أطلب تحليل أغنية ادى الميعاد لمحمد فوزى

**شريف-زغيب** · #1 15/12/2010, 18h36

أولا هى ليست الاغنية الوحيدة التى سأطلبها لمعرفة مابها من كنوز ومقامات وابداعات موسيقية ولكن هناك الكثير.
اغنية ادى الميعاد اعتبرها من ضمن افضل الاغانى لمحمد فوزى ان لم يختلف معى الاصدقاء.
اعذرونى لأننى لست مختصا يعنى لو خرجت كلمة كده ولا كده متعاتبونيش عليها انا هاقول اللى انا حاسه ناحية الاغنية.
احس انها اغنية جديدة فى وقتها فيها شغل من فوزى وإن كان أغلب تلحينها بالكمنجات وأحس انه لحنها كما لو هناك ساعة تمشى او واقفة يعنى احس الحيرة فى لحنه.
هذه الاغنية تعشقها الشحرورة صباح حيث سمعتها فى حديث اذاعى فى برنامج تسجيلات من زمن فات قالت انها تعشق هذه الاغنية لمحمد فوزى وتمنت ان تغنيها
اتمنى من المختصين الموسيقيين فى المنتدى تحليل الاغنية واتحافنا بدراستها موسيقيا

**غواص النغم** · #2 16/12/2010, 13h30

إختيار جميل
للجميل
محمد فوزي
ودائما ما اخلط بينها واغنية جميلة اخري له من كلمات صالح جودت:
انتي ياساعة قوليلي الحق وانت يا قلبي انا سامع دق
ممكن لان الاغنيتين عن الساعة وانتظار الحبيب
في انتظار
كلمات الاغنية

للمساعدة في تحليل الاغنية لمن يريد تحليلها
والذي نقول له مسبقاً:

بقى ان نذكر ان الاغنية من فيلم :
عدو المرأة : 1946 مع صباح
ومن كلمات مصطفى السيد

تحياتي

**شريف-زغيب** · #3 16/12/2010, 19h28

ادى الميعاد قرب ولا جاتشى

وصبحت أنا تايه معرفشى
الساعة واقفة ولا بتمشى
ادى الميعاد الميعاد قرب
الفكر بالوقت بيجرى يسبق خيالى لميعادها
ويهون عليا عمرى واسعد امالى بودادها
جمالها.. رقتها. . دلالها.. خفتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب
موهوم وخايف ليبان حبى ساعة لقايا وياها
دى الساعة بدق وقلبى بيحسب الوقت معاها
قوامها..حلاوتها..كلامها..شقاوتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب
اللى تشوف الحسن عينيه يميل وتكتر اوهامه
ويمر كاس الحب عليه يشرب من الكاس احلامه
عيونها..نظرتها..جفونها..لفتتها
على كل دول انا مقدرشى وصبحت تايه معرفشى
الساعة واقفة ولا بتمشى
ادى الميعاد الميعاد قرب

ادى الميعاد:
ك:مصطفى السيد
ل وغ :محمد فوزى.

**الألآتى** · #4 16/12/2010, 23h02

بسم الله نبدأ فى تحليل أغنية ( أدى الميعاد )

كلمات : مصطفى السيد

ألحان وغناء : محمد فوزى

بدأ اللحن بمقدمة موسيقية سنباطية من مقام الراست .. ويظهر أن عمنا فوزى .. رجع لصوابه سريعاً فظهر أسلوبه المميز فى الجملة الموسيقية التالية .. الجملة السريعة الرشيقة

ويغنى من الراست ( أدى المعاد قرب ولا جاتش ) ..

ولكنه ينتقل لمقام جديد عند ( الساعة واقفة ولا بتمشى )

المقام الجديد هنا هو ( النوا أثر ) .. وتحويلة قصيرة جميلة للكورديللى عند نهاية المذهب

المهم ..

نفس موسيقى المذهب .. ولكنه يسلم للنهاوند .. ويغنى ( الفكر بالوقت بيجرى يسبق خيالى لمعادها )

وتحويلة للحجاز .. ليمهد للعودة للنوا أثر ثم الكورديللى لينهى الكوبليه

موسيقى جديدة .. يبدأها بسلم ملون ( كروماتيك ) ثم جنس نهاوند ..

