طلبات نوتة أ / عادل صموئيل الجزء الثانى

[عادل صموئيل]

اخى العزيز عاصم المنشاوى

اولا بالنسبة لموضوع حذف المشاركات دى خسارة لأن انتم بتسألوا اسئلة وانا بجاوب بكلام ممكن يهم ناس كتير هو ممكن الاخ العزيز الألاتى يحطها فى مكانها المناسب بعد ما المنتدى يرجع لحاله
لن انا لما حد من حبايبى والمتعاملين المسمتمرين معايا بيسألنى السؤال بيسألنى السؤال هنا لأن ده المكان اللى انا بدخله كذا مرة فى اليوم لو سألأ السؤال فى مكان تانى ممكن انا ما اشوفو إلا صدفة بعد فترة طويلة وممكن وسط الزحمة ما اشوفوش خالص لذلك انا كمان برد الرد هنا ...
انا دايما لما اى حد بيفتح موضوع فيه رد عندى بيكون سريع ورد بيحتاج انى افكر شوية واحضر كلام مفيد وانا عايز اقول تعقيب مهم على كلامهم وبرضو محتار احط التعقيب هنا ولا فى مكان تانى وممكن هم الاتنين مايشوفوش التعقيب على كلامهم
اما بالنسبة لأم كلثوم وهى فى قمة مجدها لما تتعامل مع بليغ اول مرة فى حب ايه وكل ليلة وكل يوم ثم انساك .. وبليغ ساعتها كان صغير اوى فى السن يعنى نص عمر عبد الوهاب ده دليل انو عبقرى وانها اعجبت بعبقريته .. يعنى الناس دول كان من الصعب حد يقنعهم بنفسه لكن لو اقتنعوا بيشوفوه حايعمل ايه بعد كده ..
الفنانين العمالقة كانوا بيحرصوا انهم يفضلوا على القمة بمعنى يبقوا متمشين مع العصر بس فى اطار الاستايل بتاعهم بحيث ان المستمع بتاعهم يتجدد دايما .. يعنى مثلا مثلا سنة 1948 كان نوعية جمهور ام كلثوم جمهور معين فى سن معين وابتدوا يعجزوا .. الذكاء جذب الشباب لكن بدون فقد الكبار .. واخطر شىء المحافظة على خطها ونكهتها العامة وتبقى عصرية .. الآلات الجديدة ابتدت من عبد الوهاب يعنى ماكنتش مقتنعة بالجيتار لكن عبد الوهاب قال لها نجرب
والبروفات كانت مش اقل من خمسين بروفة قال لها اسمعيه بالعود الاول بعدين نجرب الجيتار وانتى حددى
طبعا لما الجمهور سمع الجيتار اتجنن لأن شىء غير مسبوق مع ام كلثوم .. لكن الجيتار كان تدخله محدود فى حدود الصولو فقط يعنى هى بعد الصولو غنت زى ما بتغنى ... لما نجحت تجربة الجيتار جاء بليغ وحب يعمل حاجة احدث راح مدخل الاكورديون وبرضو ام كلثوم كانت متحفظة وقال لها نجرب وانتى قررى ثم جاء الساكس قال لها نجرب الساكس هى نفسها ماكانتش تعرف ايه الساكس ده يعنى فوجئت بسمير سرور جه بيتها فى البروفة وكان اول واحد ييجى يعنى كان طبعا اول يوم يتعامل مع ام كلثوم لازم ييجى بدرى عن الميعاد بساعة هى فو جئت بيه قاعد ومعاه شنطة وقالت لو مين حضرتك قال لها انا عازف ساكس قالت ايه الساكس ده وكانت مش مقتنعة بيه اساسا لكن بليغ اقنعها اما بالنسبة للكورال ماكنتش اوى مرة يعنى من ايام غنى لى شوية كان الاناشيد كلها فيها كورال وفى حكم علينا الهوى والثلاثية المقدسة كان فيه كورال بس هو مشكلة ام كلثوم انك تحاول تقنعها بطريقة غير مباشرة يعنى ماتجيش تقول لها نروح غرب حاتعند لكن قول لها فيه اربع اتجاهات شمال وجنوب وشرق وغرب وانت تحاول انك تخليها تشوف الغرب احلا حاجة تبقى انت مشيت كلامك وهى مقتنعة انها هى اللى مشت كلامها
المهم واخطر شىء فى الموضوع ان النهاردة بعد خمسين سنة انك تحس ان الخيارات كانت جميلة اوى
يعنى انا كارم محمود مثلا كان صديق شخصى ليا لكن عمل حاجة غلط فى اواخر ايامه اوشكت او كادت ان تضيع تاريحه .. يعنى واحد منتج كاسيت اقنعه انو يعدي غناء كام اغنية بتوزيع جديد ومنهم على شط بحر الهوا وعنابى
وايقاع غربى حديث وعك انا النهاردة لو سمعت واحدة منهم بيحصل لى اشمئزاز والاخطر اقنعوه انو يسجلهم فيدو وطلع لابس باروكة مش حلوة ولابس جاكتة حمرا لونها فج جدا ما يتناسبش مع سنة يعنى افسد شكله ده الفرق بين التطوير والافساد وللعلم كل العمالقة فضلوا عمالقة من حاجتين اولا المحافظة على استايل معين محدد فى كل شكلهم وشغلهم تانى حاجة التطوير يكون فى اضيق الحدود عشام عدم افساد الشكل الاولانى
والتطوير ده مرة حصل مع عبد الحليم يعنى احد اصدقاء السودء قال لو ماتيجى تغير الفرقة وتعمل فرقة زى ديميس روسوس كان مكسر الدنيا فى اوروبا وقتها قال لو عشان تبقى عالمى زيو .. راح عمل فى وصلة فى حفلة كذا اغنية من القدام القصيرين زى اهواك على اتنين اورج واتنين جيتار ودرامز وكانت وصلة تحت الزفت ب حمسين درجة وهو نفسو لما سمع نفسو اشمئز من نفسو وامر بعدم اذاعة القرف اللى حصل ده لأن المطرب العربى لازم يكون تحته كمنجات بتعمل ارضية ودى بتمثل خمسين % من حلاوة صوته والاداء بتاعه لما تشيل الكمنجات دى بيبقى المطرب بيغنى فى الهوا بدون ارضية يعنى مش ماشى على شارع ولكن كأنو بالونة الهوا بيحركها زى ماهو عايز وبعدين الباند الغربى بيعمل ايقاعات غربية رومبا وحيرك وحاجات كده لكن معظم الاغانى محتاجة الوحدة الكبيرة والملفو والمقسوم وكل جملة لو تلاحظ بتحتاج تغيير فى الايقاع لكن الباند بيعمل الاغنية كلها ايقاع واحد
مع اطيب تحياتى

