورونى كل سنة مرَّة )
الله الله يابدوى جاب اليسرا

ــــــــــــــــــــــــــــــــــــــــ

[حمدى شبانة]

شخصيات الأدباتى
ــــــــــــــــــــــــ
نجيب محفوظ


أنا الأديب وبقيت محتار
من راسى تاهت الأشعار
عمَّال أدوَّر على أفكار
ولابد إنى ألاقى فكرة
الله الله يابدوى جاب اليسرا

الفكرة لسَّة حالاً جايَّة
شخصيَّة شُهرة مدوِّيّة
كتب لنا ( السكرية )
أعماله دايماً منتشرة
الله الله يابدوى جاب اليسرا

( نوبل ) أخدها لأنه مَتين
أبدع لنا ( بين القصرين )
عشنا معاه ( القاهرة 30 )
( بداية ونهاية ) فيها عِبرة
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــ
عنترة بن شداد

شخصية الليلة مغوار
( فارس ) شجاع ومشهور نار
ترك كمان لينا أشعار
فارس ومحسوب عالشُعرا
الله الله يابدوى جاب اليسرا

السيف ف إيده تزيد هيبتُه
( عاشق ) كتبلنا ف حبيبته
دى ( بنت عمُّه ) وقريبتُه
مع ( عبلة ) لُه قصَّة كبرى
الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــ

عمر المختار

أنا الأديب المتأدِّب
أفكارى دايماً تترتِّب
كل ليلة آجى أكتب
شخصية فى كل مرَّة
الله الله يابدوى جاب اليسرا

حقول لكم عن شخصيَّة
عاش ف الأراضى الليبية
عربى وأخلاقُه أبيَّة
قال للطلاينة اخرجوا برَّة
الله الله يابدوى جاب اليسرا

كافح من الأعوام عشرين
ضد الغُزاه ( الإيطاليين )
قبضوا عليه المحتلِّين
وأعدموا ( أسد الصحرا )
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــ
عباس العقاد

شخصية الليلة يا إخوان
( أديب ) ومولود فى ( أسوان )
أسِّس ( جماعة الديوان )
و ( عبقرياتُه ) لها شُهرة
الله الله يابدوى جاب اليسرا

دخَل ( معارك أدبيَّة )
مع ( طَهَ ) و ( الرافعى ) قويَّة
ما أخدشى غير ( إبتدائيَّة )
عملاق ومنُّه ناخد عبْرة
الله الله يابدوى جاب اليسرا