ويغنى من نفس الطريق .. ( موهوم وخايف ليبان حبى ساعة لقايا وياها )

واضح طبعاً .. سر إختيار فوزى لهذه الجملة الكروماتيكية .. ليؤكد حالة الوهم والخوف .. شغل محترفين

وبعده يعود لنفس السيناريو ونفس الطريق .. للنوا أثر ثم الكورديللى لينهى الكوبليه

موسيقى جديدة من مقام العجم .. أو الدو ميجور .. ويغنى ( إللى تشوف الحُسن عينيه .. يميل وتكبر أوهامه )

والملاحظ هنا .. أن عمنا فوزى لم يكتفى بالعجم فقط .. ولكنه حود على مقام ( الشوق أفزا ) من درجة الدو ..

والشوق أفزا عبارة عن جنس عجم وجنس حجاز .. وخلاص .

يعنى غنى ( إللى تشوف الحُسن عينيه ) من العجم .. وغنى ( يميل وتكبر أوهامه ) من الشوق أفزا .. ملحن بيفكر ويخطط

ونفس الموضوع والسيناريو .. لينهى الكوبليه والأغنية ..

يبقى أن نذكر أن الإيقاعات المستخدمة غربية .. مثل الفوكس تروت والسلو روك .. فيما عدا الشطرة الأولى من المقدمة .. فنجده إستعمل إيقاع السنباطى

أرجو أن أكون وُفقت فى هذا التحليل المتواضع

**شريف-زغيب** · #5 17/12/2010, 11h45

رائع يابوحسام وتحليل متميز وضح لنا مجموعة المقامات الموسيقية التى وضعها محمد فوزى والتى تناسب كلمات مصطفى السيد

.
وشكرا على التلبية الجميلة.
ولكن انا استفسر عن شئ يابوحسام:
حضرتك ذكرت بأن المقام الجديد وهو النوا أثر وتحويلة قصيرة للكورديللى عند نهاية المذهب هى فى الكلام الاتى:
جمالها.. رقتها. . دلالها.. خفتها
على كل دول انا مقدرشى وصبحت تايه معرفشى،
قوامها..حلاوتها..كلامها..شقاوتها
على كل دول انا مقدرشى وصبحت تايه معرفشى،

عيونها..نظرتها..جفونها..لفتتها
على كل دول انا مقدرشى وصبحت تايه معرفشى

هل هذه هى المقصودة؟

**الألآتى** · #6 17/12/2010, 11h51

النوا أثر موجود بالتحديد عند ( على كل دول أنا ماقدرش .. وصبحت تايه ماعرفش )

والكورديللى عند النهاية ( أدى المعاد قرب ) ويسمى أيضاً حجاز كار كورد

**محمد محمد صادق** · #7 22/05/2012, 08h40

عزيزي محمد بك الآلاتي النوأثر مش من فصايل النهاوند ده مقام مستقل زي مقام النكريز الفرق بينهم ان النوأثر بيعمل حجاز على النوى و النكريز كرد على النوى ... تحياتي

**الألآتى** · #8 22/05/2012, 17h34

اقتباس:

المشاركة الأصلية كتبت بواسطة محمد محمد صادق

عزيزي محمد بك الآلاتي النوأثر مش من فصايل النهاوند ده مقام مستقل زي مقام النكريز الفرق بينهم ان النوأثر بيعمل حجاز على النوى و النكريز كرد على النوى ... تحياتي

أشكرك أخى الكريم على محاولة التصحيح .. ولكنى ياأخى العزيز لم أقل أنه من فصيلة النهاوند .. قلت بالحرف الواحد .. أنه من مشتقات النهاوند

ويسميه البعض ( نهاوند رومى ) لأنه عبارة عن سلم دو مينور بحساسه .. مع رفع درجته الرابعة نصف تون .. فتصبح فا دييز

كما أن حضرتك تقول أن النكريز بيعمل كرد على النوا .. والصحيح أنه يعمل نهاوند على النوا .. وليس كرد

أشكرك مرة أخرى لمحاولة التصحيح والتوضيح .

**محمد محمد صادق** · #9 24/05/2012, 20h57

ابو حسام العزيز عندك حق النكريز الفرع نهاوند لكنه جنس منفصل عن النهاوند مالوش أى علاقه بيه و هو احد الأجناس التسعة فى الموسيقى الشرقية اللي مبنى عليها المقامات الموسيقية صحح المعلومه ان كنت اخطأت ... تحياتي