[DoaaRady]

ممكن اعرف انا لية كل ما اجي احمل نوتة يقولي المرفقات مخفية؟؟؟؟؟؟؟

الاخ العزيز
المرفقات مخفية مؤقتا عطل فنى فى السرفر بتاع المنتدى وان شاء الله تتحل المشكلة قريبا

مع اطيب تحياتى

[الألآتى]

إخوانى وأساتذتى

بداية .. أحيى الأستاذ عادل صموئيل لمجهودة الواضح والمستمر فى القسم

كما أحيى الأستاذ عاصم المنشاوى على ملاحظته وتقديره للأمور

وبعد إذنكم لى كلام معكم فى هذا الشأن

أنا أعرف تماماً أن قسم النوت بيتكم الثانى .. ولا تتصورون العيش خارجه .. لكن

هل تتذكرون موضوع طلبات النوتة الأول للأستاذ عادل صموئيل ؟

هذا الموضوع تخطى عدد صفحاته 660 صفحة .. هل تتخيلون معى يعنى إيه 660 صفحة ؟

هذا الموضوع تضخم بشدة بسبب المناقشات خارج السياق

حاولت كثيراً أن أقوم بترتيب مشاركات الموضوع .. وتجنيب المشاركات الخارجة عن موضوع النوت

لكنى فشلت .. وكلما حاولت .. أفشل وأبوء بخيبتى التقيلة

لأنى ببساطة شديدة .. كلما إنتهيت من ترتيب عدد من الصفحات .. أجد أن ضعفهم أضيف إلى الموضوع

ولذلك .. لجأ الأستاذ عادل صموئيل لفتح موضوع طلبات النوتة ( الجزء الثانى )

وماحدث فى الجزء الأول .. يحدث الأن فى الجزء الثانى .. فماذا أفعل بالله عليكم

إذا كنتم لا تستطيعون المناقشة خارج قسم النوت .. فلا بأس .. إفتحوا موضوع منفصل للمناقشة داخل القسم

لكن .. لا تضيفوا صفحات غير ذات فائدة لموضوع طلبات النوتة ..

إتبحبحوا براحتكم .. لكن خارج موضوع طلبات النوتة .. لأنى لن أستطيع ملاحقة زيادة الصفحات الرهيب الذى يحدث

تقبلوا جميعاً تحياتى وتقديرى

اخى العزيز المايسترو الألاتى
والله ونا كمان معاك بس فيه مشكلة
الاخ العزيز جدا الريحانى فتح فى قسم الدروس موضوع عن ذكرياتى فى الزمن الجميل من 5 ايام وابتديت اكتب فيه ماحدش دخله غير عضوين فقط
انا زيك مش عارف اعمل ايه
وبينى وبينك الاعضاء الاعزاء عارفين انى متواجد هنا 24 ساعة زى ماتسألأ على فلان يقول لك اى وقت تلاقيه على القهوة الفلانية
مع اطيب تحياتى عادل صموئيل

[عادل صموئيل]

احبائى
بناء على طلب الاخت العزيزة الاستاذة emanmuisictaymou
اقدم لكم نوتة اغنية اطفال
اسمها

فى جنينة الجيوان فى الجيزة

اقدم النوتة الموسيقية ومعاها الملف الصوتى وطبعا بعد اذن الاخت العزيزة ايمان بنهديها لكل مدرسى الموسيقى بالذات بتوع ابتدائى او اعداى هى اغنية دمها خفيف اوى وكوبليه بيتكرر كذا مرة

مع اطيب تحياتى

[AsserGad]

ألف شكر

[عادل صموئيل]

احبائى
اقدم تحية للجيش المصرى

اغنية تعظيم سلام



واهديها لكل الاحباء مدرسى الموسيقى انا مقدم النوتة على رابط والملف اصوتى على رابط تانى عشان طبعا اللى ماسمعوهاش قبل كده
وماتنسوش تقدموا الشكر للأخت العزيزة emanmusictaymou هو الاسم طويل شوية انا بركب تاكسى من اوله لآخره
وطالما جبنا سيرة الجيش المصرى العظيم
تخيل سيادتك لو اسرائل استغلت الفوضى والبهدلة اللى احنا فيها محبت تحقق حلمها القديم دولة اسرائيل الكبرى من الفرات الى النيل وهجمت علينا لأن الجيش ممكن هى تتخيل انو مشتت فى كل محافظة مش واقف كلو على الجبهة السؤال ... الاخوة الاعزاء اللى كل يوم نازلين ضرب فى الجيش والشرطة ساعتها حايقفوا مع الجيش ضد اسرائيل ولا يضبروا الجيش من الخلف عشان يسهلوا مهمة اسرائيل ؟؟؟ وعجبى

مع اطيب تحياتى

[armendo]

اخى العزيز عادل صمؤيل...اتقدم اليك والى كل اخوتى اقباط مصر والعالم بإجمل التهانى بمناسبة حلول عيد الميلاد المجيد اعاده الله عليك وعلينا بكل الصحه والخير والسعاده اللهم آمين.

احمد (ارمندو)

[إيمان.]

ميلاد مجيد لكل الاخوة المسيحيين عامة وللاستاذ عادل بشكل خاص ..اعاده الله عليكم بالصحة والسرور...وكل عام وجميعكم بخير.

[muhamadibra]

المشاركة الأصلية كتبت بواسطة armendo

اخى العزيز عادل صمؤيل...اتقدم اليك والى كل اخوتى اقباط مصر والعالم بإجمل التهانى بمناسبة حلول عيد الميلاد المجيد اعاده الله عليك وعلينا بكل الصحه والخير والسعاده اللهم آمين.

احمد (ارمندو)

اضم صوتي لصوت الاخ احمد و اخص جيراني واصدقائي المسيحيين وزملاء العمل
د محمد ابراهيم

[عادل صموئيل]

اشكركم احبائى كلكم
وربنا يخلى السنة الجديدة احسن من السنة السوداء الماضية
وربنا يستر فى العيد

مع اطيب تحياتى